Jéeobaeʼ ku jáalkʼabtikoʼon tu jaajil
Jéeobaeʼ ku jáalkʼabtikoʼon tu jaajil
«[Il] maʼalob le utsil chúukaʼan [...] aʼalmajtʼaan ku tsʼáaiktoʼon jáalkʼabiloʼ.» (SANT. 1:25)
¿BAʼAX JEʼEL A NÚUKIKEʼ?
¿Baʼax aʼalmajtʼaanil áantkoʼon utiaʼal k-jáalkʼabtaʼal, yéetel máaxoʼob kʼamik u yutsil?
¿Baʼax kʼaʼabéet utiaʼal k-jáalkʼabtaʼal tu jaajil?
¿Baʼax jáalkʼabtajil ken u kʼam le máaxoʼob kun pʼáatloʼob tiʼ u bejil le kuxtaloʼ?
1, 2. 1) ¿Baʼax táan u yúuchul tiʼ le máakoʼob bejlaʼaʼ, yéetel baʼaxten? 2) ¿Baʼax táan u páaʼtik le máaxoʼob meyajtik Jéeobaoʼ?
BEJLAʼEʼ cada kʼiin ku máaneʼ wíinikeʼ ku tsʼíiboltik u maasil baʼaloʼob, u beetik loob yéetel uláakʼ baʼaloʼob kʼaastak (2 Tim. 3:1-5). Utiaʼal u xuʼululeʼ, le gobiernoʼoboʼ ku tsʼáaikoʼob uláakʼ aʼalmajtʼaanoʼob (wa leyoʼob), ku maas yaʼabkuntkoʼob policíaʼob yéetel ku meyajtiʼob uláakʼ baʼaloʼob. Yaʼab máakoʼob tiʼ jejeláas luʼumileʼ, utiaʼal u kanáantik u yotochoʼobeʼ ku meyajtiʼob alarmaʼob, candadoʼob wa ku baʼpachtik u terrenoʼob yéetel alambre yaan u corrienteil. Yaʼabeʼ maʼ tu jóokʼloʼob de noche yéetel mix de kʼiin ku chaʼik u jóokʼol báaxal u paalal calle tu juunaloʼob. Tu yoʼolal lelaʼ le máakoʼoboʼ maʼ libre u yuʼubikubaʼobiʼ yéetel táan u bin u maas kʼastal tuláakal.
2 Le oʼolaleʼ, ¿baʼax kʼaʼabéet utiaʼal k-jáalkʼabtaʼal? Tu jardinil Edeneʼ, Satanaseʼ tu yaʼaleʼ kʼaʼabéet k-náachtal tiʼ Jéeoba. Baʼaleʼ le baʼaxoʼob táan k-ilik bejlaʼoʼ ku yeʼesik jach junpuliʼ maʼ jaajiʼ. U jaajileʼ wa ku náachtal máak tiʼ Dios yéetel ku xuʼulul u beetik baʼax maʼalobeʼ, ku beetik u muʼyaj u maasil. Tak toʼon k-muʼyaj kex táan k-meyajtik Jéeoba. Baʼaleʼ jach ku kiʼimaktal k-óol, tumen k-ojel maʼ kun xáantaleʼ yaan u xuʼulsaʼal le kʼeban yéetel le kʼasaʼanil utiaʼal k-kʼamik «u nojbeʼen jáalkʼabtajil u paalaloʼob Jajal Dios» ku yaʼalik le Bibliaoʼ (Rom. 8:21). Bejlaʼeʼ Jéeobaeʼ yaan baʼaxoʼob tsʼoʼok u beetik utiaʼal u jáalkʼabtikoʼon. ¿Baʼaxoʼobiʼ?
3. ¿Baʼax aʼalmajtʼaanil u tsʼaamaj Jéeoba tiʼ le máaxoʼob meyajtikoʼ, yéetel baʼax kʼáatchiʼiloʼob ken k-núuke?
3 Utiaʼal u jáalkʼabtikoʼoneʼ, Jéeobaeʼ tsʼoʼok u tsʼáaik «le utsil chúukaʼan [...] aʼalmajtʼaan ku tsʼáaiktoʼon jáalkʼabil» tu yaʼalaj Santiagooʼ, wa jeʼex u suʼutul tumen uláakʼ bibliaʼobeʼ, «le utsil chúukaʼan aʼalmajtʼaanoʼ, le ku taasik jáalkʼabil[oʼ]» wa «le aʼalmajtʼaan ku tsʼáaiktoʼon jáalkʼabiloʼ» (xokaʼak Santiago 1:25; Le Tumben Nuptʼan, Le Tumben Nuptʼan [Versión Popular]). Baʼaleʼ ken tuukulnak máak tiʼ aʼalmajtʼaaneʼ, maʼ tu taal tu tuukul u jáalkʼabtaʼal, baʼaxeʼ ku yuʼubik bey maas maʼ kun páajtal u beetik baʼax uts tu tʼaaneʼ. ¿Baʼax túun «le utsil chúukaʼan [...] aʼalmajtʼaan ku tsʼáaiktoʼon jáalkʼabiloʼ»? ¿Bix u jáalkʼabtikoʼon?
LE AʼALMAJTʼAAN KU JÁALKʼABTIKOʼONOʼ
4. ¿Baʼax «le utsil chúukaʼan [...] aʼalmajtʼaan ku tsʼáaiktoʼon jáalkʼabiloʼ», yéetel máaxoʼob kʼamik u yutsil?
4 «Le utsil chúukaʼan [...] aʼalmajtʼaan ku tsʼáaiktoʼon jáalkʼabiloʼ» maʼ letiʼe aʼalmajtʼaan tsʼaʼab tiʼ Moisesoʼ, tumen lelaʼ tsʼaʼab «utiaʼal u yeʼes le siʼipiloʼoboʼ», yéetel Cristoeʼ tu tsʼoʼokbesaj xan (Mat. 5:17; Gal. 3:19). ¿Tiʼ baʼax aʼalmajtʼaanil táan u tʼaan kaʼach Santiago? Táan u tʼaan tiʼ «u yaʼalmajtʼaan Cristo» (Gal. 6:2). Bey túunoʼ ichil «le utsil chúukaʼan [...] aʼalmajtʼaan[aʼ]» táakaʼan tuláakal le baʼax ku páaʼtik Jéeoba ka k-beetoʼ. Lelaʼ ku taasik utsiloʼob tiʼ le máaxoʼob yéeyaʼanoʼoboʼ yéetel tiʼ le «uláakʼ tamanoʼob[oʼ]» (Juan 10:16).
5. ¿Baʼaxten maʼ talam u beetaʼal le baʼax ku yaʼalik le aʼalmajtʼaan jáalkʼabtikoʼonoʼ?
5 Le aʼalmajtʼaanoʼob ku tsʼáaik yaʼab luʼumiloʼoboʼ maases talam u beetaʼal. Baʼaleʼ «le utsil chúukaʼan [...] aʼalmajtʼaan[oʼ]» chéen ku yáantkoʼon k-chʼaʼtukult baʼax unaj k-beetik yéetel maʼ talam u tsʼoʼokbesaʼaliʼ (1 Juan 5:3). Jesuseʼ tu yaʼalaj: «In kuucheʼ maʼ aaliʼ yéetel sáal u bisaʼal» (Mat. 11:29, 30). Tsʼoʼoleʼ «le utsil chúukaʼan [...] aʼalmajtʼaan[oʼ]» maʼ kʼaʼabéet u yaʼalik baʼax castigoil unaj u tsʼaʼabal tiʼ máaxoʼob maʼ tu tsʼoʼokbeskoʼoboʼ, tumen letiʼe yaabilaj péeksik máak u beetoʼ yéetel bey tsʼíibtaʼan t-tuukul yéetel t-puksiʼikʼaleʼ, maʼ tiʼ tuunichiʼ (xokaʼak Hebreob 8:6, 10).
LE BIX U JÁALKʼABTIKOʼON «LE UTSIL CHÚUKAʼAN [...] AʼALMAJTʼAAN[Oʼ]»
6, 7. 1) ¿Baʼax u biilal le aʼalmajtʼaanoʼob u tsʼaamaj Jéeobaoʼ? 2) ¿Bix u jáalkʼabtikoʼon «le utsil chúukaʼan [...] aʼalmajtʼaan[oʼ]»?
6 Jéeobaeʼ u tsʼaamaj yaʼab baʼaloʼob utiaʼal k-utsil. Jeʼex le gravedad táakaʼan ichil le leyes físicas ku nuʼuktik le baʼaxoʼob u beetmoʼ. ¿Máasaʼ mix máak jeʼel u yaʼalik chéen maʼ tu chaʼabal u beetik mix baʼal tumen le aʼalmajtʼaanoʼobaʼ? Baʼaxeʼ tuláakloʼon k-ilik kʼaʼabéet utiaʼal k-utsil. Bey xan le aʼalmajtʼaanoʼob u tsʼaamaj Jéeoba yoʼolal bix unaj k-kuxtal yéetel bix unaj k-adorartikoʼ táakaʼan ichil u «chúukaʼan [...] aʼalmajtʼaan» Cristooʼ.
7 Le aʼalmajtʼaan ku jáalkʼabtikoʼonoʼ maʼ chéen ku kanáantkoʼoniʼ, baʼaxeʼ ku tsʼáaik u páajtalil k-beetik le baʼaxoʼob maʼalob k-tsʼíiboltikoʼ yéetel maʼatech u beetik u muʼyaj u maasil. Bey túunoʼ utiaʼal k-jáalkʼabtaʼal, wa utiaʼal k-beetik le baʼax k-kʼáateʼ, kʼaʼabéet k-ilik wa uts tu tʼaan Jéeoba. Lelaʼ u kʼáat u yaʼaleʼ unaj k-yaabiltik baʼax u yaabiltmaj Dios yéetel k-pʼektik le baʼax u pʼekmoʼ. Letiʼe baʼax ku kaʼansiktoʼon xan le aʼalmajtʼaan ku jáalkʼabtikoʼonoʼ (Amós 5:15).
8, 9. ¿Baʼax utsil ku taasik u beetik máak le baʼax ku yaʼalik le aʼalmajtʼaan ku jáalkʼabtikoʼonoʼ? Kete.
8 Mientras kʼebanoʼoneʼ, maʼ chéen chʼaʼabil ken k-il maʼ k-tsʼíiboltik baʼax kʼaasiʼ. Baʼaleʼ wa chúukaʼan k-óol yéetel k-beetik le baʼax ku yaʼalik le utsil chúukaʼan aʼalmajtʼaanoʼ, yaan k-uʼuyik jáalkʼabtaʼanoʼon desde bejlaʼeʼ. Lelaʼ bey u yeʼesik le baʼax úuch tiʼ Jay, juntúul máak ku tsʼuʼutsʼik chamal ka káaj u xokik le Bibliaoʼ. Le ka tu kanaj maʼ maʼalob u yilik Dios u tsʼuʼutsʼaʼal chamaleʼ, anchaj u chʼaʼtuklik wa yaan u seguertik le vicioaʼ wa yaan u beetik baʼax u kʼáat Jéeoba. Letiʼeʼ tu chʼaʼtuklaj u meyajtik Dios yéetel kex maʼ chéen chʼaʼabileʼ tu yilaj u pʼatik le vicioaʼ. ¿Bix tu yuʼubiluba ka tu pʼataj? Letiʼeʼ tu yaʼalaj: «Jach kiʼimakchaj in wóol yéetel tin wuʼuyaj bey jáalkʼabtaʼabeneʼ».
9 Jayeʼ tu kaneʼ le jáalkʼabtajil ku yaʼalik u tsʼáaik le yóokʼol kaab, táakaʼan «u tsʼáaik u yóol máak chéen tiʼ u baʼaloʼobil le wíinkliloʼ», chéen ku palitsiltkoʼon; baʼaleʼ le jáalkʼabtajil ku tsʼáaiktoʼon Jéeoba, táakaʼan «u tsʼáaik u yóol máak tiʼ u baʼaloʼobil le [kiliʼich muukʼoʼ]», jach tu jaajil ku jáalkʼabtikoʼon yéetel ku tsʼáaiktoʼon «kuxtal yéetel [...] jeetsʼel óolal» (Rom. 8:5, 6). ¿Bix túun béeychajik u pʼatik Jay le tsʼuʼutsʼ chamaloʼ? Jéeoba áante. Letiʼeʼ ku yaʼalik: «Mantatsʼ tin xokaj le Bibliaoʼ, tin kʼáataj u kiliʼich muukʼ Dios yéetel tin kʼamaj le áantaj tsʼaʼabten teʼ múuchʼuliloʼ». Koʼox ilik bix jeʼel u yáantkoʼon xan le baʼax tu beetaj utiaʼal k-jáalkʼabtaʼal tu jaajiloʼ.
UNAJ K-XAKʼALXOKTIK LE BIBLIAOʼ
10. ¿Baʼax u kʼáat u yaʼal le tʼaan «il maʼalob» u aʼalmajtʼaan Diosoʼ?
10 Santiago 1:25, ku yaʼalik: «Le máax [...] ku yilik maʼalob le utsil chúukaʼan aʼalmajtʼaanoʼ u kʼáat u yaʼaleʼ, le aʼalmajtʼaan ku tsʼáaiktoʼon jáalkʼabiloʼ yéetel ku pʼáatal jeetsʼel u yanil tiʼeʼ [...], bíin kiʼimakchajak u yóol tiʼ baʼax ku beetik». Le tʼaan ich griego ku suʼutul «il maʼaloboʼ» u kʼáat u yaʼal «u chintal máak u yil wa baʼax», baʼaleʼ utiaʼal lelaʼ kʼaʼabéet u tsʼáaik u yóoliʼ yéetel u chʼíikil u pakte. Bey túunoʼ utiaʼal u kʼuchul t-puksiʼikʼal yéetel t-tuukul le aʼalmajtʼaan ku jáalkʼabtikoʼonoʼ, kʼaʼabéet k-tsʼáaik k-óol k-xakʼalxokt le Bibliaoʼ yéetel k-payalchiʼ tiʼ Dios utiaʼal u yáantkoʼon k-naʼat le baʼax k-xokikoʼ (1 Tim. 4:15).
11, 12. 1) ¿Baʼax tu yaʼalaj Jesús utiaʼal u yeʼesik kʼaʼabéet k-tsʼáaik ichil k-kuxtal le u jaajiloʼ? 2) Jeʼex u yeʼesik le foto yaan teʼ táan juʼunaʼ, ¿tiʼ baʼax jach unaj u kanáantkuba maases le táankelmoʼoboʼ?
11 Kʼaʼabéet xan k-beetik le baʼax ku yaʼalik le Bibliaoʼ, utiaʼal u nuʼuktik k-kuxtal. Letiʼe baʼax tu tsʼáaj naʼatbil Jesús le ka tu yaʼalaj tiʼ u disipuloʼob: «Wa ka pʼáatleʼex tiʼ le baʼaxoʼob kin waʼalik tiʼ teʼexaʼ, jach tu jaajileʼ teʼexeʼ in j-kaanbaleʼex. Bíin a kʼaj óolteʼex le jaajoʼ, le jaaj túunoʼ bíin u jáalkʼabteʼex» (Juan 8:31, 32). Junpʼéel libroeʼ ku yaʼalikeʼ, le tʼaan ku suʼutul «bíin a kʼaj óolteʼex[oʼ]» ku tsʼáaik naʼatbil «u yaabiltaʼal wa baʼax», tumen «jach maʼalob yéetel jach koʼoj u yilik máak le baʼax ku kʼaj óoltikoʼ». Utiaʼal k-kʼaj óoltik tubeel le jaajoʼ kʼaʼabéet k-yaabiltik yéetel k-tsʼáaik ichil k-kuxtal. Chéen bey jeʼel u páajtal k-aʼalik «u tʼaan Jajal Dios[eʼ]» táan «u meyaj» ichil k-kuxtal, utiaʼal k-eʼesik le jatsʼuts modos yaan tiʼ k-Taata yaan teʼ kaʼanoʼ (1 Tes. 2:13, Le Tumben Nuptʼan).
12 Maʼalob ka k-tukle: «¿Jach wa tu jaajil in kʼaj óol le jaajoʼ? ¿Táan wa in kuxtal jeʼex u yaʼalikoʼ wa láayliʼ kin yaayamtik jujunpʼéel baʼaloʼob ku beetaʼal teʼ yóokʼol kaabaʼ?». Juntúul kiik líikʼ ichil junpʼéel familia j-Jaajkunajoʼobeʼ ku yaʼalik baʼax úuchtiʼ tu x-lóoʼbayanil: «Le ken líikʼik máak ichil máaxoʼob meyajtik Dioseʼ, jeʼel u páajtal u yaʼalaʼaleʼ tiaʼan Jéeoba mantatsʼ tu yiknaleʼ. Baʼaleʼ teneʼ maʼ kʼuchen in kʼaj óolt tubeeliʼ. Maʼatech in pʼektik kaʼach le baʼax ku pʼektikoʼ, kin tuklik maʼatech u beetik u cuentail baʼax kin beetik yéetel maʼ tin kaxtaj u yáantaj le ka yanchajten talamiloʼobiʼ. Kin tuklik kaʼacheʼ tuláakal baʼal in wojel, kex u jaajileʼ maʼ in wojel mix baʼaliʼ». U maʼalobileʼ ka máan kʼiineʼ le kiikaʼ tu naʼataj maʼ maʼalob le bix u tuukuloʼ ka tu kʼexaj. Tu beetaj tak u precursora regularil.
LE KILIʼICH MUUKʼOʼ KU JÁALKʼABTIKOʼON
13. ¿Bix u jáalkʼabtikoʼon u kiliʼich muukʼ Dios?
13 Tu tsʼíibil 2 Corintoiloʼob 3:17, ku yaʼalik: «Jeʼel tuʼuxak ka yanak u kiliʼich [muukʼ] Yuumtsileʼ, teʼeloʼ yaan jáalkʼabil[iʼ]». ¿Bix u jáalkʼabtikoʼon le kiliʼich muukʼoʼ? Ku yáantkoʼon utiaʼal k-eʼesik jatsʼuts modos, jeʼex «yaakunaj, kiʼimak óolal, jeetsʼel óolal, chúukaʼan óolal, maʼalob bisajbail, utsil puksiʼikʼal, oksaj óolal, kabal óolal yéetel muʼukʼaʼan óolal» (Gal. 5:22, 23). Le baʼaxoʼob ku yúuchul teʼ yóokʼol kaabaʼ ku yeʼesikeʼ wa minaʼan le jatsʼuts modos maases le yaabilajoʼ, maʼ tu páajtal u yantal jáalkʼabtajil tiʼ mix máak. Ka tsʼoʼok u tʼaan tiʼ le jatsʼuts modosaʼ le apóstol Pablooʼ tu yaʼalaj: «Minaʼan mix junpʼéel aʼalmajtʼaan ka u mixbaʼalkúunt baʼaloʼob jeʼel bix leloʼobaʼ». Jach beyoʼ, junpuliʼ minaʼan yéetel maʼ tu béeytal u yantal mix junpʼéel aʼalmajtʼaan ka u yaʼal tak bukaʼaj unaj k-eʼesik le jatsʼuts modosoʼ (Gal. 5:18). Wa ka yanakeʼ, ¿baʼax túun u biilal junpʼéel aʼalmajtʼaan beyaʼ? Jéeobaeʼ maʼ u kʼáat ka yanak mix baʼal ka u talamkúunt k-eʼesik le jatsʼuts modosaʼ, tumen letiʼeʼ u kʼáat ka k-eʼes utiaʼal mantatsʼ.
14. Le yóokʼol kaaboʼ, ¿bix u palitsiltik le máaxoʼob ku beetkoʼob baʼax ku yaʼalikoʼ?
14 Le máaxoʼob ku tuʼusloʼob tumen le kʼasaʼan yóokʼol kaabaʼ maʼ xaaneʼ ku tuklikoʼob jáalkʼaboʼob utiaʼal u beetkoʼob jeʼel baʼaxak u kʼáatoʼobeʼ, tumen ku tsʼoʼokbesik baʼax ku tsʼíiboltkoʼob (xokaʼak 2 Pedro 2:18, 19). Kex jach u jaajileʼ palitsiltaʼanoʼob. Tumen tsʼaʼan yaʼab aʼalmajtʼaanoʼob utiaʼal maʼ u píitmáan u beetkoʼob chéen baʼaxoʼob minaʼan u cuentail. Pabloeʼ tu yaʼalaj: «Mix junpʼéel aʼalmajtʼaan ku tsʼaʼabal utiaʼal le máaxoʼob ku beetkoʼob utsoʼ, u jaajileʼ le aʼalmajtʼaanoʼ tsʼaʼan utiaʼal le máaxoʼob chich u puksiʼikʼaloʼoboʼ, le máaxoʼob maʼ tu yuʼubikoʼob tʼaanoʼ» (1 Tim. 1:9, 10). Tsʼoʼoleʼ tumen kuxaʼanoʼob utiaʼal u beetkoʼob chéen «baʼax u kʼáat [u] bakʼel[oʼobeʼ]», palitsiltaʼanoʼob tumen le kʼeban, ku keʼetel yéetel juntúul máax jach kʼasaʼanoʼ (Efe. 2:1-3). Beyoʼob jeʼex le yaʼaxkachoʼob ku tʼúuchloʼob tiʼ kaab, kex jeʼel tak u kíimloʼobeʼ (Sant. 1:14, 15).
LE BIX U JÁALKʼABTIKOʼON LE MÚUCHʼULILOʼ
15, 16. ¿Baʼaxten jach unaj k-antal ichil u kaajal Dios, yéetel bix u jáalkʼabtikoʼon?
15 Tiaʼanoʼon ichil le múuchʼuliloʼ, tumen Jéeoba natsʼoʼoniʼ, maʼ wa tumen t-tsʼíibtaj k-kʼaabaʼ jeʼex u beetik le máaxoʼob taak u yookloʼob tiʼ junpʼéel sociedadoʼ (Juan 6:44). ¿Baʼax péeks Jéeoba u natsʼoʼoniʼ? ¿Tumen wa k-meyajtik yéetel k-beetik baʼax maʼalob mantatsʼ? U jaajileʼ maʼ. Bey túunoʼ, ¿baʼax túun péeks Jéeoba? Tu yilaj yaantoʼon junpʼéel maʼalob puksiʼikʼal, yaan k-chaʼik u nuʼuktikoʼon yéetel yaan k-kʼamik le aʼalmajtʼaan ku jáalkʼabtikoʼonoʼ. Desde ka ookoʼon ichil le múuchʼuliloʼ, Jéeobaeʼ tsʼoʼok u kanáantkoʼon yéetel baʼax ku kaʼansik le Bibliaoʼ, tsʼoʼok u jáalkʼabtikoʼon tiʼ le baʼaxoʼob maʼ jaajtak ku kaʼansaʼaloʼ yéetel tsʼoʼok u yáantkoʼon kuxtal jeʼex kuxlajik Jesuseʼ (xokaʼak Efesoiloʼob 4:22-24). Chéen tu yoʼolaleʼ bejlaʼeʼ tiaʼanoʼon ichil le kaaj jáalkʼabtaʼanoʼ (Sant. 2:12).
16 ¿Máasaʼ ken yanakoʼon yéetel máaxoʼob meyajtik Jéeoba yéetel tuláakal u puksiʼikʼaloʼobeʼ maʼ saajkoʼoniʼ? ¿Máasaʼ maʼ ta súusut paakat láalaj hora utiaʼal a kanáantkaba? ¿Máasaʼ tu Najil Reinoeʼ maʼ t-jach kanáantik k-nuʼukul tumen saajkoʼon u yoklaʼal? U jaajileʼ maʼ. Baʼaxeʼ kiʼimak k-óol yéetel yaantoʼon jeetsʼelil. ¿Máasaʼ mix tuʼux uláakʼ k-uʼuyikba beyaʼ? Tsʼoʼoleʼ le jeetsʼelil k-uʼuyik ichil u kaajal Diosoʼ chéen u káajbal tiʼ le kun yantal maʼ kun xáantaloʼ.
«U NOJBEʼEN JÁALKʼABTAJIL U PAALALOʼOB JAJAL DIOS»
17. ¿Baʼax yaan u yil le «u kʼaj óoltaʼal u paalal Jajal Dios» yéetel u jáalkʼabtaʼal tuláakal wíinikoʼ?
17 Le ka tu tsolaj Pablo le jáalkʼabtajil ken u tsʼáa Jéeoba tiʼ le máaxoʼob meyajtik way Luʼumaʼ, tu yaʼalaj: «Tuláakal le baʼaloʼob u beetmaj Jajal Diosoʼ táan u páaʼtkoʼob u kʼiinil le ken páatak u kʼaj óoltaʼal u paalal Jajal Dios», lelaʼ táan u páaʼtkoʼob «yéetel yaʼab tsʼíibolal». Yéetel tu yaʼalaj xan: «Tuláakal baʼax beetaʼaneʼ yaan u toʼokol tiʼ le palitsililoʼ yéetel tiʼ le xuʼulsajiloʼ, utiaʼal ka yanak baʼal u yil tiʼ u nojbeʼen jáalkʼabtajil u paalaloʼob Jajal Dios» (Rom. 8:19-21). Le ken u yaʼal le teksto, «tuláakal baʼax beetaʼaneʼ» táan u tʼaan tiʼ le máaxoʼob ku páaʼtkoʼob u kuxtaloʼob utiaʼal mantatsʼ way Luʼumeʼ. Letiʼobeʼ yaan u kʼamkoʼob u yutsil «ken páatak u kʼaj óoltaʼal» le sukuʼunoʼob yéeyaʼanoʼoboʼ. Lelaʼ yaan u káajal ken kaʼa kuxkíintaʼak teʼ kaʼan le yéeyaʼanoʼob yéetel ken u yáantoʼob Cristo u luʼs le kʼasaʼanil way Luʼum, bey xan ken u yáantoʼob okol le «yaʼabkach máakoʼob» teʼ túumben yóokʼol kaaboʼ (Apo. 7:9, 14).
18. ¿Bix kun jáalkʼabtbil le máaxoʼob uʼuyik tʼaanoʼ, yéetel bix le jáalkʼabtajil ken u kʼamoʼob tu tsʼookoʼ?
18 Tuláakal wíinikeʼ yaan u kiʼimaktal u yóol ken u yil junpʼéel jáalkʼabtajil mix juntéen ilaʼak, tumen mix Satanás yéetel mix u kʼasaʼan angeloʼob kun antaliʼ (Apo. 20:1-3). ¡Bukaʼaj jatsʼutsil waleʼ! Tsʼoʼoleʼ le 144,000 reyoʼob yéetel j-kʼiinoʼob kun gobernaroʼob yéetel Cristooʼ yaan u meyajtiʼob u kuxtal Jesús tu kʼuboʼ, utiaʼal u jáalkʼabtikoʼob wíinik tiʼ le kʼebanoʼ (Apo. 5:9, 10). Ken tsʼoʼokok u yeʼesik wíinik chúukaʼan u yóoleʼ, Jéeobaeʼ yaan u tsʼáaiktiʼob le baʼax u yaʼalmaj desde úuchjeakoʼ, lelaʼ «u nojbeʼen jáalkʼabtajil u paalaloʼob Jajal Dios». ¡Chéen tukult bukaʼaj jatsʼutsil! Teʼ kʼiinoʼob jeʼeloʼ maʼ ken k-tsʼíibolt k-beetik baʼax kʼaas, tumen maʼ kʼeban máakoʼoniʼ yéetel yaan k-eʼesik u jatsʼuts modos Dios.
19. ¿Baʼax unaj k-beetik utiaʼal k-jáalkʼabtaʼal tu jaajil?
19 ¿Taak wa a kʼamik «u nojbeʼen jáalkʼabtajil u paalaloʼob Jajal Dios»? Wa beyoʼ chaʼa u yokol taʼ tuukul yéetel ta puksiʼikʼal «le aʼalmajtʼaan ku tsʼáaiktoʼon jáalkʼabiloʼ». Tsʼáa a wóol a xakʼalxokt mantatsʼ le Bibliaoʼ. Tsʼáa ichil a kuxtal u jaajiloʼ. Kʼáat tiʼ Jéeoba u kiliʼich muukʼ. Maʼ a náachtal tiʼ u kaajal yéetel jóoʼs u yutsil le kaʼansaj ku tsʼáaikoʼ. Maʼ a chaʼik a tuʼusul tumen Satanás ka tak joʼopʼok a tuklik u aʼalmajtʼaanoʼob Dioseʼ mix baʼal ku chaʼik a beetik, jeʼex tu beetil Evaeʼ. U jaajileʼ le Kʼaasilbaʼaloʼ jach yaan u naʼat. Baʼaleʼ jeʼex ken k-il teʼ tuláakʼ xookoʼ maʼ tu béeytal u jáan beetik k-lúubul, tumen «maʼalob k-kʼaj óoltmil u kʼaakʼas tuukuloʼob» (2 Cor. 2:11).
[U kʼáatchiʼiloʼob le xookoʼ]
[Fotoʼob yaan teʼ táan juʼun 9]
¿Láayliʼ wa kin tsʼíiboltik jujunpʼéel tiʼ le baʼaxoʼob ku beetaʼal teʼ yóokʼol kaabaʼ?
[Fotoʼob yaan teʼ táan juʼun 9]
¿Kin kuxtal wa jeʼex u yaʼalik u jaajiloʼ?
