Le baʼaxoʼob k-líiʼsmoʼ

«Tuláakal máax paktiken»

Ka kʼuch Charlotte White, juntúul precursora, tu kaajil Louisville (Kentucky, Estados Unidos) jelaʼan ilaʼabik, tumen yaʼab u máan yéetel junpʼéel maleta yaan u llantasil.

TU JAʼABIL 1908, le kiik Whiteoʼ meyajnajtiʼ le «auroramoviloʼ», le oʼolal ken jóokʼkeʼ jach ku paktaʼal tumen le máakoʼoboʼ. Letiʼeʼ tu yaʼalaj: «Yaʼab baʼax ku yaʼalik le máakoʼob kaʼachoʼ, tuláakal máax paktiken».

Le Máaxoʼob Xokik le Biblia, jeʼex kʼaj óolaʼanil kaʼach u j-jaajkunajoʼob Jéeobaoʼ, u yojloʼob kʼaʼabéet u tsikbaltikoʼob tiʼ uláakʼ máakoʼob le baʼaxoʼob tsʼoʼok u kankoʼob teʼ Bibliaoʼ. Yaʼab máak tsʼoʼok u naʼatkoʼob le baʼax ku kaʼansik le Biblia yoʼolal le libroʼob tu kʼaabaʼtaj La Aurora del Milenio (ka máan kʼiineʼ tu kʼaabaʼtaj xan Estudios de las Escrituras). Le máaxoʼob páajchaj u beetkoʼoboʼ, binoʼob tiʼ nukuch kaajoʼob yéetel mejen kaajoʼob yéetel uláakʼ tuʼuxoʼob utiaʼal u kʼaʼaytikoʼob le libroʼob ku meyaj bey «áantajoʼob utiaʼal le Máaxoʼob Xokik le Bibliaoʼ».

Tu jaʼabil 1908 le kiik White yéetel uláakʼ j-kʼaʼaytajoʼoboʼ, tu kʼaʼaytoʼob le seis libroʼob chuyaʼanoʼob tiʼ nookʼoʼ, cada junpʼéeleʼ ku tojoltik 1,65 dólares. Letiʼobeʼ maʼatech u kʼubkoʼob teʼ súutuk le libroʼob tiʼ u yuumil najoʼ, baʼaxeʼ ku tsʼíibtikoʼob máaxoʼob kʼáatik, bey túunoʼ ku biskoʼob tuláakʼ kʼiin, maases teʼ kʼiin ku boʼotaʼal u meyaj le máakoʼoboʼ. Juntúul máax maʼ uts tu tʼaan le kʼaʼaytajoʼ, joʼopʼ tak u yaʼalik jach junpʼíit taakʼin ku tsʼaʼabal yoʼolal le libroʼoboʼ.

Juntúul kiik ku kʼaabaʼtik Malinda Keefereʼ ku yaʼalikeʼ yaan semanaeʼ ku kʼáataʼaltiʼ doscientos, tak trescientos libroʼob. Baʼaleʼ tumen yaʼab libroʼob ku kʼáataʼaleʼ ku taasik junpʼéel nojoch talamil. Tumen  tak chéen junpʼéel libro, jeʼex le u seisoʼ, 740 u táan juʼuniloʼob. Tak le The Watch Tower teʼ kʼiinoʼob jeʼeloʼ ku yaʼalikeʼ 50 libroʼobeʼ 18 kilos u aalil, le oʼolal «chan talam» u bisaʼal kʼubbiloʼob, maases tumen le kiikoʼoboʼ.

Utiaʼal u pʼáatal maʼ talam u kʼuʼubul le libroʼoboʼ, le sukuʼun James Coleoʼ, tu beetaj junpʼéel armazón yaan kaʼapʼéel u mejen llanta jeʼel u páajtal u chʼoʼotol tiʼ junpʼéel maletaeʼ. Tumen maʼ kun seguer u kuchik u cajasil libroʼobeʼ Jameseʼ tu yaʼalaj: «¡Bejlaʼeʼ maas maʼ kun kaʼanal in paach!». Le baʼax tu beetoʼ tu yeʼesaj teʼ Asamblea tiʼ le Máaxoʼob Xokik le Biblia yanchaj Cincinnati (Ohio, Estados Unidos) tu jaʼabil 1908, tuláakal le máaxoʼob yanoʼoboʼ utschaj tu yichoʼob. Tiʼ cada u tséel le armazonoʼ ku taasik le kʼaabaʼ auroramóvil ich inglesoʼ (Dawn-Mobile), tumen le maletaoʼ maases ku meyaj utiaʼal u bisaʼal le libroʼob ku kʼaabaʼtik La Aurora del Milenio. Ka suukchaj u bisaʼaleʼ, pʼáat maʼ talam u bisaʼal chéen yéetel junpʼéel u kʼab máakiʼ. Cada juntúuleʼ ku tsʼáaik le maleta le bukaʼaj kaʼanlil u kʼáatoʼ, tsʼoʼoleʼ u llantasil de huleeʼ maʼalob u bin teʼ bejoʼob kʼaastak yéetel kʼoʼlemakoʼ. Ken tsʼoʼokok le kʼaʼaytajoʼ jeʼel u páajtal u wuʼutsʼul le armazón tu tséel le maleta utiaʼal u suut máak xíimbalil wa tiʼ camionoʼ.

Le kiikoʼob ku beetik u precursorailoʼoboʼ siibil u beetaʼaltiʼob le auroramoviloʼ. U maasil j-kʼaʼaytajoʼoboʼ ku boʼotkoʼob 2,50 dólares. Le kiik Keefer, ku chíikpajal teʼ fotooʼ, jach tu kanaj u bis le auroramóvil chéen yéetel junpʼéel u kʼaboʼ yéetel uláakʼ junpʼéel u kʼabeʼ ku bisik junpʼéel bolsa chuup yéetel libroʼob. Tiʼ junpʼéel u kaajil Pensilvaniaeʼ tu yilaj jach yaʼab máaxoʼob taak u kaanbaloʼob, le oʼolal kʼuch tak u beet óoxpʼéel wa kanpʼéel viaje utiaʼal u bisik le libroʼob kʼáataʼabtiʼoʼ.

Tu jóokʼbal u jaʼabil 1989, juntúul máax manejartik avionoʼobeʼ tu káajsaj u beetaʼal le maletaʼob yaan u llantail ku yilaʼaloʼob teʼ aeropuertoʼob yéetel teʼ noj kaajoʼoboʼ. Baʼaleʼ kex cien jaʼaboʼob bejlaʼeʼ, le Máaxoʼob Xokik le Bibliaoʼ, meyajnajtiʼob le auroramóvil utiaʼal u biskoʼob le maʼalob péektsil jeʼel tuʼuxakoʼ.

[Uláakʼ baʼax ku tsoʼolol teʼ táan juʼun 32]

Teʼ kʼiin ku kʼubik le libroʼoboʼ, le kiik Keeferoʼ ku beetik óoxpʼéel wa kanpʼéel viaje yéetel ku kʼáat máan tiʼ junpʼéel puente

[Uláakʼ baʼax ku tsoʼolol teʼ táan juʼun 32]

«Pʼáat maʼ talam u kʼuʼubul le libroʼoboʼ»