Unaj k-kʼubik siibaloʼob tiʼ Jéeoba tu jaajil k-óol
Unaj k-kʼubik siibaloʼob tiʼ Jéeoba tu jaajil k-óol
«Jeʼel baʼalak ka a beeteʼexeʼ, beeteʼex yéetel utsil óolal, bey táan a meyajtikeʼex Yuumtsileʼ.» (COL. 3:23)
ILAWIL A KAXTIK U NÚUKIL:
¿Bix jeʼel k-tsʼáaik nojbeʼenil tiʼ Jéeoba yéetel le baʼaxoʼob k-beetik sáamsamaloʼ?
¿Baʼax siibaliloʼob k-beetik utiaʼal k-meyajtik Dios?
¿Baʼax siibaliloʼob jeʼel u páajtal k-tsʼáaik tiʼ Jéeobaeʼ?
1-3. 1) Tumen tsʼoʼok u kʼubik u kuxtal Jesús t-oʼolaleʼ, ¿pʼáat wa maʼ kʼaʼabéet k-kʼubik siibaloʼob tiʼ Jéeobaiʼ? Tsol baʼaxten bey a núukikoʼ. 2) ¿Baʼax unaj k-ilik le ken k-kʼub siibaloʼob tiʼ Jéeoba?
TEʼ YÁAX siglooʼ Jéeobaeʼ tu yaʼalaj tiʼ le máaxoʼob meyajtik xuʼul u kʼaʼabéettal u beetaʼal baʼax ku yaʼalik le Ley le ka tsʼoʼok u kʼubik u kuxtal Jesusoʼ (Col. 2:13, 14). Le oʼolal le baʼalcheʼob yéetel uláakʼ baʼaloʼob úuch joʼopʼok u kʼubik le judíoʼoboʼ tsʼoʼok u pʼáatal maʼ kʼaʼabéetiʼ. Tumen bey jeʼex juntúul máax ku kanáantik máakeʼ, le Leyoʼ tu nuʼuktaj le judíoʼob tu yiknal Cristooʼ (Gal. 3:24).
2 Baʼaleʼ lelaʼ maʼ u kʼáat u yaʼal wa tsʼoʼok u xuʼulul u beetaʼal siibaloʼobiʼ. Apóstol Pedroeʼ ku yaʼalikeʼ le cristianoʼoboʼ, «tu yoʼolal Jesucristoeʼ ku tsʼáaikoʼob [...] siibaloʼob ku páajtal u kʼaʼamloʼob tumen Jajal Dios» (1 Ped. 2:5). Yéetel apóstol Pabloeʼ ku yaʼalikeʼ tuláakal baʼax k-beetik ichil k-kuxtal, le tsʼoʼok k-kʼubik tiʼ Diosoʼ, bey junpʼéel «siibal[eʼ]» (Rom. 12:1).
3 Toʼoneʼ k-tsʼáaik siibaloʼob tiʼ Jéeoba ken k-tsʼáa wa baʼax tiʼ wa ken k-pʼat wa baʼax utiaʼal k-meyajtik. Le oʼolal kʼaʼabéet k-ilik wa uts tu tʼaan le siibaloʼob k-tsʼáaiktiʼ, jeʼex úuchik u kʼáatik ka u beet le israelitaʼoboʼ.
LE SIIBALOʼOB KU KʼUBAʼAL SÁAMSAMALOʼ
4. ¿Baʼax maʼ unaj u tuʼubultoʼoniʼ?
4 Yaan kʼiineʼ maʼ chéen chʼaʼabil u yilik máak baʼax yaan u yil le siibaloʼob yéetel le baʼaxoʼob ku beetik sáamsamaloʼ. Yaan horaeʼ jeʼel k-tuklikeʼ u meeyjil ichil u yotoch máak, u bin máak xook, le meyajoʼ, u bin máak maan wa u beetik uláakʼ baʼaloʼobeʼ minaʼan baʼax u yil yéetel u meyajtaʼal Dios. Baʼaleʼ wa tsʼoʼok k-kʼubik k-kuxtal tiʼ Jéeoba, bey xan wa táan k-tuklik k-beetkeʼ, jach maʼalob ka k-naʼat baʼaxten kʼaʼabéet k-beetik baʼax maʼalob mantatsʼ. Ichil le veinticuatro horas tiʼ junpʼéel kʼiinoʼ, kʼaʼabéet k-meyajtik Dios yéetel unaj k-ilik k-beetik le baʼax ku yaʼalik le Biblia tuláakal súutukiloʼ. Pabloeʼ ku yaʼalik: «Jeʼel baʼalak ka a beeteʼexeʼ, beeteʼex yéetel utsil óolal, bey táan a meyajtikeʼex Yuumtsileʼ maʼ máakoʼobiʼ» (xokaʼak Colosailoʼob 3:18-24).
5, 6. ¿Baʼax unaj u tuklik máak yoʼolal baʼax ku beetik yéetel bix u vestirkuba?
5 Le baʼax k-beetik sáamsamaloʼ maʼ táakaʼanoʼob ichil le adoración k-tsʼáaik tiʼ Jéeobaoʼ. Baʼaleʼ Pabloeʼ ku yaʼaliktoʼoneʼ unaj k-beetkoʼob «yéetel utsil óolal, bey táan» k-meyajtik Jéeobaeʼ, le oʼolal kʼaʼabéet k-kanáantik baʼaxoʼob k-beetik sáamsamal. Maʼalob ka k-tukle: «¿Kin beetik wa baʼax maʼalob mantatsʼ yéetel maʼalob wa in vestirkinba? ¿Wa yaan kʼiineʼ jeʼel in suʼlaktal in waʼal u j-jaajkunajen Jéeoba yoʼolal le baʼax kin beetik wa le bix in vestirmilinbaoʼ? ¿Máasaʼ jach maʼ maʼalob wa ka úuchuktoʼon beyoʼ?». Le máaxoʼob meyajtik Diosoʼ maʼ u kʼáatoʼob u pʼatoʼob kʼaasil u kʼaabaʼ Jéeoba yoʼolal baʼaxoʼob ku beetkoʼobiʼ (Isa. 43:10; 2 Cor. 6:3, 4, 9).
6 Koʼoneʼex tuukul tiʼ jujunpʼéel baʼaxoʼob k-beetik yéetel bix jeʼel u yáantkoʼon utiaʼal ka k-beet tuláakal «yéetel utsil óolal, bey táan» k-meyajtik Jéeobaeʼ. Le táan k-xakʼalxoktikoʼ, kʼaʼajaktoʼoneʼ letiʼeʼ ku páaʼtik ka tsʼaʼabak u maas maʼalobil tiʼ tumen le israelitaʼoboʼ (Éxo. 23:19).
LE BAʼAXOʼOB K-BEETIK SÁAMSAMALOʼ
7. ¿Baʼax táakaʼan ichil le úuchik k-kʼubik k-kuxtal tiʼ Jéeobaoʼ?
7 Ka t-kʼubaj k-kuxtal tiʼ Jéeobaeʼ t-aʼaleʼ yaan k-beetik tuláakal baʼax ku yaʼalik. Ichil uláakʼ tʼaaneʼ, t-aʼaleʼ yaan k-tsʼáaik táanil ichil k-kuxtal ken k-aktáant jeʼel baʼaxakeʼ (xokaʼak Hebreob 10:7). Lelaʼ letiʼe baʼax maas maʼalob tsʼoʼok k-chʼaʼtuklik k-beetkoʼ. Yéetel maʼ xaaneʼ tsʼoʼok k-ilkeʼ, wa k-ilik k-naʼatik baʼax u kʼáat Dios ka k-beet ken k-aktáant wa baʼax talamil yéetel k-ilik k-beetkeʼ ku bintoʼon utsil mantatsʼ (Isa. 48:17, 18). Toʼoneʼ k-bisik junpʼéel kuxtal limpio yéetel kiʼimak k-óol, tumen mantatsʼ k-ilik u yantaltoʼon le modos ku taal tiʼ le Máax kaʼanskoʼonoʼ (Lev. 11:44; 1 Tim. 1:11).
8. ¿Baʼax k-kanik tiʼ le úuchik u yilaʼal tumen Jéeoba kiliʼich le siibaloʼob ku kʼubik kaʼach le israelitaʼoboʼ?
8 Jéeobaeʼ ku yilik kiliʼich tuláakal le siibaloʼob ku kʼuʼubul kaʼach tiʼ tumen le israelitaʼoboʼ (Lev. 6:25; 7:1). Le tʼaan hebreo ku suʼutul «kiliʼichoʼ» ku meyaj utiaʼal u yúuchul tʼaan tiʼ tuláakal baʼax junpáaykuntaʼan utiaʼal tsʼaabil tiʼ Dios. Le oʼolal wa k-kʼáat ka kʼaʼamak k-siibaloʼob tumen Dioseʼ, kʼaʼabéet k-kanáantik maʼ u yantal mix baʼal kʼaas ichil. Maʼ unaj k-yaabiltik mix junpʼéel tiʼ le baʼaxoʼob pʼektaʼan tumen Jéeobaoʼ (xokaʼak 1 Juan 2:15-17). Maʼ k-kʼáat k-beet junpʼéel baʼax jeʼel u beetik k-pʼáatal maʼ limpioil tu táaneʼ (Isa. 2:4; Apo. 18:4). Yéetel maʼ unaj k-chaʼantik baʼaloʼob kʼaastak yéetel suʼtsiltakiʼ, mix u joʼopʼol k-tuukul tiʼ baʼaloʼob maʼ uts tu tʼaaniʼ (Col. 3:5, 6).
9. ¿Baʼaxten jach unaj k-áantik u maasil?
9 Pabloeʼ ku yaʼalik tiʼ le máaxoʼob meyajtik Diosoʼ: «Maʼ u tuʼubulteʼex a beetkeʼex uts yéetel a paklan áantkabaʼex; tumen leloʼobaʼ letiʼ le siibaloʼob uts tu tʼaan Diosoʼ» (Heb. 13:16). Jeʼex túun k-ilkoʼ, Jéeobaeʼ ku yilik bey siibaloʼob le bix k-tsʼáaik k-óol k-beet baʼax ku yaʼalikoʼ bey xan utiaʼal k-áantik u maasil. Ken k-yaabilt u maasileʼ k-eʼesik jach tu jaajil u disipuloʼon Jesús (Juan 13:34, 35; Col. 1:10).
SIIBALOʼOB UTIAʼAL K-ADORARTIK DIOS
10, 11. ¿Bix u yilik Jéeoba le baʼax k-beetik utiaʼal k-meyajtikoʼ, yéetel baʼax unaj u péeksikoʼon k-beete?
10 Junpʼéel bix k-beetik utseʼ letiʼe k-tsikbaltik baʼax k-creertikoʼ. ¿K-tsikbaltik wa le baʼaxoʼob k-creertik ken yanak u súutukiloʼ? Pabloeʼ tu yaʼaleʼ le meyajaʼ táakaʼan ichil «le siibal unaj [k-tsʼáaikoʼ]. ¡Koʼox túun kiʼikiʼtʼantik u kʼaabaʼ yéetel k-chiʼ!» (Heb. 10:23; 13:15; Ose. 14:2). Maʼalob ka tuukulnakoʼon tiʼ le bukaʼaj tiempo k-máansik teʼ kʼaʼaytajoʼ yéetel bix k-tsʼáaik k-óol k-beete; le u Muchʼtáambalil Kʼaʼaytajoʼ ku yáantkoʼon k-beet tubeel le meyajaʼ. Baʼaleʼ le kʼaʼaytaj joonaj joonajil, wa u kʼaʼaytaj máak kex maʼ le jokʼaʼan u beetoʼ, táakaʼan ichil «k-kiʼikiʼtʼantik mantatsʼ Jajal Dios», le oʼolal unaj k-ilik k-beetik u maas maʼalobil ku páajtal. Kex maʼ junpʼéeliliʼ le bukaʼaj ku páajtal u beetik tuláakaloʼ, le bukaʼaj ku beetik cada juntúuloʼ ku yeʼesik bix u yilik u meyajtik Dios.
11 Toʼoneʼ k-jóoʼsik tiempo cada semana utiaʼal k-adorartik Jéeoba chéen t-juunal wa yéetel uláakʼ sukuʼunoʼob. Lelaʼ letiʼ aʼalmil ka beetaʼak. Bejlaʼeʼ maʼ kʼaʼabéet u jeʼelel máak tiʼ sabadoʼob mix u bin tu kaajil Jerusalén utiaʼal le kʼiinbesajoʼob cada jaʼaboʼ. Baʼaleʼ le baʼaloʼob beetaʼab úuchjeakiloʼ yaan tiʼ baʼax chíikaʼan tiʼ le baʼaxoʼob ku beetaʼal tumen le máaxoʼob meyajtik Dios bejlaʼaʼ. Dioseʼ láayliʼ u kʼáat ka k-pʼat juntséelil jujunpʼéel baʼaxoʼob k-beetik utiaʼal k-xokik le Bibliaoʼ, utiaʼal k-payalchiʼ yéetel utiaʼal k-bin teʼ muchʼtáambaloʼoboʼ. Tsʼoʼoleʼ ku yaʼalik xan tiʼ le taatatsiloʼob ka u nuʼuktoʼob le adoración ich familiail yéetel le máaxoʼob yaan ichil u yotochoʼ (1 Tes. 5:17; Heb. 10:24, 25). Le oʼolal maʼalob ka k-tukle: «¿Unaj wa in maas maʼalobkíintik bix in meyajtik Dios?».
12. 1) ¿Yéetel baʼax ku keʼetel le incienso ku tóokaʼal kaʼach teʼ altaroʼ? 2) ¿Bix unaj k-beetik k-payalchiʼob yoʼolal bix u keʼetel yéetel le inciensooʼ?
12 Rey Davideʼ tu yaʼalaj tiʼ Jéeoba: «In payalchiʼeʼ ka kʼuchuk ta táan bey u kiʼibokil poomeʼ [wa incienso]» (Sal. 141:2). Maʼalob ka k-tukle: ¿Bix le payalchiʼob kin beetik tiʼ Diosoʼ? ¿Kin beetik wa mantatsʼ? ¿Maʼalob wa bix in beetik? U libroil Apocalipsiseʼ ku yeʼesikeʼ Jéeobaeʼ ku yuʼubik «u payalchiʼob le máaxoʼob kiliʼichoʼob» bey jeʼex u kiʼibokil le inciensooʼ (Apo. 5:8). Kʼaʼajaktoʼoneʼ letiʼeʼ tu yaʼalaj tiʼ le israelitaʼoboʼ kʼaʼabéet u beetkoʼob tubeel le incienso ku tóokikoʼob teʼ altar sáamsamaloʼ. Wa maʼ u beetkoʼob jeʼex u yaʼalikoʼ maʼ tu kʼamik (Éxo. 30:34-37; Lev. 10:1, 2). ¿Baʼax ku kaʼansiktoʼon lelaʼ? Wa k-kʼáat ka uʼuyaʼak tumen Jéeoba le payalchiʼob k-beetkoʼ, kʼaʼabéet k-beetik jeʼex uts tu tʼaaneʼ.
K-TSʼÁAIK YÉETEL K-KʼAMIK XAN
13, 14. 1) ¿Baʼax áantajil tsʼaʼab tiʼ Pablo tumen Epafrodito yéetel le filiposiloʼoboʼ, yéetel bix úuchik u yilik? 2) ¿Bix jeʼel k-beetik jeʼex tu beetil Epafrodito yéetel le filiposiloʼoboʼ?
13 Kex wa yaʼab wa junpʼíit le taakʼin k-síik utiaʼal u kʼaʼaytaʼal le maʼalob péektsil tuláakal tuʼuxoʼ, ku keʼetel yéetel siibaloʼob (Mar. 12:41-44). Teʼ yáax siglooʼ, le sukuʼunoʼob tiʼ le múuchʼulil yaan tu kaajil Filiposoʼ tu túuxtoʼob Epafrodito tu kaajil Roma utiaʼal u yáantik Pablo yéetel, maʼ xaaneʼ, utiaʼal u bisik junpʼíit taakʼin tiʼ. Letiʼobeʼ maʼ yáax u yáantkoʼob beyoʼ. Yéetel le áantaj tu tsʼáajoʼob tiʼoʼ, u kʼáatoʼob maʼ u chiʼichnaktal le apóstol yoʼolal taakʼin utiaʼal u maas kʼubik u yóol teʼ kʼaʼaytajoʼ. ¿Bix úuchik u yilik le taakʼin siʼib tiʼoʼ? Tu yilaj «bey junpʼéel siibal kiʼibok incienso, junpʼéel siibal kʼambeʼen yéetel uts tu tʼaan Jajal Dio[seʼ]» (xokaʼak Filiposiloʼob 4:15-19). Letiʼeʼ jach tu tsʼáaj u diosboʼotikil yoʼolal le áantaj tu tsʼáajoʼoboʼ yéetel jach lúub xan utsil tiʼ Jéeoba.
14 Bejlaʼeʼ Jéeobaeʼ jach uts tu tʼaan u yilik bix k-síik k-taakʼin utiaʼal u kʼaʼaytaʼal le maʼalob péektsil tuláakal tuʼuxoʼ. Yéetel ku yaʼaliktoʼoneʼ wa k-tsʼáaik táanil le Reino ichil k-kuxtaloʼ, yaan u tsʼáaiktoʼon le baʼaxoʼob kʼaʼabéet utiaʼal k-maas meyajtikoʼ bey xan utiaʼal k-kuxtal (Mat. 6:33; Luc. 6:38).
UNAJ K-EʼESIK K-TSʼÁAIK NIB ÓOLAL
15. ¿Baʼax péeksikech a tsʼáa nib óolal tiʼ Jéeoba?
15 U jaajileʼ jach yaʼab baʼax oʼolal unaj k-tsʼáaik nib óolal tiʼ Jéeoba. ¿Máasaʼ unaj k-tsʼáaik u nib óolalil tiʼ sáamsamal yoʼolal le kuxtal u tsʼaamajtoʼonoʼ? Letiʼeʼ ku tsʼáaik baʼaxoʼob kʼaʼabéettoʼon: baʼal k-jaante, k-nookʼ, k-otoch yéetel le iikʼoʼ. Tsʼoʼoleʼ ku yáantkoʼon k-naʼat le baʼax ku kaʼansik le Biblia utiaʼal u yantaltoʼon fe yéetel esperanzaoʼ. Ken tuukulnakoʼon tiʼ máax Jéeoba yéetel le baʼaxoʼob tsʼoʼok u beetik t-oʼolaloʼ, ku péeksikoʼon k-adorarte yéetel k-tsʼáa siibaloʼob tiʼ (xokaʼak Apocalipsis 4:11).
16. ¿Baʼax unaj u péeksikoʼon k-beet le úuchik u kʼubik u kuxtal Cristo t-oʼolaloʼ?
16 Jeʼex úuchik k-ilik teʼ xook máanikoʼ, le u kuxtal Cristo tu kʼubaj t-oʼolaloʼ junpʼéel nojoch siibal ku taal tiʼ Dios. ¿Máasaʼ lelaʼ ku yeʼesik jach u yaabiltmoʼon Jéeoba? (1 Juan 4:10.) ¿Baʼax unaj u péeksikoʼon k-beet le yaabilaj ku yeʼesiktoʼonoʼ? Pabloeʼ ku yaʼalik: «U yaakunaj Cristo[eʼ] ku beetik k-tuklik lelaʼ[,] wa juntúul máak kíim tu yoʼolal tuláakaleʼ, bey túunoʼ tuláakal kimenoʼob. Cristoeʼ kíim tu yoʼolal tuláakal, utiaʼal beyoʼ le máaxoʼob kuxaʼanoʼoboʼ maʼ u kuxtaloʼob chéen utiaʼal letiʼob, baʼaleʼ ka kuxlakoʼob tu yoʼolal letiʼ, máax kíim yéetel kaʼa púut kuxlaj tu yoʼolaloʼob» (2 Cor. 5:14, 15). Le tʼaanoʼobaʼ ku yeʼesikeʼ utiaʼal k-tsʼáaik u nib óolalil tiʼ Dios yoʼolal le yaabilaj ku yeʼesiktoʼonoʼ, yaan k-tsʼáaik nojbeʼenil tiʼ bey xan tiʼ u Hijo ichil k-kuxtal. ¿Bix jeʼel k-tsʼáaik nib óolal tiʼobeʼ? K-beetik baʼax ku yaʼalikoʼob yéetel k-tsʼáaik k-óol teʼ kʼaʼaytaj yéetel k-kaʼansik uláakʼ máakoʼoboʼ (1 Tim. 2:3, 4; 1 Juan 5:3).
17, 18. ¿Baʼax ku beetik yaʼab sukuʼunoʼob utiaʼal u maas tsʼáaik u siibaloʼob tiʼ Jéeoba? Tʼaanen tiʼ junpʼéel baʼax uchaʼan.
17 ¿Jeʼel wa u páajtal k-maas maʼalobkíintik le siibaloʼob k-tsʼáaik tiʼ Diosoʼ? Yaʼab sukuʼunoʼobeʼ, ken tuukulnakoʼob tiʼ le baʼaxoʼob tsʼoʼok u beetik Jéeoba tu yoʼolaloʼoboʼ ku chʼaʼtuklik u kʼexkoʼob jujunpʼéel baʼax suukaʼan u beetkoʼob. Beyoʼ ku páajtal u maas táakpajloʼob teʼ kʼaʼaytajoʼ bey xan tiʼ uláakʼ meyajoʼob ichil u kaajal Dios. Yanoʼobeʼ ku páajtal u beetik u precursor auxiliariloʼob junpʼéel wa jaypʼéel mesoʼob ichil junpʼéel jaʼab. Yanoʼob xaneʼ ku páajtal u beetik u precursor regulariloʼob. Uláakʼoʼob xaneʼ ku táakpajloʼob utiaʼal u líiʼsaʼal najoʼob utiaʼal u adorartaʼal Dios. ¿Máasaʼ lelaʼ junpʼéel bix jeʼel u yeʼesik máak ku tsʼáaik nib óolal tiʼ Dioseʼ? Letiʼeʼ ku kʼamik yéetel kiʼimak óolal le meyajoʼob k-beetik utiaʼal k-tsʼáaik nib óolal tiʼoʼ.
18 Yaʼab sukuʼunoʼobeʼ jach ku tsʼáaik u yóol u meyajtoʼob Jéeoba tumen ku yuʼubikoʼob yaʼab u pʼaaxoʼob tiʼ letiʼ. Lelaʼ bey u beetik juntúul kiik ku kʼaabaʼtik Morena. Letiʼeʼ tu beetaj tuláakal le ku páajtal utiaʼal u kaxtik u núukil yaʼab kʼáatchiʼob teʼ Iglesia Católica, tuʼux líiʼsaʼanoʼ, bey xan tiʼ le kaʼansajoʼob ku beetik le j-lakʼiniloʼoboʼ, baʼaleʼ maʼ áantaʼab u kʼaj óolt Diosiʼ. Baʼaleʼ ka joʼopʼ u tsʼaʼabal xook tiʼ tumen u j-jaajkunajoʼob Jéeobaeʼ páajchaj u naʼatik. Letiʼeʼ jach taakchaj u tsʼáaik u nib óolalil tiʼ Dios yoʼolal le bix áantaʼabikoʼ ka tu chʼaʼtuklaj u kʼubik tuláakal u kuxtal utiaʼal u meyajte. Chéen pʼel tsʼoʼokik u yokjaʼeʼ káaj u beetik u precursora auxiliaril yéetel ka páajchajeʼ joʼopʼ u beetik precursora regularil. Bejlaʼeʼ tsʼoʼok treinta jaʼaboʼob joʼopʼok u beetik u precursorail.
19. ¿Bix jeʼel u páajtal k-maas yaʼabkuntik le siibaloʼob k-tsʼáaik tiʼ Jéeobaoʼ?
19 U jaajileʼ maʼ tuláakal jeʼel u páajtal u beetik u precursorileʼ. Baʼaleʼ tuláakloʼon jeʼel u páajtal k-beetik le bukaʼaj ku páajtal utiaʼal k-kʼubik k-siibal tiʼ Dios jeʼex uts tu tʼaaneʼ. Yéetel le bix kuxlikoʼonoʼ, k-chʼaʼik en cuentail le baʼax ku yaʼalik le Bibliaoʼ yéetel k-ilik maʼ u tuʼubultoʼon u j-jaajkunajoʼon Jéeoba tuláakal súutukil. Yéetel k-fejeʼ, k-eʼesik jach tu jaajil k-creertik Dioseʼ yaan u béeykuntik le baʼax u tukultmoʼ. Bey xan yéetel baʼaxoʼob maʼalobtak k-beetik, maases le ken jóokʼkoʼon k-kʼaʼayt le maʼalob péektsiloʼ. Le baʼax yaan tu puksiʼikʼal máakoʼ letiʼe baʼax ku yaʼalikoʼ. Tumen jach kiʼimak u yóol k-puksiʼikʼal yoʼolal le baʼaxoʼob ku tsʼáaiktoʼon Jéeobaoʼ, yaan u seguer k-tsʼáaik siibaloʼob tu jaajil k-óol tiʼ letiʼ.
[U kʼáatchiʼiloʼob le xookoʼ]
[Uláakʼ baʼax ku tsoʼolol teʼ táan juʼun 25]
¿Ku péeksikoʼon wa u yutsil Jéeoba k-maas maʼalobkíint le siibaloʼob k-tsʼáaiktiʼoʼ?
[Foto yaan teʼ táan juʼun 23]
¿K-tsikbaltik wa tiʼ tuláakal súutukil baʼaxoʼob k-creertik?
