Junpʼéel U Pʼíich Tulumil Kanan ich inglés maʼ talam u naʼataʼaliʼ

JACH kiʼimak k-óol k-aʼalikteʼexeʼ desde le revista jeʼelaʼ, yaan u káajal u jóoʼsaʼal ich inglés maʼ talam u naʼataʼal le revista utiaʼal le múuchʼuliloʼ, lelaʼ yaan u jóoʼsaʼal ichil junpʼéel jaʼab utiaʼal u yilaʼal wa yaan u seguer u jóoʼsaʼal. Yéetel yaan u jóoʼsaʼal junmúuchʼ yéetel le suukaʼan u jóoʼsaʼaloʼ. Yaan u taasik le xookoʼob utiaʼal xakʼaltbiloʼ bey xan jujunpʼéel uláakʼ xookoʼob. ¿Baʼax u biilal le túumben revistaaʼ? Utiaʼal u yáantik yaʼabkach j-jaajkunajoʼob tiʼ Jéeoba u jóoʼsoʼob u yutsil le kaʼansaj ku keʼetel yéetel janaloʼ.

Tu luʼumiloʼob Fiyi, Ghana, Kenia, Liberia, Nigeria, Papúa Nueva Guinea yéetel teʼ islaʼob Salomonoʼ maases chéen inglés ku tʼaʼanliʼ. Le oʼolal le muchʼtáambaloʼoboʼ ku máansaʼal ich inglés, yéetel le sukuʼunoʼoboʼ ku kʼaʼaytajoʼob ich inglés kex yaanal idioma ku tʼankoʼob tu yotochoʼob. Baʼaleʼ le inglés ku meyaj teʼ jóoʼsaʼaniloʼoboʼ maas talam u naʼataʼal tiʼ le ku tʼanik le sukuʼunoʼobaʼ. Tsʼoʼoleʼ yaʼab tiʼ le máaxoʼob meyajtik Jéeobaoʼ yaanal luʼumil kajaʼanoʼob, le oʼolal ku kʼaʼabéettal u tʼaanoʼob ich inglés kex maʼ u jach oojloʼobiʼ. Yanoʼob xaneʼ maʼ tu páajtal u binoʼob tiʼ junpʼéel múuchʼulil ichil u idiomaʼob.

Jeʼex k-ojlileʼ, le xookoʼob k-xakʼaltik cada semana teʼ tu Xookil U Pʼíich Tulumil Kananoʼ letiʼe baʼax ku meyaj utiaʼal k-kʼamik le kaʼansaj ku keʼetel yéetel janal ku tsʼaʼabal tu yorailoʼ. Le oʼolal utiaʼal u jóoʼsaʼal utsil tumen le sukuʼunoʼob tʼanik junpʼíit inglesoʼ, ku jóoʼsaʼal le revista ku taasik tʼaanoʼob maʼ talam u naʼataʼaloʼ. Yaan u kʼexaʼal u yáax táan juʼunil, baʼaleʼ junpʼéeliliʼ u joʼol xookiloʼob, u xóotʼoliloʼob yéetel u kʼáatchiʼiloʼob, bey xan le fotoʼob ku taaskoʼ. Beyoʼ cada juntúuleʼ jeʼel u páajtal u meyajtiʼ u revistail U Pʼíich Tulumil Kanan maas ku naʼatikeʼ. Wa ka tʼanik ingleseʼ, ¿a kʼáat wa a wil u jelaʼanil le kaʼapʼéel revistaʼobaʼ? Teʼ kabaloʼ ku chíikpajal u jelaʼanil le kaʼapʼéel xóotʼol tiʼ le yáax xook kun xakʼaltbil teʼ múuchʼulil tiʼ le revistaaʼ.

Yaʼab sukuʼunoʼobeʼ tsʼoʼok u kʼáatkoʼob tiʼ Jéeoba: «Tsʼáaten naʼat utiaʼal in kanik a waʼalmajtʼaanoʼob» (Sal. 119:73). K-ojel le túumben revistaaʼ yaan u yáantaj utiaʼal u béeytal le baʼax ku tsʼíiboltkoʼobaʼ. K-kʼáat óoltik ka meyajnak tiʼ le táankelmoʼob yéetel le máaxoʼob maʼ u jach oojloʼob inglés utiaʼal u líiʼskubaʼob maas maʼalob utiaʼal U Xookil U Pʼíich Tulumil Kanan cada semanaoʼ. Nib óolal Jéeoba yoʼolal le yaabilaj ka weʼesik tiʼ tuláakal «le sukuʼunoʼoboʼ» yéetel ikil a tsʼáaiktoʼon yaʼabkach kaʼansaj ku keʼetel yéetel janal yoʼolal «le palitsil chúukpajaʼan u yóol yéetel yaan u naʼa[toʼ]» (1 Ped. 2:17; Mat. 24:45).

Cuerpo Gobernante tiʼ u J-jaajkunajoʼob Jéeoba