«Juntúul superintendente yéetel juntúul amigo jach yaabiltaʼabi»

LE SUKUʼUN John Barr, ku meyaj kaʼach ichil le Cuerpo Gobernante tiʼ u J-jaajkunajoʼob Jéeobaoʼ, xuʼul u meyajtik Dios way Luʼum tu jaʼatskabil sábado 4 tiʼ diciembre tiʼ 2010, letiʼeʼ yaan kaʼach 97 jaʼaboʼob tiʼ. Le máaxoʼob kʼaj óoltoʼ jach tu yaabiltoʼob, tumen letiʼeʼ juntúul superintendente yéetel juntúul jach maʼalob amigo. Letiʼobeʼ ku yaʼalikoʼob kaʼach tiʼ Jack.

Le sukuʼun Jack Barroʼ yaan kaʼatúul u sukuʼunoʼob, yéetel u taataʼobeʼ yéeyaʼanoʼob utiaʼal u binoʼob kaʼan, tiʼ líikʼ tu kaajil Aberdeen (Escocia). Letiʼeʼ jach suuk u tsikbaltik kaʼach bix líikʼik tu chichnil yéetel jach ku tsʼáaik u nib óolalil tiʼ u taataʼob úuchik u kaʼansaʼal u beet baʼax maʼalob.

Letiʼeʼ jach suʼlak kaʼachi. Baʼaleʼ tu beetaj tuláakal le ku páajtal utiaʼal u xuʼulul u sajaktal tʼaan yéetel u maasil. Lelaʼ páajchaj u beetik. Tiʼ junpʼéel domingo tiʼ u jaʼabil 1927, le yaan 14 jaʼaboʼob kaʼach tiʼeʼ, tu yaʼalaj tiʼ u taata u kʼáat jóokʼol kʼaʼaytaj tu yéetel joonaj joonajil. Bey káajik u meyajtik Diosoʼ. Tak ka kíimeʼ jach tu tsʼáaj u yóol teʼ kʼaʼaytajoʼ.

U maamaeʼ jach óolak kíimik yoʼolal junpʼéel nojoch loob. Le baʼax úuchoʼ tu beetaj u jach tuklik Jack baʼax ku beetik yéetel u kuxtal, le oʼolal tu chʼaʼtuklaj u kʼubik u kuxtal tiʼ Jéeoba tu jaʼabil 1929. Baʼaleʼ tu jaʼabil 1934 ka béeychaj u yokjaʼ. Cinco jaʼaboʼob tsʼoʼokok u yokjaʼeʼ bin Londres utiaʼal meyaj tu najil Betel yaan tu luʼumil Inglaterra, bey káajik le 71 jaʼaboʼob tu jach kʼubaj u yóol u meyajt Jéeobaoʼ.

Tu kʼiinil 29 tiʼ octubre tiʼ 1960, le sukuʼun Barroʼ tu káajsaj u biskuba yéetel juntúul máax jach tu yaabiltaj. Tsʼoʼok u beel yéetel Mildred Willett, juntúul kiik jach ku tsʼáaik u yóol kaʼach teʼ kʼaʼaytajoʼ yéetel úuch joʼopʼok u beetik u precursorail yéetel u misionerail. Tak tu mesil octubre tiʼ 2004 ka xuʼul u meyajtaʼal Dios way Luʼum tumen Mildredeʼ, letiʼobeʼ tu yeʼesoʼob bix u múul meyajtaʼal Dios tubeel. Desde ka tsʼoʼok u beeloʼobeʼ, sáamsamal tu múul xokoʼob le Bibliaoʼ.

Ken uʼuyaʼak u yaʼalaʼal le kʼaabaʼ Jack Barr tumen le máaxoʼob kʼaj óoltoʼ, ku taal tu tuukuloʼob juntúul máak jach maʼalob u tsolnuʼuk, maʼ tsʼíikiʼ, jach uts yéetel ku beetik le baʼax ku yaʼalik le Bibliaoʼ. Jach j-meeyjil yéetel juntúul superintendente jach tu yeʼesaj yaabilaj yéetel juntúul maʼalob amigo. Le bix u núukik le kʼáatchiʼob teʼ muchʼtáambaloʼob, le tsoltʼaanoʼob tu máansaj yéetel u payalchiʼobeʼ, tu yeʼesaj jach bix u biskuba kaʼach yéetel Jéeoba yéetel bix úuchik u tsʼáaik u yóol u meyajte.

Jach yaan k-tuklik le sukuʼun Barroʼ. Baʼaleʼ jach ku kiʼimaktal k-óol k-ojéeltik tsʼoʼok u tsʼaʼabal junpʼéel kuxtal tiʼ mix bikʼin kun xuʼulsbil teʼ kaʼanoʼ, le baʼax chúukpaj u yóol u páaʼtoʼ yéetel le baʼax jach ku tsikbaltik kaʼachoʼ. Letiʼe baʼax maas tu tsʼíiboltajoʼ (1 Cor. 15:53, 54). *

[Tsolajil]