In xokik le Bibliaoʼ ku líiʼsik in wóol

Tsikbaltaʼab tumen Marceau Leroy

KA TIN kʼalinba tin juunal tin cuartoeʼ, joʼopʼ in xokik: «Tu [káajbaleʼ Dioseʼ] tu beetaj kaʼanoʼob yéetel luʼum». ¿Baʼaxten kin taʼakkinba kaʼach utiaʼal in xook? Tumen in taataeʼ maʼatech u creertik wa yaan Dios, le oʼolal in wojel kaʼach baʼax ken u yaʼal wa ka u yil yaanten junpʼéel Biblia.

Kex yáax in xokikoʼ, le yáax versículo tiʼ Genesisoʼ yaʼab baʼaxoʼob tu yáanten in naʼate. Le oʼolal tin tuklaj: «Beoraaʼ kin naʼatik baʼaxten tuláakal baʼal jach maʼalob u meyaj». Jach kiʼimak in wóol le oʼolal joʼopʼ in xook desde las ocho áakʼab tak las cuatro u sáastal. Desde teʼ kʼiin jeʼeloʼ, u xookil le Bibliaoʼ jach ku líiʼsik in wóol. Paʼatik in tsikbaltik baʼaxten kin waʼalik beyoʼ.

«Yaan u kʼaʼabéettal a xokik sáamsamal»

Teneʼ síijen tu jaʼabil 1926 tu kaajil Vermelles, junpʼéel kaaj yaan tu xaaman Francia, teʼeloʼ yaʼab máaxoʼob ku meyajoʼob tiʼ minaiʼ. Tu kʼiiniloʼob le kaʼapʼéel nojoch baʼateltáambaloʼ, jach yaʼab u meyaj le chúuk ku jóoʼsaʼal teʼ minaʼoboʼ, le oʼolal le máaxoʼob ku meyajoʼob, jeʼex tenoʼ, maʼ kʼaʼabéet k-beetik k-servicio militariʼ. Utiaʼal in maas maʼalobkíintik bix in kuxtaleʼ, joʼopʼ in xokik radioelectrónica yéetel electricidad; lelaʼ tu yáanten in wileʼ jach maʼalob bix beetaʼanil tuláakal baʼal. Le yaanten kaʼach 21 jaʼaboʼoboʼ, juntúul in wéet xookeʼ tu tsʼáajten le yáax Biblia yanchajtenoʼ, ka tu yaʼalajten: «Chʼaʼ le libroaʼ, jach jeʼel u yáantkecheʼ». Ka tsʼoʼok in xokikeʼ, tin tsʼáaj cuentaeʼ le baʼax ku yaʼalikoʼ letiʼe baʼax u kʼáat Dios ka u yojéelt tuláakal máakoʼ.

Tumen tin tuklaj jeʼel u yutstal tu yich in vecinoʼobeʼ, tin manaj uláakʼ ocho bibliaʼob. Baʼaleʼ joʼopʼ u pʼaʼastikenoʼob yéetel u yaʼalikoʼobten baʼal. Yaan tiʼ in láakʼtsiloʼob jach ku creerkoʼob tomoxchiʼobeʼ, tu yaʼaloʼobten: «Wa ku káajal a xokikeʼ, yaan u kʼaʼabéettal a xokik sáamsamal». Jach jaaj le baʼax tu yaʼaloʼoboʼ, tumen bey tsʼoʼok in beetkoʼ. Ichil le bukaʼaj jaʼaboʼob tsʼoʼok u máanoʼ, maʼ xuʼuluk in xokkiʼ yéetel mix juntéen yaachajak tin wóol in xokik.

Ka ilaʼab tumen jujuntúul in vecinoʼob uts tin wich in xokik le Bibliaoʼ, tu síijoʼobten jujunpʼéel jóoʼsaʼaniloʼob tsʼaʼantiʼob tumen u j-jaajkunajoʼob Jéeoba. Ichil le jóoʼsaʼaniloʼoboʼ tiaʼan le folleto Junpʼéel yóokʼol kaab, junpʼéel gobierno (teʼ táan juʼunaʼ ku chíikpajal ich francés), * le folletoaʼ ku tsolikeʼ chéen u Reino Dios jeʼel u yáantik máakeʼ (Mat. 6:10). Leloʼ tu maas péeksen utiaʼal in tsikbaltik tiʼ u maasil le baʼax kin kanikoʼ.

Juntúul máax tu yáax kʼamajten junpʼéel Bibliaeʼ Noël, juntúul in amigo desde tin chichnil. Letiʼeʼ jach católico, le oʼolal tu yaʼalajten ka xiʼikoʼon k-il juntúul máax táan u xook utiaʼal u beetik u j-kʼiinil. Teneʼ chan saajken kaʼachi, baʼaleʼ  jach tu yáanten le Salmo 115:4 tak 8 bey xan Mateo 23:9 yéetel 10, tuʼux ku yaʼalikeʼ Dioseʼ u pʼeek u adorartaʼal beetbil diosoʼob yéetel u tsʼaʼabal nojbeʼen kʼaabaʼob tiʼ máak. Le tekstoʼobaʼ tu yáantenoʼob utiaʼal maʼ in chʼaʼik saajkil in defendert le baʼaxoʼob túumbentak kin creertikoʼ. Yoʼolal leloʼ Noëleʼ tu creertaj le baʼax ku yaʼalik le Bibliaoʼ, tak bejlaʼeʼ jach chúukaʼan u yóol u meyajt Dios.

Juntéenjeak xaneʼ binen in xíimbalt in kiik, tiʼ u yíichameʼ yaan kaʼach libroʼob ku tʼaanoʼob tiʼ espiritismo yéetel ku beetaʼal u muʼyaj tumen le demonioʼoboʼ. Tu káajbaleʼ tin wuʼuyaj bey maʼ tu páajtal in wáantikeʼ, baʼaleʼ Hebreoʼob 1:14 tu yáanten in wileʼ jeʼel u yáantken u angeloʼob Jéeobaeʼ. Ka tu tsʼáaj ichil u kuxtal in cuñado le baʼax ku yaʼalik le Biblia yéetel ka tu láaj pulaj tuláakal le baʼaxoʼob yaan yil yéetel espiritismooʼ, pʼaʼat tumen le demonioʼoboʼ. Jach kiʼimak in wóol tumen in kiik yéetel u yíichameʼ tu beetubaʼob j-Jaajkunajil yéetel jach tu tsʼáaj u yóol u meyajtoʼob Dios.

Tu jaʼabil 1947 taal u yilen Arthur Emiot, juntúul j-Jaajkunaj estados unidosil. Teneʼ jach kiʼimakchaj in wóol. Ka tin kʼáatajtiʼ tuʼux ku muchʼkuba le sukuʼunoʼoboʼ, ka tu yaʼalajten yaan junmúuchʼ sukuʼunoʼob tu kaajil Liévin, kex kaʼapʼéel leguas ka tak táanchumuk yanil (10 kilómetros). Teʼ kʼiinoʼob jeʼeloʼ istikyaj u yantal tiʼ máak tak junpʼéel bicicleta, le oʼolal ichil yaʼab mesoʼobeʼ xíimbalil in bin teʼ muchʼtáambaloʼoboʼ. Teʼ kʼiinoʼob jeʼeloʼ chéen 2,380 j-Jaajkunajoʼob yaan tu luʼumil Francia, yaʼabeʼ tiʼ u taaloʼob tu luʼumil Poloniaeʼ, yéetel tsʼoʼok ocho jaʼaboʼob prohibirtaʼak le meyaj k-beetkoʼ. Baʼaleʼ tu kʼiinil 1 tiʼ septiembre tiʼ u jaʼabil 1947, kaʼa kʼaʼam le meyaj k-beetik tumen le gobiernooʼ yéetel jeʼekʼabtaʼab junpʼéel u túumben najil Betel tu noj kaajil París, teʼ kúuchil ku kʼaabaʼtik Villa Guibert. Tumen minaʼan mix juntúul precursor tu luʼumil Franciaeʼ, le Informador tiʼ u mesil diciembre tiʼ u jaʼabil 1947 (bejlaʼeʼ ku kʼaabaʼtik K-meeyjil tiʼ le Reinooʼ) invitartaʼab le sukuʼunoʼob u beet u precursoriloʼoboʼ. Teʼ kʼiinoʼob jeʼeloʼ unaj u kʼubkoʼob ciento cincuenta horas cada mes, baʼaleʼ tu jaʼabil 1949 pʼáat chéen cien. Teneʼ okjaʼanajen tu jaʼabil 1948, teʼ kʼiinoʼob jeʼeloʼ tsʼoʼok in naʼatik le baʼax ku yaʼalik Juan 17:17, tuʼux ku yaʼalik Jesús tiʼ Jéeoba: «A [tʼaaneʼ] letiʼ le jaajoʼ». Tu mesil diciembre tiʼ 1949 káaj in beetik in precursoril.

Ka jóokʼen carceleʼ túuxtaʼaben Dunkerque

Tuʼux yáax bineneʼ Agen, tu noojol Francia. Baʼaleʼ maʼ xáanchajeniʼ, tumen ka xuʼul in meyaj teʼ minaoʼ tʼaʼanen utiaʼal in beet in soldadoil, baʼaleʼ maʼ tin wóotaj biniʼ, le oʼolal kʼaʼalen cárcel. Teʼeloʼ maʼatech u chaʼabal u yantal u Biblia máakiʼ, baʼaleʼ tin kaxtaj jujunpʼéel u táan juʼunil Salmos. Leloʼobaʼ jach tu líiʼsoʼob in wóol yéetel tu yáantenoʼob utiaʼal maʼ in chʼaʼik saajkil. Ka jóokʼen teʼ carceloʼ tin tuklaj: ¿yaan wa u seguer in beetik in precursoril wa tsʼoʼok u chukik u kʼiinil in jéetsʼel tin wotoch? Jeʼex suukileʼ le Bibliaoʼ tu yáanten in chʼaʼtukult baʼax ken in beete. Jach tu beetaj in tuukul le baʼax ku yaʼalik Pablo tiʼ Filiposiloʼob 4:11 tak 13, tuʼux ku yaʼalik: «Tuláakal ku páajtal in beetik, tu yoʼolal [le Máax] ku tsʼáaikten muukʼ[oʼ]». Ka tsʼoʼokeʼ tin chʼaʼtuklaj u seguer in beetik in precursoril. Tu jaʼabil 1950 túuxtaʼaben tu kaajil Dunkerque, teʼeloʼ yáax bijaʼanen kʼaʼaytajiʼ.

Ka kʼucheneʼeʼ mix baʼal yaanten. Tsʼoʼoleʼ le kaajoʼ kʼaskúuntaʼan tumen le u kaʼapʼéel nojoch baʼateltáambaloʼ, le oʼolal istikyaj úuchik in kaxtik tuʼux in pʼáatal. Ka taal tin tuukul in bin tu yotoch junpʼéel familia suuk kaʼach in xíimbaltik. Ka tu yilen le koʼolel kajaʼanoʼ jach kiʼimakchaj u yóol, ka tu yaʼalaj: «Don Leroy, tsʼoʼok a chaʼabal bakáan. In wíichameʼ ku yaʼalikeʼ wa ka yanak uláakʼ máakoʼob jeʼex techoʼ, bejlaʼa maʼ kun yantal kaʼach le baʼateltáambaloʼ». Tumen yaantiʼob junpʼéel naj ku tsʼáaikoʼob u alquilart le turistaʼaboʼ, tu yaʼaloʼobten ka pʼatken tak ken kʼuchuk u kʼiinil u taaloʼob. Teʼ kʼiin xanoʼ Evans Emiot, u sukuʼun Arthur, ku yáantik le turistaʼob ku kʼuchloʼoboʼ, tu tsʼáajten meyaj, ka joʼopʼ in bin in kanáant junpʼéel nojoch barco de áakʼab. * Baʼaleʼ tumen táant in jóokʼol carceleʼ, jach tsʼoyaʼanen bey junpʼéel chʼilibeʼ. Evanseʼ tu bisen tu yiknal juntúul tiʼ le máaxoʼob nuʼuktik le barcooʼ  ka tu yaʼalajtiʼ baʼaxten jach tsʼoyaʼanen. Letiʼ túuneʼ tu séebaʼanileʼ tu yaʼalajten jeʼel u páajtal in chʼaʼik jeʼel baʼaxak in jaant teʼ refrigeradoroʼ. Bey túunoʼ, chéen tiʼ junpʼéel kʼiineʼ tin kaxtaj tuʼux in pʼáatal, tuʼux in meyaj yéetel baʼal in jaante. Leloʼ tu beetaj in maas kʼubik in wóol tiʼ le baʼax tu yaʼalaj Jesús tiʼ Mateo 6:25 tak 33.

Ka kʼuch u kʼiinil u taal le turistaʼoboʼ, yanchaj in jóokʼol yéetel Simon Apolinarski, uláakʼ juntúul precursor, utiaʼal k-kaxt tuʼux ken k-pʼáatal. Toʼoneʼ k-chʼaʼtukultmaj u seguer k-pʼáatal kʼaʼaytajiʼ. Aʼalaʼabtoʼon jeʼel u páajtal k-pʼáatal tiʼ junpʼéel úuchben naj tuʼux ku tséentaʼal tsíiminoʼobeʼ. Le u yuumiloʼ tu kʼamaj le maʼalob péektsiloʼ bey xan yaʼab máakoʼob teʼ kaajoʼ. Tumen óoliʼ bul kʼiin k-jóokʼol kʼaʼaytajeʼ, le periodicooʼ tu yaʼaleʼ táan «u chuʼupul le kaaj tumen u j-jaajkunajoʼob Jéeobaoʼ». Tsʼoʼoleʼ chéen kaʼatúuloʼon yéetel wa jaytúul sukuʼunoʼob k-kʼaʼaytajiʼ. Baʼaleʼ seguernaj k-kʼaʼaytaj, tumen mantatsʼ tuukulnajoʼon tiʼ le baʼax ku yaʼalik u tsʼáaik Jéeobaoʼ yéetel tiʼ le bix tsʼoʼok u kanáantkoʼonoʼ. Ka túuxtaʼaben kʼaʼaytaj yaanal tuʼux tu jaʼabil 1952, tu kaajil Dunkerqueiʼ yaan treinta juntúulal precursoroʼobiʼ.

Uláakʼ meyajoʼob tin beetaj

Le maʼ úuch kʼuchken tu kaajil Amiensoʼ, túuxtaʼaben in beet in precursor especialil tu kaajil Boulogne-Billancourt, junpʼéel kaaj yaan naatsʼ tiʼ París. Yaʼab tiʼ le máaxoʼob tin tsʼáaj xookoʼ, jach tu tsʼáaj u yóoloʼob meyaj ichil u kaajal Jéeoba, yaan tiʼ letiʼobeʼ tu beetaj u misioneroiloʼob. Juntúuleʼ ku kʼaabaʼtik Guy Mabilat, letiʼeʼ kʼuch u beetuba superintendente tiʼ circuito yéetel tiʼ distrito. Ka máan kʼiineʼ tsʼaʼab u yil u líiʼsaʼal le imprenta yaan Betel tu kaajil Louviers, naatsʼ tiʼ París. Teneʼ jach uts tin tʼaan in tsikbaltik le baʼax ku yaʼalik le Biblia tiʼ uláakʼ máakoʼoboʼ. Baʼaleʼ maʼ chéen tumen ku taasikten kiʼimak óolaliʼ, baʼaxeʼ tumen ku maas pʼáatal tin tuukul le baʼax ku yaʼalikoʼ yéetel ku yáantken kaʼansaj tubeel.

Junpʼéel kʼiin tiʼ u jaʼabil 1953, tsʼaʼaben in beet in superintendente tiʼ circuitoil tu luʼumil Alsacia-Lorena, lelaʼ pʼáat kaʼatéen yáanal u páajtalil Alemania tu yáamil u jaʼabil 1871 yéetel 1945. Teʼeloʼ ku tʼaʼanal alemán xaniʼ, le oʼolal kʼaʼabéetchaj in kanik. Teʼ kʼiinoʼob jeʼeloʼ chéen junpʼíit máakoʼob yaan u cocheʼob, u televisionoʼob, u maquinaʼob utiaʼal tsʼíib wa u radioʼob. Minaʼan computadoraʼob kaʼachi. Baʼaleʼ kiʼimak in wóol yéetel maʼ tin wuʼuyaj bey mix baʼal yaanteneʼ. U jaajileʼ maas minaʼan mix baʼal beetik u náayal in wóol utiaʼal in meyajtik Jéeoba, jeʼex le yanoʼob bejlaʼaʼ. Tsʼoʼoleʼ mantatsʼ kin wilik u yantalten junpʼéel maʼalob ich, jeʼex u yaʼalik le Bibliaoʼ (Mat. 6:19-22).

Tu jaʼabil 1955, binen teʼ asamblea ku kʼaabaʼtik «Reino Triunfante», lelaʼ yanchaj tu kaajil París. Teʼ asamblea jeʼeloʼ tiʼ tin kʼaj óoltaj Irène Kolanski, le máax yéetel tsʼoʼok in beeloʼ, letiʼeʼ  junpʼéel jaʼab káajak u beetik u precursorail ka káajen teen. U taataʼobeʼ poloniailoʼob yéetel úuch joʼopʼok u meyajtikoʼob Dios yéetel chúukaʼan óolal. Le tiaʼanoʼob Franciaoʼ bin xíimbaltbiloʼob tumen Adolf Weber, juntúul máax tu beetaj u jardineroil tiʼ le sukuʼun Russelloʼ yéetel bin tu luʼumil Europa utiaʼal u maas kʼaʼaytik le maʼalob péektsiloʼ. Tu jaʼabil 1956, tsʼoʼok in beel yéetel Irène yéetel joʼopʼ k-xíimbaltik le múuchʼuliloʼoboʼ. Jach kin tsʼáaik u nib óolalil tiʼ yoʼolal le áantaj tu tsʼáajten ichil le jaʼaboʼob tsʼoʼok u máanoʼ.

Kaʼapʼéel jaʼab tsʼoʼokok k-beeleʼ, tsʼaʼaben in beet in superintendenteil tiʼ distrito. Baʼaleʼ tumen maʼ yaʼab sukuʼunoʼob yaan utiaʼal u beetik u superintendeil tiʼ circuitoeʼ, seguernaj in beetik xan le meyajaʼ. U jaajileʼ minaʼan tiempo utiaʼal k-jeʼelel kaʼachi. Kʼaʼabéet k-kʼubik cien horas teʼ kʼaʼaytaj cada mesoʼ, yéetel cada semanaeʼ unaj in máansik jejeláas tsoltʼaanoʼob, in xíimbaltik óoxpʼéel u xookil libro teʼ múuchʼuliloʼoboʼ, in xakʼaltik le juʼunoʼob ku meyaj tiʼ le múuchʼuliloʼoboʼ yéetel in túuxtik u informeiloʼob. ¿Tuʼux ken in jóoʼs u tiempoil utiaʼal in xokik le Bibliaoʼ? Taal tin tuukul u bin in lakik u táan juʼuniloʼob junpʼéel úuchben Biblia utiaʼal in bis jeʼel tuʼuxak utiaʼal in xok ken joʼopʼok in páaʼtik wa máaxeʼ. Le súutukiloʼob beyoʼ jach tu yáanten utiaʼal maʼ u xuʼulul in meyajtik Dios.

Tu jaʼabil 1967 tʼaʼanoʼon meyaj tu najil Betel yaan tu kaajil Boulogne-Billancourt. Teneʼ tsʼaʼaben meyaj teʼ Departamento tiʼ Servicio, bejlaʼeʼ tsʼoʼok u máan cuarenta jaʼaboʼob joʼopʼok in meyajiʼ. Junpʼéel tiʼ le baʼaxoʼob jach uts tin wichoʼ, letiʼe in núukik le kʼáatchiʼob ku beetik le máakoʼob yoʼolal le Bibliaoʼ. Jach uts tin wich in xakʼalxoktik le baʼax ku yaʼalik le Biblia utiaʼal in defendertik «le maʼalob péektsiloʼ» (Fili. 1:7). Jach uts tin tʼaan xan in tsolik baʼax ku yaʼalik le Biblia ken in nuʼukt u xookil u tekstoil le kʼiin táanil tiʼ k-ukʼuloʼ. Tu jaʼabil 1976 táakpajen meyaj ichil u Comiteil u najil Betel Francia.

Le baʼax maas maʼalob tsʼoʼok k-beetkoʼ

Toʼoneʼ tsʼoʼok k-aktáantik yaʼab talamiloʼob, tsʼoʼok k-chʼíijil yéetel k-jach kʼojaʼantal, le oʼolal maʼ tu béeytal k-meyajtik Dios jeʼex kaʼacheʼ. Kex beyoʼ láayliʼ jach k-kʼubik k-óol tiʼ Dioseʼ yéetel sáamsamal k-xakʼalxoktik le Bibliaoʼ. Yéetel jach uts t-tʼaan k-bin teʼ kʼaʼaytaj, kex tiʼ autobusoʼ. Tu kaʼatúulaloʼoneʼ tsʼoʼok maas tiʼ ciento veinte jaʼaboʼob joʼopʼok k-beetik precursoril, le oʼolal jeʼel u páajtal k-aʼalik tiʼ u maasil ka u beetoʼob xan beyoʼ. Teneʼ jach kin wuʼuykinba jeʼex le rey David le ka tu yaʼalaj: «Tsʼoʼok in [chʼíijil]; baʼaleʼ mix juntéen tin wilaj xúumpʼattaʼan le utsil máakoʼ» (Sal. 37:25).

Ichil tuláakal in kuxtaleʼ jach tsʼoʼok u líiʼsik in wóol le baʼax ku yaʼalik le Bibliaoʼ. Jach jaaj le úuchik u yaʼalikoʼobten in láakʼtsiloʼob walajki sesenta jaʼaboʼob maʼ kun xuʼulul in xokik le Bibliaoʼ. Tak bejlaʼa maʼ xuʼuluk in xokikeʼ yéetel maʼ yaachajak in wóol in beetkiʼ.

[Tsolajilo’ob]

[Foto yaan teʼ táan juʼun 5]

Teen yéetel Simon

[Foto yaan teʼ táan juʼun 5]

Le táan in beetik in superintendenteil tiʼ distritooʼ

[Foto yaan teʼ táan juʼun 5]

Le yáax Biblia tin xokoʼ

[Foto yaan teʼ táan juʼun 6]

Le kʼiin ka tsʼoʼok k-beeloʼ

[Foto yaan teʼ táan juʼun 6]

Teen yéetel Irèneeʼ sáamsamal k-xokik le Bibliaoʼ