U tsikbalil u kuxtal sukuʼunoʼob

Mantatsʼ tu yáanten le nukuch máakoʼoboʼ

Tsikbaltaʼab tumen Elva Gjerde

Kex óoliʼ setenta jaʼaboʼob bejlaʼeʼ, bin juntúul máak xíimbaltikoʼon, le baʼax tu yaʼalaj tiʼ in taataoʼ tu kʼexaj in kuxtal. Desde teʼ kʼiin jeʼeloʼ yaʼab uláakʼ máaxoʼob tsʼoʼok u yáantkenoʼob. Tsʼoʼoleʼ leloʼ tsʼoʼok u yáantken utiaʼal u yantalten juntúul amigo maas nojoch. Paʼatik in tsoliktech baʼaxten kin waʼalik beyoʼ.

SÍIJEN tu jaʼabil 1932 tu kaajil Sydney (Australia). In taataʼobeʼ ku creertikoʼob yaan Dios, baʼaleʼ maʼatech u binoʼob iglesia. Teneʼ saajken kaʼach tiʼ Dios, tumen in maamaeʼ ku yaʼalikten kaʼachi: «Letiʼeʼ mantatsʼ táan u yilkech, wa ka beetik baʼax kʼaaseʼ ku castigarkech». Kex beyoʼ uts tin wich in xokik le Bibliaoʼ. Utiaʼal u jóokʼbal semanaeʼ ku bin in tía u tsikbalttoʼon baʼaxoʼob ku yaʼalik le Bibliaoʼ, jach jatsʼuts in wuʼuyik. Jach kin páaʼtik u kʼiinil u xíimbaltikoʼon.

Tin x-lóoʼbayanileʼ, in taataeʼ tu xokaj u jaats libroʼob tsʼaʼan tiʼ in maama tumen juntúul koʼolel x-jaajkunaj tiʼ Jéeoba yaan u jaʼabil. Letiʼeʼ utschaj tu yich le baʼaxoʼob tu xokaj teʼ libroʼoboʼ, le oʼolal tu yóotaj ka tsʼaʼabak xook tiʼ yéetel le Bibliaoʼ. Junpʼéel áakʼab táan u xook yéetel juntúul j-Jaajkunaj tin wotocheʼ, tu yilaj in taʼakminba utiaʼal in wuʼuyik le baʼax ku xokikoʼoboʼ. Le jach taʼaytak u yaʼalikten ka xiʼiken chital tu kaʼatéenoʼ, ka aʼalaʼabtiʼ tumen le sukuʼunoʼ: «¿Baʼaxten maʼ chaʼik u taal Elva kutal xan?». Teʼ kʼiin jeʼeloʼ tin wuʼuyaj bey jel káajal tu beetaj in kuxtaleʼ, tumen káaj in biskinba yéetel Jéeoba, le u jaajil Diosoʼ.

Maʼ úuch tiʼ leloʼ, teen yéetel in taataeʼ joʼopʼ k-bin teʼ muchʼtáambaloʼoboʼ, yéetel letiʼeʼ joʼopʼ u kʼexik bix u kuxtal, pʼáat maʼ séeb u tsʼíikiliʼ. Ka ilaʼab tumen in maama yéetel Frank, in sukuʼun, bix u yáantkoʼon k-xokik le Bibliaoʼ, ka káaj u binoʼob xan muchʼtáambal. * Tu kantúuliloʼoneʼ t-maas tsʼáaj k-óoleʼ, ka okjaʼanajoʼon utiaʼal k-beetikba j-jaajkunajil tiʼ Jéeoba. Desde teʼ kʼiin jeʼeloʼ joʼopʼ in biskinba yéetel uláakʼ sukuʼunoʼob maas yaan u jaʼabiloʼob tiʼ teen, letiʼobeʼ jach tu yáantenoʼob ichil tuláakal u kʼiinil in kuxtal.

LE BAʼAX TIN CHʼAʼTUKLAJ IN BEETKOʼ

Teneʼ uts tin tʼaan in wantal yéetel le sukuʼunoʼob maas yaan u jaʼabiloʼob teʼ múuchʼuliloʼ. Jeʼex le kiik Alice Place, tsikbalt le maʼalob péektsil toʼonoʼ, kʼuchen in wil bey in abuelaeʼ. Letiʼ kaʼansen kʼaʼaytaj yéetel tu líiʼsaj in wóol utiaʼal ka okjaʼanaken, lelaʼ tin beetaj le ka tu tsʼáajten 15 jaʼaboʼoboʼ.

Jach tin bisinba yéetel Percy Dunham bey xan yéetel Madge (Margaret), u yatan; letiʼobeʼ maas yaan u jaʼabiloʼob tiʼ teen yéetel tu yáantenoʼob in yéey bix jeʼel in maas meyajtik Dioseʼ. Teneʼ jach uts tin wich kaʼach le matematicasoʼ, le oʼolal taak kaʼach in beetik in profesorail. Baʼaleʼ le bix u kuxtaloʼoboʼ tu yáanten in kʼex bix in tuukul. Tu jaʼabil 1930 tak 1939,  letiʼobeʼ tu beetaj u misioneroiloʼob tu luʼumil Letonia. Yéetel le ka káaj le kaʼapʼéel nojoch baʼateltáambal tu luʼumil Europaoʼ, invitartaʼaboʼob meyaj tu Betelil Australia, naatsʼ tiʼ u kaajil Sydney. Letiʼobeʼ mantatsʼ tu tsikbaltoʼobten baʼaxoʼob jatsʼutstak tu yiloʼob le táan u beetik u misioneroiloʼoboʼ. Yoʼolal le áantaj tu tsʼáajoʼobtenoʼ, tin wileʼ maas maʼalob ka in tsʼáa xook yéetel le Bibliaoʼ ke ka in kaʼans matemáticas. Ka tin chʼaʼtukleʼ yaan u kʼuchul u kʼiinil in beetik in misionerail.

Letiʼobeʼ tu yaʼaloʼobten ka in beet in precursorail, tumen leloʼ jeʼel u yáantken utiaʼal in chukpachtik le baʼax tsʼoʼok in chʼaʼtuklikoʼ. Bey túunoʼ tu jaʼabil 1948, le yaanten 16 jaʼaboʼoboʼ, káaj in beetik in precursorail junmúuchʼ yéetel le diez precursoroʼob yanoʼob kaʼach tin múuchʼulil yaan tu kaajil Hurstville (Sydney).

Kanpʼéel jaʼab kʼaʼaytajnajen tiʼ uláakʼ kanpʼéel noj kaajoʼob yanoʼob tu estadoil Nueva Gales del Sur yéetel Queensland. Juntúul tiʼ le koʼoleloʼob tin yáax tsʼáaj xookoʼ ku kʼaabaʼtik Betty Law (u apellido u yíichameʼ Remnant). Kaʼapʼéel jaʼab u maas nojchil tiʼ teen yéetel jach uts. Ka máan kʼiineʼ tin múul beetaj in precursorail tu yéetel tu kaajil Cowra, kex 57 leguas ka tak táanchumuk (230 kilómetros) yanil tu chiikʼin Sydney. Kex maʼ jach nojoch tiempo múul meyajnajoʼoneʼ, láayliʼ jach maʼalob k-bisikba tak bejlaʼeʼ.

Ka máan kʼiineʼ túuxtaʼaben in beet in precursora especialil tu kaajil Narrandera, 55 leguas (220 kilómetros) tu noojol-chikʼin Cowra. In wéet kʼaʼaytajeʼ Joy Lennox (u apellido u yíichameʼ Hunter), juntúul precursora jach ku tsʼáaik u yóol teʼ kʼaʼaytajoʼ, letiʼeʼ kaʼapʼéel jaʼab xan maas nojchil tiʼ teen. Teʼeloʼ minaʼan uláakʼ j-jaajkunaj tiʼ Jéeobaiʼ, chéen toʼon kaʼatúuloʼon. Tu yotoch Ray yéetel Esther Irons, u yatan, k-pʼáatal wenel kaʼachi, letiʼobeʼ jach utsoʼob yéetel tu kʼamoʼob le maʼalob péektsil yéetel juntúul u hijo yéetel óoxtúul u hijaʼob. Ichil le semanaoʼ, le taatatsil yéetel u hijooʼ ku kanáantkoʼob tamanoʼob yéetel ku meyajtikoʼob trigo tiʼ junpʼéel granja maʼ jach náach tiʼ le kaajoʼ. Esther yéetel u hijaʼobeʼ ku meyajoʼob tiʼ junpʼéel naj tuʼux ku kʼuchul uʼulaboʼob. Utiaʼal domingoʼobeʼ, teen yéetel Joyeʼ k-kʼáaʼtik bakʼ u jaant le 12 máaxoʼob ku meyajoʼob teʼ tren u kʼubéentmubaʼob tu yiknaloʼoboʼ. Beyoʼ k-boʼotik u jaats tiʼ le rentaoʼ. Tsʼoʼoleʼ k-limpiartik le mesa utiaʼal k-xook yéetel le familia Ironsoʼ: k-xakʼaltik tu yéeteloʼob u xookil U Pʼíich Tulumil Kanan ku yilaʼal cada semanaoʼ. Tu seisiloʼob tu kʼamoʼob le maʼalob péektsiloʼ, letiʼob le yáax káaj u kaanbaloʼob teʼ múuchʼulil yanchaj tu kaajil Narranderaoʼ.

Tu jaʼabil 1951 binen teʼ asamblea tiʼ u j-jaajkunajoʼob Jéeoba yanchaj tu kaajil Sydneyoʼ. Yáanal junpʼéel nojoch toldoeʼ tiʼ yanchaj junpʼéel muchʼtáambal yéetel le precursoroʼob u kʼáat u beet u misioneroiloʼoboʼ, teʼ kʼiin jeʼeloʼ maas tiʼ trescientos u túulul máaxoʼob binoʼobiʼ. Le sukuʼun Nathan Knorr, ku meyaj kaʼach tu najil Betel yaan Brooklyneʼ, tu tsolaj u kʼaʼabéetil u bisaʼal le maʼalob péektsil tak tu maas náachil le Luʼumaʼ. T-jach chʼenxikintaj le baʼax tu yaʼaloʼ. Ka máan kʼiineʼ yaʼab tiʼ le precursoroʼoboʼ binoʼob u kʼaʼaytoʼob le maʼalob péektsil tu noojol le Pacíficooʼ yéetel tuláakʼ tuʼuxoʼob. Teneʼ táakpajen ichil le diecisiete precursoroʼob tiʼ Australia invitartaʼaboʼob utiaʼal le xook 19 tiʼ le Escuela tiʼ Galaad yanchaj tu jaʼabil 1952. Bey túunoʼ, chéen 20 jaʼaboʼob yaanten ka tin beetinba misionerail, le baʼax jach kin tsʼíiboltik kaʼachoʼ.

YANCHAJ IN BEETIK JUJUNPʼÉEL KʼEEXOʼOB

Le Escuela tiʼ Galaadoʼ jach tu yáanten in maas kʼaj óolt le baʼax ku yaʼalik le Bibliaoʼ yéetel tu beetaj u maas muʼukʼaʼantal in fe, baʼaleʼ tu yáanten xan in maʼalobkíint in modos. Tin x-lóoʼbayanileʼ kin wilik in beetik tuláakal baʼax jach maʼalob yéetel in kʼáat ka beetaʼak xan bey tumen u maasiloʼ. Tsʼoʼoleʼ yaan  baʼaxoʼob maʼ jach maʼalob in wilik kaʼachiʼ. Jeʼex juntéenjeakileʼ jach jaʼakʼ in wóol ka tin wilaj le sukuʼun Knorroʼ táan u jatsʼ bola yéetel u jaats táankelem betelitaʼob.

Le profesoroʼob tiʼ le Escuela tiʼ Galaad úuch joʼopʼok u meyajtikoʼob Jéeobaoʼ tu tsʼáajoʼob cuenta bix in modos. Le oʼolal jach tu yáantenoʼob utiaʼal in kʼexik bix in tuukul. Jujunpʼíitileʼ tin naʼateʼ Jéeobaeʼ juntúul Dios jach yaan u yaabilaj yéetel maʼatech u kʼáatik ka k-beet junpʼéel baʼax maʼ tu páajtal. Áantaʼaben xan tumen in wéet xookoʼob. Juntúul tiʼ letiʼobeʼ tu yaʼalajten: «Elva, Jéeobaeʼ maʼ táan u máan t-paach yéetel junpʼéel chicoteiʼ. Le oʼolal tsʼáa u pʼiis baʼax ka páaʼtik tiʼ teech». Le baʼax tu yaʼaloʼ tu beetaj in tuukul.

Ka tsʼoʼok le xookoʼ, cinco tiʼ toʼoneʼ túuxtaʼaboʼon tu luʼumil Namibia (África). Chéen junpʼíit kʼiinoʼob tiʼ leloʼ, tuláakloʼoneʼ k-tsʼáaik xook tiʼ ochenta máakoʼob. Jach utschaj tin wich le tuʼux túuxtaʼaboʼonoʼ bey xan in beetik in misionerail, baʼaleʼ utschaj tin wich juntúul tiʼ le sukuʼunoʼob xooknaj xan Galaad túuxtaʼab Suizaoʼ. Le oʼolal ka máan junpʼéel jaʼabeʼ binen Suiza, ka tsʼoʼok in beel tu yéetel. Ka joʼopʼ in láakʼintik utiaʼal u beetik u superintendenteil tiʼ circuito.

TIN MUʼYAJTAJ JUNPʼÉEL BAʼAX JACH TALAM

Ka tsʼoʼok u máan cinco jaʼaboʼob joʼopʼok k-meyaj teʼ circuitooʼ, invitartaʼaboʼon meyaj tu najil Betel Suiza. Jach jatsʼuts úuchik in wilik in wantal ichil junpʼéel familia tuʼux yaan sukuʼunoʼob yéetel kiikoʼob yaan u jaʼabiloʼob úuch joʼopʼok u meyajtikoʼob Jéeoba.

Baʼaleʼ maʼ úuch kʼuchkoʼoneʼ, jach yaachaj tin wóol le ka tin wojéeltaj in wíichameʼ tsʼoʼok u traicionarken bey xan Jéeoba. Ka tu xúumpʼatten. Jach tu beetaj in muʼyaj. Maʼ in wojel baʼax jeʼel in beetik kaʼach wa maʼ in wáantaʼal yéetel yaabilaj tumen le sukuʼunoʼob yéetel le kiikoʼob ku meyajoʼob Beteloʼ. Tu yuʼuboʼob baʼax tin waʼalaj yéetel tu pʼatenoʼob tin juunal ken in waʼaltiʼob taak in pʼáatal chéen tin juun. Le baʼaxoʼob tu yaʼaloʼobten yéetel le baʼaxoʼob tu beetoʼoboʼ jach tu líiʼsoʼob in wóol utiaʼal in aktáantik le nojoch talamiloʼ, tsʼoʼoleʼ tu yáanten in maas natsʼinba tiʼ Jéeoba.

Kʼaʼajten le baʼaxoʼob ku yaʼalik le sukuʼunoʼob tsʼoʼok u muʼyajtikoʼob jejeláas talamiloʼoboʼ. Jeʼex le kiik Madge Dunhamoʼ u yaʼalmajten: «Elva, le táan a meyajtik Jéeobaoʼ yaan a aktáantik yaʼabkach túuntaj óolaloʼob, baʼaleʼ maas yaan a muʼyaj yoʼolal le baʼaxoʼob kun beetbil tumen le máaxoʼob a yaabiltmoʼ. Ken úuchuk beyoʼ, machaba tiʼ Jéeoba. Maʼ u tuʼubultecheʼ letiʼ ka meyajtik, maʼ chéen juntúul kʼeban wíinikiʼ». Le baʼaxoʼob tu yaʼalajtenoʼ jach tu yáanten. Tin chʼaʼtuklaj maʼ in náachtal tiʼ Jéeoba yoʼolal le baʼax tu beetaj in wíichamoʼ.

Ka máan kʼiineʼ suunajen Australia utiaʼal in beetik in precursorail naatsʼ teʼ tuʼux yaan in láakʼtsiloʼoboʼ. Le tiaʼanen teʼ barcooʼ tin tsikbaltaj le baʼax ku yaʼalik le Biblia tiʼ u jaats máakoʼoboʼ. Ichiloʼobeʼ tiaʼan juntúul noruegoiʼ, letiʼeʼ jach uts, u kʼaabaʼeʼ Arne Gjerde, letiʼeʼ jach utschaj tu yich le baʼax tu yuʼuboʼ. Ka máan kʼiineʼ bin u xíimbaltoʼon tu kaajil Sydney. Maʼ úuch tiʼ leloʼ ka okjaʼanaji. Tu jaʼabil 1963 tsʼoʼok in beel tu yéetel, ka máan uláakʼ kaʼapʼéel jaʼabeʼ ka síij Gary, in chan hijo.

ULÁAKʼ BAʼAX TU BEETAJ IN MUʼYAJ

Teen, Arne yéetel Gary, in hijoeʼ, jach kiʼimak k-óol kaʼachi. Maʼ sen úuch tiʼ leloʼ, Arneeʼ tu maas nojochkíintaj k-otoch utiaʼal u taal in taataʼob kajtal t-iknal, letiʼobeʼ tsʼoʼok u yantal u jaʼabiloʼob. Baʼaleʼ seis jaʼaboʼob tsʼoʼokok k-beeleʼ, aʼalaʼabtoʼoneʼ yaan cáncer tu pool Arne. Ka káaj u tsʼaʼabal radioterapia tiʼeʼ, sáamsamal  in bin in kanáant teʼ hospitaloʼ. Ka káajeʼ joʼopʼ u bin u maʼalobtal, baʼaleʼ chéen ka maaschaji. Aʼalaʼabteneʼ chéen wa jaypʼéel semana pʼaataltiʼ. Baʼaleʼ Arneeʼ chan maʼalobchaji, ka suunaj t-otoch, teʼeloʼ tin wáantaj utiaʼal u maas maʼalobtal. Ka máan kʼiineʼ joʼopʼ u kaʼa xíimbal yéetel káaj u beetik u ancianoil tu kaʼatéen teʼ múuchʼuliloʼ. Tumen mantatsʼ kiʼimak u yóol yéetel jach séeb u báaxal tʼaaneʼ séeb úuchik u chʼaʼik u yóol yéetel maas maʼ talam úuchik in wáantikiʼ.

Tu jaʼabil 1986 kaʼa kʼojaʼanchaji. Teʼ kʼiinoʼob jeʼeloʼ tsʼoʼok u kíimil in taataʼob, le oʼolal lukʼoʼon Sydney utiaʼal k-bin kajtal teʼ wits Azuloʼoboʼ, naatsʼ tiʼ k-amigoʼob. Ka máan kʼiineʼ Garieʼ tsʼoʼok u beel yéetel Karin, juntúul koʼolel jach jatsʼuts u modos yéetel jach u tsʼaamaj u yóol u meyajt Dios. Ka máan wa jaypʼéel meseʼ, letiʼobeʼ tu yaʼaloʼobtoʼon ka xiʼikoʼon kajtal tu yéeteloʼob tiʼ junpʼéel naj maʼ jach náach teʼ tuʼux kajaʼanoʼon kaʼachoʼ.

Arneeʼ dieciocho meses pʼáat maʼ tu páajtal u líikʼil. Tumen kʼaʼabéet u jach kanáantaʼaleʼ, teneʼ yanchaj in pʼáatal tu yiknal mantatsʼ. Tumen sáamsamal kin máansik kaʼapʼéel hora táan in xokik le Biblia yéetel le jóoʼsaʼaniloʼoboʼ, tu yáanten in wil baʼax unaj in beetik utiaʼal in aktáantik le talamiloʼ. Le sukuʼunoʼob tsʼoʼok u yantal u jaʼabiloʼob teʼ múuchʼulil yéetel tsʼoʼok u aktáantkoʼob talamil jeʼex le kin aktáantikoʼ, tu líiʼsoʼob in wóol úuchik u bin u xíimbaltenoʼob. Arneeʼ kíim tu mesil abril tiʼ 2003, letiʼeʼ ku creertik yaan u kaʼa kuxkíintaʼal le kimenoʼoboʼ.

LE MÁAX JACH ÁANTKENOʼ

Tin x-lóoʼbayanileʼ jach in kʼáat ka in beet tuláakal baʼax jach maʼalob, baʼaleʼ ichil u kuxtal máakeʼ maʼatech u yúuchul tuláakal jeʼex u tuklikeʼ. Jach yaʼab baʼaxoʼob jatsʼutstak tsʼoʼok in wilik, baʼaleʼ tsʼoʼok xan in peʼertik kaʼatúul in wíicham: le yáaxoʼ tumen tu tusen yéetel yaanal, le u kaʼatúuloʼ yoʼolal cáncer. Teʼ kʼiinoʼob jeʼeloʼ, yaʼab máaxoʼob áanten yéetel tu líiʼsoʼob in wóol. Baʼaleʼ le máax maas tsʼoʼok u yáantken, yéetel kun seguer u yáantkenoʼ, Jéeoba, le «nuxib[oʼ]» (Dan. 7:9). Yéetel u Tʼaaneʼ tu yáanten in kʼex in modos yéetel tu tsʼáajten u páajtalil in wilik yaʼab baʼaloʼob jatsʼutstak le táan in beetik in misionerailoʼ. Le ka tin aktáantaj le talamiloʼoboʼ tu líiʼsaj in wóol yéetel yaabilaj (Sal. 94:18, 19). Tsʼoʼoleʼ in láakʼtsiloʼob bey xan le sukuʼunoʼoboʼ jach u yaabiltmenoʼob, yaʼab tiʼ letiʼobeʼ maas yaan u jaʼabiloʼob tiʼ teen. Cada juntúul tiʼ letiʼobeʼ tsʼoʼok u yeʼeskoʼob jach tu jaajil «bey juntúul [...] sukuʼun» tu kʼiinil táan in aktáantik le talamiloʼoboʼ (Pro. 17:17).

Úuchjeakileʼ Jobeʼ tu yaʼalaj: «Le nuxiboʼoboʼ yaʼab baʼax u yojloʼob, u jaʼabiloʼob tsʼaamil u [y]ojéelajoʼob» (Job 12:12). Ken tuukulnaken tiʼ le baʼaxoʼob in wilmoʼ, jeʼel u páajtal in waʼalik jach jaaj le baʼax tu yaʼaloʼ. Le máaxoʼob maas yaan u jaʼabiloʼoboʼ tsʼoʼok u yáantkenoʼob yéetel le tsolnuʼukoʼob ku tsʼáaikoʼoboʼ, tsʼoʼok u líiʼskoʼob in wóol yéetel yaʼab baʼaxoʼob tsʼoʼok in kanik tiʼ letiʼob ikil in biskinba tu yéeteloʼoboʼ. Jach kiʼimak in wóol úuchik u yantal yaʼab máaxoʼob yéetel in bisinba yaan u jaʼabiloʼob.

Tsʼoʼok u tsʼáaikten 80 jaʼaboʼob, le oʼolal bejlaʼeʼ teen le máax maas yaan u jaʼabiloʼ. Le baʼaxoʼob in wilmoʼ ku yáantken in naʼat bix u yuʼubikuba le máaxoʼob tsʼoʼok u chʼíijloʼob xanoʼ, jach uts tin tʼaan in bin in xíimbaltoʼob yéetel in wáantkoʼob. Tsʼoʼoleʼ jach jatsʼuts in wilik in biskinba yéetel le táankelmoʼob yéetel le x-lóoʼbayanoʼoboʼ. Letiʼobeʼ ku líiʼskoʼob in wóol yéetel ku beetkoʼob xan u kiʼimaktal in wóol. Ken u kʼáatoʼobten áantaj wa tsolnuʼukeʼ, jach uts tin tʼaan in tsʼáaiktiʼob.

[Tsolajil]

[Foto yaan teʼ táan juʼun 14]

Teen yéetel Joy Lennox, le táan k-beetik k-precursorail tu kaajil Narrandera

[Foto yaan teʼ táan juʼun 15]

Elva yéetel jujuntúul sukuʼunoʼob ku meyajoʼob Betel tu luʼumil Suiza tu jaʼabil 1960

[Foto yaan teʼ táan juʼun 16]

Táan in kanáantik Arne