¿Ka chíikbesik wa u kiʼichkelmil Jéeoba?
¿Ka chíikbesik wa u kiʼichkelmil Jéeoba?
«Beyoʼon junpʼéel néen ku yeʼesik u kiʼichkelmil Yuumtsileʼ.» (2 COR. 3:18)
¿BAʼAX JEʼEL A NÚUKIKEʼ?
¿Baʼaxten jeʼel u béeytal k-nojbeʼenkúuntik Jéeoba kex kʼebanoʼoneʼ?
¿Bix u yáantkoʼon le payalchiʼ yéetel le muchʼtáambaloʼob utiaʼal k-chíikbesik u kiʼichkelmil Diosoʼ?
¿Baʼax jeʼel u yáantkoʼon utiaʼal maʼ u xuʼulul k-tsʼáaik nojbeʼenil tiʼ Jéeobaeʼ?
1, 2. ¿Baʼaxten jeʼel u páajtal k-chíikbesik u kiʼichkelmil Jéeobaeʼ?
TULÁAKAL máakeʼ yaan tiʼ baʼax chíikaʼan tiʼ u taata wa tiʼ u maama. Le oʼolal yaan kʼiineʼ ku yaʼalaʼal tiʼ juntúul chan xiʼipal: «¡Jach chíikaʼanech tiʼ a taata!». Wa maʼ xaaneʼ ku yaʼalaʼal tiʼ juntúul chan x-chʼúupal: «Jach beyech jeʼex a maamaeʼ». Tsʼoʼoleʼ le paalaloʼoboʼ ku beetkoʼob le baʼax ku yilik u beetaʼal tumen u taataʼoboʼ. Kux túun toʼon, ¿jeʼel wa u páajtal k-beetik jeʼex Jéeoba, le k-Taata yaan teʼ kaʼanoʼ? Kex maʼ tu páajtal k-ilkeʼ, k-ilik bix u modos tiʼ le baʼaxoʼob u beetmoʼ, ken k-xok le Bibliaoʼ yéetel ken tuukulnakoʼon tiʼ le baʼaxoʼob k-xokik, maases tiʼ le baʼaxoʼob tu kaʼansaj yéetel tu beetaj Jesucristo, u Hijooʼ (Juan 1:18; Rom. 1:20). Bey túunoʼ jeʼel u páajtal k-chíikbesik u kiʼichkelmil Jéeobaeʼ.
2 Táanil tiʼ u beetaʼal Adán yéetel Eva tumen Dioseʼ, u yojel jeʼel u páajtal u beetkoʼob baʼax ken u yaʼaltiʼobeʼ, u yeʼeskoʼob le modos ku yeʼesik letiʼoʼ yéetel u tsʼáaikoʼob nojbeʼenil tiʼ (xokaʼak Génesis 1:26, 27). Ken k-eʼes le jatsʼuts modos ku yeʼesik le Máax beet tuláakal baʼaloʼ, k-chíikbesik u kiʼichkelmil Dios. Lelaʼ tuláakal máak jeʼel u páajtal u beetkeʼ, kex jeʼel baʼaxak chʼiʼibalil u taaleʼ, jeʼel baʼalak luʼumileʼ wa kex kaʼanchajaʼan u xook wa maʼ. ¿Baʼaxten? Tumen «Jajal Dioseʼ mix máak jelaʼan u paktik, baʼaleʼ tiʼ jeʼel baʼalak kaajileʼ ku kʼamik le máax tsikikeʼ» (Hch. 10:34, 35).
3. ¿Bix jeʼel k-uʼuyikba ikil k-meyajtik Jéeobaeʼ?
3 Le sukuʼunoʼob yéeyaʼanoʼob utiaʼal u binoʼob kaʼanoʼ ku chíikbeskoʼob u kiʼichkelmil Jéeoba. Apóstol Pablo, juntúul tiʼ letiʼobeʼ, ku yaʼalik: «Beyoʼon junpʼéel néen ku yeʼesik u kiʼichkelmil Yuumtsileʼ; bey túunoʼ toʼoneʼ táan k-jelbesaʼal utiaʼal k-béeytal [maas] jeʼel bix Cristoeʼ, tumen u kiʼichkelmileʼ táan u yantal [maas] tiʼ toʼon» (2 Cor. 3:18). Ka éem le profeta Moisés tu witsil Sinaí yéetel le Diez Leyoʼoboʼ u yicheʼ táan u léembal, tumen tsʼoʼok u tʼaan yéetel Jéeoba (Éxo. 34:29, 30). Baʼaleʼ toʼoneʼ mix juntéen tʼaanak Jéeoba t-éetel, yéetel u táan k-icheʼ maʼatech xan u léembal. Baʼaleʼ ku yilaʼal kiʼimak k-óol ken tʼaanakoʼon yéetel u maasil tiʼ Jéeoba, tiʼ u modos yéetel tiʼ le baʼax u tukultmaj yoʼolal wíinikoʼ. Jeʼex le néem ku beetaʼal úuchjeakil yéetel junpʼéel metal sen pulirtaʼanoʼ, le sukuʼunoʼob yéeyaʼanoʼob utiaʼal u binoʼob kaʼan yéetel u maasil máaxoʼob meyajtik Diosoʼ ku chíikbeskoʼob u kiʼichkelmil Dios ichil u kuxtaloʼob yéetel ken jóokʼkoʼob kʼaʼaytaj (2 Cor. 4:1). Le oʼolal cada juntúul tiʼ toʼoneʼ unaj u tuklik: «¿Kin chíikbesik wa u kiʼichkelmil Jéeoba yéetel bix kuxliken bey xan yéetel le bix in tsʼáaik in wóol in kʼaʼayt le Reinooʼ?».
K-KʼÁAT K-CHÍIKBES U KIʼICHKELMIL JÉEOBA
4, 5. 1) ¿Baʼax talamil yaantoʼon, jeʼex úuchik xan tiʼ Pabloeʼ? 2) ¿Baʼax ku talamtaltoʼon yoʼolal le kʼebanoʼ?
4 Toʼoneʼ k-kʼáat k-nojbeʼenkúunt Jéeoba yéetel tuláakal baʼaxoʼob k-beetik. Baʼaleʼ lelaʼ maases maʼatech u páajtal k-beetik. Tak Pabloeʼ bey úuchiktiʼoʼ (xokaʼak Romailoʼob 7:21-25). Letiʼeʼ tu yaʼalaj baʼaxten tuláakal máak talam u yilik u beetik baʼax maʼalob: «Tumen tuláakloʼob tsʼoʼok u kʼebantaloʼob yéetel náach yaniloʼob tiʼ u nojbeʼenil Jajal Dios» (Rom. 3:23). Bey túunoʼ tuláakal máakeʼ tiaʼan yáanal u páajtalil le kʼeban tu máansaj Adanoʼ (Rom. 5:12; 6:12).
5 Baʼaleʼ ¿baʼax le kʼebanoʼ? Tuláakal le baʼaxoʼob ku bin tu contra u modos Jéeoba, u leyoʼob yéetel le baʼax uts tu tʼaanoʼ. Le kʼebanoʼ ku beetik u xuʼulul k-bisikba yéetel Dios. Yoʼolal le kʼebanoʼ maʼ tu páajtal k-chíikbesik u kiʼichkelmil tubeel, jeʼex juntúul máak ku chʼiin yéetel u flecha maʼ tu páajtal u tsayik tuʼux u kʼáateʼ. Yaan kʼiineʼ taaliʼ tiʼ máak yaan kʼiineʼ maʼatech (Núm. 15:27-31). Le kʼebanoʼ junpʼéel baʼax k-taasik desde ken síijikoʼon, tsʼoʼoleʼ ku beetik k-náachtal tiʼ Dios (Sal. 51:5; Isa. 59:2; Col. 1:21). U maas yaʼabil máakeʼ náach yanil tiʼ Jéeoba, le oʼolal maʼ tu páajtal u chíikbeskoʼob u kiʼichkelmil. Jeʼex túun k-ilkoʼ, jach yaʼab talamil ku taasiktoʼon le kʼebanoʼ.
6. ¿Baʼaxten kex kʼebanoʼoneʼ jeʼel u páajtal k-chíikbesik u kiʼichkelmil Dioseʼ?
6 Kex kʼebanoʼoneʼ, Jéeobaeʼ ku «tsʼáaiktoʼon alab óolal» wa esperanza (Rom. 15:13). Letiʼeʼ tu tsʼáaj u kuxtal Jesucristo utiaʼal u jáalkʼabtikoʼon tiʼ le kʼebanoʼ. Ken k-tsʼáa k-fe tiʼ u kuxtal tu kʼuboʼ, ku xuʼulul «k-palitsiltaʼal tumen le kʼebanoʼ», bey túunoʼ ku páajtal k-chíikbesik u kiʼichkelmil Jéeoba (Rom. 5:19; 6:6; Juan 3:16). Wa k-bisikba tu yéeteleʼ, yaan u kʼamkoʼon teʼ kʼiinoʼobaʼ yéetel teʼ kʼiinoʼob ku taaloʼ yaan u luʼsik le kʼeban yaan t-wíinkliloʼ yéetel yaan u tsʼáaiktoʼon le kuxtal minaʼan u xuuloʼ. Bey túunoʼ kex kʼebanoʼoneʼ, Dioseʼ u yojel jeʼel u páajtal k-chíikbesik u kiʼichkelmileʼ. ¿Máasaʼ jach jatsʼuts le páajtalil u tsʼaamajtoʼonoʼ?
BIX JEʼEL K-CHÍIKBESIK U KIʼICHKELMIL DIOSEʼ
7. ¿Baʼax unaj k-beetik wa k-kʼáat k-chíikbes u kiʼichkelmil Dios?
7 Utiaʼal u páajtal k-chíikbesik u kiʼichkelmil Dioseʼ, cada juntúul tiʼ toʼoneʼ kʼaʼabéet u yilik baʼax maʼ maʼalob suuk u beetkiʼ (2 Cró. 6:36). Wa tsʼoʼok k-kʼaj óoltik máakalmáakeʼ unaj k-kanáantik maʼ k-suut beete. Chéen bey jeʼel u páajtal k-tsʼáaik nojbeʼenil tiʼ Diosoʼ. Jeʼex wa tsʼoʼok u suuktal k-chaʼantik pornografíaeʼ, ¿baʼax unaj k-beetik? Unaj k-ilik u kʼaʼabéetil k-kaxtik áantaj (Sant. 5:14, 15). Lelaʼ letiʼe yáax baʼax kʼaʼabéet k-beetik utiaʼal k-tsʼáaik nojbeʼenil tiʼ Dios mantatsʼoʼ. Bey túunoʼ, tuláakloʼon táan k-meyajtik Dioseʼ, mantatsʼ unaj k-ilik wa táan k-kuxtal jeʼex u yaʼalik u leyoʼobeʼ (Pro. 28:18; 1 Cor. 10:12). Wa k-kʼáat k-chíikbes u kiʼichkelmil Dioseʼ mantatsʼ unaj k-ilik maʼ k-beetik baʼax kʼaas, kex jeʼel baʼaxakeʼ.
8. ¿Baʼax jeʼel u páajtal k-beetik kex kʼebanoʼoneʼ?
8 Chéen Jesús tsʼoʼok u béeytal u beetik jach tubeel baʼax u kʼáat Dios yéetel u chíikbesik u kiʼichkelmil. Kex kʼebanoʼoneʼ unaj k-beetik tuláakal le ku páajtal utiaʼal k-beetik jeʼex letiʼoʼ (1 Ped. 2:21). Jéeobaeʼ ku chʼaʼik en cuentail yéetel ku yilik tuláakal le baʼax k-beetik utiaʼal k-tsʼáaik nojbeʼenil tiʼoʼ.
9. ¿Bix u yilaʼal le Biblia tumen le máaxoʼob u kʼáatoʼob lúubul utsil tiʼ Diosoʼ?
9 Le Bibliaoʼ ku sáasilkuntik k-beel yéetel ku yáantkoʼon k-maʼalobkíint k-kuxtal. Le oʼolal jach unaj k-xokik, k-tuukul tiʼ baʼax ku yaʼalik yéetel k-ilik k-naʼatik le baʼaxoʼob talamtak ku kaʼansikoʼ (Sal. 1:1-3). Wa k-xokik sáamsamaleʼ jeʼel u yáantkoʼon k-kʼex bix k-kuxtaleʼ (xokaʼak Santiago 1:22-25). Wa maas k-kʼaj óol le baʼax ku yaʼalik le Bibliaoʼ, yaan u maas muʼukʼaʼantal k-fe yéetel maas yaan k-kanáantik maʼ k-lúubul tiʼ nukuch kʼebanoʼob utiaʼal ka lúubkoʼon utsil tu táan Jéeoba (Sal. 119:11, 47, 48).
10. ¿Bix u yáantkoʼon le payalchiʼ utiaʼal k-maas tsʼáaik k-óol k-meyajt Jéeobaoʼ?
10 Utiaʼal k-chíikbesik u kiʼichkelmil Dioseʼ, kʼaʼabéet xan k-beetik le baʼax ku yaʼalik le Bibliaaʼ: «Payalchiʼineneʼex mantatsʼ» (Rom. 12:12). Unaj k-kʼáatik tiʼ Jéeoba ka u yáantoʼon utiaʼal k-adorartik jeʼex uts tu tʼaaneʼ. Jeʼel u páajtal k-kʼáatiktiʼ ka u tsʼáatoʼon u kiliʼich muukʼeʼ, ka u yáantoʼon utiaʼal u maas muʼukʼaʼantal k-fe, ka u tsʼáatoʼon u muukʼil utiaʼal maʼ k-lúubul tiʼ le túuntaj óolaloʼoboʼ yéetel ka u yáantoʼon utiaʼal «[k-]tsolik maʼalob u tʼaaniloʼob le jaajoʼ» (2 Tim. 2:15; Mat. 6:13; Luc. 11:13; 17:5). Unaj k-kʼubik k-óol tiʼ Jéeoba jeʼex u kʼubik u yóol juntúul chan paal tiʼ u taataeʼ. Ken k-kʼáattiʼ ka u yáantoʼon utiaʼal k-maas tsʼáaik k-óol k-meyajteʼ, unaj k-creertik jach yaan u beetik. Maʼ unaj k-tuklik wa jeʼel u tsʼíikil yoʼolal le baʼax ken k-aʼaltiʼ ich payalchiʼoʼ. Letiʼeʼ mix juntéen jeʼel u beetik beyoʼ. Jeʼel u páajtal k-beetik payalchiʼ tiʼ letiʼ utiaʼal k-kiʼikiʼtʼantikeʼ, utiaʼal k-tsʼáaik nib óolal tiʼ yéetel utiaʼal k-kʼáatik u yáantaj utiaʼal k-aktáantik le talamiloʼoboʼ. Tsʼoʼoleʼ jeʼel u páajtal k-kʼáatiktiʼ ka u yáantoʼon k-nojbeʼenkúunt u kiliʼich kʼaabaʼ yéetel le bix k-meyajtikoʼ (Sal. 86:12; Sant. 1:5-7).
11. ¿Bix jeʼel u yáantkoʼon le muchʼtáambaloʼob utiaʼal k-chíikbesik u kiʼichkelmil Diosoʼ?
11 Dioseʼ u tsʼaamaj le «palitsil chúukpajaʼan u yóol yéetel yaan u naʼat» utiaʼal u kanáantik le máaxoʼob meyajtikoʼ (Mat. 24:45-47; Sal. 100:3). Le «palitsiloʼ» u kʼáat ka k-chíikbes u kiʼichkelmil Jéeoba. Jeʼex juntúul máak ku chuy nookʼ jeʼel u páajtal u yutskíintik k-nookʼeʼ, le muchʼtáambaloʼob xanoʼ jeʼel u yáantkoʼon utiaʼal «k-utskíintik» wa baʼax ichil k-kuxtaleʼ (Heb. 10:24, 25). Le oʼolal jach unaj k-ilik k-kʼuchul tu pʼiis horaiʼ. Wa ku suuktal k-kʼuchul tsʼoʼok u káajaleʼ, maʼ ken k-láaj uʼuy le kaʼansajoʼob jeʼel u yáantkoʼon k-maas maʼalobkíint k-meyajtik Jéeobaoʼ.
UNAJ K-BEETIK JEʼEX DIOSEʼ
12. ¿Bix jeʼel k-beetik jeʼex Dioseʼ?
12 Utiaʼal k-chíikbesik u kiʼichkelmil Jéeobaeʼ, kʼaʼabéet k-beetik jeʼex u beetik letiʼoʼ (Efe. 5:1). Junpʼéel bix jeʼel u páajtal k-beetkeʼ letiʼe ka tuukulnakoʼon jeʼex u tuukuloʼ. Wa maʼ k-chʼaʼik en cuentail baʼax ku yaʼalik ichil k-kuxtaleʼ, maʼ ken k-tsʼáa nojbeʼenil tiʼ yéetel yaan u bintoʼon kʼaasil. Le yóokʼol kaabaʼ tiaʼan yáanal u páajtalil le Kʼaasilbaʼaloʼ, le oʼolal jach kʼaʼabéet k-pʼektik le baʼax ku pʼektik Jéeobaoʼ yéetel k-yaabiltik le baʼax u yaabiltmoʼ (Sal. 97:10; 1 Juan 5:19). Unaj u jach kʼaʼajaltoʼoneʼ utiaʼal u kʼamik Dios le adoración k-tsʼáaiktiʼoʼ, kʼaʼabéet k-beetik tuláakal baʼal utiaʼal u nojbeʼenil (xokaʼak 1 Corintoiloʼob 10:31).
13. ¿Baʼaxten unaj k-pʼektik le baʼax kʼaasoʼ, yéetel baʼax unaj k-beetik?
13 Jéeobaeʼ u pʼeek u beetaʼal baʼax kʼaas, le oʼolal bey unaj k-tuukul xanoʼ. Bey túunoʼ maʼ unaj k-natsʼikba tiʼ baʼax jeʼel u beetik k-kʼebantaleʼ. Junpʼéel tiʼ le baʼaxoʼob jach unaj k-kanáantikbaoʼ letiʼe baʼaxoʼob ku yaʼalik le apostataʼoboʼ, tumen jeʼel u beetik u xuʼulul k-tsʼáaik nojbeʼenil tiʼ Dioseʼ (Deu. 13:6-9). Bey túunoʼ jach unaj k-náachtal tiʼ le apostataʼoboʼ yéetel tiʼ le máaxoʼob chéen ku yaʼalikoʼob táan u meyajtikoʼob Dios, baʼaleʼ maʼatech u tsʼáaikoʼob nojbeʼenil tiʼ, kex wa k-láakʼtsiloʼob (1 Cor. 5:11). Mix junpʼéel utsil jeʼel k-jóoʼsik ka óolt eʼesik tiʼ le apostataʼob maʼ jaaj baʼax ku yaʼalikoʼoboʼ mix tiʼ le u maasil máaxoʼob aʼalik baʼal tiʼ u kaajal Jéeobaoʼ. Le oʼolal jach unaj k-kanáantik maʼ k-ilik baʼax ku yaʼalikoʼob tiʼ revistaʼob, tiʼ Internet wa tiʼ uláakʼ baʼaloʼob, tumen jeʼel u náachkuntkoʼon tiʼ Jéeobaeʼ (xokaʼak Isaías 5:20 yéetel Mateo 7:6).
14. ¿Máakalmáak tiʼ u modos Jéeoba jach unaj u yantaltoʼon, yéetel baʼaxten?
14 Junpʼéel bix jeʼel k-beetik jeʼex Jéeobaeʼ letiʼe k-eʼesik yaabilajoʼ (1 Juan 4:16-19). Le yaabilaj k-eʼesik ichiloʼonoʼ ku yeʼesik jach tu jaajil táan k-tsaypachtik Jesús yéetel táan k-meyajtik Jéeoba (Juan 13:34, 35). Kex yaan kʼiin k-beetik baʼax maʼ jach maʼalobeʼ, unaj u seguer k-ilik k-eʼesik yaabilaj. Wa k-ilik k-eʼesik yaabilaj yéetel uláakʼ jatsʼuts modoseʼ, maʼ ken k-beet baʼax maʼ maʼalob tiʼ u maasiliʼ yéetel maʼ ken k-lúubul tiʼ nukuch kʼebanoʼob (2 Ped. 1:5-7).
15. ¿Bix u yáantkoʼon le yaabilajoʼ?
15 Le yaabilajoʼ ku péeksikoʼon k-beet uts tiʼ u maasil (Rom. 13:8-10). Wa k-yaabiltmaj k-núupeʼ maʼ ken k-tus yéetel yaanal. Wa k-yaabiltmaj le ancianoʼob yéetel k-chʼaʼik en cuentail le meyaj ku beetkoʼoboʼ yaan k-beetik baʼax ku yaʼalikoʼob yéetel kiʼimak óolal. Wa le paalal u yaabiltmaj u taataʼoboʼ yaan u yeʼeskoʼob tsiikil tiʼob, yaan u yuʼubikoʼob u tʼaanoʼob yéetel maʼ kun tʼaanoʼob kʼaas tu contraʼob. Wa k-yaabiltmaj k-éet máakileʼ yaan k-eʼesik tsiikil tiʼ, maʼ ken k-taasba noj baʼalil tiʼ (Sant. 3:9). Yéetel wa le ancianoʼob u yaabiltmoʼob u j-tamanoʼob Dioseʼ, yaan u tratartikoʼob yéetel yaabilaj (Hch. 20:28, 29).
16. ¿Bix u yáantaj le yaabilaj teʼ kʼaʼaytajoʼ?
16 Le yaabilajoʼ junpʼéel modos jach unaj k-eʼesik ken jóokʼkoʼon kʼaʼaytaj. Yoʼolal k-yaabilaj tiʼ Jéeobaeʼ, maʼ tu xuʼulul k-kʼaʼaytik le maʼalob péektsil kex yaan máaxoʼob maʼatech u kʼamkoʼoboʼ. Tsʼoʼoleʼ k-líiʼsikba tubeel utiaʼal k-maas maʼalobkíintik k-kʼaʼaytik le Reinooʼ. Wa jach tu jaajil k-yaabiltmaj Dios yéetel k-éet máakileʼ, maʼ ken k-il le kʼaʼaytaj bey junpʼéel kuuchoʼ, baʼaxeʼ yaan k-beetik yéetel kiʼimak óolal (Mat. 10:7).
MAʼ U XUʼULUL K-TSʼÁAIK NOJBEʼENIL TIʼ JÉEOBA
17. ¿Bix u yáantkoʼon le k-naʼatik le kʼebanoʼ maʼatech u chaʼik k-chíikbesik u kiʼichkelmil Dios?
17 Toʼoneʼ k-naʼatik le talamil ku taasik le kʼebanoʼ, maʼ jeʼex u maasil máakoʼoboʼ. Le oʼolal k-ojel utiaʼal k-chíikbesik u kiʼichkelmil Dioseʼ, kʼaʼabéet k-ilik maʼ k-beetik baʼax kʼaas. Kʼaʼabéet k-kaʼansik k-conciencia utiaʼal u yáantkoʼon k-séeb luʼs t-tuukul junpʼéel baʼax maʼ maʼalobiʼ (Rom. 7:22, 23). Kex k-uʼuyik bey maʼ tu páajtal k-beetkeʼ, Dioseʼ jeʼel u yáantkoʼon utiaʼal k-beetik baʼax uts tuláakal súutukileʼ (2 Cor. 12:10).
18, 19. 1) ¿Baʼax unaj k-beetik utiaʼal maʼ k-lúuʼsaʼal tumen le kʼasaʼan angeloʼoboʼ? 2) ¿Baʼax unaj k-chʼaʼtuklik k-beetik?
18 Uláakʼ baʼax kʼaʼabéet k-beetik utiaʼal k-tsʼáaik nojbeʼenil tiʼ Jéeobaeʼ, letiʼe k-tsʼáaikba tu contra le kʼasaʼan angeloʼoboʼ, utiaʼal lelaʼ unaj u meyajtoʼon «le u nuʼukulil baʼateʼel ku tsʼáaik[toʼon] Jajal Diosoʼ» (Efe. 6:11-13). Satanaseʼ láayliʼ u kʼáat ka tsʼaʼabak tiʼ letiʼ le nojbeʼenil chéen tiʼ Dios unaj u tsʼaʼabaloʼ. Tsʼoʼoleʼ láayliʼ ku meyajtiʼ jejeláas baʼaloʼob utiaʼal u beetik k-náachtal tiʼ Jéeobaeʼ. Le oʼolal le ken chúukpajak u yóol juntúul xiib, juntúul koʼolel wa juntúul chan paal kex kʼebaneʼ, ku tsʼáaik nojbeʼenil tiʼ Dios yéetel ku yeʼesik chéen táan u tuus le Kʼaasilbaʼaloʼ. Bejlaʼeʼ u millonesil máaxoʼob beetik beyoʼ. Bey túunoʼ mantatsʼ unaj k-nojbeʼenkúuntik Jéeoba jeʼex u beetik le angeloʼob teʼ kaʼanoʼ, letiʼobeʼ ku yaʼalikoʼob: «Yuumtsil yéetel k-Jajal Dios, techeʼ [ka] náajmatik a kʼamik nojbeʼenil, tsiikil bey xan páajtalil; tumen teech ta beetaj tuláakal baʼaloʼob, tu yoʼolal a wóolajeʼ yanoʼob yéetel beetaʼaboʼob» (Apo. 4:11).
19 Unaj k-chʼaʼtuklik k-tsʼáaik nojbeʼenil tiʼ Jéeoba, kex jeʼel baʼaxak ka úuchkeʼ. Dioseʼ jach ku kiʼimaktal u yóol ken u yil bukaʼaj máakoʼob táan u xachkubaʼob u beetoʼob jeʼex letiʼoʼ yéetel ku chíikbeskoʼob u kiʼichkelmil (Pro. 27:11). Jeʼex Davideʼ, k-aʼalik xan: «In Yuumtsil, in [Dios], yaan in kiʼikiʼtʼantikech yéetel tuláakal in puksiʼikʼal[,] yaan xan in nojbeʼenkúuntik mantatsʼ a kʼaabaʼ» (Sal. 86:12). Maʼ kun xáantaleʼ tuláakal le máaxoʼob meyajtik Dios yéetel chúukaʼan óolaloʼ, maas jach maʼalob ken u chíikbesoʼob u kiʼichkelmil Dios mantatsʼ, tumen yaan u luʼsaʼal le kʼeban yaan tu wíinkliloʼoboʼ. ¡Bukaʼaj jatsʼutsil waleʼ! ¿A kʼáat wa xan a chíikbes u kiʼichkelmil Jéeoba utiaʼal mantatsʼ? Wa a kʼáateʼ, ¿táan wa a wilik a chíikbesik yéetel le baʼaxoʼob ka beetik teʼ kʼiinoʼobaʼ?
[U kʼáatchiʼiloʼob le xookoʼ]
[Fotoʼob yaan teʼ táan juʼun 27]
¿Táan wa a wilik a chíikbesik u kiʼichkelmil Jéeoba yéetel le baʼaloʼob beyaʼ?
