Bix jeʼel k-áantaj utiaʼal ka yanak junpʼéeliliʼ tuukul teʼ múuchʼuliloʼ
Bix jeʼel k-áantaj utiaʼal ka yanak junpʼéeliliʼ tuukul teʼ múuchʼuliloʼ
«Ka yanak ta wéeteleʼex u nojoch utsil Yuumtsil Jesucristo tu yoʼolal le maʼalob tuukul yaanteʼexoʼ.» (FILI. 4:23, NM)
¿BIX JEʼEL K-EʼESIK YAANTOʼON JUNPʼÉELILIʼ TUUKUL TEʼ MÚUCHʼULIL . . .
... ken yanakoʼon yéetel le sukuʼunoʼoboʼ?
... ken jóokʼkoʼon teʼ kʼaʼaytajoʼ?
... ken k-ojéelt tsʼoʼok u lúubul tiʼ junpʼéel nojoch kʼeban wa máaxoʼ?
1. ¿Baʼaxten aʼalaʼab maʼalob baʼax ku beetik le múuchʼulil yaan Filipos yéetel Tiatira kaʼachoʼ?
LE CRISTIANOʼOB kajaʼanoʼob Filipos kaʼachoʼ maʼ yaʼab taakʼin yaantiʼobiʼ, kex beyoʼ tu yeʼesaj u yutsiloʼob yéetel u yaabilajoʼob tiʼ u maasil sukuʼunoʼob (Fili. 1:3-5, 9; 4:15, 16). Le oʼolal Pabloeʼ tu yaʼalaj tu tsʼoʼokbal le carta tu túuxtajtiʼoboʼ: «Ka yanak ta wéeteleʼex u nojoch utsil Yuumtsil Jesucristo tu yoʼolal le maʼalob tuukul yaanteʼexoʼ» (Fili. 4:23, NM). Lelaʼ bey xan úuchik u beetik le múuchʼulil yaan tu kaajil Tiatiraoʼ. Le oʼolal ka tsʼoʼok u bin Jesús tu kaʼatéen teʼ kaʼanoʼ, tu yaʼalajtiʼob: «In wojel tuláakal baʼax ka beetik; in kʼaj óol a yaakunaj, [yéetel] a woksaj óolal, [...] a meyaj bejlaʼeʼ maʼ jeʼel bix kaʼacheʼ» (Apo. 2:19, 20).
2. ¿Bix u yáantik u maasil teʼ múuchʼulil le bix k-tuukul yéetel le baʼaxoʼob k-beetkoʼ?
2 Le sukuʼunoʼob tiʼ cada junpʼéel múuchʼuliloʼ ku kʼaj óoltaʼaloʼob yoʼolal le modos ku yeʼeskoʼoboʼ wa yoʼolal baʼax suukaʼan u beetkoʼob. Yanoʼobeʼ jach utsoʼob yéetel ku yeʼeskoʼob yaabilaj, yéetel yaneʼ kʼaj óolaʼanoʼob yoʼolal bix u tsʼáaik u yóoloʼob teʼ kʼaʼaytaj yéetel jatsʼuts u yilkoʼob u beetik precursoril máak. ¿Bix jeʼel k-áantaj utiaʼal maʼ u xuʼulul k-múuchʼ meyajtik Dioseʼ? Unaj k-ilik u yantaltoʼon junpʼéel maʼalob tuukul (1 Cor. 1:10). Wa maʼ maʼalob bix k-tuukuleʼ yaan u xuʼulul u yeʼesaʼal yaabilaj teʼ múuchʼuliloʼ, tsʼoʼoleʼ jeʼel tak u chéen ilaʼal u beetaʼal baʼaloʼob kʼaastak ichileʼ (1 Cor. 5:1; Apo. 3:15, 16). Le oʼolaleʼ, ¿baʼax modosil unaj k-eʼesik teʼ múuchʼulilaʼ, yéetel baʼax unaj k-beetik utiaʼal u seguer k-múuchʼ meyaj?
LE BIX JEʼEL K-ÁANTAJ TEʼ MÚUCHʼULILOʼ
3, 4. ¿Bix jeʼel k-nojbeʼenkúuntik Jéeoba teʼ múuchʼuliloʼ?
3 Davideʼ tu yaʼalaj tiʼ Jéeoba: «Yaan in tsʼáaiktech nib óolal tu táan tuláakal a kaajal; ¡yaan in kiʼikiʼtʼantkech tu táan tuláakal a nojoch kaajoʼ!» (Sal. 35:18). Jeʼex túun k-ilkoʼ, letiʼeʼ tu nojbeʼenkúuntaj Jéeoba tu táan u maasil máaxoʼob meyajtikoʼ. ¿Kux túun toʼon? Ken xiʼikoʼon teʼ muchʼtáambaloʼob cada semana, jeʼex teʼ tu Xookil U Pʼíich Tulumil Kananoʼ, ku tsʼáaik tuʼux k-núukik le kʼáatchiʼob ku beetaʼal yéetel ka tʼaanakoʼon tiʼ le baʼaxoʼob k-creertikoʼ. ¿K-ilik wa k-táakpajliʼ? ¿K-líiʼsikba wa maʼalob utiaʼal k-núukik tubeel le kʼáatchiʼob ku beetaʼaloʼ? Wa taatatsiloʼoneʼ, ¿k-áantik wa k-paalal utiaʼal u núukikoʼob chéen ichil u tʼaanoʼob le kʼáatchiʼob ku beetaʼaloʼ?
4 Tiʼ uláakʼ junpʼéel salmoeʼ, Davideʼ tu yaʼalaj: «In puksiʼikʼaleʼ u tsʼaamaj u yóol, in [Dios]; in puksiʼikʼaleʼ u tsʼaamaj u yóol utiaʼal u kʼayiktech kʼaayoʼob» (Sal. 57:7). Le baʼax tu yaʼaloʼ ku yeʼesikeʼ le bix k-kʼaayoʼ ku chíikbesik wa k-tsʼaamaj k-óol k-meyajt Dios. Le muchʼtáambaloʼoboʼ ku tsʼáaik u páajtalil k-kʼaay tiʼ Jéeoba yéetel tuláakal k-puksiʼikʼal. ¿Yaan wa tiʼ le kʼaayoʼob maʼ k-jach k-ojloʼ? Wa yaneʼ maʼalob ka k-ensayartoʼob ken yanaktoʼon le Adoración ich Familiailoʼ. Unaj k-tuukul jeʼex Davideʼ, letiʼeʼ tu yaʼalaj: «Kaʼalikil yaanten kuxtaleʼ bíin in kʼay kʼaayoʼob tiʼ Yuumtsil, in [Dios]» (Sal. 104:33).
5, 6. ¿Baʼax táakaʼan ichil k-kʼamik u maasil t-otoch yéetel k-tsʼáaiktiʼob le baʼaxoʼob yaantoʼonoʼ, yéetel bix u yáantaj le k-paklan eʼesik k-utsil ichil le múuchʼuliloʼ?
5 Utiaʼal k-eʼesik yaabilaj teʼ múuchʼuliloʼ, kʼaʼabéet xan k-kʼamik maʼalob u maasil t-otoch. Teʼ tu tsʼook capítulo tiʼ u libroil Hebreoboʼ, Pabloeʼ ku yaʼalik: «Maʼ u jáawal a yaabiltikabaʼex ta baatsileʼex jeʼel bix sukuʼunoʼobeʼ. Maʼ u tuʼubulteʼex a kʼamkeʼex maʼalob le máaxoʼob ku kʼuchloʼob ta wotocheʼexoʼ» (Heb. 13:1, 2). Junpʼéel bix jeʼel k-beetik lelaʼ, letiʼe k-invitartik janal le superintendente viajanteʼob yéetel u yatanoʼoboʼ, bey xan uláakʼ sukuʼunoʼob u tsʼaamaj u yóol u meyajtoʼob Dios. Maʼalob xan ka k-invitart janal wa utiaʼal le adoración ich familiail le máaxoʼob kíimen u núupoʼoboʼ, le máaxoʼob ku líiʼsaʼaloʼob chéen tumen u taataʼob wa u maamaʼoboʼ bey xan uláakʼ sukuʼunoʼob.
6 Pabloeʼ tu yaʼalaj tiʼ Timoteo ka u yaʼal tiʼ le sukuʼunoʼob «ka u beetoʼob uts, ka ayikʼalchajkoʼob tiʼ maʼalob meyajoʼob yéetel ka yanak u puksiʼikʼalil tiʼob u tsʼáaikoʼob le baʼax yaantiʼoboʼ». Wa ku beetkoʼob beyoʼ «bíin yanaktiʼob le ayikʼalil ku tsʼáaik tuʼux u jéetsʼeloʼob maʼalob utiaʼal le kʼiinoʼob bíin taalakoʼ, yéetel bíin u machoʼob le kuxtal minaʼan u xuuloʼ» (1 Tim. 6:17-19). Jeʼex túun k-ilkoʼ, le apostoloʼ tu líiʼsaj u yóol le sukuʼunoʼob utiaʼal u tsʼáaʼob baʼax yaantiʼob tiʼ u maasil. ¿Bix jeʼel u béeytal k-beetik kex táan k-máansik óotsilileʼ? Junpʼéel bixeʼ letiʼe ka k-bis le sukuʼunoʼob teʼ muchʼtáambaloʼob wa teʼ kʼaʼaytajoʼ. Baʼaleʼ wa toʼon le k-bisaʼaloʼ, ¿bix jeʼel k-áantaj xaneʼ? Maʼ xaaneʼ jeʼel u béeytal k-áantaj yéetel u tojol le gasolinaoʼ. Uláakʼ bix jeʼel k-áantik yéetel k-eʼesik yaabilaj tiʼ le sukuʼunoʼoboʼ letiʼe k-máansik tiempo tu yéeteloʼoboʼ. ¿Baʼax utsil jeʼel k-kʼamik wa k-jóoʼsik k-tiempo yéetel k-taakʼin utiaʼal k-áantik «le sukuʼunoʼob[oʼ]»? Yáaxeʼ k-maas yaabiltikoʼob, u kaʼapʼéeleʼ k-áantaj utiaʼal ka k-eʼes utsil ichiloʼon (Gal. 6:10).
7. ¿Bix u yáantaj maʼ u máan u tsikbalt máak le baʼax ku yaʼalaʼaltiʼ utiaʼal u yantal junpʼéeliliʼ tuukul yéetel utiaʼal ka eʼesaʼak yaabilaj teʼ múuchʼuliloʼ?
7 Uláakʼ baʼax jeʼel u yáantkoʼon k-eʼes yaabilaj ichiloʼoneʼ letiʼe k-bisikba maʼalob yéetel le sukuʼunoʼoboʼ bey xan le k-kanáantik maʼ k-tsikbaltik baʼax maʼ unaj u yojéeltaʼal tumen u maasiliʼ (xokaʼak Proverbios 18:24). Le máaxoʼob maʼalob u biskubaʼoboʼ maʼatech u tsikbaltikoʼob tiʼ yaanal le baʼax ku tsikbaltaʼaltiʼob tumen u amigoʼoboʼ. Wa juntúul sukuʼun ku tsikbaltiktoʼon wa baʼax, tumen u yojel maʼ ken k-máan k-tsikbalteʼ, yaan k-maas bisikba tu yéetel. Bey túunoʼ, maʼ k-tsikbaltik junpʼéel baʼax chéen tiʼ toʼon aʼalaʼan tumen k-amigo, beyoʼ yaan k-áantaj utiaʼal ka yanak junpʼéeliliʼ tuukul yéetel ka eʼesaʼak yaabilaj teʼ múuchʼuliloʼ (Pro. 20:19).
UNAJ K-TSʼÁAIK K-ÓOL K-MEYAJT DIOS
8. ¿Baʼax tsolnuʼukil tsʼaʼab tiʼ le laodiceailoʼoboʼ yéetel baʼaxten kʼaʼabéet kaʼach tiʼob?
8 Jesuseʼ tu yaʼalaj tiʼ le múuchʼulil yaan kaʼach Laodiceaoʼ: «In wojel tuláakal baʼax ka beetik. In wojel maʼ síisechiʼ mix chokoechiʼ. ¡Bukaʼaj maʼalobil wa síisech wa chokoech! Baʼaleʼ tumen chéen kʼíinalech, mix síisechiʼ mix chokoechiʼ, bíin in kaʼaj in xéech» (Apo. 3:15, 16). Le sukuʼunoʼob yaan kaʼach Laodiceaoʼ maʼatech u jach tsʼáaik u yóol u meyajtoʼob Dios, maʼ xaaneʼ, lelaʼ tu beetaj maʼ u biskubaʼob tubeel. Le oʼolal aʼalaʼabtiʼob tumen Jesús: «Teneʼ kin chichtʼantik yéetel kin jatsʼtʼantik tuláakal le máaxoʼob in yaakúuntmajoʼ. Bey túunoʼ yanak a wóol yéetel kʼex a tuukul» (Apo. 3:19).
9. ¿Bix u yáantaj utiaʼal k-múuchʼ meyajtik Dios le bix k-ilik le kʼaʼaytajoʼ?
9 Wa k-kʼáat ka yanak kiʼimak óolal teʼ múuchʼuliloʼ kʼaʼabéet k-tsʼáaik k-óol teʼ kʼaʼaytajoʼ. Junpʼéel tiʼ le baʼax oʼolal jatsaʼanoʼon ich jejeláas múuchʼuliloʼoboʼ letiʼe k-kaxtik le máakoʼob u kʼáat u kʼaj óoltoʼob le maʼalob péektsiloʼ. Le oʼolal unaj k-beetik jeʼex úuchik u beetik Jesuseʼ yéetel k-maas tsʼáaik k-óol teʼ kʼaʼaytajoʼ (Mat. 28:19, 20; Luc. 4:43). Toʼoneʼ táan k-múul meyaj yéetel Dios, le oʼolal wa k-maas tsʼáaik k-óol teʼ meyajoʼ yaan k-maas bisikba t-baatsil (1 Cor. 3:9). Le ken k-il bix u defendertik u fejoʼob yéetel bix u yaabiltmiloʼob Jéeobaeʼ k-maas yaabiltikoʼob xan yéetel k-maas eʼesik tsiikil tiʼob. Bey túunoʼ, k-meyajtik Dios «chéen yéetel junpʼéeliliʼ tuuku[leʼ]» ku yáantaj utiaʼal k-maas bisikba teʼ múuchʼuliloʼ (xokaʼak Sofonías 3:9).
10. ¿Bix u yáantik u maasil teʼ múuchʼulil le bix k-maas maʼalobkíintik k-kʼaʼaytajoʼ?
10 Uláakʼ bix jeʼel k-áantaj teʼ múuchʼuliloʼ letiʼe k-maas maʼalobkíintik bix k-kʼaʼaytajoʼ. Wa k-kaxtik bix jeʼel k-maas k-áantik le máakoʼob ken jóokʼkoʼon teʼ kʼaʼaytajoʼ yaan u maas jatsʼutstal k-ilik k-beetik (Mat. 9:36, 37). Maʼ xaaneʼ le máax ku jóokʼol t-éetel teʼ kʼaʼaytajoʼ yaan xan u taaktal u beetik beyoʼ. ¿Baʼaxten Jesuseʼ tu túuxtaj u disipuloʼob kʼaʼaytaj kaʼakaʼatúulil? (Luc. 10:1.) Maʼ chéen utiaʼal u paklan líiʼsik u yóoloʼob yéetel utiaʼal u kaanbaloʼobiʼ, baʼaxeʼ utiaʼal u maas tsʼáaik u yóoloʼob teʼ kʼaʼaytajoʼ. ¿Máasaʼ jach jatsʼuts k-ilik k-jóokʼol kʼaʼaytaj yéetel juntúul sukuʼun uts tu yich u táakpajal teʼ kʼaʼaytajoʼ? Leloʼ jach ku yáantkoʼon utiaʼal maʼ u xuʼulul k-kʼaʼaytik u reino Dios (Rom. 1:12).
MAʼ UNAJ K-TʼAAN TU CONTRA U MAASILIʼ MIX K-CHÉEN ILIK U BEETAʼAL BAʼAX KʼAASIʼ
11. ¿Baʼax maʼ maʼalob tu beetaj le israelitaʼob tu kʼiinil Moisesoʼ, yéetel baʼax úuchtiʼob?
11 Chéen wa jaypʼéel kʼiinoʼob jóoʼsaʼak le israelitaʼob tu kaajil Egiptooʼ, joʼopʼ u x-mukul tʼaanoʼob. Tumen yaan baʼax maʼ uts tu tʼaanoʼobeʼ tu tsʼáajubaʼob tu contra Jéeoba bey xan tu contra le máaxoʼob u tsʼaamaj utiaʼal u nuʼuktikoʼoboʼ (Éxo. 16:1, 2). Le oʼolaleʼ chéen wa jaytúul tiʼ le jóokʼoʼob tu kaajil Egipto ookoʼob teʼ Luʼum Aʼalaʼan u Tsʼaʼabaloʼ. Tak Moiseseʼ maʼ ookiʼ, tumen tsʼíikilnaj yoʼolal le baʼax maʼ maʼalob tu beetaj u kaajil Israeloʼ (Deu. 32:48-52). ¿Bix jeʼel k-kanáantik maʼ u yúuchultoʼon beyoʼ?
12. ¿Baʼax jeʼel u yáantkoʼon utiaʼal maʼ k-tʼaan kʼaas tu contra u maasileʼ?
12 Unaj k-ilik maʼ k-tʼaan kʼaas tu contra u maasil. Utiaʼal lelaʼ unaj u yantaltoʼon kabal óolal yéetel k-eʼesik tsiikil tiʼ le máaxoʼob tsʼaʼantiʼob páajtaliloʼ; baʼaleʼ unaj k-kanáantik xan yéetel máaxoʼob k-bisikba. Wa k-náaysik k-óol yéetel baʼaxoʼob maʼ maʼalobtak bey xan wa k-máansik yaʼab tiempo yéetel k-éet xookoʼob wa k-éet meyajoʼob maʼatech u beetkoʼob le baʼax ku yaʼalik le Bibliaoʼ, yaan u bintoʼon kʼaasil. Le oʼolal maas maʼalob maʼ k-bisikba yéetel le máaxoʼob ku tʼaanoʼob tu contra u maasiloʼ wa ku yaʼalikoʼob ka u beet máak chéen baʼax u kʼáatoʼ (Pro. 13:20).
13. ¿Baʼax nukuch talamiloʼob jeʼel u beetik u yantal teʼ múuchʼulil u tʼaan máak kʼaas tu contra u maasiloʼ?
13 U tʼaan máak kʼaas tu contra u maasileʼ jeʼel u beetik u yantal nukuch talamiloʼob teʼ múuchʼuliloʼ, tumen jeʼel u beetik u xuʼulul u yantal jeetsʼelil yéetel u xuʼulul u múuchʼ meyaj tuláakaleʼ. Wa k-tʼaan kʼaas tu contra le sukuʼunoʼoboʼ, maʼ chéen ken k-beet kʼaas tiʼ letiʼobiʼ, baʼaxeʼ tak tiʼ toʼon, tumen yaan k-lúubul tiʼ le aʼalaj baʼal ku yaʼalik le Biblia maʼ unaj k-beetkoʼ (Lev. 19:16; 1 Cor. 5:11). Teʼ yáax siglooʼ, yanoʼobeʼ joʼopʼ u «kúulpachkuntikoʼob u páajtalil Yuumtsil, yéetel ku pochʼkoʼob le kaʼanal páajtalil», wa le máaxoʼob nuʼuktik le múuchʼuliloʼ (Jud. 8, 16). Dioseʼ maʼ maʼalob úuchik u yilik le baʼax tu beetoʼoboʼ.
14, 15. 1) ¿Baʼax jeʼel u yúuchul teʼ múuchʼulil wa ku chéen ilaʼal u beetaʼal baʼax kʼaasoʼ? 2) ¿Baʼax unaj k-beetik wa k-ojéeltik tsʼoʼok u lúubul tiʼ junpʼéel nojoch kʼeban juntúul sukuʼun yéetel maʼ tu yaʼalik?
14 Baʼaleʼ ¿kux túun wa k-ojéeltik yaan máax tsʼoʼok u lúubul tiʼ junpʼéel nojoch kʼeban, jeʼex tiʼ káaltal, u chaʼantik pornografía wa uláakʼ baʼax kʼaas, yéetel maʼ u kʼáat u yaʼaliʼ? (Efe. 5:11, 12.) Wa k-beetik bey mix baʼal k-ojleʼ, jeʼel u xuʼulul u yáantaj u kiliʼich muukʼ Jéeoba teʼ múuchʼuliloʼ yéetel jeʼel u xuʼulul u yantal jeetsʼelil ichileʼ (Gal. 5:19-23). Utiaʼal u yantal jeetsʼelil mantatsʼ ichileʼ, unaj k-beetik jeʼex le corintoiloʼoboʼ: unaj k-kanáantik maʼ u beetaʼal mix baʼal kʼaas teʼ múuchʼuliloʼ. ¿Bix jeʼel u páajtal k-beetkeʼ?
15 Jeʼex tsʼoʼok k-ilkoʼ yaan baʼaxoʼob maʼ unaj k-tsikbaltikiʼ, jeʼex le baʼaxoʼob ku tsikbaltaʼal chéen tiʼ toʼon tumen juntúul sukuʼunoʼ. Maʼ maʼalob ka k-tsikbalt tiʼ mix máakiʼ. Baʼaleʼ maʼ u tuʼubultoʼoneʼ letiʼe ancianoʼob áantik le máaxoʼob ku lúubloʼob tiʼ junpʼéel nojoch kʼebanoʼob. Le oʼolal unaj u yojéeltikoʼob (xokaʼak Levítico 5:1). Bey túunoʼ, wa k-ojéeltik tsʼoʼok u lúubul juntúul sukuʼun tiʼ junpʼéel nojoch kʼebaneʼ, unaj k-aʼaliktiʼ ka u kʼáat áantaj tiʼ le ancianoʼoboʼ (Sant. 5:13-15). Baʼaleʼ wa ku máan wa jaypʼéel kʼiin maʼ u yaʼaleʼ, toʼon unaj k-aʼalik.
16. Wa k-ojéeltik tsʼoʼok u lúubul juntúul sukuʼun tiʼ junpʼéel nojoch kʼebaneʼ, ¿baʼaxten unaj k-aʼalik tiʼ le ancianoʼoboʼ?
16 Le múuchʼuliloʼ junpʼéel kúuchil tuʼux k-kanáantaʼal, le oʼolal wa k-ojéeltik tsʼoʼok u lúubul wa máax tiʼ junpʼéel nojoch kʼebaneʼ unaj k-aʼalik. Wa le máax kʼebanchajaʼan ku kʼexik u tuukul, ku arrepentir yéetel ku kʼamik le áantajoʼ, maʼ kun xuʼulul u yantal jeetsʼelil teʼ múuchʼuliloʼ. Baʼaleʼ wa maʼ tu kʼamik le áantaj ku tsʼáaik le ancianoʼob yéetel maʼ tu arrepentireʼ yaan u jóoʼsaʼal teʼ múuchʼuliloʼ. Yáax tiʼ Corintoiloʼob 5:5, (NM), ku yaʼalik: «Unaj a kʼubkeʼex le máak tu kʼab Satanasoʼ, utiaʼal ka xuʼuluk u beetik u kʼebantal le múuchʼuliloʼ, utiaʼal beyoʼ ka kanáantaʼak le maʼalob tuukul yaan tiʼ le múuchʼulil le táan u yilaʼal u kʼiinil Yuumtsiloʼ». Jeʼex túun k-ilkoʼ, utiaʼal maʼ u xuʼulul u yantal junpʼéel maʼalob tuukul teʼ múuchʼuliloʼ, unaj k-áantik le ancianoʼoboʼ yéetel unaj k-kaxtik u yutsil le sukuʼunoʼoboʼ.
MAʼ U XUʼULUL U YANTALTOʼON JUNPʼÉELILIʼ TUUKUL
17, 18. ¿Baʼax kʼaʼabéet utiaʼal maʼ u xuʼulul u yantal junpʼéeliliʼ tuukul teʼ múuchʼuliloʼ?
17 Le cristianoʼob teʼ yáax siglooʼ tu kʼamoʼob le baʼax kaʼansaʼab tumen le apostoloʼoboʼ, le oʼolal páajchaj u múuchʼ meyajoʼob (Hch. 2:42). Tsʼoʼoleʼ tu kʼamoʼob yéetel kiʼimak óolal le tsolnuʼukoʼob tsʼaʼab tumen le ancianoʼoboʼ. Le ancianoʼob xan bejlaʼaʼ ku múul meyajoʼob yéetel le palitsil chúukpajaʼan u yóol yéetel yaan u naʼatoʼ. Beyoʼ le múuchʼuliloʼ ku kʼamik le áantaj kʼaʼabéet utiaʼal u múuchʼ meyajoʼ (1 Cor. 1:10). Tuláakal le máaxoʼob meyajtik Diosoʼ ku beetkoʼob le baʼax ku yaʼalik u kaajal Jéeobaoʼ yéetel ku kʼamkoʼob le tsolnuʼuk ku tsʼáaik le ancianoʼoboʼ, beyoʼ ku «pʼáatl[oʼob] nupaʼan[oʼob] mantatsʼ yéetel u yáantaj kiliʼich [muukʼ], tu yoʼolal le jéetsʼel óolal[oʼ]» (Efe. 4:3).
18 Bey túunoʼ, unaj k-beetik tuláakal le ku páajtal utiaʼal u yantaltoʼon junpʼéel maʼalob tuukul teʼ múuchʼuliloʼ. Beyoʼ yaan k-ilik u béeytal le baʼax ku yaʼalik le tekstoaʼ: «Ka yanak ta wéeteleʼex u nojoch utsil Yuumtsil Jesucristo tu yoʼolal le maʼalob tuukul yaanteʼexoʼ» (Fili. 4:23, NM).
[U kʼáatchiʼiloʼob le xookoʼ]
[Foto yaan teʼ táan juʼun 19]
¿K-líiʼsikba wa tubeel utiaʼal k-núukik le kʼáatchiʼob teʼ múuchʼuliloʼ?
[Foto yaan teʼ táan juʼun 20]
Utiaʼal ka yanaktoʼon junpʼéeliliʼ tuukul teʼ múuchʼuliloʼ unaj k-kanik tubeel le kʼaayoʼoboʼ
