¿Letiʼe Biblia wa beetik u kiʼimaktal a wóoloʼ?

LORRAINEEʼ ku yaʼalik: «Ka káaj in xokik le Biblia sáamsamaloʼ, maʼ jatsʼuts in wilkiʼ, jach séeb u náakal in wóol. Talam in wilik in naʼatik, le oʼolal séeb u joʼopʼol in tuukul tiʼ yaanal baʼal».

Yaʼab sukuʼunoʼobeʼ bey xan u yuʼubikubaʼoboʼ. Baʼaleʼ maʼ tu pʼataj u beetkoʼobiʼ, tumen u yojloʼob kʼaʼabéet. Markeʼ ku yaʼalik: «Jach séeb u náayal u yóol máak yéetel yaanal baʼal, yéetel séeb u pʼatik máak utiaʼal uláakʼ kʼiin u xokik le Biblia yéetel u xakʼalxook chéen tu juunaloʼ. Teneʼ yaʼab u téenel tin kʼáataj u yáantaj Jéeoba yéetel tin tsʼáaj in wóol utiaʼal in xokik le Biblia sáamsamaloʼ».

¿Baʼax kʼaʼabéet a beetik utiaʼal ka taakchajak a xokik le Bibliaoʼ? ¿Baʼax jeʼel u yáantkech utiaʼal ka utschajak ta wich a xokikeʼ? Koʼox ilik jujunpʼéel baʼaloʼob jeʼel u yáantkecheʼ.

Baʼax unaj u beetik máak yéetel bix jeʼel u beetkeʼ

Payalchiʼnen táanil yéetel ilawil maʼ u náayal a wóol. Kʼáat u yáantaj Jéeoba utiaʼal ka taakchajak a xokik le Bibliaoʼ yéetel ka u jeʼekʼabt a tuukul yéetel a puksiʼikʼal utiaʼal a naʼatik le baʼax ku yaʼalikoʼ (Sal. 119:34). Wa maʼeʼ séeb kun náakal a wóol yéetel maʼ kun seguer a beetik. Lynneʼ ku yaʼalik: «Yaan kʼiineʼ jach séebaʼan in xook, maʼatech in beetik u cuentail yaʼab tiʼ le baʼaxoʼob jatsʼutstak ku yaʼalikoʼ; mix tech in jach naʼatik tiʼ baʼax ku tʼaan. Tsʼoʼoleʼ ku joʼopʼol in tuukul tiʼ yaanal baʼal. Le oʼolal kin kʼáatik tiʼ Jéeoba ka u yáanten in beet tubeel».

Ilawil u kʼaʼanaʼanil le baʼax ka kanikoʼ. Kʼaʼajaktecheʼ utiaʼal a kʼamik le kuxtal minaʼan u xuuloʼ kʼaʼabéet a naʼatik le baʼax ku yaʼalik le Bibliaoʼ yéetel a tsʼáaik ichil a kuxtal. Le oʼolal kʼaʼabéet a wilik a kaxtik le baʼaxoʼob jeʼel u yáantkech ichil a kuxtaloʼ. Chriseʼ ku yaʼalik: «Kin wilik in kaxtik le baʼaxoʼob jeʼel u yáantken in kʼex in modos yéetel le bix in tuukuloʼ. Jach jatsʼuts in wilik teʼ Biblia yéetel teʼ jóoʼsaʼaniloʼob le baʼaxoʼob jach jeʼel u yáantkenoʼ. Kex maʼ in kʼaj óol le máaxoʼob tsʼíibtoʼ mix letiʼob u kʼaj óolenoʼob».

Chʼaʼtukult a maas kʼaj óoltik le máaxoʼob ku yaʼalik le Bibliaoʼ. Ken a xok le Bibliaoʼ ilawil a kanik junpʼéel baʼal túumben tiʼ le máaxoʼob ku chʼaʼchiʼitikoʼ. Utiaʼal lelaʼ jeʼel u yáantkech le enciclopedia Perspicacia para comprender las Escrituras wa le Índice de las publicaciones Watch Tower. Wa ka máansik ta tuukul bey kuxaʼanoʼob, ka wilik u modosoʼob yéetel bix u yuʼubikubaʼobeʼ, yaan a maas kʼaj óoltikoʼob.

Kaxt junpʼéel baʼax túumben jeʼel u yáantkech ken jóokʼkech kʼaʼaytajeʼ (Hch. 17:2, 3). Lelaʼ letiʼe baʼax ku beetik Sophia ken xooknakoʼ, letiʼeʼ ku yaʼalik: «Kin kaxtik junpʼéel baʼax túumben jeʼel in waʼalik ken jóokʼken kʼaʼaytajeʼ bey xan tiʼ uláakʼ súutukiloʼob. Beyoʼ ku páajtal in tsolik maas maʼalob le baʼaxoʼob ku yaʼalik le Bibliaoʼ. Le revista U Pʼíich Tulumil Kananoʼ jach ku yáantken» (2 Tim. 2:15).

Beet bey jach táan a wilkoʼobeʼ. Hebreob 4:12, ku yaʼalik: «U tʼaan Jajal Dioseʼ kuxaʼan». Máans ta tuukul bey táan a wilik u yúuchul le baʼax ka xokikoʼ. Beet bey táan a wilik, táan a  wuʼuyik baʼax ku yaʼalaʼal yéetel bix u yuʼubikuba le máaxoʼob ku yaʼalik le xookoʼ. Tukle: «¿Tiʼ baʼax chíikaʼan le baʼax úuchtiʼob tiʼ le baʼaxoʼob ku yúuchultenoʼ? ¿Bix jeʼel in beetik jeʼex tu beetiloʼob ken in aktáant talamiloʼoboʼ?». Lelaʼ yaan u yáantkech a maas naʼat yéetel maʼ u tuʼubultech le baʼax ka xokikoʼ.

Xok le jaatsoʼob talam u naʼataʼaloʼ yéetel le jóoʼsaʼaniloʼob tuʼux ku maas tsolaʼaloʼ. Maʼ a jóoʼsik chéen junpʼíit tiempo utiaʼal a xook ta juunal. Xakʼalt le baʼaxoʼob jatsʼuts ken a wiloʼ, kaxt baʼax u kʼáat u yaʼal le tʼaanoʼob maʼ ta naʼatikoʼ yéetel meyajnaktech le tsolajiloʼob yéetel uláakʼ tekstoʼob ku taasik le Bibliaoʼ. Jeʼex u bin a maas naʼatik le baʼax ka xokik yéetel u bin a tsʼáaik ichil a kuxtaleʼ, yaan a wilik letiʼe Biblia taasik kiʼimak óolal techoʼ. Bey túunoʼ yaan a wuʼuyikaba jeʼex le salmista le ka tu yaʼalaj tiʼ Jéeobaaʼ: «A waʼalmajtʼaanoʼobeʼ kin tiaʼalintik tak minaʼan u xuul, tumen letiʼobeʼ ku kiʼimakkúuntikoʼob u yóol in puksiʼikʼal» (Sal. 119:111).

Maʼ a jáajan xook. Jóoʼs u tiempoil a beetik tubeel. Baʼaleʼ kʼaʼajaktecheʼ kʼaʼabéet xan a líiʼskaba utiaʼal le muchʼtáambaloʼoboʼ. Raqueleʼ ku yaʼalik: «Yaʼab u téeneleʼ kin wilik bey jach yaʼab baʼax yaan in xokeʼ, lelaʼ ku beetik maʼ u chʼíikil in tuukul tiʼ le baʼax kin xokikoʼ. Le oʼolal kin wilik in xook yaʼab u téenel kex maʼ u jach xáantal. Beyoʼ maas kin jóoʼsik utsil tiʼ le xookoʼ». Chris xaneʼ ku yaʼalik: «Wa kin jáajan xookeʼ ku chiʼichnakkúuntiken in conciencia, tumen maʼ tu pʼáatal tin tuukul le baʼax kin xokikoʼ yéetel maʼ tu kʼuchul tin puksiʼikʼal». ¿Baʼax jeʼel u yáantik máakeʼ? U jóoʼsik le bukaʼaj tiempo ku yilik kʼaʼabéetoʼ.

Tsʼíibolt a xokik le Bibliaoʼ. Apóstol Pedroeʼ ku yaʼalik: «Jeʼel bix paalaloʼob táant u síijloʼobeʼ tsʼíibolteʼex yéetel yaamyamil le [...] leche minaʼan u kʼasaʼaniloʼ, utiaʼal ka chʼíijkeʼex tu yoʼolal yéetel ka yanakteʼex [salvación]» (1 Ped. 2:2). Ken síijik le mejen paalaloʼoboʼ ku tsʼíiboltkoʼob u yukʼikoʼob leche, baʼaleʼ toʼoneʼ kʼaʼabéet k-ilik k-tsʼíiboltik k-tséentikba tiʼ le baʼax ku yaʼalik le Bibliaoʼ. Wa ka wilik a xokik kex junpʼéel táan juʼun sáamsamaleʼ, yaan a wilik bix kun joʼopʼol u taaktal a xokik. Ken káajakeʼ, maʼ xaaneʼ talam ken a wile, baʼaleʼ séebaʼan kun utstal ta wich.

Tuukulnen tiʼ le baʼax ka xokikoʼ. U tuukul máak tiʼ le baʼax ku xokikoʼ ku yáantaj utiaʼal u nupik yéetel le baʼax u yáax ojeloʼ. Wa ka  beetkeʼ yaan a wilik séebaʼan kun bin a kʼaj óoltik le baʼaxoʼob jach koʼojtak u tojol ku kaʼansik le Bibliaoʼ (Sal. 19:14; Pro. 3:3).

Maʼ chéen kunel k-jóoʼsik u tiempoiliʼ

Maʼ chéen chʼaʼabil u suuktal u xokik máak le Bibliaoʼ, baʼaleʼ jach yaʼab utsiloʼob ku taasik. Jeʼex u bin u maas naʼatik máak le baʼax ku kaʼansikoʼ (Heb. 5:12-14). Tsʼoʼoleʼ ku maas yantal naʼatil yéetel kʼaj óolal tiʼ máak jach jeʼel u yáantik utiaʼal ka yanak kiʼimak óolal yéetel jeetsʼelil tiʼeʼ. Le Bibliaoʼ ku yaʼalikeʼ le naʼat ku tsʼáaikoʼ «kuxtal utiaʼal le máax tiaʼalintik» yéetel ku beetik baʼax ku yaʼalikoʼ (Pro. 3:13-18).

Utiaʼal u yantaltech naʼatileʼ unaj a xakʼalxoktik le Bibliaoʼ (Pro. 15:14). Beyoʼ yaan u meyajtech utiaʼal a tsolik u nuʼuk tiʼ u maasil. Wa ku meyajtech le Biblia yéetel le jóoʼsaʼaniloʼob ku tsʼáaik le «palitsil chúukpajaʼan u yóol yéetel yaan u naʼat[oʼ]», yaan u yantaltech jeetsʼelil yéetel kiʼimak óolal (Mat. 24:45). Tsʼoʼoleʼ maas maʼ kun jáan lúubul a wóol yéetel maas yaan a tsʼáaik a wóol a meyajt Dios. Yéetel u maas maʼalobileʼ, yaan u bintech utsil ikil a meyajtik Jéeoba (Sal. 1:2, 3).

Wa k-yaabiltik Jéeoba yéetel tuláakal k-puksiʼikʼaleʼ yaan u péekskoʼon k-tsikbalt tiʼ u maasil baʼaxoʼob k-creertik. Lelaʼ jach ku taasik kiʼimak óolal. Sophiaeʼ tu yilaj u kanik jejeláas tekstoʼob utiaʼal u tsikbal yéetel le máakoʼob ken jóokʼok kʼaʼaytajoʼ, bejlaʼeʼ tsʼoʼok u maas maʼalobtal u kʼaʼaytaj. Letiʼeʼ ku yaʼalik: «Jach ku kiʼimaktal in wóol in wilik bix u líikʼil u yóol le máakoʼob ken in xok tiʼob le Bibliaoʼ».

Baʼaleʼ le maas nojoch utsil ku taasik u xoʼokol le Bibliaoʼ, letiʼe u maas biskuba máak yéetel Jéeobaoʼ. Le xakʼalxookoʼ yaan u yáantkech a maas naʼat baʼax uts tu tʼaan Dios bey xan u modos, jeʼex le yaabilaj, u yutsil yéetel u justicia. Minaʼan uláakʼ baʼax jeʼel u maas taasik kiʼimak óolaleʼ. Le oʼolal ilawil a jóoʼsik tuláakal le tiempo ku páajtal utiaʼal a xokik le Bibliaoʼ. Letiʼe baʼax maas maʼalob jeʼel u páajtal a beetkoʼ (Sal. 19:7-11).

[U tsolajil le oochel teʼ táan juʼun 5]

LE BIX JEʼEL U XOKIK MÁAK LE BIBLIAOʼ

▪ Payalchiʼnen táanil yéetel ilawil maʼ u náayal a wóol.

▪ Ilawil u kʼaʼanaʼanil le baʼax ka kanikoʼ.

▪ Chʼaʼtukult a maas kʼaj óoltik le máaxoʼob ku yaʼalik le Bibliaoʼ.

▪ Kaxt junpʼéel baʼax túumben jeʼel u yáantkech ken jóokʼkech kʼaʼaytajeʼ.

▪ Beet bey jach táan a wilkoʼobeʼ.

▪ Xok le jaatsoʼob talam u naʼataʼaloʼ yéetel le jóoʼsaʼaniloʼob tuʼux ku maas tsolaʼaloʼ.

▪ Maʼ a jáajan xook.

▪ Tsʼíibolt a xokik le Bibliaoʼ.

▪ Tuukulnen tiʼ le baʼax ka xokikoʼ.

[U tsolajil le oochel teʼ táan juʼun 4]

Máans ta tuukul bey táan a wilik u yúuchul le baʼax ka xokikoʼ