«Táanxel luʼumiloʼob» teʼ kʼasaʼan yóokʼol kaabaʼ
«Táanxel luʼumiloʼob» teʼ kʼasaʼan yóokʼol kaabaʼ
«Tuláakloʼob [...] tu yeʼesajoʼobeʼ táanxel luʼumiloʼob chéen kʼáatal ku beetkoʼob way yóokʼol kaabeʼ.» (HEB. 11:13)
1. Jeʼex úuchik u yaʼalik Jesuseʼ, ¿bix unaj u kuxtal u disipuloʼob teʼ yóokʼol kʼaabaʼ?
JESUSEʼ yaʼalaj yoʼolal u disipuloʼob: «Letiʼobeʼ yaan u pʼáatloʼob way yóokʼol kaabeʼ», baʼaleʼ ka tsʼoʼokeʼ tu yaʼalaj: «Maʼ yóokʼol kaabiloʼobiʼ jeʼel bix teen maʼ yóokʼol kaabileneʼ» (Juan 17:11, 14). Le tʼaanoʼobaʼ tu yeʼesaj bix unaj u kuxtal le máaxoʼob tsaypachtik teʼ «yóokʼol kaab» nuʼuktaʼan tumen Satanasoʼ (2 Cor. 4:4). Kex kuxaʼanoʼob teʼ kʼasaʼan yóokʼol kaabaʼ, maʼatech u táakpajloʼob tiʼ le baʼaloʼob ku beetaʼaloʼ. Letiʼobeʼ beyoʼob jeʼex, «táanxel luʼumiloʼob kajaʼanoʼob náach tiʼ u luʼumoʼob[eʼ]» (1 Ped. 2:11).
Kuxlajoʼob bey «táanxel luʼumiloʼob[eʼ]»
2, 3. ¿Baʼaxten ku yaʼalaʼal Enok, Noé, Abrahán yéetel Saraeʼ kuxlajoʼob bey «táanxel luʼumiloʼob chéen kʼáatal ku beetkoʼob way yóokʼol kaabeʼ»?
2 Desde úuchjeakileʼ le máaxoʼob meyajtik Jéeobaoʼ maʼatecj u kuxtaloʼob jeʼex u maasileʼ. Jeʼex táanil tiʼ le Búulkabaloʼ, Enok yéetel Noeeʼ kuxlajoʼob «jeʼel bix tu yóoltilak [Dioseʼ]» (Gén. 5:22-24; 6:9). Tu kaʼatúulaloʼobeʼ tu kʼaʼaytoʼob táan u náatsʼal u kʼiinil u xuʼulsaʼal tiʼ u kʼasaʼan yóokʼol kaab Satanás (xokaʼak 2 Pedro 2:5 yéetel Judas 14, 15). Kex kuxlajoʼob ichil le kʼasaʼan máakoʼoboʼ, letiʼobeʼ kuxlajoʼob jeʼex uts tu tʼaan Jéeobaeʼ. Le oʼolal le Bibliaoʼ ku yaʼalikeʼ «Enokeʼ lúub utsil tu táan Jajal Dios» yéetel Noeeʼ «kuxlaj kaʼach jeʼel bix tu yóoltilak [Dioseʼ]» (Heb. 11:5; Gén. 6:9).
3 Abrahán yéetel Saraeʼ tu yuʼuboʼob u tʼaan Dios, tumen tu pʼatoʼob tuláakal le baʼax yaan kaʼach tiʼob tu kaajil Ur, utiaʼal u binoʼob yaanal luʼumil kajtal chéen tiʼ pasel nookʼoʼob (Gén. 11:27, 28; 12:1). Pabloeʼ ku yaʼalik tu yoʼolaloʼob: «Tu yoʼolal le oksaj óolaloʼ Abrahaneʼ, le ka tʼaʼan tumen Jajal Dioseʼ, tu yuʼubaj tʼaaneʼ ka jóokʼ utiaʼal u binbal tiʼ le kúuchil bíin tsʼaʼabaktiʼ tumen Jajal Diosoʼ. Jóokʼ tiʼ u luʼumeʼ kex maʼ u yojel tuʼux ku biniʼ. Tumen yanji u yoksaj óolaleʼ Abrahaneʼ kuxlaj tiʼ le luʼum aʼalaʼantiʼ tumen Jajal Dios yaan u tsʼaʼabaltiʼoʼ bey tiʼ táanxel luʼumeʼ. Kajlaj tiʼ pasel nookʼoʼob bey xan tu beetiloʼob Jacob máaxoʼob tu kʼamoʼob xan le tsʼaabiltʼaanoʼ» (Heb. 11:8, 9). Le apostoloʼ tu yaʼalaj xan: «Tuláakloʼob kíimoʼob kex maʼ tu kʼamoʼob le baʼaloʼob aʼalaʼabtiʼob tumen Jajal Diosoʼ; baʼaleʼ tumen yaan u yoksaj óolaloʼobeʼ, tu paktoʼob náachileʼ ka tu yoksaj óoltoʼob, ka tu yiloʼob yéetel kiʼimak óolal. Beyoʼ tu yeʼesajoʼobeʼ táanxel luʼumiloʼob chéen kʼáatal ku beetkoʼob way yóokʼol kaabeʼ» (Heb. 11:13).
Le baʼax maʼ unaj u beetik kaʼach le israelitaʼoboʼ
4. ¿Baʼax aʼalaʼab tiʼ le israelitaʼob maʼ unaj u beetkoʼob ken ookkoʼob tu luʼumoʼoboʼ?
4 Ka máan kʼiineʼ yaʼabchaj u chʼiʼibal Abrahán, kʼuch u beetubaʼob junpʼéel kaaj tu kʼaabaʼtoʼob Israel, tsʼaʼab leyoʼob tiʼob utiaʼal u nuʼuktikubaʼob (Gén. 48:4; Deu. 6:1). Baʼaleʼ maʼ unaj u tuʼubul kaʼach tiʼobeʼ Jéeoba u Yuumil le luʼum tuʼux kajlajoʼoboʼ (Lev. 25:23). Jeʼel u páajtal u yaʼalaʼaleʼ, chéen tu kʼubéentubaʼobiʼ, le oʼolal unaj u beetkoʼob baʼax ku yaʼalik. Tsʼoʼoleʼ unaj u kʼaʼajaltiʼobeʼ «maʼ chéen yéetel waaj bíin kuxlak wíinikiʼ»; maʼ unaj u tuʼubskoʼob Jéeoba chéen yoʼolal le ayikʼaliloʼoboʼ (Deu. 8:1-3). Táanil tiʼ u yookloʼob teʼ luʼumoʼ aʼalaʼabtiʼob: «Yuumtsil a [Dioseʼexeʼ], bin u kaʼaj u beet a wookleʼex teʼ luʼum tu jalaʼachtʼantaj u tsʼáaik tiʼob Abrahán, Isaak yéetel Jacob a máanjaʼan chʼiʼibaleʼexoʼoboʼ. Leloʼ junpʼéel luʼum yéetel u kiʼichkelem kaajiloʼob maʼ a meyajtmajeʼexiʼ, yaan u najiloʼob chupoʼob yéetel maʼalob baʼaloʼob maʼ teʼex chupmiliʼ; yaan u chʼeʼeniloʼob maʼ teʼex jolmiloʼobiʼ, bey xan u paakʼaliloʼob uva yéetel olivoʼob maʼ teʼex pakʼmiliʼ, baʼaleʼ bíin a jaanteʼex tak ken náakak a wóoleʼex. Le ken kʼuchuk u kʼiinil u yúuchul beyoʼ, bik táabkeʼex a tuʼubseʼex Yuumtsil» (Deu. 6:10-12).
5. ¿Baʼaxten pʼaʼat u kaajil Israel tumen Jéeoba, yéetel baʼax túumben kaajil tu yéeyaj?
5 Baʼaleʼ maʼ bey tu beetiloʼobiʼ. Tu kʼiiniloʼob Nehemíaseʼ, u jaats tiʼ le levitaʼoboʼ suʼlakoʼob ka tu kʼaʼajsoʼob baʼax tu beetaj le israelitaʼob le ka tsʼoʼok u chʼaʼikoʼob le Luʼum Aʼalaʼan u Tsʼaʼabaloʼ. Ka yanchaj u yotochoʼob maʼalobtak yéetel baʼal u jaantoʼob yéetel yaʼab vinoeʼ «tu naʼajkúuntubaʼob» yéetel «polokchajoʼob». Tu náachkuntubaʼob tiʼ Dios, ka tu kíimsoʼob le profetaʼob túuxtaʼab áantkoʼob kaʼachoʼ. Le oʼolal Jéeobaeʼ tu chaʼaj u xuʼulsaʼaltiʼob tumen le máaxoʼob pʼekmiloʼoboʼ (xokaʼak Nehemías 9:25-27; Ose. 13:6-9). Ka máan kʼiineʼ, le israelitaʼob yanoʼob yáanal u nuʼuktaj Romaoʼ, maʼ tu kʼamoʼob le Mesías túuxtaʼaboʼ, baʼaxeʼ tu kíimsoʼob. Le oʼolal pʼaʼatoʼob tumen Jéeoba ka tu yéeyaj junpʼéel túumben kaaj: u Israel Dios (Mat. 21:43; Hch. 7:51, 52; Gál. 6:16, NM).
«Maʼ yóokʼol kaabileʼexiʼ»
6, 7. 1) ¿Bix jeʼel a tsolik le baʼax tu yaʼalaj Jesús tiʼ u disipuloʼoboʼ? 2) ¿Baʼax eʼesik le máaxoʼob meyajtik Diosoʼ maʼ unaj u táakpajloʼob tiʼ le baʼaxoʼob ku beetik u kʼasaʼan yóokʼol kaab Satanasoʼ?
6 Jeʼex t-ilaj tu káajbal le xookaʼ, Jesucristo, u Poolil le múuchʼuliloʼ, tu yaʼaleʼ le máaxoʼob tsaypachtikoʼ maʼ kun táakpajloʼob teʼ yóokʼol kaab nuʼuktaʼan tumen Satanasoʼ. Le taʼaytak u kíimsaʼaloʼ tu yaʼalaj tiʼ u disipuloʼob: «Wa teʼex yóokʼol kaabileʼexeʼ, u máakiloʼob yóokʼol kaabeʼ jeʼel u yaabiltikeʼexeʼ jeʼel bix u yaabiltikoʼob le máaxoʼob u tiaʼaloʼoboʼ. Baʼaleʼ teneʼ tin yéeyeʼex tiʼ ichil u máakiloʼob yóokʼol kaab, le oʼolaleʼ yóokʼol kaabeʼ u pʼekmajeʼex, tumen maʼ yóokʼol kaabileʼexiʼ» (Juan 15:19).
7 Jeʼex u bin u yaʼabtal le máaxoʼob tsaypachtik Cristooʼ, ¿unaj wa u joʼopʼol u beetkoʼob le baʼaxoʼob suuk u beetik le máaxoʼob maʼatech u meyajtikoʼob Diosoʼ? Maʼatech. Jeʼel tuʼuxak kajaʼanoʼobeʼ, unaj u yeʼeskoʼob maʼ beyoʼob jeʼex le máaxoʼob yaan tu kʼasaʼan yóokʼol kaab Satanasoʼ. Kex treinta jaʼaboʼob kíimik Jesuseʼ, le apóstol Pedrooʼ tu tsʼíibtaj tiʼ le cristianoʼob kajaʼanoʼob yáanal u nuʼuktaj u Imperioil Romaoʼ: «In yaabilaj sukuʼuneʼex, kin kʼáat óoltikteʼex, jeʼel bix tiʼ táanxel luʼumiloʼob kajaʼanoʼob náach tiʼ u luʼumoʼobeʼ, maʼ tsʼáaikeʼex kúuchil tiʼ le yóokʼol kaabil tsʼíibolaloʼob ku baʼateloʼob tu contra [«a kuxtaleʼex», NM]. Xíimbalneneʼex maʼalob ichil le máaxoʼob maʼ u kʼaj óoloʼob Jajal Diosoʼ» (1 Ped. 1:1; 2:11, 12).
8. ¿Baʼax tu yaʼalaj juntúul máak yoʼolal le yáax cristianoʼoboʼ?
8 Juntúul máak jach kʼaj óolaʼaneʼ, ku yaʼalikeʼ le yáax cristianoʼoboʼ kuxlajoʼob bey «táanxel luʼumiloʼob yéetel bey kʼáat máan ku beetkoʼob way luʼum» ichil u maasil romailoʼoboʼ: «Junpʼéel baʼax maʼ suuk u yilaʼaleʼ [...] letiʼe bix úuchik u chʼaʼpachtaʼal le yáax cristianoʼob ichil le trescientos jaʼaboʼob máan tsʼoʼokok u kíimil Cristooʼ [...]. Jejeláas baʼax oʼolal ku taʼakal kaʼach u pooloʼob. Tumen maʼatech u táakpajloʼob tiʼ le kʼiinbesajoʼob ku beetaʼal tumen le máaxoʼob maʼatech u meyajtikoʼob Diosoʼ, ku yaʼalaʼaleʼ maʼatech u creertikoʼob Dios. Tumen maʼatech u táakpajloʼob tiʼ baʼaxoʼob jeʼex le kʼiinbesajoʼob, náaysaj óoloʼob ku beetaʼal tu táan yaʼabkach máak yaan yil yéetel baʼaloʼob kʼaastak yéetel suʼtsiltakeʼ, ku yaʼalaʼaltiʼobeʼ u pʼekmaj u yéet máakiloʼob» (Historia del cristianismo, tsʼíibtaʼan tumen Kenneth Scott Latourette).
Maʼ k-bin tu paach le baʼax ku tsʼáaik le yóokʼol kaabaʼ
9. ¿Bix k-eʼesik maʼ k-pʼekmaj k-éet máakiliʼ?
9 ¿Bix unaj k-ilik «le kʼaakʼas kʼiinoʼob» wa le baʼaxoʼob ku tsʼáaik le kʼasaʼan yóokʼol kaabaʼ? (Gal. 1:4.) Jeʼex ilaʼabik tumen le yáax cristianoʼoboʼ. Le oʼolal yaan kʼiineʼ le máakoʼoboʼ ku yaʼalikoʼobtoʼon baʼal, tumen maʼ tu naʼatkoʼob baʼaxten bey kuxlikoʼonoʼ. Baʼaleʼ toʼoneʼ jach junpuliʼ maʼ k-pʼekmaj k-éet máakiliʼ. Baʼaxeʼ yoʼolal k-yaabilaj tiʼ u maasileʼ, k-kʼaʼaytik tiʼob u maʼalob péektsilil u Reino Dios tu yotochoʼob (Mat. 22:39; 24:14). Toʼoneʼ k-beetik lelaʼ, tumen k-ojel u Reino Jéeoba u tsʼaamaj tiʼ Cristooʼ, maʼ kun xáantal ken u xuʼuls tiʼ u gobierno chéen wíinik utiaʼal u beetik u yantal le túumben luʼum tuʼux kun beetbil baʼax tojoʼ (Dan. 2:44; 2 Ped. 3:13).
10, 11. 1) ¿Bix k-tsʼáaik u pʼiis u meyajtoʼon le yóokʼol kaabaʼ? 2) ¿Bix k-eʼesik maʼ naayal k-óol yéetel maʼatech u meyajtoʼon tuláakal le baʼaxoʼob ku tsʼáaik le yóokʼol kaabaʼ?
10 Le kʼasaʼan yóokʼol kaabaʼ jach taʼaytak u xuʼulsaʼal. ¡Chéen junpʼíit kʼiin pʼaataltiʼ! Le oʼolal k-ojel maʼ u kʼiinil u sen yantaltoʼon le baʼaxoʼob ku tsʼáaikoʼ. Mantatsʼ k-kʼaʼajsik le baʼax tu yaʼalaj Pabloaʼ: «Sukuʼuneʼex baʼax in kʼáat in waʼaleʼ letiʼ lelaʼ: Chéen junpʼíit kʼiin pʼaataltoʼon. U káajbal bejlaʼeʼ, le máaxoʼob tsʼokaʼan u beeloʼoboʼ unaj u kuxtaloʼob bey maʼ tsʼokaʼan u beeloʼobeʼ. Le máaxoʼob yaj u yóoloʼobeʼ, unaj u kuxtaloʼob bey minaʼan yaayaj óol tiʼobeʼ. Le máaxoʼob kiʼimak u yóoloʼobeʼ unaj u kuxtaloʼob bey minaʼan kiʼimak óolal tiʼobeʼ. Le máaxoʼob ku maanoʼoboʼ unaj u kuxtaloʼob bey mix baʼal yaantiʼobeʼ. Le máaxoʼob táan u náajaltikoʼob u baʼaloʼobil yóokʼol kaabeʼ unaj u kuxtaloʼob bey maʼ táan u náajaltikoʼobeʼ, tumen le yóokʼol kaab k-ilkaʼ táan u xuʼulul» (1 Cor. 7:29-31). ¿Bix k-ilik le baʼaxoʼob yaan way yóokʼol kaabaʼ? Ku meyajtoʼon jujunpʼéeliʼ. Jeʼex le túumben baʼaloʼob ku jóoʼsaʼaloʼ ku meyaj utiaʼal k-tsʼáaik ojéeltbil le baʼax ku kaʼansik le Biblia ich jejeláas idiomaʼob tiʼ le yóokʼol kaabaʼ. Ku meyajtoʼon xan le baʼax ku tsʼáaik le yóokʼol kaab utiaʼal k-kaxtik k-kuxtal yéetel uláakʼ baʼax ku kʼaʼabéettaltoʼon sáamsamaloʼ. Baʼaleʼ maʼatech u meyajtoʼon tuláakal le baʼaxoʼob ku tsʼáaikoʼ, tumen maʼatech k-bin tu paach le ayikʼaliloʼob yéetel uláakʼ baʼaloʼob yanoʼ (xokaʼak 1 Timoteo 6:9, 10).
11 Le máaxoʼob meyajtik Dios xanoʼ, maʼatech u yilik u sen kaʼantal u xookoʼob utiaʼal maʼ u náayal u yóoloʼob yéetel yaanal baʼal. Yaʼabeʼ ku tuklikeʼ kʼaʼabéet u kaʼantal u xook máak utiaʼal u yantal yaʼab baʼaloʼob tiʼ. Baʼaleʼ toʼoneʼ k-ojel chéen kʼáat máan k-beetik way Luʼumeʼ, le oʼolal k-chʼíikil tiʼ yaanal baʼal. K-ilik «maʼ u kaʼantal» k-ich (Rom. 12:16; Jer. 45:5). U disipuloʼon Cristo, le oʼolal k-ilik k-beetik le baʼax tu yaʼalaʼ: «Kanáantabaʼex tiʼ u tsʼíiboltaʼal ayikʼalil, tumen u kuxtal máakeʼ maʼ tu taal tiʼ u yaʼabil le baʼaloʼob yaantiʼoʼ» (Luc. 12:15). Wa táankelmecheʼ ilawil bix jeʼel a maas meyajtik Dioseʼ. Ilawil maʼ u kaʼantal a xook tiʼ le bukaʼaj jeʼel u yáantkech utiaʼal a kaxtik a kuxtaleʼ. Le baʼax maas kʼaʼanaʼanoʼ, a meyajtik Jéeoba «yéetel tuláakal a [kuxtal], yéetel tuláakal a muukʼ, yéetel tuláakal a naʼat» (Luc. 10:27). Beyoʼ maʼ kan pʼáatal «óotsil tu táan Dios» (Luc. 12:21; xokaʼak Mateo 6:19-21).
Maʼ k-chaʼik u chiʼichnakkúuntikoʼon le baʼaxoʼob ku tsʼáaik le yóokʼol kaabaʼ
12, 13. ¿Baʼax u jelaʼanil le máaxoʼob meyajtik Dios beetik le baʼax ku yaʼalik Mateo 6:31 tak 33?
12 Le máaxoʼob meyajtik Jéeobaoʼ maʼatech u binoʼob tu paach ayikʼaliloʼob jeʼex u beetik u maasil máakoʼoboʼ, tumen ku beetkoʼob le baʼax tu yaʼalaj Jesús tiʼ u disipuloʼobaʼ: «Maʼ a sen tuukuleʼex táan a waʼalikeʼex: ¿Baʼax k-bin jaante?, wa ¿baʼax k-bin ukʼe?[,] wa ¿baʼax k-bin búukinte? Tumen u kajnáaliloʼob le yóokʼol kaabaʼ ku kaxtikoʼob tuláakal le baʼaloʼobaʼ, baʼaleʼ teʼexeʼ yaanteʼex juntúul Taata teʼ kaʼanoʼ u yojel kʼaʼabéetteʼex tuláakal le baʼaloʼobaʼ. Bey túunoʼ kaxteʼex táanil u [reino] Jajal Dios yéetel le toj kuxtal uts tu tʼaan letiʼoʼ, tuláakal túun le baʼaloʼobaʼ bíin tsʼaʼabakteʼex» (Mat. 6:31-33). Toʼoneʼ yaʼab u téenel tsʼoʼok k-ilik Jéeobaeʼ ku tsʼáaiktoʼon tuláakal le baʼaxoʼob kʼaʼabéetoʼ.
13 Le Bibliaoʼ ku yaʼalik: «Le oksaj óolaloʼ junpʼéel nojoch náajal[,] baʼaleʼ utiaʼal le máax kiʼimak u yóol yéetel le baʼax yaantiʼoʼ» (1 Tim. 6:6). U maas yaʼabil le máakoʼob teʼ kʼiinoʼobaʼ maʼ bey u tuukuloʼobiʼ. Jeʼex le táankelem paalaloʼob bejlaʼaʼ, ken tsʼoʼokok u beeloʼobeʼ u kʼáatoʼob yaan u yotochoʼob yéetel tuláakal baʼax kʼaʼabéet ichil, junpʼéel maʼalob coche yéetel u maas túumbenil le baʼaxoʼob ku jóoʼsaʼaloʼoboʼ. Baʼaleʼ le máaxoʼob meyajtik Dios u yojloʼob chéen kʼáat máan ku beetkoʼob way Luʼumaʼ, ku yilik u yantaltiʼob chéen le baʼaxoʼob jach kʼaʼabéeteʼ. Yaʼabeʼ ku tsʼáaikoʼob juntséelil yaʼab baʼaloʼob utiaʼal u maas páajtal u kʼaʼaytikoʼob le Reinooʼ. Yanoʼob xaneʼ ku meyajtikoʼob Jéeoba bey precursoril, betelitail, superintendente viajanteil wa misioneroil. ¿Máasaʼ jach jatsʼuts k-ilik le meyaj ku beetik le sukuʼunoʼobaʼ?
14. ¿Baʼax k-kanik tiʼ u kettʼaanil le máak ku paakʼaloʼ?
14 Tu kettʼaanil le máak ku paakʼaloʼ, Jesuseʼ tu yaʼaleʼ le máakoʼob «ku sen tuklikoʼob u baʼaloʼobil le yóokʼol kaabaʼ yéetel ku tuʼusloʼob tumen le ayikʼaliloʼ», ku beetik u lukʼul tu puksiʼikʼaloʼob u tuukulil u meyajtikoʼob Dios, le oʼolal maʼatech u yichankiloʼob (Mat. 13:22). ¿Baʼax jeʼel u yáantkoʼon utiaʼal maʼ u yúuchultoʼon beyoʼ? U kiʼimaktal k-óol chéen yéetel junpʼíit baʼal yéetel k-kuxtal bey jeʼex juntúul táanxel luʼumileʼ. Lelaʼ jeʼel u yáantkoʼon utiaʼal ka yanaktoʼon junpʼéel maʼalob ich ku tsʼáaik u paakat chéen tiʼ junpʼéeliliʼ baʼaleʼ. Bey túunoʼ, k-tsʼáaik k-paakat tiʼ u Reino Dios yéetel k-tsʼáaik táanil ichil k-kuxtal tiʼ u maasil baʼaloʼob (Mat. 6:22).
«Le yóokʼol kaaboʼ táan u bin u xuʼulul»
15. ¿Baʼax tu yaʼalaj apóstol Juan ku yáantkoʼon k-il baʼax tuukulil unaj u yantaltoʼon?
15 Toʼoneʼ k-ilik k-kuxtal bey máaxoʼob «táanxel luʼumiloʼob kajaʼanoʼob náach tiʼ u luʼumoʼobeʼ», tumen k-ojel taʼaytak u xuʼulsaʼal tiʼ le kʼasaʼan yóokʼol kaabaʼ (1 Ped. 2:11; 2 Ped. 3:7). K-ojéeltik lelaʼ ku yáantkoʼon k-kanáant baʼaxoʼob k-tsʼíiboltik yéetel baʼaxoʼob k-chʼaʼtuklik k-beetik. Apóstol Juaneʼ tu yaʼalaj tiʼ le sukuʼunoʼob maʼ u yaabiltikoʼob le yóokʼol kaaboʼ mix le baʼaxoʼob yanoʼ, tumen «le yóokʼol kaaboʼ táan u bin u xuʼulul yéetel tuláakal le kʼaakʼas tsʼíibolaloʼob yaan tu yóokʼoloʼ; baʼaleʼ le máax ku beetik baʼax u kʼáat Dioseʼ ku pʼáatal utiaʼal kʼiinoʼob minaʼan u xuul» (1 Juan 2:15-17).
16. ¿Bix k-eʼesik toʼoneʼ beyoʼon junpʼéel yéeybil kaaj jelaʼan tiʼ u maasiloʼ?
16 Jéeobaeʼ tu yaʼalaj tiʼ le israelitaʼoboʼ wa ku beetkoʼob le baʼax ku yaʼalikoʼ yaan u beetkubaʼob u «yéeybil kaajal ichil tuláakal kaajoʼob» (Éxo. 19:5). Teʼ kʼiinoʼob táan u beetkoʼob le baʼax ku yaʼalik Diosoʼ, ilaʼabeʼ maʼ beyoʼob jeʼex u maasil kaajoʼob yoʼolal bix u kuxtaloʼob yéetel bix u adorartikoʼob Diosoʼ. Bejlaʼa xaneʼ Jéeobaeʼ tsʼoʼok u junpáaykuntik junpʼéel kaaj utiaʼal meyajtik, maʼ bey jeʼex le máaxoʼob yanoʼob tu kʼasaʼan yóokʼol kaab Satanasoʼ. Jach beyoʼ, tuláakloʼoneʼ tsʼoʼok k-kanik «k-pʼat le kʼaasoʼ yéetel le luʼumkabil tsʼíibolaloʼoboʼ yéetel ka k-bis way yóokʼol kaabeʼ junpʼéel kuxtal ich maʼalob tuukul, tojil yéetel kʼub óolal tiʼ Jajal Dios. Bey xan ku kaʼansiktoʼon ka kuxlakoʼon táan k-páaʼtik u nojbeʼen taalbal k-nojoch Jajal Dios yéetel [k-salvador] Jesucristo. Letiʼeʼ tu kʼububa tiʼ kíimil t-oʼolal, utiaʼal u [salvartikoʼon] tiʼ tuláakal kʼaas, yéetel u maʼalob pʼoʼik utiaʼal ka u tiaʼalinteʼ junpʼéel kaaj u kʼubmaj u yóol u beet utsil meyajoʼob» (Tito 2:11-14). Ichil le «kaaj» tu yaʼaloʼ táakaʼan le sukuʼunoʼob yéeyaʼanoʼob utiaʼal u binoʼob kuxtal teʼ kaʼanoʼ bey xan le u millonesil «uláakʼ tamanoʼob» áantkoʼoboʼ (Juan 10:16).
17. ¿Baʼaxten mix le sukuʼunoʼob yéeyaʼanoʼoboʼ mix le uláakʼ tamanoʼob kun yaatal tu yóoloʼob úuchik u kuxtaloʼob bey táanxel luʼumiloʼob teʼ kʼasaʼan yóokʼol kaabaʼ?
17 Le sukuʼunoʼob yéeyaʼanoʼoboʼ táan u páaʼtik u binoʼob reinar yéetel Cristo teʼ kaʼanoʼ (Apo. 5:10). Yéetel le uláakʼ tamanoʼoboʼ táan u páaʼtkoʼob u pʼáatloʼob kuxtal utiaʼal minaʼan u xuul way Luʼumeʼ, teʼ kʼiin jeʼeloʼ maʼ kun kuxtaloʼob bey táanxel luʼumiloʼob ichil kʼasaʼan máakoʼobeʼ, baʼaxeʼ yaan u kajtaloʼob tiʼ jatsʼuts najoʼob, yaan u yantal baʼal u jaantoʼob yéetel u yukʼoʼob (Sal. 37:10, 11; Isa. 25:6; 65:21, 22). Tsʼoʼoleʼ maʼ kun tuʼubultiʼob, jeʼex úuch tiʼ le israelitaʼoboʼ, Jéeobaeʼ «u [Diosil] tuláakal yóokʼol kaab», letiʼ tsʼáaiktiʼob tuláakal le baʼaxoʼob maʼalobtakoʼ (Isa. 54:5). Mix le sukuʼunoʼob yéeyaʼanoʼoboʼ mix le uláakʼ tamanoʼob kun yaatal tu yóoloʼob úuchik u kuxtaloʼob bey táanxel luʼumiloʼob teʼ kʼasaʼan yóokʼol kaabaʼ.
¿Baʼax jeʼel k-núukikeʼ?
• ¿Bix úuchik u kuxtal bey táanxel luʼumil yaʼab máaxoʼob meyajt Dios úuchjeakileʼ?
• ¿Bix ilaʼabik le yóokʼol kaab tumen le yáax cristianoʼoboʼ?
• ¿Bix u meyajtoʼon le baʼaxoʼob ku tsʼáaik le yóokʼol kaab bejlaʼaʼ?
• ¿Baʼaxten maʼ kun yaatal t-óol ikil k-kuxtal bey táanxel luʼumiloʼon teʼ kʼasaʼan yóokʼol kaabaʼ?
[U kʼáatchiʼiloʼob le xookoʼ]
[Foto yaan teʼ táan juʼun 18]
Le yáax cristianoʼoboʼ maʼ táakpajoʼob teʼ náaysaj óolaloʼob tuʼux ku beetaʼal loob yéetel baʼaloʼob suʼtsiltakoʼ
