Unaj k-yaabiltik baʼax toj yéetel tuláakal k-puksiʼikʼal
Unaj k-yaabiltik baʼax toj yéetel tuláakal k-puksiʼikʼal
«Tsʼoʼok a yaabiltik le baʼax tojoʼ.» (HEB. 1:9)
1. ¿Baʼax jeʼel u yáantkoʼon xíimbal «tiʼ toj bejoʼo[beʼ]»?
JÉEOBAEʼ ku nuʼuktikoʼon yéetel u Tʼaan bey xan yéetel u kiliʼich muukʼ utiaʼal ka xiʼikoʼon «tiʼ toj bejoʼob» (Sal. 23:3). Baʼaleʼ tumen kʼebanoʼoneʼ séebaʼan k-tséelel tiʼ yaanal bej. Le oʼolal utiaʼal k-kaʼa jóokʼol teʼ «toj bejoʼ» unaj k-jach tsʼáaik k-óoliʼ. ¿Baʼax jeʼel u yáantkoʼon k-beeteʼ? Letiʼe k-beetik jeʼex tu beetil Jesusoʼ, letiʼeʼ tu yaabiltaj baʼax toj (xokaʼak Hebreob 1:9).
2. ¿Baʼax u kʼáat u yaʼal le «toj bejoʼob[oʼ]»?
2 Tuukulnakoʼon tiʼ le tʼaan «toj bejoʼo[boʼ]». Le bejoʼob ku chʼaʼchiʼitaʼal teʼelaʼ mejen tʼuʼul bejoʼob nuʼutʼtak. Baʼaleʼ ¿baʼaxten ku yaʼalaʼal «toj»? Tumen beetaʼanoʼob jeʼex u nuʼuktik u justicia Dioseʼ. Le tʼaan hebreo yéetel griego ku suʼutul «tojoʼ» ku tsʼáaik naʼatbil u beetaʼal baʼax maʼalob mantatsʼ. Tumen unaj k-kʼubik k-óol tiʼ Jéeobaeʼ, unaj k-chaʼik u nuʼuktikoʼon teʼ bej ku yeʼesiktoʼonoʼ (Jer. 50:7).
3. ¿Bix jeʼel k-maas kʼaj óoltik baʼax tojeʼ?
3 Wa k-kʼáat lúubul utsil tu táan Jéeobaeʼ, unaj k-tsʼáaik k-óol k-beet baʼax ku yaʼalik (Deu. 32:4). Baʼaleʼ táanileʼ, unaj k-xokik le Biblia utiaʼal k-maas kʼaj óoltikoʼ. Wa maas k-kʼaj óol Dioseʼ, yaan k-uʼuyik maas naatsʼ yaniloʼon tiʼ letiʼ yéetel yaan k-maas yaabiltik baʼax toj (Sant. 4:8). Bey túunoʼ, ken k-chʼaʼtukult k-beetik wa baʼaxeʼ yaan k-chaʼik u nuʼuktikoʼon u Tʼaan.
Unaj k-kaxtik le toj kuxtal tu táan Diosoʼ
4. ¿Baʼax u kʼáat u yaʼal u kaxtik máak le toj kuxtal tu táan Diosoʼ?
4 (Xokaʼak Mateo 6:33.) ¿Baʼax u kʼáat u yaʼal u kaxtaʼal le toj kuxtal tu táan Jéeobaoʼ? ¿Chéen wa u kʼáat u yaʼal u kʼaʼaytaʼal le maʼalob péektsiloʼ? Maʼatech. Baʼaxeʼ yaan uláakʼ baʼax unaj u beetaʼal. Utiaʼal u kʼamik le meyaj k-tsʼáaiktiʼoʼ unaj k-beetik sáamsamal baʼax ku yaʼalik. Le máaxoʼob kaxtik le toj kuxtal uts tu tʼaan Diosoʼ, unaj u beetkoʼob le baʼax ku yaʼalik le tekstoaʼ: «Búukinteʼex le túumben wíinikoʼ beetaʼan jeʼel bix u kʼáat Jajal Dioseʼ yéetel ku chíikbesaʼal yéetel junpʼéel kuxtal tu jaajil toj yéetel kiliʼich» (Efe. 4:24).
5. ¿Baʼax jeʼel u yáantkoʼon ken lúubuk k-óoleʼ?
5 Baʼaleʼ kex ka k-jach tsʼáa k-óol k-beet baʼax ku yaʼalik Dioseʼ, yaan kʼiineʼ k-beetik baʼaxoʼob maʼ maʼalobiʼ. ¿Baʼax jeʼel u yáantkoʼon utiaʼal maʼ u lúubul k-óol k-yaabilt baʼax maʼalobeʼ? (Pro. 24:10.) Junpʼéel baʼax jeʼel u yáantkoʼoneʼ letiʼe ka payalchiʼinakoʼon sáamsamal yéetel «u jaajil yóol k-puksiʼikʼal[oʼ]» bey xan yéetel «junpʼéel [fe] jach jeetsʼel» (Heb. 10:19-22). U jaajileʼ tuláakal le máaxoʼob meyajtik Dios, le táan u páaʼtik u binoʼob kuxtal teʼ kaʼan bey xan le táan u páaʼtik u pʼáatloʼob kuxtal way Luʼumeʼ, unaj u tsʼáaik u fejoʼob tiʼ Cristo, le máax tu tsʼáaj u kuxtal t-oʼolal yéetel ku beetik u Nojoch j-Kʼiiniloʼ (Rom. 5:8; Heb. 4:14-16). Apóstol Juaneʼ tu yaʼalaj: «U kʼiʼikʼel Jesucristo u Paal [Dioseʼ] ku pʼoʼikoʼon tiʼ tuláakal kʼeban» (1 Juan 1:6, 7). Yéetel le Bibliaoʼ ku yaʼalikeʼ kex k-kʼeban jach chakeʼ yaan u pʼáatal «sak bey piitsʼeʼ». ¿Máasaʼ jach ku kiʼimaktal k-óol yoʼolal u kuxtal Jesús tu tsʼáaj Jéeoba utiaʼal u salvartikoʼonoʼ? (Isa. 1:18.)
Unaj k-ilik bix yanil u nuʼukul k-baʼateʼel
6. ¿Baʼaxten jach unaj k-ilik bix yanil u nuʼukul k-baʼateʼel?
6 Mantatsʼ unaj k-tsʼáaik le nuʼukul ku «kanáantik u tseem» máakoʼ (Efe. 6:11, 14). Kex wa maʼ úuch k-kʼub k-kuxtal tiʼ Jéeoba bey xan wa tsʼoʼok u xáantaleʼ, jach unaj k-ilik sáamsamal bix yanil le u nuʼukul k-baʼateʼel u tsʼaamajtoʼon Diosoʼ. ¿Baʼaxten? Tumen tsʼoʼok u puʼulul Satanás yéetel u kʼasaʼan angeloʼob way Luʼumeʼ (Apo. 12:7-12). Letiʼeʼ jach pʼujaʼan tumen u yojel chéen junpʼíit kʼiin pʼaatal tiʼ. Le oʼolal tsʼoʼok u joʼopʼol u maas chʼaʼpachtik u kaajal Dios. Bey túunoʼ maas jach kʼaʼabéet k-tsʼáaik mantatsʼ le nuʼukul «kanáantik u tseem» máakoʼ.
7. ¿Baʼax unaj k-beetik utiaʼal maʼ k-pʼatik le nuʼukul kanáantik k-tseemoʼ?
7 Jeʼex juntúul soldado úuchjeakil kʼaʼabéet u pixik u tseem utiaʼal u kanáantik u puksiʼikʼaleʼ, toʼon xaneʼ kʼaʼabéet k-yaabiltik baʼax uts utiaʼal k-kanáantik k-puksiʼikʼal. ¿Baʼaxten? Tumen yoʼolal le kʼebanoʼ, maas ku túulchʼintkoʼon k-beet baʼax maʼ maʼalobiʼ (Gén. 8:21). Jach ku tuus yéetel sen kʼasaʼan (Jer. 17:9). Le oʼolal jach unaj k-kaʼansik yéetel k-nuʼuktik tubeel. Mix junsúutuk unaj k-pʼatik le nuʼukul kanáantik k-tseemoʼ. Bey túunoʼ, maʼ unaj k-náaysik k-óol yéetel baʼaxoʼob u pʼekmaj Diosiʼ mix u joʼopʼol k-tuukul tiʼ baʼaloʼob kʼaastak. Maʼ unaj xan k-máansik yaʼab tiempo chéen utiaʼal k-chaʼantik televisioniʼ. Baʼaxeʼ unaj k-beetik tuláakal le ku páajtal utiaʼal k-kiʼimakkúuntik u yóol Jéeoba yéetel baʼaxoʼob k-beetik. Baʼaleʼ ¿kux túun wa k-beetik wa k-tuklik baʼax maʼ maʼalobiʼ? Maʼ unaj k-tuklik wa maʼ tu páajtal k-beetik baʼax maʼalobiʼ, yéetel u yáantaj Dioseʼ jeʼel u páajtal u seguer k-beetkeʼ (xokaʼak Proverbios 24:16).
8. ¿Baʼaxten kʼaʼabéettoʼon «le [fe] bey jeʼel bix junpʼéel [escudoeʼ]»?
8 Ichil le u búukil baʼateloʼ táakaʼan xan «le [fe] bey jeʼel bix junpʼéel [escudoeʼ]», lelaʼ jach kʼaʼabéet utiaʼal k-tupik «tuláakal u tʼabaʼan [flechaʼob] Kʼaasilbaʼal» (Efe. 6:16). Le fejoʼ ku yáantkoʼon utiaʼal maʼ k-jóokʼol tiʼ le toj bej biskoʼon teʼ kuxtal minaʼan u xuuloʼ. Baʼaleʼ unaj xan k-jach yaabiltik Jéeoba, beyoʼ yaan k-maas yaabiltik baʼax toj. Tsʼoʼoleʼ k-concienciaeʼ jeʼel xan u yáantkoʼoneʼ. ¿Bix jeʼel u yáantkoʼon utiaʼal k-eʼesik k-yaabiltmaj baʼax tojeʼ?
Unaj u yantaltoʼon junpʼéel maʼalob conciencia
9. ¿Baʼax utsiloʼob ku taasik u yantal tiʼ máak junpʼéel maʼalob conciencia?
9 Le kʼiin ka okjaʼanajoʼonoʼ t-kʼáataj tiʼ Jéeoba «junpʼéel tuukul toj» wa junpʼéel maʼalob conciencia (1 Ped. 3:21). Yoʼolal k-fe tiʼ u kʼiʼikʼel Jesús tu wekaj t-oʼolaleʼ ku perdonartaʼal k-kʼebanoʼob, leloʼ ku tsʼáaik u páajtalil k-kaʼa bisikba yéetel Dios. Baʼaleʼ utiaʼal k-pʼáatal tu bejil le salvacionoʼ unaj u yantaltoʼon junpʼéel maʼalob conciencia mantatsʼ. Ken u yaʼaltoʼon wa ken u beet k-uʼuyik yaan baʼax maʼ maʼalob táan k-beetkeʼ, unaj u kiʼimaktal k-óol. ¿Baʼaxten? Tumen leloʼ ku yeʼesikeʼ maʼ kʼaschajkiʼ, baʼaxeʼ láayliʼ maʼalob bix u nuʼuktikoʼon utiaʼal k-beetik baʼax ku yaʼalik Jéeobaeʼ (1 Tim. 4:2). Baʼaleʼ yaan uláakʼ bix u yáantkoʼon le conciencia utiaʼal k-yaabiltik baʼax tojoʼ.
10, 11. 1) Aʼal junpʼéel baʼax eʼesik u yutsiloʼob u beetik máak baʼax ku yaʼalik u conciencia nuʼuktaʼan tumen le Bibliaoʼ. 2) ¿Baʼaxten ku taasik kiʼimak óolal u bisik máak junpʼéel toj kuxtal?
10 Wa k-beetik baʼax kʼaaseʼ, k-concienciaeʼ jeʼel u takik k-pooleʼ wa jeʼel u chiʼichnakkúuntikoʼoneʼ. Lelaʼ bey úuchik tiʼ juntúul táankelem xiʼipal tu xulaj u xíimbal «tiʼ toj bejoʼob» teʼ kʼiinoʼob káajal ku beetik u kʼaj óoltik Diosoʼ. Suukchaj u chaʼantik pornografía yéetel u tsʼuʼutsʼik marihuana. Le oʼolal ken xiʼik kaʼach teʼ muchʼtáambaloʼoboʼ ku chiʼichnakkúuntaʼal tumen u conciencia, yéetel ken jóokʼok kʼaʼaytajeʼ ku yuʼubik maʼ maʼalob baʼax ku beetkiʼ. Ka tu xulaj u meyajtik Dios. Letiʼeʼ ku yaʼalik: «Maʼ tin tuklaj wa yaan u seguer u chiʼichnakkúuntiken in conciencia yoʼolal le baʼaxoʼob kin beetkoʼ. Kex beyoʼ xáanchaj kanpʼéel jaʼaboʼob táan in beetik baʼaloʼob kʼaastak». Ka máan kʼiineʼ joʼopʼ u tuklik u suut tu kaʼatéen ichil u kaajal Jéeoba. Kex ku tuklik maʼ kun uʼuybil tumen Jéeobaeʼ, payalchiʼinaj tiʼ yéetel tu kʼáataj ka perdonartaʼak. Maʼ máanak mix diez minutos ka bin xíimbaltbil tumen u maamaiʼ, ka líiʼsaʼab u yóol utiaʼal ka xiʼik tu kaʼatéen teʼ muchʼtáambaloʼoboʼ. Tu beetaj le baʼax aʼalaʼabtiʼoʼ yéetel tu kʼáataj tiʼ juntúul anciano wa jeʼel u tsʼaʼabal xook tiʼeʼ. Ka máan kʼiineʼ okjaʼanaji, bejlaʼeʼ jach ku tsʼáaik nib óolal tiʼ Jéeoba úuchik u salvartaʼal u kuxtal.
11 ¿Máasaʼ maas ku taasik kiʼimak óolal u bisik máak junpʼéel toj kuxtal? Wa k-yaabiltik le baʼax ku yaʼalik Dios yéetel k-ilik k-tsʼáaik ichil k-kuxtal sáamsamaleʼ, yaan k-uʼuyikba maʼalobil ikil k-kiʼimakkúuntik u yóol Dios yéetel le baʼaxoʼob k-beetkoʼ. Chéen máans ta tuukul. Táan u taal u kʼiinileʼ, mix máak kun chiʼichnakkúuntbil tumen u conciencia, tumen tuláakal máakeʼ yaan u beetik baʼax maʼalob jeʼex u beetik Jéeobaeʼ. Baʼaleʼ bejlaʼeʼ u kʼiinil k-maas yaabiltik le baʼax toj desde t-puksiʼikʼal utiaʼal k-kiʼimakkúuntik u yóol Jéeoba (Pro. 23:15, 16).
12, 13. ¿Bix jeʼel k-kaʼansik maʼalob k-concienciaeʼ?
12 ¿Bix jeʼel k-kaʼansik k-concienciaeʼ? Unaj k-xokik le Bibliaoʼ, le jóoʼsaʼaniloʼoboʼ yéetel k-beetik le baʼax ku yaʼalik le tekstoaʼ: «Le máak [toj] u kuxtaleʼ ku [tuukul]» (Pro. 15:28). Koʼoneʼex ilik bix jeʼel u yáantkoʼon le k-tuukul ken joʼopʼok k-ilik baʼax meyajil ken k-beete. Yaan meyajoʼobeʼ tsʼoʼok u yaʼalik le palitsil chúukpajaʼan u yóol maʼ maʼalob ka beetaʼakoʼ, le oʼolal u maas yaʼabil le sukuʼunoʼoboʼ junpuul u yaʼalikoʼob maʼ tu beetkoʼob. Baʼaleʼ wa maʼ jóoʼsaʼak mix baʼal aʼalik baʼax unaj u beetaʼaleʼ, cada juntúuleʼ unaj u kʼáatik u yáantaj Dios utiaʼal u naʼatik baʼax ku yaʼalik le Biblia táanil tiʼ u chʼaʼtuklik u beetik wa baʼaxoʼ. * Junpʼéel tiʼ le baʼax ku yaʼalik le Bibliaoʼ letiʼe maʼ u beetaʼal u tʼóochpajal mix máakoʼ (1 Cor. 10:31-33). Baʼaleʼ baʼax maas unaj k-ilkeʼ letiʼe maʼ u xuʼulul k-bisikba yéetel Diosoʼ. Wa k-ilik Jéeoba bey k-amigoeʼ, táanileʼ yaan k-tuklik: «¿Maʼ wa ken in beet u yaatal u yóol wa ka in kʼam le meyajaʼ?» (Sal. 78:40, 41).
13 Ken k-líiʼsba yéetel u xookil U Pʼíich Tulumil Kanan wa U Xookil le Biblia teʼ Múuchʼuliloʼ, unaj k-tuukul tiʼ le baʼax ku yaʼalikoʼ. ¿Chéen wa k-jáajan marcartik u núukil le kʼáatchiʼob ku taasik le xóotʼoloʼoboʼ? Wa chéen bey k-beetkoʼ, maʼ ken u yáantoʼon k-kaʼans maʼalob k-conciencia yéetel maʼ ken k-maas yaabilt baʼax toj. Utiaʼal k-kaʼansik maʼalobeʼ kʼaʼabéet k-tsʼáaik k-óol xook yéetel k-jóoʼsik u tiempoil k-tuukul tiʼ le baʼax ku yaʼalik le Bibliaoʼ. Chéen bey jeʼel u pʼáatal t-puksiʼikʼal le baʼaxoʼob ku yaʼalikoʼ.
Unaj k-eʼesik wiʼijoʼon yéetel ukʼajoʼon k-beet baʼax uts tu tʼaan Dios
14. ¿Bix u kʼáat Jéeoba yéetel Jesucristo ka k-meyajte?
14 Jéeoba yéetel u Hijoeʼ u kʼáatoʼob ka yanaktoʼon kiʼimak óolal ikil k-meyajtik. ¿Baʼax jeʼel u yáantkoʼon utiaʼal u yantaltoʼon kiʼimak óolaleʼ? Letiʼe k-yaabiltik baʼax tojoʼ. Jesuseʼ tu yaʼalaj teʼ kaʼansaj tu beetaj teʼ puʼukoʼ: «Kiʼ u yóoloʼob le máaxoʼob wiʼijoʼob yéetel ukʼajoʼob utiaʼal u beetkoʼob baʼax uts tu tʼaan Jajal Dios, tumen letiʼ [kun] áantkoʼob utiaʼal u beetoʼob beyoʼ» (Mat. 5:6). ¿Bix unaj u yilik le máaxoʼob yaabiltmil baʼax toj le baʼax ku yaʼalik le tekstoaʼ?
15, 16. ¿Bix kun áantbil le máaxoʼob wiʼijoʼob yéetel ukʼajoʼob tiʼ baʼax uts tu tʼaan Diosoʼ?
15 Le yóokʼol kaabaʼ tiaʼan yáanal u páajtalil Satanaseʼ (1 Juan 5:19). Tuláakal tuʼuxeʼ ku yilaʼal teʼ periodicoʼob le baʼaloʼob kʼaastak ku sen beetaʼaloʼ. Le máaxoʼob yaabiltmil le baʼax tojoʼ jach kʼaas u yilkoʼob le bix u beetaʼal loob tiʼ wíinik tumen u yéet wíinikiloʼ (Ecl. 8:9). Baʼaleʼ le máaxoʼob yaabiltmil Jéeoba bey xan le baʼaxoʼob ku yaʼalikoʼ, u yojloʼobeʼ chéen letiʼ jeʼel u tsʼáaik baʼax kʼaʼabéet utiaʼal u xuʼulul u yuʼubkoʼob wiʼij yéetel ukʼaj tiʼ baʼax tojeʼ. Maʼ kun xáantaleʼ yaan u xuʼulsaʼal tiʼ le kʼasaʼan máakoʼoboʼ. Le máakoʼob utstakoʼoboʼ yaan u xuʼulul u muʼyajoʼob yoʼolal le baʼaxoʼob maʼ maʼalobtak ku beetik le kʼasaʼan máakoʼoboʼ (2 Ped. 2:7, 8). ¿Máasaʼ jach jatsʼuts le baʼax ku taal u kʼiinoʼ?
16 Toʼon táan k-tsaypachtik Cristo yéetel táan k-meyajtik Jéeobaeʼ k-ojel le máaxoʼob u kʼáatoʼob ka beetaʼak baʼax maʼaloboʼ «bin [áantaʼakoʼob] utiaʼal u beetoʼob beyoʼ». Lelaʼ yaan u béeytal teʼ túumben kaʼanoʼob yéetel teʼ túumben luʼum «tuʼux tuláakal baʼal toj» kun beetbiloʼ (2 Ped. 3:13). Le oʼolal maʼ u lúubul a wóol yoʼolal le baʼaxoʼob kʼaastak ku sen beetaʼal teʼ tu kʼasaʼan yóokʼol kaab Satanasoʼ (Ecl. 5:8). Jéeobaeʼ ku yilik tuláakal yéetel maʼ kun xáantal ken u jáalkʼabt le máaxoʼob yaabiltmil le baʼax tojoʼ.
Le utsiloʼob ken u taas u yaabiltik máak le baʼax tojoʼ
17. ¿Baʼax utsiloʼob k-kʼamik tumen k-yaabiltmaj baʼax toj?
17 Salmo 146:8 ku yaʼalik: «Yuumtsi[leʼ] u yaakuntmaj máaxoʼob uts u kuxtaloʼob». ¿Ta wilaj wa baʼax utsil ku yaʼalik le versículo ken u kʼam le máaxoʼob beetik baʼax maʼaloboʼ? Yaan u yaabiltaʼaloʼob tumen Jéeoba, u Reyil tuláakal baʼal. ¿Máasaʼ jach jatsʼuts lelaʼ? Toʼoneʼ jach k-ojel yaan u tsʼáaik tuláakal baʼax kʼaʼabéettoʼon wa k-tsʼáaik táanil u Reino ichil k-kuxtal (xokaʼak Salmo 37:25 yéetel Proverbios 10:3). Yaan u kʼuchul u kʼiinileʼ, chéen máaxoʼob yaabiltmil baʼax toj kun pʼáatloʼob kuxtal way Luʼumeʼ (Pro. 13:22). U maas yaʼabil tiʼ le máaxoʼob meyajtik Diosoʼ yaan u tsʼaʼabaltiʼob le kuxtal minaʼan u xuul teʼ túumben luʼum sutaʼan Paraisoiloʼ. Tak teʼ kʼiinoʼobaʼ yaan jeetsʼelil tiʼob yéetel u láakʼtsiloʼob bey xan yéetel u maasil máaxoʼob meyajtik Dios (Fili. 4:6, 7).
18. ¿Baʼax unaj k-beetik le táan k-páaʼtik u noj kʼiinil Jéeobaoʼ?
18 Le táan k-páaʼtik u noj kʼiinil Jéeobaoʼ, maʼ unaj u xuʼulul k-kaxtik le toj kuxtal tu táanoʼ (Sof. 2:2, 3). Unaj k-eʼesik jach tu jaajil k-yaabiltmaj le baʼaxoʼob maʼalobtak ku yaʼalikoʼ. Maʼ tu páajtal k-pʼatik mix junsúutuk le nuʼukul pixik k-tseem utiaʼal maʼ u xuʼulul k-kanáantik k-puksiʼikʼaloʼ. Tsʼoʼoleʼ jach unaj k-ilik u yantaltoʼon junpʼéel maʼalob conciencia mantatsʼ, wa k-beetik beyoʼ yaan u yantaltoʼon kiʼimak óolal, tsʼoʼoleʼ yaan k-kiʼimakkúuntik u yóol Jéeoba, k-Taata yaan teʼ kaʼanoʼ (Pro. 27:11).
19. ¿Baʼax unaj k-chʼaʼtuklik k-beetik, yéetel baʼax ken k-il teʼ tuláakʼ xookoʼ?
19 Jéeobaeʼ «mantatsʼ táan u yilik baʼax ku yúuchul tu yóokʼol kaab utiaʼal u muʼukʼaʼankúuntik máax [creertik] tu jaajil u yóol» (2 Cró. 16:9). ¿Máasaʼ le tʼaanoʼobaʼ jach ku líiʼsik k-óol utiaʼal maʼ u xuʼulul k-beetik baʼax maʼalob kex táan u bin u maas kʼastal baʼax ku beetaʼal teʼ yóokʼol kaabaʼ? Le máaxoʼob maʼatech u meyajtikoʼob Diosoʼ, maʼ xaaneʼ jelaʼan u yilkoʼob baʼaxten toʼoneʼ láayliʼ táan k-beetik baʼax ku yaʼalik Dioseʼ, baʼaleʼ toʼoneʼ k-ojel utiaʼal k-utsil (Isa. 48:17; 1 Ped. 4:4). Le oʼolal tsʼoʼok k-chʼaʼtuklik u seguer k-eʼesik k-yaabiltmaj le baʼax toj yéetel tuláakal k-puksiʼikʼaloʼ. Baʼaleʼ yaan uláakʼ baʼax unaj k-beetik. Utiaʼal k-eʼesik táan k-meyajtik Dios yéetel tuláakal k-puksiʼikʼaleʼ unaj xan k-pʼektik baʼax kʼaas. Teʼ tuláakʼ xookoʼ yaan k-ilik baʼax táakaʼan ichil u beetaʼal lelaʼ.
[Tsolajiloʼob]
^ xóot’ol 12 Le baʼaxoʼob ku yaʼalik le Biblia tiʼ baʼaloʼob yaan yil yéetel jujunpʼéel meyajoʼoboʼ ku tsoʼolol teʼ La Atalaya 15 tiʼ abril tiʼ 1999, táan juʼun 28 tak 30.
¿Baʼax jeʼel k-núukikeʼ?
• ¿Bix u yáantkoʼon k-yaabilt baʼax toj le u kuxtal Jesús tu kʼubaj t-oʼolaloʼ?
• ¿Baʼaxten jach unaj k-bisik mantatsʼ le nuʼukul kanáantik k-tseemoʼ?
• ¿Bix jeʼel k-kaʼansik tubeel k-concienciaeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 26]
Utiaʼal k-chʼaʼtuklik tubeel baʼax meyajil unaj k-beetkeʼ, unaj k-kaʼansik maʼalob k-conciencia