¿Baʼaxten unaj k-chaʼik u nuʼuktikoʼon u kiliʼich muukʼ Dios?
¿Baʼaxten unaj k-chaʼik u nuʼuktikoʼon u kiliʼich muukʼ Dios?
«Kaʼans tiʼ teen in beet baʼax a kʼáati, tumen teech in [Dios].» (SAL. 143:10)
1. ¿Baʼax yéetel jeʼel k-ketik utiaʼal k-eʼesik jeʼel u páajtal k-nuʼuktaʼal tumen junpʼéel baʼax maʼ tu yilaʼaleʼ?
¿TSʼOʼOK wa u yáax meyajtech junpʼéel brújula utiaʼal a nuʼuktikaba? Lelaʼ junpʼéel chan nuʼukul ku taasik junpʼéel púutsʼ yaan imán tiʼ, yéetel mantatsʼ ku tuchʼuʼtik u tojil xaman. ¿Baʼaxten? Tumen ku kóolaʼal tumen u imanil le Luʼumaʼ. Kex maʼ tu páajtal u yilaʼal u muukʼ u imanil le Luʼumaʼ ku beetik u pʼáatal tu tojil noojol yéetel xaman. Desde úuchileʼ yaʼab máakoʼob ku nuʼuktikubaʼob yéetel le brújula teʼ luʼumaʼ wa ich kʼáaʼnáab.
2, 3. 1) ¿Baʼax páajtalil meyajnaj tiʼ Jéeoba úuchjeakil? 2) ¿Bix k-ojéeltik unaj u nuʼuktikoʼon le kiliʼich muukʼoʼ?
2 Baʼaleʼ yaan uláakʼ junpʼéel baʼal maʼatech k-ilik jeʼel u páajtal u nuʼuktikoʼoneʼ. ¿Baʼaxiʼ? Letiʼe baʼax ku chʼaʼchiʼitaʼal tu káajbal le Bibliaoʼ. Ken tʼaanak tiʼ le meyaj tu beetaj Jéeoba u millonesil jaʼabjeakiloʼ, u libroil Genesiseʼ ku yaʼalik: «Tu [káajbaleʼ Jajal Dioseʼ] tu beetaj kaʼanoʼob yéetel luʼum». Ken tsʼoʼokkeʼ ku yaʼalik le baʼax meyajnajtiʼ utiaʼal u beetkoʼ, tumen ku yaʼalikeʼ «u [muukʼ Dioseʼ] tiʼ ku péek kaʼach pakakbal yanil tu yóokʼol[eʼ]» (Gén. 1:1, 2). ¿Baʼax le ku meyaj kaʼachoʼ? Letiʼe kiliʼich muukʼoʼ, lelaʼ letiʼe nojoch páajtalil meyajnaj utiaʼal u beetik tuláakal baʼaloʼ. Tak toʼoneʼ kuxaʼanoʼon yoʼolal le kiliʼich muukʼ meyajnaj tiʼ Jéeobaoʼ (Job 33:4; Sal. 104:30).
3 Baʼaleʼ maʼ chéen unaj u kiʼimaktal k-óol ikil k-ojéeltik u kiliʼich muukʼ Dioseʼ ku meyaj utiaʼal u tsʼáaiktoʼon kuxtal yéetel le baʼaxoʼob kʼaʼabéettoʼonoʼ. Baʼaxeʼ unaj k-chaʼik u nuʼuktikoʼon. U Hijo Dioseʼ tu yaʼalaj tiʼ u disipuloʼob: «Le kiliʼich muukʼ[oʼ] [...] yaan u yáantkeʼex a kʼaj óolteʼex tuláakal u jaajil» (Juan 16:13, NM). Baʼaleʼ ¿baʼax jach tu jaajil le kiliʼich muukʼoʼ yéetel baʼax utsiloʼob jeʼel k-kʼamik wa k-chaʼik u nuʼuktikoʼoneʼ?
Le baʼax le kiliʼich muukʼoʼ
4, 5. 1) ¿Baʼax maʼ jaaj ku creertik le máakoʼob yoʼolal le kiliʼich muukʼoʼ? 2) ¿Bix jeʼel k-tsolik jach baʼax le kiliʼich muukʼoʼ?
4 Ken jóoʼkoʼon kʼaʼaytajeʼ k-ilik yaʼab máakoʼobeʼ ku creertikoʼob le Trinidadoʼ. Le oʼolal ku tuklikoʼobeʼ le kiliʼich muukʼoʼ juntúul máak jeʼex le Taata yéetel Hijooʼ (1 Cor. 8:6). Le oʼolaleʼ tiʼ yaʼab bibliaʼobeʼ ku tsʼíibtaʼal nojoch u yáax letrail le tʼaanaʼ: Kiliʼich Pixan wa Espíritu Santo. Baʼaleʼ juntúul profesor tiʼ griego, jach kʼaj óolaʼan ku kʼaabaʼtik Joan F. Mira, tu jóoʼsaj tu jaʼabil 2006 tu luʼumil España le Evangelioʼoboʼ, Hechos yéetel Apocalipsis, baʼaleʼ maʼ tu tsʼíibtaj yéetel letraʼob nuuktak le u yáax letrail le tʼaan espíritu santooʼ. Yéetel tu yaʼaleʼ le Kiliʼich Tsʼíiboʼoboʼ maʼatech u tsʼáaik naʼatbil le kiliʼich muukʼoʼ juntúul máak. *
5 ¿Baʼax túun jach tu jaajil le kiliʼich muukʼoʼ? Le tʼaan [hebreo] rú·aj, ku meyaj teʼ Génesis 1:2, ku suʼutul «kiliʼich muukʼ», «iikʼ» bey xan yéetel uláakʼ tʼaanoʼob ku tsʼáaik naʼatbil junpʼéel muukʼ maʼ tu páajtal u yilaʼal (keʼetek yéetel Génesis 3:8 yéetel 8:1). Jeʼex le iikʼ maʼ tu páajtal u yilaʼal kex táan u meyajoʼ, le kiliʼich muukʼoʼ maʼ tu páajtal u yilaʼal, tumen minaʼan u wíinklil jeʼex juntúul máakeʼ, baʼaleʼ ku yilaʼal baʼaxoʼob ku beetik. U jaajileʼ letiʼe muukʼ ku tsʼáaik Dios tiʼ le máakoʼob wa tiʼ uláakʼ baʼaxoʼob utiaʼal u béeykuntik baʼax u tukultmajoʼ. ¿Máasaʼ maʼ talam u creertaʼaleʼ le nojoch páajtalilaʼ tiʼ le kiliʼich Dios yaan tuláakal páajtalil u taaloʼ? (xokaʼak Isaías 40:12, 13).
6. ¿Baʼax tu kʼáataj David tiʼ Jéeoba?
6 Jéeobaeʼ jeʼel u páajtal u meyajtiʼ u kiliʼich muukʼ utiaʼal u nuʼuktik k-kuxtaleʼ. Lelaʼ bey úuchik u yaʼalik tiʼ David: «Bíin in tsʼáatech tsolxikinoʼob; bíin in weʼestech le bej unaj a biskoʼ» (Sal. 32:8). Baʼaleʼ ¿u kʼáat wa le salmista ka nuʼuktaʼak u kuxtal tumen Jéeobaoʼ? U kʼáat, tumen letiʼeʼ tu yaʼalajtiʼ: «Kaʼans tiʼ teen in beet baʼax a kʼáati, tumen teech in [Dios]» (Sal. 143:10). Toʼon xaneʼ unaj k-tsʼíiboltik ka u nuʼuktoʼon le kiliʼich muukʼoʼ. ¿Baʼaxten? Koʼoneʼex ilik kanpʼéel baʼax oʼolal.
Maʼ tu páajtal k-nuʼuktik k-kuxtal chéen t-juunal
7, 8. 1) ¿Baʼaxten maʼ tu páajtal k-nuʼuktik k-kuxtal chéen t-juunal? 2) ¿Yéetel baʼax jeʼel u páajtal k-ketik utiaʼal k-eʼesik maʼ maʼalob ka k-tukult maʼ kʼaʼabéettoʼon u nuʼuktaj Dios teʼ kʼasaʼan yóokʼol kaabaʼ?
7 Le yáax baʼax oʼolal kʼaʼabéet u nuʼuktaʼal k-kuxtal tumen Jéeobaoʼ, tumen chéen toʼoneʼ maʼ tu páajtal k-beetik. Le tʼaan nuʼuktajoʼ u kʼáat u yaʼal «u yeʼesaʼal bej», «u yaʼalaʼal u nuʼuk yéetel u tsolxikintaʼal» máak. Ka beetaʼab wíinikeʼ maʼ tsʼaʼab u páajtalil u nuʼuktikuba tu juunaliʼ, baʼaleʼ lelaʼ maas talamchaj le ka tsʼoʼok u lúubul tiʼ le kʼebanoʼ. Le oʼolal Jeremíaseʼ ku yaʼalik: «Yuumtsil, teneʼ in wojleʼ xiibeʼ maʼ u yuumil u kuxtaliʼ, minaʼan u páajtalil u yéeyik bix ku bin [u] xuʼulul» (Jer. 10:23). Tsʼoʼoleʼ Jéeobaeʼ tu yaʼalaj tiʼ le profeta junpʼéel baʼax beetik maʼ tu páajtal k-nuʼuktikba t-juunaloʼ: «Minaʼan uláakʼ baʼal ku tuus yéetel sen kʼasaʼaneʼ jeʼel bix u puksiʼikʼal wíinikeʼ. ¿Máax jeʼel u páajtal u chʼaʼnuʼuktik bixeʼ?» (Jer. 17:9; Mat. 15:19).
8 Tuukulnakoʼon tiʼ juntúul máax ku bin xíimbal tiʼ junpʼéel tuʼux maʼ u kʼaj óoliʼ tsʼoʼoleʼ minaʼan mix junpʼéel mapa tiʼ. Wa maʼ u kʼáatik áantaj tiʼ juntúul máax u kʼaj óol maʼalob le tuʼux ku bin, yéetel wa maʼ u bisik tak chéen junpʼéel brujulaeʼ, yaan u bin kʼaasil tiʼ. Tsʼoʼoleʼ wa maʼ u yojel baʼax jeʼel u beetik wa ka yanak wa baʼax talamil tiʼeʼ jeʼel tak u peʼertik u kuxtaleʼ. Lelaʼ bey u yúuchul xan tiʼ le máax ku tuklik maʼ kʼaʼabéet u nuʼuktaj Dios ichil u kuxtaloʼ. Utiaʼal maʼ k-peʼertik k-kuxtal teʼ kʼasaʼan yóokʼol kaabaʼ, jach unaj k-beetik jeʼex tu beetil Davideʼ, letiʼeʼ tu yaʼalaj: «Yéetel x-maʼ lúubulil kin xíimbaltik a beeloʼob; mix baʼal páajchaj u tseliken tiʼ letiʼob» (Sal. 17:5; 23:3). ¿Baʼax unaj k-beetik utiaʼal maʼ k-lúubul ken xíimbalnakoʼon teʼ bej u kʼáat Dios ka k-bisoʼ?
9. Jeʼex u yeʼesik le táan juʼun 17, ¿bix u yáantkoʼon le kiliʼich muukʼ ichil k-kuxtaloʼ?
9 Wa yaantoʼon kabal óolal yéetel k-kʼubik k-óol tiʼ Jéeobaeʼ, letiʼeʼ yaan u tsʼáaiktoʼon u kiliʼich muukʼ utiaʼal u nuʼuktikoʼon. Baʼaleʼ ¿bix u yáantkoʼon le kiliʼich muukʼoʼ? Jesuseʼ tu yaʼalaj tiʼ u disipuloʼob: «Le kiliʼich [muukʼ] kun u túuxt le Taata tin kʼaabaʼoʼ, utiaʼal ka u yáanteʼex yéetel u tsʼáaik a wóoleʼexeʼ, letiʼ kun u kaʼansteʼex tuláakal baʼal, yéetel yaan u kʼaʼajsikteʼex tuláakal le baʼaloʼob tsʼoʼok in waʼalikteʼexoʼ» (Juan 14:26). Mantatsʼ kʼaʼabéet k-kʼáatik tiʼ Dios ka u yáantoʼon yéetel unaj k-xokik le Biblia, tuʼux tsʼíibtaʼan le baʼaxoʼob tu kaʼansaj Cristooʼ. Le kiliʼich muukʼoʼ yaan u yáantkoʼon k-kʼaj óolt maʼalob u naʼat Jéeoba, lelaʼ jeʼel u yáantkoʼon k-beet mantatsʼ le baʼax ku yaʼalikoʼ (1 Cor. 2:10). Tsʼoʼoleʼ wa ka yanak junpʼéel talamil ichil k-kuxtaleʼ, le kiliʼich muukʼoʼ yaan u yáantkoʼon k-il baʼax unaj k-beetik. Yaan u yáantkoʼon k-kʼaʼajs le tekstoʼob tsʼoʼok k-kanikoʼ yéetel yaan u yáantkoʼon k-il bix unaj k-tsʼáaik ichil k-kuxtal ken k-aktáant jeʼel baʼalak talamileʼ.
Jesuseʼ nuʼuktaʼab tumen le kiliʼich muukʼoʼ
10, 11. ¿Baʼax jach tu tsʼíiboltaj u Hijo Dios, yéetel bix áantaʼabik tumen le kiliʼich muukʼoʼ?
10 Le u kaʼapʼéel baʼax oʼolal kʼaʼabéettoʼon u nuʼuktaj le kiliʼich muukʼoʼ, tumen letiʼe baʼax meyajnaj tiʼ Dios utiaʼal u nuʼuktik u yáax Hijooʼ. Táanil tiʼ u taal Jesús way Luʼumeʼ, u kʼaj óol tubeel le baʼax ku yaʼalik le profecíaaʼ: «U [kiliʼich muukʼ] Yuumtsileʼ, tiʼ bíin yanak mantatsʼ tu yóokʼoleʼ, utiaʼal ka u tsʼáatiʼeʼ, naʼatil, sáasil tuukul, ojéelajil, [...] maʼalob tuukul, muukʼ, kʼaj óolal yéetel u sajbeʼentsil Yuumtsil» (Isa. 11:2). ¡Bukaʼaj wal úuchik u tsʼíiboltik ka áantaʼak tumen le kiliʼich muukʼ utiaʼal u aktáantik le nukuch talamiloʼob ken u muʼyajt way Luʼumoʼ!
11 Jesuseʼ tu yilaj u béeytal le baʼax u yaʼalmaj Jéeobaoʼ. Le Evangelioʼoboʼ ku yaʼalikoʼob baʼax úuch le ka tsʼoʼok u yokjaʼoʼ: «Lukʼ tu áalkab jaʼil [le] Jordanoʼ ka bisaʼab x-tokoy luʼum tumen le [kiliʼich muukʼoʼ]» (Luc. 4:1). Teʼeloʼ maʼ jaaniʼ, payalchiʼinaji yéetel tuukulnaj tiʼ le baʼax kʼaʼajtiʼ le ka okjaʼanajoʼ, yéetel maʼ xaaneʼ eʼesaʼabtiʼ tumen Jéeoba le meyaj ken u beetoʼ. U kiliʼich muukʼ Dioseʼ joʼopʼ u nuʼuktik u tuukul yéetel u puksiʼikʼal Cristo utiaʼal u yáantik u chʼaʼtukult maʼalob baʼax ken u beete. Le oʼolal tu kanaj u aktáant tuláakal le talamiloʼoboʼ yéetel tu beetaj mantatsʼ baʼax uts tu tʼaan u Taata.
12. ¿Baʼaxten unaj k-kʼáatik tiʼ Dios ka u nuʼuktoʼon u kiliʼich muukʼ?
12 Tumen Jesús u yojel bukaʼaj kʼaʼabéetil u yáantaj le kiliʼich muukʼ ichil u kuxtaloʼ, yaʼab u téenel tu yaʼalaj tiʼ u disipuloʼob unaj u kʼáatkoʼob tiʼ Dios yéetel ka u chaʼ u nuʼuktaʼaloʼob tu yéetel (xokaʼak Lucas 11:9-13). ¿Baʼaxten unaj k-beetik xan beyoʼ? Tumen u kiliʼich muukʼ Dioseʼ jeʼel u yáantkoʼon k-kʼex k-tuukul utiaʼal ka yanaktoʼon le tuukul yanchaj tiʼ Cristooʼ (Rom. 12:2; 1 Cor. 2:16). Wa k-chaʼik u nuʼuktikoʼoneʼ, yaan k-tuukul jeʼex Cristoeʼ yéetel yaan k-kuxtal jeʼex letiʼeʼ (1 Ped. 2:21).
Le tuukul yaan teʼ yóokʼol kaabaʼ jeʼel u beetik k-náachtal tiʼ Dioseʼ
13. ¿Baʼax nuʼuktik le yóokʼol kaabaʼ, yéetel baʼax talamiloʼob ku taasik?
13 Le u yóoxpʼéel baʼax oʼolal kʼaʼabéettoʼon u nuʼuktaj le kiliʼich muukʼoʼ, tumen ku yáantkoʼon utiaʼal maʼ u kʼaskúuntaʼal k-kuxtal tumen le bix u tuukul máaxoʼob maʼatech u meyajtikoʼob Diosoʼ. Le máakoʼob teʼ yóokʼol kaabaʼ ku nuʼuktaʼaloʼob tumen junpʼéel baʼax jach yaan u páajtalil, le muukʼaʼ ku péeksikoʼob u beetoʼob le baʼaxoʼob ku bin tu contra le baʼax ku péeksik máak u beet u kiliʼich muukʼ Diosoʼ. Maʼatech u yilik u yantaltiʼob u tuukul Cristo, baʼaxeʼ ku tuukuloʼob yéetel ku beetkoʼob le baʼax u kʼáat Satanás, le máax gobernartik le yóokʼol kaabaʼ (xokaʼak Efesoiloʼob 2:1-3 yéetel Tito 3:3). Tuláakal le máax ku chaʼik u nuʼuktaʼal tumen le tuukul ku taal teʼ yóokʼol kaabaʼ yaan u bin kʼaasil tiʼ. Maʼ ken u kʼam u Reino Dios (Gal. 5:19-21).
14, 15. ¿Baʼax jeʼel u yáantkoʼon utiaʼal k-tsʼáaikba tu contra le tuukul ku taal teʼ yóokʼol kaabaʼ?
14 Jéeobaeʼ ku yáantkoʼon utiaʼal k-aktáantik le muukʼ nuʼuktik le yóokʼol kaabaʼ. Le oʼolal apóstol Pabloeʼ ku yaʼalik: «Sukuʼuneʼex, muʼukʼaʼankúunsabaʼex tiʼ Yuumtsil tu yoʼolal u muʼukʼaʼanil páajtalil [...], utiaʼal ka páatak a xachikabaʼex tiʼ le kʼaakʼas kʼiinoʼ» (Efe. 6:10, 13). Jéeobaeʼ ku yáantkoʼon yéetel u kiliʼich muukʼ utiaʼal k-aktáantik le baʼaxoʼob ku beetik Satanás t-contraoʼ (Apo. 12:9). Le muukʼ nuʼuktik le yóokʼol kaabaʼ jach yaan u páajtalil yéetel tuláakal tuʼux yaan, baʼaleʼ maʼ tu kʼaskúuntik k-tuukul, tumen k-áantaʼal tumen le kiliʼich muukʼ maas yaan u páajtaliloʼ.
15 Le ka tʼaanaj apóstol Pedro tiʼ le máaxoʼob xuʼul u tsaypachtikoʼob Cristo teʼ yáax siglooʼ, tu yaʼalaj: «Saatal u máanoʼob tumen tsʼoʼok u tselikubaʼob tiʼ le toj bejoʼ» (2 Ped. 2:15). ¿Máasaʼ toʼoneʼ jach kiʼimak k-óol tumen «maʼ t-kʼamaj [le muukʼ nuʼuktik] yóokʼol [kaaboʼ,] baʼaleʼ le [kiliʼich muukʼ] ku taal tiʼ Jajal Diosoʼ»? (1 Cor. 2:12.) Wa k-chaʼik u nuʼuktik k-kuxtal yéetel k-kʼamik le áantaj ku tsʼáaik Jéeobaoʼ, maʼ ken k-jóokʼol teʼ maʼalob bejoʼ yéetel yaan k-tsʼáaikba tu contra le bix u tuukul Satanás yéetel u kʼasaʼan yóokʼol kaaboʼ (Gal. 5:16).
Le kiliʼich muukʼoʼ ku tsʼáaik maʼalob ich
16. ¿Baʼax modosil jeʼel u yáantkoʼon k-eʼes le kiliʼich muukʼoʼ?
16 U kanpʼéel baʼax oʼolal kʼaʼabéet u nuʼuktikoʼon u kiliʼich muukʼ Dioseʼ, tumen ku yáantkoʼon ka k-eʼes jatsʼuts modos (xokaʼak Galaciailoʼob 5:22, 23). ¿Máax meyajtik Dios maʼ uts tu tʼaan ka maas yanak yaabilaj tiʼ, kiʼimak óolal yéetel kabal óolal tiʼ? ¿Máax maʼ kʼaʼabéet u maas eʼesik chúukaʼan óolal, utsil puksiʼikʼal yéetel maʼalob bisajbailiʼ? ¿Máax maʼ kʼaʼabéet u maas eʼesik fe, u yantal jeetsʼelil tiʼ yéetel u kanik u controlartubaiʼ? Le kiliʼich muukʼoʼ ku yáantkoʼon utiaʼal ka k-eʼes jatsʼuts modos ku taasik utsil tiʼ toʼon, tiʼ k-familia yéetel tiʼ le sukuʼunoʼob teʼ múuchʼuliloʼ. Le kiliʼich muukʼoʼ maʼatech u xuʼulul u tsʼáaik u yich, le oʼolal mantatsʼ kʼaʼabéet k-ilik k-eʼesik ichil k-kuxtal le jatsʼuts modos ku tsʼáaikoʼ.
17. ¿Bix jeʼel k-maas eʼesik le jatsʼuts modos ku taal tiʼ u yich le kiliʼich muukʼoʼ?
17 Maʼalob ka k-tukle: «¿Ku yeʼesik wa le baʼaxoʼob kin waʼalik yéetel kin beetik táan u nuʼuktaʼal in kuxtal tumen le kiliʼich muukʼ yéetel táan in weʼesik le modos ku tsʼáaikoʼ?» (2 Cor. 13:5a; Gal. 5:25). Maʼ xaaneʼ k-ilik kʼaʼabéet k-maas eʼesik jujunpʼéel tiʼ le modos ku tsʼáaikoʼ. ¿Baʼax túun unaj k-beetik? Unaj k-múuchʼ meyaj yéetel le kiliʼich muukʼ utiaʼal u nuʼuktikoʼonoʼ. ¿Bixi? Letiʼe k-xakʼalxoktik le Biblia yéetel le jóoʼsaʼaniloʼoboʼ bey xan k-ilik bix jeʼel k-tsʼáaik ichil k-kuxtal utiaʼal k-maas eʼesik jatsʼuts modoseʼ. * Ken k-il bix u yáantkoʼon le kiliʼich muukʼ yéetel bix u yáantik le sukuʼunoʼoboʼ, yaan k-naʼatik baʼaxten jach kʼaʼabéet u nuʼuktik k-kuxtal.
¿K-chaʼik wa u nuʼuktikoʼon u kiliʼich muukʼ Dios?
18. ¿Baʼax tu beetaj Jesús yoʼolal le nuʼuktaj tsʼaʼabtiʼ tumen le kiliʼich muukʼoʼ?
18 Ka beetaʼab tuláakal baʼal tumen Jéeobaeʼ, áantaʼab tumen Jesús. Le oʼolal letiʼeʼ u yojel bix u meyaj u imanil le Luʼum, ku yáantaj utiaʼal u kʼaj óoltaʼal u kantiʼitsil tumen wíinikoʼ (Pro. 8:30; Juan 1:3). Baʼaleʼ mix baʼal eʼesik wa meyajnajtiʼ utiaʼal u nuʼuktikuba le ka taal way Luʼumoʼ. Le baʼax ku yeʼesik le Bibliaoʼ, le ka taal way Luʼumoʼ tu yilaj le bukaʼaj páajtalil yaan tiʼ u kiliʼich muukʼ Diosoʼ. Tu nuʼuktaj u kuxtal tu yéetel mantatsʼ, le oʼolal ken péeksaʼak kaʼach u beet wa baʼaxeʼ ku beetik yéetel kiʼimak óolal (Mar. 1:12, 13; Luc. 4:14). ¿K-beetik wa xan beyoʼ?
19. ¿Baʼax unaj k-beetik utiaʼal u nuʼuktaʼal k-kuxtal tumen le kiliʼich muukʼoʼ?
19 Le kiliʼich muukʼoʼ láayliʼ ku yáantik u tuukul yéetel u puksiʼikʼal le máaxoʼob ku chaʼik u nuʼuktaʼaloʼoboʼ. ¿Baʼax unaj k-beetik utiaʼal u yáantkoʼon yéetel u nuʼuktikoʼon teʼ maʼalob bejoʼ? K-kʼáatik tiʼ Jéeoba mantatsʼ ka u tsʼáatoʼon yéetel ka k-chaʼ u nuʼuktikoʼon (xokaʼak Efesoiloʼob 3:14-16). Tsʼoʼoleʼ kʼaʼabéet k-ilik ichil le Biblia bix jeʼel k-beetik le baʼax k-kʼáatik ich payalchiʼoʼ, tumen letiʼe kiliʼich muukʼ nuʼukt u tsʼíibtaʼaloʼ (2 Tim. 3:16, 17). Kʼaʼabéet k-beetik le baʼax ku yaʼalik le Bibliaoʼ yéetel k-kʼamik yéetel kiʼimak óolal le nuʼuktaj ku tsʼáaik le kiliʼich muukʼoʼ. Bey túunoʼ kʼaʼabéet k-eʼesik ichil k-kuxtal jach k-kʼubik k-óol jeʼel u nuʼuktikoʼon Jéeoba teʼ kʼasaʼan yóokʼol kaabaʼ.
[Tsolajiloʼob]
^ xóot’ol 4 Tu tʼaaniloʼob u káajbal le librooʼ ku yaʼalikeʼ «le máakoʼob teʼ siglo 2 yéetel 3 maʼatech u tuklikoʼob wa le [...] espírituoʼ juntúul máak jeʼex Dioseʼ, maʼ jeʼex le Taataoʼ yéetel le Hijooʼ, tumen lelaʼ chéen tiʼ u taal tiʼ u kaʼansajil le Trinidadoʼ, baʼaleʼ teʼ kʼiinoʼob jeʼeloʼ maʼ káajak u creertaʼaliʼ».
^ xóot’ol 17 Utiaʼal a wojéeltik u maasil yoʼolal le modosoʼobaʼ ilawil le Índice de las publicaciones Watch Tower yáanal le xook ku kʼaabaʼtik «Fruto del espíritu de Dios» yéetel le jaats «Lista por aspecto».
¿T-kanaj wa le baʼaxoʼob maas kʼaʼanaʼantakoʼ?
• ¿Bix u yáantkoʼon le kiliʼich muukʼ ichil k-kuxtaloʼ?
• ¿Máakalmáak le kanpʼéel baʼax oʼolal kʼaʼabéettoʼon u nuʼuktaj u kiliʼich muukʼ Diosoʼ?
• ¿Baʼax unaj k-beetik utiaʼal k-kʼamik le utsiloʼob ku taasik u nuʼuktaʼal máak tumen le kiliʼich muukʼoʼ?
[U kʼáatchiʼiloʼob le xookoʼ]
[Foto yaan teʼ táan juʼun 15]
Jesuseʼ mantatsʼ tu chaʼaj u nuʼuktaʼal tumen u kiliʼich muukʼ Dios
[Foto yaan teʼ táan juʼun 17]
Le kiliʼich muukʼoʼ ku nuʼuktik k-tuukul yéetel k-puksiʼikʼal
