Le baʼaxoʼob k-kanik tiʼ le u jaajiloʼ
Le baʼaxoʼob k-kanik tiʼ le u jaajiloʼ
«Tiʼ le aʼalmajtʼaanoʼ yaantech u nuuktakil le kʼaj óolaliloʼ yéetel le jaajiloʼ.» (ROM. 2:20)
KOʼONEʼEX KAXTIK U NÚUKIL LE KʼÁATCHIʼOBAʼ:
¿Baʼaxoʼob tu chíikbesaj le siibaloʼob ku yaʼalik u Ley Moisés unaj u kʼuʼubuloʼ?
¿Tiʼ baʼax chíikaʼan le siibaloʼob tu tsʼáaj le israelitaʼob tiʼ le k-tsʼáaik teʼ kʼiinoʼobaʼ?
¿Baʼax beetik u kʼamik wa maʼ u kʼamik Jéeoba junpʼéel siibal?
1. ¿Baʼaxten unaj k-ilik naʼatik le Ley tsʼaʼab tiʼ Moisesoʼ?
YOʼOLAL le libroʼob tu tsʼíibtaj apóstol Pablooʼ, k-naʼatik yaʼab tiʼ le baʼaxoʼob ku yaʼalik u Ley Moisesoʼ, wa maʼ tu yoʼolaloʼobeʼ talam jeʼel k-naʼatkoʼobeʼ. Junpʼéel tiʼ letiʼobeʼ u cartail Hebreob. Teʼeloʼ Pabloeʼ ku yaʼalikeʼ Jesuseʼ tsʼoʼok u tsʼaʼabal u beet «u nojoch j-kʼiinil chúukaʼan u yóol bey xan chuup yéetel chʼaʼ óotsilil», yéetel ku tsolik bix páajchajik «u luʼsik u kʼeban máakoʼob» utiaʼal u tsʼáaik «le toksajil minaʼan u xuul» tiʼ le máaxoʼob ku tsʼáaik u fejoʼob tiʼ letiʼoʼ (Heb. 2:17; 9:11, 12). Tu yaʼalaj xaneʼ le tabernaculooʼ «u yoochel le baʼax yaan teʼ kaʼanoʼ» yéetel Cristoeʼ ku béeykuntik «junpʼéel núuptʼaan maas maʼalob» tiʼ le tu béeykuntaj Moisesoʼ (Heb. 7:22; 8:1-5). Tu kʼiiniloʼob Pabloeʼ, le baʼaxoʼob ku tsoʼolol yoʼolal le Leyoʼ jach ku yáantik le cristianoʼoboʼ. Yéetel teʼ kʼiinoʼobaʼ láayliʼ ku yáantkoʼon k-maas naʼat le baʼaxoʼob tsʼoʼok u beetik Dios utiaʼal u yáantkoʼonoʼ.
2. ¿Baʼax u yojel le cristianoʼob judíoʼoboʼ?
2 Teʼ carta tu tsʼíibtaj Pablo tiʼ le romailoʼoboʼ, yaan baʼax tu yaʼalaj tiʼ le judíoʼob yaan teʼ múuchʼulil u yojloʼob baʼax ku kaʼansik u Ley Moisesoʼ. Letiʼeʼ tu yaʼaleʼ u yojloʼob le baʼax ku yaʼalik le Leyoʼ, le oʼolal yaantiʼob «u nuuktakil le kʼaj óolaliloʼ yéetel le jaajil» yoʼolal Dios yéetel le baʼax ku yaʼalik unaj u beetaʼaloʼ. Le cristianoʼob judíoʼoboʼ ku naʼatkoʼob yéetel ku yeʼeskoʼob tsiikil tiʼ u jaajiloʼ. Le oʼolal jeʼex le israelitaʼob chúukpaj u yóoloʼob u meyajtoʼob Dios úuchjeakiloʼ, jeʼel u páajtal u nuʼuktikoʼob, u kaʼanskoʼob, yéetel u yáantkoʼob le máakoʼob kajaʼanoʼob tiʼ uláakʼ kaajoʼob, maʼ u yojloʼob le baʼax ku yaʼalik le Ley tsʼaʼab tiʼ Israel tumen Jéeobaoʼ (xokaʼak Romailoʼob 2:17-20).
U YOOCHEL LE U KUXTAL JESÚS TU KʼUBOʼ
3. ¿Baʼaxten maʼalob ka k-naʼat le siibaloʼob ku tsʼáaik kaʼach le judíoʼoboʼ?
3 Le baʼax ku kaʼansik u jaajil tu yaʼalaj Pablooʼ láayliʼ jach kʼaʼabéet utiaʼal u naʼataʼal le baʼax u tukultmaj u beetik Diosoʼ. Bey túunoʼ le baʼax ku kaʼansik le Ley tsʼaʼab tiʼ u kaajil Israeloʼ maʼ kʼexpajakiʼ yéetel láayliʼ maʼalob baʼax ku yaʼalikeʼ. Utiaʼal k-ilik lelaʼ, koʼoneʼex tʼaan tiʼ junpʼéel baʼax ku yaʼalik le Ley yaan yil yéetel le siibaloʼob ku tsʼaʼabal úuchjeakiloʼ. Yaan k-ilik bix úuchik u yáantik le judíoʼob kabal u yóoloʼob utiaʼal u kʼamkoʼob Cristooʼ yéetel utiaʼal u naʼatkoʼob baʼax u kʼáat Jéeoba ka u beetoʼob. Tsʼoʼoleʼ yaan k-ilik bix jeʼel u yáantkoʼon utiaʼal k-ilik bix le meyaj k-tsʼáaik tiʼ Diosoʼ, tumen le baʼaxoʼob ku kʼáatik Jéeoba tiʼ le máaxoʼob meyajtikoʼ maʼatech u kʼexpajal (Mal. 3:6).
4, 5. 1) ¿Baʼax tu kʼaʼajsaj u Ley Moisés tiʼ le máaxoʼob meyajt Jéeoba úuchjeakiloʼ? 2) ¿Baʼax tu chíikbesaj le siibaloʼob ku yaʼalik u Ley Dios unaj u kʼuʼubul kaʼachoʼ?
4 Le Leyoʼ ku kʼaʼajsik kaʼach tiʼ le judíoʼoboʼ kʼebanoʼob. Lelaʼ bey u yeʼesik le baʼax unaj u beetkoʼob wa ku machkoʼob juntúul kimenoʼ. Tu yóoxpʼéel yéetel tu siete kʼiinil u mach le kimenoʼ, unaj u wiʼitsʼil tiʼ «u jaʼil utskíinajil», ichil le jaʼoʼ tsʼaʼan u taʼanil juntúul x-chak wakax toj u yóol (Núm. 19:1-13). Uláakʼ baʼax ku yaʼalik le Leyoʼ letiʼe u pʼáatal maʼ limpioil le maamatsiloʼob ku yantal u mejen paalaloʼoboʼ yéetel le u kʼubkoʼob u siibalil u perdonartaʼal u kʼebanoʼoboʼ. Beyoʼ ku kʼaʼajsaʼal tiʼ máakeʼ ken yanak u paalaleʼ ku máansik le kʼeban yéetel le kíimil tiʼoboʼ (Lev. 12:1-8).
5 Sáamsamal xaneʼ le máaxoʼob meyajtik Jéeobaoʼ ku kʼaʼabéettal u kʼubkoʼob uláakʼ siibaloʼob utiaʼal u perdonartaʼaloʼob. Kex u yojloʼob wa maʼeʼ, le siibaloʼob tu kʼuboʼob, tak le kʼubaʼaboʼob teʼ templooʼ, chéen u «yoochel» le u kuxtal Jesús tu kʼuboʼ (Heb. 10:1-10).
LE TUUKUL UNAJ U YANTALTIʼOB KEN U KʼUB U SIIBALOʼOBOʼ
6, 7. 1) ¿Baʼax maʼ unaj u tuʼubsik le israelitaʼob ken u kʼuboʼob kaʼach u siibaloʼoboʼ, yéetel baʼax tu chíikbesaj? 2) ¿Baʼax kʼáatchiʼiloʼob unaj k-beetik?
6 Ken kʼuʼubuk juntúul baʼalcheʼ tiʼ Jéeoba tumen le israelitaʼoboʼ kʼaʼabéet tʼaʼaj: maʼ móochiʼ, maʼ chʼóopiʼ, maʼ uchaʼan loob tiʼiʼ yéetel maʼ kʼojaʼaniʼ (Lev. 22:20-22). Ken u kʼuboʼob xan u yich cheʼ wa uláakʼ neekʼoʼobeʼ, unaj u kʼubkoʼob «le yáax ich» ku tsʼáaik le paakʼaloʼoboʼ yéetel «u jach maʼalobil» (Núm. 18:12, 29). Letiʼeʼ maʼ ken u kʼam wa maʼ jach maʼalobiʼ. ¿Baʼax tu chíikbesaj le úuchik u kʼáatik ka kʼuʼubuk siibaloʼob tiʼ tʼaʼajtakoʼ? Tu chíikbesaj u kuxtal Jesús tu kʼubaj utiaʼal u perdonartaʼal u kʼeban tuláakal máak, yéetel lelaʼ Jéeobaeʼ tu tsʼáaj le baʼax maas maʼalob yéetel u maas yaabiltmoʼ (1 Ped. 1:18, 19).
7 Juntúul máax meyajtik Jéeoba u kʼáat u tsʼáa u nib óolalil tiʼ yoʼolal u yutsileʼ, ku yéeyik u maas maʼalobil utiaʼal u kʼub tiʼ. Baʼaleʼ cada juntúul kun chʼaʼtuklik wa yaan u kʼubik junpʼéel siibal maʼalob wa maʼ. Baʼaleʼ maʼ unaj u tuʼubul tiʼ máakeʼ wa ku kʼubik junpʼéel siibal maʼ jach maʼalobeʼ ku tsʼáaik naʼatbil bey maʼ jach kʼaʼabéet u kʼubik le siibaloʼ wa ku yilik bey junpʼéel kuucheʼ, baʼaleʼ le siibal beyoʼ maʼatech u kʼamik Dios (xokaʼak Malaquías 1:6-8, 13). Le oʼolal maʼalob ka k-tukle: «¿Yéetel baʼax tuukulil kin meyajtik Jéeoba? ¿Unaj wa in maas maʼalobkíintik le bix in adorartik yéetel le baʼax oʼolal kin beetkoʼ?».
8, 9. ¿Bix u yáantkoʼon le k-tuukul tiʼ le baʼax péeksik le israelitaʼob u kʼub u siibaloʼob kaʼachoʼ?
8 Yaan kʼiin xaneʼ le israelitaʼoboʼ tu juunaloʼob tu chʼaʼtuklaj u kʼubkoʼob u siibaloʼob. ¿Baʼaxten? Maʼ xaaneʼ tumen taak u tsʼáaikoʼob nib óolal tiʼ Jéeoba, wa jeʼex u beetkoʼob yéetel le tóokbil siibaloʼoboʼ, u kʼáatoʼob lúubul utsil tiʼ letiʼ. Jeʼel máakalmáak tiʼ le siibaloʼob tu beetoʼobaʼ, maʼ talam úuchik u yilkoʼob baʼax baʼalcheʼil ken u yéeyoʼob utiaʼal u kʼuboʼobiʼ. Yéetel kiʼimak óolal tu tsʼáajoʼob u maas maʼalobil. Bejlaʼeʼ maʼatech k-kʼubik siibaloʼob jeʼex u yaʼalik u Ley Moisesoʼ. Baʼaleʼ láayliʼ k-kʼubik siibaloʼobeʼ, tumen k-jóoʼsik tiempo, k-tsʼáaik muukʼ yéetel uláakʼ baʼaxoʼob yaantoʼon utiaʼal k-meyajtik. Apóstol Pabloeʼ tu yaʼaleʼ le siibaloʼob uts tu tʼaan Diosoʼ letiʼe «[k-]kiʼikiʼtʼantik u kʼaabaʼ yéetel k-chiʼ», «[k-]beetkeʼex uts» yéetel «[k-]paklan áantikbaʼex» (Heb. 13:15, 16). Le tuukul yaantoʼon ken k-beet le meyajaʼ ku yeʼesik bix k-ilik tuláakal le baʼax tsʼoʼok u beetik t-oʼolaloʼ yéetel tuláakal le baʼax tsʼoʼok u tsʼáaiktoʼonoʼ. Jeʼex túun k-ilkoʼ, unaj u yantaltoʼon junpʼéel maʼalob tuukul ken k-meyajt Dios, jeʼex beetaʼabik tumen le israelitaʼob úuchjeakil ka tu kʼubaj u siibaloʼoboʼ.
9 Ken lúubuk tiʼ wa baʼax kʼebanil le israelitaʼob kaʼachoʼ, u Ley Moiseseʼ ku yaʼalikeʼ unaj u kʼubkoʼob siibaloʼob yoʼolal le kʼebanoʼ. Tumen kʼaʼabéet u tsʼáaikoʼob le siibaloʼob beyaʼ, ¿yaan wa u beetkoʼob yéetel kʼuuxilil wa bey maʼ taak u beetkoʼobeʼ? (Lev. 4:27, 28.) Wa u kʼáatoʼob seguer u biskubaʼob yéetel Jéeobaeʼ maʼ ken u beetoʼob beyoʼ.
10. ¿Baʼax unaj k-beetik utiaʼal u seguer k-bisikba maʼalobil yéetel Jéeoba wa yéetel le sukuʼunoʼoboʼ?
10 Teʼ kʼiinoʼobaʼ láayliʼ bey xan u yúuchloʼ. Maʼ xaaneʼ k-tsʼáaik cuenta tsʼoʼok k-beetik u yaatal u yóol juntúul sukuʼun yoʼolal baʼax t-aʼalaj wa baʼax t-beetaj. Wa maʼ xaaneʼ tsʼoʼok k-beetik junpʼéel baʼax maʼ maʼalob táan u chiʼichnakkúuntik k-concienciaiʼ. Wa jatsʼuts k-ilik k-meyajtik Jéeobaeʼ yaan k-beetik tuláakal le ku páajtal utiaʼal k-utskíintik le talamiloʼ. Maʼ xaaneʼ unaj k-kʼáatik ka perdonartaʼak baʼax t-aʼalaj wa baʼax t-beetaj yéetel wa k-lúubul tiʼ junpʼéel nojoch kʼebaneʼ unaj k-kʼáatik u yáantaj le ancianoʼoboʼ (Mat. 5:23, 24; Sant. 5:14, 15). Jeʼex túun k-ilkoʼ kex maʼ chéen chʼaʼabileʼ yaan baʼaxoʼob unaj k-beetik utiaʼal k-utskíintik junpʼéel talamil yéetel juntúul sukuʼun wa utiaʼal u perdonartikoʼon Dios. Baʼaleʼ ken k-beet lelaʼ k-bisikba yéetel Jéeoba, k-bisikba yéetel le sukuʼunoʼ yéetel ku yantaltoʼon junpʼéel maʼalob conciencia. Lelaʼ ku yeʼesiktoʼon xaneʼ le baʼax ku yaʼalik Jéeoba ka k-beetoʼ mantatsʼ utiaʼal k-utsil.
11, 12. 1) ¿Bix u beetaʼal u siibalil le kaʼa bisajbailoʼ? 2) ¿Baʼax k-kanik tiʼ le bix u beetaʼal u siibalil kaʼa bisajbailoʼ?
11 Le Leyoʼ ku yaʼalik xaneʼ le máaxoʼob meyajtik Diosoʼ unaj u beetkoʼob u siibalil kaʼa bisajbail utiaʼal u yeʼeskoʼob u kʼáat ka yanaktiʼob jeetsʼelil yéetel Jéeoba. Letiʼob yéetel u familiaʼobeʼ, u suukileʼ ku jaantkoʼob u bakʼel le baʼalcheʼ teʼ tuʼux ku yúuchul janal teʼ templooʼ. Ku tsʼaʼabal tiʼ le j-kʼiin u jaantoʼ bey xan tiʼ u maasil máaxoʼob ku meyajoʼob tu yéeteloʼ (Lev. 3:1; 7:31-33). Le baʼax ku kaxtaʼal ken kʼuʼubuk le siibaloʼob beyaʼ, u biskuba máak maʼalob yéetel Dios. Bey ka múul janak ich jeetsʼelil le máax kʼubik le siibal, u familia, le j-kʼiinoʼoboʼ yéetel Jéeoba.
12 ¿Yaan wa junpʼéel baʼax maas maʼalob jeʼex u invitartaʼal Jéeoba tiʼ junpʼéel janal yéetel ka u yóot u kʼameʼ? Ku páaʼtaʼaleʼ le máaxoʼob invitartikoʼ yaan u yilik u tsʼáaikoʼob u maas maʼalobil tiʼ. Le siibaloʼob utiaʼal kaʼa bisajbail ku yaʼalik le Ley ka beetaʼakoʼ, ku chíikbesik le u kuxtal Jesús tu kʼuboʼ, lelaʼ ku tsʼáaik u páajtalil tiʼ tuláakal máak u kaʼa biskuba yéetel Dios, le Máax beet tuláakal baʼaloʼ. Teʼ kʼiinoʼobaʼ le máaxoʼob ku tsʼáaikoʼob yéetel kiʼimak óolal tiʼ Dios u muukʼoʼob yéetel uláakʼ baʼaxoʼob yaantiʼobeʼ ku biskubaʼob maʼalob tu yéetel.
SIIBALOʼOB MAʼATECH U KʼAMIK DIOS
13, 14. ¿Baʼaxten maʼ tu kʼamaj Jéeoba le siibal u tukultmaj u kʼubik kaʼach rey Sauloʼ?
13 Jeʼex tsʼoʼok k-ilkoʼ, le Bibliaoʼ ku yaʼalikeʼ Jéeobaeʼ ku kʼamik le siibaloʼob ku yaʼalik le Ley chéen wa ku beetaʼal yéetel junpʼéel maʼalob tuukul jeʼex u kʼáat letiʼoʼ. Le oʼolal ku tʼaan tiʼ le siibaloʼob maʼ kʼaʼam tumen Diosoʼ. Koʼoneʼex ilik kaʼapʼéeliʼ yéetel baʼaxten maʼ kʼaʼamoʼobiʼ.
14 Profeta Samueleʼ tu yaʼalaj tiʼ rey Sauleʼ, tsʼoʼok u kʼuchul u kʼiinil u xuʼulsaʼal le amalekiloʼob tumen Diosoʼ: tu yaʼalajtiʼeʼ unaj u xuʼulsiktiʼob bey xan tiʼ u yaalakʼoʼob. Baʼaleʼ le ka tsʼoʼok u ganartikoʼobeʼ, tu yaʼalaj tiʼ u soldadoʼob maʼ u kíimskoʼob Agag, u reyil Amalec. U maas jatsʼutstakil xan tiʼ u yaalakʼoʼobeʼ maʼ tu kíimsiʼ, tumen joʼopʼ u yaʼalikeʼ utiaʼal u kʼub tiʼ Jéeoba (1 Sam. 15:2, 3, 21). Baʼaleʼ ¿bix úuchik u yilaʼal tumen Dios? Maʼ utschaj tu tʼaan le baʼax tu beetaj Sauloʼ ka tu luʼsaj u beet u reyil (xokaʼak 1 Samuel 15:22, 23). Lelaʼ ku kaʼansiktoʼoneʼ wa maʼ k-beetik baʼax ku yaʼalik Jéeobaeʼ, letiʼeʼ maʼ ken u kʼam le siibaloʼob k-kʼubiktiʼoʼ.
15. ¿Baʼax tu yeʼesaj le baʼaxoʼob kʼaastak tu beetaj le israelitaʼob tu kʼiiniloʼob Isaíasoʼ?
15 U libroil Isaíaseʼ ku yaʼalik junpʼéel baʼax beetaʼab xan beyoʼ. Tu kʼiiniloʼob Isaíaseʼ, yaʼab israelitaʼobeʼ ku kʼubik u siibaloʼob, baʼaleʼ ku beetkoʼob baʼax kʼaas. Yoʼolal le baʼaxoʼob ku beetkoʼob kaʼachoʼ tu yeʼesoʼob maʼ tu jaajil u yóoloʼob ku kʼubkoʼobiʼ, baʼaxeʼ chéen tumen u yojloʼob unaj u beetkoʼob; le oʼolal mix baʼal u biilal úuchik u kʼubkoʼob. Jéeoba túuneʼ tu yaʼalajtiʼob: «¿Baʼax u biilal le sen kíimsbil baʼalcheʼob ka taaskeʼextenoʼ? Tsʼoʼok u náakal in wóol tiʼ le tóokbil tamanoʼob yéetel tiʼ u tsaatsel le mejen wakaxoʼoboʼ; kʼaas u lúubul tiʼ teen u kʼiʼikʼel le wakaxoʼob, le tamanoʼob yéetel le mejen yuukoʼoboʼ. [...] Maʼ a taaskeʼex tiʼ teen tiʼibil óoloʼob minaʼan u tojol; tsʼoʼok u náakal in wóol tiʼ u buutsʼiloʼob». Tsʼoʼoleʼ Dioseʼ tu yaʼalaj baʼax oʼolal: «Kex sen payalchiʼinakeʼexeʼ, maʼ bíin in chʼenxikintiʼ. Ta kʼabileʼex a kíimsmajeʼex wíinikoʼob. ¡Pʼoʼex a kʼaasileʼex! ¡Tseleʼex tin táan a loobileʼex! ¡Pʼateʼex a beetkeʼex baʼaxoʼob kʼaastak!» (Isa. 1:11-16).
16. ¿Baʼax unaj k-beetik utiaʼal u kʼamik Dios le siibaloʼob k-tsʼáaiktiʼoʼ?
16 Jéeobaeʼ maʼatech u kʼamik le siibaloʼob ku kʼubik le máaxoʼob beetik baʼaloʼob kʼaastak maʼatech u arrepentiroʼoboʼ. Baʼaleʼ ku yuʼubik u payalchiʼ yéetel ku kʼamik u siibal le máaxoʼob ku beetkoʼob tu jaajil u yóoloʼob le baʼax ku yaʼalikoʼ. Yoʼolal le u jaajil ku kaʼansik le leyoʼ, tu naʼatoʼob kʼebanoʼob yéetel kʼaʼabéet u perdonartaʼaloʼob tumen Dios (Gal. 3:19). Yaachaj tu yóoloʼob úuchik u beetkoʼob baʼax kʼaas tu táan. Toʼon xaneʼ unaj k-kʼamik kʼaʼabéettoʼon le u kuxtal Cristo tu kʼubaj utiaʼal u perdonartaʼal k-kʼebanoʼoboʼ. Wa k-beetik beyoʼ, Jéeobaeʼ jeʼel u kʼamik yéetel kiʼimak óolal le meyaj k-beetkoʼ (xokaʼak Salmo 51:17, 19).
UNAJ K-TSʼÁAIK K-FE TIʼ U KUXTAL JESÚS TU KʼUBOʼ
17-19. 1) ¿Baʼax unaj k-beetik wa k-tsʼáaik u nib óolalil tiʼ Jéeoba yoʼolal u kuxtal Jesús tu kʼuboʼ? 2) ¿Baʼax ken k-il teʼ tuláakʼ xookoʼ?
17 Le israelitaʼob úuchjeakiloʼ unaj u kiʼimaktal u yóoloʼob kaʼach chéen yéetel u «yoochel» le baʼaxoʼob u tukultmaj u beetik Diosoʼ, maʼ jeʼex le máaxoʼob meyajtik teʼ kʼiinoʼobaʼ (Heb. 10:1). Kex beyoʼ, le bix u yaʼalik le ley unaj u kʼubik u siibaloʼoboʼ tu yáantoʼob utiaʼal ka u beetoʼob baʼax kʼaʼabéet utiaʼal u biskubaʼob maʼalob yéetel Dios. Tu péeksoʼob u tsʼáaʼob nib óolal tiʼ Dios tu jaajil u yóoloʼob, u taaktal u tsʼáaikoʼob u maas maʼalobil tiʼ yéetel u naʼatkoʼob kʼaʼabéet u perdonartaʼaloʼob. Toʼoneʼ maas yaʼab baʼax tsʼoʼok k-naʼatik yoʼolal le baʼaxoʼob ku yaʼalik le Kiliʼich Tsʼíiboʼob ich Griegooʼ. Yoʼolal le baʼax ku yaʼalikoʼoboʼ tsʼoʼok k-naʼatik le utsiloʼob ku taasik le u kuxtal Jesús tu kʼuboʼ. Maʼ kun xáantaleʼ, Jéeobaeʼ yaan u luʼsik le kʼeban yoʼolal u kuxtal Jesús tu kʼuboʼ, baʼaleʼ teʼ kʼiinoʼobaʼ ku yáantkoʼon utiaʼal ka yanaktoʼon junpʼéel maʼalob conciencia tu táan. ¿Máasaʼ jach maʼalob le baʼax tu beetoʼ? (Gal. 3:13; Heb. 9:9, 14.)
18 Baʼaleʼ maʼ chéen unaj u naʼatik máak le utsiloʼob ku taasik le u kuxtal Jesús tu kʼuboʼ. Kʼaʼajaktoʼon baʼax tu yaʼalaj Pablo: «Le aʼalmajtʼaanoʼ tu kanáantoʼon, jeʼel bix u kanáantaʼal paalaleʼ, utiaʼal u kaʼanskoʼon tak ken taalak Cristo, utiaʼal beyoʼ le ken k-oksaj óolteʼ, ka páatak k-tsʼaʼabal maʼalobil tu táan Jajal Dios» (Gal. 3:24). Bey túunoʼ kʼaʼabéet k-tsʼáaik k-fe tiʼ letiʼ, baʼaleʼ unaj k-eʼesik yoʼolal le baʼaxoʼob k-beetkoʼ (Sant. 2:26). Teʼ yáax siglooʼ yaʼab tiʼ le cristianoʼoboʼ u yojloʼob baʼax ku kaʼansik le Leyoʼ, le oʼolal aʼalaʼabtiʼob tumen le apóstol unaj u tsʼáaikoʼob ichil u kuxtaloʼoboʼ. Ken u beetoʼobeʼ beyoʼ yaan u kuxtaloʼob jeʼex u nuʼuktik le Leyoʼ (xokaʼak Romailoʼob 2:21-23).
19 Kex bejlaʼa maʼ yáanal u Ley Moisés yanoʼoneʼ, láayliʼ unaj k-kʼubik siibaloʼob kʼambeʼenoʼob tu táan Jéeobaeʼ. Teʼ tuláakʼ xookoʼ yaan k-ilik bix jeʼel u páajtal k-beetkeʼ.
[U kʼáatchiʼiloʼob le xookoʼ]
[Uláakʼ baʼax ku tsoʼolol teʼ táan juʼun 17]
Le baʼax ku kʼáatik Jéeoba ka beetaʼakoʼ maʼatech u kʼexpajal
[Foto yaan teʼ táan juʼun 18]
¿Máakalmáak tiʼ le baʼalcheʼ jeʼel k-kʼubik kaʼach tiʼ Jéeobaoʼ?
[Foto yaan teʼ táan juʼun 19]
Jéeobaeʼ ku kʼamik le máaxoʼob ku kʼubkoʼob siibaloʼob jeʼex uts tu tʼaanoʼ
