¿Kʼajaʼan wa tech?

¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

¿Baʼax jeʼel k-kanik tiʼ le baʼax úuch tiʼ Salomonoʼ?

Dioseʼ tu beetaj u bin utsil tiʼ rey Salomón yéetel tu tsʼáaj junpʼéel meyaj u beete. Baʼaleʼ le táan u beetik u reyiloʼ tu beetaj baʼaloʼob ku bin tu contra baʼaxoʼob ku yaʼalik Dios. Tsʼoʼok u beel yéetel u hija faraón, juntúul koʼolel ku adorartik yaanal diosoʼob bey xan yéetel uláakʼ koʼoleloʼob, tsʼoʼoleʼ tu chaʼaj u náachkuntaʼal tiʼ Dios tumen le koʼoleloʼobaʼ. Lelaʼ ku kaʼansiktoʼoneʼ jach unaj k-ilik maʼ u joʼopʼol k-beetik wa k-tuklik baʼaloʼob kʼaastak (Deu. 7:1-4; 17:17; 1 Rey. 11:4-8) (15/12, táan juʼun 10 tak 12).

¿Maʼalob wa ka meyajnak anticonceptivo tiʼ le tsʼokaʼan u beeloʼoboʼ?

Le Bibliaoʼ maʼatech u yaʼalik wa maʼ maʼalob ka u kanáantuba máak utiaʼal maʼ u yantal u paalaliʼ. Le oʼolal letiʼe máaxoʼob tsʼokaʼan u beeloʼob unaj u chʼaʼtuklikoʼob wa yaan u yantal u paalaloʼoboʼ. Letiʼob kun chʼaʼtuklik wa yaan u meyaj anticonceptivo tiʼob maʼatech u beetik u abortar máak wa maʼ (1/1, táan juʼun 6).

¿Baʼaxten junpʼéel kʼeban le abortooʼ?

Dioseʼ kiliʼich u yilik le kuxtaloʼ yéetel juntúul chaambal tsʼoʼok u káajal u nojochtal tu jobnel u maamaeʼ láayliʼ junpʼéel kuxtal tu táaneʼ (Sal. 139:16). Le oʼolal tu yaʼalaj ka castigartaʼak le máax beetik loob tiʼ juntúul chaambal maʼ síijkiʼ; leloʼ ku yeʼesikeʼ u luʼsaʼal u kuxtal juntúul chaambal maʼ síijkeʼ bey ka u kíims máak u yéet máakileʼ (Éxo. 21:22, 23) (1/1, táan juʼun 6).

¿Yaan wa u xuʼulul le yóokʼol kaab tu jaʼabil 2012?

Yoʼolal baʼax ku yaʼalik junpʼéel úuchben calendario mayaoʼ, yaan máaxoʼob aʼalikeʼ le yóokʼol kaabaʼ yaan u xuʼulul tu jaʼabil 2012. Baʼaleʼ maʼ kun xuʼulsbil, tumen le Bibliaoʼ ku yaʼalikeʼ le Luʼumaʼ beetaʼab utiaʼal u kajtal máak yéetel yaan u pʼáatal utiaʼal minaʼan u xuul (Ecl. 1:4; Isa. 45:18) (1/1 táan juʼun 13).

¿Bix k-ojéeltik desde teʼ yáax siglooʼ maʼ xuʼuluk u yantal sukuʼunoʼob yéeyaʼanoʼob utiaʼal u binoʼob kaʼan way Luʼumeʼ?

Tu kettʼaanil «le trigo» yéetel «le kʼaakʼas xíiwoʼ», Jesuseʼ tu yaʼaleʼ «le maʼalob trigooʼ letiʼ le máaxoʼob yanoʼob teʼ [reinooʼ]» (Mat. 13:24-30, 38). Le kʼaakʼas xíiwoʼ yaan u líikʼil paʼteʼ yéetel le trigo tak ken kʼuchuk u kʼiinil le joochoʼ. Le oʼolal kex maʼ tu páajtal k-aʼalik jach máaxoʼob táakaʼanoʼob ichil le máaxoʼob ku chíikbesik le trigooʼ, jeʼel u páajtal k-aʼalikeʼ desde teʼ yáax siglooʼ, maʼ xuʼuluk u yantal way Luʼum sukuʼunoʼob yéeyaʼanoʼob utiaʼal u binoʼob kaʼaniʼ (15/1, táan juʼun 7).

¿Baʼaxten jach maʼalob úuchik u kaʼansaj Pablo?

Yaan jejeláas baʼax oʼolal: 1) Tʼaanaj tiʼ u Reino Dios yéetel tiʼ Jesucristo. 2) Tu yeʼesaj jach jaaj baʼax ku yaʼalik utiaʼal u kʼuchul tu puksiʼikʼal le máakoʼoboʼ. 3) Meyajnajtiʼ le Kiliʼich Tsʼíiboʼob utiaʼal u kaʼansajoʼ. 4) Maʼ tu kaxtaj chéen u yutsiliʼ, baʼaxeʼ tu yilaj u kʼaʼaytaj desde «jaʼatskab kʼiin tak u binbal kʼiin» (Hch. 28:23). (15/1, táan juʼun 13).

¿Baʼax jeʼel u yáantkoʼon utiaʼal maʼ k-tsʼíiboltik baʼax yaan tiʼ u maasileʼ?

Lelaʼ jujunpʼéel tiʼ le baʼaxoʼob jeʼel u páajtal k-beetkoʼ: k-ilik yaabiltik le sukuʼunoʼoboʼ, k-bisikba yéetel máaxoʼob meyajtik Dios, k-beetik uts tiʼ u maasil yéetel u kiʼimaktal k-óol yéetel le kiʼimak u yóoloʼoboʼ (Rom. 12:15) (15/2, táan juʼun 16 yéetel 17).

Ken joʼopʼok k-tsʼáaik junpʼéel tsolnuʼukeʼ, ¿baʼax maʼ unaj u tuʼubultoʼoniʼ?

Unaj u yilik máak jach baʼax talamil yaan. Maʼ u jáan tsʼáaik máak tsolnuʼuk kex taak u yáantaj. U chʼaʼik máak en cuentail le baʼax ku yaʼalik le Bibliaoʼ. Wa ku béeytaleʼ u yilik máak baʼax ku yaʼalik le jóoʼsaʼaniloʼoboʼ. Maʼ a chʼaʼtuklik baʼax unaj u beetik u maasil (15/3, táan juʼun 7 tak 9).

¿Baʼaxten tu yaʼalaj Jesús tiʼ le máaxoʼob ku kaʼansik ka u xíimbaltoʼob kaʼapʼéel kilómetro wa chéen junpʼéel ku yaʼalaʼaltiʼob ka u xíimbaltoʼobiʼ? (Mat. 5:41, NM.)

Teʼ kʼiinoʼob jeʼeloʼ u kaajil Israeleʼ tiaʼan yáanal u páajtal Romaeʼ, le oʼolal jeʼel u páajtal u yaʼalikoʼob tiʼ jeʼel máaxak ka u beet wa baʼax meyajileʼ. Le ka tu yaʼalaj tiʼ le máaxoʼob ku kaʼansik ka u xíimbaltoʼob kaʼapʼéel kilómetro le ken aʼalaʼaktiʼob ka u xíimbaltoʼob junpʼéeleʼ, táan u yaʼaliktiʼob ka u beetoʼob yéetel kiʼimak óolal le baʼax maʼ kʼaas ku kʼáataʼal tumen le autoridadoʼoboʼ (1/4, táan juʼun 9).