Pʼil ichnakoʼon jeʼex tu beetil Jesuseʼ
Pʼil ichnakoʼon jeʼex tu beetil Jesuseʼ
«Pʼil ichneneʼex yéetel payalchiʼineneʼex.» (MAT. 26:41)
¿BAʼAX JEʼEL A NÚUKIKEʼ?
¿Bix u yeʼesik le payalchiʼob k-beetik wa maʼ naayal k-óoloʼ?
¿Bix k-eʼesik maʼatech u naayal k-óol kʼaʼaytaj?
¿Baʼaxten jach unaj k-pʼil ich ken k-aktáant talamiloʼob, yéetel bix jeʼel u páajtal k-beetkeʼ?
1, 2. 1) ¿Baʼax kʼáatchiʼil jeʼel u beetik máak yoʼolal le bix úuchik u kuxtal Jesusoʼ? 2) ¿Jeʼel wa u páajtal u beetaʼal baʼax tu beetaj juntúul máak perfecto tumen kʼeban máakoʼobeʼ? Aʼal junpʼéel kettʼaan eʼesik.
MAʼ XAANEʼ jeʼel u tuklik máakeʼ: «¿Jeʼel wa u béeytal k-pʼil ich jeʼex úuchik u beetik Jesús, juntúul máak perfectoeʼ? Tsʼoʼoleʼ tumen yaan kʼiin béeychaj u yojéeltik baʼax ku taal u kʼiin kex yaʼab jaʼaboʼob u bin u yúuchleʼ, ¿jach wa tu jaajil kʼaʼabéetchaj u pʼil ich?» (Mat. 24:37-39; Heb. 4:15). Utiaʼal k-naʼatik baʼaxten jach kʼaʼanaʼan k-pʼil icheʼ, yáaxeʼ koʼoneʼex ilik u núukil le kaʼapʼéel kʼáatchiʼobaʼ.
2 ¿Jeʼel wa u páajtal u beetaʼal baʼax tu beetaj juntúul máak perfecto tumen kʼeban máakoʼobeʼ? Jeʼeleʼ, lelaʼ jeʼex u kaanbal máak tiʼ juntúul maʼalob j-kaʼansajeʼ. Lelaʼ jeʼel u páajtal k-ketik yéetel juntúul máak ku káajal u kanik chʼiin yéetel flechaeʼ. Kex tu káajbal maʼatech u tsayik tiʼ le diana tuʼux unaj u chʼinkoʼ, ku seguertik u kaanbal. Utiaʼal u kanik chʼiin yéetel le flechaoʼ, ku jach ilik bix u beetik le máax kaʼanskoʼ. Ku jach ilik bix u waʼatal, bix u tsʼáaik u kʼab yéetel bix u machik u kʼáanil le arcooʼ. Jujunpʼíitileʼ le máax ku kaanbaloʼ ku kanik u mach tubeel le arcooʼ, u chʼaʼ en cuentail bix u jaatsʼ le iikʼoʼ yéetel uláakʼ baʼaloʼob. Ken joʼopʼok u beetik jeʼex le máax kaʼanskoʼ, ku kanik u chʼin le flechaʼob tu chúumuk le dianaoʼ. Toʼon xaneʼ k-ilik beetik le baʼax tu yaʼalaj Jesusoʼ yéetel k-beetik jeʼex tu beetiloʼ.
3. 1) ¿Baʼaxoʼob tu yaʼalaj Jesús ku yeʼesik letiʼeʼ kʼaʼabéet u pʼil ich? 2) ¿Baʼax ken k-il teʼ xookaʼ?
3 ¿Jach wa tu jaajil unaj u pʼil ich kaʼach Jesús? Jach tu jaajil. Jeʼex teʼ tu tsʼook áakʼab tu máansaj yéetel u apostoloʼoboʼ, tu yaʼalajtiʼob: «Pʼil ichnakeʼex tin wéetel». Yéetel tu yaʼalaj: «Pʼil ichneneʼex yéetel payalchiʼineneʼex utiaʼal maʼ a lúubleʼex tiʼ túuntaj óolal» (Mat. 26:38, 41). U jaajileʼ Jesuseʼ mantatsʼ pʼil ichnaji, baʼaleʼ teʼ súutuk jach talamoʼ maas tu yilaj maʼ u náayal u yóol yéetel u pʼáatal naatsʼ tiʼ u Taata yaan teʼ kaʼanoʼ. Letiʼeʼ u yojel u disipuloʼobeʼ unaj u beetkoʼob beyoʼ, baʼaleʼ maʼ chéen teʼ súutukil jeʼeloʼ, baʼaxeʼ tak teʼ kʼiinoʼob ku taaloʼ. Koʼoneʼex ilik baʼaxten letiʼeʼ u kʼáat ka pʼil ichnakoʼon xan. Tsʼoʼoleʼ yaan k-ilik óoxpʼéel bix jeʼel k-beetik sáamsamal jeʼex tu beetiloʼ.
BAʼAXTEN JESUSEʼ U KʼÁAT KA PʼIL ICHNAKOʼON
4. Tumen yaan baʼax maʼ k-ojel tiʼ le baʼaxoʼob ku taal u kʼiinoʼ, ¿baʼaxten jach unaj k-pʼil ich?
4 Ichil uláakʼ tʼaanoʼobeʼ, Jesuseʼ u kʼáat ka pʼil ichnakoʼon yoʼolal le baʼaxoʼob maʼ k-ojel ku taal u kʼiinoʼ bey xan yoʼolal le baʼax k-ojloʼ. ¿U yojel wa tuláakal yoʼolal le baʼax ku taal u kʼiin le tiaʼan way Luʼumoʼ? Maʼatech, tumen letiʼeʼ tu yaʼalaj: «Baʼax kʼiin wa baʼax hora ken úuchuk[eʼ], mix máak u yojel, mix u angeliloʼob kaʼan, mix u Paal Máak. Chéen Jajal Dios le Taata u yojloʼ» (Mat. 24:36). Teʼ kʼiinoʼob jeʼeloʼ, Jesús, le Paaloʼ, maʼ u yojel jach baʼax kʼiin ken xuʼulsaʼak tiʼ le kʼasaʼan yóokʼol kaabaʼ. ¿Kux túun toʼon? ¿Máasaʼ yaan baʼaxoʼob maʼ k-ojel tiʼ le baʼaxoʼob ku taal u kʼiinoʼ? Yaan, maʼ k-ojel baʼax kʼiin ken u túuxt Jéeoba u Hijo utiaʼal u xuʼuls tiʼ le kʼasaʼan yóokʼol kaabaʼ. Tumen wa k-ojleʼ, ¿jeʼel wa u kʼaʼabéettal k-pʼil icheʼ? Jeʼex úuchik u yaʼalik Jesusoʼ, le xuʼulsajiloʼ chéen ken jáan taalak; le oʼolal unaj k-pʼil ich mantatsʼ (xokaʼak Mateo 24:43).
5, 6. 1) Yoʼolal le baʼaxoʼob k-ojel ken u beet Diosoʼ, ¿baʼaxten unaj k-pʼil ich mantatsʼ? 2) Tumen k-ojel baʼax u kʼáat u beet Satanaseʼ, ¿baʼaxten maas unaj k-pʼil ich?
5 Baʼaleʼ Jesuseʼ u yojel yaʼab tiʼ le jatsʼuts baʼaloʼob ku taal u kʼiin u yilaʼal, maʼ ojéelaʼan tumen u maas yaʼabil le máakoʼoboʼ. Kex maʼ yaʼab baʼax k-ojel, jeʼex letiʼoʼ, yoʼolal le baʼax tu kaʼansoʼ k-ojel yaʼab baʼaloʼob yoʼolal u Reino Dios bey xan le baʼaxoʼob ken u beet maʼ kun xáantaloʼ. Ken k-il le máakoʼob teʼ escuela, tuʼux k-meyaj wa teʼ tuʼux k-kʼaʼaytajoʼ, ¿máasaʼ k-tsʼáaik cuenta yaʼab baʼaxoʼob maʼ u yojloʼobiʼ yéetel maʼatech u naʼatkoʼob le jatsʼuts baʼaxoʼob ku kaʼansik le Bibliaoʼ? Lelaʼ uláakʼ baʼax oʼolal unaj k-pʼil ich mantatsʼ jeʼex úuchik u beetik Jesuseʼ, unaj k-kaxtik u súutukil utiaʼal k-tsikbaltik le baʼax k-ojel yoʼolal u Reino Diosoʼ. Maʼ unaj k-chaʼik u máan mix junpʼéel súutukil utiaʼal k-kʼaʼaytik le maʼalob péektsiloʼ. Bejlaʼeʼ yaʼab máaxoʼob unaj u yáantaʼal u salvartubaʼob (1 Tim. 4:16).
6 Baʼaleʼ yanchaj uláakʼ baʼax áant Jesús utiaʼal u pʼil ich mantatsʼ. Letiʼeʼ u yojel yaan u túuntaʼal u yóol yéetel yaan u chʼaʼpachtaʼal tumen Satanás utiaʼal u xuʼulul u meyajtik Dios. Satanaseʼ maʼ náay u yóoliʼ, mantatsʼ tu kaxtaj «uláakʼ súutukil maas maʼalob utiaʼal u kaʼa túuntik u yóol» (Luc. 4:13, NM). Baʼaleʼ Jesuseʼ mix juntéen náay u yóol. Tu pʼilaj u yich mantatsʼ utiaʼal u aktáantik le túuntaj óolal yéetel le chʼaʼpachtajiloʼ. ¿Máasaʼ bey unaj k-beetik xan bejlaʼoʼ? Beyoʼ, tumen Satanaseʼ láayliʼ «táan u máan jeʼel bix león ku yáakameʼ, táan u kaxantik máax u lukʼe». Le oʼolal le Bibliaoʼ ku yaʼaliktoʼon: «Ilawileʼex maʼalob baʼax ka beetkeʼex yéetel pʼil ichneneʼex» (1 Ped. 5:8). ¿Bix jeʼel u páajtal k-beetkeʼ?
LE PAYALCHIʼOʼ KU YÁANTKOʼON PʼIL ICH
7, 8. ¿Baʼax tu yaʼalaj Jesús yoʼolal le payalchiʼoʼ, yéetel bix úuchik u beetik letiʼ?
7 Le Bibliaoʼ ku yeʼesik u kʼaʼabéetil u payalchiʼ máak utiaʼal u pʼil ich (Col. 4:2; 1 Ped. 4:7). Maʼ sáam u yaʼal Jesús tiʼ u disipuloʼob ka pʼil ichnakoʼob tu yéeteleʼ, tu yaʼalajtiʼob: «Pʼil ichneneʼex yéetel payalchiʼineneʼex utiaʼal maʼ a lúubleʼex tiʼ túuntaj óolal» (Mat. 26:41). ¿Chéen wa unaj u beetkoʼob teʼ súutukil tumen jach talam yaniloʼoboʼ? Maʼatech. Le baʼax tu yaʼaloʼ ku yeʼesik baʼax unaj k-beetik sáamsamal.
8 Jesuseʼ tu yeʼesaj u kʼaʼabéetil le payalchiʼoʼ. Maʼ xaaneʼ, kʼajaʼantoʼoneʼ juntéenjeakeʼ payalchiʼinaj bul áakʼab tiʼ u Taata. Koʼoneʼex máansik t-tuukul le baʼax úuchoʼ (xokaʼak Lucas 6:12, 13). Tu kʼiinil yáaxkʼiin. Maʼ xaaneʼ Jesuseʼ tiaʼan naatsʼ tiʼ u noj kaajil Capernaum, le tuʼux kajaʼan kaʼachoʼ. Ka joʼopʼ u chíinil le kʼiinoʼ, naʼak tiʼ junpʼéel tiʼ le witsoʼob yanoʼob aktáan tiʼ u kʼáaʼnáabil Galileaoʼ. Le táan u yilik u éeʼjochʼeʼentaloʼ, maʼ xaaneʼ tu yilaj bix u bin u tʼaʼabal le lamparaʼob de aceite tu kaajil Capernaum yéetel uláakʼ kaajoʼob yanoʼob naatsʼ tiʼoʼ. Ka tu káajsaj u beetik u payalchiʼ tiʼ Jéeobaeʼ jach búuyi. Máan le minutoʼoboʼ bey xan le horaʼoboʼ. Jujunpʼéelileʼ, le sáasil ku juul tu yotoch le máakoʼob teʼ kaajoʼ joʼopʼ u bin u tuʼuploʼob. Le Lunaoʼ joʼopʼ u bin u kaʼantal. Yéetel le baʼalcheʼob ku jóokʼloʼob janal de áakʼaboʼ joʼopʼ jóokʼloʼob. Baʼaleʼ tumen jach buuyleʼ maʼ tu tsʼáaj cuentaiʼ. Maʼ xaaneʼ letiʼeʼ payalchiʼinaj yoʼolal bix ken u yéeyil u doce apostoloʼob. Maʼ xaaneʼ tu yaʼalaj tiʼ u Taata baʼaxoʼob ku tuklik yéetel baʼaxoʼob chiʼichnakkúuntik yoʼolal cada juntúul tiʼ u disipuloʼob, yéetel tu kʼáataj ka nuʼuktaʼak yéetel ka tsʼaʼabak naʼatil tiʼ.
9. ¿Baʼax ku kaʼansiktoʼon le úuchik u máansik Jesús junpʼéel áakʼab táan u payalchiʼoʼ?
9 ¿Táan wa u yeʼesik Jesús unaj u xáantal táan k-payalchiʼ? Maʼatech, tak letiʼeʼ tu yaʼalaj yoʼolal u disipuloʼob: «Tu jaajileʼ le [«puksiʼikʼaloʼ», NM] chúukaʼan u yóol baʼaleʼ le wíinkliloʼ minaʼan u muukʼ» (Mat. 26:41). Kex beyoʼ jeʼel u páajtal k-beetik jeʼex úuchik u beetkoʼ. Jeʼex ken k-chʼaʼtukult wa baʼax ichil k-kuxtal, ichil k-familia wa uláakʼ sukuʼunoʼobeʼ, ¿k-kaxtik wa táanil u nuʼuktaj k-Taata yaan teʼ kaʼanoʼ? Ken payalchiʼinakoʼoneʼ, ¿k-chʼaʼchiʼitik wa le baʼaxoʼob ku muʼyajtik le sukuʼunoʼoboʼ? ¿K-aʼalik wa baʼax yaan t-puksiʼikʼal wa chéen junpʼéeliliʼ baʼax suuk k-aʼalik? Jesuseʼ jach uts tu tʼaan u tsikbal kaʼach chéen tu juunal yéetel u Taata. Yoʼolal le baʼaxoʼob ku sen beetik máakoʼ jach séeb jeʼel u tuʼubultiʼ le baʼaxoʼob maas kʼaʼanaʼantakoʼ. Baʼaleʼ wa k-jóoʼsik yaʼab tiempo utiaʼal k-payalchiʼ tu jaajil k-óoleʼ, yaan u yáantkoʼon utiaʼal maʼ u náayal k-óol (Mat. 6:6, 7). Yaan k-maas náatsʼal tiʼ Jéeoba, tumen k-kʼáat k-maas bisba tu yéetel, tsʼoʼoleʼ yaan u yáantkoʼon utiaʼal maʼ k-beetik mix baʼal jeʼel u beetik k-náachtal tiʼ letiʼeʼ (Sal. 25:14).
MAʼ U NÁAYAL K-ÓOL KʼAʼAYTAJ
10. ¿Baʼax eʼesik Jesuseʼ tu yilaj u kʼaʼaytaj tuláakal súutukil?
10 Jesuseʼ maʼ náay u yóol utiaʼal u beetik le meyaj kʼubéentaʼabtiʼ tumen Jéeobaoʼ. Kex yaan meyajoʼob jeʼel u páajtal u beetaʼal kex ka náayak u yóol máakeʼ, yaan meyajoʼobeʼ kʼaʼabéet u jach kanáantik máak maʼ u náayal u yóol utiaʼal u beetik. Junpʼéel tiʼ le meyajoʼob beyoʼ letiʼe kʼaʼaytajoʼ. Jesuseʼ mix juntéen náay u yóol utiaʼal u kʼaʼaytik le maʼalob péektsiloʼ. Juntéenjeakil tsʼoʼok chúumuk kʼiin káajak u xíimbal yéetel u disipuloʼobeʼ, kʼuchoʼob tu kaajil Sicar. Ka bin u disipuloʼob u manoʼob janaleʼ, letiʼeʼ pʼáat jeʼelel tu jáal junpʼéel chʼeʼen yaan naatsʼ teʼ kaajoʼ. Kex beyoʼ kʼaʼaytajnaj ka tu yilaj jeʼel u páajtaleʼ. Juntúul koʼolel x-samariaileʼ taal u chʼaʼ jaʼ. Jesuseʼ jeʼel kaʼach u páajtal u jáan weenleʼ wa u kaxtik baʼax u beet utiaʼal maʼ u tsikbal yéetel le koʼoleloʼ, baʼaleʼ maʼ tu beetiʼ. Tsikbalnaj tu yéetel, bey túunoʼ le baʼax tu yaʼalajtiʼoʼ tu yáantaj yaʼab máakoʼob u salvart u kuxtaloʼob teʼ kaajoʼ (Juan 4:4-26, 39-42). ¿Jeʼel wa u páajtal k-kʼaʼaytik le maʼalob péektsil tiʼ jeʼel máaxak, jeʼex úuchik u beetkoʼ?
11, 12. 1) ¿Baʼax tu beetaj Jesús ka joʼopʼ u yaʼalaʼaltiʼ maʼ u bin? 2) ¿Chéen wa chʼíik kʼaʼaytaj Jesús?
11 Yaan máakoʼobeʼ tu yóotaj u beetoʼob u náayal u yóol Jesús, kex maʼ kʼaas u tuukuloʼob kaʼachiʼ. Tuukulnakoʼon tiʼ le baʼax tu beetaj u kajnáaliloʼob Capernaumoʼ. Ka tu yiloʼob le milagroʼob tu beetoʼ, jach kiʼimakchaj u yóoloʼob, ka joʼopʼ u yaʼalikoʼobtiʼ maʼ u bin. U jaajileʼ maʼ kʼaas u tuukuloʼob kaʼachiʼ. Baʼaleʼ u meyaj kaʼach Jesuseʼ u kʼaʼaytik le maʼalob péektsil tiʼ tuláakal «u saatal tamaniloʼob u kaajil Israel», maʼ chéen tiʼ junpʼéel kaajiʼ (Mat. 15:24). Le oʼolal tu yaʼalajtiʼob: «Kʼaʼabéet in tsʼáaik u maʼalob péektsilil [u reino] Jajal Dios tiʼ uláakʼ kaajoʼob xan, tumen le u biilal túuxtaʼaben» (Luc. 4:40-44). Jeʼex túun k-ilkoʼ, Jesuseʼ tu tsʼáaj táanil ichil u kuxtal u kʼaʼaytik le maʼalob péektsiloʼ, maʼ tu chaʼaj tiʼ mix baʼal yéetel tiʼ mix máak ka u beet u xuʼulul u kʼaʼaytajiʼ.
12 Baʼaleʼ ¿u kʼáat wa túun u yaʼaleʼ maʼ tu jóoʼsaj u súutukil utiaʼal u beetik uláakʼ baʼaloʼobiʼ? ¿Chéen wa chʼíik u beet u meyaj yéetel maʼ tu beetaj u cuentail le baʼaxoʼob kʼaʼabéet tiʼ u maasiloʼoboʼ? Maʼatech. Letiʼeʼ tu jóoʼsaj tiempo u beetik tu kaʼapʼéelal. Tu kiʼimakkúuntaj u yóol yéetel u amigoʼob. Tsʼoʼoleʼ maʼ tu taasaj bey mix baʼalil le familiaʼoboʼ, tu yeʼesaj ku naʼatik bix u yuʼubikubaʼob yéetel tu yeʼesaj yaabilaj tiʼ le mejen paalaloʼoboʼ (xokaʼak Marcos 10:13-16).
13. ¿Bix jeʼel u páajtal k-pʼil ich jeʼex úuchik u beetik Jesús yéetel k-jóoʼsik u tiempoil utiaʼal k-beetik uláakʼ baʼaloʼobeʼ?
13 ¿Bix jeʼel u páajtal k-pʼil ich jeʼex úuchik u beetik Jesús yéetel k-jóoʼsik u tiempoil utiaʼal k-beetik uláakʼ baʼaloʼobeʼ? Maʼ unaj k-chaʼik u náaysaʼal k-óol tumen le baʼaxoʼob ku tsʼáaik le yóokʼol kaabaʼ, mix tak ken aʼalaʼaktoʼon tumen k-amigoʼob wa k-láakʼtsiloʼob ka kuxlakoʼon jeʼex u beetik u maasileʼ. Jeʼex Jesuseʼ, k-ilik bey junpʼéel janal k-meyajtik Dioseʼ, tumen ku muʼukʼaʼankúuntik k-fe yéetel ku taasiktoʼon kiʼimak óolal (Juan 4:34). Baʼaleʼ maʼatech k-náachtal tiʼ u maasil mix tech k-taasikba noj baʼalil. Jeʼex Jesuseʼ, k-kʼáat k-meyajt yéetel kiʼimak óolal «le Dios kiʼimak u yóoloʼ» (1 Tim. 1:11, NM).
MAʼ U NÁAYAL K-ÓOL TAK KEN K-AKTÁANT TALAMILOʼOB
14. ¿Baʼax maʼ maʼalob ka k-beet ken k-aktáant talamiloʼobiʼ, yéetel baʼaxten?
14 Jeʼex tsʼoʼok k-ilkoʼ, le ka tu yaʼalaj Jesús tiʼ u disipuloʼob ka pʼil ichnakoʼoboʼ, tu beetaj teʼ súutukiloʼob táan u aktáantik nukuch talamiloʼoboʼ (xokaʼak Marcos 14:37). Lelaʼ ku yeʼesiktoʼoneʼ teʼ súutukiloʼob táan k-aktáantik talamiloʼoboʼ maas unaj k-beetik jeʼex úuchik u beetkoʼ. Yaʼab máakeʼ, ken u aktáantoʼob talamiloʼobeʼ tu juunaloʼob ku chʼaʼtuklikoʼob baʼax ken u beetoʼob, ku tuʼubultiʼob le baʼax ku yaʼalaʼal kaʼatéen tu libroil Proverbiosoʼ: «Yaan máakeʼ ku tuklik uts baʼax ku beetik, baʼaleʼ tu xuuleʼ ku naktáantik kíimil» (Pro. 14:12; 16:25). Wa k-beetik chéen le baʼax k-tuklik maʼalob, maases le ken k-aktáant nukuch talamiloʼoboʼ, jeʼel u bintoʼon kʼaasileʼ bey xan tiʼ k-láakʼtsiloʼob.
15. ¿Baʼax maʼ maʼalob jeʼel tak u beetik juntúul taatatsil utiaʼal u tsʼáaik baʼax kʼaʼabéet ichil u yotocheʼ?
15 Jeʼex juntúul taatatsileʼ, maʼ xaaneʼ jeʼel u talamtal u yilik u tsʼáaik baʼaxoʼob kʼaʼabéet tiʼ «u láakʼtsiloʼobeʼ» (1 Tim. 5:8). Le oʼolal maʼ xaaneʼ jeʼel u taaktal a kʼamik junpʼéel meyaj ku luʼsik u tiempoil u bin teʼ muchʼtáambaloʼoboʼ, utiaʼal u nuʼuktik le adoración ich familiailoʼ wa utiaʼal u jóokʼol kʼaʼaytaj. Maʼ xaaneʼ ku tuklikeʼ maʼalob baʼax ku beetik, baʼaleʼ lelaʼ jeʼel u beetik a náachtal jujunpʼíitil tiʼ Dioseʼ. Le oʼolaleʼ maas maʼalob ka k-beet le baʼax tu yaʼalaj Salomón teʼ Proverbios 3:5 yéetel 6, ku yaʼalik: «Oks a wóol tiʼ Yuumtsil yéetel tuláakal a puksiʼikʼal[,] maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej».
16. 1) ¿Bix úuchik u yeʼesik Jesús unaj k-kʼubik k-óol tiʼ baʼax ku yaʼalik Jéeoba maʼ tiʼ baʼaxoʼob k-tuklikiʼ? 2) ¿Bix u beetik yaʼab taatatsiloʼob jeʼex tu beetil Jesús ken u aktáantoʼob talamiloʼobeʼ?
16 Ka tu aktáantaj talamil Jesuseʼ, maʼ tu beetaj chéen le baʼax tu tuklaj maʼaloboʼ. ¡Chéen máans ta tuukul! Le máax maas yaan u naʼat yanchaj way Luʼumoʼ, maʼ tu beetaj chéen le baʼax tu tuklaj maʼaloboʼ. Jeʼex le ka túuntaʼab u yóol tumen Satanasoʼ, yaʼab u téenel tu yaʼalaj: «Le kiliʼich Tsʼíiboʼ ku yaʼalik» (Mat. 4:4, 7, 10). Baʼaxeʼ tu kʼubaj u yóol tiʼ le baʼax ku yaʼalik u Taata utiaʼal maʼ u lúubul tiʼ le túuntaj óolaloʼ, beyoʼ tu yeʼesaj kabal óolal, le modos jach u pʼeek Satanás yéetel maʼatech u yeʼesikoʼ. ¿K-beetik wa jeʼex úuchik u beetik Jesusoʼ? Le taatatsil beetik beyoʼ, ku nuʼuktikuba yéetel le baʼax ku yaʼalik le Bibliaoʼ, maases le ken u aktáant talamiloʼob. Lelaʼ bey u beetik yaʼab sukuʼunoʼob tiʼ tuláakal le yóokʼol kaabaʼ. Ku chúukpajal u yóoloʼob u tsʼáaʼob táanil ichil u kuxtaloʼob u Reino Dios yéetel u adorartikoʼob, maʼatech u binoʼob tu paach le ayikʼaliloʼoboʼ. Beyoʼ ku tsʼáaikoʼob le baʼax maas kʼaʼanaʼan tiʼ u familiaʼoboʼ. Jéeoba túuneʼ ku yáantkoʼob jeʼex u yaʼalikoʼ (Mat. 6:33).
17. ¿Baʼax péeksikech pʼil ich jeʼex úuchik u beetik Jesuseʼ?
17 Jeʼex túun k-ilkoʼ, Jesuseʼ tu yeʼesaj bix unaj k-pʼil ich, lelaʼ jach jeʼel u yáantkoʼoneʼ yéetel jeʼel tak u beetik k-salvartikbaeʼ. Kʼaʼajaktoʼoneʼ Satanaseʼ u kʼáat ka náayak k-óol, tumen beyoʼ jeʼel u pʼáatal maʼ muʼukʼaʼan k-fejeʼ, yaan u pʼáatal maʼ taak k-meyajtik Jéeobaiʼ yéetel jeʼel u xuʼulul k-beetik baʼax uts tu tʼaaneʼ (1 Tes. 5:6). Maʼ k-chaʼik u jóokʼol yéetel baʼax u kʼáat. Unaj k-pʼil ich jeʼex úuchik u beetik Jesusoʼ: unaj k-payalchiʼ, unaj k-kʼaʼaytaj tuláakal súutukil yéetel u chúukpajal k-óol k-aktáant le talamiloʼoboʼ. Beyoʼ yaan u yantaltoʼon kiʼimak óolal, kex tiaʼanoʼon tu tsʼook kʼiinil le kʼasaʼan yóokʼol kaabaʼ. Beyoʼ ken taalak u Yuumil le meyaj utiaʼal u xuʼuls tiʼ le kʼasaʼan yóol kaabaʼ, yaan u yilkeʼ maʼ naayal k-óoliʼ yéetel táan k-beetik baʼax uts tu tʼaan u Taata. ¡Jéeobaeʼ jach yaan u kiʼimaktal u yóol ken u tsʼáatoʼon le baʼax u yaʼalmaj, tumen chúukpaj k-óol k-meyajtoʼ! (Apo. 16:15.)
[U kʼáatchiʼiloʼob le xookoʼ]
[Foto yaan teʼ táan juʼun 6]
Jesuseʼ tu kʼaʼaytaj le maʼalob péektsil tiʼ juntúul koʼolel tu jáal junpʼéel chʼeʼenoʼ. ¿Baʼax ka beetik utiaʼal u páajtal a kʼaʼaytaj sáamsamal?
[Foto yaan teʼ táan juʼun 7]
Ken xooknakoʼon ich familiaileʼ k-eʼesik maʼ naayal k-óoliʼ
