Maʼalob tsolnuʼukoʼob utiaʼal le tsʼokaʼan u beeloʼob yéetel le maʼatechoʼ
Maʼalob tsolnuʼukoʼob utiaʼal le tsʼokaʼan u beeloʼob yéetel le maʼatechoʼ
«Kin waʼalik le baʼaloʼobaʼ [...] utiaʼal ka kuxlakeʼex maʼalob, táan a meyajtikeʼex Yuumtsil yéetel tuláakal a puksiʼikʼaleʼex.» (1 COR. 7:35)
1, 2. ¿Baʼaxten unaj k-xakʼaltik le tsolnuʼuk ku tsʼáaik le Biblia tiʼ le tsʼokaʼan u beeloʼob yéetel le maʼatechoʼ?
U BISKUBA juntúul xiib yéetel juntúul koʼoleleʼ ku taasik yaʼab kiʼimak óolal, baʼaleʼ ku taasik xan chiʼichnakiloʼob yéetel talamiloʼob. Le máaxoʼob meyajtik Jéeobaoʼ unaj u kaxtikoʼob u nuʼuktaj utiaʼal u kanáantkoʼob bix u biskubaʼob yéetel juntúul xiib wa yéetel juntúul koʼolel. Baʼaleʼ maʼ chéen yoʼolal le baʼaloʼob bey unaj u kʼáatkoʼob u yáantaj Jéeobaoʼ. Yaan sukuʼunoʼob yéetel kiikoʼob kiʼimak u yóoloʼob kex maʼ tsʼokaʼan u beeloʼobeʼ, ku yuʼubikoʼob bey jach ku sen aʼalaʼaltiʼob tumen u láakʼtsiloʼob wa u amigoʼob ka u kaxt u núupoʼobeʼ. Yanoʼob xaneʼ taak u tsʼoʼokol u beeloʼob, baʼaleʼ maʼ yanak máax yéeteliʼ. Le noviotsiloʼob xanoʼ kʼaʼabéet áantaj tiʼob utiaʼal u yilkoʼob bix ken u aktáantiloʼob le talamiloʼob ken tsʼoʼokok u beeloʼoboʼ. Tsʼoʼoleʼ kex tsʼokaʼan k-beel wa maʼeʼ, tuláakloʼon kʼaʼabéet k-kanáantik maʼ k-beetik baʼax kʼaas.
2 Kex tsʼokaʼan u beel máak wa maʼeʼ, yaan yil yéetel ka yanak kiʼimak óolal tiʼ bey xan ka seguernak u bisikba yéetel Jéeoba. Le oʼolal jach maʼalob ka k-il le tsolnuʼukoʼob tu tsʼáaj apóstol Pablo teʼ capítulo 7 tiʼ Yáax tiʼ Corintoiloʼoboʼ. Jeʼex úuchik u yaʼalikoʼ, letiʼeʼ tu tsʼíibtaj utiaʼal u líiʼsik k-óol utiaʼal ka k-beet baʼax «maʼalob» yéetel utiaʼal k-meyajtik «Yuumtsil yéetel tuláakal [k-]puksiʼikʼal» (1 Cor. 7:35). Le táan k-ilik le tsolnuʼukoʼobaʼ, unaj k-tuklik bix jeʼel u yáantkoʼon k-maas meyajt Jéeoba, kex tsʼokaʼan k-beel wa maʼeʼ.
Junpʼéel baʼax chéen tu juunal máak unaj u chʼaʼtuklik
3, 4. 1) ¿Baʼax jeʼel u yúuchul wa ku jach chiʼichnaktal máak tumen maʼ tsʼoʼokok u beel u láakʼtsil wa u amigoiʼ? 2) ¿Bix u yáantkoʼon le baʼax tu yaʼalaj Pablo utiaʼal maʼ k-obligartik mix máak utiaʼal ka tsʼoʼokok u beel?
3 Le judíoʼob teʼ yáax siglooʼ ku yilkoʼobeʼ le tsʼoʼokol beeloʼ letiʼe baʼax maas taasik kiʼimak óolal tiʼ máakoʼ. Bejlaʼeʼ yaʼab tuʼuxoʼob bey xan u yilaʼaloʼ, wa yaan wa máax tsʼoʼok u chan yantal u jaʼabil maʼ tsʼoʼokok u beeleʼ, u láakʼtsiloʼob wa u amigoʼobeʼ ku tuklikoʼob kʼaʼabéet u yáantkoʼob utiaʼal ka tsʼoʼokok u beel. Maʼ xaaneʼ ku yaʼalikoʼobtiʼ ka u yil u kaxtik u núup wa ku yaʼalikoʼobtiʼ bey máax yéetel maʼalob ka tsʼoʼokok u beeleʼ. Maʼ xaaneʼ ku joʼopʼol u kaxtikoʼob wa máax utiaʼal u tʼane wa ku beetkoʼob wa baʼax utiaʼal u páajtal u kʼaj óoltik wa máax. Baʼaleʼ le baʼaloʼob beyaʼ jeʼel u beetik u suʼlaktal wa máakeʼ, u xuʼulul u biskuba yéetel wa máax wa u beetaʼal u yaatal u yóol wa máax.
4 Pabloeʼ mix juntéen tu yaʼalaj wa unaj u tsʼoʼokol u beel wa máax mix tu yaʼalaj ka pʼáatak maʼ u tsʼoʼokol u beel máakiʼ (1 Cor. 7:7). Kex letiʼ kiʼimak u yóol u meyajtik Jéeoba kex maʼ tsʼokaʼan u beeleʼ, tu yeʼesaj tsiikil tiʼ le máaxoʼob ku tsʼoʼokol u beeloʼoboʼ. U jaajileʼ cada juntúul kun chʼaʼtuklik wa yaan u tsʼoʼokol u beel wa maʼ, mix máak unaj u obligartaʼal u beet junpʼéel baʼax maʼ u kʼáatiʼ.
Baʼax unaj u beetik le máaxoʼob maʼ tsʼokaʼan u beeloʼoboʼ
5, 6. ¿Baʼaxten tu yaʼalaj Pablo maʼalob maʼ u tsʼoʼokol u beel máak?
5 Ichil le baʼaxoʼob tu yaʼalaj Pablo tiʼ le sukuʼunoʼob yanoʼob Corintooʼ, tu yeʼesaj le páajtalil yaan tiʼ le máaxoʼob maʼ tsʼokaʼan u beeloʼob utiaʼal u maas meyajtikoʼob Diosoʼ (xokaʼak 1 Corintoiloʼob 7:8). Kex maʼ tsʼokaʼan u beeleʼ, mix juntéen tu beetaj jeʼex u nuuktakil u maasil religionoʼob ku taaskubaʼob noj baʼalil tumen maʼ tsʼokaʼan u beeloʼoboʼ. Baʼaxeʼ tu yaʼaleʼ le máaxoʼob meyajtik Dios maʼ tsʼokaʼan u beeloʼoboʼ, yaan junpʼéel jatsʼuts páajtalil tiʼob. ¿Baʼax?
6 U páajtalil u kʼamik meyajoʼob, maʼ xaaneʼ maʼ tu páajtal u beetik wa tsʼokaʼan u beel. Jeʼex Pabloeʼ tu kʼamaj u páajtalil u bisik le maʼalob péektsil «tiʼ le máaxoʼob maʼ judíoʼoboʼ» (Rom. 11:13). Ken k-xok le capítulo 13 tak 20 tiʼ u libroil Beetaʼanoʼoboʼ, k-ilkeʼ bin yéetel uláakʼ misioneroʼob, bin kʼaʼaytaj tuʼux maʼ yáax uʼuyaʼak le maʼalob péektsiloʼ yéetel tu káajsaj yaʼab múuchʼuliloʼob jejeláas tuʼuxoʼob. Letiʼeʼ tu aktáantaj talamiloʼob óoliʼ mix máak u aktáante (2 Cor. 11:23-27, 32, 33). Tu beetaj yéetel kiʼimak óolal tuláakal, le oʼolal maʼ yaachaj tu yóol u xupkuba u beetiʼ (1 Tes. 1:2-7, 9; 2:19). ¿Jeʼel wa u páajtal u beetik kaʼach wa tsʼokaʼan u beel yéetel wa yaan u paalaloʼobeʼ? Maʼ xaaneʼ maʼatan.
7. ¿Baʼax ku beetik kaʼatúul precursoraʼob maʼ tsʼokaʼan u beeloʼob utiaʼal u maas meyajtikoʼob Diosiʼ?
7 Yaʼab sukuʼunoʼob yéetel kiikoʼob maʼ tsʼokaʼan u beeloʼobeʼ ku tsʼáaik u yóol u maas meyajtoʼob Dios. Lelaʼ bey u beetik Sara yéetel Limbania, kaʼatúul precursoraʼob ku meyajoʼob tu luʼumil Bolivia, letiʼobeʼ binoʼob kʼaʼaytaj tiʼ junpʼéel chan kaaj úuch pʼáatak maʼatech u kʼuchul j-kʼaʼaytajoʼobiʼ. Kex minaʼan electricidad teʼ chan kaajoʼ ku yaʼalikoʼobeʼ maʼ talam u yilkoʼobiʼ: «Tumen minaʼan radio mix televisioneʼ, le máakoʼoboʼ maas ku jóoʼskoʼob u tiempoil utiaʼal u xookoʼob». Yaan tak tiʼ le máakoʼoboʼ tu yeʼesoʼob jujunpʼéel jóoʼsaʼaniloʼob úuch xuʼuluk u beetaʼal tumen le palitsiloʼ, baʼaleʼ letiʼobeʼ láayliʼ u xokkoʼobeʼ. Le kaʼatúul kiikoʼobaʼ óoliʼ tiʼ tuláakal naj ku yilkoʼob yaan máaxoʼob u kʼáatoʼob u kan u maasil, le oʼolal ku xáantal ken láaj kʼaʼaytajnakoʼob ichil le chan kaajoʼ. Ku yaʼalikoʼobeʼ aʼalaʼabtiʼob tumen juntúul nojoch koʼolel: «Wa tsʼoʼok u kʼuchul u j-jaajkunajoʼob Jéeoba tak wayeʼ, u kʼáat u yaʼaleʼ jach naatsʼ yanil le xuʼulsajiloʼ». Yoʼolal le áantaj ku tsʼáaikoʼoboʼ, joʼopʼ u bin muchʼtáambal yaʼab tiʼ le máaxoʼob yaan teʼ chan kaajoʼ.
8, 9. 1) ¿Tiʼ baʼax ku tuukul Pablo ka tʼaanaj tiʼ le utsiloʼob ku taasik le maʼ tsʼokaʼanil u beel máakoʼ? 2) ¿Baʼaxoʼob maas ku páajtal u beetik le máaxoʼob maʼ tsʼokaʼan u beeloʼoboʼ?
8 U jaajileʼ tak le tsʼokaʼan u beeloʼoboʼ jach ku bin utsil tiʼob ikil u kʼaʼaytikoʼob le maʼalob péektsil teʼ tuʼuxoʼob maʼ chéen chʼaʼabil u yúuchul kʼaʼaytajoʼ. Baʼaleʼ le precursoroʼob maʼ tsʼokaʼan u beeloʼoboʼ jeʼel u páajtal u kʼamkoʼob uláakʼ meyajoʼob maʼ tu páajtal u beetik le tsʼokaʼan u beeloʼob bey xan wa yaan u paalaloʼoboʼ. Ka tʼaanaj Pablo tiʼ le meyajoʼob ku páajtal u beetik le máaxoʼob maʼ tsʼokaʼan u beeloʼoboʼ, táan u tuukul kaʼach tiʼ le bukaʼaj tuʼux kʼaʼabéet u kʼaʼaytaʼal le maʼalob péektsiloʼ. Letiʼeʼ u kʼáat ka kiʼimakchajak u yóol tuláakal jeʼex úuchik u kiʼimaktal u yóol u kʼaʼayt le maʼalob péektsiloʼ.
9 Juntúul precursora maʼ tsʼokaʼan u beel kajaʼan Estados Unidoseʼ, tu tsʼíibtaj: «Yaan máaxeʼ ku tuklikeʼ kʼaʼabéet u tsʼoʼokol u beel máak utiaʼal ka kiʼimakchajak u yóol. Baʼaleʼ teneʼ tsʼoʼok in wilkeʼ maʼ letiʼe baʼax taasik kiʼimak óolaloʼ, baʼaxeʼ u biskuba máak yéetel Jéeoba. Kex yaan kʼiin ku chiʼichnaktal máak tumen maʼ tsʼokaʼan u beeleʼ, wa ku yilaʼal jeʼex unajeʼ ku taasik yaʼab utsiloʼob», yéetel tu yaʼalaj: «U jaajileʼ maas ku yáantaj utiaʼal u yantal kiʼimak óolal tiʼ máak. Jéeobaeʼ u yaabiltmaj tuláakal, kex tsʼokaʼan k-beel wa maʼ». Bejlaʼeʼ le kiikaʼ tiʼ ku meyaj tuʼux maas kʼaʼabéet j-kʼaʼaytajoʼobeʼ. Tuláakal le maʼ tsʼokaʼan u beeloʼoboʼ unaj u tuklikoʼob: «¿Jeʼel wa u páajtal in maas táakpajal teʼ kʼaʼaytaj bejlaʼa maʼ tsʼokaʼan in beeleʼ?». Wa ka beetkeʼ, maʼ xaaneʼ jeʼel a wilkeʼ junpʼéel siibal le maʼ tsʼokaʼanil a beeloʼ.
Le máaxoʼob taak u tsʼoʼokol u beeloʼoboʼ
10, 11. ¿Bix u yáantik Jéeoba le máaxoʼob maʼ yanak yéetel máax u tsʼoʼokol u beeloʼoboʼ?
10 Ken máanak kʼiineʼ, yaʼab sukuʼunoʼob yéetel kiikoʼobeʼ ku tuklik u tsʼoʼokol u beeloʼob. Tumen u yojloʼob kʼaʼabéet u nuʼuktaj Jéeoba tiʼobeʼ ku kʼáatkoʼob u yáantaj utiaʼal u kaxtikoʼob juntúul máax maʼalob utiaʼal u tsʼoʼokol u beeloʼob (xokaʼak 1 Corintoiloʼob 7:36).
11 Yaan sukuʼunoʼob yéetel kiikoʼobeʼ u kʼáatoʼob ka yanak juntúul máax yéetel u tsʼoʼokol u beeloʼob jach u yaabiltmaj Jéeoba. ¿Bey wa a tuukul techoʼ? Wa beyoʼ maʼ u xuʼulul a kʼáatik tiʼ Jéeoba (Fili. 4:6, 7). Kex tsʼoʼok u xáantal joʼopʼok a páaʼtikeʼ maʼ u lúubul a wóol. Maʼ u tuʼubultecheʼ Dioseʼ u yojel bix a wuʼuyikaba yéetel yaan u tsʼáaiktech u muukʼil utiaʼal u chúukpajal a wóol (Heb. 13:6).
12. ¿Baʼaxten unaj u jach tuklik máak tubeel wa yaan u yóotik tsʼoʼokol u beel yéetel wa máax?
12 Yaan máaxoʼob meyajtik Dios taak u tsʼoʼokol u beeloʼobeʼ ku tʼaʼanloʼob tumen máaxoʼob maʼ u jach tsʼaamaj u yóol u meyajtoʼob Diosiʼ wa junpuliʼ maʼatech u meyajtikoʼob. Kex jach talam yaniloʼob chéen tu juunaloʼobeʼ, unaj u kʼaʼajskoʼobeʼ jach jeʼel u muʼyajoʼob wa maʼ u yéeyikoʼob tubeel máax yéetel kun tsʼoʼokol u beeloʼobeʼ. Kex xiʼik utsil wa maʼ u bin utsil tiʼ máakeʼ, le ken u yaʼal «jeʼeleʼ», maʼ tu béeytal u jel aʼalik maʼ (1 Cor. 7:27). Le oʼolaleʼ maʼ unaj k-jach chiʼichnaktaliʼ. Maʼ xaaneʼ jeʼel a beetik junpʼéel baʼal kun beetik u yaatal a wóol tuláakal u kʼiinil a kuxtaleʼ (xokaʼak 1 Corintoiloʼob 7:39).
Baʼaxoʼob unaj u tuklik máak táanil tiʼ u tsʼoʼokol u beel
13-15. ¿Baʼax talamiloʼob maʼalob ka u tsikbalt máak táanil tiʼ u tsʼoʼokol u beel?
13 Jeʼex tsʼoʼok k-ilkoʼ, Pabloeʼ tʼaanaj tiʼ le utsiloʼob ku yilik le máaxoʼob maʼ tsʼokaʼan u beeloʼoboʼ, baʼaleʼ mix juntéen tu taasaj mix baʼalil le máaxoʼob meyajtik Jéeoba tsʼokaʼan u beeloʼoboʼ. Baʼaxeʼ yéetel u nuʼuktaj le kiliʼich muukʼoʼ tu tsʼáaj tsolnuʼukoʼob jeʼel u yáantkoʼobeʼ. Le baʼaxoʼob tu yaʼaloʼ jeʼel u yáantkoʼob u aktáantoʼob le talamiloʼob utiaʼal maʼ u pʼatkubaʼoboʼ.
14 Yaan máaxoʼob ken tsʼoʼokok u beeloʼobeʼ, ku yilkoʼob unaj u kʼexkoʼob baʼax ku páaʼtkoʼob tiʼ u núupoʼob. Le táan u biskubaʼoboʼ, maʼ xaaneʼ ku tuklikoʼobeʼ jach u yaabiltmubaʼob, le oʼolal ku tuklikoʼob yaan u bin utsil tiʼob. Le ken kʼuchuk u kʼiinil le tsʼoʼokol beeloʼ ku yuʼubikoʼob minaʼan uláakʼ máax jeʼex letiʼobeʼ yéetel ku tuklikoʼob mix baʼal jeʼel u beetik u xuʼulul u yaabiltikubaʼobeʼ. Baʼaleʼ wa ku tuukuloʼob tubeeleʼ, yaan u naʼatkoʼobeʼ yaan u yantal talamil tiʼob, yéetel kex ku taasik kiʼimak óolal u yantaloʼob junmúuchʼeʼ, maʼ chéen letiʼe baʼax kʼaʼabéet utiaʼal u yutskíintikoʼob le talamiloʼob kun yantaltiʼoboʼ (xokaʼak 1 Corintoiloʼob 7:28). *
15 Yaʼab tiʼ le máaxoʼob táant u tsʼoʼokol u beeloʼoboʼ ku yaatal u yóoloʼob ken u yiloʼob maʼ junpʼéeliliʼ bix u tuukuloʼob yoʼolal baʼaloʼob kʼaʼanaʼantakiʼ. Maʼ xaaneʼ maʼ junpʼéeliliʼ bix u tuukuloʼob yoʼolal le taakʼinoʼ, tiʼ baʼax ken u náays u yóoloʼob, tuʼux kun kajtaloʼob wa tiʼ baʼaloʼob yaan yil yéetel u xíimbaltik u láakʼtsiloʼob. Wa maʼ xaaneʼ le baʼaxoʼob mejentak ku beetik kaʼach u núupoʼ, ku joʼopʼol u yilik nak óol yéetel ku joʼopʼol u tsʼíikil tu yoʼolal. Le oʼolal maas maʼalob ka u tsikbaltoʼob le baʼaloʼob bey táanil tiʼ u tsʼoʼokol u beeloʼoboʼ.
16. ¿Baʼaxten le máaxoʼob tsʼokaʼan u beeloʼoboʼ unaj u tsikbaltikoʼob bix ken u aktáantoʼob le talamiloʼoboʼ?
16 Utiaʼal ka xiʼik utsil tiʼ le máaxoʼob ku tsʼoʼokol u beeloʼob yéetel ka yanak kiʼimak óolal tiʼobeʼ, kʼaʼabéet u yáantaj tu kaʼatúulal utiaʼal u aktáantkoʼob le talamiloʼoboʼ. Tu kaʼatúulaloʼob unaj u chʼaʼtuklikoʼob bix ken u líiʼs u paalaloʼob yéetel bix ken u kanáant u taataʼob, maʼ unaj u pʼatkubaʼob chéen yoʼolal le talamiloʼob ku yantal yoʼolal le baʼaloʼob beyaʼ. Wa ku nuʼuktik u kuxtaloʼob yéetel le baʼax ku yaʼalik le Bibliaoʼ, yaan u béeytal u yutskíintikoʼob le talamiloʼoboʼ wa yaan u kanik u aktáantoʼob utiaʼal ka seguernak u múuchʼ máansik u kuxtaloʼob ich kiʼimak óolal (1 Cor. 7:10, 11).
17. ¿Baʼaxoʼob chiʼichnakkúuntik le máaxoʼob tsʼokaʼan u beeloʼoboʼ?
17 Pabloeʼ ku yaʼalik tiʼ Yáax tiʼ Corintoiloʼob 7:32 tak 34 (xokaʼak), uláakʼ baʼax ku aktáantik le máaxoʼob ku tsʼoʼokol u beeloʼoboʼ. Ku yaʼalikeʼ le xiib tsʼokaʼan u beeloʼ ku chiʼichnaktal yoʼolal «u baʼalubaʼob yóokʼol kaab», wa yoʼolal janal, nookʼ, u yotochoʼob yéetel uláakʼ baʼaloʼob kʼaʼabéettak. ¿Baʼaxten jach ku chiʼichnaktal yoʼolal le baʼaloʼob beyaʼ? Tumen unaj u kanáantik u yatan yéetel u kiʼimakkúuntik u yóol. Kaʼacheʼ ku maas kʼubik u yóol u meyajt Dios, baʼaleʼ ken tsʼoʼokok u beeleʼ yaan u jóoʼsik u tiempoil utiaʼal u yantal yéetel u yatan. Lelaʼ bey xan unaj u beetik le atantsiloʼ. ¿Máasaʼ jach kiʼimak k-óol k-ojéeltik Jéeoba, k-Taata yaan teʼ kaʼanoʼ, jach ku naʼatik lelaʼ? Jéeobaeʼ u yojleʼ le máaxoʼob tsʼokaʼan u beeloʼoboʼ unaj u máanskoʼob yaʼab tiempo junmúuchʼ utiaʼal u maas yaabiltikubaʼob, kex ka yanak u meyajtiʼob le tiempo ku jóoʼskoʼob kaʼach utiaʼal u meyajtikoʼoboʼ.
18. ¿Baʼaxoʼob ku kʼexpajal ichil u kuxtal le máaxoʼob ku tsʼoʼokol u beeloʼoboʼ?
18 Le baʼaxoʼob tu yaʼalaj Pablooʼ ku kaʼansiktoʼon uláakʼ junpʼéel baʼal. Wa le máax tsʼokaʼan u beel ku máansik yéetel u núup le tiempo ku meyajtiʼ kaʼach utiaʼal u meyajtik Diosoʼ, ¿maʼ wa bey unaj u beetik yéetel uláakʼ baʼaloʼob suuk u beetik kaʼachiʼ? Maʼalob ka k-tukle: ¿bix jeʼel u yuʼubikuba juntúul atantsil wa jach yaʼab tiempo ku máansik u yíicham yéetel u amigoʼob jeʼex u beetik kaʼach maʼ tsʼoʼokok u beeleʼ? ¿Bix jeʼel u yuʼubikuba juntúul íichamtsil wa jach yaʼab tiempo ku máansik u yatan yéetel u amigaʼobeʼ? Maʼ xaaneʼ yaan u káajal u tuklikoʼob maʼ jach yaabiltaʼanoʼob tumen u núupoʼobiʼ, yaan u yuʼubikubaʼob chéen tu juunaloʼob yéetel maʼ kun yantal kiʼimak óolal tiʼob. Baʼaleʼ lelaʼ maʼ kun úuchul wa tu kaʼatúulal ku yilik u maas yaabiltikubaʼob (Efe. 5:31).
Jéeobaeʼ u kʼáat ka k-beet baʼax maʼalob
19, 20. 1) ¿Baʼaxten le tsʼoʼokol beeloʼ maʼatech u kanáantik máak utiaʼal maʼ u lúubul tiʼ núupkʼeban? 2) ¿Baʼax talamil jeʼel u yantal tiʼ le máaxoʼob ku máanskoʼob yaʼab tiempo náach tiʼ u núupoʼoboʼ?
19 Tuláakal le máaxoʼob meyajtik Jéeobaoʼ u yojloʼobeʼ maʼ unaj u lúubloʼob tiʼ núupkʼebaniʼ. Yaan máaxeʼ ku tsʼoʼokol u beel chéen utiaʼal maʼ u lúubul tiʼ le núupkʼebanoʼ. Baʼaleʼ unaj u kʼaʼajsik máakeʼ maʼ chéen letiʼe tsʼoʼokol beel kun kanáantikoʼ. Úuchjeakileʼ u baʼpakʼiloʼob junpʼéel kaajeʼ ku kanáantik le máaxoʼob yanoʼob ichiloʼ. Wa ku jóokʼloʼob teʼ kaajoʼ maʼ xaaneʼ jeʼel u yoklaʼaloʼobeʼ wa jeʼel tak u kíimsaʼaloʼob tumen le kʼasaʼan máakoʼoboʼ. Le máaxoʼob tsʼokaʼan u beeloʼob xanoʼ, maʼ kun lúubloʼob tiʼ núupkʼeban wa ku yilik u beetkoʼob le baʼax ku yaʼalik Jéeobaoʼ.
20 ¿Baʼax ku yaʼalik Jéeoba ka u beetoʼob? Pabloeʼ ku yaʼalik tiʼ Yáax tiʼ Corintoiloʼob 7:2 tak 5. Chéen letiʼe atantsil yaan u derechoil u núupchital yéetel u yíichamoʼ, lelaʼ bey xan u yúuchul yéetel le íichamtsiloʼ. Dioseʼ ku yaʼalik cada juntúuleʼ «unaj u tsʼoʼokbesik baʼax unaj» tiʼ baʼaloʼob yaan yil yéetel le núupchitaloʼ. Yaan máaxeʼ maʼatech u beetik beyoʼ, tumen ku máansik yaʼab tiempo tuʼux ku meyaj wa ku jóokʼol xíimbal chéen tu juunal. ¿Máasaʼ jach maʼ maʼalob ka lúubuk máak tiʼ núupkʼeban chéen tumen maʼ tu jetsʼik u tsʼíibolaliʼ? Jéeobaeʼ yaan u bendecirtik le íichamtsiloʼob ku yilik u tsʼáaikoʼob baʼax kʼaʼabéet tiʼ u familiaʼob yéetel ku yilkoʼob ka xiʼik utsil tiʼob yéetel u núupoʼoboʼ (Sal. 37:25).
Le utsiloʼob ku taasik u beetaʼal le baʼax ku yaʼalik le Bibliaoʼ
21. 1) ¿Baʼaxten maʼ chéen chʼaʼabil u chʼaʼtuklik máak wa yaan u tsʼoʼokol u beel wa maʼiʼ? 2) ¿Bix u yáantkoʼon le capítulo 7 tiʼ Yáax tiʼ Corintoiloʼoboʼ?
21 U jaajileʼ maʼ chéen chʼaʼabil u chʼaʼtuklik máak wa yaan u tsʼoʼokol u beel wa maʼiʼ. Yoʼolal le kʼebanoʼ ku yantal talamil tiʼ tuláakal máak. Le oʼolal tak le máaxoʼob meyajtik Jéeobaoʼ, kex tsʼokaʼan u beeloʼob wa maʼeʼ, ku muʼyajtikoʼob talamiloʼob. Baʼaleʼ le máaxoʼob beetik le baʼax ku yaʼalik le capítulo 7 tiʼ Yáax tiʼ Corintoiloʼoboʼ maas maʼ kun yantal talamil tiʼob, yéetel yaan u beetkoʼob baʼax uts tu táan Dios, kex tsʼokaʼan u beeloʼob wa maʼ (xokaʼak 1 Corintoiloʼob 7:37, 38). U maas maʼalobileʼ, letiʼe ka lúubkoʼon utsil tu táan Diosoʼ. Wa k-lúubul utsil tiʼeʼ, yaan u páajtal k-kuxtal mantatsʼ teʼ túumben luʼum, tuʼux maʼ kun yantal talamil ichil le xiiboʼob yéetel le koʼoleloʼoboʼ.
[Tsolajil]
^ xóot’ol 14 Ilaʼak le libro Le baʼax jeʼel u beetik u yantal kiʼimak óolal ichil le familiaoʼ, capítulo 2, xóotʼol 16 tak 19.
¿A wojel wa u núukil?
• ¿Baʼaxten maʼ unaj u sen aʼalaʼal tiʼ máak ka tsʼoʼokok u beeliʼ?
• ¿Bix jeʼel u meyaj maʼalob le tiempo yaan tiʼ le máax maʼ tsʼokaʼan u beeloʼ?
• ¿Baʼax unaj u beetik le máaxoʼob táan u tuklik u tsʼoʼokol u beeloʼoboʼ?
• ¿Baʼaxten le tsʼoʼokol beeloʼ maʼatech u kanáantik máak utiaʼal maʼ u lúubul tiʼ núupkʼeban?
[U kʼáatchiʼiloʼob le xookoʼ]
[Fotoʼob yaan teʼ táan juʼun 14]
Le sukuʼunoʼob yéetel le kiikoʼob maʼ tsʼokaʼan u beeloʼoboʼ ku yantal kiʼimak óolal tiʼob ken u tsʼáa u yóoloʼob teʼ kʼaʼaytajoʼ
[Foto yaan teʼ táan juʼun 16]
¿Baʼaxoʼob unaj u kʼexik máak ken tsʼoʼokok u beel?
