Unaj k-kʼubik k-óol tiʼ Jéeoba, u Diosil le «kʼiinoʼob bey xan le jaʼabiloʼoboʼ»
Unaj k-kʼubik k-óol tiʼ Jéeoba, u Diosil le «kʼiinoʼob bey xan le jaʼabiloʼoboʼ»
«Letiʼ kʼexik le kʼiinoʼob bey xan le jaʼabiloʼoboʼ; ku luʼsik yéetel ku tsʼáaik [reyoʼob].» (DAN. 2:21)
¿BAʼAX JEʼEL K-NÚUKIKEʼ?
¿Bix u yeʼesiktoʼon le baʼaxoʼob beetaʼan bey xan le profecíaʼob tsʼoʼok u béeytaloʼob Jéeobaeʼ letiʼ u Yuumtsilil le Tiempooʼ?
¿Baʼax unaj k-beetik ikil k-ojéeltik Jéeobaeʼ letiʼ u Diosil le «kʼiinoʼob bey xan le jaʼabiloʼob[oʼ]»?
¿Baʼaxten le kʼiin u tukultmaj Jéeobaoʼ maʼ tu kʼexpajal yoʼolal baʼaxoʼob ku yúuchul way yóokʼol kaab yéetel yoʼolal le baʼaxoʼob ku beetik wíinikoʼ?
1, 2. ¿Bix k-ojéeltik Jéeobaeʼ jach u yojel baʼax le tiempooʼ?
YAʼAB jaʼaboʼob táanil tiʼ u beetaʼal wíinik tumen Jéeobaeʼ, tu tsʼáaj junpʼéel baʼax utiaʼal u pʼisaʼal le tiempooʼ. Tu kanpʼéel kʼiinil joʼopʼok u beetik tuláakal baʼaleʼ, tu yaʼalaj: «Ka yanak sáasiloʼob teʼ tu nakʼ kaʼanoʼ utiaʼal u sáasilkuntoʼob le luʼumoʼ ka xan u junpáaykuntoʼob le kʼiin tiʼ le áakʼaboʼ, ka meyajnakoʼob utiaʼal xan u yeʼeskoʼob le kʼiinoʼob, le jaʼaboʼob yéetel le kʼiinbesajiloʼoboʼ» (Gén. 1:15, 19, 26). Tuláakal túun béeychaj jeʼex u tukultmil Diosoʼ.
2 Baʼaleʼ le cientificoʼoboʼ tak bejlaʼa maʼ u jach naʼatoʼob baʼax le tiempooʼ. Junpʼéel enciclopediaeʼ ku yaʼalik: «Le tiempooʼ mix máak jeʼel u páajtal u yaʼalik jach baʼaxeʼ». Baʼaleʼ Jéeoba, le «Máax beet kaʼan» yéetel le «Máax beet luʼum[oʼ]», jach u yojel baʼaxiʼ. Letiʼeʼ ku yaʼalik: «[Desde] tu yáax chuuneʼ kin waʼalik baʼax ku taal tu tsʼook kʼiin; kin waʼalik baʼax ku taal u kʼiin maʼiliʼ úuchkeʼ» (Isa. 45:18; 46:10). Teʼ xookaʼ yaan k-ilik jujunpʼéel tiʼ le baʼaxoʼob u beetmaj Diosoʼ bey xan jujunpʼéel profecíaʼob tsʼoʼok u béeychajloʼob. Le xookaʼ yaan u yáantkoʼon utiaʼal k-maas muʼukʼaʼankúuntik k-fe tiʼ Jéeoba, u Yuumtsilil le Tiempooʼ yéetel tiʼ le baʼax ku yaʼalik le Bibliaoʼ.
LE BAʼAXOʼOB BEETAʼANOʼ KU YÁANTKOʼON K-TSʼÁA K-FE TIʼ U YUUMTSILIL LE TIEMPOOʼ
3. ¿Baʼaxoʼob jach maʼalob u meyajoʼob?
3 Tuláakal le baʼaxoʼob yaan teʼ yóokʼol kʼaabaʼ jach maʼalob u meyaj, tak le baʼaxoʼob jach mejentakoʼ. Jeʼex le atomosoʼ, maʼatech u xuʼulul u péekoʼob. Yoʼolal lelaʼ tsʼoʼok u beetaʼal relojoʼob de átomo jach maʼalob u meyajoʼob, chéen junpʼéel segundo ku kʼexpajal cada ochenta millones jaʼaboʼob. Le planetaʼob yéetel le eekʼoʼoboʼ jach tu tsoolol xan bix u péekoʼob yéetel maʼatech u kʼexpajal. Le oʼolal ku páajtal u nuʼuktikuba máak tu yéeteloʼob yéetel jeʼel u páajtal u yaʼalaʼal baʼax kʼiin u káajal yáaxkʼiin, jaʼajaʼal wa keʼelil. Jeʼex túun k-ilkoʼ, le Máax beet le nukuch «relojoʼobaʼ» jach «nojoch u páajtalil, bey xan u muukʼ», le oʼolal unaj k-tsʼáaik nojbeʼenil tiʼ (xokaʼak Isaías 40:26).
4. ¿Baʼaxoʼob eʼesik u naʼat Jéeoba ichil le baʼaxoʼob kuxaʼanoʼoboʼ?
4 Le baʼaxoʼob kuxaʼanoʼob xanoʼ láayliʼ jach maʼalob bix u meyajoʼobeʼ. Jeʼex yaʼab tiʼ le baʼalcheʼob yéetel le xíiwoʼoboʼ bey yaan junpʼéel reloj nuʼuktikoʼobeʼ. Yaʼab chʼíichʼoʼobeʼ u yojloʼob baʼax kʼiin unaj u binoʼob táanxel luʼumil (Jer. 8:7). Tak ichil u wíinklil máakeʼ bey yaan junpʼéel reloj utiaʼal nuʼuktikeʼ, lelaʼ maases ku meyaj yoʼolal le kʼiin yéetel le áakʼaboʼ. Le oʼolal wa ka xiʼikoʼon táanxel luʼumil tiʼ avioneʼ, k-wíinklileʼ xaan jeʼel u suuktal tiʼ le hora ku meyaj teʼ luʼumiloʼ. Jeʼex túun k-ilkoʼ, ichil le baʼaxoʼob beetaʼanoʼ yaʼab baʼaxoʼob eʼesik Jéeobaeʼ, letiʼ u Diosil le «kʼiinoʼob bey xan le jaʼabiloʼob[oʼ]» yéetel jach yaan u naʼat yéetel tuláakal páajtalil tiʼ (xokaʼak Salmo 104:24). Le oʼolal jeʼel u páajtal k-creertikeʼ, le baʼax u tukultmaj u beetik u Yuumtsilil le Tiempooʼ jach yaan u láaj béeychajal.
LE BIX U BÉEYTAL LE PROFECÍAʼOBOʼ KU YÁANTKOʼON UTIAʼAL U YANTAL K-FE
5. 1) ¿Chéen baʼax jeʼel u yáantkoʼon k-ojéelt baʼax ku taal u kʼiinileʼ? 2) ¿Baʼaxten Jéeobaeʼ jeʼel u páajtal u yaʼalik baʼax kʼiin ken úuchuk wa baʼaxeʼ?
5 Le baʼaxoʼob beetaʼanoʼ ku yáantkoʼon k-il «le baʼax maʼ tu páajtal u yilaʼal» tiʼ Jéeobaoʼ, baʼaleʼ maʼ tu yáantkoʼon k-ojéelt baʼax ku taal u kʼiin (Rom. 1:20). Le oʼolal utiaʼal k-ojéeltikeʼ kʼaʼabéet k-xokik le Bibliaoʼ. Lelaʼ jeʼel u yáantkoʼon k-il bix úuchik u béeytal yaʼab profecíaʼob jach jeʼex aʼalaʼaniloʼ. ¿Baʼaxten Jéeobaeʼ jeʼel u páajtal u yaʼalik baʼax ku taal u kʼiineʼ? Yáaxeʼ tumen yaan u páajtalil u yilik baʼax ku taal u kʼiin. Tsʼoʼoleʼ letiʼeʼ jeʼel u páajtal u nuʼuktik tuláakal utiaʼal ka béeychajak jach tu kʼiinil le baʼaxoʼob u tukultmoʼ.
6. ¿Bix k-ojéeltik Jéeobaeʼ u kʼáat ka k-naʼat bix u béeytal le profecíaʼoboʼ?
6 Jéeobaeʼ u kʼáat ka naʼataʼak le profecíaʼob yaan ichil le Biblia tumen le máaxoʼob meyajtikoʼ yéetel ka u jóoʼsoʼob utsil tiʼ. Le oʼolal kex letiʼ ku páajtal u naʼatik le tiempooʼ, ken u yaʼal baʼax ku taal u kʼiineʼ ku yaʼalik junpʼéel bix maas séeb jeʼel k-naʼatikeʼ (xokaʼak Salmo 90:4). Jeʼex u libroil Apocalipsiseʼ ku tʼaan tiʼ «kantúul [angeloʼob] nuʼukbesaʼanoʼob jach utiaʼal le horaoʼ, le kʼiinoʼ, le winaloʼ yéetel le jaʼaboʼ», jeʼex k-ilik le tiempo xanoʼ (Apo. 9:14, 15). Koʼoneʼex ilik jujunpʼéel tiʼ le profecíaʼob béeychajoʼob jach teʼ kʼiin u yaʼalmaj Jéeobaoʼ. Lelaʼ yaan u yáantkoʼon k-maas k-tsʼáa k-fe tiʼ u Diosil le «kʼiinoʼob bey xan le jaʼabiloʼob[oʼ]» bey xan tiʼ le Bibliaoʼ.
7. ¿Bix u yeʼesik le bix béeychajik u profecía Jeremías yoʼolal u kaajil Jerusalén yéetel Judá, Jéeobaeʼ u Yuumtsilil le Tiempooʼ?
7 Koʼoneʼex ilik le baʼax úuch teʼ siglo 7 táanil tiʼ u taal Jesusoʼ. Jéeobaeʼ «tu tsʼáaj tiʼ Jeremías le péektsilaʼ utiaʼal tuláakal u kaajil Judá», «tu kanjaʼabil [káajak u reinar] Joacim [wa Jehoiaquim], u paal Josías, tu kaajil Judá» (Jer. 25:1). U Yuumtsilil le Tiempooʼ tu yaʼaleʼ yaan u xuʼulsaʼal tiʼ Jerusalén yéetel le judíoʼob yanoʼob kaʼach tu luʼumil Judaoʼ yaan u bisaʼaloʼob Babilonia, yéetel ich «setenta jaʼaboʼobeʼ le luʼumaʼ bíin pʼáatak yáanal u páajtalil [u reyil] Babilonia». Tu jaʼabil 607 táanil tiʼ u taal Jesuseʼ, xuʼulsaʼab tiʼ u kaajil Jerusalén tumen u soldadoiloʼob Babilonia yéetel le judíoʼoboʼ bisaʼaboʼob Babilonia. ¿Baʼax aʼalaʼab kun úuchul ken tsʼoʼokok le setenta jaʼaboʼoboʼ? Jeremíaseʼ tu yaʼalaj: «Yuumtsileʼ ku yaʼalik: Le ken chúukpajak le setenta jaʼaboʼob tiʼ Babiloniaoʼ, ku káajal in beetik tiʼ teʼex uts, bíin xan in tsʼoʼokbes baʼax tin séebchiʼitaj utiaʼal ka suunakeʼex teʼ kúuchilaʼ» (Jer. 25:11, 12; 29:10). Le baʼax ku yaʼalik le profecíaaʼ béeychaj jach teʼ kʼiin u yaʼalmoʼ: tu jaʼabil 537 táanil tiʼ u taal Jesuseʼ, jáalkʼabtaʼab le judíoʼob tumen le medoʼob yéetel le persaʼoboʼ.
8, 9. ¿Bix u yeʼesik u profecíail Daniel yoʼolal le Mesías yéetel le baʼax kʼiin ka káaj u meyaj le Reino teʼ kaʼanoʼ Jéeobaeʼ u Diosil le «kʼiinoʼob bey xan le jaʼabiloʼob[oʼ]»?
8 Koʼoneʼex ilik uláakʼ junpʼéel profecía tʼaanaj tiʼ u kaajal Dios úuchjeakil. Óoliʼ kaʼapʼéel jaʼab táanil tiʼ u jóokʼol le judíoʼob tu kaajil Babiloniaoʼ, profeta Danieleʼ tu yaʼaleʼ le Mesíasoʼ yaan u chíikpajal cuatrocientos ochentaitres jaʼaboʼob aʼalaʼak ka jel líiʼsaʼak u baʼpakʼiloʼob u kaajil Jerusalén. Le rey medopersaoʼ tu yaʼalaj ka jel líiʼsaʼak tu jaʼabil 455 táanil tiʼ u taal Jesús. Jach cuatrocientos ochentaitres jaʼaboʼob, tu jaʼabil 29 tsʼoʼokok u taal Jesuseʼ, tsʼaʼab u yokjaʼ yéetel kiliʼich muukʼ, bey úuchik u kʼuchul u beet u Mesíasiloʼ (Neh. 2:1, 5-8; Dan. 9:24, 25; Luc. 3:1, 2, 21, 22). *
9 Beoraaʼ koʼoneʼex ilik le profecíaʼob ku tʼaanoʼob yoʼolal le Reinooʼ. Le Bibliaoʼ u yaʼalmiliʼeʼ u Reyileʼ yaan u káajal u gobernar teʼ kaʼan tu jaʼabil 1914. Jeʼex le «chíikulal» kun eʼesik way yaan Jesús tu kaʼatéenoʼ ku yeʼesik le baʼaxoʼob kun muʼyajtbil way Luʼum le ken jóoʼsaʼak Satanás teʼ kaʼanoʼ (Mat. 24:3-14; Apo. 12:9, 12). Tsʼoʼoleʼ uláakʼ profecíaʼobeʼ ku yeʼeskoʼobeʼ jach tu jaʼabil 1914 ken u chuk «le kʼiin aʼalaʼan[oʼ]» yéetel yaan u káajal u meyaj le Reino teʼ kaʼanoʼ (Luc. 21:24; Dan. 4:10-17). *
10. ¿Baʼaxoʼob kun úuchul jach teʼ kʼiin aʼalaʼanoʼ?
10 ¿Baʼax ku taal u kʼiin u yúuchul? Yáaxeʼ Jesuseʼ tu yaʼaleʼ yaan u yantal «táaj yaʼab muʼyaj». Ken tsʼoʼokkeʼ yaan u Reinar ichil Mil Jaʼaboʼob. Leloʼobaʼ yaan u béeytal jach teʼ kʼiin aʼalaʼanoʼ. Kʼaʼajaktoʼoneʼ le tiaʼan Jesús way Luʼumoʼ, Jéeobaeʼ tsʼokaʼaniliʼ u yaʼalik jach «baʼax kʼiin wa baʼax hora» ken úuchkoʼobeʼ (Mat. 24:21, 36; Apo. 20:6).
«MAʼ A CHÉEN MÁANSAJ KʼIINEʼEX»
11. ¿Baʼax unaj k-beetik tumen k-ojel kuxaʼanoʼon tu tsʼook kʼiinoʼob?
11 ¿Baʼax unaj u péeksikoʼon k-beet tumen k-ojel le Reinooʼ táan u gobernar yéetel kuxaʼanoʼon «tu tsʼook kʼiin[oʼob]»? (Dan. 12:4.) Yaʼab máakeʼ táan u tsʼáaik cuenta bix u bin u maas kʼastal baʼaxoʼob ku beetaʼal, baʼaleʼ maʼ tu tsʼáaikoʼob cuenta wa letiʼe baʼax ku yaʼalik le Biblia kun ilbil tu tsʼook kʼiinoʼoboʼ. Yanoʼobeʼ ku tuklikoʼobeʼ jach taʼaytak u xuʼulul tuláakal baʼal, baʼaleʼ yanoʼob xaneʼ ku tuklikoʼobeʼ wíinikeʼ yaan u beetik u pʼáatal «tuláakal jejetsʼkil yéetel maʼalob yanil» (1 Tes. 5:3). Baʼaleʼ ¿kux túun toʼon? Wa k-naʼatik kuxaʼanoʼon tu tsʼook u kʼiiniloʼob u kʼasaʼan yóokʼol kaab Satanaseʼ, ¿máasaʼ jach unaj k-tsʼáaik k-óol k-meyajt u Diosil le «kʼiinoʼob bey xan le jaʼabiloʼob» yéetel k-áantik u maasil u kʼaj óoltoʼoboʼ? (2 Tim. 3:1.) Cada juntúul tiʼ toʼoneʼ unaj u yilik wa táan u meyajtiʼ maʼalob le tiempo pʼaatloʼ (xokaʼak Efesoiloʼob 5:15-17).
12. ¿Baʼax ku kaʼansiktoʼon le baʼax tu yaʼalaj Jesús yoʼolal u kʼiiniloʼob Noeoʼ?
12 Teʼ yóokʼol kaab jach chuup yéetel náaysaj óolaloʼobaʼ chan talam u yilik máak «maʼ [u] chéen máansaj kʼiin». Jesuseʼ tu yaʼalaj: «Jeʼel bix úuchik tu kʼiiniloʼob Noeeʼ, bey xan bíin úuchuk le ken taalak u Paal Máak». ¿Baʼaxoʼob úuch tu kʼiiniloʼob Noé? Aʼalaʼabeʼ yaan u xuʼulsaʼal tiʼ le kʼasaʼan máakoʼob teʼ Búulkabaloʼ. Noeeʼ «tu tseʼektaj toj kuxtal» yéetel baʼax ku yaʼalik Dios tiʼ le máakoʼob teʼ kʼiinoʼob jeʼeloʼ (Mat. 24:37; 2 Ped. 2:5). Baʼaleʼ letiʼobeʼ chéen «táan u janaloʼob, táan u yukʼuloʼob, yéetel táan u tsʼoʼokol u beeloʼob tak le kʼiin ka ook Noé ichil le nojoch cheemoʼ; maʼ tu naʼatoʼob mix baʼaliʼ tak le kʼiin ka taal le búulkabaloʼ ka láaj bisaʼaboʼob». Le oʼolal Jesuseʼ tu yaʼalaj: «Nuʼuktabaʼex; tumen le kʼiin ka tuklikeʼex maʼ tun taaleʼ, letiʼ ken taalak u Paal Máak» (Mat. 24:38, 39, 44). Toʼoneʼ kʼaʼabéet k-beetik jeʼex úuchik u beetik Noeoʼ, maʼ jeʼex le u maasil máakoʼob teʼ kʼiinoʼob jeʼeloʼ. ¿Baʼax jeʼel u yáantkoʼon utiaʼal maʼ u náayal k-óoleʼ?
13, 14. Le táan k-páaʼtik u taal u Paal máakoʼ, ¿baʼax unaj k-kʼaʼajsik yoʼolal Jéeoba utiaʼal u chúukpajal k-óol?
13 Kex maʼ ojéeltaʼan baʼax kʼiin ken taalak u Paal máakeʼ, maʼ unaj u tuʼubultoʼoneʼ Jéeobaeʼ letiʼ u Yuumtsilil le Tiempooʼ. Le baʼax kʼiin u tukultmaj u béeykuntik baʼax u yaʼalmoʼ maʼ kun kʼexpajal yoʼolal baʼax ku yúuchul way Luʼum wa baʼax ku beetik wíinikeʼ. Utiaʼal u béeytal baʼax u tukultmeʼ, letiʼeʼ jeʼel u páajtal u controlartik baʼax kun úuchleʼ yéetel baʼax kʼiin ken úuchuk (xokaʼak Daniel 2:21). Le oʼolal Proverbios 21:1 ku yaʼalik: «U tuukul [reyeʼ], tu kʼab Yuumtsileʼ, bey áalkab jaʼeʼ, ku bin tu beel jeʼel tuʼux u kʼáat Yuumtsileʼ».
14 Jeʼex túun k-ilkoʼ, Jéeobaeʼ ku nuʼuktik tuláakal baʼal utiaʼal u béeykuntik jach tu kʼiinil le baʼax u tukultmoʼ. Yaʼab tiʼ le baʼaxoʼob ku yúuchloʼob teʼ yóokʼol kaabaʼ tsʼoʼok u yáantajoʼob utiaʼal u béeytal le profecíaʼoboʼ, maases le yaan yil yéetel u kʼaʼaytaʼal u maʼalob péektsilil u Reino Dios tuláakal tuʼuxoʼ. Tuukulnakoʼon tiʼ le baʼax úuch le ka júub le Unión Soviéticaoʼ. Yaʼab máakeʼ maʼ tu tuklaj wa jeʼel u kʼexpajal bix u tuukul le politicoʼob chéen ichil junpʼíit kʼiinoʼ. Baʼaleʼ yoʼolal le baʼaxoʼob úuchoʼ, bejlaʼeʼ le maʼalob péektsiloʼ ku kʼaʼaytaʼal teʼ tuʼuxoʼob luʼsaʼan u páajtalil kaʼachoʼ. Bey túunoʼ tuláakloʼon unaj k-ilik maʼ k-chéen máansaj kʼiin utiaʼal k-tsʼáaik k-óol k-meyajt u Diosil «le kʼiinoʼob bey xan le jaʼabiloʼoboʼ».
UNAJ K-CREERTIK JÉEOBAEʼ YAAN U BEETIK LE BAʼAX U YAʼALMAJ TEʼ KʼIIN U TUKULTMOʼ
15. ¿Bix jeʼel k-eʼesik yaan k-fe ken beetaʼak kʼeexoʼob tumen u kaajal Dioseʼ?
15 Utiaʼal u seguer k-kʼaʼaytik le Reino teʼ tu tsʼook kʼiinoʼobaʼ, jach unaj k-creertik Jéeobaeʼ yaan u béeykuntik le baʼax u yaʼalmaj jach teʼ kʼiin u tukultmoʼ. Yoʼolal le baʼaxoʼob ku yúuchloʼob bejlaʼaʼ, maʼ xaaneʼ yaan u kʼaʼabéetchajal k-kʼexik bix k-kʼaʼaytaj yéetel k-kaʼansik le máakoʼoboʼ. Maʼ xaaneʼ u kaajal Jéeobaeʼ ku yilik u kʼaʼabéetil u beetik jujunpʼéel kʼeexoʼob utiaʼal u béeytal k-kʼaʼaytik le maʼalob péektsil junpʼéel bix maas maʼaloboʼ. ¿Bix jeʼel k-eʼesik yaan k-fe tiʼ u Diosil le «kʼiinoʼob bey xan le jaʼabiloʼob[oʼ]»? Letiʼe k-kʼamik le kʼeexoʼob ku beetaʼaloʼ yéetel k-beetik baʼax tu yaʼalaj «Cristo u pool le [múuchʼuliloʼ]» (Efe. 5:23).
16. ¿Baʼaxten jach k-creertik Jéeobaeʼ yaan u yáantkoʼon tu «yorail yaj yaniloʼon»?
16 Jéeobaeʼ u yojel jeʼel u páajtal u yáantkoʼon tu «yorail yaj yaniloʼon[eʼ]», le oʼolal u kʼáat ka payalchiʼinakoʼon tiʼ letiʼ yéetel ka creert jach yaan u yáantkoʼon (Heb. 4:16). ¿Máasaʼ leloʼ ku yeʼesikeʼ jach u yaabiltmoʼon yéetel ku kanáantik cada juntúul tiʼ toʼon? (Mat. 6:8; 10:29-31.) Le ken k-kʼáattiʼ ka u yáantoʼon, ken k-beet le baʼax k-aʼalikoʼ yéetel ken k-chaʼa u nuʼuktikoʼoneʼ k-eʼesik yaan k-fe tiʼ letiʼ. Tsʼoʼoleʼ maʼ unaj u tuʼubultoʼon k-payalchiʼ yoʼolal k-sukuʼunoʼobiʼ.
17, 18. 1) ¿Baʼax ken u beet Jéeoba tiʼ le máaxoʼob pʼekmiloʼ? 2) ¿Baʼax maʼ unaj k-beetkiʼ?
17 Bejlaʼeʼ maʼ u kʼiinil u kaʼapʼéeltal k-óoliʼ, baʼaxeʼ u kʼiinil k-maas muʼukʼaʼankúuntik k-fe (Rom. 4:20). Le máaxoʼob pʼekmil Dios, Satanás yéetel le máaxoʼob u tsʼaamubaʼob tu tséeloʼ, u kʼáatoʼob u beetoʼob u xuʼulul le kʼaʼaytaj tu yaʼalaj Jesús ka k-beetoʼ (Mat. 28:19, 20). Le Kʼaasilbaʼaloʼ táan u baʼateʼel t-contra, baʼaleʼ maʼ unaj u tuʼubultoʼoneʼ, Jéeobaeʼ letiʼ «le kuxaʼan Jajal Diosoʼ, máax [salvartik] tuláakal máakoʼob, [maases] le máaxoʼob ku yoksaj óoloʼoboʼ». Tsʼoʼoleʼ letiʼeʼ «u yojel u tok tiʼ le muʼyajoʼoboʼ le máaxoʼob u kʼubmoʼob u kuxtaloʼob tiʼ letiʼoʼ» (1 Tim. 4:10; 2 Ped. 2:9).
18 Maʼ kun xáantaleʼ Jéeobaeʼ yaan u xuʼulsik tiʼ le kʼasaʼan yóokʼol kaabaʼ. Cristoeʼ yaan u xuʼulsik tiʼ le máaxoʼob pʼekmil Diosoʼ, yéetel yaan u chíikpajal chéen tiʼ Jéeoba yaan u derechoil utiaʼal u gobernar. Maʼ k-ojel baʼax kʼiin yéetel bix kun úuchliʼ, baʼaleʼ k-ojel yaan u béeytal jach teʼ kʼiin u tukultmoʼ. Le oʼolal maʼ u tuʼubultoʼoneʼ le «kʼiinoʼob bey xan le jaʼabiloʼob» kuxlikoʼonaʼ u tsʼook. Maʼ unaj k-tuklikeʼ «tuláakal baʼal keet yanil jeʼel bix u yanil kaʼach le ka beetaʼab yóokʼol kaabeʼ» (1 Tes. 5:1; 2 Ped. 3:3, 4).
«BÍIN PÁAʼTAJNAKEN»
19, 20. ¿Baʼaxten unaj k-aʼalik xan: «bíin páaʼtajnaken»?
19 Le ka beetaʼab le wíinikoʼob tumen Diosoʼ, u tuukul kaʼach ka kuxlakoʼob utiaʼal mantatsʼ yéetel utiaʼal u maas kaanbaloʼob tiʼ letiʼ bey xan tiʼ le baʼaxoʼob u beetmoʼ. Eclesiastés 3:11 ku yaʼalik tu yoʼolal Jéeoba: «Jach tu súutukil tu beetaj baʼal[,] tu láaj beetaj kiʼichkelem; tu tsʼáaj xan tiʼ wíinik u tuukulil minaʼan xuʼulul, kex maʼ tu naʼatik wíinik tuláakal u nojchil baʼax tu beetaj Dios mix xan baʼax bíin u beete».
20 ¿Máasaʼ jach ku kiʼimaktal k-óol tumen maʼ kʼexpajak le baʼax u tukultmaj Jéeoba yoʼolal wíinikoʼ? (Mal. 3:6.) Tiʼ letiʼeʼ «minaʼan u yoocheloʼob jelpajlil» (Sant. 1:17). Jéeobaeʼ maʼ kun xuʼulul u kuxtal, yéetel tiʼ letiʼeʼ maʼatech u meyajtiʼ le bix u suut le Luʼum utiaʼal u pʼisik le tiempo, jeʼex u beetik wíinikoʼ (1 Tim. 1:17). Le oʼolal maʼalob ka k-aʼale: «Bíin páaʼtajnaken tiʼ Dios in j-toksajil» (Miq. 7:7). Unaj k-beetik le baʼax ku yaʼalik le Salmo 31:24: «U tsʼáaʼob líikʼ óol yéetel x-maʼ saajkileʼ tiʼ u puksiʼikʼaloʼob tuláakal le máaxoʼob u kʼubmaj u yóoloʼob tiʼ le Yuumtsiloʼ».
[Tsolajiloʼob]
[U kʼáatchiʼiloʼob le xookoʼ]
[Foto yaan teʼ táan juʼun 19]
Danieleʼ jach ku creertik kaʼach yaan u béeytal le baʼax u yaʼalmaj u beetik Diosoʼ
[Foto yaan teʼ táan juʼun 21]
¿Ku meyaj wa tech maʼalob a tiempo utiaʼal a meyajtik Jéeoba?
