¿Kʼajaʼan wa tech?

Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

• ¿Baʼax tu tsʼáaj Dios u naʼat u chʼiʼibal Leví le ka tu yaʼalajtiʼ: «Teneʼ a tiaʼalen yéetel a [herenciaen]»?

Le levitaʼoboʼ maʼ tsʼaʼab mix junxéetʼ u luʼumoʼob, jeʼex u maasil israelitaʼoboʼ. U herenciaʼobeʼ Jéeoba (Núm. 18:20). Kex minaʼan u luʼumoʼobeʼ yaan junpʼéel nojoch meyaj tsʼaʼabtiʼob. Jéeobaeʼ tu yilaj ka yanak tuláakal le baʼaxoʼob kʼaʼabéettiʼoboʼ. Le máaxoʼob ku tsʼáaikoʼob táanil u Reino Dios ichil u kuxtaloʼoboʼ, yaan xan u tsʼaʼabal tuláakal baʼax kʼaʼabéettiʼob (15/9, táan juʼun 7, 8 yéetel 13).

• ¿Máax unaj u kaʼansik le mejen paalaloʼob u kʼaj óoltoʼob Diosoʼ?

Le Bibliaoʼ ku yaʼalikeʼ letiʼe taatatsil yéetel le maamatsiloʼ (Pro. 1:8; Efe. 6:4). Lelaʼ tsʼoʼok u yilaʼaleʼ letiʼe baʼax maas áantik le paalaloʼoboʼ (1/10, táan juʼun 6 yéetel 7).

• ¿Bix jeʼel a weʼesik tsiikil tiʼ a núup ken tsikbalnakeʼexeʼ?

Ken tʼaanak a núupeʼ unaj a chʼenxikintik tubeel yéetel maʼ unaj a séeb tʼaaniʼ mix a pʼuʼujuliʼ (Sant. 1:19). Juntúul máax ku chʼenxikin maʼalobeʼ ku yilik xan u naʼatik bix u yuʼubikuba le máax ku tʼaanoʼ. Tak wa minaʼan mix máak uʼuyikeʼexeʼ, maʼ unaj a waʼalikeʼex baʼaloʼob kʼaastak tiʼ a núupeʼexiʼ. Ken u paklan eʼes tsiikil le máaxoʼob tsʼokaʼan u beeloʼoboʼ ku yantal kiʼimak óolal ichil u yotochoʼob (Rut 1:9) (1/10, táan juʼun 10 yéetel 11).

• ¿Jeʼel wa k-beetik u kiʼimaktal wa u lúubul u yóol Jéeobaeʼ?

Salmo 78:40 yéetel 41, ku yeʼesik bix tu yuʼubiluba Jéeoba yoʼolal le baʼaloʼob tu beetaj le israelitaʼob úuchjeakiloʼ. Le salmistaoʼ ku yaʼalik: «¡Bukaʼaj u téenel maʼ tu [yuʼubajtʼantoʼob] [...] teʼ [desiertooʼ]!». Yéetel ku yaʼalik: «Tu túuntajoʼob u yóol tu kaʼatéen». Le oʼolaleʼ utiaʼal maʼ k-beetik u yaatal u yóol Dioseʼ unaj k-beetik baʼax maʼalob utiaʼal k-kiʼimakkúuntik u yóol (1/10, táan juʼun 27).

• ¿Baʼax jeʼel u yáantik le máax meyajtik Dios u yil wa kʼambeʼen junpʼéel náaysaj óol wa maʼoʼ?

Utiaʼal k-ilik wa maʼalob yéetel ku kʼaʼamal tumen Dioseʼ, maʼalob ka k-tukle: ¿Baʼax táakaʼaniʼ? ¿Bukaʼaj tiempo ken u bis tiʼ máak? ¿Máaxoʼob kun táakpajloʼobiʼ? (15/10, táan juʼun 9 tak 12).

• ¿Baʼaxten tu yaʼalaj Pablo maas maʼalob maʼ u tsʼoʼokol u beel máak?

Teʼ carta tu túuxtaj tiʼ le corintoiloʼoboʼ, tʼaanaj tiʼ le utsiloʼob ku taasik maʼ u tsʼoʼokol u beel máakoʼ. Teʼ capítulo 13 tak 20 tiʼ Beetaʼanoʼoboʼ, k-ilkeʼ letiʼ yéetel uláakʼ misioneroʼobeʼ binoʼob kʼaʼaytaj yéetel áantajnajoʼob utiaʼal u yantal múuchʼuliloʼob jejeláas tuʼuxoʼob. Letiʼeʼ tu aktáantaj jejeláas talamiloʼob mix juntúul tiʼ toʼon u aktáantiʼ (2 Cor. 11:23-27, 32, 33). Wa tsʼokaʼan u beel yéetel wa yaan u paalal kaʼacheʼ, bejlaʼa maʼ tu páajtal u beetkeʼ (15/10, táan juʼun 13 tak 15).

• ¿Bix u yáantkoʼon le baʼax ku yaʼalik Proverbios 7:6 tak 23 utiaʼal maʼ k-chaʼantik pornografíaoʼ?

Le versiculoʼobaʼ ku tʼaan tiʼ juntúul táankelem xiʼipal ku bin tuʼux u yojel kajaʼan juntúul koʼolel x-núupkʼeban, yéetel tiʼ bix úuchik u táabsaʼal. Bejlaʼeʼ kʼaʼabéet k-kanáantik maʼ k-okol ich Internet teʼ tuʼux ku taasik fotoʼob kʼaastakoʼ. Kʼaʼabéet k-kʼáatik u yáantaj Dios táanil tiʼ k-ilik fotoʼob beyoʼ (15/11, táan juʼun 9 yéetel 10).

• ¿Baʼax k-kanik tiʼ u kettʼaanil le máak ku paakʼaloʼ?

Tu kettʼaanil le máak ku paakʼaloʼ, Jesuseʼ tu yaʼaleʼ le máakoʼoboʼ «ku sen tuklikoʼob u baʼaloʼobil le yóokʼol kaabaʼ yéetel ku tuʼusloʼob tumen le ayikʼaliloʼ», ku beetik u lukʼul tu puksiʼikʼaloʼob u tuukulil u meyajtikoʼob Dios, le oʼolal maʼatech u yichankiloʼob (Mat. 13:22). U kiʼimaktal k-óol chéen yéetel junpʼíit baʼal yéetel k-kuxtal bey jeʼex juntúul táanxel luʼumileʼ, jeʼel u yáantkoʼon utiaʼal ka yanaktoʼon junpʼéel ich ku tsʼáaik u paakat chéen tiʼ junpʼéeliliʼ tuʼuxeʼ (15/11, táan juun 20).