Bix jeʼel u maas jóoʼsik máak utsil tiʼ le xookoʼ

¿Máasaʼ k-kʼáat ka maas jatsʼutschajak k-ilik yéetel ka k-maas jóoʼs utsil tiʼ u xookil le Bibliaoʼ? Yaan óoxpʼéel baʼax jach jeʼel u yáantkoʼoneʼ.

1 PAYALCHIʼ. Yáaxeʼ unaj k-kʼáatik u yáantaj Dios (Sal. 42:8). K-xakʼalxoktik le Bibliaoʼ táakaʼan ichil le adoración k-tsʼáaik tiʼ Diosoʼ. Le oʼolal unaj k-kʼáatik ka u tsʼáatoʼon u kiliʼich muukʼ bey xan junpʼéel maʼalob tuukul (Luc. 11:13). Barbara, juntúul kiik tsʼoʼok u xáantal joʼopʼok u beetik u misioneraileʼ, ku yaʼalik: «Teneʼ suuk in beetik in payalchiʼ táanil tiʼ in xakʼalxoktik le Bibliaoʼ. Beyoʼ kin wuʼuyikeʼ Jéeobaeʼ ku yáantken yéetel ku kʼamik baʼax kin beetik». Le payalchiʼoʼ ku jeʼekʼabtik k-tuukul yéetel k-puksiʼikʼal utiaʼal k-kʼamik le baʼax ku kaʼansik le Bibliaoʼ.

2 U MÁANSIK TU TUUKUL MÁAK. Tumen jach yaʼab baʼaxoʼob ku beetik máakeʼ, yaneʼ chéen jáajan xokbil u beetik le Bibliaoʼ, le oʼolal maʼatech u jach naʼatik baʼax ku yaʼalik. Carlos, tsʼoʼok maas tiʼ cincuenta jaʼaboʼob joʼopʼok u meyajtik Jéeobaeʼ ku yaʼalikeʼ jach ku jóoʼsik máak utsil u tsʼáaik u tiempoil utiaʼal u tuukul tiʼ le baʼax ku xokikoʼ, letiʼeʼ ku yaʼalik: «Bejlaʼeʼ chéen kaʼapʼéel táan juʼun tiʼ le Biblia kin xokik sáamsamaloʼ. Beyoʼ ku páajtal in naʼatik le baʼax kin xokikoʼ yéetel in kanik yaʼab baʼaloʼobiʼ» (Sal. 77:12). Bey túunoʼ, wa k-jóoʼsik u tiempoil utiaʼal k-tuukul tiʼ le baʼaxoʼob k-xokikoʼ yaan k-kʼaj óoltik yéetel yaan k-naʼatik baʼax uts tu tʼaan Dios (Col. 1:9-11).

3 U BEETIK MÁAK. Ken k-il u yutsil k-beetik wa baʼaxeʼ, k-ilik k-maas beetik, lelaʼ bey xan u yúuchul yéetel u xookil le Bibliaoʼ. Lelaʼ bey u yeʼesik le baʼax ku yaʼalik Gabriel, juntúul táankelem sukuʼun: «In xokik le Bibliaoʼ ku yáantken in aktáant le talamiloʼoboʼ yéetel in wáantik u maasil. Baʼaleʼ kin wilik in tsʼáaik ichil in kuxtal le baʼax kin kanikoʼ» (Deu. 11:18; Jos. 1:8). U jaajileʼ yaʼab baʼax jeʼel u páajtal k-kanik tiʼ Dios unaj k-tsʼáaik ichil k-kuxtaleʼ (Pro. 2:1-5).

KʼAʼAJSAJ. ¿Máasaʼ jach jatsʼuts le páajtalil tsʼaʼantoʼon k-maas naʼatik baʼax ku yaʼalik Dios, u Yuumil le naʼatiloʼ? (Rom. 11:33.) ¿Baʼax jeʼel u yáantkoʼon k-maas jóoʼs u yutsil u xookil le Bibliaoʼ? Yáaxeʼ, unaj k-payalchiʼ utiaʼal ka tsʼaʼabaktoʼon kiliʼich muukʼ yéetel junpʼéel maʼalob tuukul tumen Jéeoba; tsʼoʼoleʼ unaj k-jóoʼsik u tiempoil utiaʼal k-máansik t-tuukul le baʼax tsʼoʼok k-xokikoʼ, tu tsʼookeʼ unaj k-ilik k-beetik le baʼax k-kanikoʼ. Le baʼaxoʼob tsʼoʼok k-ilkaʼ, jach jeʼel u yáantkoʼon k-jóoʼs u yutsil le xookoʼ.