Le familiaʼob meyajtik Diosoʼ unaj u yeʼeskoʼob maʼ táan u weenloʼobiʼ
Le familiaʼob meyajtik Diosoʼ unaj u yeʼeskoʼob maʼ táan u weenloʼobiʼ
«Eʼeseʼex maʼ táan a weenleʼexiʼ, tumen tiʼ junpʼéel hora maʼ táan a páaʼtkeʼexeʼ yaan u kʼuchul u Paal máak.» (LUC. 12:40, NM)
1, 2. ¿Baʼaxten maʼ unaj u tuʼubultoʼon le baʼax tu yaʼalaj Jesusaʼ: «Eʼeseʼex maʼ táan a weenleʼexiʼ»?
¿BIX kun bin tiʼ k-familia «ken taalak u Paal Máak» u jatsláant le utsoʼob tiʼ le kʼasaʼanoʼoboʼ? (Mat. 25:31, 32.) Jesuseʼ yaan u taal teʼ kʼiin maʼ táan u páaʼtaʼaloʼ, le oʼolal jach unaj k-beetik le baʼax tu yaʼalaʼ: «Eʼeseʼex maʼ táan a weenleʼexiʼ» (Luc. 12:40, NM).
2 Teʼ xook máanikoʼ t-ileʼ le familiaʼob meyajtik Diosoʼ jeʼel u páajtal u pʼilik u yichoʼob wa cada juntúul ku beetik le baʼax ku páaʼtaʼal tiʼoʼ. Bejlaʼeʼ yaan k-ilik uláakʼ bix jeʼel u yáantaj cada juntúul utiaʼal u tsʼáaik u yóol u meyajtoʼob Dioseʼ.
Unaj k-kanáantik u sáasil k-ich
3, 4. 1) ¿Tiʼ baʼax unaj u kanáantkuba le familiaʼob meyajtik Diosoʼ? 2) ¿Baʼax u kʼáat u yaʼal u yantal junpʼéel maʼalob ich tiʼ máak?
3 Utiaʼal maʼ u náayal u yóol le máaxoʼob yaan ichil k-familia ken kʼuchuk Cristooʼ, maʼ unaj u xuʼulul k-tsʼáaik k-óol k-meyajt Jéeoba yoʼolal mix baʼaliʼ. Yaʼab familiaʼobeʼ tsʼoʼok u xuʼulul u meyajtikoʼob Dios yoʼolal le ayikʼaliloʼ. Le oʼolal maʼalob ka yanaktoʼon junpʼéel maʼalob ich, jeʼex úuchik u yaʼalik Jesusoʼ (xokaʼak Mateo 6:22, 23). Jeʼex junpʼéel lámpara ku sáasilkuntik k-beel utiaʼal maʼ k-lúubuleʼ, «u yich [le] puksiʼikʼal[oʼ]» ku sáasilkuntik k-beel utiaʼal maʼ k-lúubul tiʼ baʼaloʼob kʼaastak (Efe. 1:18, NM).
4 Junpʼéel ich minaʼan kʼojaʼanil tiʼ yéetel ku páajtal u paktik maʼalob wa baʼaxeʼ sáasil u paakat. Lelaʼ bey xan u yúuchul yéetel u yich le puksiʼikʼaloʼ. U yantal junpʼéel maʼalob ich tiʼ máakeʼ, u kʼáat u yaʼal u bin máak tu paach chéen junpʼéel baʼal. U chʼíikil u meyajt Dios, maʼ u chʼíikil u kaxt chéen ayikʼaliloʼob wa u chʼíikil chéen u tsʼáa baʼax kʼaʼabéet ichil u yotochiʼ (Mat. 6:33). Bey túunoʼ unaj u kiʼimaktal k-óol chéen yéetel le baʼaxoʼob yaantoʼonoʼ yéetel unaj k-tsʼáaik táanil ichil k-kuxtal k-meyajtik Dios (Heb. 13:5).
5. ¿Bix úuchik u yeʼesik juntúul x-lóoʼbayan chʼúupal u tsʼaamaj táanil u meyajtik Dios?
5 U kaʼansaʼal tiʼ le paalal u kʼaʼanaʼanil u yantaltiʼob junpʼéel maʼalob ichoʼ yaʼab utsiloʼob ku taasik. Tuukulnakoʼon tiʼ baʼax tu beetaj juntúul x-lóoʼbayan chʼúupal tiʼ Etiopía. Ka jóokʼ tu xookeʼ jach maʼalob calificacionoʼob tu jóoʼsaj, ka aʼalaʼab u tsʼaʼabaltiʼ junpʼéel beca utiaʼal u seguertik u xook. Baʼaleʼ letiʼeʼ maʼ tu kʼamiʼ, tumen u kʼáat u beet u precursorail. Maʼ sen úuch tiʼ leloʼ, aʼalaʼab u tsʼaʼabaltiʼ junpʼéel meyaj tuʼux ken u náajalt 3,000 euros cada mes, lelaʼ jach yaʼab tiʼ le bukaʼaj suuk u náajaltik máak teʼ luʼumil tuʼux kajaʼanoʼ. Baʼaleʼ letiʼeʼ láayliʼ tu tsʼáaj táanil u beetik u precursoraileʼ. Maʼ kʼaʼabéetchaj mix u kʼáatik tiʼ u taataʼob baʼax ku tuklikoʼob yoʼolal le meyajoʼ. ¿Bix tu yuʼubilubaʼob ka tu yojéeltoʼob le baʼax tu beetaj u hijaʼoboʼ? Jach kiʼimakchaj u yóoloʼob yéetel tu yaʼaloʼobtiʼ jach maʼalob le baʼax tu beetoʼ.
6, 7. ¿Baʼaxten kʼaʼabéet k-jach pʼilik k-ich?
6 Le baʼax ku yaʼalik Mateo 6:22 yéetel 23, ku tsʼáaik naʼatbil maʼ unaj u tsʼíiboltik máak baʼax maʼ u tiaʼaliʼ. Teʼ tekstoaʼ Jesuseʼ tu yaʼalaj u jelaʼanil le ich maʼalob tiʼ le maʼ maʼaloboʼ. Junpʼéel ich maʼ maʼalobeʼ «kʼaschajaʼan» yéetel «ku tsʼíiboltik baʼax maʼ u tiaʼaliʼ» (Mat. 6:23; tsolajil, NM). ¿Bix u yilik Jéeoba u tsʼíiboltik máak baʼax maʼ u tiaʼaliʼ? Le Bibliaoʼ ku yaʼalik: «Maʼ unaj mix u yaʼalaʼal ichileʼex le núupkʼebanoʼ, mix junpʼéel uláakʼ baʼal kʼaas wa u tsʼíibolal u nikkúunsaʼal taakʼin» (Efe. 5:3).
7 U suukileʼ jach séeb u yilik máak máax tsʼíiboltik baʼaxoʼob maʼ u tiaʼaliʼ, baʼaleʼ maʼatech u tsʼáaik cuenta wa bey u beetik letiʼoʼ. Le oʼolal maʼalob ka k-beet le baʼax tu yaʼalaj Jesusaʼ: «Jach pʼil a wicheʼex mantatsʼ, yéetel kanáantabaʼex utiaʼal maʼ a tsʼíiboltkeʼex baʼax u tiaʼal yaanal máak» (Luc. 12:15, NM). Utiaʼal lelaʼ kʼaʼabéet k-jach ilik baʼax ku tsʼíiboltik k-puksiʼikʼal. Tuláakal le familiaʼob meyajtik Diosoʼ unaj u yilkoʼob bukaʼaj tiempo yéetel taakʼin ku xupikoʼob utiaʼal u náaysik u yóoloʼob bey xan utiaʼal u yantal u maasil baʼaloʼob tiʼob.
8. ¿Bix jeʼel k-pʼilik k-ich ken jóokʼkoʼon maaneʼ?
8 Táanil tiʼ k-bin k-man wa baʼaxeʼ, maʼ chéen unaj k-ilik wa yaantoʼon u tojoliʼ. Baʼaxeʼ yaan uláakʼ baʼaxoʼob unaj k-chaʼik en cuentail. Maʼalob ka k-tukle: «¿Yaan wa ten u tiempoil utiaʼal u meyajten bey xan utiaʼal in kanáantik le nuʼukulaʼ? ¿Jeʼel wa in séeb kanik bix u meyajeʼ?». Le táankelem paalaloʼoboʼ unaj u tuklikoʼob xan: «¿Kin kanáantik wa baʼaxoʼob kin manik, wa ku taaktal u yantalten le baʼaloʼob túumbentak ku sen kʼaʼaytaʼaloʼ, yéetel mantatsʼ kin sen kʼáatik tiʼ in taataʼob ka u manoʼobten nookʼoʼob yéetel uláakʼ baʼaloʼob koʼojtak?». Cada juntúul ichil le familiaoʼ unaj u tuklik: «Le baʼax ken in manaʼ, ¿jeʼel wa u yáantik in familia utiaʼal maʼ u náayal u yóol ken taalak u Paal máakeʼ?». Maʼ unaj u tuʼubultoʼoneʼ Jéeobaeʼ ku yaʼalik: «Mix bikʼin ken in pʼatech mix ken in xúumpʼattech» (Heb. 13:5).
Unaj k-ilik bix jeʼel k-maas meyajtik Dioseʼ
9. ¿Baʼax utsil ku kʼamik le familiaʼob ku tsʼáaik u yóol u maas meyajtoʼob Jéeobaoʼ?
9 Uláakʼ bix jeʼel u muʼukʼaʼankúuntik u fe le familiaʼoboʼ letiʼe u chʼaʼtuklikoʼob bix jeʼel u maas meyajtikoʼob Dios yéetel u yilik u beetkoʼob jeʼex u tuklikoʼoboʼ. Beyoʼ yaan u yilkoʼob wa táan u tsʼáaik u yóol u meyajtoʼob Jéeoba yéetel yaan u yilkoʼob baʼax maas unaj u tsʼáaikoʼob táanil ichil u kuxtaloʼob (xokaʼak Filiposiloʼob 1:10).
10, 11. ¿Baʼax tsʼoʼok a chʼaʼtuklik a beetik yéetel a familia, yéetel baʼaxoʼob maʼalob ka a wil a beetkeʼex?
10 Tak le baʼaloʼob maʼ jach nuuktak ku chʼaʼtuklaʼal u beetaʼaloʼ jeʼel u taasik utsil wa tuláakal, wa u maas yaʼabil le familia ku táakpajloʼoboʼ. Junpʼéel tiʼ lelaʼ letiʼe u suuktal u múul xokikoʼob u tekstoil le kʼiin sáamsamaloʼ. Le baʼax ku yaʼalikoʼob ken xooknakoʼoboʼ jeʼel u yáantik le taatatsil u yil bix u tsʼáaik u yóol cada juntúul u meyajt Dioseʼ. Maʼalob xan ka u múul xokoʼob ich familiail le Bibliaoʼ, lelaʼ jeʼel u yáantik le mejen paalaloʼob utiaʼal ka maas maʼalobchajak u xookoʼob yéetel ka u maas naʼatoʼob le baʼax ku yaʼalikoʼ (Sal. 1:1, 2). Tsʼoʼoleʼ maʼalob xan ka k-il k-maas maʼalobkíintik k-payalchiʼ. Bey xan ka k-il k-maas eʼesik le modos ku taal tiʼ u yich le kiliʼich muukʼoʼ (Gal. 5:22, 23). Uláakʼ baʼax maʼalob ka k-beeteʼ letiʼe k-chʼaʼik en cuentail bix u tuukul le máaxoʼob yéetel k-tsikbal ken jóokʼkoʼon kʼaʼaytajoʼ. Beyoʼ yaan k-kaʼansik tiʼ k-paalal u chʼaʼob en cuentail u maasil, yéetel maʼ xaaneʼ maas jeʼel u taaktal u beetik u precursor regulariloʼob wa u misioneroiloʼobeʼ.
11 ¿Baʼax uláakʼ jeʼel u páajtal a chʼaʼtuklik a beetkeʼex ich familiaileʼ? ¿A wilkeʼex a maas táakpajleʼex teʼ kʼaʼaytajoʼ? ¿U káajal a kʼaʼaytajeʼex tiʼ teléfono, teʼ bejoʼoboʼ wa teʼ tuʼuxoʼob ku yúuchul koonoloʼ? ¿Yéetel bix a wilkeʼex ka xiʼikeʼex kʼaʼaytaj tuʼux maas kʼaʼabéet máaxoʼob kʼaʼaytik u maʼalob péektsilil le Reinooʼ? ¿Yaan wa máax ichileʼex jeʼel u páajtal u kanik uláakʼ idioma utiaʼal u kʼaʼaytik le maʼalob péektsil tiʼ le j-táanxel luʼumiloʼoboʼ?
12. ¿Bix jeʼel u yáantik u familia le taatatsil utiaʼal u tsʼáaik u yóol u maas meyajt Diosoʼ?
12 Le taatatsiloʼ unaj u yilik baʼax kʼaʼabéet u maʼalobkíintik u familia utiaʼal u meyajtik Dios yéetel u yilik u beetik jujunpʼíitil jeʼex ku páajtal u beetik cada juntúuleʼ (Pro. 13:12). U jaajileʼ u beetik máak le baʼaxoʼob maas kʼaʼanaʼantakoʼ ku bisik tiempo. Le oʼolal maʼ xaaneʼ, yaan u kʼaʼabéettal maʼ u jach chaʼantaʼal televisión utiaʼal u yantal u tiempoil u meyajtaʼal Dios (Efe. 5:15, 16). U tsʼáaik u yóol tuláakal u beet le baʼax ku chʼaʼtuklaʼaloʼ le kun áantaj utiaʼal u beetaʼal jeʼex u tuklaʼaloʼ (Gal. 6:9). Beyoʼ yaan «u yilaʼal tumen tuláakaleʼ bix [u] bin táanil» tuláakal le familiaoʼ (1 Tim. 4:15).
Maʼ u tuʼubultoʼon le Adoración ich familiailoʼ
13. ¿Baʼax kʼeexil beetaʼab tumen u kaajal Jéeoba tiʼ le muchʼtáambaloʼoboʼ, yéetel baʼax kʼáatchiʼi unaj k-beetik?
13 Le úuchik u kʼeʼexel u kʼiinil le muchʼtáambaloʼob káaj tu kʼiinil 1 tiʼ enero tiʼ 2009, tsʼoʼok u yáantik yaʼab familiaʼob utiaʼal maʼ u náayal u yóoloʼob ken kʼuchuk u Paal máak. Le muchʼtáambal ku kʼaabaʼtik kaʼach U Xookil Libroil Múuchʼuliloʼ muchʼaʼab yéetel u muchʼtáambalil Kaanbalil utiaʼal Kaʼansaj yéetel U Muchʼtáambalil Kʼaʼaytaj. Beyoʼ pʼaʼat junpʼéel áakʼab cada semana utiaʼal u muʼukʼaʼankúuntik u fe le familiaʼob teʼ Adoración ich familiailoʼ. Bejlaʼa tsʼoʼok u máan kaʼapʼéel jaʼab káajak u beetaʼaleʼ, maʼalob ka k-tukle: «¿Ku yantal wa ten le Adoración ich familiail wa kin xook tin juunal teʼ tiempo tsʼaʼaboʼ? ¿Táan wa in jóoʼsik u yutsil le baʼax tu chʼaʼtuklaj u kaajal Jéeobaoʼ?».
14. 1) ¿Baʼax u biilal le Adoración ich familiail yéetel u xook máak tu juunaloʼ? 2) ¿Baʼaxten jach kʼaʼabéet k-jóoʼsik u yorail cada semana utiaʼal k-xook?
14 U jóoʼsik máak u súutukil utiaʼal u beetik le Adoración ich familiail wa utiaʼal u xook tu juunaloʼ ku yáantaj utiaʼal u maas natsʼkuba tiʼ Dios (Sant. 4:8). Wa k-beetik cada semanaeʼ yaan k-maas kʼaj óoltik Jéeoba yéetel yaan k-maas naʼatik le baʼax ku yaʼalik le Bibliaoʼ, beyoʼ yaan k-maas bisikba tu yéetel. Jeʼex u bin k-maas bisikba yéeteleʼ yaan k-maas yaabiltik yéetel tuláakal k-puksiʼikʼal, k-kuxtal, k-tuukul yéetel k-muukʼ (Mar. 12:30). Tsʼoʼoleʼ maas yaan u taaktal k-uʼuyik u tʼaan yéetel k-beetik jeʼex letiʼoʼ (Efe. 5:1). Jeʼex túun k-ilkoʼ jach unaj u yantaltoʼon cada semana le Adoración ich familiail utiaʼal maʼ u náayal u yóol mix juntúul ichil k-otoch ken kʼuchuk le «táaj yaʼab muʼyaj[oʼ]» (Mat. 24:21). Jach kʼaʼabéet utiaʼal k-salvartikba.
15. ¿Bix u yáantaj le Adoración ich familiailoʼ?
15 Le Adoración ich familiailoʼ ku meyaj xan utiaʼal u maas yaabiltikuba le máaxoʼob yanoʼob ichil le familiaoʼ. U múuchʼ xokikoʼob le Biblia cada semanaoʼ jach jeʼel u yáantaj utiaʼal u maas biskubaʼobeʼ. Jeʼex le máaxoʼob tsʼokaʼan u beeloʼoboʼ ku maas yaabiltikubaʼob jeʼex u bin u naʼatkoʼob le baʼaxoʼob maʼalobtak ku kaʼansik le Bibliaoʼ (xokaʼak Eclesiastés 4:12). Le taatatsiloʼob ku múuchʼ adorartikoʼob Jéeoba yéetel u paalaloʼoboʼ ku maas kanik u yeʼesoʼob le yaabilaj nupik tuláakal máakoʼ (Col. 3:14).
16. ¿Baʼax utsiloʼob tsʼoʼok u yilik óoxtúul kiikoʼob ku muchʼkubaʼob utiaʼal u xokoʼob le Biblia cada semanaoʼ?
16 Koʼoneʼex ilik baʼax utsiloʼob tsʼoʼok u yilik óoxtúul kiikoʼob kimen u yíichamoʼob yéetel tsʼoʼok u chan yantal u jaʼabiloʼob ku múul xookoʼob. Letiʼobeʼ maʼ láakʼtsiloʼobiʼ, baʼaleʼ jach úuch joʼopʼok u biskubaʼob. Tumen tiʼ junpʼéeliliʼ kaaj kajaʼanoʼobeʼ, uts tu tʼaan u muchʼkubaʼob tsikbal, baʼaleʼ maʼ chéen utiaʼal u náaysik u yóoloʼobiʼ, baʼaxeʼ utiaʼal xan u xookoʼob. Le oʼolal tu chʼaʼtuklaj u muchʼkubaʼob junpʼéel áakʼab cada semana utiaʼal u xokikoʼob le Bibliaoʼ. Táanileʼ tu xokoʼob le libro “Testimonio cabal” del Reino de Dios. Juntúul tiʼ letiʼobeʼ ku yaʼalik: «Jach jatsʼuts k-ilik, yaan kʼiineʼ ku máan tak junpʼéel hora táan k-xook. K-máansik t-tuukul le baʼaxoʼob tu muʼyajtaj le sukuʼunoʼob teʼ yáax siglooʼ yéetel k-tsikbaltik baʼax jeʼel k-beetik wa ka úuchuktoʼon beyoʼ. Tsʼoʼoleʼ k-ilik u meyajtoʼon teʼ kʼaʼaytaj le baʼax k-kanikoʼ. Yoʼolal lelaʼ maas maʼalobchaj bix k-kʼaʼaytaj yéetel bix k-kaʼansaj, le oʼolal jach ku bintoʼon utsil». Baʼaleʼ maʼ chéen tsʼoʼok u maas maʼalobtal bix u meyajtikoʼob Diosiʼ, baʼaxeʼ maas maʼalob u biskubaʼob. Letiʼobeʼ ku yaʼalikoʼob: «Jach jatsʼuts k-ilik le súutukiloʼob k-jóoʼsik utiaʼal k-múul xookoʼ».
17. ¿Baʼax jeʼel u yáantaj utiaʼal u beetaʼal maʼalob le Adoración ich familiailoʼ?
17 ¿Baʼax utsiloʼob tsʼoʼok k-ilik toʼon ikil k-jóoʼsik junpʼéel áakʼab utiaʼal le adoración ich familiail wa utiaʼal k-xook chéen t-juunaloʼ? Wa maʼatech k-beetik mantatsʼeʼ maʼ ken k-il le utsiloʼob ku taaskoʼ. Maʼ unaj u pʼáatal maʼ k-beetik chéen yoʼolal wa baʼaxiʼ. Tuláakal ichil le familia unaj u líiʼskuba teʼ kʼiin yéetel teʼ hora chʼaʼtuklaʼanoʼ. Tsʼoʼoleʼ kʼaʼabéet u yéeyaʼal baʼax kun xokbil utiaʼal u yáantik tuláakal le familiaoʼ. ¿Baʼax unaj k-beetik utiaʼal maʼ u náakal u yóol mix juntúuliʼ? U kaʼansaj máak tubeel yéetel u yilaʼal u yantal jeetsʼelil yéetel tsiikil tu yorail le xookoʼ (Sant. 3:18). *
«Unaj k-pʼilik k-ich mantatsʼ» yéetel unaj k-eʼesik «maʼ táan [k-weneliʼ]»
18, 19. ¿Baʼax unaj a beetik yéetel a familia tumen a wojleʼex taʼaytak u taal u Paal máak?
18 Le baʼaloʼob kʼaastak ku yilaʼal bejlaʼaʼ, ku yeʼesikeʼ u kʼasaʼan yóokʼol kaab Satanaseʼ tiaʼan tu tsʼook kʼiinoʼob desde tu jaʼabil 1914. Le Armagedonoʼ jach naatsʼ yanil. Maʼ kun xáantal ken taalak u Paal máak utiaʼal u xuʼuls tiʼ le kʼasaʼan máakoʼoboʼ (Sal. 37:10; Pro. 2:21, 22). K-ojéeltik lelaʼ unaj u yáantkoʼon utiaʼal maʼ u náayal k-óol mix k-familia.
19 ¿Táan wa a wilik u yantaltech junpʼéel «maʼalob ich» jeʼex úuchik u yaʼalik Jesusoʼ? ¿Táan wa a wilik a maas meyajtikeʼex Dios ich familiail utiaʼal maʼ a beetkeʼex jeʼex le máakoʼob chéen u kʼáatoʼob ka kʼaj óoltaʼakoʼob, ka ayikʼalchajkoʼob yéetel ka yanak páajtalil tiʼoboʼ? ¿Táan wa a wilik a beetik le Adoración ich familiail wa a xakʼal xook ta juunaloʼ? ¿Táan wa a beetik le baʼax a chʼaʼtukultmoʼ? Jeʼex úuchik u yaʼalik le xook máanikoʼ, ¿táan wa a beetik le baʼax ku páaʼtaʼal tech ichil a wotoch utiaʼal maʼ u náayal u yóol a familiaoʼ? (1 Tes. 5:6). Wa táan a beetik le baʼaloʼobaʼ a familiaeʼ maʼ naayal u yóol ken taalak u Paal máakiʼ.
[Tsolajiloʼob]
^ xóot’ol 17 Utiaʼal u yilaʼal baʼax jeʼel u páajtal u xoʼokol yéetel bix jeʼel u beetaʼal le Adoración ich familiailoʼ, ilaʼak U Pʼíich Tulumil Kanan 15 tiʼ octubre tiʼ 2009, táan juʼun 29 tak 31.
¿Kʼajaʼan wa tech?
• Le óoxpʼéel baʼaloʼobaʼ, ¿bix jeʼel u yáantik le familiaʼob utiaʼal maʼ u náayal u yóoloʼoboʼ?
U yantaltiʼob junpʼéel «maʼalob ich»
U yilik u beetkoʼob baʼax ku chʼaʼtuklikoʼob utiaʼal u maas meyajtikoʼob Dios
U yantaltiʼob le adoración ich familiailoʼ
[U kʼáatchiʼiloʼob le xookoʼ]
[U tsolajil le oochel teʼ táan juʼun 13]
Le maʼalob ichoʼ jeʼel u yáantkoʼon utiaʼal maʼ u náayal k-óol yéetel le baʼaloʼob ku tsʼáaik le yóokʼol kaabaʼ