Unaj k-tsaypachtik Cristo, le máax nuʼuktikoʼon tubeeloʼ

LE MÁAXOʼOB tsaypachtik le politicoʼoboʼ jach ku yaatal u yóoloʼob yoʼolal bix u nuʼuktaʼaloʼob. Baʼaleʼ le máaxoʼob tsaypachtik Cristooʼ ku kʼamikoʼob yaʼab utsiloʼob. Letiʼeʼ tu yaʼalaj: «Koʼoteneʼex [tin wiknal], tuláakleʼex máaxeʼex kaʼananeʼex tiʼ a meyajeʼex yéetel máax aal a kucheʼex, teen bíin in beet a jeʼeleʼex. Biseʼex in kuuch ta wóokʼoleʼex, yéetel kaanbalneneʼex tiʼ teen, tumen teneʼ chúukaʼan in wóol yéetel kabal u yóol in puksiʼikʼal; beyoʼ bíin a kaxteʼex jeʼelel [a tiaʼaleʼex]» (Mat. 11:28, 29). Jeʼex túun k-ilkoʼ, le u nuʼuktaj Jesusoʼ jach ku líiʼsik k-óol. Letiʼeʼ jach ku yáantik le máaxoʼob ku muʼyajoʼoboʼ, le pechʼ óoltaʼanoʼoboʼ, yéetel ku yaʼaliktiʼob ka u tsʼáaubaʼob yáanal u nuʼuktaj. Baʼaleʼ ¿baʼax táakaʼan ichil u tsʼáaikuba máak yáanal u nuʼuktaj Cristo?

Apóstol Pedroeʼ ku yaʼalik: «Cristoeʼ muʼyajnaj ta woʼolaleʼex, ka tu tsʼáajteʼex junpʼéel kaʼansaj, utiaʼal ka kuxlakeʼex jeʼel bix kuxlajik letiʼoʼ» (1 Ped. 2:21). Baʼaleʼ ¿jach wa kʼaʼabéet k-kuxtal jeʼex kuxlajik Jesusoʼ? Koʼox ketik beyaʼ. Koʼox aʼalikeʼ tiaʼanech tiʼ junpʼéel Hospital yoʼolal junpʼéel talam kʼojaʼanil tsʼoʼok u tsaʼayal tiʼ yaʼab máak, baʼaleʼ ku taal juntúul doctor u yojel bix jeʼel u tsʼakikeʼ, ¿máasaʼ jeʼel a wilik a beetik tuláakal baʼax ken u yaʼaltecheʼ? Toʼon xaneʼ unaj k-ilik k-beetik baʼax ku yaʼalik Cristo utiaʼal ka yanaktoʼon le kuxtal minaʼan u xuuloʼ. Wa k-kʼáat k-salvartbaeʼ unaj k-kuxtal jeʼex kuxlajik letiʼoʼ. Utiaʼal lelaʼ unaj k-uʼuyik u tʼaan yéetel k-beetik baʼax ku yaʼalik yéetel unaj k-chaʼik u nuʼuktikoʼon le máaxoʼob u tsʼaamajoʼ.

K-uʼuyik u tʼaan yéetel k-beetik baʼax ku yaʼalik

Tu tsʼoʼokbal le tsikbal tu beetaj Jesús teʼ puʼukoʼ, tu yaʼalaj: «Le máax ku yuʼubik in tʼaan yéetel ku beetik baʼax kin waʼalikeʼ, bey juntúul máak yaan u naʼat tu beetaj u yotoch tu yóokʼol tuunicheʼ. Kʼáax cháakeʼ, áalkabnaj le jaʼoboʼ, taal kʼaʼamkach iikʼ tu yóokʼol le najoʼ, baʼaleʼ maʼ lúubiʼ, tumen yóokʼol tuunich yaan u chuunpakʼil» (Mat. 7:24, 25).

Jesuseʼ tu yaʼaleʼ «yaan u naʼat» le máax uʼuyik u tʼaan yéetel ku beetik le baʼax tu yaʼaloʼ. ¿Kux túun toʼon? ¿K-beetik wa yéetel kiʼimak óolal tuláakal le baʼax ku yaʼalik Cristo utiaʼal k-eʼesik tsiikil tiʼ yéetel k-ilik jach nojoch le baʼax tu beetaj t-oʼolaloʼ? ¿Wa k-ilik k-beetik chéen le baʼax maʼ jach talamtakoʼ wa chéen le ku taasiktoʼon utsiloʼ? Kʼaʼajaktoʼoneʼ letiʼeʼ tu yaʼalaj: «Teneʼ mantatsʼ kin beetik le baʼax uts tu tʼan [in Taataoʼ]» (Juan 8:29). Lelaʼ letiʼe tuukul unaj u yantaltoʼonoʼ.

Le apostoloʼob teʼ yáax siglooʼ, tu yeʼesoʼob bix unaj u tsʼáaikuba máak yáanal u nuʼuktaj Cristo. Jeʼex juntéenjeakeʼ «Pedroeʼ tu yaʼalaj tiʼ Jesús: Yuumtsil toʼoneʼ tsʼoʼok k-pʼatik tuláakal baʼax yaantoʼon, yéetel tsʼoʼok k-taal ta paach» (Mar. 10:28). Jeʼex túun k-ilkoʼ, le apostoloʼoboʼ jach maʼalob u yilkoʼob bix u nuʼuktaj Jesús, le oʼolal tu pʼatoʼob tuláakal baʼax yaantiʼob utiaʼal u tsaypachtikoʼob (Mat. 4:18-22).

K-chaʼik u nuʼuktikoʼon le máaxoʼob u tsʼaamaj Cristooʼ

Le maʼ yaʼab u bin u kíimil Jesusoʼ tu yaʼalaj uláakʼ junpʼéel bix jeʼel u tsʼáaikuba máak yáanal u nuʼuktajeʼ: «Le máax ku kʼamik jeʼel máaxak ka in túuxteʼ, ku kʼamken xan» (Juan 13:20, NM). Letiʼeʼ tu yaʼaleʼ tuláakal le máaxoʼob yéeyaʼanoʼob utiaʼal u binoʼob kaʼanoʼ u «sukuʼunoʼob» (Mat. 25:40). Ka tsʼoʼok u kaʼa kuxtal yéetel u bin teʼ kaʼanoʼ, Cristoeʼ tu túuxtoʼob tʼaan tu kʼaabaʼ. Letiʼob túuneʼ tu invitartoʼob le máakoʼob  u kaʼa bisubaʼob yéetel Jéeoba, jeʼex aʼalaʼabiktiʼoboʼ (2 Cor. 5:18-20). Bey túunoʼ, k-tsʼáaikba yáanal u nuʼuktaj Jesuseʼ, u kʼáat u yaʼal k-chaʼik u nuʼuktikoʼon u «sukuʼunoʼob».

Tuláakloʼon unaj k-tuklik bix k-kʼamik le tsolnuʼukoʼob ku tsʼaʼabaltoʼon teʼ Bibliaoʼ, teʼ jóoʼsaʼaniloʼoboʼ yéetel teʼ muchʼtáambaloʼoboʼ. Ken k-kʼam le tsolnuʼukoʼobaʼ k-eʼesik táan k-uʼuyik u tʼaan le Máax nuʼuktikoʼonoʼ (2 Ped. 3:1, 2). Ken k-jóoʼs u súutukil utiaʼal k-xookeʼ k-eʼesik k-kʼamik yéetel kiʼimak óolal u tsolnuʼukoʼob. Baʼaleʼ ¿baʼax k-beetik ken k-uʼuy u kaʼa aʼalaʼal junpʼéel tsolnuʼuk ku tsʼáaik le Bibliaoʼ? Tuukulnakoʼon tiʼ le tsolnuʼuk ku yaʼalik ka tsʼoʼokok u beel máak chéen yéetel máax meyajtik Jéeobaoʼ (1 Cor. 7:39). Lelaʼ yaʼab u téenel tsʼoʼok u tsoʼolol tu revistail U Pʼíich Tulumil Kanan ich maas tiʼ cien jaʼaboʼob. U jóoʼsaʼal xookoʼob yaan yil yéetel le tsolnuʼukaʼ bey xan yéetel uláakʼ baʼaloʼobeʼ ku yeʼesik u «sukuʼunoʼob» Cristoeʼ jach u yaabiltmoʼonoʼob. Ken k-beet le baʼax ku yaʼalikoʼoboʼ, k-eʼesik k-kʼamik le nuʼuktaj ku tsʼáaik Jesusoʼ.

Proverbios 4:18 ku yaʼalik: «U beel le [máax toj u kuxtaloʼ] bey u sáasilil junpʼéel túumben kʼiineʼ; ku bin u jóokʼol jujunpʼíitil tak ken jóom sáasilchajak yéetel tuláakal u muukʼ». Le tekstoaʼ ku yeʼesiktoʼoneʼ Jesuseʼ maʼ jelekbaliʼ, mantatsʼ táan u nuʼuktikoʼon. Le oʼolal junpʼéel bix k-chaʼik u nuʼuktikoʼon u «sukuʼunoʼob» Cristoeʼ, letiʼe k-kʼamik yéetel kiʼimak óolal le baʼaxoʼob túumbentak ku tsolik «le palitsil chúukpajaʼan u yóol yéetel yaan u naʼat[oʼ]» (Mat. 24:45).

¿Bix uláakʼ jeʼel k-eʼesik tsiikil tiʼ u «sukuʼunoʼob» Cristoeʼ? Letiʼe k-múul meyaj yéetel le ancianoʼob teʼ múuchʼuliloʼ, lelaʼ bey u yaʼalik Pablo: «Uʼuyeʼex u tʼaan le máaxoʼob nuʼuktikteʼex le bejoʼ yéetel yaneneʼex yáanal u páajtaliloʼob; tumen letiʼob [...] kanáantik[eʼex]» (Heb. 13:17). Maʼ xaaneʼ juntúul ancianoeʼ jeʼel u yaʼaliktoʼon ka yanaktoʼon cada semana le Adoración ich Familiailoʼ wa ku yaʼaliktoʼon junpʼéel bix jeʼel k-maas maʼalobkíintik k-meyajtik Dioseʼ. Wa maʼ xaaneʼ ku yaʼalaʼaltoʼon tumen juntúul superintendente tiʼ circuito baʼax unaj k-maʼalobkíintik ichil k-kuxtal. Ken k-kʼam yéetel kiʼimak óolal yéetel ken k-beet le baʼax ku yaʼalaʼaltoʼonoʼ, k-eʼesik táan k-chaʼik u nuʼuktikoʼon Cristo.

U maasil máakoʼobeʼ táan u muʼyajoʼob tumen maʼ maʼalob bix u nuʼuktaʼaloʼobiʼ. Baʼaleʼ toʼoneʼ jach kiʼimak k-óol yoʼolal le nuʼuktaj ku tsʼáaiktoʼon Cristooʼ. Toʼoneʼ tsʼoʼok k-chʼaʼtuklik u seguer k-beetik baʼax ku yaʼalik yéetel k-chaʼik u nuʼuktikoʼon le máaxoʼob u yéeymoʼ.

[U tsolajil le oochel teʼ táan juʼun 27]

¿Bix k-ilik le tsolnuʼuk ku tsʼáaik le Biblia tiʼ u tsʼoʼokol u beel máak chéen yéetel máax meyajtik Diosoʼ?