Koʼoneʼex meyajtik le Dios jáalkʼabtikoʼonoʼ

«U yaabiltaʼal Jajal Dioseʼ u yuʼubajtʼantaʼal u yaʼalmajtʼaanoʼob; yéetel u yaʼalmajtʼaa noʼobeʼ maʼ talamoʼobiʼ.» (1 JUAN 5:3)

¿BAʼAX JEʼEL A NÚUKIKEʼ?

¿Baʼax ku beetik Satanás utiaʼal k-tuklik jach talam u beetaʼal le baʼax ku yaʼalik u yaʼalmajtʼaanoʼob Diosoʼ?

¿Baʼaxten jach unaj k-kanáantik yéetel máaxoʼob k-bisikba?

¿Baʼax jeʼel u yáantkoʼon utiaʼal u chúukpajal k-óol k-meyajt le Dios jáalkʼabtikoʼonoʼ?

1. ¿Bix u meyaj tiʼ Jéeoba u páajtalil u nuʼuktikuba chéen tu juunaloʼ, yéetel baʼax páajtalil tu tsʼáaj tiʼ Adán yéetel Eva?

CHÉEN Jéeoba ku páajtal u nuʼuktikuba tu juunal mantatsʼ. Baʼaleʼ maʼatech u tuklik wa chéen tiʼ letiʼ unaj u yantal le páajtalilaʼ mix tech u controlartik tuláakal baʼax ku beetik le máaxoʼob meyajtikoʼ. Baʼaxeʼ u tsʼaamajtiʼob u páajtalil u chʼaʼtuklikoʼob baʼax ken u beetoʼob. Jeʼex tiʼ Adán yéetel Evaeʼ, chéen tu yaʼalaj maʼ u jaantkoʼob «u cheʼil u kʼaj óolalil uts yéetel kʼaas» (Gén. 2:17). Le oʼolal jeʼel kaʼach u páajtal u beetkoʼob baʼax u kʼáat le Máax beetmiloʼoboʼ bey xan u beetkoʼob baʼax uts tu tʼaanoʼob.

2. ¿Bix tu peʼertil k-yáax taataʼob le páajtalil tsʼaʼabtiʼob tumen Diosoʼ?

² ¿Baʼaxten tu tsʼáaj Jéeoba le páajtalil tiʼ k-yáax taataʼoboʼ? Tumen tu beetaj Adán yéetel Eva jeʼel bix letiʼeʼ yéetel tu tsʼáajtiʼob junpʼéel conciencia. Jéeobaeʼ ku páaʼtik kaʼacheʼ le yaabilaj ku yuʼubikoʼob tu yoʼolaloʼ yaan u yáantkoʼob utiaʼal u binoʼob tiʼ le maʼalob bejoʼ (Gén. 1:27; Rom. 2:15). Baʼaleʼ lugar u tsʼáaikoʼob u nib óolalil yéetel u kanáantkoʼob le páajtalil tsʼaʼabtiʼoboʼ, maas tu chʼaʼtukloʼob u beetkoʼob baʼax ku yaʼalik Satanás bey xan u chʼaʼtuklikoʼob tu juunaloʼob baʼax uts yéetel baʼax kʼaas. Tu tukloʼob yaan u páajtal u beetkoʼob jach jeʼel baʼaxak u kʼáatoʼobeʼ, baʼaleʼ chéen tu tusubaʼob. Pʼáat bey kʼaxaʼanoʼob paʼteʼ yéetel u paalaloʼob tumen le kʼebanoʼ, leloʼ yaʼab talamil tu taasaj (Rom. 5:12).

3, 4. Satanaseʼ ¿baʼax u kʼáat ka k-tukult yoʼolal baʼax ku yaʼalik Dios?

³ Wa Satanás béeychaj u tusik kaʼatúul máak minaʼan u kʼebanoʼob, bey xan yaʼab angeloʼob, utiaʼal maʼ u yuʼubikoʼob u tʼaan Jéeobaeʼ, maas jeʼel u tuskoʼoneʼ. Letiʼeʼ u kʼáat ka k-tukleʼ, le baʼaxoʼob ku kʼáatik Jéeobaoʼ jach talam yéetel nak óol u beetaʼal (1 Juan 5:3). Wa maʼ k-kanáantikbaeʼ, jeʼel xan u káajal k-tuukul beyoʼ. Juntúul kiik  yaantiʼ 24 jaʼaboʼob lúub tiʼ núupkʼebaneʼ, ku yaʼalik: «Le máaxoʼob yéetel kin biskinba kaʼachoʼ tu beetoʼob in lúubul tiʼ baʼaloʼob kʼaastak, tumen mix juntéen tin waʼalaj wa maʼ tin beetik le baʼax ku yaʼalikoʼoboʼ». ¿Máasaʼ yaʼab tiʼ toʼon xaneʼ tsʼoʼok k-túulchʼintaʼal k-beet wa baʼax tumen k-amigoʼob?

⁴ U jaajileʼ tak ichil le múuchʼulil unaj k-kanáantik yéetel máax k-bisikbaoʼ. Juntúul táankelem j-Jaajkunajeʼ, ku yaʼalik: «Jujuntúul tiʼ in amigoʼob kaʼacheʼ ku biskubaʼob yéetel máaxoʼob maʼatech u meyajtikoʼob Dios. Le oʼolal ka máan kʼiineʼ tin tsʼáaj cuentaeʼ wa maas yaʼab tiempo kin máansik tu yéeteloʼobeʼ maas kin beetik baʼax ku beetkoʼob. Joʼopʼ u náakal in wóol teʼ muchʼtáambaloʼoboʼ yéetel óoliʼ maʼatech in jóokʼol kʼaʼaytaj. Bey túunoʼ tin tsʼáaj cuentaeʼ unaj u xuʼulul in biskinba tu yéeteloʼob. Le oʼolal bey tin beetiloʼ». Jeʼex tsʼoʼok k-ilkoʼ jeʼel u joʼopʼol k-beetik le baʼaxoʼob ku beetik le máaxoʼob yéetel k-bisikbaoʼ. Koʼoneʼex ilik junpʼéel baʼax ku yaʼalik le Biblia ku yeʼesik bey u yúuchloʼ (Rom. 15:4).

KU «LÚUBUL UTSIL KAʼACH TU PUKSIʼIKʼAL TULÁAKAL»

5, 6. 1) ¿Bix tu tusil Absalón yaʼab israelitaʼob? 2) ¿Jóokʼ wa yéetel le baʼax u kʼáatoʼ?

⁵ Le Bibliaoʼ ku tʼaan tiʼ yaʼab máaxoʼob tu beetoʼob baʼaloʼob maʼ maʼalobiʼ. Juntúul tiʼ letiʼobeʼ Absalón, u hijo rey David. Letiʼeʼ jach kiʼichkelem u yilaʼal kaʼachi. Baʼaleʼ jeʼex Satanaseʼ, káaj u tsʼíiboltik junpʼéel baʼal maʼ u tiaʼaliʼ: u trono u taata. * Utiaʼal u tokik le trono tiʼ u taataoʼ tu beetaj bey jach taak u yáantik le israelitaʼoboʼ yéetel tu beetaj u tuklikoʼob maʼatech u kaxtaʼal u yutsiloʼob tumen le reyoʼ. Absaloneʼ tu yeʼesaj bey jach utseʼ yéetel tu pʼataj kʼaasil u taata, jeʼex tu beetil le Kʼaasilbaʼal tu jardinil Edenoʼ (2 Sam. 15:1-5).

⁶ ¿Jóokʼ wa yéetel le baʼax u kʼáatoʼ? Tu káajbaleʼ jóokʼ yéetel, tumen le Bibliaoʼ ku yaʼalikeʼ «ku lúubul utsil kaʼach tu puksiʼikʼal tuláakal le israelitaʼoboʼ» (2 Sam. 15:6). Baʼaleʼ tumen kaʼanal u yicheʼ bin kʼaasil tiʼ, yéetel tu tsʼookeʼ kíim paʼteʼ yéetel le máakoʼob tu tusoʼ (2 Sam. 18:7, 14-17).

7. ¿Baʼax ku kaʼansiktoʼon le baʼax tu beetaj Absalonoʼ? (Ilaʼak le foto yaan teʼ táan juʼun 14.)

⁷ ¿Baʼaxten jach séeb úuchik u tuʼusul le israelitaʼoboʼ? Maʼ xaaneʼ tu tsʼíiboltoʼob le baʼax tu yaʼalaj Absalonoʼ, wa maʼ xaaneʼ yoʼolal le bix u yilkoʼob Absalón kaʼachoʼ. Jeʼel bixakeʼ maʼ chúukpaj u yóoloʼob tiʼ Jéeobaiʼ mix tiʼ le rey u tsʼaamoʼ. Bejlaʼeʼ Satanaseʼ láayliʼ ku meyajtiʼ máakoʼob jeʼex Absalón utiaʼal u tusik le máaxoʼob meyajtik Jéeobaoʼ. Yaan tiʼ letiʼobeʼ ku yaʼalikoʼob: «Le baʼaxoʼob ku kʼáatik Diosoʼ jach talam u beetaʼal», wa ku yaʼalikoʼob: «Le máaxoʼob meyajtik Jéeobaoʼ jach maʼatech u kiʼimakkúuntik u yóoloʼob». ¿Chíikaʼan wa k-ilik chéen taak u tuskoʼonoʼob, yéetel ku chúukpajal k-óol k-meyajt Dios? ¿K-creertik wa chéen u «utsil chúukaʼan aʼalmajtʼaan» Jéeoba, u ley Cristo, letiʼe baʼax jeʼel u jáalkʼabtikoʼon tu jaajiloʼ? (Sant. 1:25.) Unaj k-tsʼáaik u nib óolalil tu yoʼolal le aʼalmajtʼaan (wa ley) ku jáalkʼabtikoʼonoʼ yéetel maʼ k-píitmáan ka tak pʼáatak chéen k-beetik baʼaxoʼob k-kʼáat (xokaʼak 1 Pedro 2:16).

8. ¿Baʼaxoʼob uchaʼantak ku yeʼesik maʼatech u taasik kiʼimak óolal maʼ u yuʼubik tʼaan máak?

⁸ Satanaseʼ maases ku yichtik le táankelmoʼoboʼ. Juntúul sukuʼun yaantiʼ 30 jaʼaboʼobeʼ, ku yaʼalik: «Le táan kaʼach in táankelemtaloʼ kin tuklikeʼ le baʼaxoʼob ku yaʼalik Jéeobaoʼ maʼ tu kanáantken, baʼaxeʼ chéen maʼ tu chaʼik in beetik mix baʼal». Yoʼolal lelaʼ lúub tiʼ núupkʼeban. ¿Maas wa anchajtiʼ kiʼimak óolal? Maʼatech. Letiʼeʼ ku yaʼalik: «Máan yaʼab jaʼaboʼob jach maʼ maʼalob in wuʼuyikinbaiʼ yéetel in concienciaeʼ mantatsʼ ku chiʼichnakkúuntiken kaʼachi». Juntúul kiik xaneʼ ku yaʼalik le baʼax úuchtiʼ le táan u x-lóoʼbayantaloʼ:  «Le ken tsʼoʼokok u núupkʼebantal máakeʼ ku yuʼubik bey minaʼan u biilal u kuxtaleʼ. Kex tsʼoʼok u máan diecinueve jaʼaboʼobeʼ, láayliʼ ku chiʼichnakkúuntikeneʼ». Uláakʼ juntúul kiikeʼ ku yaʼalik: «Ka tin naʼataj le bukaʼaj loob tin beetaj tiʼ le máaxoʼob in yaabiltmoʼ, jach táaj yaachaj in wóol. Jach kʼaas u yuʼubikuba máak ken xuʼuluk u biskuba yéetel Jéeoba». Táankelem, maʼ a chaʼik u tuskech Satanás, táanil tiʼ a beetik wa baʼaxeʼ tukult le talamiloʼob jeʼel u taaskoʼ.

9. 1) ¿Baʼax unaj k-tuklik yoʼolal Jéeoba, u yaʼalmajtʼaanoʼob yéetel u maasil baʼaxoʼob ku yaʼalikoʼ? 2) ¿Baʼaxten unaj k-kʼaj óoltik tubeel Dios?

⁹ U talamileʼ yaʼab táankelmoʼob yéetel sukuʼunoʼob yaan u jaʼabiloʼobeʼ jach pʼis u yúuchultiʼob wa baʼaxeʼ ku yilkoʼob tu jaajil ku taasik talamil u beetik máak baʼaloʼob kʼaastak (Gal. 6:7, 8). Cada juntúul tiʼ toʼoneʼ unaj u tuklik: «¿Kin tsʼáaik cuenta wa baʼax ku meyaj tiʼ Satanás utiaʼal u tusiken? ¿Kin wilik wa Jéeoba bey letiʼ in maas maʼalob amigo, mantatsʼ ku yaʼalik u jaajil yéetel chéen ku kaxtik in wutsil? ¿Jach wa tu jaajil kin creertik mix juntéen jeʼel u yaʼalik maʼ in beetik junpʼéel baʼax jeʼel u taasikten utsil yéetel kiʼimak óolaleʼ?» (xokaʼak Isaías 48:17, 18). Utiaʼal u páajtal k-aʼalik beyoʼ, kʼaʼabéet k-maas k-kʼaj óoltik tubeel Jéeoba. Unaj xan k-creertikeʼ tu yoʼolal u yaabilaj u tsʼaamaj aʼalmajtʼaanoʼob, maʼ chéen tumen maʼ u kʼáat ka k-beet baʼax uts t-tʼaaniʼ (Sal. 25:14).

UNAJ K-KʼÁATIK TIʼ JÉEOBA JUNPʼÉEL MAʼALOB PUKSIʼIKʼAL KU YUʼUBIK TʼAAN

10. ¿Baʼaxten unaj k-beetik le baʼax tu beetaj le rey Salomón tu táankelmiloʼ?

¹⁰ Tu táankelmil Salomoneʼ, tu yaʼalaj tiʼ  Dios yéetel kabal óolal: «Chéen juntúul [...] táankelem xiʼipal[en] mix baʼal in wojel». Tsʼoʼoleʼ tu kʼáataj tiʼ Dios junpʼéel maʼalob puksiʼikʼal ku yuʼubik tʼaan (1 Rey. 3:7-9, 12). Jéeobaeʼ tu tsʼáajtiʼ le baʼax tu kʼáatoʼ. Láayliʼ bey ken u beet t-éetel kex jeʼel jaypʼéel jaʼab yaantoʼoneʼ. Kex maʼ ken u tsʼáatoʼon le bukaʼaj kʼaj óolalil yéetel naʼatil tu tsʼáaj tiʼ Salomonoʼ, jeʼel u tsʼáaiktoʼon naʼatil wa k-xakʼalxoktik le Bibliaoʼ, wa k-kʼáatik u kiliʼich muukʼ yéetel wa k-jóoʼsik u yutsil le kaʼansaj ku tsʼaʼabaltoʼon teʼ múuchʼuliloʼ (Sant. 1:5). Kʼaʼajaktoʼoneʼ letiʼe baʼax ku meyaj tiʼ Jéeoba utiaʼal u beetik u maas yantal u naʼat le táankelmoʼob meyajtik tiʼ le máaxoʼob maʼatech u yuʼubikoʼob u tʼaan, jeʼex le máaxoʼob «kaanbalnaj[aʼanoʼob] yéetel kaʼanal u naʼatoʼob» yaan way Luʼumeʼ (Luc. 10:21; xokaʼak Salmo 119:98-100).

11-13. 1) ¿Baʼax jach maʼalob ku kaʼansiktoʼon Salmo 26:4, Proverbios 13:20 yéetel 1 Corintoiloʼob 15:33? 2) ¿Bix jeʼel k-beetik le baʼax ku yaʼalik le tekstoʼobaʼ?

¹¹ Jeʼex k-ilkoʼ wa k-kʼáat kʼaj óolt tubeel Jéeobaeʼ kʼaʼabéet k-xakʼalxoktik le Bibliaoʼ yéetel k-tuukul tiʼ baʼax ku yaʼalik. Koʼoneʼex ilik jujunpʼéel tekstoʼob jeʼel u yáantkoʼon k-yéey yéetel máaxoʼob ken k-bisbaeʼ. Salmo 26:4, ku yaʼalik: «Mix juntéen tin nupimba yéetel le j-tuusoʼoboʼ, mix tin muchʼinba yéetel le j-kaʼapʼéel ichoʼoboʼ». Proverbios 13:20, ku yaʼalik: «Bisaba yéetel le j-ojéelaloʼoboʼ ka yanak tiʼ teech ojéelaj; bisaba yéetel [le] j-maʼ naʼatoʼoboʼ beyoʼ bíin kʼasakech». Yéetel 1 Corintoiloʼob 15:33, ku yaʼalik: «Le kʼaakʼas éet xíimbaloʼoboʼ ku kʼaskúuntikoʼob le maʼalob kuxtaloʼ».

¹² Le tekstoʼobaʼ jach jeʼel u yáantkoʼoneʼ. Yáaxeʼ ku yeʼeskoʼobeʼ Jéeobaeʼ ku yaʼalik ka k-yéey tubeel k-amigoʼob, tumen u kʼáat u kanáantoʼon utiaʼal maʼ k-beetik baʼaloʼob kʼaastak yéetel utiaʼal maʼ k-náachtal tiʼ letiʼ. U kaʼapʼéeleʼ tumen u yojel jeʼel u joʼopʼol k-beetik le baʼax ku beetik le máaxoʼob yéetel k-bisikbaoʼ. Tsʼoʼoleʼ le baʼax ku yaʼalik le tekstoʼoboʼ ku yeʼesikeʼ Jéeobaeʼ u kʼáat u beet k-tuukul. ¿Bix u beetik? Letiʼeʼ maʼatech u yaʼaliktoʼon: «Maʼ a beetik lelaʼ mix leloʼ», baʼaxeʼ chéen ku yaʼaliktoʼon baʼax jeʼel u yúuchleʼ. Óoliʼ bey ka u yaʼaltoʼoneʼ: «Jeʼel bixak ka a suteʼ letiʼe baʼax jeʼel u yúuchlaʼ. Le oʼolaleʼ, ¿baʼax ken a beete? ¿Baʼax yaan ta puksiʼikʼal?».

¹³ Tsʼoʼoleʼ tumen le tekstoʼob ku yaʼalikoʼob baʼax jeʼel u yúuchul wa k-beetik wa baʼaxoʼ, jeʼel u yáantkoʼon mantatsʼ tiʼ jeʼel baʼaxak talamileʼ. Maʼalob ka k-tukle: «¿Baʼax jeʼel u yáantken utiaʼal maʼ in biskinba yéetel le máaxoʼob ‹kaʼapʼéel ichoʼoboʼ›? ¿Baʼaxoʼob jeʼel u beetik in biskinba tu yéeteloʼobeʼ? (Pro. 3:32; 6:12.) ¿Máaxoʼob le ‹j-ojéelaloʼob› ku yaʼalik Jéeoba maʼalob ka in bisinba tu yéeteloʼoboʼ, yéetel máaxoʼob le ‹j-maʼ naʼatoʼoboʼ›? (Sal. 111:10; 112:1; Pro. 1:7.) ¿Máakalmáak ‹le maʼalob kuxtal› jeʼel u kʼastal wa kin biskinba yéetel máaxoʼob maʼ unajoʼ? ¿Chéen wa yéetel le máaxoʼob maʼatech u meyajtikoʼob Dios maʼ unaj in biskinbaoʼ? (2 Ped. 2:1-3.)». Maʼalob ka k-tukult baʼax jeʼel k-núukikeʼ.

14. ¿Baʼax maʼalob ka k-xakʼalxokt ken yanaktoʼon le Adoración ich Familiaoʼ?

¹⁴ Maʼalob ka tuukulnakoʼon xan tiʼ uláakʼ tekstoʼob ku yeʼesik baʼax ku tuklik Jéeoba tiʼ baʼaloʼob jeʼel u yáantkoʼon wa jeʼel u yáantik k-familiaeʼ. * Le taatatsiloʼoboʼ maʼalob ka u xakʼalxoktoʼob le baʼaloʼob tsʼoʼok k-ilik le ken yanaktiʼob le Adoración ich Familiaoʼ. Yéetel unaj u kʼaʼajaltiʼobeʼ unaj u yáantkoʼob cada juntúul tiʼ le máaxoʼob yanoʼob ichil u familia u naʼatoʼobeʼ Jéeobaeʼ u tsʼaamaj aʼalmajtʼaanoʼob, tumen u yaabiltmoʼon (Sal. 119:72). Beyoʼ yaan u maas biskuba le  familiaoʼ yéetel yaan u maas náatsʼloʼob tiʼ Jéeoba.

15. ¿Bix jeʼel k-ojéeltik wa táan u yantaltoʼon junpʼéel maʼalob puksiʼikʼal ku yuʼubik tʼaaneʼ?

¹⁵ ¿Bix jeʼel k-ojéeltik wa táan u yantaltoʼon junpʼéel maʼalob puksiʼikʼal ku yuʼubik tʼaaneʼ? Junpʼéel bixeʼ letiʼe k-ilik wa táan k-kuxtal jeʼex le máaxoʼob chúukpaj u yóol u meyajtoʼob Dios úuchjeakoʼ. Jeʼex le rey Davidoʼ tu yaʼalaj: «In [Dios], teneʼ uts tin tʼaan in beetik le baʼax a kʼáateʼ; ¡kin bisik tin puksiʼikʼal a kaʼanbesaj!» (Sal. 40:8). Le máax tsʼíibt le Salmo 119, tu yaʼalaj: «¡Bukaʼaj in yaakúuntmail a kaʼansaj! ¡Bul kʼiin in tsʼaamaj in tuukul tiʼ letiʼ!» (Sal. 119:97). Junpʼéel yaabilaj beyaʼ maʼ chéen bey u taaloʼ, baʼaxeʼ kʼaʼabéet u tsʼáaik u yóol máak xakʼalxook, u payalchiʼ, u tuukul tiʼ baʼax ku xokik bey xan tiʼ le utsiloʼob ku kʼamik ken u beet le baʼax ku yaʼalik Diosoʼ (Sal. 34:8).

UNAJ K-BAʼATEʼEL UTIAʼAL MAʼ K-PEʼERTIK LE JÁALKʼABTAJIL YAANTOʼONOʼ

16. ¿Baʼax unaj k-kʼaʼajsik utiaʼal maʼ k-peʼertik le jáalkʼabil yaantoʼonoʼ?

¹⁶ Desde úuchjeakeʼ yaʼab kaajoʼob ku baʼateloʼob utiaʼal maʼ u palitsiltaʼaloʼob. Toʼon xaneʼ maas unaj k-baʼateʼel utiaʼal maʼ k-peʼertik le jáalkʼabil yaantoʼon ichil u kaajal Diosoʼ. Kʼaʼajaktoʼoneʼ maʼ chéen táan k-baʼateʼel tu contra Satanás, le yóokʼol kaab yéetel le iikʼ nuʼuktikoʼ, baʼaxeʼ tak tu contra k-kʼeban wíinklil yéetel k-puksiʼikʼal jach séeb u tuusoʼ (Jer. 17:9; Efe. 2:3). Baʼaleʼ yéetel u yáantaj Jéeobaeʼ jeʼel u páajtal k-ganareʼ. Yéetel cada ken k-ganart junpʼéel baʼateʼel, chichan wa nojcheʼ, yaan k-kʼamik kaʼapʼéel utsil. Yáaxeʼ yaan k-kiʼimakkúuntik u yóol Jéeoba (Pro. 27:11). U kaʼapʼéeleʼ, ken k-il bix u jáalkʼabtikoʼon «le utsil chúukaʼan aʼalmajtʼaanoʼ», yaan k-maas pʼáatal tiʼ le nuʼutʼ bej ku bisik máak tiʼ le kuxtal minaʼan u xuuloʼ. Tu tsʼookeʼ yaan k-kʼamik junpʼéel jáalkʼabil maas nojoch: letiʼe ken u tsʼáa Jéeoba tiʼ le máaxoʼob kun chúukpajal u yóoloʼob meyajtikoʼ (Sant. 1:25; Mat. 7:13, 14).

17. ¿Baʼaxten maʼ unaj u jach lúubul k-óol wa k-beetik junpʼéel baʼax maʼ maʼalobiʼ, yéetel bix u yáantkoʼon Jéeoba?

¹⁷ U jaajileʼ tuláakloʼon k-beetik baʼax maʼ maʼalob wa baʼax kʼiiniʼ (Ecl. 7:20). Ken úuchuktoʼoneʼ maʼ unaj u jach lúubul k-óoliʼ mix k-tuklik wa mix baʼal k-biilal. Wa k-lúubuleʼ unaj k-kaʼa líikʼil utiaʼal u seguer k-bin teʼ maʼalob bejoʼ, kex maʼ xaaneʼ yaan u kʼaʼabéettaltoʼon u yáantaj le ancianoʼoboʼ. Santiagoeʼ tu yaʼaleʼ ken payalchiʼinakoʼob «yéetel oksaj óolal[eʼ], le kʼojaʼanoʼ yaan u tojtal u yóol, yéetel yaan u líiʼsaʼal tumen Yuumtsil; yéetel wa kʼebanchajaʼaneʼ yaan u [perdonartaʼal]» (Sant. 5:15). Maʼ u tuʼubultoʼoneʼ Jéeobaeʼ jach ku chʼaʼik óotsilil yéetel letiʼ natsʼoʼon ichil u kaajal, tumen tu yilaj yaan baʼax maʼalob ichil k-puksiʼikʼal (xokaʼak Salmo 103:8, 9). Le oʼolaleʼ, wa ku chúukpajal k-óol yéetel tuláakal k-puksiʼikʼal k-meyajt Dioseʼ, letiʼeʼ mix bikʼin ken u pʼatoʼon (1 Cró. 28:9).

18. Jeʼex tu yaʼalaj Jesús tiʼ Juan 17:15, ¿baʼax unaj k-beetik utiaʼal k-kanáantaʼal tumen Jéeoba?

¹⁸ Le áakʼab táanil tiʼ u kíimil Jesusoʼ, tu kʼáataj tiʼ Jéeoba tu yoʼolal u disipuloʼob: «Táan in kʼáatik ka a tokoʼob tiʼ Kʼaasilbaʼal» (Juan 17:15). Bejlaʼeʼ láayliʼ u kʼáat u kanáant le máaxoʼob tsaypachtikoʼ. Le oʼolal jeʼel u páajtal k-creertikeʼ Dioseʼ yaan u kanáantkoʼon teʼ talam kʼiinoʼob jeʼex kʼáataʼabiktiʼ tumen Jesusoʼ. Le Bibliaoʼ ku yaʼalik: «Ku kanáant[ik] [...] le máaxoʼob toj u kuxtaloʼob[oʼ], [...] yéetel ku kanáantik le máaxoʼob u yoksmaj u yóoloʼob tiʼeʼ» (Pro. 2:7, 8). U jaajileʼ maʼ chéen chʼaʼabil u chúukpajal u yóol máak tiʼ Diosiʼ, baʼaleʼ chéen bey jeʼel k-pʼáatal teʼ bej ku bisik máak tiʼ le kuxtal minaʼan u xuuloʼ yéetel teʼ jáalkʼabtajil jach tu jaajiloʼ (Rom. 8:21). Unaj k-ilik mix baʼal ka u beet k-jóokʼol tu bejil le kuxtaloʼ.

[Tsolajiloʼob]

[U kʼáatchiʼiloʼob le xookoʼ]

[Fotoʼob yaan teʼ táan juʼun 14]

Bejlaʼeʼ ¿máaxoʼob bey Absaloneʼ, yéetel bix jeʼel k-kanáantikba tiʼobeʼ?