Unaj k-áantik le máakoʼob utiaʼal ka aajkoʼoboʼ
Unaj k-áantik le máakoʼob utiaʼal ka aajkoʼoboʼ
«Teʼexeʼ a wojleʼex tiʼ baʼax kʼiinil kuxaʼanoʼon: u kʼiinil a waajleʼex.» (ROM. 13:11, NM)
¿JEʼEL WA U PÁAJTAL A TSOLIKEʼ?
¿Baʼaxten jach unaj u kanáantik maʼ u wenel le máaxoʼob meyajtik Diosoʼ?
¿Baʼaxten unaj u yuʼubik máak baʼax ku yaʼalik u maasil yéetel u kanik u kʼaj óolt tiʼ baʼax jeʼel u páajtal u yáantik u maasileʼ?
¿Baʼaxten kʼaʼabéet k-eʼesik utsil teʼ kʼaʼaytajoʼ?
1, 2. ¿Baʼaxten ku yaʼalaʼal kʼaʼabéet u yajal yaʼab máakoʼob?
CADA jaʼabeʼ u milesil máakoʼob ku kíimloʼob tumen ku weenloʼob táan u manejaroʼob. Yanoʼobeʼ ku luʼsaʼal meyaj tiʼob tumen maʼ tu kʼuchloʼob tu yorail wa ku weenloʼob tu joʼol u meyajoʼob. Baʼaleʼ le wenel ku yaʼalik le Bibliaoʼ maas yaʼab talamil ku taasik. Le oʼolal ku yaʼalik: «Kiʼ u yóol máax maʼ táan u [weenliʼ]» (Apo. 16:14-16).
2 Kex tsʼoʼok u náatsʼal u kʼiinil Jéeobaeʼ, le máakoʼoboʼ bey táan u weenloʼobeʼ. Yaan tak tiʼ u nuuktakil le religionoʼoboʼ ku ketkoʼob le máaxoʼob yaan ichil u religionoʼob yéetel «giganteʼob ku weenloʼoboʼ». ¿Bix le wenel ku yaʼalik le Bibliaoʼ? ¿Baʼaxten le máaxoʼob meyajtik Diosoʼ jach unaj u yilkoʼob maʼ u weenloʼob? ¿Bix jeʼel k-áantik u maasil utiaʼal ka aajkoʼobeʼ?
¿BIX LE WENEL KU YAʼALIK LE BIBLIAOʼ?
3. ¿Bix kuxlik le máaxoʼob bey táan u weenloʼoboʼ?
3 Juntúul máax táan u weenleʼ mix baʼal uláakʼ ku beetik. Baʼaleʼ le máaxoʼob bey táan u weenloʼoboʼ maʼ xaaneʼ yaʼab meyaj ku beetkoʼob... baʼaleʼ mix baʼal yaan yil yéetel u meyajtikoʼob Dios. Chʼiikiloʼob tiʼ u baʼalubaʼob le kuxtalaʼ, tiʼ náaysaj óolaloʼob, ka jach kʼaj óoltaʼakoʼob wa ka ayikʼalchajkoʼob. Jach yaʼab baʼax ku beetkoʼob, le oʼolal óoliʼ maʼatech u jóoʼskoʼob u tiempoil u meyajtikoʼob Dios. Baʼaleʼ le máaxoʼob maʼ táan u weenloʼoboʼ u yojloʼob tu tsʼook kʼiinoʼob kuxaʼanoʼon, le oʼolal ku máanskoʼob le bukaʼaj tiempo ku páajtal utiaʼal u meyajtikoʼob Diosoʼ (2 Ped. 3:3, 4; Luc. 21:34-36).
4. ¿Baʼaxten jach unaj k-kanáantik maʼ «k-wenel jeʼel bix le uláakʼoʼoboʼ»?
4 (Xokaʼak 1 Tesalonicailoʼob 5:4-8.) Teʼ tekstoaʼ apóstol Pabloeʼ táan u yaʼalik tiʼ le sukuʼunoʼob maʼ u weenloʼob jeʼex u maasiloʼ. Junpʼéel bix jeʼel u yúuchultoʼoneʼ letiʼe u pʼáatal maʼ k-beetik le baʼax ku yaʼalik Jéeobaoʼ. Uláakʼ bixeʼ letiʼe maʼ k-chʼaʼik en cuentail tsʼoʼok u náatsʼal u kʼiinil u xuʼulsaʼal tiʼ le kʼasaʼan yóokʼol kaabaʼ; le oʼolal unaj k-kanáantik maʼ u joʼopʼol k-tuukul jeʼex u tuukuloʼoboʼ mix k-beetik le baʼaxoʼob ku beetkoʼoboʼ.
5. ¿Bix u tuukul le máakoʼob bey táan u weenloʼoboʼ?
5 Yaan máakeʼ ku tuklikeʼ minaʼan juntúul Dios utiaʼal u kʼubik cuenta tiʼ (Sal. 53:1). Yanoʼob xaneʼ ku tuklikoʼobeʼ maʼ yaabiltaʼan máak tumen Diosiʼ, le oʼolal minaʼan baʼax oʼolal u yaabiltaʼal xan. Yéetel yanoʼobeʼ ku tuklikoʼobeʼ utiaʼal u biskubaʼob yéetel Dioseʼ chúukaʼan chéen yéetel ka táakpajkoʼob ichil junpʼéel religión. Tuláakal le máakoʼob beyaʼ bey táan u weenloʼobeʼ. ¿Bix jeʼel u páajtal k-áantkoʼob utiaʼal ka aajkoʼobeʼ?
UNAJ K-KANÁANTIK MAʼ K-WENEL
6. ¿Baʼaxten jach kʼaʼabéet u kanáantik maʼ u wenel le máaxoʼob meyajtik Diosoʼ?
6 Utiaʼal u páajtal k-ajsik u maasileʼ, kʼaʼabéet maʼ táan k-weenliʼ. ¿Baʼax táakaʼan ichil lelaʼ? Le Bibliaoʼ ku yaʼalikeʼ le máaxoʼob bey táan u weenloʼoboʼ ku chʼíikiloʼob tiʼ baʼaloʼob «ku beetaʼal ichil éeʼjochʼeʼenil», jeʼex kʼaakʼas náaysaj óolaloʼob, káaltal, núupkʼeban, u beetik máak baʼaloʼob suʼtsiltak, baʼateliloʼob yéetel pʼekbail (xokaʼak Romailoʼob 13:11-14). U kanáantik máak maʼ u beetik le baʼaloʼob kʼaastakaʼ maʼ chéen chʼaʼabiliʼ. Le oʼolal unaj k-ilik maʼ u náayal k-óol. Wa juntúul máak táan u manejar maʼ tu jeʼelel kex táan u yuʼubik taak u weenleʼ, táan u tsʼáaik u kuxtal tu chiʼ kíimil. Bey túunoʼ, le máax meyajtik Diosoʼ maʼ unaj u tuʼubultiʼeʼ jeʼel u peʼertik u kuxtal wa ku wenel xaneʼ.
7. ¿Baʼax jeʼel u yúuchultoʼon wa ku joʼopʼol k-tuklik mix máak kun kʼamik le maʼalob péektsiloʼ?
7 Maʼ xaaneʼ juntúul sukuʼuneʼ jeʼel u tuklik mix máak uláakʼ kun kʼamik le maʼalob péektsil teʼ tuʼux ku kʼaʼaytajoʼ (Pro. 6:10, 11). Maʼ xaaneʼ ku tuklik: «Wa mix máak u kʼáat u kʼameʼ, ¿baʼax tiaʼal kin kíimskinba in wáantoʼob?». U jaajileʼ yaʼab máakeʼ bey táan u weenloʼobeʼ, baʼaleʼ jeʼel u kʼexpajal u kuxtaloʼob yéetel bix u tuukuloʼobeʼ. Yaan tiʼ letiʼobeʼ jeʼel u yaajloʼobeʼ wa jeʼel u kʼamkoʼob le maʼalob péektsiloʼ. Yéetel wa k-ilik maʼ k-wenel xaneʼ jeʼel u páajtal k-áantkoʼobeʼ, lelaʼ jeʼel u páajtal k-beetik wa k-ilik k-kʼaʼaytaj junpʼéel bix maas jeʼel u jatsʼutstal u yuʼubikoʼob le maʼalob péektsiloʼ. U jaajileʼ u kʼaʼajsik máak baʼaxten jach kʼaʼanaʼan le kʼaʼaytajoʼ ku yáantaj utiaʼal maʼ u wenel xan.
¿BAʼAXTEN JACH KʼAʼANAʼAN LE KʼAʼAYTAJOʼ?
8. ¿Baʼaxten jach unaj k-kʼaʼaytaj?
8 Maʼ u tuʼubultoʼoneʼ, kex maʼ u kʼaʼamal le maʼalob péektsiloʼ, ku tsʼáaik nojbeʼenil tiʼ Jéeoba yéetel ku yáantaj utiaʼal u béeytal le baʼax u tukultmoʼ. Maʼ kun xáantaleʼ Dioseʼ yaan u xuʼulsik tiʼ le máaxoʼob maʼ tu kʼamkoʼob le maʼalob péektsiloʼ. ¿Baʼax kun eʼesik wa ku náajmatkoʼob ka xuʼulsaʼakoʼob? Letiʼe baʼax tu beetoʼob ka kʼuchoʼon kʼaʼaytaj tu yiknaloʼoboʼ (2 Tes. 1:8, 9). Bey túunoʼ, maʼ unaj k-tuklik tumen «yaan u kaʼapúut kuxtal le kimenoʼoboʼ, le utstakoʼoboʼ bey xan le kʼasaʼanoʼoboʼ», maʼ kʼaʼabéet k-tsʼáaik k-óol kʼaʼaytajiʼ (Hch. 24:15). Le Bibliaoʼ ku yaʼalikeʼ le máaxoʼob beyoʼob «chivoʼoboʼ», «yaan u xuʼulsaʼaltiʼob utiaʼal mantatsʼ». Le kʼaʼaytaj k-beetkoʼ ku yeʼesik u yutsil Dios, tumen ku tsʼáaik u páajtalil tiʼ le máakoʼob u kʼexik u kuxtaloʼob utiaʼal u kʼamkoʼob «kuxtal minaʼan u xuul» (Mat. 25:32, 41, 46, NM; Rom. 10:13-15). Wa maʼ k-kʼaʼaytajeʼ, ¿bix jeʼel u yuʼubaʼal le maʼalob péektsil tumen u maasil utiaʼal u salvarkubaʼoboʼ?
9. ¿Bix u yáantkoʼon k-kʼaʼaytik le maʼalob péektsiloʼ, yéetel bix u yáantik u maasil?
9 Ken kʼaʼaytajnakoʼoneʼ tak toʼon k-kʼamik utsiloʼob (xokaʼak 1 Timoteo 4:16). ¿Tsʼoʼok wa k-tsʼáaik cuentaeʼ ken tʼaanakoʼon tiʼ Jéeoba yéetel tiʼ u Reinoeʼ, ku maas muʼukʼaʼantal k-fe yéetel k-maas yaabiltik Dios? ¿Máasaʼ ku yáantkoʼon k-eʼes jatsʼuts modos? ¿Máasaʼ ku kiʼimaktal k-óol ken táakpajkoʼon teʼ kʼaʼaytajoʼ? Yaʼab tiʼ toʼoneʼ tsʼoʼok k-ilik bix úuchik u yáantaʼal juntúul máax tiʼ t-tsʼáaj xook tumen u kiliʼich muukʼ Dios utiaʼal u kʼexik u kuxtal.
UNAJ K-ILIK BAʼAX JEʼEL U LÍIʼSIK U YÓOL U YUUMIL NAJEʼ
10, 11. 1) ¿Bix úuchik u yeʼesik Jesús yéetel Pablo jach ku chʼaʼikoʼob en cuentail baʼax kʼaʼabéet tiʼ u maasil? 2) ¿Baʼaxoʼob unaj k-beetik u cuentail utiaʼal k-maas maʼalobkíintik k-kʼaʼaytaj?
10 Toʼoneʼ jejeláas bix jeʼel u páajtal k-áantik le máakoʼob utiaʼal u kʼamkoʼob le maʼalob péektsiloʼ. Le oʼolal jach unaj k-ilik k-naʼatik baʼax maas jeʼel u kʼamik u yuumil najeʼ. Jesuseʼ bey úuchik u beetkoʼ. Tumen perfectoeʼ, páajchaj u yilik kʼuux juntúul fariseo kex mix baʼal ku yaʼalik, tu yilaj jach arrepentirnajaʼan juntúul koʼolel yéetel tu yilaj bix úuchik u tsʼáaik tuláakal baʼax yaan tiʼ juntúul koʼolel kimen u yíicham (Luc. 7:37-50; 21:1-4). Le oʼolal páajchaj u yáantik cada juntúul jeʼex kʼaʼabéeteʼ. Baʼaleʼ kex kʼebanoʼoneʼ jeʼel u páajtal k-tsʼáaik cuenta baʼax maas jeʼel u líiʼsik u yóol le máakoʼoboʼ. Juntúul máax tu beetaj beyoʼ apóstol Pablo, letiʼeʼ tu kʼexaj bix u kʼaʼaytaj utiaʼal u kʼaʼamal tumen máakoʼob jejeláas bix u tuukuloʼob (Hch. 17:22, 23, 34; 1 Cor. 9:19-23).
11 Wa k-ilik k-beetik jeʼex úuchik u beetik Jesús yéetel Pablooʼ, maʼ xaaneʼ yaan u páajtal k-áantik u maasil u kʼamoʼob le baʼax k-kʼaʼaytikoʼ. Jeʼex le ken tʼaanakoʼon yéetel wa máaxeʼ, unaj k-ilik tuʼux u taal, baʼaxoʼob uts tu tʼaan yéetel baʼaxoʼob ku aktáantik ichil u yotoch. Maʼ xaaneʼ jeʼel u páajtal k-káajsik k-tsikbal yoʼolal le baʼax ku beetkoʼ.
12. ¿Baʼaxten unaj k-kanáantik tiʼ baʼaxoʼob k-tsikbal ken jóokʼkoʼon kʼaʼaytaj?
12 Maʼ unaj u náayal u yóol máak ken jóokʼok teʼ kʼaʼaytajoʼ. Ken tsikbalnakoʼon yéetel le máax jokʼaʼanoʼon kʼaʼaytajoʼ jeʼel u líiʼsik k-óoleʼ. Baʼaleʼ maʼ unaj u tuʼubultoʼoneʼ jokʼaʼanoʼon utiaʼal k-kʼaʼaytik le maʼalob péektsil tiʼ u yuumiloʼob najoʼ (Ecl. 3:1, 7). Le oʼolal unaj k-ilik maʼ u náayal k-óol tʼaan chéen tiʼ yaanal baʼal ken jóokʼkoʼon teʼ kʼaʼaytajoʼ. K-tsikbal tiʼ le baʼax taak k-tsolik tiʼ u yuumiloʼob najoʼ jeʼel u yáantkoʼon utiaʼal maʼ u náayal k-óoleʼ. Kex yaan kʼiin jeʼel u yáantaj le celular ken jóokʼkoʼon teʼ kʼaʼaytajoʼ, unaj k-kanáantik maʼ k-núukik u tʼaan mix máak wa táan k-tsikbal yéetel u yuumil naj.
UNAJ K-ÁANTIK U MAASIL
13, 14. 1) ¿Bix jeʼel k-ojéeltik baʼax jeʼel u yóotik u yuʼub u yuumil najeʼ? 2) ¿Baʼax jeʼel u péeksik u yuumil naj utiaʼal ka maas taakchajak u kʼaj óoltik Dioseʼ?
13 Le sukuʼunoʼob maʼ táan u weenloʼob yéetel maʼ naayal u yóoloʼoboʼ ku yuʼubikoʼob baʼax ku yaʼalik u yuumil naj. ¿Baʼax kʼáatchiʼiloʼob jeʼel k-beetik tiʼ le máakoʼob teʼ tuʼux k-kʼaʼaytaj utiaʼal k-ojéeltik baʼax chiʼichnakkúuntikoʼoboʼ? ¿Chiʼichnakoʼob wa tumen jach yaʼab religionoʼob yaan, tumen jach yaʼab u beetaʼal loob teʼ tuʼux kajaʼanoʼoboʼ, wa tumen maʼ maʼalob bix u meyaj le gobiernoʼoboʼ? Wa ka tʼaanakoʼon tiʼ le bix jatsʼutsil beetaʼanil tuláakal baʼax kuxaʼan wa tiʼ le bix jeʼel u yáantik máak le baʼax ku yaʼalik le Bibliaoʼ, maʼ xaaneʼ jeʼel u taaktal u maas kʼaj óoltikoʼob Dioseʼ. Le payalchiʼoʼ junpʼéel baʼax óoliʼ tuláakal máak u yojel kʼaʼabéet u beetaʼal, tak jujuntúul tiʼ le máaxoʼob maʼatech u creertikoʼob Diosoʼ. Yaʼabeʼ ku tuklikoʼobeʼ ku yuʼubaʼal u payalchiʼob. Uláakʼoʼobeʼ taak u yojéeltikoʼob wa ku yuʼubik Dios tuláakal le payalchiʼoboʼ, yéetel wa maʼatech u yuʼubikeʼ, baʼax jeʼel u páajtal u beetik máak utiaʼal ka uʼuyaʼak u payalchiʼeʼ.
14 Utiaʼal k-maʼalobkíintik bix k-káajsik k-tsikbal yéetel u yuumil najeʼ, maʼalob ka k-il bix u beetik le sukuʼunoʼob úuch joʼopʼok u kʼaʼaytajoʼoboʼ. Unaj k-ilik bix u beetkoʼob utiaʼal maʼ u yuʼubik u yuumil naj bey táan u sen kʼáatchiʼitaʼal wa bey táan u yoksikubaʼob ichil u kuxtaleʼ. ¿Bix u tʼaanoʼob yéetel bix u paktikoʼob u yuumil naj utiaʼal u naʼatkoʼob baʼax ku yaʼalik? (Pro. 15:13.)
UNAJ K-KANIK K-EʼES MAʼALOB MODOS
15. ¿Baʼaxten unaj k-eʼesik utsil ken jóokʼkoʼon kʼaʼaytaj?
15 ¿Uts t-tʼaan wa ka jáan ajsaʼakoʼon jach tu yorail kiʼ k-wenel? Yaʼab máakeʼ jach maʼ uts tu tʼaaniʼ, le oʼolal unaj u yajsaʼal jujunpʼíitil. Lelaʼ bey u yúuchul ken k-óot k-ajs le máakoʼob bey táan u weenloʼoboʼ. Le oʼolal wa ku kʼuuxiloʼob ken k-xíimbaltoʼobeʼ, ¿baʼax unaj k-beetik? K-ilik k-naʼatik bix u yuʼubikubaʼob, k-tsʼáaik u diosboʼotikil tiʼob úuchik u yaʼalikoʼob bix u yuʼubikubaʼob yéetel maʼ k-kʼuuxil ken lukʼkoʼoniʼ (Pro. 15:1; 17:14; 2 Tim. 2:24). Wa k-eʼesik utsileʼ, maʼ xaaneʼ, jeʼel u yáantaj utiaʼal u kʼamkoʼob maʼalob ken xíimbaltaʼakoʼob tumen uláakʼ sukuʼuneʼ.
16, 17. ¿Baʼax unaj k-beetik utiaʼal k-kʼaʼaytaj tiʼ le máaxoʼob maʼ u kʼáat u yuʼuboʼoboʼ?
16 Yaan kʼiin xaneʼ k-ilik bix jeʼel u seguer k-tsikbal yéetel juntúul máax maʼ u kʼáat u kʼam tu káajbaleʼ. Yaan máaxoʼobeʼ ku yaʼalikoʼob «Teneʼ yaan in religión», wa «Maʼ in kʼáat in wuʼuy mix baʼaliʼ», baʼaleʼ chéen utiaʼal maʼ u seguer u tsikbal máak tu yéeteloʼob. Teʼ súutukiloʼob beyoʼ jeʼel u páajtal k-kʼáatiktiʼob yéetel yaabilaj baʼax chiʼichnakkúuntikoʼob utiaʼal k-péeksikoʼob u kʼamoʼob le maʼalob péektsiloʼ (xokaʼak Colosailoʼob 4:6).
17 Wa k-tʼaan yéetel wa máax ku yaʼaliktoʼon jach yaan baʼax ku beetkeʼ, maʼ xaaneʼ maas maʼalob ka lukʼkoʼoniʼ. Baʼaleʼ maʼ xaaneʼ k-ilik jeʼel u páajtal k-jáan tsikbaltiktiʼ le maʼalob péektsil kex u chan súutukoʼ. Yaan sukuʼunoʼobeʼ ku jáan xokikoʼob junpʼéel teksto u yuʼub u yuumil naj yéetel ku beetkoʼob junpʼéel kʼáatchiʼ utiaʼal u núukoʼob tuláakʼ kʼiin. Yaan kʼiineʼ yéetel le baʼax ku jáan aʼalikoʼoboʼ ku taaktal u maas kaanbal u yuumil naj, bey túunoʼ ku maas chan xáantal táan u tsikbaloʼob. ¿Máasaʼ maʼalob ka k-beet bey ken k-il jeʼel u páajtaloʼ?
18. ¿Bix jeʼel u páajtal k-kʼaʼaytaj kex maʼ le jokʼaʼanoʼon k-beeteʼ?
18 U suukileʼ yaʼab máakoʼob k-ilik sáamsamal yoʼolal le baʼaxoʼob k-beetkoʼ. Jeʼel u páajtal k-beetik u taaktal u yuʼubikoʼob le maʼalob péektsil wa k-líiʼsikba utiaʼal k-kʼaʼaytaj kex maʼ le jokʼaʼanoʼon k-beetiʼ. Yaʼab sukuʼunoʼobeʼ ku biskoʼob jóoʼsaʼaniloʼob ken xiʼikoʼob wa tuʼux. Maʼ xaaneʼ u tukultmoʼob xan baʼax tekstoil ken u xokoʼob wa ka yanak tuʼux. Wa k-ilik kʼaʼabéettoʼon áantajeʼ, jeʼel u páajtal k-kʼáatik tiʼ le superintendente tiʼ servicio yéetel tiʼ le precursoroʼob teʼ múuchʼuliloʼ.
UNAJ K-CHAAMBEL AJSIK K-LÁAKʼTSILOʼOB
19. ¿Baʼaxten maʼ unaj k-tuklik mix bikʼin kun kʼambil le maʼalob péektsil tumen k-láakʼtsiloʼoboʼ?
19 Tuláakloʼoneʼ k-kʼáat ka kʼaʼamak le maʼalob péektsil tumen k-láakʼtsiloʼoboʼ (Jos. 2:13; Hch. 10:24, 48; 16:31, 32). Wa tu káajbal maʼ tu kʼamkoʼobeʼ, maʼ xaaneʼ jeʼel u lúubul k-óoleʼ. Maʼ xaaneʼ jeʼel k-tuklikeʼ mix baʼal jeʼel u páajtal k-beetik wa k-aʼalik utiaʼal u kʼexik u tuukuloʼobeʼ. Baʼaleʼ yaan baʼaxoʼob jeʼel u beetik u kʼexik u tuukuloʼobeʼ. Wa maʼ xaaneʼ bejlaʼeʼ tsʼoʼok k-maas kanik bix jeʼel tsikbaltik le maʼalob péektsil junpʼéel bix jeʼel u kʼamkoʼoboʼ.
20. ¿Baʼaxten unaj k-kanáantik bix k-kʼaʼaytik le maʼalob péektsil tiʼ k-láakʼtsiloʼoboʼ?
20 Unaj k-chʼaʼik en cuentail bix u yuʼubikuba k-láakʼtsiloʼob (Rom. 2:4). Kʼaʼabéet k-tsikbaltiktiʼob le maʼalob péektsil yéetel yaabilaj jeʼex k-beetik ken jóokʼkoʼon teʼ kʼaʼaytajoʼ. Unaj u chúukpajal k-óol tiʼob yéetel k-eʼesik tsiikil tiʼob. Ichil junpʼíit tʼaanoʼobeʼ jeʼel u páajtal k-aʼaliktiʼob baʼax utsil tsʼoʼok k-kʼamik desde káajak k-meyajtik Jéeobaeʼ (Efe. 4:23, 24). Unaj k-beetik u tsʼáaikoʼob cuenta bix u yáantkoʼon Jéeoba yéetel bix u kaʼanskoʼon utiaʼal ka xiʼiktoʼon utsil (Isa. 48:17). Unaj k-eʼesiktiʼob bix unaj u kuxtal juntúul máax meyajtik Dios.
21, 22. Tsikbalt junpʼéel baʼax uchaʼan ku yeʼesik maʼ unaj u xuʼulul k-tsʼáaik k-óol k-áant k-láakʼtsiloʼob utiaʼal u kankoʼob u jaajiloʼ.
21 Maʼ úucheʼ juntúul kiikeʼ tu tsʼíibtaj: «Yéetel baʼaxoʼob kin beetik yéetel kin waʼalikeʼ, kin tsʼáaik u yojéelt in láakʼtsiloʼob baʼax kin creertik. Maʼatech u máan mix junpʼéel jaʼab wa maʼ in túuxtik junpʼéel carta tiʼob. Kex beyoʼ máan maas tiʼ treinta jaʼaboʼob chéen teen meyajtik Dios ichil in láakʼtsiloʼob».
22 Le kiikoʼ ku seguer u yaʼalik: «Junpʼéel kʼiineʼ tin tʼanaj tiʼ teléfono juntúul in kiik náach kajaʼan. Letiʼeʼ tu yaʼaleʼ tu kʼáataj tiʼ u nojchil u religión ka xiʼik tsʼaabil xook tiʼ yéetel le Bibliaoʼ, baʼaleʼ maʼ biniʼ. Ka tin waʼalajtiʼ jeʼel in tsʼáaik xook tiʼeʼ, letiʼeʼ tu yaʼalajten: “Maʼalob, baʼaleʼ in kʼáat ka a wojéelteʼ maʼ ken in beetinba u x-jaajkunaj Jéeoba”. Ka tsʼoʼok in túuxtiktiʼ le libro ¿Baʼax jach tu jaajil ku kaʼansik le Bibliaoʼ?, joʼopʼ in maas tʼanik cada wa baʼax kʼiin. Baʼaleʼ tumen maʼ u xok le librooʼ, tin waʼalajtiʼ ka k-múul xoke, bey túunoʼ xooknajen kex quince minutos tu yéetel, tsʼoʼoleʼ t-tsikbaltaj baʼax u kʼáat u yaʼalal le tekstoʼob ku taaskoʼ. Ka máan wa jaypʼéel kʼiin chéen quince minutos k-xookeʼ, joʼopʼ u jóoʼsik u súutukil utiaʼal u maas xáantal. Ka tsʼoʼokeʼ letiʼ tʼanken utiaʼal ka xooknakoʼon, yaan kʼiineʼ mix aajken ken tʼaanakiʼ yéetel yaan kʼiineʼ k-xook tak kaʼatéen ichil junpʼéel kʼiin. Ka tu tsʼáaj junpʼéel jaʼabeʼ okjaʼanaji, yéetel ka máan uláakʼ junpʼéel jaʼabeʼ tu beetaj u precursorail».
23. ¿Baʼaxten maʼ unaj u náakal k-óol k-ajs le máakoʼob bey táan u weenloʼoboʼ?
23 U jaajileʼ kʼaʼabéet maʼ u xuʼulul u kanik máak bix jeʼel u yajsik le máakoʼob bey táan u weenloʼoboʼ. Láayliʼ yaan máakoʼob uts u puksiʼikʼaloʼob jeʼel u yóotkoʼob ka k-áantoʼobeʼ. Cada meseʼ ku yokjaʼ óoliʼ veinte mil u túulul túumben j-jaajkunajoʼob tiʼ Jéeoba. Le oʼolal maʼalob ka k-beet le baʼax tu yaʼalaj Pablo tiʼ Arquipo, juntúul cristiano kuxlaj teʼ yáax siglooʼ: «Ilawil ka [a] beet maʼalob le meyaj u kʼubéentmajtech Yuumtsiloʼ» (Col. 4:17). Le uláakʼ xookoʼ yaan u yáantkoʼon k-il baʼax u kʼáat u yaʼal maʼ u xuʼulul k-tsʼáaik k-óol teʼ kʼaʼaytajoʼ.
[U kʼáatchiʼiloʼob le xookoʼ]
[Cuadro yaan teʼ táan juʼun 13]
BIX JEʼEL U KANÁANTIK MAʼ U WENEL MÁAKEʼ
▪ U tsʼáaik u yóol u beet baʼax ku yaʼalik Dios
▪ U náachkuntkuba tiʼ baʼaloʼob kʼaastak
▪ Maʼ u tuʼubul tiʼ máak séeb jeʼel xan u weenleʼ
▪ Maʼ unaj k-tuklik wa mix máak uláakʼ kun kʼamik le maʼalob péektsiloʼ
▪ U kaxtik máak uláakʼ bix jeʼel u kʼaʼaytajeʼ
▪ Maʼ u tuʼubul tiʼ máak u kʼaʼabéetil u kʼaʼaytaj
