Unaj k-líiʼsik u yóol «máaxoʼob yaj u yóoloʼob»
Unaj k-líiʼsik u yóol «máaxoʼob yaj u yóoloʼob»
«Yuumtsileʼ tsʼoʼok u junpáaykuntiken [...] utiaʼal in tsʼáa u yóol máaxoʼob yaj u yóoloʼob.» (ISA. 61:1, 2)
1. ¿Bix úuchik u yáantik Jesús le máaxoʼob ku muʼyajoʼoboʼ, yéetel baʼaxten tu beetaj?
JESUSEʼ tu yaʼalaj: «In jaanleʼ in beetik u yóolal [wa baʼax u kʼáat] le máax túuxtenoʼ, yéetel in tsʼoʼoksik u meyaj» (Juan 4:34). Le táan u beetik le meyaj túuxtaʼab u beetoʼ, mantatsʼ tu yeʼesaj u jatsʼuts modos u Taata, maases le yaabilaj ku yuʼubik yoʼolal le máakoʼoboʼ (1 Juan 4:7-10). Junpʼéel bix u yeʼesiktoʼon u yaabilaj Jéeobaeʼ letiʼe u líiʼsik k-óoloʼ. Le oʼolal bakáan le apóstol Pablooʼ tu yaʼaleʼ Jéeobaeʼ letiʼe «Dios ku kiʼimakkúuntik k-óol mantatsʼoʼ» (2 Cor. 1:3). Cristoeʼ tu yeʼesaj xan le yaabilaj bey le ka tu beetaj le baʼax aʼalaʼan tumen Isaíasoʼ (xokaʼak Isaías 61:1, 2). Le ka bin u xíimbalt le sinagoga yaan tu kaajil Nazaretoʼ, tu xokaj le profecíaaʼ ka tu yaʼalaj tiʼ letiʼ ku béeytal le baʼax ku yaʼalikoʼ (Luc. 4:16-21). Leloʼ jach jaaj. Le tiaʼan way Luʼumoʼ mantatsʼ tu líiʼsaj u yóol yéetel tu yáantaj yéetel yaabilaj le máaxoʼob lubaʼan u yóoloʼoboʼ.
2, 3. ¿Baʼaxten unaj k-beetik jeʼex Jesús utiaʼal k-líiʼsik u yóol u maasileʼ?
2 Toʼon táan k-tsaypachtik Jesuseʼ unaj k-líiʼsik u yóol le máaxoʼob ku muʼyajoʼoboʼ (1 Cor. 11:1). Pabloeʼ ku yaʼalik: «Líiʼs óolintabaʼex yéetel muʼukʼaʼankúuntabaʼex ta baatsileʼex» (1 Tes. 5:11). Le máaxoʼob uts u puksiʼikʼaloʼob ku muʼyajoʼob wa lubaʼan u yóoloʼoboʼ jach unaj k-líiʼsik u yóoloʼob. ¿Baʼaxten? Tumen kuxaʼanoʼon tiʼ «talam kʼiinoʼob», tuʼux yaʼab máakoʼob chéen u yutsiloʼob ku kaxtikoʼob yoʼolal baʼax ku beetkoʼob wa baʼax ku yaʼalikoʼob (2 Tim. 3:1).
3 Jeʼex u yeʼesik le profecíaʼoboʼ, yaʼab máakeʼ «bíin tsʼuʼutchajkoʼob, bíin u yaabiltoʼob taakʼin, bíin kaʼanchajak u yichoʼob yéetel bíin u nojbaʼalkúuntubaʼob. Bíin tʼaanakoʼob tu contra Jajal Dios, maʼ tun u yuʼuboʼob u tʼaan u taataʼob, maʼ tun u tsʼaʼob nib óolal yéetel maʼ tun u tsikoʼob u maʼalob kuxtalil le oksaj óolaloʼ. Maʼ tun yantal u yaakunajoʼob mix u chʼaʼ óotsililoʼob, bíin u beetoʼob u líiʼsaj tʼaaniloʼob, maʼ tun páajtal u tsʼáancheʼetikoʼob u kʼaakʼas tsʼíibolaloʼobiʼ, bíin jach kʼasaʼanchajak u puksiʼikʼaloʼob yéetel bíin u pʼektoʼob tuláakal baʼal maʼalob. Bíin u kúulpachkuntoʼob máak, bíin u yoksubaʼob tuʼux maʼ unajiʼ, chuupoʼob yéetel nonojbail, bíin u yaabiltoʼob u kʼaakʼas tsʼíibolaloʼob baʼaleʼ maʼ bin u yaabiltoʼob Jajal Diosiʼ». Yéetel cada kʼiin ku máaneʼ táan u maas kʼastal, jeʼex u yaʼalik le tekstoaʼ: «Le máaxoʼob kʼasaʼanoʼoboʼ yéetel le ku tuusoʼoboʼ bíin xiʼikoʼob tiʼ kʼaas tak tu maas kʼaasil» (2 Tim. 3:2-4, 13).
4. ¿Baʼax táan u sen úuchul teʼ kʼiinoʼobaʼ?
4 Toʼoneʼ maʼ jelaʼan k-ilik lelaʼ, tumen le Bibliaoʼ ku yaʼalikeʼ «u túulisil yóokʼol kaabeʼ tiʼ yaan yáanal u páajtalil Kʼaasilbaʼaleʼ» (1 Juan 5:19). Le ken u yaʼal «u túulisil yóokʼol kaabeʼ» ku táakbesik le politicoʼoboʼ, u maasil religioʼonoʼoboʼ, le j-koonoloʼoboʼ yéetel le baʼaxoʼob ku meyaj tiʼ le Kʼaasilbaʼaloʼ. Le oʼolal le Bibliaoʼ ku yaʼalikeʼ Satanaseʼ letiʼe «máax ku tusbel way yóokʼol kaabeʼ» yéetel «u [diosil] le yóokʼol kaabaʼ» (Juan 14:30; 2 Cor. 4:4). ¿Baʼaxten táan u bin u maas kʼastal le baʼaxoʼob ku beetaʼal way Luʼumeʼ? Tumen le Kʼaasilbaʼaloʼ jach pʼujaʼan yéetel u yojel jach taʼaytak u xuʼulsaʼaltiʼ (Apo. 12:12). Maʼ kun xáantaleʼ Jéeobaeʼ yaan u xuʼulul u chéen ilik baʼax ku beetik Satanás yéetel u kʼasaʼan yóokʼol kaab, yéetel yaan u beetik u yilaʼaleʼ maʼ jaaj le baʼax u yaʼalmaj le Kʼaasilbaʼal tu contra le bix u gobernaroʼ. ¿Máasaʼ jach jatsʼuts le baʼax ku taal u kʼiinoʼ? (Gén., cap. 3; Job, cap. 2.)
K-kʼaʼaytik le maʼalob péektsil tiʼ tuláakal le Luʼumaʼ
5. ¿Bix táan u béeytal teʼ tu tsʼook kʼiinoʼob le profecía ku tʼaan tiʼ le kʼaʼaytajoʼ?
5 Teʼ tu tsʼook kʼiinoʼob jach talamtakaʼ táan xan u béeytal le baʼax tu yaʼalaj Cristoaʼ: «U maʼalob péektsil le ajawiloʼ [wa reinooʼ] bíin tseʼektaʼak [wa kʼaʼaytaʼak] tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mat. 24:14). Cada kʼiin ku máaneʼ táan u maas kʼaʼaytaʼal le maʼalob péektsiloʼ. Teʼ kʼiinoʼobaʼ yaan maas tiʼ 7,500,000 j-kʼaʼaytajoʼob, maas tiʼ 107,000 múuchʼuliloʼob, táan u kʼaʼaytikoʼob tiʼ tuláakal le Luʼum u Reino Dios, le gobierno kʼaʼaytaʼab yéetel kaʼansaʼab tumen Jesusoʼ (Mat. 4:17). Yoʼolal leloʼ le máaxoʼob ku muʼyajoʼoboʼ ku líikʼil u yóoloʼob. Lelaʼ ku yilaʼal tumen chéen teʼ kaʼapʼéel jaʼab tsʼoʼok u máanoʼ okjaʼanaj 570,601 máakoʼob utiaʼal u beetkubaʼob j-jaajkunajil tiʼ Jéeoba.
6. ¿Baʼax ka tuklik yoʼolal bix u bin u kʼaʼaytaʼal le maʼalob péektsil tuláakal tuʼuxoʼ?
6 Uláakʼ baʼax eʼesik táan u bin u maas kʼaʼaytaʼal le maʼalob péektsiloʼ tumen táan k-sutik yéetel táan k-jóoʼsik jejeláas jóoʼsaʼaniloʼob ich maas tiʼ quinientos tʼaanoʼob. ¿Máasaʼ lelaʼ junpʼéel baʼax mix juntéen ilaʼak? Lelaʼ ku yilaʼal tumen mix baʼal béeyak u xuʼulsik tiʼ u kaajal Jéeoba, mix u xuʼulul u kʼaʼaytaj bey xan u yaʼabtal. Lelaʼ maʼ tu béeytal wa maʼ yoʼolal u yáantaj yéetel u nuʼuktaj le kiliʼich muukʼoʼ, tumen u kʼasaʼan yóokʼol kaab Satanaseʼ tiaʼan t-contraeʼ. Yoʼolal le kʼaʼaytaj ku beetaʼal tuláakal yóokʼol kaaboʼ, táan u bin u yaʼabtal le máaxoʼob kʼamik u maʼalob péektsilil le Reinooʼ yéetel táan u líikʼil u yóoloʼob jeʼex úuchik u líiʼsaʼal k-óoleʼ.
Unaj k-líiʼsik u yóol k-sukuʼunoʼob
7. 1) ¿Baʼaxten maʼ unaj k-páaʼtik ka xuʼulsaʼak tumen Jéeoba tu séebaʼanil le baʼaxoʼob beetik k-muʼyajoʼ? 2) ¿Bix k-ojéeltik jeʼel u páajtal k-aktáantik le chʼaʼpachtajil yéetel le talamiloʼoboʼ?
7 Teʼ kʼiinoʼobaʼ jeʼel baʼaxak ka k-beeteʼ k-chiʼichnaktal yoʼolal wa baʼax, tumen le yóokʼol kaabaʼ jach chuup yéetel kʼasaʼanil bey xan yéetel muʼyajil. Mientras maʼ xuʼulsaʼak tumen Dioseʼ, yaan u seguer k-muʼyajtik yaʼab baʼaloʼob. Tsʼoʼoleʼ k-aktáantik le chʼaʼpachtajil jeʼex u yaʼalik le Bibliaoʼ, utiaʼal k-eʼesik chúukaʼan k-óol tiʼ Jéeoba yéetel utiaʼal k-eʼesik k-tsʼáaikba tu tséel u gobernación (2 Tim. 3:12). Yéetel le líiʼsaj óol ku tsʼáaiktoʼon Jéeoba, k-Taata yaan teʼ kaʼan, bey xan yéetel u yáantajoʼ jeʼel u páajtal k-beetik jeʼex le cristianoʼob yéeyaʼanoʼob tiʼ u kaajil Tesalónica úuchjeakiloʼ, letiʼobeʼ tu yeʼesoʼob le «chowak óolaloʼ yéetel le oksaj óolal [...] ichil tuláakal le chʼaʼpachtajiloʼoboʼ yéetel ichil le yaayaj óolaloʼob[oʼ]» (xokaʼak 2 Tesalonicailoʼob 1:3-5).
8. ¿Baʼaxoʼob eʼesik Jéeobaeʼ mantatsʼ ku líiʼsik u yóol le máaxoʼob meyajtikoʼ?
8 Jéeobaeʼ mantatsʼ ku tsʼáaik le áantaj kʼaʼabéet tiʼ le máaxoʼob meyajtikoʼ. Koʼoneʼex ilik bix úuchik u yáantik Elías. Le ka aʼalaʼab yaan u kíimsaʼal tumen reina Jezabeleʼ, jach sajakchajeʼ ka púutsʼi, ka tak kuch u yaʼal taak u kíimil. Baʼaleʼ Dioseʼ maʼ tu kʼeyaj yoʼolal le baʼax tu beetoʼ, baʼaxeʼ tu líiʼsaj u yóol yéetel tu yáantaj utiaʼal u seguer u beetik u profetail (1 Rey. 19:1-21). U jaajileʼ Jéeobaeʼ mantatsʼ ku líiʼsik u yóol le máaxoʼob meyajtikoʼ, lelaʼ bey úuchik u beetik yéetel le cristianoʼob teʼ yáax siglooʼ. Le Bibliaoʼ ku yaʼalik: «Tuláakal le [«múuchʼuliloʼob», NM] tu luʼumil Judea, Galilea yéetel Samariaeʼ, yaan jeetsʼel tiʼob yéetel táan u chʼaʼikoʼob muukʼ. Kuxaʼanoʼob tiʼ u saajkilil Yuumtsil, bey xan táan u yaʼabtaloʼob yéetel u yáantaj kiliʼich» muukʼ (Hch. 9:31). ¿Máasaʼ jach kiʼimak k-óol tumen, jeʼex le sukuʼunoʼob teʼ yáax siglooʼ, toʼon xaneʼ táan k-áantaʼal tumen le kiliʼich muukʼoʼ?
9. ¿Baʼaxten jeʼel u líikʼil k-óol wa k-xakʼalxoktik le baʼaxoʼob tu beetaj Cristooʼ?
9 Uláakʼ baʼax líiʼsik k-óoleʼ letiʼe k-xokik le baʼaxoʼob tu beetaj Jesusoʼ yéetel k-kuxtal jeʼex kuxlajikoʼ. Letiʼeʼ tu yaʼalaj: «Biseʼex in kuuch ta wóokʼoleʼex, yéetel kaanbalneneʼex tiʼ teen, tumen teneʼ chukaʼan in wóol yéetel kabal u yóol in puksiʼikʼal; beyoʼ bíin a kaxteʼex jeʼelel utiaʼal a [«kuxtaleʼex», NM]. Tumen in kuucheʼ maʼ aaliʼ yéetel sáal u bisaʼal» (Mat. 11:28-30). Jeʼex k-ilkoʼ Cristoeʼ mantatsʼ tu líiʼsaj u yóol u maasil yéetel tu yeʼesaj yaabilaj tiʼob. Wa k-xakʼalxoktik le baʼaxoʼob tu beetaj yéetel k-ilik k-beetik jeʼex tu beetiloʼ yaan u líikʼil k-óol yéetel yaan u yáantkoʼon k-aktáant le talamiloʼob ku yantaltoʼon sáamsamaloʼ.
10, 11. ¿Máaxoʼob teʼ múuchʼulil jeʼel u páajtal u líiʼsik u yóol u maasileʼ?
10 Jeʼel xan u líiʼsaʼal k-óol tumen k-sukuʼunoʼob teʼ múuchʼuliloʼ. Jeʼex le ancianoʼoboʼ jach ku yáantkoʼob le sukuʼunoʼob ku muʼyajoʼoboʼ. Le disipulo Santiagooʼ, tu yaʼalaj: «¿Yaan wa máax kʼojaʼan? Unaj u tʼanik u nuukiloʼob le [«múuchʼuliloʼ», NM], utiaʼal ka payalchiʼinakoʼob tu yoʼolal» ¿Baʼax túun kun úuchul? «Le ken payalchiʼinakoʼo[b] yéetel oksaj óolaleʼ, le kʼojaʼanoʼ yaan u tojtal u yóol, yéetel yaan u líiʼsaʼal tumen Yuumtsil; yéetel wa kʼebanchajaʼaneʼ yaan u saʼatal tiʼ» (Sant. 5:14, 15.) Baʼaleʼ tuláakloʼon jeʼel u páajtal k-paklan líiʼsik k-óoleʼ.
11 Yaan kʼiineʼ le kiikoʼoboʼ maas uts tu tʼaan u tsikbaltikoʼob tiʼ uláakʼ kiikoʼob le talamiloʼob ku yantaltiʼoboʼ. Le kiikoʼob tsʼoʼok u chan yantal u jaʼabiloʼoboʼ jeʼel u páajtal u tsolkoʼob u nuʼuk tiʼ le x-lóoʼbayanoʼoboʼ, tumen maʼ xaaneʼ tsʼoʼok u aktáantkoʼob le talamiloʼob beyoʼ. Tumen ku chʼaʼikoʼob óotsilil yéetel ku kanáantkoʼob baʼax ku yaʼalikoʼobeʼ jach ku béeytal u yáantajoʼob (xokaʼak Tito 2:3-5). Le ancianoʼob yéetel u maasil sukuʼunoʼob teʼ múuchʼuliloʼ unaj xan u líiʼskoʼob «u yóol le máaxoʼob luubul u yóoloʼoboʼ» (1 Tes. 5:14, 15). Maʼ u tuʼubultoʼoneʼ Dioseʼ ku líiʼsik «k-óol tiʼ tuláakal k-muʼyajoʼob, utiaʼal ka páatak k-kiʼimakkúuntik u yóol le máaxoʼob ku muʼyajoʼoboʼ» (2 Cor. 1:4).
12. ¿Baʼaxten jach unaj k-bin teʼ muchʼtáambaloʼoboʼ?
12 Le muchʼtáambaloʼob xanoʼ mantatsʼ jach ku líiʼskoʼob k-óol. Le Bibliaoʼ ku yaʼalikeʼ Judas yéetel Silaseʼ «yéetel u tʼaanoʼobeʼ tu tsʼáajoʼob yaʼab jeetsʼel óolal yéetel tu [«líiʼsoʼob u yóol», NM] le sukuʼunoʼoboʼ» (Hch. 15:32). Le tsikbal k-beetik yéetel le sukuʼunoʼob táanil tiʼ le muchʼtáambal yéetel ken tsʼoʼokkoʼ jach ku líiʼsik k-óol. Le oʼolal wa táan k-aktáantik talamiloʼobeʼ maʼ unaj k-náachtal tiʼ k-sukuʼunoʼobiʼ, tumen maas maʼ kun bin utsil toʼon (Pro. 18:1). Baʼaxeʼ unaj k-beetik le baʼax tu yaʼalaj apóstol Pablooʼ: «Unaj k-kaxantik bix jeʼel u páajtal k-áantikba t-baatsileʼ utiaʼal ka yanaktoʼon yaakunaj yéetel utiaʼal k-beetik baʼax uts. Maʼ unaj k-ketikba yéetel le máaxoʼob suuk tiʼob maʼ u taaloʼob muchʼtal t-éeteliʼ, baʼaleʼ unaj k-líikʼ óoltikba t-baatsileʼ, [maas] unaj k-beetik bejlaʼeʼ tumen táan a wilkeʼex u náatsʼal u kʼiinil Yuumtsil» (Heb. 10:24, 25).
Le Bibliaoʼ jach ku líiʼsik k-óol
13, 14. ¿Bix u líiʼsik k-óol le Bibliaoʼ?
13 Kex úuch okjaʼanakoʼon wa kex maʼ úuch káajak k-kaanbal tiʼ Jéeoba bey xan tiʼ le baʼaxoʼob ku yaʼalik u beetkoʼ, jeʼel u líiʼsik k-óol le baʼax ku yaʼalik le Bibliaoʼ. Lelaʼ bey tu yaʼalil Pablo: «Tuláakal baʼax aʼalaʼab tiʼ le Kiliʼich Tsʼíiboʼ, tsʼíibtaʼan utiaʼal ka kaanbalnakoʼon, utiaʼal ka yanaktoʼon alab óolal tu yoʼolal le chukaʼan óolal yéetel le kiʼimak óolal k-ilik teʼ tsʼíiboʼoboʼ» (Rom. 15:4). Le Bibliaoʼ ku líiʼsik u yóol le máax meyajtik Diosoʼ yéetel ku yáantik utiaʼal «ka utsil chúukaʼanchajak yéetel nuʼukaʼan utiaʼal u beetik tuláakal u jejeláasil maʼalob meyajoʼob» (2 Tim. 3:16, 17). Jach ku kiʼimaktal k-óol k-ojéeltik baʼax u tukultmaj u beetik Dios yéetel u yantaltoʼon junpʼéel esperanza. Le oʼolal unaj u meyajtoʼon maʼalob le Bibliaoʼ bey xan le jóoʼsaʼaniloʼob ku maas tsolkoʼob baʼax ku yaʼalikoʼ. Wa k-beetik beyoʼ yaan u líikʼil k-óol yéetel yaan k-kʼamik uláakʼ utsiloʼob.
14 Jesuseʼ tu yeʼesajtoʼon bix unaj k-beetik. Tiʼ letiʼeʼ meyajnaj le Kiliʼich Tsʼíiboʼob utiaʼal u kaʼansaj yéetel utiaʼal u líiʼsik u yóol u maasiloʼ. Ka tsʼoʼok u kaʼa kuxkíintaʼaleʼ tu chíikbesuba tiʼ kaʼatúul u disipuloʼob «kaʼalikil táan u tsolik[tiʼob] le Kiliʼich Tsʼíiboʼoboʼ», le oʼolal kʼuch tu puksiʼikʼaloʼob (Luc. 24:32). Apóstol Pabloeʼ jach tu beetaj jeʼex Cristoeʼ. Yaʼab u téeneleʼ meyajtiʼ le Kiliʼich Tsʼíiboʼob utiaʼal u tʼaan yéetel le máaxoʼob uʼuyikoʼ. ¿Baʼax tu beetoʼob le máakoʼob ka tsʼoʼokoʼ? U kajnáaliloʼob Bereaeʼ «tu kʼamoʼob le maʼalob péektsiloʼ yéetel kiʼimak óolal, táan u kaxtikoʼob sáamsamal tiʼ le Kiliʼich Tsʼíiboʼoboʼ» (Hch. 17:2, 10, 11). Jeʼex k-ilkoʼ jach unaj k-xokik sáamsamal le Biblia yéetel le jóoʼsaʼaniloʼoboʼ. Leloʼobaʼ jach ku líiʼskoʼob k-óol yéetel jeʼel u yáantkoʼon teʼ kʼiinoʼob jach talamtakaʼ.
Uláakʼ bix jeʼel k-líiʼsik u yóol u maasileʼ
15, 16. ¿Baʼaxoʼob jeʼel u páajtal k-beetik utiaʼal k-áantik yéetel k-líiʼsik u yóol le sukuʼunoʼoboʼ?
15 Jejeláas bix jeʼel k-áantik le sukuʼunoʼoboʼ. Le oʼolal wa kʼojaʼanoʼob, wa tsʼoʼok u chʼíijloʼob yéetel wa maʼ tu páajtal u binoʼob maaneʼ, maʼalob ka k-aʼaltiʼob jeʼel k-bin man le baʼax kʼaʼabéettiʼoboʼ. Tsʼoʼoleʼ jeʼel u páajtal k-áantkoʼob tiʼ wa baʼax meyajil kʼaʼabéet ichil u yotochoʼobeʼ (Fili. 2:4). Maʼalob xan ka k-aʼaltiʼob jach jatsʼuts bix u yeʼeskoʼob yaabilaj, bix u tsʼáaik u yóol u meyajtoʼob Dios, bix u yeʼeskoʼob fe wa yoʼolal uláakʼ jatsʼuts modos.
16 Junpʼéel bix jeʼel k-líiʼsik u yóol le sukuʼunoʼob tsʼoʼok u yantal u jaʼabiloʼoboʼ, letiʼe ka xiʼikoʼon k-xíimbaltoʼoboʼ yéetel ka k-chʼenxikint le baʼaxoʼob tsʼoʼok u aktáantkoʼoboʼ bey xan le utsiloʼob tsʼoʼok u kʼamkoʼob yoʼolal le bix u meyajtikoʼob Jéeobaoʼ. Wa beetik beyoʼ, maʼ xaaneʼ toʼon kun líikʼil k-óol. Ken xiʼikoʼon k-xíimbaltoʼobeʼ jeʼel u páajtal k-xokik le Biblia wa le jóoʼsaʼaniloʼob u yuʼuboʼoboʼ. Tsʼoʼoleʼ maʼalob ka k-xakʼalt tu yéeteloʼob u Xookil U Pʼíich Tulumil Kanan wa le U Xookil le Biblia teʼ Múuchʼulil ku yilaʼal teʼ semanaoʼ. Jeʼel xan u páajtal k-chaʼantik tu yéeteloʼob junpʼéel DVD jóoʼsaʼan tumen le palitsiloʼ, k-xokik wa k-tsikbaltiktiʼob jujunpʼéel experienciaʼob ku taasik le jóoʼsaʼaniloʼoboʼ.
17, 18. ¿Baʼaxten jeʼel u páajtal k-kʼubik k-óol yaan k-áantaʼal yéetel yaan u líiʼsaʼal k-óol tumen Jéeobaeʼ?
17 Ken k-il lubaʼan u yóol juntúul sukuʼuneʼ jeʼel u páajtal k-chʼaʼchiʼitik u kʼaabaʼ ken payalchiʼinakoʼon t-juunaleʼ (Rom. 15:30; Col. 4:12). Wa táan k-tuklik bix jeʼel k-áantik u maasil bey xan wa táan k-aktáantik wa baʼax talamileʼ, unaj u yantaltoʼon le fe yéetel le tuukul yanchaj tiʼ le salmistaaʼ: «Pʼat a yaayam óolaloʼob tiʼ Yuumtsil, letiʼ túuneʼ yaan u tsʼáaiktech jeetsʼel; mix bikʼin bíin u chaʼa u lúubul le máax toj u kuxtaloʼ» (Sal. 55:22). Wa chúukaʼan k-óol k-meyajt Dioseʼ, letiʼeʼ yaan u yáantkoʼon yéetel yaan u líiʼsik k-óol mantatsʼ.
18 Úuchjeakileʼ Jéeobaeʼ tu yaʼalaj tiʼ le máaxoʼob meyajtikoʼ: «Teen tsʼáaik a wóol[eʼex]» (Isa. 51:12). Bejlaʼa xaneʼ ku líiʼsik k-óol yéetel ku yáantkoʼon, tsʼoʼoleʼ ku bendecirtik le baʼaxoʼob k-beetik yéetel k-aʼalik utiaʼal k-líiʼsik u yóol u maasiloʼ. Kex wa táan k-páaʼtik k-bin kuxtal teʼ kaʼan wa k-pʼáatal kuxtal way Luʼumeʼ, jach ku líiʼsik k-óol le baʼax tu yaʼalaj Pablo tiʼ le sukuʼunoʼob yéeyaʼanoʼob utiaʼal u binoʼob kaʼanoʼ: «K-Yuumtsil Jesucristo, yéetel Jajal Dios k-Taataeʼ le máax tu yoʼolal u siibal utsil tu yaabiltoʼon yéetel tu tsʼáajtoʼon kiʼimak óolal minaʼan u xuuleʼ bey xan junpʼéel maʼalob alab óolaleʼ, ka u líiʼs u yóol a puksiʼikʼaleʼex yéetel ka u beet a jeetsʼel pʼáatleʼex utiaʼal ka a waʼaleʼex yéetel ka a beeteʼex tuláakal baʼax uts» (2 Tes. 2:16, 17).
¿Kʼajaʼantoʼon wa lelaʼ?
• ¿Bix u bin u yaʼabtal le máaxoʼob ku líiʼsaʼal u yóoloʼoboʼ?
• ¿Baʼaxoʼob jeʼel u páajtal k-beetik utiaʼal k-líiʼsik u yóol u maasileʼ?
• ¿Baʼax tekstoiloʼob eʼesik Jéeobaeʼ ku líiʼsik u yóol le máaxoʼob meyajtikoʼ?
[U kʼáatchiʼiloʼob le xookoʼ]
[U tsolajil le foto yaan te táan juʼun 28]
¿K-ilik wa k-líiʼsik u yóol le máaxoʼob ku muʼyajoʼoboʼ?
[U tsolajil le foto yaan te táan juʼun 30]
Kex táankelmoʼon wa tsʼoʼok u yantal k-jaʼabileʼ jeʼel u páajtal k-líiʼsik u yóol u maasileʼ
