Le baʼaxoʼob k-líiʼsmoʼ

Le baʼaxoʼob koʼojtak u tojol k-líiʼsmoʼ

TOʼON, u j-jaajkunajoʼon Jéeobaeʼ, k-líiʼsmaj yaʼab baʼaloʼob koʼoj u tojol, maʼ chéen le yaan teʼ jóoʼsaʼaniloʼoboʼ, baʼaxeʼ yaan fotoʼob, cartaʼob, baʼax u tsikbaltmaj sukuʼunoʼob yéetel uláakʼ baʼaloʼob yaan yil yéetel le adoración k-tsʼáaik tiʼ Diosoʼ, le kʼaʼaytajoʼ yéetel uláakʼ baʼaloʼob uchaʼantak. Baʼaleʼ ¿baʼax u biilal k-líiʼsik le úuchben baʼaloʼobaʼ? Úuchjeakileʼ le taatatsil israelitaʼoboʼ unaj u kaʼansik le leyoʼob tiʼ u paalaloʼoboʼ yéetel u tsikbaltiktiʼob le baʼaxoʼob u beetmaj Jéeoba utiaʼal ka «yanak u yoksaj óolaloʼob tiʼ [Dios]» (Sal. 78:1-7).

Le u xakʼaltaʼal le baʼaxoʼob líiʼsaʼanoʼoboʼ, úuch joʼopʼok u beetaʼal yéetel áantajnajoʼob utiaʼal u béeytal le baʼax u tukultmaj Jéeobaoʼ. Jeʼex le ka óotaʼab xuʼulsbil u jel líiʼsaʼal le templo yaan tu kaajil Jerusalenoʼ, xakʼaltaʼab le tsʼíiboʼob líiʼsaʼanoʼob Ec-batana, u noj kaajil Media, teʼeloʼ kaxtaʼab junpʼéel juʼun tuʼux ku yaʼalik rey Ciro ka beetaʼak le meyajoʼ (Esd. 6:1-4, 12). Bey túunoʼ seguernaj u beetaʼal le meyaj jeʼex u yaʼalmil Diosoʼ. Lucas xaneʼ tu xakʼaltaj «bix úuchik tuláakal le baʼaloʼob desde tu káajbal» utiaʼal u tsʼíibtik u Evangeliooʼ (Luc. 1:1-4).

Bejlaʼeʼ le Cuerpo Gobernanteoʼ jach u kʼáat ka ojéeltaʼak baʼaxoʼob tsʼoʼok u beetik u j-jaajkunajoʼob Jéeoba desde úuchjeakil. Ka tʼaanaj tiʼ u kʼaʼabéetil u líiʼsaʼal, u kanáantaʼal yéetel u tsʼaʼabal ojéeltbil le baʼaxoʼob k-beetmoʼ, juntúul tiʼ letiʼobeʼ tu yaʼalaj: «Utiaʼal k-ojéeltik tuʼux k-bineʼ, unaj k-ojéeltik xan  tuʼux k-taal». Le oʼolal tu najil Betel yaan tu noj kaajil Brooklyneʼ (Nueva York) tsʼoʼok u beetaʼal junpʼéel túumben departamento ku kʼaabaʼtik Archivos tiʼ Redacción, tiaʼan yáanal u nuʼuktaj le Comité tiʼ Redaccionoʼ.

LE «ÁLBUM» YÉETEL ULÁAKʼ BAʼALOʼOB ÚUCHBENTAK YAANTOʼONOʼ

Tumen séeb u máan le kʼiinoʼoboʼ, ¿máasaʼ tuláakal máak u kʼáat u líiʼs jujunpʼéel baʼaloʼob utiaʼal u kʼaʼajsik baʼax tsʼoʼok u yúuchul ichil u familia? Lelaʼ letiʼe meyaj ku beetik le departamento Archivos tiʼ Redacción utiaʼal u líiʼsik yéetel u kanáantik le baʼaxoʼob yaantoʼonoʼ. Le fotoʼob líiʼsaʼanoʼ jeʼel u páajtal k-aʼalikeʼ bey junpʼéel u «álbum» k-familiaeʼ. Ichil le baʼaxoʼob líiʼsaʼanoʼ yaan jujunpʼéel tiʼ le yáax jóoʼsaʼaniloʼoboʼ, baʼaxoʼob ku tsikbaltik jujuntúul sukuʼunoʼob yéetel jujunpʼéel baʼaloʼob jatsʼutstak. Tuláakal le baʼaxoʼob úuchbentak yaantoʼonoʼ ku yáantkoʼon k-maas kʼaj óolt bix káajik le meyaj k-beetkoʼ yéetel utiaʼal k-maas kʼubik k-óol tiʼ le baʼax ku taal u kʼiinoʼ.

K-invitartikech ka a «xíimbalt» le departamento Archivos tiʼ Redaccionoʼ, utiaʼal lelaʼ unaj a xokik le túumben jaats ken u taas cada wa baʼax kʼiin U Pʼíich Tulumil Kanan utiaʼal le múuchʼulil ku kʼaabaʼtik: «Le baʼaxoʼob k-líiʼsmoʼ». Tiʼ junpʼéel revista kun jóoʼsbil maʼ kun xáantaleʼ yaan u núukaʼal le kʼáatchiʼobaʼ: ¿Baʼax le «auroramoviloʼ»? ¿Tiʼ máaxoʼob ku meyaj kaʼachi? ¿Baʼax kʼiin ka káaj u meyaj, yéetel baʼax u biilal?

Jeʼex junpʼéel álbum tuʼux yaan u fotoʼob k-familiaeʼ, le baʼaxoʼob líiʼsaʼan teʼ departamento Archivos tiʼ Redaccionoʼ ku yáantkoʼon k-maas kʼaj óolt u kaajal Dios yéetel baʼax tu beetaj jujuntúul sukuʼunoʼob úuchjeakil: bix úuchik u yeʼeskoʼob fe yéetel maʼ u chaʼikoʼob saajkil, le kiʼimak óolal yéetel le talamiloʼob ku taasik u meyajtaʼal Diosoʼ yéetel le bix úuchik u nuʼuktik u kaajal Dios yéetel bix u yáantik mantatsʼoʼ (Deu. 33:27). Toʼoneʼ jach k-ojel Jéeobaeʼ yaan u bendecirtik le meyaj ku beetik le sukuʼunoʼob utiaʼal u kanáantkoʼob maʼ u tuʼubsaʼal le baʼaxoʼob uchaʼan tiʼ u kaajaloʼ, tumen lelaʼ ku yáantkoʼon maas múuchʼ meyaj yéetel ku yáantkoʼon utiaʼal k-beetik baʼax uts tu tʼaan.

[Foto yéetel cuadro yaan teʼ táan juʼun 31]

Uláakʼ baʼaloʼob

Le ken joʼopʼok u beetaʼal le jóoʼsaʼaniloʼoboʼ, le DVD yéetel le baʼaxoʼob ku kaʼansik le Biblia k-tsolikoʼ, le sukuʼunoʼob tsʼíibtik, le ku chʼaʼabal u foʼotoʼoboʼ yéetel uláakʼ máaxoʼob ku táakpajal teʼ meyajoʼ yaʼab baʼaxoʼob ku xakʼalxoktikoʼob. Le oʼolal le departamento Archivos tiʼ Redaccionoʼ ku líiʼsik yéetel ku kanáantik le baʼaxoʼob ku túuxtik uláakʼ u najiloʼob Beteloʼ, le departamentoʼob yanoʼob Beteloʼ, le múuchʼuliloʼoboʼ, le institucionoʼob yéetel uláakʼ kúuchiloʼoboʼ. Koʼoneʼex ilik jujunpʼéel baʼaxoʼob ku beetaʼaliʼ:

U muʼuchʼul yéetel u xakʼaltaʼal. Mantatsʼ táan u yaʼabtal baʼaxoʼob ku líiʼsaʼaliʼ. Yaʼabeʼ siibil u beetaʼal wa ku tsʼaʼabal majáantbil tumen sukuʼunoʼob úuch joʼopʼok u meyajtaʼal Jéeoba tumen u láakʼtsiloʼob. Ken xakʼaltaʼak yéetel ken keʼetek le baʼaloʼobaʼ k-maas ojéeltik baʼaxoʼob tu beetaj u kaajal Dios úuchjeakil.

U tsoʼolol. U milesil baʼaloʼob ku líiʼsaʼaliʼ, yanoʼobeʼ yaan maas tiʼ cien jaʼaboʼob tiʼob. Tumen jejeláas bixoʼob yéetel u nuuktakiloʼobeʼ, unaj u tsʼaʼabaloʼob tu tsoolol utiaʼal u séeb kaxtaʼaloʼob ken kʼaʼabéetchajak.

U yutskíintaʼal yéetel u líiʼsaʼal. Le libroʼob yéetel le baʼaxoʼob séeb u kʼastaloʼoboʼ ku yutskíintaʼaloʼob yéetel ku meyaj uláakʼ baʼaloʼob utiaʼal maʼ u séeb kʼastaloʼob. Le juʼunoʼob, fotoʼob, u xóoxotʼal periodicoʼob, peliculaʼob yéetel le paaxoʼoboʼ ku yoksaʼaloʼob tiʼ computadora. Bey túunoʼ jeʼel u béeytal u meyaj utiaʼal maʼ u maʼachal le originaloʼ.

Baʼax ku beetaʼal utiaʼal u líiʼsaʼaloʼob. Le baʼaxoʼob ku líiʼsaʼaloʼ ku tsʼaʼabal tu tsoolol utiaʼal u kanáantaʼal tiʼ u juul le kʼiin yéetel tiʼ le síisoʼ. Táan u beetaʼal junpʼéel lista tiʼ computadora utiaʼal u séeb kaxtaʼal ken kʼaʼabéetchajkoʼob.

[Fotoʼob yaan teʼ táan juʼun 32]

1) U foto le «Foto-Drama de la Creación». 2) U listail máaxoʼob kʼamik le jóoʼsaʼaniloʼoboʼ. 3) Junpʼéel coche yaan u nuʼukul paaxiʼ. 4) U yáax táan juʼunil The Watch Tower 15 tiʼ abril tiʼ 1912. 5) U juʼunil tuʼux ku yaʼalaʼal yaan u kʼaʼalal cárcel J. F. Rutherford. 6) Micrófono ku meyaj tiʼ le WBBR. 7) Fonógrafo. 8) Maletín utiaʼal libroʼob. 9) Le baʼax tu tsʼíibtaj jujuntúul sukuʼunoʼoboʼ. 10) Junpʼéel chan juʼun túuxtaʼab tiʼ J. F. Rutherford