Le familiaʼob meyajtik Diosoʼ unaj u pʼil ichoʼob mantatsʼ

«Unaj k-pʼilik k-ich mantatsʼ yéetel unaj k-kanáantik maʼ u saʼatal k-óol.» (1 TES. 5:6, NM)

1, 2. ¿Baʼax kʼaʼabéet utiaʼal u pʼilik u yich le familiaʼob meyajtik Diosoʼ?

KA TʼAANAJ Pablo tiʼ «u kʼiinil Yuumtsileʼ», tu yaʼalaj tiʼ le sukuʼunoʼob tiʼ Tesalónicaoʼ: «Sukuʼuneʼex, teʼexeʼ minaʼaneʼex ich éeʼjochʼeʼenil utiaʼal ka téek taalak le kʼiin ta wóokʼoleʼex jeʼex u taal tu yóokʼol j-ookoloʼobeʼ, tumen teʼexeʼ tuláakleʼex u paalaleʼex le sáasiloʼ yéetel u paalaleʼex le kʼiinoʼ. Maʼ utiaʼaloʼon áakʼabiʼ mix utiaʼaloʼon éeʼjochʼeʼeniliʼ». Ka tsʼoʼokeʼ tu yaʼalajtiʼob: «Maʼ k-weenleʼex jeʼex u beetik le uláakʼ máakoʼoboʼ, baʼaxeʼ unaj k-pʼilik k-ich mantatsʼ yéetel unaj k-kanáantik maʼ u saʼatal k-óol» (Joel 2:31; 1 Tes. 5:4-6, NM).

² Le baʼax tu yaʼalaj Pablo tiʼ le tesalonicailoʼoboʼ jach jeʼel u yáantkoʼon teʼ «tu tsʼook kʼii[noʼobaʼ]» (Dan. 12:4). Unaj k-beetik baʼax ku yaʼalik yéetel k-pʼilik k-ich. ¿Baʼaxten? Tumen jach taʼaytak u xuʼulsaʼal tiʼ le kʼasaʼan yóokʼol kaabaʼ, yéetel Satanaseʼ jach u tsʼaamaj u yóol u beet u lúubul le jaytúul máaxoʼob meyajtik Dios ku páajtaleʼ. ¿Baʼax unaj u beetik le familiaʼob meyajtik Dios utiaʼal maʼ u lúubloʼoboʼ? Cada juntúuleʼ unaj u beetik le baʼax ku páaʼtaʼal tiʼ tumen Jéeobaoʼ. Koʼoneʼex ilik bix jeʼel u yáantaj le íichamtsil, le atantsil yéetel le paalaloʼob utiaʼal u pʼilik u yichoʼob mantatsʼoʼ.

Íichamtsileʼex, beeteʼex jeʼex le «maʼalob j-kanan tamanoʼ»

3. Jeʼex u yaʼalik 1 Timoteo 5:8, ¿máakalmáak junpʼéel tiʼ le baʼaxoʼob unaj u beetik u poolil le familiaoʼ?

³ Le Bibliaoʼ ku yaʼalikeʼ «le íichamoʼ u pool u yatan» (1 Cor. 11:3). ¿Bix jeʼel u beetik u poolil tubeel ichil u yotocheʼ? Le Bibliaoʼ ku yaʼalik junpʼéel tiʼ le baʼaxoʼob unaj u beetkoʼ: «Wa yaan máax maʼ tu táan óoltik u láakʼtsiloʼobeʼ, maas le [yaan ichil u yotochoʼ], tsʼoʼok u mixbaʼalkúuntik le [fejoʼ] yéetel maas kʼaas yanil tiʼ le máax [minaʼan u fejoʼ]» (1 Tim. 5:8). Jach beyoʼ, le taatatsiloʼ unaj u kanáantik u familia. Baʼaleʼ maʼ chúukaʼan chéen ka u tsʼáa baʼaxoʼob kʼaʼabéet ichil u yotochiʼ. Wa u kʼáat ka u pʼil u yichoʼob mantatsʼeʼ unaj u yáantkoʼob u muʼukʼaʼankúunt u fejoʼob yéetel u maas bisubaʼob yéetel Dios (Pro. 24:3, 4). ¿Bix jeʼel u páajtal u beetkeʼ?

4. ¿Baʼax unaj u beetik le íichamtsil utiaʼal ka nuʼuktaʼak u familia tumen u kiliʼich muukʼ Diosoʼ?

⁴ Le Bibliaoʼ ku yaʼalik: «Le íichamtsiloʼ u pool le atantsiloʼ, bey jeʼel bix Cristo u pool le [múuchʼuliloʼ]». Le oʼolal le íichamtsiloʼ kʼaʼabéet u yilik bix u nuʼuktaʼal le múuchʼulil tumen Jesús utiaʼal u nuʼuktik u familia beyoʼ (Efe. 5:23). Koʼox ilik bix úuchik u biskuba Jesús yéetel u disipuloʼob (xokaʼak Juan 10:14, 15). Letiʼeʼ tu yaʼaleʼ letiʼ le «maʼalob j-kanan tamanoʼ». Le oʼolal le íichamtsil u kʼáat ka nuʼuktaʼak u familia tumen u kiliʼich muukʼ Dioseʼ kʼaʼabéet u xakʼalxoktik le baʼaxoʼob tu yaʼalaj yéetel tu beetaj Cristooʼ utiaʼal ka kuxlak «jeʼel bix kuxlajik letiʼoʼ» (1 Ped. 2:21).

5. ¿Bukaʼaj kʼaj óolaʼanil le múuchʼulil tumen le Maʼalob j-Kanan Tamanoʼ?

⁵ Le tamanoʼob aʼalaʼab tumen Jesusoʼ maʼ kʼoʼoxoʼob tiʼ u yuumiloʼobiʼ. Le j-kanan tamanoʼ jach u kʼaj óol u taamanoʼob, yéetel letiʼeʼ jach kʼaj óoltaʼan tumen le tamanoʼoboʼ, le oʼolal maʼ kʼoʼoxoʼob tiʼiʼ; u kʼaj óoloʼob bix u tʼaan yéetel ku yuʼubikoʼob u tʼaan. Le oʼolal  Jesuseʼ tu yaʼalaj: «In kʼaj óol in tamanoʼob, le in tiaʼaloʼoboʼ u kʼaj óolenoʼob xan». Letiʼeʼ jach u kʼaj óol tubeel le múuchʼuliloʼ. Le tʼaan griego ku suʼutul «kʼaj óoloʼ» ku tsʼáaik naʼatbil «u jach kʼaj óoltaʼal tubeel wa baʼax». Le Maʼalob j-Kanan Tamanoʼ u kʼaj óol cada juntúul tiʼ u j-tamanoʼob, u yojel baʼax kʼaʼabéettiʼob, baʼax maʼalob ku beetkoʼob bey xan le baʼaxoʼob maʼ jach maʼalob ku beetkoʼoboʼ. Mix baʼal ku pʼáatal maʼ u yilik. Le j-tamanoʼob xanoʼ jach u kʼaj óoloʼob tubeel le máax kanáantkoʼoboʼ, le oʼolal ku yuʼubikoʼob u tʼaan.

6. ¿Bix jeʼel u páajtal u beetik le íichamtsil jeʼex le Maʼalob j-Kanan Tamanoʼ?

⁶ ¿Bix jeʼel u nuʼuktik u familia le íichamtsil jeʼex u beetik Jesusoʼ? U yilkuba bey juntúul j-kanan tamaneʼ yéetel le máaxoʼob yaan ichil u familiaoʼ bey mejen tamanoʼob kʼaʼabéet u kanáantikeʼ. Unaj u yilik u kʼaj óoltikoʼob tubeel. ¿Jeʼel wa u páajtal u beetik máak lelaʼ? Jeʼeleʼ, baʼaleʼ kʼaʼabéet u tsikbal mantatsʼ yéetel cada juntúul tiʼ le máaxoʼob yanoʼob ichil u yotochoʼ yéetel u kanik u yuʼub baʼax chiʼichnakkúuntikoʼob. Tsʼoʼoleʼ kʼaʼabéet u yilik u beetik baʼax maʼalob u yiloʼob yéetel u chʼaʼtuklik tubeel le baʼaxoʼob unaj u múuchʼ beetkoʼob, jeʼex le adoración ich familiailoʼ, u binoʼob teʼ muchʼtáambaloʼoboʼ, u jóokʼloʼob kʼaʼaytaj yéetel u yilik tiʼ baʼax ken u náays u yóoloʼob. Wa ku chʼaʼik en cuentail le baʼax ku yaʼalik le Biblia yéetel ku chʼaʼik en cuentail cada juntúul tiʼ le máaxoʼob yanoʼob ichil u familiaoʼ, maas yaan u yuʼubaʼal u tʼaan yéetel yaan u páajtal u seguer u múuchʼ meyajtikoʼob Jéeoba.

7, 8. ¿Bix jeʼel u yeʼesaʼal yaabilaj tumen le íichamtsil jeʼex le Maʼalob j-Kanan Tamanoʼ?

⁷ Le maʼalob j-kanan tamanoʼ maʼ chéen u kʼaj óol u tamanoʼobiʼ, baʼaxeʼ jach u yaabiltmoʼob. Le oʼolaleʼ, ¿baʼax k-kanik ken k-xok le bix kuxlajik Jesús yéetel le bix úuchik u meyajtik Diosoʼ? K-ilik le yaabilaj tu yeʼesaj tiʼ u disipuloʼoboʼ. Tu kʼubaj tak u «kuxtal tu yoʼolal le tamanoʼoboʼ». Le íichamtsil u kʼáat lúubul utsil tu táan Diosoʼ unaj u beetik beyoʼ yéetel u yaabiltik le máaxoʼob yanoʼob ichil u familiaoʼ. Letiʼeʼ maʼ unaj u taasik mix baʼalil u yataniʼ mix u beetik loob tiʼiʼ, baʼaxeʼ unaj u yaabiltik «jeʼel bix Cristo tu yaabiltaj le [múuchʼuliloʼ]» (Efe. 5:25). Ku tʼanik yéetel yaabilaj yéetel ku tratartik yéetel tsiikil (1 Ped. 3:7).

⁸ Le taatatsiloʼ maʼ unaj u chéen ilik le baʼax maʼ maʼalob ku beetik u paalaloʼoboʼ, kʼaʼabéet u kaʼansiktiʼob yéetel yaabilaj le baʼax ku yaʼalik le Bibliaoʼ. Tsʼoʼoleʼ kʼaʼabéet u tsolik u nuʼuk tiʼob yéetel yaabilaj. Yaan mejen paalaleʼ maas séeb u naʼatkoʼob baʼax unaj u beetkoʼob, yanoʼobeʼ maʼatech. Le oʼolal le taatatsiloʼ kʼaʼabéet u yilik tiʼ máax maas unaj u chúukpajal u yóol. Wa ku yilik u beetik mantatsʼ jeʼex tu beetil Jesuseʼ, yaan u yantal jeetsʼelil ichil u yotoch yéetel tuláakal yaan u yuʼubikuba kanáantaʼan, bey túunoʼ u familiaeʼ yaan u yuʼubikubaʼob jeʼex tu yuʼubiluba le salmistaoʼ (xokaʼak Salmo 23:1-6).

9. Jeʼex Noeiʼ, ¿baʼax unaj u beetik le íichamtsiloʼob bejlaʼaʼ, yéetel baʼax jeʼel u yáantkoʼob u beetoʼobeʼ?

⁹ Tuukulnakoʼon tiʼ Noé. Letiʼeʼ kuxlaj tu tsʼook kʼiiniloʼob tiʼ le kʼasaʼan yóokʼol kaab úuchjeakiloʼ, baʼaleʼ ka taal «le búulkabal tu yóokʼol le kʼasaʼan máakoʼoboʼ» kanáantaʼab tumen Jéeoba «yéetel uláakʼ siete máakoʼob» (2 Ped. 2:5). Tumen letiʼ u poolil u yotoch kaʼacheʼ, tu yilaj u yáantik cada juntúul utiaʼal ka u salvartubaʼob. Lelaʼ letiʼe baʼax unaj u beetik xan le taatatsiloʼob teʼ kʼiinoʼobaʼ (Mat. 24:37). ¿Baʼax jeʼel u yáantik máak utiaʼal u beetkeʼ? U xakʼalxoktik le baʼax tu beetaj le Maʼalob j-Kanan Tamanoʼ yéetel u yilik u beetik jeʼex tu beetiloʼ.

Atantsileʼex, kanáant a wotocheʼex

10. ¿Baʼax táakaʼan ichil le tʼaan: «Le atantsiloʼoboʼ ka yanakoʼob tu yáanal u páajtalil u yíichamoʼob»?

¹⁰ Apóstol Pabloeʼ ku yaʼalik: «Le atantsiloʼoboʼ ka yanakoʼob tu yáanal u páajtalil u yíichamoʼob, bey jeʼel bix tiʼ Yuumtsileʼ» (Efe. 5:22). Le baʼax tu yaʼalaʼ maʼatech u taasik mix baʼalil le koʼoleloʼ. Táanil tiʼ u beetaʼal Eva, le yáax koʼolel, tumen Jéeobaoʼ, tu yaʼalaj:  «Maʼ uts ka yanak chéen tu juun wíinikiʼ. Nikaʼaj in beet máax nuʼukaʼan utiaʼal áantik» (Gén. 2:18). U yáantik u yíicham u nuʼukt u familia jeʼex u kʼáat Dioseʼ, junpʼéel baʼax jach maʼalob.

11. ¿Baʼaxoʼob ku beetik le koʼolel yaan u naʼatoʼ?

¹¹ Juntúul maʼalob atantsileʼ ku yilik u yáantaj utiaʼal ka xiʼik utsil tiʼ u familia (xokaʼak Proverbios 14:1). Ku tsʼáaikuba yáanal u páajtalil u yíicham, maʼ jeʼex le koʼolel mix baʼal u yojel tu yaʼalaj Salomonoʼ. Tsʼoʼoleʼ maʼatech u tuukul jeʼex u maasil máakoʼob maʼatech u yuʼubikoʼob tʼaanoʼ, baʼaxeʼ ku chaʼik u nuʼuktaʼal tumen u yíicham (Efe. 2:2). Le koʼolel minaʼan u naʼatoʼ séeb u yaʼalik baʼal tiʼ u yíicham. Baʼaleʼ le koʼolel yaan u naʼatoʼ ku beetik tuláakal le ku páajtal utiaʼal u yeʼesaʼal tsiikil tiʼ u yíicham tumen u paalal bey xan tumen u maasil. Tsʼoʼoleʼ ku yilik maʼ u tʼaan kʼaas tiʼ letiʼ mix u baʼateltʼaan tu yéetel. ¿Kux túun tiʼ baʼaloʼob yaan yil yéetel taakʼin? Le koʼolel minaʼan u naʼatoʼ ku xuʼuxupik le taakʼin talam u náajaltaʼal tumen u yíichamoʼ. Baʼaleʼ le koʼolel yaan u naʼatoʼ ku kanáantik le taakʼinoʼ yéetel maʼatech u yaʼalik tiʼ u yíicham ka meyajnak yaʼab horaʼob utiaʼal u náajaltik u maasil taakʼin.

12. ¿Baʼax unaj u beetik le atantsil utiaʼal u tsʼáaik u yóol tuláakal le familia u meyajt Diosoʼ?

¹² Juntúul kiik maʼalob atantsileʼ ku yáantik u yíicham utiaʼal u kaʼansik u paalal u meyajtoʼob Jéeoba, beyoʼ ku yáantaj utiaʼal u tsʼáaik u yóol tuláakal le familia u maas meyajtoʼoboʼ (Pro. 1:8). Ku yáantaj mantatsʼ utiaʼal ka yanaktiʼob le Adoración ich familiailoʼ. Tsʼoʼoleʼ ken tsoʼolok u nuʼuk wa ken chan jaʼatsʼak le paalaloʼob tumen u yíichamoʼ maʼatech u yaʼalik maʼ maʼalob baʼax ku beetkiʼ. Maʼ bey jeʼex le koʼolel maʼatech u yáantik u yíicham u nuʼukt tubeel u paalaloʼob utiaʼal ka xiʼik utsil tiʼoboʼ.

13. ¿Baʼaxten le atantsil meyajtik Diosoʼ jach unaj u yáantik u yíicham u beet le meyajoʼob tsʼaʼantiʼ teʼ múuchʼuliloʼ?

¹³ ¿Bix u yuʼubikuba juntúul maʼalob atantsil yoʼolal le meyajoʼob ku beetik u yíicham teʼ múuchʼuliloʼ? Ku kiʼimaktal u yóol ken u yil bix u yáantik le sukuʼunoʼoboʼ, kex wa siervo ministerial, anciano, ku meyaj teʼ Comité tiʼ Enlace yéetel le Hospitaloʼoboʼ, teʼ Comité Regional tiʼ Construcción wa tiʼ uláakʼ meyajoʼoboʼ. Maʼ xaaneʼ maʼ chéen chʼaʼabil u yáantik yéetel baʼaxoʼob ku yaʼalik wa ku beetkiʼ. Baʼaleʼ u yojel jach ku taasik yaʼab utsiloʼob, tumen wa yaʼab meyajoʼob ku beetik u yíicham utiaʼal u yáantik u maasileʼ, maas yaan u tsʼáaik u yóol tuláakal le familia u meyajtoʼob Diosoʼ.

14. 1) ¿Baʼax jeʼel u talamtal u yilik le atantsiloʼ, yéetel bix jeʼel u aktáantikeʼ? 2) ¿Bix jeʼel u yáantaj le atantsil utiaʼal ka xiʼik utsil tiʼ u familiaoʼ?

¹⁴ U jaajileʼ ku talamtal tiʼ le atantsil u yáantik u yíicham wa maʼ junpʼéeliliʼ bix u tuukul yéeteloʼ. Baʼaleʼ kex beyoʼ ku yeʼesik kabal  óolal yéetel ku yáantik utiaʼal ka jóokʼok tuláakal maʼalobil (1 Ped. 3:4). Tsʼoʼoleʼ ku yilik u beetik jeʼex Sara, Rut, Abigail yéetel María, u maama Jesús (1 Ped. 3:5, 6). Yéetel ku beetik jeʼex le kiikoʼob úuch joʼopʼok u meyajtikoʼob Jéeoba teʼ kʼiinoʼobaʼ (Tito 2:3, 4). U yaabiltik yéetel u yuʼubik u tʼaan u yíichameʼ ku yáantaj utiaʼal u maas biskubaʼob, utiaʼal ka xiʼik utsil tiʼ le familiaoʼ yéetel utiaʼal ka yanak jeetsʼelil yéetel kiʼimak óolal tu yotochoʼob. Juntúul koʼolel beyoʼ, jach koʼoj u tojol tu táan le xiib ku nuʼuktaʼal tumen le kiliʼich muukʼoʼ (Pro. 18:22).

Paalaleʼex, maʼ a luʼsik a paakateʼex tiʼ le baʼaloʼob maʼ tu yilaʼaloʼoboʼ

15. ¿Bix jeʼel u yáantaj le táankelem paalaloʼob utiaʼal u tsʼáaik u yóol tuláakal le familia u meyajtoʼob Diosoʼ?

¹⁵ ¿Táankelem paal, bix jeʼel u páajtal a wáantik a taataʼob utiaʼal u seguer a tsʼáaik a wóoleʼex ich familiail a meyajteʼex Dioseʼ? Tuukulnen tiʼ le baʼax ku yaʼalik u tsʼáaiktech Jéeobaoʼ. Maʼ xaaneʼ desde ta chichnileʼ, ku yeʼesaʼaltech tumen a taataʼob bix le Paraíso kun yantaloʼ, yéetel jeʼex u bin a nojochtaleʼ, bey u bin u meyajtiʼob le Biblia yéetel le jóoʼsaʼaniloʼob utiaʼal u yáantkechoʼob a wil bix le kuxtal kun yantal teʼ túumben luʼumoʼ. Wa ka tsʼáaik a wóol a meyajt Jéeoba mantatsʼeʼ, maas maʼ kun náayal a wóol.

16, 17. ¿Baʼax unaj u beetik le táankelem paalaloʼob utiaʼal u kʼamikoʼob le kuxtal minaʼan u xuuloʼ?

¹⁶ Beet le baʼax ku yaʼalik apóstol Pablo teʼ 1 Corintoiloʼob 9:24 (xokaʼak). Áalkabnen yéetel u tuukulil a wilik le kuxtal minaʼan u xuuloʼ. Yéey le bej jeʼel u biskechoʼ. Yaʼab táankelem paalaloʼobeʼ tsʼoʼok u pʼatkoʼob le bej utiaʼal u binoʼob chéen tu paach ayikʼaliloʼoboʼ. Baʼaleʼ leloʼ maʼ maʼalobiʼ. U tsʼáaik u yóol máak u kaxt chéen taakʼineʼ maʼatech u taasik kiʼimak óolal. Tsʼoʼoleʼ le baʼaloʼob beyaʼ maʼ kun pʼáatloʼob utiaʼal mantatsʼ. Le oʼolal maas maʼalob ka k-tsʼáa k-paakat tiʼ «le baʼaloʼob maʼ tu yilaʼaloʼoboʼ». ¿Baʼaxten? Tumen leloʼobaʼ «maʼatan u xuʼululoʼob» (2 Cor. 4:18).

¹⁷ Ichil «le baʼaloʼob maʼ tu yilaʼaloʼoboʼ» táakaʼan le utsiloʼob ken u tsʼáa u Reino Diosoʼ. Le oʼolal chʼaʼtukult a beetik baʼaloʼob jeʼel u yáantkech utiaʼal a wilkoʼobeʼ. Wa a kʼáat ka yanaktech kiʼimak óolaleʼ, meyajt Jéeoba ichil tuláakal a kuxtal. Yaʼab baʼaxoʼob jeʼel u béeytal a beetik chéen ichil junpʼíit kʼiin wa utiaʼal náachkʼineʼ. * Wa ka chʼaʼtuklik a beetik le baʼaxoʼob jeʼel u béeytal a beetkoʼ, yaan u chúukpajal a wóol a meyajt Dios yéetel maʼ ken a luʼs a paakat tiʼ le kuxtal minaʼan u xuuloʼ (1 Juan 2:17).

18, 19. ¿Bix jeʼel u yojéeltik juntúul táankelem paal wa táan u kuxtal jeʼex u kaʼansik le Bibliaoʼ?

¹⁸ A creertik tu jaajil a wóol le baʼax ku kaʼansik le Bibliaoʼ, bey ka a tsʼáa le yáax xáakʼab tu bejil le kuxtaloʼ. ¿Tsʼoʼok wa a beetik lelaʼ? Tukulte: «¿Kin táakpajal wa teʼ meyajoʼob ku beetaʼal teʼ múuchʼulil tumen in kʼáat in beetoʼ, wa chéen tumen ku yaʼalaʼalten tumen in taataʼob ka in beete? ¿Táan wa in weʼesik jatsʼuts modos ku kiʼimakkúuntik u yóol Dios? ¿Kin payalchiʼ wa mantatsʼ, kin xakʼalxook wa, kin bin wa teʼ muchʼtáambaloʼoboʼ, kin jóokʼol wa kʼaʼaytaj yéetel kin beetik wa uláakʼ meyajoʼob ku beetaʼal ichil u kaajal Jéeoba? ¿Táan wa in maas biskinba yéetel Jéeoba?» (Sant. 4:8).

¹⁹ Tuukulnen tiʼ baʼax tu beetaj Moisés. Kex  kaʼansaʼabtiʼ le baʼaxoʼob suukaʼan u beetik le egipcioʼoboʼ, tu chʼaʼtuklaj u meyajtik Jéeoba, maʼ ka kʼaj óoltaʼak bey u hijo u hija faraoneʼ (xokaʼak Hebreob 11:24-27). Techeʼ bey xan unaj a beetik wa a kʼáat a meyajt Jéeoba yéetel chúukaʼan óolaloʼ. Beyoʼ yaan u bintech utsil, yaan u yantaltech kiʼimak óolal yéetel jeʼel u yantaltech «le kuxtal minaʼan u xuuloʼ» (1 Tim. 6:19).

20. ¿Máaxoʼob kun kʼamik le kuxtal minaʼan u xuuloʼ?

²⁰ Teʼ ketlan áalkab tu chʼaʼchiʼitaj Pablooʼ chéen juntúul máax ku ganar. Baʼaleʼ lelaʼ maʼ bey u yúuchul yéetel le máaxoʼob ku yáalkaboʼob tu bejil le kuxtaloʼ. Tumen Dioseʼ «u kʼáat ka [salvartaʼak] tuláakal máakoʼob yéetel ka kʼuchuk u chúukaʼan kʼaj óoltoʼob le jaajoʼ» (1 Tim. 2:3, 4). Táanil tiʼ techeʼ, yaʼabeʼ tsʼoʼok u ganartikoʼob, yéetel yanoʼob xaneʼ táan u múul áalkaboʼob ta wéetel bejlaʼeʼ (Heb. 12:1, 2). Le maʼ kun kaʼanaloʼoboʼ yaan u kʼamikoʼob le kuxtal minaʼan u xuuloʼ. Techeʼ jeʼel u páajtal u yantaltecheʼ.

21. ¿Baʼax ken k-il teʼ tuláakʼ xookoʼ?

²¹ Mix baʼal jeʼel u beetik maʼ u kʼuchul u nojoch «kʼiinil [...] Yuumtsil[eʼ]» (Mal. 4:5). Le familiaʼob táan u meyajtikoʼob Jéeobaoʼ, kʼaʼabéet u kanáantkoʼob maʼ u náayal u yóoloʼob ken kʼuchuk le kʼiin jeʼeloʼ. Cada juntúul jach unaj u beetik le baʼax ku yaʼalik Diosoʼ. Baʼaleʼ ¿yaan wa uláakʼ baʼax jeʼel u páajtal k-beetik utiaʼal maʼ u náayal k-óol yéetel utiaʼal k-maas bisikba yéetel Jéeobaeʼ? Yaan. Le uláakʼ xookoʼ yaan u yeʼesik óoxpʼéel baʼaloʼob jeʼel u yáantik le familia u maas tsʼáa u yóol u meyajtoʼob Jéeobaoʼ.

[Tsolajil]

¿Kʼajaʼan wa tech le baʼaloʼobaʼ?

• ¿Baʼaxten jach kʼaʼabéet u pʼilik u yich le familiaʼob meyajtik Diosoʼ?

• ¿Bix jeʼel u beetik le íichamtsil jeʼex le Maʼalob j-Kanan Tamanoʼ?

• ¿Bix u yáantik u yíicham le maʼalob atantsiloʼ?

• ¿Bix jeʼel u yáantaj le paalaloʼob utiaʼal maʼ u náayal u yóol u familiaʼoboʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 9]

Utiaʼal le xiib nuʼuktaʼan tumen le kiliʼich muukʼoʼ jach yaʼab u tojol le atantsil ku yáantik u familiaoʼ