Utiaʼal ka yanaktoʼon kuxtal yéetel jeetsʼelileʼ, unaj k-kuxtal jeʼex u yaʼalik le kiliʼich muukʼoʼ
Utiaʼal ka yanaktoʼon kuxtal yéetel jeetsʼelileʼ, unaj k-kuxtal jeʼex u yaʼalik le kiliʼich muukʼoʼ
«Maʼ táan k-xíimbal jeʼel bix u yaʼalik le luʼumkabil wíinkliloʼ[,] baʼaleʼ jeʼel bix u yaʼalik le kiliʼich [muukʼoʼ].» (ROM. 8:4)
1, 2. 1) ¿Baʼax talamiloʼob ku taasik u náayal u yóol máak ken manejartnak? 2) ¿Baʼax talamiloʼob ku taasik u náayal u yóol máaxoʼob meyajtik Dios?
LE SECRETARIO tiʼ Transporte tiʼ u kaajil Estados Unidosoʼ, tu yaʼalaj: «Cada jaʼabeʼ táan u maas yaʼabtal máaxoʼob ku náayal u yóoloʼob táan u manejaroʼob». Junpʼéel tiʼ le baʼaxoʼob beetik u náayal u yóoloʼoboʼ letiʼe celularoʼ. Junpʼéel xook beetaʼabeʼ ku yeʼesikeʼ yaʼab máakeʼ óolak chocartaʼakoʼob yéetel yanoʼobeʼ jéenantaʼaboʼob tumen máaxoʼob táan u bin u tʼaanoʼob tiʼ celular kex táan u manejaroʼob. Yaʼab máakeʼ ku yilik maʼalob ka u beet uláakʼ baʼal le táan u manejaroʼ, baʼaleʼ lelaʼ jeʼel u beetik u yúuchul loobeʼ.
2 Lelaʼ bey xan jeʼel u yúuchul yéetel le bix k-bisikba yéetel Diosoʼ. Jeʼex le máax ku manejar maʼatech u yilik le letreroʼob tumen ku náayal u yóoloʼ, le máaxoʼob meyajtik Diosoʼ jeʼel u muʼyajtikoʼob yaʼab talamiloʼob wa ku náayal u yóoloʼobeʼ. Wa k-chaʼik tiʼ uláakʼ baʼaloʼob u beetik u xuʼulul k-tsʼáaik k-óol k-meyajt Dioseʼ, jeʼel u beetik k-peʼertik k-fejeʼ (1 Tim. 1:18, 19). Apóstol Pabloeʼ tu yaʼalaj tiʼ le sukuʼunoʼob yanoʼob Roma baʼaxten unaj u kanáantik maʼ u náayal u yóoloʼoboʼ: «U tsʼáaik u yóol máak chéen tiʼ u baʼaloʼobil le wíinkliloʼ ku bisik máak tiʼ kíimil; baʼaleʼ u tsʼáaik u yóol máak tiʼ u baʼaloʼobil [kiliʼich muukʼeʼ] ku bisik máak tiʼ kuxtal yéetel tiʼ jeetsʼel óolal» (Rom. 8:6). ¿Tiʼ baʼax ku tʼaan kaʼach Pablo? ¿Bix jeʼel k-kanáantik maʼ k-tsʼáaik k-óol «chéen tiʼ u baʼaloʼobil le wíinkliloʼ»? ¿Yéetel bix jeʼel k-tsʼáaik k-óol «tiʼ u baʼaloʼobil [kiliʼich muukʼeʼ]»?
«Minaʼan mix junpʼéel xotʼkʼiin» tiʼob
3, 4. 1) ¿Baʼax talamil yanchaj tiʼ Pablo? 2) ¿Baʼaxten unaj k-xakʼaltik le baʼax tu yaʼalaj Pablooʼ?
3 Tu cartail Romailoʼobeʼ, Pabloeʼ tʼaanaj tiʼ junpʼéel baʼax talamchaj tak tiʼ letiʼ: le baʼateʼel yanchaj tu tuukul yéetel tu wíinkliloʼ (xokaʼak Romailoʼob 7:21-23). Pabloeʼ maʼ táan u yaʼalik wa jach junpuliʼ maʼ tu páajtal u beetik baʼax maʼalobiʼ wa chéen táan u chʼaʼik óotsililtuba yoʼolal le kʼeban yaan tu wíinkliloʼ. Letiʼeʼ úuch joʼopʼok u meyajtik Dios yéetel yéeyaʼan tumen le kiliʼich muukʼ utiaʼal u bin kaʼanoʼ, yéetel tsʼaʼab u beet u apostolil utiaʼal u bisik le maʼalob péektsil «tiʼ le máaxoʼob maʼ judíoʼoboʼ» (Rom. 1:1; 11:13). Baʼaleʼ ¿baʼax oʼolal tʼaanaj tiʼ le talamil yanchajtiʼoʼ?
4 Pabloeʼ táan kaʼach u yaʼalikeʼ chéen tu juunaleʼ maʼ tu páajtal u beetik baʼax u kʼáat Dios. ¿Baʼaxten? Tumen tiʼ u taal tiʼ u chʼiʼibal Adaneʼ, kuxlaj yáanal u páajtalil xan le kʼebanoʼ. Letiʼeʼ ku yaʼalik: «Tuláakloʼob tsʼoʼok u kʼebantaloʼob yéetel náach yaniloʼob tiʼ u nojbeʼenil Jajal Dios» (Rom. 3:23). Toʼoneʼ jeʼel k-uʼuyikba jeʼex úuchik u yuʼubikubaoʼ, tumen kʼebanoʼon xan yéetel sáamsamal k-muʼyajtik talamiloʼob jeʼex le tu muʼyajtoʼ. Tsʼoʼoleʼ yaan yaʼab baʼaxoʼob jeʼel u beetik u náayal k-óol yéetel ka jóokʼkoʼon teʼ «bej ku bin tiʼ kuxtaloʼ» (Mat. 7:14). Baʼaleʼ leloʼ maʼ tu beetaj u jach chiʼichnaktal Pabloiʼ, yéetel maʼatech u beetik k-jach chiʼichnaktal xan.
5. ¿Baʼax áant Pablo yéetel baʼax beet u yuʼubikuba maʼalobil?
5 Pabloeʼ tu tsʼíibtaj: «¿Máax tokiken [...]? Chéen Yuum Jajal Dios, tu yoʼolal k-Yuumtsil Jesucristo» (Rom. 7:24, 25). Tsʼoʼoleʼ ka tʼaanaj tiʼ «le máaxoʼob nupaʼanoʼob tiʼ Cristo Jesús», wa le sukuʼunoʼob yéeyaʼanoʼob utiaʼal u binoʼob kaʼanoʼ (xokaʼak Romailoʼob 8:1, 2). Tu yaʼalajtiʼobeʼ yéetel u kiliʼich muukʼeʼ, Jéeobaeʼ ku kʼamkoʼob bey u paalaloʼob utiaʼal u tsʼáaik u beet u reyiloʼob «junmúuchʼ yéetel Cristo» (Rom. 8:14-17). Letiʼobeʼ ku yáantaʼaloʼob u aktáantoʼob le talamil tu chʼaʼchiʼitaj Pablo tumen u kiliʼich muukʼ Dios yéetel ikil u tsʼáaik u fejoʼob tiʼ u kuxtal Cristo tu kʼuboʼ, le oʼolal «minaʼan mix junpʼéel xotʼkʼiin» tiʼob. Tsʼoʼok u salvartaʼaloʼob «tiʼ u yaʼalmajtʼaan le kʼeban ku taasik kíimiloʼ».
6. ¿Baʼaxten unaj k-tuukul tiʼ le baʼax tu yaʼalaj Pablooʼ?
6 Pabloeʼ tʼaanaj tiʼ le sukuʼunoʼob yéeyaʼanoʼob utiaʼal u binoʼob kaʼanoʼ, baʼaleʼ le baʼax tu yaʼalaj yoʼolal u kiliʼich muukʼ Dios bey xan yoʼolal u kuxtal Cristo tu kʼuboʼ, ku yáantik xan le máaxoʼob táan u páaʼtik u pʼáatloʼob kuxtal way luʼumaʼ. Kex tiʼ letiʼob tu tsʼáaj le tsolnuʼukaʼ, jach unaj k-naʼatik le baʼax tu yaʼalajtiʼoboʼ yéetel k-jóoʼsik utsil tiʼ.
Dioseʼ «tu xotʼkʼintaj le kʼebanoʼ tiʼ le luʼumkabil wíinkliloʼ»
7, 8. 1) ¿Baʼaxten ku yaʼalaʼal le Leyoʼ «lúub u muukʼ tu yoʼolal le luʼumkabil wíinkliloʼ»? 2) ¿Baʼax páajchaj u beetik Dios yoʼolal u kiliʼich muukʼ yéetel yoʼolal u kuxtal u Hijo tu kʼuboʼ?
7 Teʼ capítulo 7 tiʼ Romailoʼoboʼ, Pabloeʼ tʼaanaj tiʼ le páajtalil yaan tiʼ le kʼeban tu wíinklil máakoʼ. Teʼ capítulo 8, tʼaanaj tiʼ le páajtalil yaan tiʼ u kiliʼich muukʼ Diosoʼ. Tu yaʼalaj bix u yáantaʼal le máaxoʼob meyajtik Dios tumen le kiliʼich muukʼ utiaʼal maʼ u chaʼik u lúuʼsaʼaloʼob tumen le kʼebanoʼ, utiaʼal u beetoʼob baʼax u kʼáat Jéeoba yéetel utiaʼal ka lúubkoʼob utsil tu táan. Tsʼoʼoleʼ Pabloeʼ tu yaʼaleʼ yoʼolal u kiliʼich muukʼ Dios yéetel yoʼolal u kuxtal Cristo tu kʼuboʼ, tu beetaj junpʼéel baʼax maʼ páajchaj u beetik u Ley Moisesiʼ.
8 Le aʼalmajtʼaan ku taasik le Leyoʼ ku yaʼalik unaj u kíimil le j-kʼebanoʼoboʼ. Tak le máaxoʼob ku beetik u nojoch j-kʼiiniloʼob, jeʼex u yaʼalik le Leyoʼ, kʼebanoʼob, maʼ tu páajtal u boʼotik u kʼebanoʼob yéetel mix junpʼéel tiʼ le siibaloʼob ku kʼubkoʼob kaʼachoʼ. Le oʼolal ku yaʼalaʼal le Leyoʼ «lúub u muukʼ tu yoʼolal le luʼumkabil wíinkliloʼ». Baʼaleʼ «ikil tu túuxtilak u Paal beetaʼan máakil jeʼel bix junpʼéel kíimsbil siibal tu yoʼolal le kʼebanoʼ», Dioseʼ «tu xotʼkʼintaj le kʼebanoʼ tiʼ le luʼumkabil wíinkliloʼ», beyoʼ páajchaj u beetik «le baʼax maʼ páatji u beetik u yaʼalmajtʼaan Moisesoʼ». Yoʼolal leloʼ le sukuʼunoʼob yéeyaʼanoʼoboʼ ku yilaʼal toj u kuxtaloʼob yoʼolal u fejoʼob tiʼ u kuxtal Jesús tu kʼuboʼ. Ku yaʼalaʼaltiʼob maʼ u kuxtaloʼob «jeʼel bix u yaʼalik le luʼumkabil wíinkliloʼ[,] baʼaleʼ jeʼel bix u yaʼalik le kiliʼich [muukʼoʼ]» (xokaʼak Romailoʼob 8:3, 4). Lelaʼ unaj u chúukpajal u yóol u beetoʼob tuláakal u kʼiinil u kuxtaloʼob utiaʼal u kʼamkoʼob u coronail le kuxtaloʼ (Apo. 2:10).
9. ¿Baʼax u kʼáat u yaʼal le tʼaan «ley» ku meyaj teʼ Romailoʼob 8:2?
9 Pabloeʼ tu yaʼaleʼ maʼ chéen u Ley Moisés yaan kaʼachiʼ, baʼaxeʼ yaan «u yaʼalmajtʼaan [wa u ley kiliʼich muukʼ]», «u leyil le kʼebanoʼ bey xan tiʼ le kíimiloʼ, NM» (Rom. 8:2). ¿Baʼax le leyoʼob ku yaʼalikaʼ? Le tʼaan «leyoʼ» maʼ jeʼex le ku taasik u ley Moisés kaʼachoʼ. Junpʼéel libroeʼ ku yaʼalik: «Le tʼaan griego ku suʼutul ley teʼ jaats jeʼelaʼ, táan u meyaj utiaʼal u yúuchul tʼaan tiʼ le baʼax nuʼuktik u tuukul máak utiaʼal u beetik baʼax maʼalob wa baʼax kʼaasoʼ. Le tʼaan xanoʼ [...] ku meyaj utiaʼal u yaʼalaʼal [...] le baʼax nuʼuktik u kuxtal máakoʼ».
10. ¿Baʼaxten ku yaʼalaʼal tiaʼanoʼon yáanal u ley le kʼeban yéetel u ley le kíimiloʼ?
10 Apóstol Pabloeʼ tu tsʼíibtaj: «Jeʼel bix tu yoʼolal juntúuliliʼ máak ook le kʼeban tiʼ le yóokʼol kaabaʼ ka tu taasaj yéeteleʼ le kíimiloʼ, bey xan máanik xan le kíimiloʼ tiʼ tuláakal máakoʼob tumen tuláakal kʼebanchajoʼob» (Rom. 5:12). Tumen u paalaloʼon Adaneʼ, tuláakloʼon yanoʼon yáanal u ley le kʼeban yéetel u ley le kíimiloʼ. K-kʼeban wíinklileʼ ku péekskoʼon k-beet baʼax maʼ uts tu tʼan Diosiʼ, baʼaleʼ u boʼolileʼ letiʼe kíimiloʼ. Teʼ carta tu tsʼíibtaj tiʼ le Galaciailoʼoboʼ, Pabloeʼ tʼaanaj tiʼ «le baʼaloʼob ku beetkoʼob le máaxoʼob ku binoʼob tu paach le kʼaakʼas tsʼíibolaloʼoboʼ». Ka tsʼoʼokeʼ tu yaʼalaj: «Le máaxoʼob ku beetkoʼob le baʼaloʼobaʼ maʼ tu táakpajloʼob tu [reino] Jajal Dios» (Gal. 5:19-21). Le máaxoʼob beetik beyoʼ ku beetkoʼob chéen le baʼax ku «yaʼalik le luʼumkabil wíinkliloʼ» (Rom. 8:4). Bey túunoʼ «le baʼax nuʼuktik u tuukul[oʼob]» yéetel «le baʼax nuʼuktik u kuxtal[oʼoboʼ]ʼ» chéen u tsʼíibolaloʼob. Baʼaleʼ ¿chéen wa le máaxoʼob ku núupkʼebantaloʼob, ku adorartikoʼob yaanal diosoʼob yéetel ku táakpajloʼob tiʼ espiritismo ku beetkoʼob chéen baʼax ku «yaʼalik le luʼumkabil wíinkliloʼ»? Maʼatech, tumen ichil le baʼaxoʼob ku «yaʼalik le luʼumkabil wíinkliloʼ» táakaʼan u yeʼesik máak celos, u séeb pʼuʼujul, u baʼateʼel yéetel u pʼektik u maasil yoʼolal baʼaxoʼob yaantiʼ. Le oʼolaleʼ, ¿máax jeʼel u páajtal u yaʼalik maʼatech u máan jeʼex u «yaʼalik le luʼumkabil wíinkliloʼ»?
11, 12. ¿Baʼax tsʼoʼok u tsʼáaik Jéeoba utiaʼal u jáalkʼabtikoʼon tiʼ u ley le kʼeban yéetel tiʼ u ley le kíimiloʼ? ¿Baʼax unaj k-beetik utiaʼal maʼ u xuʼulul u kʼamkoʼon Dios?
11 Jach kiʼimak k-óol tumen Jéeobaeʼ tsʼoʼok u jáalkʼabtikoʼon tiʼ u ley le kʼeban yéetel tiʼ u ley le kíimiloʼ. Jesuseʼ tu yaʼalaj: «Tumen Jajal Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ». Bey túunoʼ, unaj k-kʼamik le yaabilaj ku yeʼesiktoʼon Dios yéetel k-tsʼáaik k-fe tiʼ u kuxtal Jesucristo tu tsʼáaj t-oʼolaloʼ, tumen ku jáalkʼabtikoʼon tiʼ le kʼeban yaan t-wíinkliloʼ (Juan 3:16-18). Le oʼolal jeʼex u yaʼalik Pabloeʼ, k-tsʼáaik nib óolal tiʼ «Yuum Jajal Dios, tu yoʼolal k-Yuumtsil Jesucristo».
12 Lelaʼ bey jeʼex ka yanaktoʼon junpʼéel kʼaakʼas kʼojaʼanileʼ. Wa k-kʼáat ka utsakoʼoneʼ unaj k-beetik tuláakal baʼax ken u yaʼal le doctoroʼ. Baʼaleʼ kex k-tsʼáaik k-fe tiʼ u kuxtal Jesús tu kʼubaj t-oʼolal ku jáalkʼabtikoʼon tiʼ u leyil le kʼeban bey xan tiʼ u leyil le kíimiloʼ, láayliʼ kʼebanoʼoneʼ yéetel jeʼel k-beetik baʼax maʼ maʼalobeʼ. Bey túunoʼ, utiaʼal maʼ u xuʼulul k-meyajtik Dios yéetel utiaʼal maʼ u xuʼulul u kʼamkoʼoneʼ, Pabloeʼ ku yaʼalik yaan uláakʼ baʼax unaj k-beetik: k-kuxtal jeʼex u nuʼuktik le kiliʼich muukʼoʼ.
¿Bix jeʼel k-kuxtal jeʼex u nuʼuktik le kiliʼich muukʼoʼ?
13. ¿Baʼax u kʼáat u yaʼal u chaʼik u nuʼuktaʼal u kuxtal máak tumen le kiliʼich muukʼoʼ?
13 Ken joʼopʼok k-xíimbaleʼ ku bin k-náatsʼal teʼ tuʼux k-tuklik k-binoʼ. Le oʼolal u kuxtal máak jeʼex u nuʼuktik le kiliʼich muukʼoʼ maʼ u kʼáat u yaʼal wa jach junpuliʼ maʼ ken u beet baʼax maʼ jach maʼalobiʼ, baʼaxeʼ u kʼáat u yaʼal maʼ u xuʼulul u tsʼáaik u yóol u maas meyajt Dios (1 Tim. 4:15). Kʼaʼabéet k-ilik k-beetik tuláakal le ku páajtal sáamsamal utiaʼal k-nuʼuktik k-kuxtal jeʼex u yaʼalik le kiliʼich muukʼoʼ. K-ilik k-kuxtal «jeʼel bix [u] yaʼalik le kiliʼich [muukʼoʼ]» jeʼel u yáantkoʼon utiaʼal ka lúubkoʼon utsil tu táan Dioseʼ (Gal. 5:16).
14. ¿Máaxoʼob «ku kuxtaloʼob jeʼel bix u yaʼalik le luʼumkabil wíinkliloʼ»?
14 Teʼ carta tu tsʼíibtaj Pablo tiʼ le Romailoʼoboʼ, tʼaanaj tiʼ kaʼa jaats máakoʼob maʼ junpʼéeliliʼ bix u tuukuloʼobiʼ (xokaʼak Romailoʼob 8:5). Le tʼaan «luʼumkabil wíinklil» tu chʼaʼchiʼitoʼ maʼ u kʼáat u yaʼal u wíinklil máakiʼ. Ichil le Bibliaoʼ ku meyaj le tʼaan «luʼumkabil wíinklil» utiaʼal u tsʼáaik naʼatbil kʼebanoʼonoʼ. Lelaʼ letiʼe baʼax beetik u yantal talamil tiʼ baʼax k-tuklik yéetel baʼaxoʼob ku tsʼíiboltik k-kʼeban wíinklil, jeʼex úuchik u yaʼalik apóstol Pablooʼ. Baʼaleʼ le máaxoʼob «ku kuxtaloʼob jeʼel bix u yaʼalik le luʼumkabil wíinkliloʼ» maʼatech u beetkoʼob mix baʼal utiaʼal u tsʼáaikubaʼob tu contra. Maʼatech u tuukuloʼob tiʼ baʼax u kʼáat Dios ka u beetoʼob yéetel maʼatech u kʼamkoʼob le áantaj ku tsʼáaikoʼ, baʼaxeʼ «chéen tiʼ u baʼalubailoʼob [u] wíinkliloʼob ku tsʼáaik u yóoloʼoboʼ», lelaʼ u kʼáat u yaʼaleʼ, chéen ku binoʼob tu paach baʼaxoʼob ku tsʼíiboltkoʼob. Baʼaleʼ «le máaxoʼob kuxaʼanoʼob jeʼel bix ku yaʼalik le kiliʼich [muukʼoʼ]» ku yilik u binoʼob tu paach «u baʼaloʼobil [le kiliʼich muukʼoʼ», lelaʼ u kʼáat u yaʼaleʼ, ku yilik u maas tsʼáaik u yóol u meyajtoʼob Dios.
15, 16. 1) ¿Baʼaxoʼob ku péeksaʼal u beet máak yoʼolal le baʼaxoʼob ku tuklikoʼ? 2) ¿Tiʼ baʼax maas chʼiikil u tuukul le máakoʼob bejlaʼaʼ?
15 (Xokaʼak Romailoʼob 8:6.) Utiaʼal u beetik máak baʼax maʼalob wa baʼax kʼaaseʼ, ku tuklik bix ken u beetil. Le máaxoʼob ku tuukuloʼob chéen tiʼ baʼaloʼob kʼaastakeʼ, maʼ kun xáantal ken pʼáatak chéen bey u kuxtaloʼoboʼ wa bey u modosoʼoboʼ. U suukileʼ chéen ku tuukuloʼob, ku tsʼíiboltkoʼob yéetel ku yaabiltikoʼob u kʼaakʼas tsʼíibolaloʼob.
16 ¿Baʼax maas ku tsʼíiboltik u beetik u maas yaʼabil le máakoʼoboʼ? Apóstol Juaneʼ tu yaʼalaj: «Mix baʼal tiʼ le baʼaxoʼob ku yaʼalik u tsʼáaik yóokʼol kaaboʼ tiʼ Dios le Taata u taaloʼ, baʼaleʼ tiʼ yóokʼol kaab u taal. U kʼaakʼas tsʼíibolaloʼob le luʼumkabil wíinkliloʼ, u kʼaakʼas tsʼíibolalil le ichoʼ, yéetel u kaʼanal ichil ku yantal tu yoʼolal u baʼaliloʼob le kuxtaloʼ, tuláakal lelaʼ letiʼ le baʼaxoʼob ku yaʼalik yóokʼol kaab u tsʼáaikoʼ» (1 Juan 2:16). Bejlaʼeʼ le libroʼob, revistaʼob, periodicoʼob, le baʼaxoʼob ku máansaʼal tiʼ televisión, peliculaʼob yéetel tiʼ Interneteʼ ku tʼaanoʼob chéen tiʼ núupkʼeban, u taaskuba máak noj baʼalil yéetel u tsʼíiboltaʼal ayikʼalil. U maas yaʼabil le máakoʼoboʼ chéen tiʼ le baʼaloʼob bey ku tuukuloʼoboʼ. Baʼaleʼ «u tsʼáaik u yóol máak chéen tiʼ u baʼaloʼobil le wíinkliloʼ ku bisik máak tiʼ kíimil» tu táan Dios teʼ kʼiinoʼobaʼ yéetel maʼ kun xáantaleʼ jach yaan u peʼertik u kuxtal teʼ xuʼulsajiloʼ. ¿Baʼaxten? Tumen «le máaxoʼob ku tsʼáaik u yóoloʼob chéen tiʼ u baʼaloʼobil le wíinkliloʼ u pʼekmajoʼob Jajal Dios, tumen maʼ u kʼáatoʼob mix tu páajtal u yantaloʼob yáanal u yaʼalmajtʼaan Jajal Diosiʼ. Le oʼolaleʼ le máaxoʼob kuxaʼanoʼob chéen utiaʼal le luʼumkabil wíinkliloʼ maʼ tu páajtal u lúubloʼob utsil tiʼ Jajal Dios» (Rom. 8:7, 8.)
17, 18. ¿Bix jeʼel k-chaʼik u nuʼuktaʼal k-tuukul tumen le kiliʼich muukʼoʼ, yéetel baʼax utsiloʼob ku taasik u beetaʼal beyoʼ?
17 Baʼaleʼ «u tsʼáaik u yóol máak tiʼ u baʼaloʼobil [le kiliʼich muukʼoʼ] ku bisik máak tiʼ kuxtal yéetel tiʼ jeetsʼel óolal»: le kuxtal minaʼan u xuul ku taal u kʼiinoʼ, u yuʼubik máak yaan jeetsʼelil tu puksiʼikʼal bey xan yéetel Dios. ¿Bix jeʼel u páajtal u seguer k-tsʼáaik k-óol «tiʼ u baʼaloʼobil [le kiliʼich muukʼoʼ]»? U suuktal k-tuukul tiʼ le baʼax ku yaʼalik le kiliʼich muukʼoʼ yéetel k-ilik k-beetik baʼax uts tu tʼaan Dios yéetel k-eʼesik jatsʼuts modos. Wa k-beetik beyoʼ, k-tuukuleʼ yaan u pʼáatal «yáanal u yaʼalmajtʼaan Jajal Dios» yéetel yaan k-beetik baʼax u kʼáat. Ken túuntaʼak k-óoleʼ maʼ kun kaʼapʼéeltal k-tuukul tiʼ baʼax unaj k-beetik. Baʼaxeʼ yaan k-chʼaʼtuklik k-beetik baʼax maʼalob jeʼex u nuʼuktik le kiliʼich muukʼoʼ.
18 Jeʼex túun k-ilkoʼ, jach unaj k-chaʼik u nuʼuktaʼal k-tuukul tumen le kiliʼich muukʼoʼ. Lelaʼ jeʼel k-beetik wa k-payalchiʼ mantatsʼ, k-xakʼalxoktik le Bibliaoʼ, k-bin teʼ muchʼtáambaloʼoboʼ yéetel k-jóokʼol kʼaʼaytaj (1 Ped. 1:13). Maʼ unaj k-chaʼik u náayal k-óol yoʼolal le baʼax ku tsʼíiboltik k-bakʼeloʼ, baʼaxeʼ unaj k-tsʼáaik k-óol k-beet baʼax ku yaʼalik le kiliʼich muukʼoʼ. Chéen bey jeʼel u seguer k-chaʼik u nuʼuktik k-kuxtaloʼ. Lelaʼ yaan u taasiktoʼon yaʼab utsiloʼob, tumen u chaʼik máak u nuʼuktaʼal tumen le kiliʼich muukʼoʼ ku tsʼáaik kuxtal yéetel jeetsʼelil (Gal. 6:7, 8).
¿Jeʼel wa u páajtal a tsolikeʼ?
• ¿Baʼaxten ku yaʼalaʼal yaan «baʼax maʼ páatji u beetik u yaʼalmajtʼaan Moises[iʼ]», yéetel bix utskíintaʼabik tumen Dios?
• ¿Baʼax u ley le kʼeban yéetel u ley le kíimiloʼ yéetel bix jeʼel k-salvartikba tiʼeʼ?
• ¿Bix jeʼel u páajtal u seguer k-tsʼáaik k-óol «tiʼ u baʼaloʼobil [le kiliʼich muukʼoʼ]»?
[U kʼáatchiʼiloʼob le xookoʼ]
[Fotoʼob yaan teʼ táan juʼun 12 yéetel 13]
¿K-nuʼuktik wa k-kuxtal yéetel baʼax ku tsʼíiboltik k-wíinklil wa yéetel le baʼax ku yaʼalik le kiliʼich muukʼoʼ?
