«Béeychaj baʼax kin tsʼíiboltik»

Walajki quince jaʼaboʼobaʼ, Emiliaeʼ precursora, baʼaleʼ anchaj u pʼatik. Maʼ úucheʼ káaj u tuukul tiʼ bukaʼaj kiʼimakil u yóol kaʼachi, le oʼolal taakchaj u kaʼa beetik.

Baʼaleʼ yaʼab horaʼob ku meyaj, le oʼolal talamchaj tiʼ. Juntéenjeakeʼ Emiliaeʼ tu yaʼalaj tu táan u yéet meyajoʼob: «¡Bukaʼaj utsil wa ka béeyak in meyaj maas junpʼíit horaʼobeʼ!». Ka tu yojéeltaj u jefaeʼ, bin ilbileʼ ka kʼáataʼabtiʼ wa jach jaaj. Emiliaeʼ tu yaʼalajtiʼ jach jaaj. Baʼaleʼ utiaʼal lelaʼ le kiikoʼ unaj u tʼaan yéetel u maas nojchil le tuʼux ku meyajoʼ, tumen teʼeloʼ ku kʼáataʼaltiʼob ka meyajnakoʼob tuláakal le tiempo unajoʼ. Emilia túuneʼ payalchiʼinaj tiʼ Jéeoba utiaʼal maʼ u sajaktal tʼaan yéetel u maas nojchil le tuʼux ku meyajoʼ.

Tu yorail u tsikbal tu yéeteleʼ, Emiliaeʼ maʼ tu chʼaʼaj saajkiliʼ, tsʼoʼoleʼ yéetel tsiikil tu yaʼalaj taak u meyaj chéen junpʼíit horaʼob. Tu yaʼaleʼ ku yáantik u maasil teʼ súutukiloʼob yaantiʼoʼ. Yéetel tu yaʼalaj: «U j-jaajkunajen Jéeoba yéetel kin wáantik u maasil u natsʼubaʼob tiʼ Dios. Bejlaʼeʼ táan u maas kʼastal le kuxtaloʼ, le oʼolal jach kʼaʼabéet u nuʼuktaj le Bibliaoʼ. U jaajileʼ maʼ in kʼáat ka u talamkúunt le meyaj kin beetik wayeʼ, baʼaleʼ uts tin tʼaan ka yanakten junpʼíit maas tiempo utiaʼal in wáantik le máakoʼoboʼ. Le oʼolal uts tin tʼaan ka meyajnaken chéen junpʼíit horaʼob».

Le u nojchil tuʼux ku meyajoʼ tu jach chʼenxikintaj baʼax ku yaʼalik yéetel tu yaʼalajtiʼeʼ juntéenjeakeʼ tu yóotaj u yáant xan u maasil. Le oʼolal tu yaʼalaj tiʼ le kiikoʼ: «Yoʼolal le baʼaxoʼob taak a beetkoʼ, in waʼalikeʼ unaj in tsʼáaiktech le baʼax ka kʼáatkoʼ. Baʼaleʼ a wojel maʼ ken a náajalt le bajux suuk a náajaltikoʼ, ¿máasaʼ?». Emiliaeʼ tu yaʼalajtiʼ u yojel yéetel tsʼoʼok u chʼaʼtuklik u kuxtal chéen yéetel junpʼíit baʼal. Tsʼoʼoleʼ tu yaʼalaj: «Teneʼ jach in kʼáat in wáant le máakoʼoboʼ». Le u nojchil tuʼux ku meyajoʼ tu yaʼalajtiʼ: «Jach maʼalob in wilik u yantal máakoʼob áantik u maasil kex maʼ u náajaloʼob».

Bejlaʼeʼ, Emiliaeʼ chéen kanpʼéel kʼiin ku meyaj tiʼ junpʼéel semana, lelaʼ junpʼéel baʼal mix juntéen chaʼabak tiʼ mix juntúul tiʼ le ku meyajoʼob teʼeloʼ. Tsʼoʼoleʼ naʼaksaʼab u sueldo, le oʼolal bejlaʼeʼ ku náajal jeʼex kaʼachoʼ. Letiʼeʼ ku yaʼalik: «Béeychaj baʼax kin tsʼíiboltik. Precursoraen tu kaʼatéen».

Kux teech, ¿yaan wa baʼax jeʼel u páajtal a kʼexik utiaʼal a beetik a precursorileʼ?

[Uláakʼ baʼax ku tsoʼolol teʼ táan juʼun 32]

U nojchil tuʼux ku meyajoʼ tu yaʼalajtiʼ: «Jach maʼalob in wilik u yantal máakoʼob áantik u maasil kex maʼ u náajaloʼob»