¿Kʼajaʼan wa tech?

¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

• ¿Máakalmáak le óoxpʼéel baʼaloʼob jeʼel u yáantkoʼon utiaʼal maʼ k-beetik baʼax kʼaas jeʼex le máaxoʼob maʼatech u meyajtikoʼob Diosoʼ?

Letiʼ leloʼobaʼ: 1) Maʼalob saajkilil tiʼ Jéeoba (1 Ped. 3:12); 2) Junpʼéel conciencia nuʼuktaʼan tumen le Bibliaoʼ, yéetel 3) U kiʼimaktal k-óol chéen yéetel baʼaxoʼob yaantoʼon (15/4, táan juʼun 6 yéetel 7).

• ¿Baʼaxten u tsʼáaik u yóol máak u meyajt Dioseʼ maʼ u kʼáat u yaʼal wa maʼatech u jóoʼsik u súutukil utiaʼal u náaysik u yóoliʼ?

Jesuseʼ tu yeʼesaj bix unaj k-beetik. Letiʼeʼ maʼ chéen tu kaʼansaj le máakoʼoboʼ, baʼaxeʼ tu kaxtaj u súutukil utiaʼal u jeʼelel bey xan utiaʼal u biskuba yéetel u maasil. Le oʼolal tak le mejen paalaloʼob tu natsʼubaʼob tu yiknaloʼ (15/4, táan juʼun 10).

• ¿Baʼax ku chíikbesik le olivo ku yaʼalik le capítulo 11 tiʼ Romailoʼoboʼ?

Ku chíikbesik le u kaʼa jaats tiʼ u chʼiʼibal Abrahanoʼ, u Israel Dios. U mootseʼ ku chíikbesik Jéeoba, u chuuncheʼiloʼ Jesús. Yéetel tumen maʼ kʼaʼam Jesús tumen u maas yaʼabil le judíoʼoboʼ, Jéeobaeʼ tu «injertartaj» wa tu yoksaj ichil uláakʼ cristianoʼob kex maʼ judíoʼob utiaʼal u chúukbesik le jaytúul kʼaʼabéet ichil uláakʼ u jaats u chʼiʼibal Abrahanoʼ (15/5, táan juʼun 22 tak 25).

• ¿Tak wa u paalal Jesús kun boʼotik le kʼeban wa ka yanakoʼob kaʼachoʼ?

Maʼatech. Kex jeʼel u páajtal u yantal u millonesil u paalal Jesús minaʼan u kʼebanoʼobeʼ, letiʼobeʼ maʼ kun táakpajloʼob kaʼach utiaʼal u boʼotaʼal le kʼebanoʼ. Chéen u kuxtal Jesús tu kʼubaj ku chíikbesik u kuxtal Adán tu peʼertoʼ (1 Tim. 2:6) (15/6, táan juʼun 13).

• ¿Máakalmáak le maʼalob péektsil ku tsʼaʼabal tiʼ le óotsiloʼoboʼ?

Dioseʼ tsʼoʼok u tsʼáaik u Hijo utiaʼal u beet u Reyil. Jesuseʼ juntúul maʼalob gobernante tumen yaan u páajtalil u gobernartik tuláakal wíinik, ku chʼaʼik óotsilil tiʼ le óotsiloʼoboʼ yéetel yaan u xuʼulsik le baʼax beetik u yantal óotsililoʼ (1/7, táan juʼun 7).

• ¿Baʼax jeʼel u páajtal u beetik le taatatsiloʼob yáax u yantal u paalaloʼoboʼ?

Maʼ u xuʼulul u yaabiltikubaʼob. Le íichamtsiloʼ unaj u yaʼalik yéetel u yeʼesik tiʼ u yatan u yaabiltmaj. Tsʼoʼoleʼ tu kaʼatúulaloʼob unaj u tsikbaloʼob tiʼ baʼaloʼob yaan yil yéetel le núupchitaloʼ (1/7, táan juʼun 10 yéetel 11).

• ¿Baʼaxoʼob maʼ maʼalobtak beetaʼab tu juicio Jesusiʼ?

Le máaxoʼob beet le juiciooʼ maʼ tu kʼáatoʼob ka eʼesaʼak wa jaaj le baʼax ku yaʼalaʼal tu contraoʼ. Tu kaxtoʼob testigoʼob utiaʼal u tuusoʼob. Le juiciooʼ beetaʼab de áakʼab, tsʼoʼoleʼ káaj yéetel tsʼoʼok tiʼ junpʼéeliliʼ kʼiin (1/7, táan juʼun 20).

• «Teech aʼale», ¿baʼax tu yóotaj u yaʼal Jesús yéetel lelaʼ? (Mat. 26:63, 64, NM.)

Le baʼax tu yaʼalaj Jesusoʼ jach suuk u meyaj tiʼ le judíoʼob utiaʼal u yaʼalikoʼob jaaj junpʼéel baʼaloʼ. Le ka tu yaʼalaj Caifás tiʼ Jesús ka u yaʼal wa letiʼ le Cristo, u Hijo Diosoʼ, letiʼeʼ tu jaajil u yóol tu yaʼalaj: «Teen» (1/7, táan juʼun 31).

• ¿Bix jeʼel k-beetik le baʼax ku yaʼalik Beetaʼanoʼob 20:29 yéetel 30 utiaʼal k-kanáantikba tiʼ le máaxoʼob kaʼansik baʼaloʼob maʼ jaajtakoʼ?

Maʼ unaj k-tʼankoʼobiʼ yéetel maʼ unaj k-kʼamkoʼob t-otochiʼ (Rom. 16:17; 2 Juan 9-11). Maʼ unaj k-xokik le juʼunoʼob ku jóoʼskoʼoboʼ mix k-uʼuyik le baʼaxoʼob ku yaʼalikoʼob tiʼ televisión wa tiʼ Internetoʼ (15/7, táan juʼun 15 yéetel 16).