Le máakoʼob nuʼuktaʼab u kuxtaloʼob tumen u kiliʼich muukʼ Diosoʼ
Le máakoʼob nuʼuktaʼab u kuxtaloʼob tumen u kiliʼich muukʼ Diosoʼ
«Jéeoba, le Nojoch Jalaʼachoʼ, tsʼoʼok u túuxtiken, yéetel u kiliʼich muukʼ.» (ISA. 48:16, NM)
1, 2. ¿Baʼax kʼaʼabéet utiaʼal u yantaltoʼon fe, yéetel bix jeʼel u yáantkoʼon k-ilik le baʼax tu beetaj jujuntúul máakoʼob úuchjeakiloʼ?
DESDE tu kʼiiniloʼob Abeleʼ yaʼab xiiboʼob yéetel koʼoleloʼob tsʼoʼok u yeʼeskoʼob fe, baʼaleʼ bejlaʼeʼ «maʼ tiʼ tuláakal» máak yaan fejiʼ (2 Tes. 3:2). Le oʼolaleʼ, ¿bix jeʼel u yantaltoʼon fe yéetel bix k-eʼesik tiʼ tuláakal baʼaxoʼob k-beetkeʼ? U xokik máak le Bibliaoʼ, tumen «le oksaj óolaloʼ ku taal tu yoʼolal le uʼuyajoʼ» (Rom. 10:17). Tsʼoʼoleʼ junpʼéel tiʼ le modos ku taal tiʼ le kiliʼich muukʼoʼ (Gal. 5:22, 23). Le oʼolal wa k-kʼáat ka yanaktoʼon fejeʼ, kʼaʼabéettoʼon le kiliʼich muukʼoʼ.
2 Yaan máax tuklikeʼ le máaxoʼob chúukpaj u yóoloʼob ku yaʼalik le Bibliaoʼ, sijnáaloʼob yéetel u fejoʼob, baʼaleʼ maʼ beyiʼ. U jaajileʼ láayliʼ tu yuʼububaʼob jeʼex k-uʼuyikbaeʼ (Sant. 5:17). Jeʼex tuláakal máakeʼ, kaʼapʼéelchaj u tuukuloʼob, sajakchajoʼob yéetel yaan baʼaxoʼob maʼ maʼalob tu beetoʼobiʼ. Baʼaleʼ páajchaj u aktáantkoʼob nukuch talamiloʼob. ¿Baʼaxten? Tumen «tsʼaʼab u muukʼoʼob» tumen u kiliʼich muukʼ Dios (Heb. 11:34). Koʼoneʼex ilik baʼax tu beetaj jujuntúul tiʼ letiʼobiʼ utiaʼal k-ilik bix úuchik u yáantaʼaloʼob tumen u kiliʼich muukʼ Jéeoba. Le xookaʼ yaan u yáantkoʼon utiaʼal ka chúukpajak k-óol teʼ kʼiinoʼob jach ku túuntaʼal k-óol yoʼolal le k-fejoʼ.
U kiliʼich muukʼ Dioseʼ tu yáantaj Moisés
3-5. 1) ¿Bix k-ojéeltik Moiseseʼ áantaʼab tumen le kiliʼich muukʼ utiaʼal u beetik le meyaj tsʼaʼabtiʼoʼ? 2) ¿Baʼax ku kaʼansiktoʼon le úuchik u tsʼaʼabal le kiliʼich muukʼ tiʼ Moisés tumen Jéeobaoʼ?
3 Tu jaʼabil 1513 táanil tiʼ u taal Jesuseʼ, jeʼel u páajtal u yaʼalaʼaleʼ «Moiseseʼ juntúul jach kabal óolal máak teʼ luʼumaʼ» (Núm. 12:3). Kex beyoʼ tsʼaʼab u nuʼukt u kaajil Israel tumen Dios. ¿Páajchaj wa túun u beetik? Páajchaji. Yéetel u yáantaj le kiliʼich muukʼoʼ tu beetaj u profetail, u juezil, tu tsʼíibtaj jujunpʼéel libroʼob tiʼ le Bibliaoʼ, tu nuʼuktaj le kaajoʼ yéetel tu beetaj milagroʼob (xokaʼak Isaías 63:11-14). Baʼaleʼ yaan kʼiineʼ tu yuʼubaj bey maʼ tu páajtal u beetik le meyaj tsʼaʼabtiʼoʼ (Núm. 11:14, 15). Jéeobaeʼ tu chʼaʼaj «junjaats le [kiliʼich muukʼ] yaan tiʼ» letiʼoʼ ka tu tsʼáaj tiʼ 70 xiiboʼob utiaʼal áantik (Núm. 11:16, 17). ¿Baʼax ku kaʼansiktoʼon lelaʼ? Kex ku yuʼubik Moisés jach yaʼab le meyaj ku beetik kaʼachoʼ, maʼ chéen tu juunal ku beetkiʼ. Le 70 máakoʼob kun áantik xanoʼ maʼ chéen tu juunaloʼob ken u beetoʼobiʼ.
4 U jaajileʼ Moiseseʼ tsʼaʼan kaʼach tiʼ tuláakal le kiliʼich muukʼ kʼaʼabéet utiaʼal u beetik le meyajoʼ. Yéetel kex luʼsaʼab junjaats tiʼeʼ láayliʼ yaʼab pʼáat tiʼeʼ. Maʼ tu bineltaj tiʼiʼ yéetel maʼ píitmáan u tsʼaʼabal tiʼ le 70 ancianoʼoboʼ. Jéeobaeʼ mantatsʼ ku tsʼáaik tiʼ le máaxoʼob meyajtik le bukaʼaj kiliʼich muukʼ kʼaʼabéet utiaʼal u beetik u meyajoʼoboʼ. Jach beyoʼ, le Bibliaoʼ ku yaʼalikeʼ «tuláakloʼon tsʼoʼok k-kʼamik tiʼ» yaʼab páajtalil, yéetel letiʼeʼ «ku tsʼáaik u kiliʼich [muukʼ] x-maʼ pʼiisil» (Juan 1:16; 3:34).
5 ¿Táan wa a muʼyajtik nukuch talamiloʼob? ¿Ka wuʼuyik wa bey sáamsamal táan u yaʼabtal baʼax ka beetik yéetel yaʼab tiempo ku bisiktecheʼ? ¿Táan wa u bin u maas talamtal a wáantik a familia u maas meyajt Dios yéetel a tsʼáaik baʼaxoʼob kʼaʼabéettiʼ tumen minaʼan meyaj wa yoʼolal kʼojaʼanil? ¿Yaʼab wa meyajoʼob tsʼaʼan a beet teʼ múuchʼuliloʼ? Wa beyoʼ, maʼ u tuʼubultecheʼ Dioseʼ yaan u tsʼáaiktech le kiliʼich muukʼ kʼaʼabéet utiaʼal u páajtal a beetkoʼ (Rom. 15:13).
Le kiliʼich muukʼoʼ tu yáantaj Bezaleel
6-8. 1) ¿Baʼax meyajiloʼob tu beetaj Bezaleel yéetel Aholiab yéetel u yáantaj u kiliʼich muukʼ Dios? 2) ¿Baʼax eʼesik letiʼe kiliʼich muukʼ nuʼukt Bezaleel yéetel Aholiaboʼ? 3) ¿Baʼaxten jach ku líiʼsik k-óol le bix áantaʼabik Bezaleeloʼ?
6 Ken k-xok le bix áantaʼabik Bezaleel, u yéet kʼiinil Moiseseʼ, k-ilik uláakʼ bix u yáantaj le kiliʼich muukʼoʼ (xokaʼak Éxodo 35:30-35). Tiʼ letiʼeʼ aʼalaʼab ka u beet tuláakal le nuʼukuloʼob meyajnaj teʼ tabernaculooʼ. ¿U yojel wa kaʼach u beet nukuch meyajoʼob beyoʼ? Maʼ xaaneʼ u yojel. Baʼaleʼ maʼ xaaneʼ u meyaj kaʼacheʼ u beetik ladrilloʼob tiʼ le egipcioʼoboʼ (Éxo. 1:13, 14). Le oʼolaleʼ, ¿bix úuchik u páajtal u beetik junpʼéel nojoch meyaj beyoʼ? Tumen chuʼup «yéetel u [kiliʼich muukʼ Dios] bey [xan] yéetel ojéelalil, naʼatil, kʼaj óolalil yéetel u páajtalil u beetik túumben baʼaloʼob, [...] yéetel jeʼel baʼalak uláakʼ jatsʼuts meyajileʼ». Kex jeʼel baʼaxak meyajil u yojel u beet kaʼacheʼ, áantaʼab tumen Dios yéetel u kiliʼich muukʼ, jeʼex úuchik u beetik yéetel Aholiab [wa Oholiab]. Le kaʼatúul máakoʼobaʼ tu jach kanaj u beetoʼob le meyajoʼ, tsʼoʼoleʼ tu kaʼansoʼob xan uláakʼ máakoʼob, tumen Jéeobaeʼ tu tsʼáaj «páajtalil [tiʼob] utiaʼal u kaʼansaj[oʼob]».
7 ¿Baʼax uláakʼ eʼesik nuʼuktaʼab Bezaleel yéetel Aholiab tumen u kiliʼich muukʼ Dios? Tumen jach maʼalob úuchik u beetkoʼob le nuʼukuloʼoboʼ, tumen tak tsʼoʼok u máan quinientos jaʼaboʼobeʼ láayliʼ u meyajoʼobeʼ (2 Cró. 1:2-6). Tsʼoʼoleʼ letiʼobeʼ maʼ tu tsʼíibtaj u kʼaabaʼob tiʼ le meyaj tu beetoʼob, jeʼex u beetik le máakoʼob bejlaʼaʼ, tumen baʼax u kʼáatoʼobeʼ ka tsʼaʼabak u nojbeʼenil tiʼ Jéeoba (Éxo. 36:1, 2).
8 Bejlaʼa xaneʼ láayliʼ yaan sukuʼunoʼob ku beetkoʼob nukuch meyajoʼob jeʼex u beetaʼal nukuch najoʼob, u beetaʼal le jóoʼsaʼaniloʼoboʼ, u nuʼuktikoʼob asambleaʼob, u tsʼaʼabal áantaj ken úuchuk junpʼéel nojoch loob yéetel u tsoʼolol tiʼ le doctoroʼob baʼaxten maʼatech k-kʼamik ka tsʼaʼabaktoʼon kʼiʼikʼoʼ. Yaan kʼiineʼ u yojel u beetoʼob le meyajoʼobaʼ, baʼaleʼ yaan kʼiineʼ maʼ u yojloʼob kaʼachiʼ. Kex beyoʼ yéetel u yáantaj le kiliʼich muukʼoʼ jach maʼalob u jóokʼol le meyaj ku beetkoʼoboʼ. ¿Kux túun toʼon? ¿Maʼatech k-kʼamik wa baʼax meyajil ichil u kaajal Dios, tumen k-tuklik yaan máaxoʼob maas u yojel u beetoʼob? Wa beyoʼ, kʼaʼajaktoʼoneʼ u kiliʼich muukʼ Jéeobaeʼ jeʼel u yáantkoʼon utiaʼal k-beetik maʼalob jeʼel baʼaxak meyajil ichil u kaajaleʼ.
U kiliʼich muukʼ Dioseʼ tu yáantaj Josué
9. ¿Baʼax tu aktáantaj le israelitaʼob le maʼ úuch jóokʼkoʼob tu kaajil Egiptooʼ, yéetel baʼax maʼ u yojloʼob kaʼachiʼ?
9 Beoraaʼ koʼox ilik bix áantaʼabik tumen u kiliʼich muukʼ Dios juntúul u yéet kʼiinil Moisés bey xan Bezaleel. Le maʼ úuch jóokʼok le israelitaʼob tu kaajil Egiptooʼ, jóokʼ baʼateʼel u kaajil Amalek tu contraʼob. Kex mix juntéen baʼatelnakoʼobeʼ, kʼaʼabéetchaj u baʼateloʼob utiaʼal maʼ u xuʼulsaʼal tiʼ u kaajaloʼob (Éxo. 13:17; 17:8). Baʼaleʼ maʼ u yojloʼob kaʼach máax kun nuʼuktik le máaxoʼob kun binoʼob baʼateloʼ.
10. ¿Baʼaxten páajchaj u ganar Josué yéetel u soldadoʼob?
10 Le máax yéeyaʼaboʼ Josué. Baʼaleʼ wa utiaʼal u tsʼaʼabal u beet le meyaj kʼaʼabéet kaʼach u yaʼalik baʼax meyajiloʼob u yojel u beeteʼ, ¿baʼax jeʼel u yaʼalik kaʼacheʼ? ¿U yojel meyaj kaʼach bey palitsileʼ? ¿U yojel u xaʼakʼt luukʼ yéetel suʼuk? ¿U molik maná? Elisamá, u abueloeʼ, jeʼel kaʼach u beetkeʼ, tumen letiʼ kaʼacheʼ u nojchil u chʼiʼibal Efraín yéetel letiʼ nuʼukt 108,100 soldadoʼob (Núm. 2:18, 24; 1 Cró. 7:26, 27). Baʼaleʼ maʼ letiʼ yéeyaʼab tumen Diosiʼ mix yéeyaʼab Nun, u hijoiʼ. Baʼaxeʼ tu yaʼalaj tiʼ Moisés ka u yéey Josué utiaʼal u nuʼuktik le máaxoʼob kun baʼateʼel yéetel le máaxoʼob pʼekmiloʼoboʼ. Le baʼateloʼ óoliʼ bul kʼiin xáanchaji. Tumen Josué tu beetaj le baʼax aʼalaʼabtiʼ yéetel tu chaʼaj u nuʼuktaʼal tumen u kiliʼich muukʼ Dioseʼ, u kaajil Israeleʼ tu ganartaj le baʼateloʼ (Éxo. 17:9-13).
11. Jeʼex Josueeʼ, ¿baʼax unaj k-beetik utiaʼal k-tsʼoʼoksik le meyaj ku tsʼaʼabaltoʼon ichil u kaajal Diosoʼ?
11 Josueeʼ «tu kʼamaj naʼatil», le oʼolal tsʼaʼab u nuʼukt u kaajil Israel ka tsʼoʼok u kíimil Moisés (Deu. 34:9). Le kiliʼich muukʼoʼ maʼ tu tsʼáaj u páajtalil tiʼ utiaʼal u beetik u profetail yéetel u beetik milagroʼob, jeʼex tu beetil Moiseseʼ, baʼaleʼ tu yáantaj utiaʼal u nuʼuktik u kaajil Israel utiaʼal u chʼaʼikoʼob u luʼumil Canaán. Le baʼax tu beetaj Josueoʼ ku yáantkoʼon wa k-uʼuyik bey maʼ tu páajtal k-beetik wa baʼax meyajil ku tsʼaʼabaltoʼon ichil u kaajal Jéeobaeʼ. Jeʼex Josueeʼ, Jéeobaeʼ ku yaʼalik jeʼel u bintoʼon utsil wa k-beetik tuláakal le baʼaxoʼob ku yaʼalikoʼ (Jos. 1:7-9).
«U pixan Yuumtsileʼ ook tiʼ Gedeón»
12-14. 1) ¿Baʼax ku kaʼansiktoʼon le úuchik u ganartaʼal le madianitaʼob tumen le 300 israelitaʼoboʼ? 2) ¿Bix muʼukʼaʼankúuntaʼabik u fe Gedeón? 3) ¿Bix u yáantkoʼon Jéeoba teʼ kʼiinoʼobaʼ?
12 Ka tsʼoʼok u kíimil Josueeʼ, Jéeobaeʼ maʼ xuʼul u meyajtiʼ u kiliʼich muukʼ utiaʼal u yáantik le máaxoʼob meyajtikoʼ. U libroil Jueceseʼ ku tsikbaltik baʼax tu beetaj yaʼab tiʼ le máaxoʼob «minaʼan u muukʼoʼob» kaʼachoʼ, baʼaleʼ «tsʼaʼab u muukʼoʼob» (Heb. 11:34). Juntúul tiʼ letiʼobeʼ Gedeón. Dioseʼ tu tsʼáaj u kiliʼich muukʼ tiʼ utiaʼal u yáantik u kaajil Israel baʼateʼel (Jue. 6:34). U soldadoiloʼob Madián, le kaaj ku baʼateʼel tu contraʼoboʼ, kantéen maas yaʼabiloʼob tiʼ u soldadoʼob Gedeón. Kex beyoʼ Jéeobaeʼ tu yaʼaleʼ jach yaʼaboʼob, le oʼolal kaʼatéen tu yaʼalajtiʼ ka u pʼíitkúuntoʼob. Ka tsʼoʼokeʼ pʼáat chéen juntúul israelita tiʼ cada 450 madianitaʼob (Jue. 7:2-8; 8:10). ¿Baʼaxten kex jach junpʼíitoʼobeʼ, aʼalaʼabtiʼob tumen Jéeoba ka xiʼikoʼob baʼateʼel tu contra le enemigoʼob, kex maas yaʼaboʼoboʼ? Tumen maʼ u kʼáat ka u tukult le israelitaʼob chéen tumen yaʼaboʼob páajchaj u ganartikoʼob le baʼateloʼ wa chéen tumen jach yaan u naʼatoʼob.
13 Máans ta tuukuleʼ tiaʼanech ichil u soldadoʼob Gedeón le jach taʼaytak u káajal le baʼateloʼ. ¿Maʼ saajkech wa tumen a wojel mix juntúul tiʼ le soldadoʼob saajkoʼob yéetel ku tuklikoʼob maʼ kun ganaroʼob pʼaatloʼoboʼ? ¿Wa ku joʼopʼol a sajaktal tumen maʼ a wojel baʼax kun úuchuliʼ? Baʼaleʼ toʼoneʼ k-ojel bix tu yuʼubiluba Gedeón. Letiʼeʼ maʼ sajakchaj u beet tuláakal baʼax aʼalaʼabtiʼ tumen Diosiʼ (xokaʼak Jueces 7:9-14). Tu kʼáataj ka eʼesaʼak tiʼ tumen Dios táan u yáantaʼal (Jue. 6:36-40). Baʼaleʼ Jéeobaeʼ maʼ kʼuuxilnaj úuchik u beetkiʼ. Baʼaxeʼ tu beetaj u maas muʼukʼaʼantal u fe.
14 Jéeobaeʼ minaʼan u xuul u páajtalil. Kex jach talam le baʼax ku muʼyajtik le máaxoʼob meyajtikoʼ, jeʼel u páajtal u tsʼáaik wa máax utiaʼal áantkoʼob, kex bey minaʼan u páajtalil u beetkeʼ. Maʼ xaaneʼ, yaan kʼiineʼ jach yaʼab máaxoʼob pʼekmiloʼon, wa jach yaʼab talamiloʼob k-muʼyajtik. ¿Baʼax unaj k-beetik teʼ súutukiloʼob beyoʼ? Kex maʼ tu tsʼaʼabal k-il junpʼéel milagro jeʼex Gedeoneʼ, Jéeobaeʼ ku yáantkoʼon yéetel le Bibliaoʼ bey xan yéetel u kaajal ku nuʼuktik yéetel u kiliʼich muukʼoʼ (Rom. 8:31, 32). Le baʼaxoʼob ku yaʼalik u beetkoʼ ku yáantkoʼon ka maas yanaktoʼon fe yéetel ka k-kʼub k-óol jach yaan u yáantkoʼon mantatsʼ.
«U [kiliʼich muukʼ] Yuumtsileʼ taal yóokʼol Jefté»
15, 16. ¿Baʼax áant u hija Jefté u tsʼáa u yóol u meyajt Dios, yéetel baʼax ku kaʼansik tiʼ le taatatsiloʼob teʼ kʼiinoʼobaʼ?
15 Tuukulnakoʼon tiʼ uláakʼ juntúul máak. Ka máan kʼiineʼ, u kaajil Israeleʼ baʼatelnaj tu contra le amonitaʼoboʼ, teʼ kʼiinoʼob jeʼeloʼ «u [kiliʼich muukʼ] Yuumtsileʼ taal yóokʼol Jefté». Tumen jach u kʼáat u ganart le baʼateʼel utiaʼal u nojbeʼenkúuntik Diosoʼ, tu yaʼalaj jeʼel u tsʼáaik junpʼéel nojoch siibal tiʼeʼ. Tu yaʼalaj tiʼ Jéeobaeʼ wa ku yáantaʼal u ganart le baʼateloʼ yaan u kʼubiktiʼ le yáax máax kun jóokʼol kʼamik ken suunakoʼ. Ka suunaj tsʼoʼok u ganartik le amonitaʼoboʼ, u hija jóokʼ kʼamik (Jue. 11:29-31, 34). ¿Jaʼakʼ wa u yóol ka tu yilaj? Maʼ xaaneʼ maʼatech, tumen minaʼan uláakʼ u paalal. Kex beyoʼ tu beetaj le baʼax tu yaʼaloʼ ka tu bisaj tu kaajil Siló utiaʼal u meyajtik Jéeoba teʼ tabernaculooʼ. Tumen chúukaʼan u yóol u meyajt Jéeobaeʼ, u yojel u taataeʼ unaj u beetik le baʼax u yaʼalmoʼ (xokaʼak Jueces 11:36). Yéetel u yáantaj le kiliʼich muukʼoʼ, tu kaʼatúulal páajchaj u beetkoʼob.
16 ¿Bix úuchik u jach yantal u fe yéetel u kanik u tsʼáa táanil u meyajtik Dios u hija Jefté? Maʼ xaaneʼ tumen tu yilaj bix u tsʼáaik u yóol u meyajt Dios u taata. Taatatsileʼex, ¿baʼax ka kankeʼex tiʼ lelaʼ? U kʼaʼabéetil u yeʼesaʼal tiʼ le paalaloʼob baʼax unaj u beetkoʼoboʼ. A paalaleʼexeʼ unaj u yilkoʼob jach ka creertikeʼex le baʼaxoʼob ka kaʼanskeʼex tiʼoboʼ. Jach unaj u yilkoʼobeʼ a yaabiltmeʼex Jéeoba tu jaajil a wóoleʼex, maʼ chéen tiʼ le bix a payalchiʼexoʼ yéetel le bix a kaʼansajeʼexoʼ, baʼaxeʼ tak yéetel le baʼaxoʼob ka beetkeʼexoʼ. Ken u yiloʼob baʼax ka beetkeʼexeʼ, maʼ xaaneʼ yaan u taaktal u kʼubikubaʼob u maas meyajtoʼob Jéeoba. ¿Máasaʼ lelaʼ jach ku beetik u kiʼimaktal u yóol máak?
«U [kiliʼich muukʼ] Yuumtsileʼ ook tiʼ Sansón»
17. ¿Baʼax tu beetaj Sansón yéetel u yáantaj le kiliʼich muukʼoʼ?
17 Beoraaʼ koʼoneʼex ilik bix úuchik u yáantaʼal Sansón tumen u kiliʼich muukʼ Dios. Teʼ kʼiinoʼob jeʼeloʼ le israelitaʼoboʼ palitsiltaʼaboʼob tumen le filisteoʼoboʼ. Le Bibliaoʼ ku yaʼalikeʼ «joʼopʼ u chíikpajal tu kuxtal, u [kiliʼich muukʼ] Yuumtsil» utiaʼal u jáalkʼabtikoʼob (Jue. 13:24, 25). Tu beetaj u jach yantal u muukʼ Sansón utiaʼal u beetik nukuch baʼaloʼob. Juntéenjeakileʼ le filisteoʼoboʼ tu yaʼaloʼob tiʼ u jaats israelitaʼob ka u machoʼob. «Baʼaleʼ u [kiliʼich muukʼ] Yuumtsileʼ ook tiʼ Sansón, ka tu tʼokaj le suumoʼob kʼaxaʼanil u kʼaboʼob, bey [...] beetaʼanoʼob yéetel tóokbil kʼuucheʼ.» (Jue. 15:14.) Tumen maʼ tu yeʼesaj naʼatileʼ, pʼáat minaʼan u muukʼ, baʼaleʼ tumen tu yeʼesaj u fe tiʼ Jéeobaeʼ, tsʼaʼab u muukʼ tu kaʼatéen (Heb. 11:32-34; Jue. 16:18-21, 28-30). U jaajileʼ jach nojoch bix áantaʼabik tumen le kiliʼich muukʼoʼ, tumen jach nuuktak le talamiloʼob tu aktáantoʼ. Kex beyoʼ le baʼaxoʼob tu beetoʼ jeʼel u yáantkoʼoneʼ.
18, 19. 1) ¿Bix u yáantkoʼon le baʼax tu beetaj Sansonoʼ? 2) ¿Baʼax utsiloʼob tsʼoʼok a jóoʼsik úuchik a wilik bix áantaʼabik le máaxoʼob meyajt Dios ku chʼaʼchiʼitaʼaloʼob teʼ xookaʼ?
18 Jeʼex Sansoneʼ, toʼoneʼ jeʼel k-áantaʼal xan tumen le kiliʼich muukʼoʼ. Le oʼolal jeʼel u páajtal k-beetik le baʼax tu yaʼalaj Jesusoʼ, letiʼeʼ «tu yaʼalaj toʼon ka tseʼeknakoʼon [wa kʼaʼaytajnakoʼon] tiʼ le máakoʼoboʼ» (Hch. 10:42). Ichil le baʼax tu yaʼalaj ka beetaʼakaʼ, táakaʼan jejeláas meyajoʼobiʼ, yéetel yaʼab tiʼ toʼoneʼ maʼ sijnáaloʼon yéetel u páajtalil k-beetkoʼobiʼ. Le oʼolal jach maʼalob k-ilik u yáantkoʼon le kiliʼich muukʼoʼ. K-uʼuyikba jeʼex profeta Isaíaseʼ, letiʼeʼ tu yaʼalaj: «Jéeoba, le Nojoch Jalaʼachoʼ, tsʼoʼok u túuxtiken, yéetel u kiliʼich muukʼ» (Isa. 48:16, NM). Jeʼex túun k-ilkoʼ, u kiliʼich muukʼ Dios túuxtikoʼon. Le oʼolaleʼ unaj k-tsʼáaik k-óol k-meyajte, tumen k-ojel Jéeobaeʼ yaan u yáantkoʼon jeʼex úuchik u beetik yéetel Moisés, Bezaleel yéetel Josueeʼ. Yaan k-machik tubeel «u kiliʼich tʼaan Jajal Dios bey jeʼel bix le máaskab ku tsʼáaik[toʼon] le kiliʼich [muukʼoʼ]», tumen k-ojel yaan u tsʼáaiktoʼon muukʼ jeʼex tiʼ Gedeón, Jefté yéetel Sansoneʼ (Efe. 6:17, 18). ¿Kux túun wa k-aktáantik talamiloʼob? Unaj k-natsʼikba yiknal Jéeoba, beyoʼ yaan u yantal k-muukʼ utiaʼal k-aktáantik, jeʼex tu beetil Sansoneʼ.
19 Toʼoneʼ jach k-ojel Jéeobaeʼ yaan u yáantik le máaxoʼob ku tsʼáaikubaʼob tu tséel le u jaajil religionoʼ. Wa k-chaʼik u nuʼuktikoʼon u kiliʼich muukʼeʼ yaan u maas muʼukʼaʼantal k-fe sáamsamal. Teʼ tuláakʼ xookoʼ yaan k-tʼaan tiʼ baʼax tu beetaj jujuntúul tiʼ le máaxoʼob ku chʼaʼchiʼitaʼaloʼob ichil le Kiliʼich Tsʼíiboʼob ich Griegooʼ. Jach yaan u líiʼsik k-óol k-ilik bix úuchik u yáantaʼal le yáax cristianoʼob tumen u kiliʼich muukʼ Dios táanil tiʼ le Pentecostés tiʼ le yáax siglooʼ bey xan le ka tsʼoʼokoʼ.
¿Baʼax tsʼoʼok a kanik yoʼolal bix áantaʼabik le máakoʼob tumen le kiliʼich muukʼoʼ?
• Moisés
• Bezaleel
• Josué
• Gedeón
• Jefté
• Sansón
[U kʼáatchiʼiloʼob le xookoʼ]
[Uláakʼ baʼax ku tsoʼolol teʼ táan juʼun 22]
Le kiliʼich muukʼoʼ jeʼel u tsʼáaiktoʼon muukʼ jeʼex úuchik u yáantik Sansoneʼ
[Foto yaan teʼ táan juʼun 21]
Le paalaloʼoboʼ ku tsʼáaik u yóol u meyajtoʼob Dios jeʼex u beetik u taataʼobeʼ
