Maʼ sajakchajoʼob kʼaʼaytajiʼ

Le máaxoʼob meyajtik Diosoʼ maʼatech u chʼaʼikoʼob saajkil tak ken chʼaʼpachtaʼakoʼob, lelaʼ bey u yeʼesik le libro “Testimonio cabal” del Reino de Dios yéetel Los testigos de Jehová, proclamadores del Reino de Dios. Jeʼex le cristianoʼob teʼ yáax siglooʼ, toʼoneʼ k-kʼáatik tiʼ Jéeoba u kiliʼich muukʼ yéetel ka u yáantoʼon utiaʼal maʼ k-sajaktal kʼaʼaytaj (Hch. 4:23-31).

Juntúul sukuʼuneʼ ku yaʼalik yoʼolal le kʼaʼaytaj beetaʼab le táan le yáax nojoch baʼateltáambaloʼ: «Le máaxoʼob meyajtik Diosoʼ jach tu tsʼáaj u yóol u kʼaʼaytoʼob le libro The Finished Mystery (El misterio terminado), u siete libroil tiʼ le Estudios de las Escrituras, teʼ kʼiinoʼob jeʼeloʼ jach yaʼab tʼoxaʼabiʼ. Le tratado Kingdom News (U maʼalob péektsilil le Reinooʼ) tu jaʼabil 1918 ka yáax jóoʼsaʼabi. Ka tsʼoʼokeʼ jóoʼsaʼab le u kaʼapʼéel Kingdom News, leloʼ tu tsolaj baʼaxten le autoridadoʼoboʼ tu luʼsoʼob u páajtalil u kʼaʼaytaʼal le libro The Finished Mystery. Ka tsʼoʼokeʼ jóoʼsaʼab le u yóoxpʼéel Kingdom News. Le sukuʼunoʼob yéeyaʼanoʼob utiaʼal u binoʼob kaʼanoʼ tu kʼaʼaytoʼob yaʼab tuʼuxoʼob, baʼaleʼ kʼaʼabéetchaj fe tiʼob yéetel maʼ u chʼaʼikoʼob saajkil».

Bejlaʼeʼ le túumben j-kʼaʼaytajoʼoboʼ ku yáax kaʼansaʼaloʼob táanil tiʼ u káajal u jóokʼloʼob kʼaʼaytaj, baʼaleʼ úuchjeakileʼ maʼ bey u beetaʼaliʼ. Juntúul sukuʼun poloniail kajaʼan kaʼach tu luʼumil Estados Unidoseʼ, ku yaʼalik le baʼax úuchtiʼ le kʼiin ka yáax jóokʼ kʼaʼaytaj tu jaʼabil 1922: «Maʼ in wojel bix jeʼel u in kʼaʼaytik le jóoʼsaʼaniloʼoboʼ, tsʼoʼoleʼ maʼ in wojel in tʼan inglesiʼ, baʼaleʼ ka kʼuchen tu jool u consultorio juntúul doctoreʼ, ka tʼaanajen. Juntúul enfermera jeʼekʼabt le joonajoʼ. Mix bikʼin kun tuʼubulten le baʼax úuchtenoʼ, tumen jach in kʼáat kʼaʼaytaj baʼaleʼ jach saajken xan. Ka tin jeʼekʼabtaj in maletineʼ, lúub tuláakal baʼax yaan ichil naatsʼ tiʼ le enfermeraoʼ. Maʼ kʼajaʼanten le baʼax tin waʼalajtiʼoʼ, baʼaleʼ tu yóotaj u chʼaʼ junpʼéel libro. Le ka lukʼen tu yiknaleʼ tsʼoʼok u lukʼul in saajkil yéetel tin wuʼuyaj jach tu yáanten Jéeoba. Teʼ kʼiin jeʼeloʼ yaʼab folletoʼob tin pʼataj teʼ bej tuʼux yaʼab j-koonoloʼob yanoʼ».

Juntúul kiikeʼ ku yaʼalik: «Tu jaʼabil 1933, tiʼ yaʼab sukuʼunoʼobeʼ ku meyaj coche tiʼob tsʼaʼan u nuʼukulil paax utiaʼal u kʼaʼaytikoʼob u maʼalob péektsilil le Reinooʼ». Juntéenjeakileʼ letiʼ yéetel juntúul sukuʼun yéetel u yataneʼ, táan u kʼaʼaytajoʼob tuʼux jach yaʼab witsoʼob yaan tu kaajil California (Estados Unidos). Letiʼeʼ ku yaʼalik: «Le sukuʼunoʼ naʼak yéetel u coche tu kaʼanlil le witsoʼoboʼ, ka pʼáatoʼon ichil le kaajoʼ. Ka tsʼaʼab le tsoltʼaan grabartaʼanoʼ uʼuyaʼab bey teʼ kaʼan u taaloʼ. Le máakoʼoboʼ joʼopʼ u kaxtikoʼob le sukuʼunoʼ, baʼaleʼ maʼ tu yiloʼobiʼ. Ka tsʼoʼok le tsoltʼaanoʼ binoʼon k-xíimbalt le máakoʼob utiaʼal k-kʼaʼaytik le maʼalob péektsil tiʼoboʼ. Meyajnajten uláakʼ kaʼapʼéel cocheʼob yaan u nuʼukul paaxiʼ, tin wileʼ u maas yaʼabil le máakoʼoboʼ jach junpuliʼ maʼ uts tu tʼaanoʼob u yuʼubikoʼobiʼ. Baʼaleʼ kex beyoʼ ku yuʼubikoʼob, tumen le tsoltʼaanoʼ ku yuʼubaʼal tak tu yotochoʼob. U jaajileʼ jach kʼaʼabéet maʼ sajak máak utiaʼal le kʼaʼaytaj beyoʼ, baʼaleʼ jach áantajnaj utiaʼal u nojbeʼenkúuntaʼal u kʼaabaʼ Jéeoba. T-ileʼ Jéeobaeʼ  ku beetik u meyaj le baʼax kʼaʼabéet teʼ súutuk maas maʼalob utiaʼal le kʼaʼaytajoʼ».

Tu jaʼabil 1930 tak tu káajbal u jaʼabil 1940 jach meyajnaj fonógrafoʼob utiaʼal u tsʼaʼabal le tsoltʼaanoʼob uʼuybiloʼ. Juntúul kiikeʼ ku yaʼalik: «Juntúul x-lóoʼbayan kiikeʼ jóokʼ kʼaʼaytaj joonaj joonajil yéetel le fonógrafooʼ. Ka tu tsʼáaj uʼuybil le tsoltʼaan tu jool junpʼéel najoʼ, jach kʼuuxilnaj u yuumil le najoʼ ka tu kóochaʼtaj le fonografooʼ, náach bin pektal, u maʼalobileʼ maʼ tu yopʼaj mix junpʼéel discoiʼ. Óoxtúul máakoʼob táan u jaanloʼob ichil junpʼéel camión jelekbaleʼ tu yiloʼob, ka tu yaʼaloʼob tiʼ le kiik ka u tsʼáa le tsoltʼaan u yuʼuboʼoboʼ, tsʼoʼoleʼ tu kʼáatoʼob jóoʼsaʼaniloʼob. Leloʼ tu beetaj u líikʼil u yóol kex kóochaʼtaʼab u fonográfo». Teʼ kʼiinoʼob jeʼeloʼ jach kʼaʼabéet maʼ u chʼaʼik saajkil máak u aktáant le baʼaloʼob beyoʼ.

Le kiikoʼ ku yaʼalik xan: «Tu jaʼabil 1940, káaj k-kʼaʼaytaj yéetel le revistaʼob teʼ bejoʼoboʼ. Táanileʼ ku jóokʼol máak xíimbal yéetel junpʼéel chan letrero. Le sukuʼunoʼoboʼ ku binoʼob tu tsoolol tu jáal le bej yéetel junpʼéel juʼun tuʼux tsʼíibtaʼan “Le religionoʼ junpʼéel tuus utiaʼal u yoklaʼal máak” yéetel “Meyajteʼex Dios yéetel Cristo le Reyoʼ”. Le táan u binoʼoboʼ táan u tʼoxkoʼob tratadoʼob x-maʼ boʼolil tiʼ le máakoʼoboʼ. Kʼaʼabéet maʼ sajak máak táakpajal tiʼ le meyaj beyoʼ, baʼaleʼ meyajnaj utiaʼal u yojéeltaʼal u kʼaabaʼ Jéeoba bey xan u kaajal tumen le máakoʼoboʼ».

Uláakʼ juntúul kiikeʼ tu yaʼalaj: «Maʼ chéen chʼaʼabil u kʼaʼaytaʼal le revistaʼob teʼ bejoʼoboʼ. Teʼ kʼiinoʼob jeʼeloʼ jach pʼektaʼan le j-Jaajkunajoʼoboʼ [...]. Kʼaʼabéet maʼ u chʼaʼik saajkil máak waʼatal teʼ esquina yéetel le revistaʼoboʼ yéetel táan u yaʼalik le bix aʼalaʼanil ka u kʼaʼayt máakoʼ. Baʼaleʼ óoliʼ tiʼ tuláakal sabadoʼob t-beetaj beyoʼ. Yaan horaeʼ le máakoʼoboʼ ku kʼamkoʼob, baʼaleʼ yaan kʼiineʼ ku baʼpachtikoʼon le máakoʼob jach pʼujaʼanoʼoboʼ, yéetel yaan kʼiineʼ ku kʼaʼabéettal k-púutsʼul tiʼ letiʼob».

Kex jach chʼaʼpachtaʼab u j-jaajkunajoʼob Jéeoba tu kʼiiniloʼob le kaʼapʼéel nojoch baʼateltáambaloʼ, maʼ sajakchajoʼob kʼaʼaytajiʼ. Tiʼ junpʼéel kʼaʼaytaj tu beetoʼob (kʼaj óoltaʼab U kʼiiniloʼob Kʼaʼaytaj), tu kʼaabaʼtaj «X-maʼ saajkil» yéetel xáanchaj cuarentaitres kʼiinoʼob, káaj 1 tiʼ diciembre tiʼ 1940 tak 12 tiʼ enero tiʼ 1941, táakpaj kex cincuenta mil j-kʼaʼaytajoʼob utiaʼal u tʼoxkoʼob óoliʼ ocho millones folletoʼob tu luʼumil Estados Unidos.

Yaʼab sukuʼunoʼob tsʼoʼok u chʼíijloʼobeʼ láayliʼ kʼajaʼantiʼob le bix úuchik u kʼaʼaytajoʼob yéetel x-maʼ saajkiloʼ. Yaan tiʼ letiʼobeʼ ku yaʼalikoʼobeʼ ichil yaʼab jaʼaboʼobeʼ tu yeʼesoʼob maʼ saajkoʼobiʼ, lelaʼ ilaʼab yoʼolal le baʼax ku yaʼalikoʼobaʼ: «Maʼ u xuʼulul k-kʼaʼaytaj tak tu xuul». Maʼ k-ojel uláakʼ bix ken k-kʼaʼayt le maʼalob péektsil táanil tiʼ u xuʼulsaʼal tiʼ le kʼasaʼan yóokʼol kaabaʼ. Baʼaleʼ yéetel u yáantaj Dioseʼ yaan u seguer k-kʼaʼaytaj yéetel x-maʼ saajkil bey xan yéetel fe.

[Uláakʼ baʼax ku tsoʼolol teʼ táan juʼun 9]

Desde úuchjeakileʼ ku kʼaʼabéettal maʼ u chʼaʼik máak saajkil kʼaʼaytaj