¿Yaan wa k-kʼamik le nuʼuktaj ku tsʼáaik Jéeoba yéetel yaabilajoʼ?
¿Yaan wa k-kʼamik le nuʼuktaj ku tsʼáaik Jéeoba yéetel yaabilajoʼ?
«In pʼekʼtmaj tuláakal tuusil kuxtal.» (SAL. 119:128)
1, 2. 1) ¿Baʼax maʼalob ka u yojéelt máak táanil tiʼ u bin xíimbal wa tuʼux? 2) ¿Baʼaxoʼob ku yaʼaliktoʼon Jéeoba, yéetel baʼaxten ku yaʼaliktoʼon?
KOʼONEʼEX aʼalikeʼ k-kʼáat bin xíimbal wa tuʼux, le oʼolal k-kʼáatik tiʼ juntúul k-amigo u kʼaj óol le bej ka u yaʼaltoʼon bix jeʼel k-kʼuchloʼ. Letiʼeʼ maʼ chéen ku yaʼalik baʼax bejil unaj k-biskiʼ, baʼaxeʼ ku yaʼalik xan baʼax jeʼel u taasik talamil toʼoneʼ. Ku yaʼaliktoʼoneʼ yaan junpʼéel letrero tsʼaʼan utiaʼal u tusik máak yéetel yaʼab máaxoʼob tsʼoʼok u saʼatloʼob tu yoʼolal. ¿Máasaʼ jach jeʼel k-tsʼáaik u nib óolalil tiʼ ikil u yaʼaliktoʼoneʼ? Bey túunoʼ yaan k-ilik k-beetik le baʼax ku yaʼalikoʼ. Jéeobaeʼ bey xan u beetkoʼ. Letiʼeʼ ku yaʼaliktoʼon bix jeʼel k-kʼuchul teʼ kuxtal minaʼan u xuuloʼ. Baʼaleʼ ku yaʼaliktoʼon xan baʼax jeʼel u beetik k-pʼatik le maʼalob bejoʼ (Deu. 5:32; Isa. 30:21).
2 Teʼ xook yéetel teʼ tuláakʼoʼ yaan k-ilik le jejeláas baʼaloʼob ku yaʼalik Jéeoba, k-Maas maʼalob Amigo, jeʼel u taasiktoʼon talamiloʼ. Kʼaʼajaktoʼoneʼ letiʼeʼ ku yaʼalik tiʼ baʼaxoʼob unaj k-kanáantikba, tumen jach u yaabiltmoʼon yéetel u kʼáat ka kʼuchkoʼon yéetel uts teʼ kuxtal minaʼan u xuuloʼ. Jach jeʼel u yaatal u yóol ka u yil tsʼoʼok k-tuʼusleʼ (Eze. 33:11). Koʼoneʼex ilik óoxpʼéeliʼ. Le yáaxoʼ ku taal tiʼ uláakʼ máakoʼob; le u kaʼapʼéeloʼ t-puksiʼikʼal; le u yóoxpʼéeloʼ tiʼ le baʼaxoʼob «maʼ jaajtak», jeʼex u yaʼalik le Bibliaoʼ. Jach kʼaʼabéet k-kʼaj óoltik máakalmáak le baʼaloʼobaʼ yéetel bix u yáantkoʼon Jéeoba utiaʼal maʼ u tuskoʼonoʼob. Juntúul máax tsʼíibt le Bibliaoʼ ku yaʼalik: «In pʼekʼtmaj tuláakal tuusil kuxtal [wa tuláakal baʼax kʼaas]» (Sal. 119:128). ¿K-pʼektik wa xan le baʼax kʼaasoʼ? ¿Baʼax jeʼel u yáantkoʼon k-pʼekteʼ?
«Maʼ a tsaypachtik le sen yaʼab máakoʼob[oʼ]»
3. 1) ¿Baʼaxten maʼ maʼalob ka xiʼikoʼon tu paach u maasil chéen tumen maʼ k-ojel tuʼux unaj k-biniʼ? 2) ¿Baʼax ku yaʼalik Éxodo 23:2 unaj k-beetik?
3 Koʼoneʼex tuklikeʼ tsʼoʼok u káajal k-bin teʼ viajeoʼ. ¿Baʼax jeʼel k-beetik wa k-kʼuchul tiʼ junpʼéel xaʼay bej yéetel maʼ k-ojel tuʼux unaj k-biniʼ? Maʼ xaaneʼ k-ilik yaʼab máakoʼob táan u binoʼob tiʼ junpʼéel tiʼ le bejoʼoboʼ, bey túunoʼ ku taaktal k-bin tu paachoʼob. Baʼaleʼ jach maʼ maʼalob ka xiʼik máak tiʼ junpʼéel bej chéen tumen tiʼ ku bin u maasiliʼ. Maʼ tuláakal le máaxoʼob ku viajaroʼob ku binoʼob teʼ tuʼux k-binoʼ, yéetel maʼ tuláakloʼob u kʼaj óoloʼob le bej tubeeloʼ. Baʼaleʼ lelaʼ ku kaʼansiktoʼon junpʼéel baʼal jach jaaj. Lelaʼ ku chʼaʼabal tiʼ le baʼax ku yaʼalik junpʼéel tiʼ le leyoʼob tu tsʼáaj Jéeoba tiʼ u kaajil Israeloʼ. Dioseʼ tu yaʼalaj tiʼ cada juntúul tiʼ le máaxoʼob ku yaʼalikoʼob jach bix úuchik wa baʼaxoʼ bey xan tiʼ le ku beetik u jueziloʼoboʼ: «Maʼ a tsaypachtik le sen yaʼab máakoʼob[oʼ]» (xokaʼak Éxodo 23:2). ¿Baʼaxten tu yaʼalaj lelaʼ? Tumen u yojel, yoʼolal le kʼebanoʼ, jach séeb jeʼel k-beetik le baʼax ku beetik u maasiloʼ bey xan jeʼel k-beetik junpʼéel baʼax maʼ maʼalobeʼ. U jaajileʼ maʼ chéen le juezoʼob unaj u kanáantkoʼob maʼ u beetkoʼob le baʼax ku beetik u maasiloʼ, tuláakal unaj u beetik.
4, 5. ¿Baʼax talamil tu aktáantaj Josué yéetel Caleb, yéetel baʼax áantoʼob utiaʼal maʼ u beetkoʼob baʼax kʼaas?
4 U jaajileʼ óoliʼ tuláakal máak ku taaktal u beetik baʼax ku yilik u beetik u maasil. Tsʼoʼoleʼ le baʼax ku jáan úuchul tiʼ máakoʼ jeʼel u bisik u beet baʼax ku beetik u maasileʼ. Tuukulnakoʼon tiʼ baʼax úuch tiʼ Josué yéetel Caleb. Letiʼobeʼ táakpajoʼob ichil le doce máakoʼob binoʼob u yiloʼob le Luʼum Aʼalaʼan u Tsʼaʼabaloʼ. Diez tiʼ letiʼobeʼ tu beetoʼob u lúubul u yóol u maasil yoʼolal baʼax tu yaʼaloʼob. Kʼuch tak u yaʼaloʼobeʼ tu yiloʼob nukuch máakoʼob, u paalal le nefilimoʼoboʼ, wa u paalal le angeloʼob yanchaj yéetel le koʼoleloʼoboʼ (Gén. 6:4). ¿Baʼaxten jach maʼ maʼalob le baʼax tu yaʼaloʼoboʼ? Tumen u paalal le angeloʼoboʼ maʼ yanchaj u paalaloʼobiʼ, tsʼoʼoleʼ tiʼ kíimoʼob teʼ Búulkabaloʼ. Lelaʼ ku yeʼesikeʼ, wa maʼ muʼukʼaʼan u fe máakeʼ, jeʼel u creertik jeʼel baʼalakeʼ. Lelaʼ bey úuchik tiʼ le israelitaʼoboʼ: le baʼax tu yaʼalaj le diez máakoʼoboʼ jach tu beetaj u sajaktaloʼob. Le oʼolal u maas yaʼabil tiʼ letiʼobeʼ tu tukloʼobeʼ maʼ maʼalob ka u beetoʼob baʼax ku yaʼalik Jéeoba utiaʼal ka ookkoʼob teʼ Luʼum Aʼalaʼan u Tsʼaʼabaloʼ. ¿Baʼax túun tu beetaj Josué yéetel Caleb? (Núm. 13:25-33.)
5 Maʼ tu beetoʼob baʼax tu beetaj u maasiliʼ. Kex maʼ uʼuyaʼab le baʼax tu yaʼaloʼob tumen u maasil yéetel aʼalaʼab tak u kíimsaʼaloʼobeʼ, letiʼobeʼ tu yaʼaloʼob u jaajil. ¿Baʼax áantoʼob utiaʼal maʼ u chʼaʼikoʼob saajkil? Letiʼe fejoʼ. Tumen wa yaan u fe máakeʼ, séebaʼan u yilik u jelaʼanil le baʼaxoʼob ku yaʼalik u beetik Jéeoba tiʼ le baʼaxoʼob ku yaʼalik chéen máakoʼoboʼ. Ka máan kʼiineʼ Josué yéetel Calebeʼ tu yaʼaloʼob jach kiʼimak u yóoloʼob tumen Dioseʼ tsʼoʼok u beetik tuláakal le baʼaxoʼob u yaʼalmaj u beetkoʼ (xokaʼak Josué 14:6, 8 yéetel 23:2, 14). Letiʼobeʼ chúukpaj u yóoloʼob yéetel maʼ tu beetoʼob baʼax kʼaas tu táan Jéeoba chéen utiaʼal u kiʼimakkúuntikoʼob u yóol le máakoʼob minaʼan u fejoʼoboʼ. Le oʼolal maʼ xuʼul u beetkoʼob baʼax uts tu tʼaan Diosiʼ. ¿Máasaʼ jach maʼalob ka k-beet xan beyoʼ? (Núm. 14:1-10.)
6. ¿Baʼax jeʼel u beetik k-tuukul jeʼex u maasileʼ?
6 ¿Yaan wa kʼiin tsʼoʼok u taaktal k-beetik le baʼaxoʼob ku beetik u maasiloʼ? Bejlaʼeʼ óoliʼ tuláakal máak maʼatech u yeʼesik tsiikil tiʼ Jéeoba mix tiʼ u leyoʼob, lelaʼ maases ku yilaʼal tiʼ le bix u náaysik u yóoloʼoboʼ. Yaʼab máakeʼ ku yaʼalikeʼ le núupkʼeban, le u beetaʼal loob yéetel le baʼaloʼob yaan yil yéetel espiritismo ku máansaʼal teʼ televisión, teʼ cine, yéetel teʼ videojuegoʼoboʼ maʼatech u beetik kʼaas tiʼ mix máak (2 Tim. 3:1-5). Baʼaleʼ maʼalob ka k-tukle: «Ken in yéey yéetel baʼaxoʼob ken in náays in wóol yéetel in familiaeʼ, ¿kin tuukul wa jeʼex u maasil máakoʼob ku yaʼalikoʼob, jeʼel baʼalak ka u chʼaʼtukloʼobeʼ maʼalob?». Wa beyoʼ, maʼ táan k-beetik le baʼax ku yaʼalik le tekstoaʼ: «Maʼ a tsaypachtik le sen yaʼab máakoʼo[boʼ]».
7, 8. 1) ¿Bix jeʼel k-kanik k-chʼaʼtukult k-beetik baʼax maʼalobeʼ, yéetel baʼaxten maas maʼalob ke ka tsʼaʼabaktoʼon junpʼéel lista tiʼ baʼaxoʼob maʼ unaj k-beetkiʼ? 2) ¿Baʼax maʼalob ku beetik yaʼab táankelem paalaloʼob?
7 Jéeobaeʼ u tsʼaamajtoʼon junpʼéel baʼax ku yáantkoʼon k-chʼaʼtukult baʼax ken k-beete. U páajtalil k-ilik baʼax uts yéetel baʼax kʼaas. Utiaʼal u yáantkoʼon tubeel le páajtalil u tsʼaamajtoʼon Jéeobaoʼ, unaj «u suuktal» u meyajtoʼon (Heb. 5:14). Baʼaleʼ lelaʼ maʼ tu páajtal u beetik máak wa chéen ku beetik jeʼex u beetik u maasiloʼ, mix wa ka u beet cada junpʼéel baʼax ku yaʼalik junpʼéel lista tiʼ baʼaloʼob chéen tu juunal máak unaj u chʼaʼtuklik jeʼex u yaʼalik u concienciaeʼ. Le oʼolal u j-jaajkunajoʼob Jéeobaeʼ maʼatech u beetkoʼob u listail tiʼ baʼax peliculail maʼ unaj u chaʼantaʼaliʼ, baʼax libroil maʼ unaj u xokik máakiʼ, mix baʼax jeʼel u páajtal u yilaʼaloʼob ich Interneteʼ. Tsʼoʼoleʼ le yóokʼol kaabaʼ jach séeb u kʼexpajal, le oʼolal wa ku beetaʼal junpʼéel listaeʼ, chéen wa jaypʼéel minuto tsʼoʼokok u beetaʼaleʼ, ku pʼáatal maʼ maʼalobiʼ (1 Cor. 7:31). Tsʼoʼoleʼ junpʼéel listaeʼ ku luʼsiktoʼon u páajtalil k-beetik baʼax jach kʼaʼanaʼan: k-xakʼalxoktik baʼax ku yaʼalik le Bibliaoʼ yéetel k-kʼáatik u yáantaj Dios ich payalchiʼ utiaʼal k-chʼaʼtuklik k-beetik baʼax uts tu tʼaan (Efe. 5:10).
8 U jaajileʼ maʼ tuláakal máak maʼalob ken u yilil le baʼax ken k-chʼaʼtukult k-beetik jeʼex u yaʼalik le Bibliaoʼ yéetel yanoʼobeʼ yaan u yóotik u yaʼaloʼobtoʼon baʼax unaj k-beetik. Jeʼex le táankelem paalaloʼoboʼ, maʼ xaaneʼ jeʼel u yaʼalaʼaltiʼob tumen u yéet xookoʼob ka u beetoʼob le baʼaxoʼob ku beetik u maasil utiaʼal u náaysik u yóoloʼoboʼ (1 Ped. 4:4). Baʼaleʼ jach maʼalob u yilaʼal yaʼab sukuʼunoʼobeʼ, kex jeʼel jaypʼéel jaʼab yaantiʼobeʼ, ku yilik u beetkoʼob jeʼex tu beetil Josué yéetel Calebeʼ. Ku yilik u beetkoʼob le baʼax ku yaʼalik le tekstoaʼ: «Maʼ a tsaypachtik le sen yaʼab máakoʼo[boʼ]».
«Maʼ jíiltaʼaleʼex tumen a tuukuleʼex yéetel a tsʼíibolaleʼex»
9. 1) Wa táan a bin xíimbaleʼ, ¿baʼaxten maʼ maʼalob ka xiʼikech tiʼ junpʼéel bej chéen tumen uts ta wichiʼ? 2) ¿Baʼaxten le israelitaʼoboʼ jach unaj u beetkoʼob kaʼach le baʼax ku yaʼalik Números 15:37 tak 39?
9 Le u kaʼapʼéel baʼax jeʼel u taasiktoʼon talamiloʼ junpʼéel baʼax ku taal tiʼ toʼon. Tuukulnakoʼon tiʼ le viaje tsʼoʼok k-yáax aʼalikeʼ. ¿Baʼax jeʼel u yúuchul wa ku xuʼulul k-nuʼuktikba yéetel le mapa yéetel ka seguernak k-bin chéen teʼ tuʼuxoʼob maas jatsʼuts k-ilkoʼ? Maʼ ken kʼuchul teʼ tuʼux k-tukultmaj kaʼachoʼ. Lelaʼ ku yáantkoʼon k-naʼat uláakʼ junpʼéel baʼax tu yaʼalaj Jéeoba tiʼ le israelitaʼob úuchjeakiloʼ. Tu yaʼalajtiʼobeʼ unaj beetkoʼob u flecosil u nookʼoʼob yéetel unaj u tsʼáaikoʼob junpʼéel cinta azuliʼ (xokaʼak Números 15:37-39). Maʼ xaaneʼ bejlaʼeʼ yaʼab máakeʼ maʼatech u naʼatik baʼaxten tsʼaʼab le ley tiʼobaʼ, baʼaleʼ yaan junpʼéel baʼax oʼolal tsʼaʼabi. Tu kʼaʼajsaj tiʼ le israelitaʼoboʼ letiʼobeʼ maʼ beyoʼob jeʼex u maasil kaajoʼob maʼatech u adorartikoʼob Diosoʼ, lelaʼ jach kʼaʼabéetchaj utiaʼal u seguer u biskubaʼob yéetel Dios (Lev. 18:24, 25). Baʼaleʼ yaan uláakʼ baʼax oʼolal tsʼaʼab le leyaʼ. Koneʼex xakʼaltik utiaʼal k-ilik bix jeʼel k-kanáantikba tiʼ u kaʼapʼéel baʼax jeʼel u beetik k-náachtal tiʼ Jéeobaoʼ.
10. ¿Bix tu yeʼesil Jéeoba jach maʼalob u kʼaj óoltmil wíinik?
10 Le ley tu tsʼáaj Jéeoba tiʼ le israelitaʼoboʼ, ku yaʼalik: «Maʼ jíiltaʼaleʼex tumen a tuukuleʼex yéetel a tsʼíibolaleʼex». Letiʼeʼ tu tsʼáaj le leyaʼ tumen jach u kʼaj óol bix wíinik. U yojel k-puksiʼikʼaleʼ ku chaʼik u jíiltaʼal tumen baʼaxoʼob ku paktik le ichoʼ. Le oʼolal ku yaʼalik: «Minaʼan uláakʼ baʼal ku tuus yéetel sen [kʼasaʼan] jeʼel bix u puksiʼikʼal wíinikeʼ. ¿Máax jeʼel u páajtal u chʼaʼnuʼuktik bixeʼ?» (Jer. 17:9). ¿K-naʼatik wa baʼaxten tu yaʼalaj Jéeoba tiʼ le israelitaʼob maʼ u chaʼik u jíiltaʼaloʼob tumen u tuukuloʼob yéetel tumen baʼax ku tsʼíiboltkoʼoboʼ? Tumen u yojel yaan u yutstal tu yichoʼob le baʼax ku beetik le kaajoʼob yanoʼob tu baʼpachoʼoboʼ. Wa ku chʼíikil u paktoʼob le bix u kuxtaloʼoboʼ, yaan u joʼopʼol u takik u nookʼoʼob jeʼex letiʼoboʼ, yaan u tuukuloʼob jeʼex letiʼoboʼ yéetel yaan u beetkoʼob le baʼaxoʼob suuk u beetkoʼoboʼ (Pro. 13:20).
11. ¿Bix jeʼel u tuʼusul k-puksiʼikʼal tumen k-icheʼ?
11 Bejlaʼeʼ maas séebaʼan jeʼel u tuʼusul k-puksiʼikʼal tumen le baʼaxoʼob k-ilkoʼ. Le yóokʼol kaabaʼ séeb u beetik k-tsʼíiboltik baʼaxoʼob kʼaastak. Le oʼolaleʼ, ¿bix jeʼel u páajtal k-beetik le baʼax ku yaʼalik Números 15:39? Maʼ xaaneʼ tsʼoʼok k-ilkeʼ teʼ escuela, teʼ tuʼux k-meyaj, wa teʼ tuʼux kajaʼanoʼonoʼ le máakoʼoboʼ táan u maas kʼastal bix u vestirkubaʼob. Tumen sáamsamal táan k-ilik bix u vestirkubaʼobeʼ, jeʼel u taaktal k-vestirtikba jeʼex letiʼobeʼ, maʼ jeʼex juntúul máax meyajtik Dioseʼ (Rom. 12:1, 2.)
12, 13. 1) ¿Baʼax unaj k-beetik wa k-chʼíikil k-pakt baʼaloʼob maʼ unajiʼ? 2) ¿Baʼaxten unaj k-ilik maʼ k-beetik u tsʼíiboltaʼal baʼax kʼaas tumen u maasil?
12 Jach unaj k-kanik k-controlartba. Wa k-chʼíikil k-pakt baʼax maʼ unajeʼ, unaj k-beetik jeʼex Jobeʼ, letiʼeʼ tu chʼaʼtuklaj maʼ u chʼíikil u pakt juntúul koʼolel yéetel u tsʼíiboltik wa maʼ u yataniʼ (Job 31:1). David xaneʼ tu yaʼalaj: «Mix bikʼin bíin in tsʼáa in paakat [tiʼ baʼaloʼob mix baʼal u biilaloʼob]» (Sal. 101:3). U jaajileʼ tuláakal le baʼax jeʼel u kʼaskúuntik k-conciencia yéetel jeʼel u beetik u xuʼulul k-bisikba yéetel Jéeobaeʼ, mix baʼal u biilaloʼob. Le oʼolal maʼ unaj k-chʼíikil k-pakt mix baʼal jeʼel u beetik k-tsʼíiboltik baʼaloʼob kʼaastak yéetel jeʼel u beetik k-lúubul tiʼ kʼebaneʼ.
13 Yaan kʼiineʼ, kex maʼ k-kʼáateʼ jeʼel k-kʼuchul k-beetba bey junpʼéel baʼal mix baʼal u biilaleʼ. ¿Jeʼel wa u yúuchul lelaʼ? Jeʼeleʼ. ¿Bixi? Wa k-beetik u tsʼíiboltaʼal baʼax kʼaas tumen u maasil yoʼolal baʼax k-beetik. Jeʼex wa ku xuʼulul k-tsʼáaik «kʼambeʼen nookʼoʼob, yéetel chʼaʼ suʼtalil», jeʼex u yaʼalik le Bibliaoʼ (1 Tim. 2:9). Utiaʼal k-ilik wa kʼambeʼen junpʼéel nookʼeʼ, maʼalob ka k-il baʼax ku tuklik u maasil tu yoʼolal. Tsʼoʼoleʼ maʼ unaj k-beetik baʼax jeʼel u beetik u chiʼichnaktal u conciencia u maasiliʼ. Baʼax kʼaʼabéet k-tsʼáaik táanileʼ u yutsil u maasil, maʼ chéen baʼaxoʼob uts t-ichiʼ (Rom. 15:1, 2). Jach jatsʼuts u yilaʼal teʼ múuchʼuliloʼoboʼ yaʼab táankelem paalaloʼobeʼ jach maʼalob bix u vestirtikubaʼob. ¿Máasaʼ lelaʼ jach ku beetik u kiʼimaktal k-óol? Ku yeʼeskoʼob maʼ táan u chaʼik u jíiltaʼaloʼob tumen u tuukuloʼob yéetel u tsʼíibolaloʼobiʼ, baʼaxeʼ táan u yilik u kiʼimakkúuntikoʼob u yóol Jéeoba tiʼ tuláakal baʼax ku beetkoʼob.
Maʼ k-bin tu paach baʼaloʼob «maʼ jaaj[takiʼ]»
14. ¿Baʼax aʼalaʼab tiʼ Samuel tumen Jéeoba ka u yaʼal tiʼ le israelitaʼoboʼ?
14 Tuukulnakoʼon tu kaʼatéen tiʼ le viajeiʼ. ¿Baʼax jeʼel u yúuchul wa le táan k-binoʼ, k-tséelel yaanal tuʼux tumen bey k-óol yaan baʼax maas maʼalobeʼ? Wa ka tséelkoʼoneʼ, maʼ xaaneʼ jeʼel tak k-peʼertik k-kuxtaleʼ. Jéeobaeʼ u yojel jeʼel u bintoʼon kʼaasil wa ka xiʼikoʼon tu paach baʼaloʼob maʼ jaajtakeʼ. Le oʼolal tu yaʼalaj tiʼ le israelitaʼob maʼ maʼalob úuchik u kʼáatkoʼob ka tsʼaʼabak juntúul wíinik u beet u reyil ichiloʼob, jeʼex u maasil kaajoʼoboʼ. Le baʼax tu beetoʼoboʼ junpʼéel nojoch kʼeban, tumen tu yeʼesoʼob maʼ u kʼáatoʼob ka seguernak u gobernartaʼaloʼob tumen Jéeobaiʼ. Kex tu chaʼaj u yantal juntúul máax gobernarkoʼobeʼ, tu yaʼalaj tiʼ profeta Samuel ka u yaʼaltiʼob maʼ u binoʼob tu paach baʼaloʼob «maʼ jaaj[takiʼ]» (xokaʼak 1 Samuel 12:21).
15. ¿Bix úuchik u bin le israelitaʼob tu paach baʼaloʼob «maʼ jaaj[takoʼ]»?
15 Maʼ xaaneʼ le israelitaʼoboʼ tu tukloʼobeʼ maas jeʼel u yáantaʼaloʼob tumen juntúul reyeʼ, tumen ku páajtal u yilkoʼob. Wa bey úuchik u tuukuloʼoboʼ joʼopʼ u binoʼob tu paach baʼaloʼob «maʼ jaaj[takiʼ]». Bey túunoʼ pʼáat maas chéen chʼaʼabil jeʼel u lúubloʼob tiʼ u maasil baʼaloʼob maʼ maʼalobtak ku tsʼáaik Satanasoʼ. Tumen le reyoʼoboʼ jeʼel u beetkoʼob u joʼopʼol u adorarkoʼob beetbil diosoʼobeʼ. Le máaxoʼob ku adorarkoʼob beetbil diosoʼoboʼ ku tuklikoʼobeʼ le diosoʼob de cheʼ wa de tuunichoʼ maas jeʼel u yáantajoʼob ke u jaajil Dioseʼ. U jaajileʼ Jéeoba beetmil tuláakal baʼal, baʼaleʼ jeʼex u yaʼalik Pabloeʼ, «le beetbil [diosoʼoboʼ] mix baʼal u biilaloʼob» (1 Cor. 8:4). Jeʼex túun k-ilkoʼ le beetbil diosoʼoboʼ mix baʼal ku páajtal u beetkoʼob. ¿Baʼax u biilal wa ku páajtal k-ilkoʼob yéetel k-machkoʼob, wa maʼ tu páajtal u paakatoʼob, u yuʼubikoʼob mix baʼal, u tʼaanoʼob mix u yáantkoʼob máak? U adorartaʼaloʼobeʼ bey ka xiʼik máak tu paach baʼaloʼob maʼ jaajtakeʼ, chéen junpʼéel tuus ku bisik máak tiʼ xuʼulsajil (Sal. 115:4-8).
16. 1) ¿Bix u beetik Satanás u bin yaʼab máakoʼob tu paach baʼaloʼob «maʼ jaaj[takiʼ]»? 2) ¿Baʼaxten k-aʼalik u biskuba máak yéetel Jéeobaeʼ maas maʼalob tiʼ u bin tu paach baʼaloʼob «maʼ jaaj[takiʼ]»?
16 Satanaseʼ láayliʼ jach u yojel u tus máak utiaʼal ka xiʼik tu paach baʼaloʼob «maʼ jaaj[takiʼ]». Letiʼeʼ ku beetik u tuklaʼal tumen yaʼab máak maas maʼalob ka yanak ayikʼaliloʼob tiʼ. U jaajileʼ ku taasik utsil u yantal yaʼab taakʼin tiʼ máak, u yantal yaʼab baʼaloʼob koʼoj u tojol tiʼ yéetel u yantaltiʼ junpʼéel meyaj maʼalob u boʼotaʼal. Baʼaleʼ ken yanak junpʼéel talam kʼojaʼanil, ken yanak óotsilil wa ken úuchuk junpʼéel nojoch loobeʼ, ¿jach wa tu jaajil jeʼel u yáantaʼaloʼob tumen le baʼaxoʼob yaantiʼoboʼ? Tsʼoʼoleʼ ¿ku beetik wa u yuʼubikubaʼob maas maʼalobil yéetel maʼ chiʼichnakoʼobiʼ? ¿Ku yáantkoʼob wa u núukoʼob le kʼáatchiʼob maas chiʼichnakkúuntik máakoʼ? ¿Ku yáantaj wa utiaʼal maʼ u kíimil máak? Wa maas k-kʼubik k-óol tiʼ le ayikʼaliloʼoboʼ maʼ kun yantaltoʼon kiʼimak óolal. Tumen chéen baʼaloʼob «maʼ jaaj[takiʼ]». Kex yaan hora ku yáantik máak le taakʼinoʼ, tu tsʼookeʼ maʼ tu páajtal u manik u kuxtal tu yéetel, tumen tuláakal máak ku kʼojaʼantal yéetel ku kíimil (Pro. 23:4, 5). Baʼaleʼ Dioseʼ maʼ beyiʼ. Jéeobaeʼ jach tu jaajil yaan yéetel ku yaʼalik jeʼel u kanáantkoʼoneʼ. Baʼaleʼ chéen jeʼel u yáantkoʼon wa k-bisikba tu yéeteleʼ. ¿Máasaʼ maas maʼalob ka k-bisba tu yéetel? Maʼ unaj u xuʼulul k-bisikba tu yéetel chéen utiaʼal ka xiʼikoʼon tu paach baʼaloʼob «maʼ jaaj[takiʼ]».
17. ¿Baʼax unaj k-chʼaʼtuklik k-beetik?
17 ¿Máasaʼ maas maʼalob ka yanak Jéeoba t-tséel bey juntúul maʼalob amigo utiaʼal u nuʼuktikoʼon tuláakal u kʼiiniloʼob k-kuxtaleʼ? Wa k-chaʼik u nuʼuktikoʼoneʼ, maʼ ken k-beet le baʼax ku beetik u maasiloʼ, maʼ ken k-beet chéen baʼaxoʼob k-tsʼíiboltik yéetel maʼ ken k-bin tu paach baʼaloʼob «maʼ jaaj[takiʼ]». Beyoʼ yaan u yantaltoʼon le kuxtal minaʼan u xuul k-tsʼíiboltikoʼ. Teʼ tuláakʼ xookoʼ yaan k-ilik uláakʼ óoxpʼéel baʼaloʼob tsʼoʼok u beetik u lúubul yaʼab máakoʼob. Wa k-chaʼik u nuʼuktikoʼon Jéeobaeʼ, yaan k-pʼektik tuláakal le bejoʼob maʼ maʼalobtakoʼ (Sal. 119:128).
¿Bix úuchik a wilik?
¿Bix jeʼel a beetik le baʼax ku yaʼalik le tekstoʼobaʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 11]
¿Ku taaktal wa k-beetik le baʼaxoʼob ku beetik u maasiloʼ?
[U tsolajil le oochel teʼ táan juʼun 13]
¿Baʼaxten maʼ unaj k-jáan beetik junpʼéel baʼal chéen tumen jatsʼuts k-ilkiʼ?
[U tsolajil le oochel teʼ táan juʼun 14]
¿K-bin wa tu paach baʼaloʼob «maʼ jaaj[takiʼ]»?
