Unaj k-paklan kiʼimakkúuntik k-óol yéetel u maasil

CADA kʼiin ku máaneʼ ku maas talamtal u kuxtal máak ich kiʼimak óolal. Yaʼab máakeʼ ku tuklikeʼ bey maʼ tu béeytal u kiʼimakkúuntik u yóol u maasileʼ. Le bix u kuxtal máak, maases teʼ nukuch kaajoʼoboʼ, ku beetik maʼ u máansik tiempo yéetel u maasil.

Alberto Oliverio, profesor tiʼ Psicobiologíaeʼ, ku yaʼalik: «Bejlaʼeʼ jach yaʼab máakoʼob uts tu tʼaan u yantaloʼob chéen tu juunaloʼob [...]. U kuxtal máak tiʼ junpʼéel kaaj tuʼux kajaʼan yaʼab máakeʼ, ku beetik u náachtal tiʼ u maasil, le oʼolal yaʼab u téeneleʼ maʼ u yojel baʼax ku yúuchul tiʼ u yéet meyaj teʼ oficinaoʼ, u vecino, le máax ku koonol teʼ tienda wa tuláakʼ tuʼuxoʼ». Lelaʼ ku beetik u jach lúubul u yóol máak.

U maʼalobileʼ maʼ bey u kuxtal yéetel u yuʼubikuba le máaxoʼob meyajtik Diosoʼ. Apóstol Pabloeʼ ku yaʼaliktoʼon: «Mantatsʼ kiʼimakchajak a wóoleʼex» (1 Tes. 5:16). Bey túunoʼ jach yaan baʼax oʼolal u kiʼimaktal k-óol bey xan k-kiʼimakkúuntik u yóol u maasil. Toʼoneʼ k-adorartik Jéeoba, le Dios Sen Kaʼanal tiʼ tuláakal le luʼumaʼ; k-naʼatik le baʼax ku kaʼansik le Bibliaoʼ; k-ojel jeʼel u páajtal k-kʼamik le salvación yéetel  le kuxtal minaʼan u xuuloʼ, tsʼoʼoleʼ yaantoʼon u jatsʼuts páajtalil k-áantik u maasil utiaʼal u kʼamkoʼob le utsiloʼobaʼ (Sal. 106:4, 5; Jer. 15:16; Rom. 12:12).

Le máaxoʼob meyajtik Diosoʼ mantatsʼ ku yilaʼal yaan kiʼimak óolal tiʼob yéetel ku kiʼimakkúuntik u yóoloʼob yéetel u maasil. Le oʼolal Pabloeʼ tu yaʼalaj tiʼ le filiposiloʼoboʼ: «Teneʼ ku kiʼimaktal in wóol yéetel kin táakbesikeʼex tuláakleʼex tiʼ in kiʼimak óolal. Bey xan teʼex kiʼimakchajak a wóoleʼex yéetel nupabaʼex tiʼ in kiʼimak óolal» (Fili. 2:17, 18). Teʼ versiculoʼobaʼ le apostoloʼ kaʼatéen tu yaʼalaj unaj u kiʼimaktal k-óol yéetel u maasil.

Jeʼex k-ilkoʼ maʼ unaj k-náachkuntikba tiʼ u maasiliʼ, tumen wa k-beetkeʼ maʼ kun béeytal k-paklan kiʼimakkúuntik k-óol yéetel uláakʼ sukuʼunoʼob. Pabloeʼ ku yaʼaliktoʼon: «Kiʼimakchajak a wóoleʼex tiʼ Yuumtsil» (Fili. 3:1). ¿Bix jeʼel u páajtal k-kiʼimakkúuntik k-óol yéetel k-sukuʼunoʼobeʼ?

Unaj k-paklan kiʼimakkúuntik k-óol yéetel le sukuʼunoʼoboʼ

Le ka tu tsʼíibtaj Pablo u cartail Filiposiloʼoboʼ, maʼ xaaneʼ tiʼ kʼalaʼan tu kaajil Roma yoʼolal le maʼalob péektsiloʼ (Fili. 1:7; 4:22). Baʼaleʼ kex kʼalaʼaneʼ maʼ xuʼul u tsʼáaik u yóol u meyajt Jéeobaiʼ. Baʼaxeʼ jach kiʼimak u yóol u beetik tuláakal le ku páajtal utiaʼal u kʼubikuba bey «jeʼex le ukʼul ku láalaʼal yóokʼol le siibal[oʼ]» (Fili. 2:17, NM). Le bix u tuukul le apostoloʼ ku yeʼesikeʼ jeʼel u kiʼimaktal u yóol máak tak ken u aktáant talamiloʼobeʼ, tumen kex kʼalaʼaneʼ, tu yaʼalaj: «Yaan u [seguer u] kiʼimaktal in wóol» (Fili. 1:18)

Pabloeʼ letiʼ káajs le múuchʼulil yaan tu kaajil Filiposoʼ, le oʼolal jach tu yaabiltaj le sukuʼunoʼob yanoʼoboʼ. U yojleʼ jeʼel u líikʼil u yóoloʼob ken u tsikbaltiʼob le kiʼimak óolal ku yuʼubik ikil u meyajtik Jéeobaoʼ. Le oʼolal tu yaʼalajtiʼob: «In kʼáat ka a wojéelteʼexeʼ le baʼaloʼob tsʼoʼok u yúuchultenoʼ u jaajileʼ taaloʼob bey junpʼéel áantajeʼ utiaʼal u [kʼaʼaytaʼal] le maʼalob péektsiloʼ. Bey túunoʼ tuláakal u soldadoʼob le chúumuk najoʼ, yéetel tuláakal le uláakʼoʼoboʼ, u yojloʼob kʼalaʼanen tu yoʼolal in tsaypachtik Cristo» (Fili. 1:12, 13). Le ka tu tsikbaltajtiʼob lelaʼ u kʼáat ka kiʼimakchajak u yóoloʼob xan yoʼolal le baʼax kiʼimakkúuntik u yóoloʼ. Maʼ xaaneʼ le filiposiloʼoboʼ jach kiʼimakchaj u yóoloʼob tu yéetel. Baʼaleʼ unaj u yilkoʼob maʼ u lúubul u yóoloʼob yoʼolal le baʼaxoʼob ku muʼyajtik Pablooʼ, baʼaxeʼ ka u yiloʼob bix jeʼel u beetkoʼob jeʼex tu beetiloʼ (Fili. 1:14; 3:17). Jeʼel kaʼach u páajtal u seguer u payalchiʼob tu yoʼolaleʼ bey xan u yáantkoʼob le bukaʼaj ku páajtaleʼ (Fili. 1:19; 4:14-16).

 ¿K-tuukul wa jeʼex tuukulnajik Pablooʼ? ¿K-ilik wa k-chʼíikil tiʼ le baʼaloʼob maʼalobtak ku yúuchultoʼon ichil k-kuxtal yéetel teʼ kʼaʼaytajoʼ? Ken yanakoʼon yéetel le sukuʼunoʼoboʼ, maʼalob ka k-tsikbalttiʼob le baʼaxoʼob tsʼoʼok u kiʼimakkúuntik k-óol teʼ kʼaʼaytajoʼ. Maʼ kʼaʼabéet ka k-tsikbalttiʼob yaʼab baʼaloʼobiʼ. Maʼ xaaneʼ chéen bix úuchik u chʼenxikintikoʼon wa máax teʼ kʼaʼaytaj yoʼolal bix úuchik k-káajsik k-tsikbaloʼ wa yoʼolal bix úuchik k-tsolik wa baʼax. Wa maʼ xaaneʼ jeʼel u páajtal k-aʼalik bix úuchik k-tsolik tiʼ wa máax junpʼéel teksto tiʼ le Bibliaoʼ. Wa chéen tumen k-kʼaj óoltaʼab u j-jaajkunajoʼon Jéeoba, tumen k-ojel leloʼ tu tsʼáaj nojbeʼenil tiʼ Dios. Cada ken tsikbalnakoʼon tiʼ le baʼaloʼob beyaʼ táan k-paklan líiʼsik k-óol.

Yaʼab máaxoʼob meyajtik Jéeobaeʼ mantatsʼ táan u beetkoʼob tuláakal le ku páajtal utiaʼal u jóokʼloʼob kʼaʼaytajoʼ. Le precursoroʼob, le superintendente viajanteʼob, le betelitaʼob, le misioneroʼob yéetel le siervo internacionaloʼoboʼ, yéetel tuláakal u puksiʼikʼaloʼob bey xan yéetel kiʼimak óolal ku tsʼáaik u yóoloʼob u meyajtoʼob Dios. ¿K-paklan kiʼimakkúuntik wa k-óol yéetel le sukuʼunoʼob ku «meyajoʼob [...] utiaʼal u [Reino] Jajal Dios[oʼ]»? (Col. 4:11.) Wa beyoʼ unaj k-aʼaliktiʼob jach maʼalob le meyaj ku beetkoʼoboʼ. Ken yanakoʼon tu yéeteloʼob teʼ muchʼtáambaloʼob wa teʼ asambleaʼoboʼ, jeʼel u páajtal k-líiʼsik u yóoloʼobeʼ. Maʼalob xan ka k-il k-meyajtik Dios jeʼex u beetkoʼoboʼ, k-invitarkoʼob janal t-otoch utiaʼal u tsikbaltikoʼobtoʼon baʼaxoʼob tsʼoʼok u yúuchultiʼob ikil u meyajtikoʼob Dios (Fili. 4:10).

Unaj k-kiʼimakkúuntik u yóol le máaxoʼob aktáantik talamiloʼoboʼ

Pabloeʼ páajchaj u aktáantik le chʼaʼpachtajil yéetel uláakʼ talamiloʼoboʼ, lelaʼ le áant utiaʼal u chúukpajal u yóol u meyajt Jéeoba (Col. 1:24; Sant. 1:2, 3). Tsʼoʼoleʼ kiʼimakchaj u yóol u yojéeltik le baʼax tu beetoʼ tu yáantaj le sukuʼunoʼob tiʼ u kaajil Filipos utiaʼal ka chúukpajak u yóoloʼoboʼ, tumen maʼ xaaneʼ yaan u aktáantkoʼob talamiloʼob jeʼex le tu aktáantoʼ. Utiaʼal u paklan kiʼimakkúuntik u yóol tu yéeteloʼobeʼ, tu yaʼalajtiʼob: «Tu yoʼolal Cristoeʼ tsʼaʼan tiʼ teʼex kiʼimak óolalil maʼ chéen ka woks a wóoleʼex tiʼeʼ, baʼaleʼ ka muʼyajnakeʼex xan tu yoʼolal. Teʼex yéetel teneʼ tiʼ yanoʼon tiʼ junpʼéeliliʼ baʼateleʼ. Tsʼoʼok a wilkeʼex bix baʼatelnajiken, beoraaʼ tsʼoʼok a wuʼuyikeʼex u péektsilil bix láayliʼ táan in baʼateleʼ» (Fili. 1:29, 30).

Bejlaʼeʼ yaʼab sukuʼunoʼobeʼ láayliʼ ku chʼaʼpachtaʼaloʼob tumen ku kaʼanskoʼob u jaajileʼ. Kex yaan kʼiin ku beetaʼal loob tiʼobeʼ, maases ku yaʼalaʼal baʼaloʼob maʼ jaajtak tu contraʼob tumen le apostataʼoboʼ, ku pʼektaʼaloʼob tumen u láakʼtsiloʼob yéetel ku pʼaʼastaʼaloʼob tumen u yéet xookoʼob wa u yéet meyajoʼob. Jesuseʼ tu yaʼaleʼ maʼ unaj u jaʼakʼal k-óol mix u lúubul k-óoliʼ, baʼaxeʼ unaj u kiʼimaktal k-óol. Letiʼeʼ tu yaʼalaj: «[Kiʼimakchajak] a wóoleʼex le ken poʼochʼkeʼex tumen máakoʼob, ken beetaʼak tiʼ teʼex baʼaloʼob kʼaastak, bey xan ken líiʼsaʼak ta wóokʼoleʼex tuláakal tuusoʼob tin woʼolal. [Kiʼimakchajak] a wóoleʼex, tumen bíin a kʼameʼex junpʼéel nojoch boʼolal teʼ kaʼanoʼ» (Mat. 5:11, 12).

Ken k-uʼuy bix u chʼaʼpachtaʼal k-sukuʼunoʼob tuláakʼ luʼumiloʼobeʼ, maʼ unaj k-sen tuklikiʼ mix k-chiʼichnaktaliʼ, baʼaxeʼ unaj u kiʼimaktal k-óol tumen táan u chúukpajal u yóoloʼob yéetel unaj k-kʼáatik tiʼ Jéeoba ka u muʼukʼaʼankúunt u fejoʼob (Fili. 1:3, 4). U jaajileʼ ken úuchuk beyoʼ maʼ yaʼab baʼax jeʼel u páajtal k-beetik utiaʼal k-áantkoʼobeʼ, baʼaleʼ jeʼel u páajtal k-áantik le sukuʼunoʼob yanoʼob t-múuchʼulil táan u aktáantkoʼob talamiloʼoboʼ. Unaj k-ilik baʼax jeʼel k-beetik utiaʼal k-áantkoʼobeʼ. Jeʼel xan u páajtal k-invitarkoʼob ken yanaktoʼon le Adoración ich Familiaoʼ, ken jóokʼkoʼon kʼaʼaytaj wa chéen utiaʼal k-antal junsúutuk tu yéeteloʼob utiaʼal k-paklan kiʼimakkúuntik k-óol.

U jaajileʼ jejeláas bix jeʼel k-áantik u maasil utiaʼal ka kiʼimakchajak u yóoleʼ. Unaj k-ilik maʼ k-náachkuntikba tiʼ u maasil jeʼex u beetik le máakoʼob teʼ yóokʼol kaabaʼ, baʼaxeʼ unaj k-paklan kiʼimakkúuntik k-óol. Wa k-beetik beyoʼ maʼ chéen yaan k-áantaj utiaʼal u yaabiltikuba yéetel u biskuba maʼalobil le sukuʼunoʼoboʼ, baʼaxeʼ yaan k-paklan kiʼimakkúuntik k-óol tu yéeteloʼob (Fili. 2:1, 2). Maʼ unaj u tuʼubultoʼon le baʼax tu yaʼalaj Pabloaʼ: «Kiʼimakchajak a wóoleʼex tiʼ Yuumtsil mantatsʼ. Kin kaʼa aʼalik: Kiʼimakchajak a wóoleʼex» (Fili. 4:4).

[Máax tsʼáaik le foto yaan teʼ táan juʼun 6]

Globo terráqueo: tsʼaʼab tumen Replogle Globes