Jéeobaeʼ ku muchʼik u familia
Jéeobaeʼ ku muchʼik u familia
«Kin kʼáat óoltikteʼex ka [...] a wileʼex a pʼáatleʼex nupaʼaneʼex mantatsʼ yéetel u yáantaj kiliʼich [muukʼ].» (EFE. 4:1, 3)
¿JEʼEL WA U PÁAJTAL A TSOLIKEʼ?
¿Baʼax u biilal le baʼaxoʼob ku beetik Diosoʼ?
¿Baʼax u kʼáat u yaʼal k-núupul «mantatsʼ yéetel u yáantaj kiliʼich [muukʼ]»?
¿Bix jeʼel k-maas eʼesik yaabilaj t-baatsileʼ?
1, 2. ¿Baʼax u tukultmaj Jéeoba utiaʼal le Luʼum yéetel wíinikoʼ?
FAMILIA. ¿Baʼax ku taal ta tuukul ken a wuʼuy le tʼaanaʼ? ¿Yaabilaj? ¿Kiʼimak óolal? ¿A múuchʼ meyajeʼex utiaʼal a beetkeʼex wa baʼax? ¿Junpʼéel jatsʼuts kúuchil tuʼux a nojochtal, a kaanbal yéetel a waʼalik baʼax ka tuklik? Maʼ xaaneʼ techeʼ tiaʼanech ichil junpʼéel familia beyaʼ. Jéeoba beet u yantal le familiaoʼ (Efe. 3:14, 15). Letiʼeʼ u kʼáat ka kuxlak tuláakal máak ich jeetsʼelil, ka yanak confianza ichiloʼob yéetel ka much meyajnakoʼob, kex kajaʼanoʼob kaʼan wa way Luʼumeʼ.
2 Le ka kʼebanchaj le yáax wíinikoʼoboʼ xuʼul u kʼaʼamloʼob ichil u familia Dios, baʼaleʼ lelaʼ maʼ tu beetaj u xuʼulul u béeykuntik Jéeoba le baʼax u tukultmoʼ. Ken pʼáatak paraísoil le Luʼumaʼ, letiʼeʼ yaan u beetik u chuʼupul yéetel u chʼiʼibal Adán yéetel Eva (Gén. 1:28; Isa. 45:18). Tsʼoʼok u beetik tuláakal baʼax kʼaʼabéet utiaʼal u béeytal, yaʼab tiʼ le baʼaloʼob tsʼoʼok u beetkoʼ ku chíikpajal tu cartail Efesoiloʼob, lelaʼ maases ku tʼaan tiʼ le múuchʼ meyajoʼ. Koʼoneʼex ilik jujunpʼéel tekstoʼob tiʼ le libroaʼ yéetel bix jeʼel k-táakpajal utiaʼal u muchʼik Jéeoba tuláakal le baʼaxoʼob u beetmoʼ.
LE BAʼAX KU BEETIK JÉEOBA UTIAʼAL U BÉEYKUNTIK LE BAʼAX U TUKULTMOʼ
3. Jeʼex u yaʼalik Efesoiloʼob 1:10, ¿baʼax káaj u beetik Dios jach tu kʼiinil, yéetel baʼax kʼiin ka kʼáaj u yáax jaats?
3 Le baʼaxoʼob ku beetik Jéeobaoʼ mantatsʼ yaan baʼax u yil yéetel le baʼax u tukultmoʼ. Letiʼeʼ tsʼoʼok u kaajal u beetik le baʼax kʼaʼabéet utiaʼal u muchʼik tuláakal le baʼaxoʼob u beetmoʼ, le oʼolaleʼ «yaan u yúuchul le ken kʼuchuk u kʼiinil» (xokaʼak Efesoiloʼob 1:8-10). Le baʼax u tukultmoʼ yaan u béeychajal ich kaʼa jaats. Teʼ yáax jaatsoʼ ku nuʼuktaʼal le máaxoʼob kun binoʼob kaʼan utiaʼal u yantaloʼob yéetel Jesús, u Pooloʼoboʼ. Teʼ Pentecostés tu jaʼabil 33 tsʼoʼokok u taal Jesusoʼ, Jéeobaeʼ káaj u muchʼik le máaxoʼob kun gobernar yéetel Cristo teʼ kaʼanoʼ (Hch. 2:1-4). Tu yoʼolal u kuxtal Cristo tu kʼuboʼ le máaxoʼob yéeyaʼanoʼoboʼ toj u kuxtaloʼob tu táan Dios, le oʼolal jeʼel u páajtal u kʼamkoʼob kuxtal minaʼan u xuuleʼ, yéetel jeʼel u páajtal u yaʼalikoʼob yéetel kiʼimak óolaleʼ: «U paalaloʼon [Dios]» (Rom. 3:23, 24; 5:1; 8:15-17).
4, 5. ¿Baʼax ku beetaʼal ichil le kaʼa jaats tiʼ le baʼax u tukultmaj Dios ku yaʼalik Efesoiloʼob 1:10?
4 Teʼ tu kaʼa jaatsoʼ ku nuʼuktaʼal le máaxoʼob kun kuxtaloʼob way Luʼum tiʼ junpʼéel Paraíso yáanal u páajtalil u Reino Cristooʼ. U jaats tiʼ le máaxoʼob kun pʼáatloʼob kuxtal way Luʼumeʼ letiʼe «yaʼabkach máakoʼo[boʼ]» (Apo. 7:9, 13-17; 21:1-5). Tsʼoʼoleʼ ichil le Mil Jaʼaboʼoboʼ yaan u kaʼa kuxkíintaʼal le máaxoʼob kimenoʼob utiaʼal u múul kuxtaloʼob tu yéeteloʼoboʼ (Apo. 20:12, 13). Ken kaʼa kuxkíintaʼakoʼobeʼ maas yaan u páajtal k-múuchʼ meyaj. Ken tsʼoʼokok le Mil Jaʼaboʼoboʼ, le baʼaloʼob «yanoʼob luʼumoʼ» yaan u aktáantkoʼob le u tsʼook túuntaj óolaloʼ, yéetel le máaxoʼob kun chúukpajal u yóoloʼobeʼ yaan u kʼaʼamloʼob bey «u paalaloʼob Jajal Dios» way Luʼumeʼ (Rom. 8:21; Apo. 20:7, 8).
5 Bejlaʼeʼ táan u nuʼuktaʼal tu kaʼa jaatsil: le kun binoʼob kaʼanoʼ yéetel le kun pʼáatloʼob kuxtal way Luʼumeʼ. Baʼaleʼ ¿bix jeʼel u táakpajal cada juntúul tiʼ toʼon ichil le baʼax ku tuklik u beetik Diosoʼ?
UNAJ K-MÚUL MEYAJ «YÉETEL U YÁANTAJ KILIʼICH [MUUKʼ]»
6. ¿Bix u yeʼesik le Biblia unaj u muchʼkuba le máaxoʼob tsaypachtik Jesusoʼ?
6 Le Bibliaoʼ ku yaʼalikeʼ unaj u muchʼkuba le máaxoʼob tsaypachtik Jesusoʼ (1 Cor. 14:23; Heb. 10:24, 25). Baʼaleʼ maʼ chéen yaan ka u muchʼubaʼob tiʼ junpʼéeliliʼ tuʼux, jeʼex le máaxoʼob yanoʼob tiʼ junpʼéel mercado wa le ku binoʼob u chaʼantoʼob u báaxal junpʼéel equipooʼ. Utiaʼal lelaʼ unaj u tsʼoʼokbeskoʼob le baʼax ku kʼáatik Jéeobaoʼ yéetel u chaʼik u nuʼuktaʼaloʼob tumen u kiliʼich muukʼ.
7. ¿Baʼax u kʼáat u yaʼal le k-múuchʼ antal «mantatsʼ yéetel u yáantaj kiliʼich [muukʼoʼ]»?
7 Tu yoʼolal u kuxtal Cristo tu kʼuboʼ, Jéeobaeʼ ku yilik bey u paalal le máaxoʼob yéeyaʼanoʼoboʼ, yéetel le uláakʼ j-tamanoʼoboʼ, bey u amigoʼobeʼ. Baʼaleʼ mientras kuxaʼanoʼon way Luʼumeʼ, maʼ xaaneʼ yaan u yantaltoʼon jujunpʼéel talamil yéetel wa máax (Rom. 5:9; Sant. 2:23). Le oʼolal le Bibliaoʼ ku yaʼalik tiʼ le máaxoʼob meyajtik Diosoʼ: «Yanakteʼex chúukaʼan óolal». ¿Baʼax jeʼel u yáantkoʼon múuchʼ meyaj yéetel k-sukuʼunoʼobeʼ? Unaj u yantaltoʼon kabal óolal yéetel «suuk óolal». Tsʼoʼoleʼ Pabloeʼ ku yaʼalik ka múuchʼ yanakoʼon «mantatsʼ yéetel u yáantaj kiliʼich [muukʼ], tu yoʼolal le jeetsʼel óolal[oʼ]» (xokaʼak Efesoiloʼob 4:1-3). Utiaʼal u béeytal lelaʼ unaj k-chaʼik u nuʼuktikoʼon u kiliʼich muukʼ Dios yéetel k-eʼesik u yich. U jelaʼanil tiʼ le baʼax ku tsʼíiboltik k-bakʼeloʼ, u yich le kiliʼich muukʼoʼ bey ku lijartik le talamil ku yantaltoʼon yéetel k-sukuʼunoʼoboʼ.
8. ¿Bix u jatsik máak le baʼax ku tsʼíiboltik le bakʼoʼ?
8 U kʼaakʼas tsʼíibolal le bakʼoʼ ku náachkuntik máak tiʼ u maasil. Pabloeʼ tu yaʼalaj: «Le baʼaxoʼob ku túulchʼintaʼal u beet máak tumen u kʼeban wíinkliloʼ jach chíikaʼan u yilaʼaloʼob, yéetel letiʼe jeʼeloʼobaʼ: núupkʼeban, éekʼ kuxtal, kuxtal x-maʼ suʼtalil» (Gal. 5:19, NM). Jeʼex le máax ku lúubul tiʼ núupkʼeban ku náachtal tiʼ Jéeoba yéetel tiʼ le múuchʼuliloʼ, le máax ku tusik u núup yéetel yaanaloʼ ku náachtal tiʼ u núup yéetel tiʼ u paalal. Le éekʼ kuxtaloʼ ku beetik maʼ u biskuba máak yéetel Dios bey xan yéetel le máaxoʼob yaabiltmiloʼ. Jeʼex wa ka k-óot takʼ yéetel pegamento kaʼapʼéel baʼaleʼ, tu kaʼapʼéelal kʼaʼabéet limpio utiaʼal u táakʼal. Le kuxtal x-maʼ suʼtaliloʼ ku yeʼesik u pʼekmaj máak le leyoʼob u tsʼaamaj Diosoʼ. Tsʼoʼoleʼ le uláakʼ baʼaxoʼob ku tsʼíiboltik le bakʼoʼ ku náachkuntik xan máak tiʼ u maasil bey xan tiʼ Dios. Tuláakal le baʼaloʼobaʼ jach ku bin tu contra le baʼax uts tu tʼaan Jéeobaoʼ.
9. ¿Baʼax unaj u tuklik juntúul cristiano utiaʼal u yilik wa táan u tsʼáaik u yóol múuchʼ antal «mantatsʼ yéetel u yáantaj kiliʼich [muukʼ]»?
9 Le oʼolaleʼ cada juntúul tiʼ toʼon unaj u tuklik: «¿Kin tsʼáaik wa in wóol utiaʼal in múuchʼ antal ‹mantatsʼ yéetel u yáantaj kiliʼich [muukʼ], tu yoʼolal le jeetsʼel óolal[oʼ]›? ¿Baʼax kin beetik ken yanak talamiloʼob? ¿Kin tsikbaltik wa utiaʼal u tsʼáaikuba tin tséel in amigoʼob? Lugar in wutskíintik le talamil ku yantaltenoʼ, ¿kin pʼatik wa tu kʼab le ancianoʼob chéen utiaʼal in pʼáatal utsiloʼ? ¿Kin náachtal wa tiʼ u maasil chéen utiaʼal maʼ u kʼaʼajaltiʼob le baʼaloʼob maʼ maʼalob in beetmoʼ?». U jaajileʼ le tuukuloʼob beyaʼ ku binoʼob tu contra le baʼax u tukultmaj u beetik Dios utiaʼal u muchʼkíintik tuláakal baʼal tiʼ Cristooʼ.
10, 11. 1) ¿Baʼaxten jach unaj u yantaltoʼon jeetsʼelil yéetel le sukuʼunoʼoboʼ? 2) ¿Baʼax jeʼel u yáantaj utiaʼal u yantal jeetsʼelil yéetel utiaʼal u maas meyajtaʼal Dios teʼ múuchʼuliloʼ?
10 Jesuseʼ tu yaʼalaj: «Wa ka bisik a siibal [teʼ altaroʼ,] baʼaleʼ ku kʼaʼajal tiʼ tech, kʼuux tech a sukuʼuneʼ, pʼat a siibal teʼeloʼ, xeen táanil a kaxant kiʼimak óolal yéetel a sukuʼun. Ku tsʼoʼokoleʼ ku páajtal a suut a kʼub a [siibal]. [...] Ilawil a kaxtik kiʼimak óolal» (Mat. 5:23-25). Santiago xaneʼ tu yaʼalaj: «Le máaxoʼob ku táan óoltikoʼob u yantal jeetsʼeloʼ, ku paakʼaloʼob ich jeetsʼel utiaʼal u jochkoʼob junpʼéel toj kuxtal» (Sant. 3:17, 18). Bey túunoʼ maʼ tu béeytal u yantaltoʼon junpʼéel toj kuxtal wa minaʼantoʼon jeetsʼelil.
11 Koʼoneʼex tuukul tiʼ lelaʼ. Tsʼoʼok u yilaʼaleʼ tiʼ jujunpʼéel luʼumiloʼob tuʼux yaan baʼateltáambaloʼobeʼ jeʼel u béeytal u meyajtaʼal uláakʼ kex óoliʼ táanchumuk tiʼ le luʼum wa maʼ u chʼaʼik saajkil le máakoʼob tiʼ le minaʼoboʼ. Cada ken wáakʼak junpʼéel minaeʼ le j-kolnáaloʼoboʼ ku pʼatkoʼob le luʼum ku meyajtikoʼoboʼ, le oʼolal le mejen kaajoʼoboʼ ku pʼáatal óoliʼ minaʼan le baʼax kʼaʼabéettiʼoboʼ yéetel ku pʼáatal minaʼan janal utiaʼal túuxtbil teʼ nukuch kaajoʼoboʼ. Lelaʼ ku yeʼesiktoʼoneʼ wa yaantoʼon jujunpʼéel kʼaakʼas modos jeʼel u kʼaskúuntik le jeetsʼelil yaantoʼon yéetel le sukuʼunoʼoboʼ, maʼ tu béeytal xan k-maas k-meyajtik Dios. Wa k-perdonar tu séebaʼanil yéetel k-kaxtik u yutsil u maasileʼ, yaan k-áantaj utiaʼal u meyajtaʼal Jéeoba yéetel kiʼimak óolal.
12. ¿Bix u yáantaj le ancianoʼob utiaʼal u múuchʼ meyaj le múuchʼuliloʼ?
12 Tsʼoʼoleʼ le «siibaloʼob tiʼ máakoʼob[oʼ]» jach jeʼel u yáantajoʼob utiaʼal u múuchʼ meyaj le sukuʼunoʼoboʼ. Letiʼobeʼ baʼax ku kaxtikoʼobeʼ «k-núupul tuláakloʼon tiʼ oksaj óolal» (Efe. 4:8, 13). Le ken k-múul k-meyajt Dios yéetel le ancianoʼob yéetel ken meyajnaktiʼob le Biblia utiaʼal u tsolnuʼuktikoʼoneʼ, ku yáantkoʼonoʼob utiaʼal k-kʼexik k-kuxtal (Efe. 4:22-24). Yéetel le tsolnuʼukoʼob ku tsʼáaikoʼoboʼ, ¿k-tsʼáaik wa cuenta junpʼéel bix u yáantkoʼon Jéeoba utiaʼal u páajtal k-kuxtal teʼ túumben yóokʼol kaab yáanal u nuʼuktaj u Hijooʼ? Ancianoʼex, ¿ka tsolnuʼuktikeʼex wa le sukuʼunoʼob yéetel le tuukul beyaʼ? (Gal. 6:1.)
«YANAKTEʼEX YAAKUNAJ»
13. ¿Baʼax jeʼel u yúuchul wa maʼ k-beetik le baʼax ku yaʼalik Efesoiloʼob 4:25 tak 32?
13 Efesoiloʼob 4:25 tak 29, ku yaʼaliktoʼon maʼ k-beetik le baʼaloʼob jeʼel u taasiktoʼon talamiloʼ. Ichileʼ tiaʼan le tuusoʼ, le pʼuʼujuloʼ, le maʼakʼóoliloʼ yéetel le tʼaanoʼob jeʼel u lúuʼsik u yóol u maasiloʼ. Wa yaan máax maʼ tu tsʼáaik ichil u kuxtal le tsolnuʼukoʼobaʼ, u kiliʼich muukʼ Dioseʼ ku okʼomtal u yóol, tumen táan u yilik ka múuchʼ meyajnak máak (Efe. 4:30). Utiaʼal u páajtal k-múul meyaj ich jeetsʼelileʼ unaj k-beetik xan le baʼax tu yaʼalaj Pabloaʼ: «Xúumpʼatteʼex tuláakal kʼáajil óol, kʼuuxilil, pʼujaʼanil, awatil, poochʼilil, yéetel tuláakal u jejeláas kʼaasil. Baʼax unajeʼ, yanakteʼex yaakunaj yéetel chʼaʼ óotsilil ta baatsileʼex, jeʼel bix Jajal Dios tu [perdonarteʼex tu yoʼolal] Cristoeʼ» (Efe. 4:31, 32).
14. 1) ¿Baʼax u kʼáat u yaʼal le tʼaan «yanakteʼex yaakunaj[oʼ]»? 2) ¿Baʼax ken u yáantoʼon utiaʼal u yantaltoʼon yaabilaj?
14 Le tʼaan «yanakteʼex yaakunaj[oʼ]» ku yeʼesikeʼ maʼ xaaneʼ kʼaʼabéet k-maas eʼesik yaabilaj. Jach kʼaʼabéet u suuktal k-kaxtik táanil u yutsil u maasil (Fili. 2:4). Maʼ xaaneʼ yaan baʼax ku taaktal k-aʼalik utiaʼal cheʼejtbil wa utiaʼal u yilaʼal jach yaan k-naʼat, baʼaleʼ ¿mix máak wa ken k-pʼat kʼaasil? Wa k-tuukul tiʼ le baʼaloʼob beyaʼ yaan u yáantkoʼon k-beet le baʼax tu yaʼalaj Pablooʼ.
YAABILAJ YÉETEL TSIIKIL ICHIL LE FAMILIAOʼ
15. ¿Tiʼ Efesoiloʼob 5:28, baʼax tu yaʼalaj Pablo tu beetaj Cristo yoʼolal le múuchʼuliloʼ?
15 Le Bibliaoʼ ku ketik le bix yanil Cristo yéetel le múuchʼulil, yéetel kaʼatúul máaxoʼob tsʼokaʼan u beeloʼob. Lelaʼ ku yeʼesikeʼ le íichamtsiloʼ unaj u nuʼuktik, u yaabiltik yéetel u kanáantik u yatan, le atantsil xanoʼ unaj u chaʼik u nuʼuktaʼal tumen u yíicham (Efe. 5:22-33). Pabloeʼ tu yaʼalaj: «[«Bey túun xanoʼ», NM] le íichamtsiloʼoboʼ unaj u yaabiltikoʼob u yatanoʼob, jeʼel bix u yaabiltikoʼob u wíinkliloʼobeʼ» (Efe. 5:28). ¿Baʼax tu yóotaj u yaʼal yéetel le tʼaan «bey túun xanoʼ»? Le ka tu yaʼalaj lelaʼ jach táant u tsʼoʼokol u yaʼalikeʼ«Cristo[eʼ] tu yaabiltaj le [múuchʼuliloʼ] ka tu tsʼáaj u kuxtal tu yoʼolal [...], [utiaʼal] u sakkúuntik úuchik u pʼoʼik yéetel jaʼ tu yoʼolal le tʼaanoʼ». Le oʼolaleʼ le íichamtsiloʼ utiaʼal u múul meyaj yéetel Jéeoba utiaʼal u muchʼik tuláakal baʼal tu kaʼatéen tiʼ Cristoeʼ, unaj u yáantik u familia u meyajt Dios.
16. ¿Baʼax utsiloʼob ku taasik u beetik le taatatsiloʼob le baʼax ku yaʼalik le Bibliaoʼ?
16 Le taatatsiloʼoboʼ maʼ unaj u tuʼubskoʼobeʼ táan u beetkoʼob junpʼéel meyaj tsʼaʼantiʼob tumen Jéeoba. Baʼaleʼ teʼ kʼasaʼan yóokʼol kaabaʼ yaʼab máaxoʼob minaʼantiʼob «yaakunaj» (2 Tim. 3:1, 3). Yaʼab xiiboʼobeʼ maʼatech u tsʼáaikoʼob baʼax kʼaʼabéet tiʼ u paalaloʼob, le oʼolal jach ku bin kʼaasil tiʼ le paalaloʼ. Baʼaleʼ Pabloeʼ tu yaʼalaj tiʼ le xiiboʼob meyajtik Diosoʼ: «Maʼ a beetkeʼex u kʼuuxil a paalaleʼex, baʼaleʼ chʼíijseʼexoʼob tiʼ junpʼéel toj kuxtal yéetel tiʼ u kaʼansajil Yuumtsil» (Efe. 6:4). Le paalaloʼoboʼ yáax tu yotochoʼob unaj u kankoʼob u yeʼesoʼob yaabilaj yéetel tsiikil. Bey túunoʼ le taatatsiloʼob tsʼoʼok u kaʼansik tiʼ u paalaloʼob le baʼaloʼobaʼ táan u beetkoʼob jeʼex u tukultmaj Jéeobaoʼ. Wa ichil k-otoch minaʼan poochʼil yéetel pʼuʼujuleʼ, k-kaʼansik k-paalal u yeʼesoʼob yaabilaj yéetel tsiikil. Tsʼoʼoleʼ lelaʼ yaan u yáantkoʼob utiaʼal u kuxtaloʼob tiʼ le túumben yóokʼol kaab ken u taas Diosoʼ.
17. ¿Baʼax kʼaʼabéettoʼon utiaʼal maʼ u táabsikoʼon le Kʼaasilbaʼaloʼ?
17 Maʼ unaj u tuʼubultoʼoneʼ le Kʼaasilbaʼal, le máax yáax luʼs le jeetsʼeliloʼ, yaan u beetik tuláakal le ku páajtal utiaʼal maʼ k-beetik le baʼax u kʼáat Diosoʼ. Jeʼex k-ilkoʼ tiʼ le Kʼaasilbaʼal ku taal u divorciarkuba máakoʼ, u kajtal juntúul xiib yéetel juntúul koʼolel maʼ tsʼokaʼan u beeloʼobiʼ yéetel u yantal baʼal u yil juntúul xiib yéetel u yéet xiibil wa juntúul koʼolel yéetel u yéet koʼolelil. Toʼoneʼ maʼatech k-chaʼik u páakʼaltoʼon le tuukuloʼob beyaʼ. Baʼaxeʼ k-ilik k-kuxtal jeʼex kuxlajik Cristoeʼ (Efe. 4:17-21). Utiaʼal k-aktáantik le táabsajiloʼob ku tsʼáaik le Kʼaasilbaʼal yéetel u kʼasaʼan angeloʼoboʼ unaj k-beetik le baʼax ku yaʼalik le Bibliaaʼ: «Búukinteʼex u nuʼukulil baʼateʼel ku tsʼáaikteʼex Jajal Diosoʼ» (xokaʼak Efesoiloʼob 6:10-13).
«KUXLENEʼEX ICH YAAKUNAJ»
18. ¿Baʼaxten ku béeytal k-múul meyaj?
18 Le yaabilajoʼ letiʼe baʼax maas áantkoʼon múul meyajoʼ. Tumen chuup k-puksiʼikʼal yéetel yaabilaj tu yoʼolal «[k-]juntúuliliʼ Yuumtsil», Jesucristo, yoʼolal «[k-]juntúuliliʼ Jajal Dios», Jéeoba, yéetel yoʼolal k-sukuʼunoʼobeʼ, k-chʼaʼtuklik k-núupul «mantatsʼ yéetel u yáantaj kiliʼich [muukʼ], tu yoʼolal le jeetsʼel óolal[oʼ]» (Efe. 4:3-6). Ka payalchiʼinaj Jesús tiʼ u Taataeʼ, tu yaʼalaj: «Maʼ táan in kʼáat óolal tiʼ teech chéen tu yoʼolal leloʼobaʼ, baʼaleʼ tak tu yoʼolal le máaxoʼob bíin u yoksaj óoltenoʼob tu yoʼolal u [kʼaʼaytaj] leloʼobaʼ. Kin kʼáatiktech ka junpʼéeliliʼchajak tuláakloʼob, ka junpʼéeliliʼchajakoʼob junmúuchʼ t-éetel, in Yuum, jeʼel bix teech yanech tiʼ teen yéetel teen yanen tiʼ teech [...]. Tin tsʼáa u yojéeltoʼob máaxech, láayliʼ yaan in tsʼáaikech kʼaj óoltbileʼ, utiaʼal ka yanaktiʼob le yaakunaj yaantech tiʼ tenoʼ utiaʼal ka yanaken tiʼob xan» (Juan 17:20, 21, 26).
19. ¿Baʼax tsʼoʼok k-chʼaʼtuklik k-beetik?
19 Wa k-ilik talam k-beetik baʼax ku yaʼalik Dios yoʼolal le kʼebanoʼ, le yaabilajoʼ yaan u péeksikoʼon k-kʼáat ich payalchiʼ le baʼax tu kʼáataj le salmistaaʼ: «Beet ka u tsik a kʼaabaʼ in puksiʼikʼal» (Sal. 86:11). Le oʼolal koʼoneʼex tsʼáaikba tu contra le Kʼaasilbaʼal utiaʼal maʼ u náachkuntkoʼon tiʼ k-Taata yaan teʼ kaʼanoʼ yéetel tiʼ le máaxoʼob ku kʼamkoʼ. Unaj k-beetik ichil k-otoch yéetel teʼ múuchʼulil le baʼax tu yaʼalaj Pabloaʼ: «Tumen teʼex u yaabilaj paalal Jajal Dioseʼ, ilawileʼex a béeytaleʼex jeʼel bix letiʼeʼ. Kuxleneʼex ich yaakunaj» (Efe. 5:1, 2).
[U kʼáatchiʼiloʼob le xookoʼ]
[Foto yaan teʼ táan juʼun 29]
Pʼat a siibal tu táan le altaroʼ, xeen táanil a wutskíint le talamil yaantech yéetel a sukuʼunoʼ
[Foto yaan teʼ táan juʼun 31]
Taatatsileʼex, kaʼans a paalaleʼex u yeʼesoʼob tsiikil
