«Maʼ ken k-jáan tuʼubse»

«LE KEN tsʼoʼokok le muchʼtáambalaʼ yaan k-aʼalik: “Jach tu jaajil le muchʼtáambal teʼ jaʼabaʼ maʼ ken k-jáan tuʼubse”.» Le baʼaxoʼob tu yaʼalaj Stephen Lett, ku meyaj ichil le Cuerpo Gobernante tiʼ u J-jaajkunajoʼob Jéeobaoʼ, tu jach yajsaj u tuukul tuláakal le sukuʼunoʼob u muchʼmubaʼob tu kʼiinil 2 tiʼ octubre tiʼ 2010, teʼ tu Najil Asambleaʼob yaan tu kaajil Jersey City (Nueva Jersey, Estados Unidos) utiaʼal le muchʼtáambal 126 ku beetaʼal tumen Watch Tower Bible and Tract Society of Pennsylvania. ¿Máakalmáak jujunpʼéel tiʼ le baʼaxoʼob aʼalaʼaboʼ?

Teʼ yáax tsoltʼaanoʼ, le sukuʼun Lettoʼ tu tsolaj le baʼax tu yilaj Ezequiel tiʼ junpʼéel náay le ka tu yilaj u carro Jéeobaoʼ. Le nojoch yéetel kiʼichkelem carroaʼ ku chíikbesik u kaajal Dios, lelaʼ letiʼ nuʼuktik. Le angeloʼob táakaʼanoʼob ichiloʼ, jach séeb u péekoʼob, jeʼex u jaatsʼ cháakeʼ, tumen jeʼex aʼalaʼabik teʼ tsoltʼaanoʼ, jach séeb u meyajoʼob jeʼex u séebil u tuukul le Máax nuʼuktikoʼ. U kaajal yaan way Luʼum xaneʼ jach séebaʼan u bin u meyaj, lelaʼ bey u yeʼesik le baʼaxoʼob beetaʼab ichil u kaajal Jéeoba teʼ tu tsʼook jaʼaboʼobaʼ.

Chʼaʼchiʼitaʼab le bix u múuchʼ meyaj u najiloʼob Betel bejlaʼoʼ. Yoʼolal le baʼax beetaʼabaʼ, yaʼab tiʼ le sukuʼunoʼob ku meyajoʼob kaʼach Beteloʼ maas yaan u páajtal u máanskoʼob yaʼab tiempo teʼ kʼaʼaytajoʼ. Le sukuʼun Lettoʼ tu yaʼalaj tiʼ le muchʼukbaloʼoboʼ ka u kʼáatoʼob tiʼ Jéeoba ka u yáant le palitsil, ku nuʼuktaʼal tumen le Cuerpo Gobernante utiaʼal u seguer u chúukpajal u yóol yéetel ka seguernak u beetik baʼax maʼalob (Mat. 24:45-47).

Baʼaxoʼob tsʼaʼab ojéeltbil yéetel entrevistaʼob

Le sukuʼun Tab Honsberger, ku meyaj ichil le Comité tiʼ u najil Betel yaan tu luʼumil Haitioʼ, tu tsolaj le baʼaxoʼob beetaʼab le ka tu tíituba le luʼum tu kʼiinil 12 tiʼ enero tiʼ 2010, lelaʼ tu kíimsaj 300,000 máakoʼob. Tu yaʼaleʼ u nuuktakil uláakʼ religionoʼoboʼ joʼopʼ u yaʼalikoʼobeʼ Dios beet u tíitkuba le luʼum utiaʼal u kíimil le kʼasaʼan máakoʼoboʼ, baʼaleʼ tu kanáantaj le máaxoʼob beetik baʼax maʼaloboʼ. Wa jaaj lelaʼ, ¿baʼaxten túun yaʼab tiʼ le kʼasaʼan máakoʼob púutsʼoʼob le ka jéen u pakʼiloʼob junpʼéel tiʼ le cárcel yanoʼob teʼ luʼumiloʼ? Yaʼab tiʼ u kajnáaliloʼob Haitieʼ jach líikʼ u yóoloʼob ka tu yojéeltoʼob baʼax beetik u yúuchul loobiloʼob teʼ kʼiinoʼobaʼ. Le sukuʼunoʼ tu chʼaʼchiʼitaj le baʼax tu yaʼalaj juntúul sukuʼun kíim u yatan le ka tu tíituba le luʼumoʼ: «Sáamsamal in wokʼol. Maʼ in wojel tak jaypʼéel kʼiin ken xuʼuluk u jach yaatal in wóoliʼ, baʼaleʼ ku líikʼil in wóol yoʼolal le yaabilaj ku yeʼesaʼal ichil u kaajal Jéeobaoʼ. Teneʼ jach in wojel baʼax ku taal u kʼiin, le oʼolal yaan u seguer in tsʼáaik u yojéelt u maasil».

Le sukuʼun Mark Sanderson, ku meyaj tu najil Betel tiʼ Brooklyneʼ, tʼaanaj tiʼ le baʼaxoʼob ku yúuchul  tu luʼumil Filipinasoʼ, letiʼeʼ meyajnajaʼan ichil le Comité tiʼ u najil Betel yaan teʼ luʼumiloʼ. Letiʼeʼ tu yaʼalaj yéetel kiʼimak óolal tsʼoʼok 32 u téenel u bin u maas yaʼabtal le j-kʼaʼaytajoʼoboʼ yéetel le máaxoʼob ku tsʼaʼabal xook tiʼoboʼ maas yaʼaboʼob tiʼ le sukuʼunoʼoboʼ. Tu tsikbaltaj le baʼax úuch tiʼ Miguel, letiʼeʼ kíimsaʼab u yáabil. Le sukuʼunaʼ tu beetaj tuláakal le ku páajtal utiaʼal ka kʼaʼalak cárcel le máax kíimsoʼ. Junpʼéel kʼiineʼ bin kʼaʼaytaj teʼ carceloʼ ka tu yilajiʼ. Kex chiʼichnakchajeʼ, tu yilaj u yeʼesik jatsʼuts modos yéetel utsil tiʼ, yéetel tu yaʼalajtiʼeʼ wa u kʼáateʼ jeʼel u tsʼáaik xook tiʼ yéetel le Bibliaoʼ. Le máakoʼ tu kʼamaj, lelaʼ le áant u yaabilt Jéeoba tak ka okjaʼanaji. Bejlaʼeʼ jach maʼalob u biskuba yéetel Miguel, le oʼolal táan u yáantik utiaʼal ka séeb jóokʼok teʼ carceloʼ. *

Ka tsʼoʼokeʼ sukuʼun Mark Noumair, juntúul tiʼ le sukuʼunoʼob ku meyaj teʼ Departamento tiʼ Escuelas Teocraticasoʼ, tu entrevistartaj óoxtúul sukuʼunoʼob yéetel u yatanoʼob: Alex yéetel Sarah Reinmueller, David yéetel Krista Schafer, yéetel Robert yéetel Ketra Ciranko. Le sukuʼun Reinmueller, ku yáantik le Comité tiʼ Publicacionoʼ, tu yaʼaleʼ le ka tu tsʼáaj quince jaʼaboʼob tiʼeʼ tu maas tsʼáaj táanil ichil u kuxtal u meyajtik Dios. Teʼ kʼiinoʼob jeʼeloʼ táan kaʼach u beetik u precursoril tu luʼumil Canadá yéetel yaan kʼiineʼ chéen tu juunal ku jóokʼol kʼaʼaytaj. Le ka kʼáataʼabtiʼ máax sukuʼuniloʼob tiʼ Betel áanteʼ, letiʼeʼ tu chʼaʼchiʼitaj óoxtúul sukuʼunoʼob jach chúukaʼan u yóoloʼob, yéetel tu yaʼalaj bix úuchik u yáantaʼal utiaʼal ka u maas meyajt Dios. Sarah, u yataneʼ, tu yaʼalaj bix úuchik u biskuba yéetel juntúul kiik kʼaʼal yaʼab jaʼaboʼob cárcel tu luʼumil China yoʼolal u fe. Tu yaʼalaj xaneʼ jach tsʼoʼok u yáantaʼal tumen le payalchiʼ utiaʼal u maas natsʼuba tiʼ Jéeobaoʼ.

Le sukuʼun David Schafer, ku yáantik le Comité tiʼ Enseñanzaoʼ, tʼaanaj tiʼ bix muʼukʼaʼanil u fe u maama yéetel tu kʼaʼajsaj bix áantaʼabik tu táankelmil utiaʼal u beetik u precursor auxiliaril tumen jujuntúul sukuʼunoʼob chʼak siʼ ku beetkoʼob kaʼachi. Krista, u yataneʼ, tu kʼaʼajsaj bix úuchik u yáantaʼal tumen jujuntúul sukuʼunoʼob tsʼoʼok u yantal u jaʼabiloʼob ku meyajoʼob tu najil Betel, cada juntúul tiʼ letiʼobeʼ «chúukaʼan u yóol [meyaj tak tiʼ] junpʼíit» baʼal, jeʼex úuchik u yaʼalik Jesusoʼ (Luc. 16:10).

Le sukuʼun Robert Ciranko, ku yáantik le Comité tiʼ Redaccionoʼ, tʼaanaj yoʼolal u abueloʼob, tu kantúuliloʼobeʼ yéeyaʼanoʼob utiaʼal u binoʼob kaʼan yéetel tiʼ u luʼumil Hungría u taaloʼob. Junpʼéel tiʼ le baʼax áantoʼ letiʼe úuchik u bin tiʼ junpʼéel asamblea tu jaʼabiloʼob 1950, teʼeloʼ tu yileʼ yaʼab uláakʼ máaxoʼob meyajtik Jéeoba. Ketra, u yataneʼ, tu yaʼaleʼ tu kanaj u yeʼes chúukaʼan óolal úuchik u beetik u precursorail tiʼ junpʼéel múuchʼulil tuʼux jach yaʼab apostataʼob yaan yéetel  uláakʼ talamiloʼobiʼ. Maʼ xuʼul u tsʼáaik u yóoliʼ, le oʼolal ka máan kʼiineʼ tsʼaʼab u beet u precursora especialil yéetel túuxtaʼab tiʼ junpʼéel múuchʼulil tuʼux tu yuʼubaj jach muʼukʼaʼanchaj u yóol, tumen le sukuʼunoʼoboʼ jach u múuchʼ u meyajoʼob.

Tsʼoʼoleʼ le sukuʼun Manfred Tonakoʼ, tʼaanaj yoʼolal le baʼaloʼob maʼalobtak ku yúuchul tu luʼumil Etiopíaoʼ. Lelaʼ desde úuchjeakil chʼaʼchiʼitaʼab teʼ Bibliaoʼ, bejlaʼeʼ yaan maas tiʼ nueve mil j-kʼaʼaytajoʼobiʼ. U maas yaʼabil tiʼ le j-kʼaʼaytajoʼoboʼ tiaʼanoʼob tu noj kaajil Adís Abeba yéetel teʼ kaajoʼob yaan náatsʼ tiʼoboʼ. Jeʼex túun k-ilkoʼ jach kʼaʼabéet j-kʼaʼaytajoʼob teʼ kaajoʼob náach yaniloʼoboʼ. Le oʼolal tsʼoʼok u kʼáataʼal tiʼ jujuntúul sukuʼunoʼob etiopíailoʼob kajaʼanoʼob táanxel luʼumiloʼob wa jeʼel u binoʼob áantajeʼ, yaʼab tiʼ letiʼobeʼ tsʼoʼok u binoʼob áantaj kex chéen utiaʼal wa jaypʼéel kʼiinoʼobiʼ. Letiʼobeʼ tsʼoʼok u kaxtikoʼob yaʼab máakoʼob u kʼáatoʼob kaanbal tiʼ le Bibliaoʼ yéetel tsʼoʼok u jach líiʼskoʼob u yóol le sukuʼunoʼoboʼ.

U jaats tiʼ le tsoltʼaanoʼob máansaʼaboʼ tʼaanajoʼob tiʼ bix u chʼaʼpachtaʼal u j-jaajkunajoʼob Jéeoba tumen u gobiernoil Rusia. Le sukuʼun Aulis Bergdahl, tiʼ le Comité tiʼ u najil Betel tiʼ Rusiaoʼ, tʼaanaj yoʼolal le chʼaʼpachtajil tsʼoʼok u muʼyajtik le sukuʼunoʼob, maases tu kaajil Moscuoʼ. Le sukuʼun Philip Brumley ku meyaj teʼ Departamento tiʼ Asuntos Legales tiʼ u najil Betel tiʼ Estados Unidosoʼ, tʼaanaj yoʼolal le baʼaloʼob maʼalobtak tsʼoʼok u yúuchul teʼ tu tsʼook mesoʼob, le ka tsʼoʼok u yilaʼal tumen le Tribunal Europeo tiʼ Derechos Humanos le nueve juicioʼob beetaʼab tu contra u j-jaajkunajoʼob Jéeobaoʼ. Le u múuchʼ juezoʼoboʼ tu yaʼaloʼobeʼ maʼ jaajtak le baʼaxoʼob ku yaʼalaʼal tu contra le sukuʼunoʼoboʼ, yéetel tu yaʼaloʼob baʼaxten bey úuchik u chʼaʼtuklikoʼoboʼ. Kex maʼ káajak u beetaʼal le baʼax chʼaʼtuklaʼaboʼ, le sukuʼun Brumleyoʼ tu yaʼaleʼ yaan baʼax eʼesik yaan u taasik utsiloʼob tiʼ uláakʼ juicioʼob kun beetbil tuláakʼ luʼumiloʼob.

Yoʼolal lelaʼ, le sukuʼun Lett xanoʼ tu yaʼaleʼ le tribunal tsʼoʼok u yáax aʼalaʼaloʼ, tsʼoʼok u kʼamik utiaʼal u yil baʼaxten ku kʼáataʼal ka u boʼot yaʼab impuesto u j-jaajkunajoʼob Jéeoba tu luʼumil Francia. Le baʼax ku chʼaʼtuklik le juezoʼobaʼ jach ku yeʼesaʼal tsiikil tiʼ, tsʼoʼoleʼ maʼ tuláakal le baʼaxoʼob ku bisaʼal tu táanoʼob ku kʼamikoʼoboʼ. Tak bejlaʼeʼ tsʼoʼok u yilkoʼob 39 juicioʼob yaan yil yéetel u j-jaajkunajoʼob Jéeoba, tiʼ 37 tsʼoʼok u yaʼalikoʼob maʼ maʼalob baʼax ku beetaʼal tu contraʼobiʼ. Le sukuʼunoʼ tu yaʼalaj tiʼ le muchʼukbaloʼob ka payalchiʼinakoʼob yoʼolal le baʼax ku muʼyajtik le sukuʼunoʼobaʼ.

Le u tsʼook tsoltʼaan tiʼ le jaats jeʼelaʼ máansaʼab tumen sukuʼun Richard Morlan, profesor tiʼ le Escuela utiaʼal Ancianoʼob tiʼ le Múuchʼuliloʼ, yéetel tu yaʼaleʼ le ancianoʼob tsʼoʼok u kʼamikoʼob le xookoʼ jach kiʼimak u yóoloʼob.

 Uláakʼ sukuʼunoʼob tiʼ le Cuerpo Gobernanteoʼ

Le uláakʼ tsoltʼaanoʼoboʼ máansaʼab tumen le uláakʼ sukuʼunoʼob ku meyajoʼob ichil le Cuerpo Gobernanteoʼ. Yáaxeʼ le sukuʼun Guy Pierce tu máansaj junpʼéel tsoltʼaan tʼaanaj tiʼ u tekstoil le jaʼab 2011: Koʼoneʼex kʼubik k-óol tiʼ u kʼaabaʼ Jéeoba (Sof. 3:12). Tu yaʼaleʼ kuxaʼanoʼon tiʼ kʼiinoʼob jach ku taasik kiʼimak óolal, baʼaleʼ tu yaʼaleʼ unaj k-jach kanáantikba, tumen táan u náatsʼal u kʼiinil Jéeoba. Baʼaleʼ u maas yaʼabil máakeʼ ku kaxtikoʼob áantaj tiʼ le religionoʼob maʼatech u kaʼansik u jaajiloʼ, tiʼ le politicaoʼ, tiʼ le taakʼinoʼ yéetel tiʼ uláakʼ baʼaloʼob beetik u tuʼubultiʼob le talamiloʼob ku muʼyajtikoʼoboʼ. Utiaʼal k-kanáantaʼal tumen Jéeobaeʼ, kʼaʼabéet k-chʼaʼchiʼitik u kʼaabaʼ, k-kʼaj óoltik tubeel, k-eʼesik tsiikil tu jaajil k-óol, k-kʼubik k-óol tiʼ yéetel k-yaabiltik yéetel tuláakal k-puksiʼikʼal.

Ka tsʼoʼokeʼ máansaʼab junpʼéel tsoltʼaan tumen David Splane, ku kʼaabaʼtik «¿Tsʼoʼok wa k-okol tu kúuchil u jeʼelel Dios?». Tu yaʼaleʼ Jéeobaeʼ láayliʼ táan u meyaj kex tiaʼan tu kʼiinil u jeʼeleleʼ. Letiʼeʼ «tak bejlaʼa táan u meyaj[eʼ]», yéetel u Hijoeʼ táan xan u meyaj utiaʼal u beetik le baʼax u tukultmaj utiaʼal le Luʼumaʼ (Juan 5:17). ¿Bix jeʼel k-okol tu kúuchil u jeʼeleleʼ? Yáaxeʼ unaj k-kanáantik maʼ k-beetik baʼax kʼaas tu táan, yéetel k-beetik baʼax maʼalob utiaʼal k-lúubul utsil tiʼ. Baʼaleʼ unaj u yantaltoʼon xan fe, maʼ u tuʼubultoʼon baʼax u tukultmaj u beetik yéetel k-beetik tuláakal le ku páajtal utiaʼal k-áantaj utiaʼal u béeykuntik. Yaan kʼiineʼ maʼ chéen chʼaʼabiliʼ, baʼaleʼ le tsolnuʼukoʼob ku tsʼáaik u kaajal Jéeobaoʼ jeʼel u yáantkoʼon k-beeteʼ. Tu tsʼoʼokbal le tsoltʼaanoʼ tu líiʼsaj u yóol tuláakal u yil u yokol tu kúuchil u jeʼelel Dios.

Le u tsʼook tsoltʼaan ku kʼaabaʼtik «¿Baʼax ku taal u kʼiin k-ilik?», máansaʼab tumen sukuʼun Anthony Morris. Yéetel yaabilajeʼ tu kʼaʼajsaj tiʼ tuláakal le muchʼukbaloʼob kuxaʼanoʼon tu tsʼook kʼiinoʼob yéetel kʼaʼanaʼan k-páaʼtik u béeytal le profecíaʼob tuʼux kun aʼalbil «tuláakal jejetsʼkil yéetel maʼalob yanil» yéetel bix kun xuʼulsbil tiʼ le religionoʼob maʼatech u kaʼanskoʼob u jaajiloʼ (1 Tes. 5:2, 3; Apo. 17:15-17). Baʼaleʼ tu yaʼalaj xaneʼ unaj k-kanáantik maʼ k-tuklik wa tsʼoʼok u káajal le Armagedón yoʼolal le baʼaloʼob ku sen úuchloʼob mix baʼal yaan u yiloʼob yéetel le profecíaʼoboʼ. Tu yaʼaleʼ unaj u chúukpajal k-óol páaʼtaj yéetel u yantaltoʼon kiʼimak óolal jeʼex u yaʼalik Miqueas 7:7. Tsʼoʼoleʼ tu yaʼaleʼ unaj k-maas tsʼáaik k-óol k-áant le Cuerpo Gobernante, jeʼex u beetik le soldadoʼob ken joʼopʼok u bin u maas talamtal junpʼéel baʼateloʼ. Tu tsʼoʼokbaleʼ tu yaʼalaj tiʼ le muchʼukbaloʼob ka u maas kʼub «u yóoloʼob tiʼ le Yuumtsiloʼ» (Sal. 31:24).

Tu tsʼoʼokbal le muchʼtáambaloʼ aʼalaʼab jujunpʼéel baʼaloʼob tsʼoʼok u chʼaʼtuklaʼal u beetaʼal. Le sukuʼun Geoffrey Jacksonoʼ tu yaʼaleʼ yaan u jóoʼsaʼal U Pʼíich Tulumil Kanan maʼ talam u naʼataʼal utiaʼal u yutsil le máaxoʼob maʼ u jach oojloʼob inglesoʼ. Le sukuʼun Stephen Lett xanoʼ tu yaʼaleʼ le Cuerpo Gobernanteoʼ tsʼoʼok u chʼaʼtuklik yaan u xíimbaltaʼal xan le superintendenteʼob tiʼ distrito yéetel u yatanoʼob yanoʼob Estados Unidos utiaʼal u líiʼsaʼal u yóoloʼob. Ka tsʼoʼokeʼ tu yaʼaleʼ le Escuela tiʼ Entrenamiento Ministerialoʼ yaan u kʼaabaʼtik Escuela Bíblica utiaʼal Sukuʼunoʼob maʼ Tsʼokaʼan u Beeloʼobiʼ, yéetel maʼ kun xáantal ken káajak xan le Escuela Bíblica utiaʼal le Máaxoʼob Tsʼokaʼan u Beeloʼoboʼ. Le xookaʼ yaan u yáantik le máaxoʼob tsʼokaʼan u beeloʼob utiaʼal ka maas áantajnakoʼob ichil u kaajal Jéeoba. Tu tsʼookeʼ le sukuʼun Lett xanoʼ tu yaʼaleʼ yaan u tsʼaʼabal kaʼapʼéel xook cada jaʼab tu kaajil Patterson ku kʼaabaʼtik Escuela utiaʼal le Superintendente Viajanteʼob yéetel u Yatanoʼob bey xan le Escuela utiaʼal le Sukuʼunoʼob ku Meyajoʼob Ichil u Comiteil u Najiloʼob Betel yéetel u Yatanoʼob. Ken máanak kʼiineʼ le máaxoʼob tsʼoʼok u yáax binoʼob teʼ xookaʼ yaan u béeytal u kaʼa binoʼob.

Utiaʼal u tsʼoʼokbal le muchʼtáambaloʼ beetaʼab junpʼéel payalchiʼ yéetel yaʼabkach kabal óolal tumen le sukuʼun John E. Barr, yaan 97 jaʼaboʼob tiʼ, yéetel úuch joʼopʼok u meyaj ichil le Cuerpo Gobernanteoʼ. * Tuláakal le binoʼob teʼ muchʼtáambaloʼ jach kiʼimakchaj u yóoloʼob yoʼolal le baʼaxoʼob tu yuʼuboʼoboʼ.

[Tsolajiloʼob]

[U tsolajil le oochel teʼ táan juʼun 19]

Tuláakal jach jatsʼuts úuchik u yuʼubik le entrevistaʼob beetaʼaboʼ

[U tsolajil le oochel teʼ táan juʼun 20]

Jéeobaeʼ tsʼoʼok u beetik u bin utsil tiʼ le meyaj ku beetaʼal Etiopíaoʼ