Eʼes naʼatil Kaxt «ojéelaj[il]»

Le kuxtaloʼ ku keʼetel yéetel u bin máak ich kʼáaʼnáab. Baʼaleʼ yaʼab máakoʼob tsʼoʼok u saʼatloʼob wa u kíimloʼob ich kʼáaʼnáab, tumen maʼatech u meyajtiʼob tubeel le naʼatiloʼ (Sal. 107:23, 27). ¿Baʼaxten jach maʼalob u keʼetel le kuxtal beyoʼ?

Úuchjeakeʼ kʼaʼabéet yaʼab baʼax u yojel máak utiaʼal u bin ich kʼáaʼnáab. Lelaʼ ku kanik máak tiʼ le máaxoʼob úuch joʼopʼok u máanoʼob ich kʼáaʼnáab, jeʼex le máax nuʼuktik le timonoʼ (Hch. 27:9-11). Tiʼ yaʼab cuadroʼob úuchjeakeʼ ku boʼonol maas nojoch le máax nuʼuktik le timón utiaʼal u yeʼesaʼal le nojoch meyaj ku beetkoʼ. Utiaʼal u bin máak ichil le kʼáaʼnáaboʼ jach unaj u yojéeltik bix u taal iikʼ, bix yanil le eekʼoʼoboʼ yéetel u kʼáaj óoltik uláakʼ baʼaloʼob. Le Bibliaoʼ ku tʼaan tiʼ máakoʼob «maʼalob u yojeliloʼob» máan ich kʼáaʼnáab, le tʼaan ku suʼutul beyaʼ u kʼáat xan u yaʼal yaan u naʼatoʼob (Eze. 27:8).

Le talamiloʼob ku aktáantik máak bejlaʼaʼ ku keʼetel yéetel le talamiloʼob ku aktáantik le máaxoʼob ku binoʼob ich kʼáaʼnáab úuchjeakoʼ. Baʼaleʼ ¿baʼax jeʼel u yáantkoʼoneʼ?

BIX JEʼEL U YANTALTOʼON OJÉELAJILEʼ

Tsʼoʼok k-ketik le kuxtal yéetel u bin máak ich kʼáaʼnáaboʼ, beoraaʼ koʼoneʼex ilik le baʼax ku yaʼalik le Bibliaaʼ: «Le [...] máax yaan u naʼat yéetel ku kiʼ uʼuyik tʼaaneʼ yéetel ku yantal u yojéelaj[eʼ] ku maʼalob kaanbal» (Pro. 1:5, 6). Le tʼaan hebreo ku suʼutul «ojéela[joʼ]» ku kʼaʼajsik le baʼaxoʼob u yojel u beet juntúul u capitanil barco úuchjeakoʼ. Ku tsʼáaik naʼatbil jach u yojel u nuʼukt maʼalob le barcooʼ.

Kex maʼ chéen chʼaʼabileʼ, tuláakloʼon jeʼel xan u yantaltoʼon «ojéelaj» utiaʼal k-nuʼuktik k-kuxtal ku keʼetel yéetel u bin máak ich kʼáaʼnáaboʼ. Jeʼex u yeʼesik u libroil Proverbioseʼ, kʼaʼabéet u yantaltoʼon «ojéelajil», k-kanik «[chʼaʼnuʼukt] tʼaanoʼob» yéetel u yantaltoʼon «utsil tuukul» (Pro. 1:2-6; 2:1-9). Baʼaleʼ kʼaʼabéet xan k-kʼáatik u nuʼuktaj Dios, tumen tak le máaxoʼob beetik baʼax kʼaasoʼ jeʼel u kanik u nuʼuktikoʼob utiaʼal u beetkoʼob baʼax u kʼáatoʼobeʼ (Pro. 12:5).

Le oʼolal jach unaj k-tsʼáaik k-óol k-xok le Bibliaoʼ, tumen chéen bey jeʼel u páajtal k-maas k-kʼaj óoltik Jéeobaoʼ bey xan Jesucristo, le máax chíikbesik jach tubeel le modos ku yeʼesikoʼ (Juan 14:9). Tsʼoʼoleʼ teʼ muchʼtáambaloʼoboʼ ku tsʼaʼabaltoʼon maʼalob tsolnuʼukoʼob jach jeʼel u yáantkoʼoneʼ. Jeʼel xan u béeytal k-kaanbal tiʼ k-taataʼobeʼ, tumen letiʼobeʼ yaʼab baʼax u yojeloʼob (Pro. 23:22).

TUKULT BAʼAX JEʼEL A AKTÁANTIKEʼ YÉETEL BAʼAX JEʼEL A BEETKEʼ

Le «ojéelaj[oʼ]» maas kʼaʼabéet ken k-aktáant talamiloʼob ku keʼeteloʼob yéetel le kʼáaʼnáab táan u woʼoltikubaoʼ. Wa ka yanaktoʼon junpʼéel nojoch talamileʼ,  jeʼel u kaʼapʼéeltal k-tuukuleʼ, baʼaleʼ lelaʼ jach jeʼel u beetik k-maas muʼyajeʼ (Sant. 1:5, 6).

Le tʼaan ku suʼutul xan «ojéelaj[oʼ]», láayliʼ ku meyaj utiaʼal u yúuchul tʼaan tiʼ le máaxoʼob ku táakpajloʼob tiʼ junpʼéel baʼateltáambaloʼ. Le Bibliaoʼ ku yaʼalik: «Baʼateleʼ ku beetaʼal yéetel maʼalob tuukul, u béeychajleʼ, u kaʼakaʼaj [...] yaʼab j-tsolxikinoʼob» (Pro. 20:18; 24:6).

Jeʼex juntúul soldado ku tuklik bix kun bin teʼ baʼateloʼ, toʼoneʼ jach unaj k-tuklik bey baʼax talamiloʼob jeʼel u beetik k-náachtal tiʼ Dioseʼ (Pro. 22:3). Koʼox aʼalikeʼ techeʼ yaan u kʼaʼabéettal a chʼaʼtuklik a kʼamik junpʼéel túumben meyaj wa a tsʼaʼabal a beet a nojchil tuʼux ka meyaj. Utiaʼal lelaʼ unaj a chʼaʼik en cuentail bajux ken a náajalte yéetel bukaʼaj tiempo ken u bistech a bin yéetel a suut ta wotoch. Baʼaleʼ yaan uláakʼ baʼaloʼob unaj a chʼaʼik en cuentail, jeʼex wa maʼ tu bin tu contra le baʼax ku yaʼalik le Bibliaoʼ, wa maʼ tu luʼsik u tiempoil a meyajtik Dios yoʼolal le hora unaj a wokol meyajoʼ (Luc. 14:28-30).

Loretta, juntúul x-jaajkunaj tiʼ Jéeobaeʼ, jach maʼalob u náajal kaʼach tuʼux ku koʼonol janal. Le ka joʼopʼ u kʼeʼexel tuʼux kun binoʼob koonoleʼ aʼalaʼab u tsʼaʼabal junpʼéel maas maʼalob meyajtiʼ. U nuuktakil le tuʼux ku meyajoʼ tu yaʼaloʼobtiʼ: «Lelaʼ junpʼéel nojoch áantaj tiʼ tech, tsʼoʼoleʼ tsʼoʼok k-ilkeʼ yaan junpʼéel u Najil Reino naatsʼiʼ». Baʼaleʼ letiʼeʼ tu yileʼ wa ku kʼamik le meyajaʼ yaan u pʼaatal óoliʼ minaʼantiʼ tiempo utiaʼal u meyajtik Dios, tsʼoʼoleʼ baʼax u kʼáateʼ ka kuxlak chéen yéetel junpʼíit baʼal utiaʼal u maas meyajtik le Máax beetmil tuláakal baʼaloʼ. Le oʼolal kex juntúul u nojchil le tuʼux ku meyaj tu yaʼalajtiʼ chéen tiʼ letiʼ u kʼáat u tsʼáaʼob le meyajoʼ, tu yaʼalaj maʼ kun seguer u meyaj tu yéeteloʼob. Loretta, tsʼoʼok kex veinte jaʼaboʼob joʼopʼok u beetik u precursoraileʼ, ku yaʼalikeʼ tsʼoʼok u bin utsil tiʼ, tumen utiaʼal u chʼaʼtuklik wa baʼaxeʼ ku meyajtiʼ le «ojéelaj[oʼ]» wa ku chʼaʼik en cuentail baʼax ku yaʼalik le Bibliaoʼ. Tsʼoʼok u maas maʼalobtal bix u biskuba yéetel Jéeoba, yéetel tsʼoʼok u yáantik yaʼab máakoʼob u kʼamoʼob le baʼax ku kaʼansik le Bibliaoʼ.

Uláakʼ tuʼux unaj u yeʼesik máak yaantiʼ «ojéela[jeʼ]», ichil u yotoch. U jaajileʼ ku bisik yaʼab tiempo u kaʼansaʼal le paalaloʼ, yéetel le baʼaxoʼob ku chʼaʼtuklik máak tiʼ baʼaloʼob yaan yil yéetel u meyajtaʼal Dios wa yoʼolal baʼaxoʼob kʼaʼabéet ichil u yotocheʼ jeʼel u beetik uts wa kʼaas tiʼ cada juntúul ichil le familiaoʼ (Pro. 22:6). Le taatatsiloʼob meyajtik Jéeobaoʼ maʼalob ka u tukloʼob: «¿Táan wa k-kaʼansik tiʼ k-paalal yoʼolal baʼaxoʼob k-aʼalik yéetel k-beetik bix unaj u meyajtikoʼob Dios ken nuukchajkoʼob? ¿K-kaʼansik wa tiʼob ka kiʼimakchajak u yóoloʼob chéen yéetel junpʼíit baʼal yoʼolal le bix kuxlikoʼon yéetel ka u tsʼáaʼob táanil u meyajtikoʼob Dios?» (1 Tim. 6:6-10, 18, 19).

U yantal baʼaloʼob koʼojtak tiʼ máak wa u ayikʼaltaleʼ maʼ letiʼ eʼesik wa maʼalob yanil kex letiʼe baʼax maas ku tsʼíiboltaʼaloʼ. Rey Salomoneʼ tu tsʼáaj cuenta lelaʼ, le oʼolal tu tsʼíibtaj: «Máaxoʼob ku tsikikoʼob [Dios] yéetel ku chíinpoolaloʼob tu táaneʼ ku bíin utsil tiʼob» (Ecl. 8:12). Lelaʼ ku yeʼesik le baʼax maas unaj u beetik máakoʼ, u kaxtik le «ojéelaj» yaan teʼ Bibliaoʼ (2 Tim. 3:16, 17).

[Foto yaan teʼ táan juʼun 30]

Utiaʼal u yeʼesaʼal le nojoch meyaj ku beetik le máax nuʼuktik le timonoʼ, u suukileʼ ku boʼonol maas nojoch tiʼ u maasil

[Máax tsʼáaik le fotooʼ]

Su concessione del Ministero per i Beni e le Attività Culturali. Maʼ unaj u copiartaʼal mix u beetaʼal uláakʼ wa baʼax yéetel le fotoaʼ.