«¿Máax jeʼel u beetik in kikilankileʼ?»
«¿Máax jeʼel u beetik in kikilankileʼ?»
«Kex u líiʼsubaʼob utiaʼal baʼateʼel tin wéeteleʼ, teneʼ jejetsʼkil in wanil.» (SAL. 27:3)
JEʼEX U YEʼESIK LE TEKSTOʼOBAʼ, ¿BAʼAX KUN ÁANTKECH UTIAʼAL MAʼ A SAJAKTAL?
1. ¿Baʼax kʼáatchiʼiloʼob ken u núuk le Salmo 27?
¿BAʼAXTEN maʼalob u bintoʼon teʼ kʼaʼaytaj kex táan u maas talamtal le kuxtal teʼ yóokʼol kaabaʼ? ¿Baʼaxten k-tsʼáaik yéetel kiʼimak óolal k-tiempo yéetel k-muukʼ utiaʼal k-kʼaʼaytaj kex táan u maas talamtal le kuxtaloʼ? ¿Baʼax jeʼel u yáantkoʼon utiaʼal maʼ k-sajaktal tiʼ le baʼaxoʼob kun taal u kʼiin u yúuchul kex u maas yaʼabil le máakoʼob saajkoʼoboʼ? Le kʼaay tu tsʼíibtaj le rey David ku chíikpajal teʼ Salmo 27, ku núukik.
2. ¿Baʼax ku beetik le saajkil tiʼ yaʼab máakoʼoboʼ, baʼaleʼ baʼax k-ojel?
2 Le salmo tu tsʼíibtaj Davidaʼ ku káajal beyaʼ: «Yuumtsileʼ in sáasil, letiʼ máax tokiken; ¿máax tiʼ jeʼel in chʼaʼik saajkileʼ? Yuumtsil kanáantik in kuxtal; ¿máax jeʼel u beetik in kikilankileʼ?» (Sal. 27:1). Le saajkiloʼ maʼ xaaneʼ jeʼel u luʼsik u muukʼ máakeʼ, baʼaleʼ le kikilankiloʼ jach junpuliʼ ku luʼsik. Baʼaleʼ le máax ku chʼaʼik junpʼéel maʼalob saajkil tiʼ Jéeobaeʼ minaʼan baʼax oʼolal u kikilankil (1 Ped. 3:14). Tuláakal le máax ku machkuba tiʼ letiʼeʼ «bíin kuxlak ichil jeetsʼel óolalil, bíin kuxlak xan x-maʼ saajkil tiʼ kíimil» (Pro. 1:33; 3:25). Koʼoneʼex ilik baʼaxten.
«YUUMTSILEʼ IN SÁASIL, LETIʼ MÁAX TOKIKEN»
3. ¿Baʼaxten k-aʼalik Jéeobaeʼ bey junpʼéel sáasileʼ, baʼaleʼ baʼax unaj k-beetik?
3 Le ken u yaʼal «Yuumtsileʼ in sáasil», ku yeʼesikeʼ Jéeobaeʼ ku kaʼansiktoʼon u jaajil, bey ka u jóoʼsoʼon tiʼ éeʼjochʼeʼenileʼ (Sal. 27:1). U jaajileʼ le sáasiloʼ ku yeʼesik le baʼaxoʼob yaan t-beeloʼ. Baʼaleʼ maʼatech u luʼsik le baʼaxoʼob kʼatakbaloʼ, le oʼolal toʼon unaj k-ilik baʼax ken k-beete. Jéeoba xaneʼ ku yaʼaliktoʼon baʼax u kʼáat u yaʼal le baʼaxoʼob ku yúuchul way yóokʼol kaabeʼ, ku yaʼaliktoʼon tiʼ baʼax unaj k-kanáantikba yéetel ku tsʼáaiktoʼon maʼalob tsolnuʼukoʼob jeʼel u yáantkoʼon mantatsʼeʼ, baʼaleʼ toʼon unaj k-tsʼáaik ichil k-kuxtal. Wa k-beetik beyoʼ yaan k-eʼesik le naʼatil tu yaʼalaj le salmistaaʼ: «A waʼalmajtʼaanoʼobeʼ [...] tsʼoʼok u beetikenoʼob [maas] ojéelajen, tiʼ in j-pʼeekoʼob. Kin chʼaʼnuʼukt [maas] tiʼ tuláakal in j-kaʼanbesajoʼob» (Sal. 119:98, 99, 130).
4. 1) ¿Baʼaxten páajchaj u yaʼalik David yéetel kʼub óolal: «Yuumtsil [...] tokiken»? 2) ¿Baʼax kʼiin xan ken u salvartoʼon Jéeoba?
4 Le Salmo 27:1, ku yeʼesik Davideʼ maʼ xaaneʼ kʼaʼajtiʼ bix salvartaʼabik yaʼab u téenel tumen Jéeoba. Jeʼex le ka tu salvartaj «tiʼ le león» yéetel «tiʼ le osooʼ». Tu yáantaj xan utiaʼal u ganartik Goliat, juntúul máak waʼapáachʼ. Yaʼab u téenel xan tu kanáantaj utiaʼal maʼ u kíimsaʼal tumen Saúl yéetel junpʼéel lanza (1 Sam. 17:37, 49, 50; 18:11, 12; 19:10). Le oʼolal yéetel kʼub óolal tu yaʼalaj David: «Yuumtsil [...] tokiken». Tu kʼiinil le «nojoch yaayaj óolal» tsʼoʼok u náatsʼloʼ, Jéeobaeʼ yaan xan u salvartik le máaxoʼob meyajtik jeʼex tu salvartil Davidoʼ (Apo. 7:14; 2 Ped. 2:9).
KʼAʼAJAKTOʼON BIX TSʼOʼOK U SALVARTIKOʼON
5, 6. 1) ¿Bix u yáantkoʼon le k-kʼaʼajsik le baʼaxoʼob uchaʼantakoʼ? 2) ¿Baʼaxten ku yáantkoʼon utiaʼal maʼ k-chʼaʼik saajkil le k-xakʼalxoktik le baʼax u beetmaj Jéeoba tu yoʼolal le máaxoʼob meyajtikoʼ?
5 Le Salmo 27:2 yéetel 3 (xokaʼak), ku yaʼalik junpʼéel baʼal jach kʼaʼabéet utiaʼal maʼ k-chʼaʼik saajkil. Davideʼ kʼaʼajtiʼ bix salvartaʼabik yaʼab u téenel tumen Jéeoba (1 Sam. 17:34-37). Lelaʼ tu yáantaj utiaʼal u chúukpajal u yóol u aktáant nukuch talamiloʼob. ¿Kʼajaʼan wa tech xan bix tsʼoʼok u yáantkech Jéeoba? ¿Ku líikʼil wa a wóol ken a máans ta tuukul? ¿Tsʼoʼok wa a payalchiʼ tiʼ Jéeoba yoʼolal junpʼéel nojoch talamil yéetel tsʼoʼok a wilik bix tu tsʼáajiltech naʼatil yéetel u muukʼil utiaʼal a aktáantik? ¿Kʼajaʼan wa tech bix xuʼulik le talamiloʼob ku beetik maʼ a meyajtik Dios yéetel kiʼimak óolal, wa bix jeʼepajik junpʼéel «kóokoch jool naj» utiaʼal a maas meyajtik? (1 Cor. 16:9.) ¿Bix a wuʼuyikaba ken kʼaʼajaktech? ¿Máasaʼ ku beetik a maas creertik jeʼel u yáantkech Jéeoba a aktáant tak le talamiloʼob nuuktakoʼ? (Rom. 5:3-5.)
6 ¿Kux túun wa ka óotaʼak xuʼulsbil tuláakal u j-jaajkunajoʼob Jéeoba tumen wa baʼax gobierno jach yaan u páajtalil? Teʼ kʼiinoʼobaʼ yaʼab máakoʼob tsʼoʼok u yóotkoʼob u beetoʼob, baʼaleʼ maʼ tsaʼaykoʼobiʼ. Wa k-tuukul tiʼ le baʼax u beetmaj Jéeoba yoʼolal u kaajaleʼ, maʼ ken k-chʼaʼ saajkil tiʼ baʼax ku taal u kʼiin (Dan. 3:28).
YAABILT U JAAJIL ADORACIÓN
7, 8. 1) Jeʼex u yaʼalik Salmo 27:4, ¿baʼax tu kʼáataj David tiʼ Jéeoba? 2) ¿Baʼax le u templo espiritual Jéeobaoʼ, yéetel bix k-adorartikiʼ?
7 Kʼaʼabéet xan k-yaabiltik u jaajil adoración utiaʼal maʼ k-chʼaʼik saajkil (xokaʼak Salmo 27:4). Tu kʼiinil Davideʼ «u templo Yuumtsil[eʼ]» letiʼe tabernaculooʼ. Baʼaleʼ Davideʼ joʼopʼ u preparartik le baʼaxoʼob kun meyaj utiaʼal u beetaʼal le templooʼ, le nojoch naj beetaʼab tumen Salomón, u hijooʼ. Ka máan yaʼab jaʼaboʼobeʼ Jesuseʼ tu yaʼaleʼ maʼ jach kʼaʼabéet u adorartaʼal Dios tiʼ junpʼéel nojoch templo jeʼex le tu beetaj Salomonoʼ (Juan 4:21-23). Tu capítulo 8 tak 10 tiʼ Hebreobeʼ apóstol Pabloeʼ tu yaʼaleʼ kʼuch antal junpʼéel templo espiritual tu jaʼabil 29 tsʼoʼokok u taal Jesús, letiʼe ka okjaʼanaj Jesús yéetel ka tu kʼububa u beet baʼax uts tu tʼaan Jéeobaoʼ (Heb. 10:10). Le temploaʼ letiʼe baʼax ku meyaj tiʼ Dios utiaʼal u béeytal k-náatsʼal tiʼ letiʼ ken k-tsʼáa k-fe tiʼ u kuxtal Jesús tu kʼuboʼ. ¿Bix k-adorartik teʼ temploaʼ? Ken payalchiʼinakoʼon «yéetel u jaajil yóol k-puksiʼikʼal bey xan yéetel junpʼéel oksaj óolal jach jeetsʼel», ken k-kʼaʼayt le baʼaxoʼob ken u beet Diosoʼ yéetel ken k-líiʼs u yóol k-sukuʼunoʼob teʼ muchʼtáambaloʼoboʼ bey xan teʼ adoración ich familiaoʼ (Heb. 10:22-25). Ken k-yaabilt u jaajil adoracionoʼ ku muʼukʼaʼantal k-fe teʼ tu tsʼook kʼiinoʼob jach talamtakaʼ.
8 Tiʼ tuláakal le Luʼumaʼ yaʼab máaxoʼob ku maas tsʼáaik u yóoloʼob u meyajtoʼob Jéeoba. Yaneʼ ku kankoʼob uláakʼ tʼaanoʼob yéetel ku binoʼob tuʼux maas kʼaʼabéet u kʼaʼaytaʼal le Reinooʼ. Tu yoʼolal le baʼaxoʼob ku beetkoʼoboʼ ku yeʼeskoʼob xan, jeʼex le salmista, táan u kʼáatkoʼob tiʼ Jéeoba ka lúubkoʼob utsil tu táan yéetel ka béeyak u meyajtikoʼob jeʼel baʼaxak bíin úuchkeʼ (xokaʼak Salmo 27:6).
KOʼONEʼEX K-KʼUBIK K-ÓOL TIʼ DIOS
9, 10. ¿Baʼax ku yeʼesiktoʼon le baʼax ku yaʼalik Salmo 27:10?
9 Davideʼ tu yeʼesaj u kʼubmaj u yóol tiʼ Jéeoba, ka tu yaʼalaj: «Kex in taata yéetel in maama ka u xúumpʼattenoʼobeʼ, Yuumtsileʼ letiʼ bíin u [kʼamen]» (Sal. 27:10). Le baʼax ku yaʼalik le capítulo 22 tiʼ Yáax tiʼ Samueloʼ ku yeʼesiktoʼon maʼ pʼaʼat David tumen u taata yéetel u maamaiʼ. Teʼ kʼiinoʼobaʼ yaʼab tiʼ le máaxoʼob meyajtik Dios ku pʼektaʼaloʼob tumen u familiaʼoboʼ, ku yáantaʼaloʼob teʼ múuchʼuliloʼ.
10 Jéeobaeʼ jach ku yáantik le máaxoʼob ku chúukpajal u yóoloʼob tiʼ letiʼ kex ka pʼaʼatkoʼob tumen u familiaʼoboʼ, le oʼolaleʼ, ¿maʼ wa ken u yáantoʼon ken k-aktáant uláakʼ talamiloʼob? Jeʼex wa k-chiʼichnaktal utiaʼal k-kaxtik le baʼaxoʼob kʼaʼabéet tiʼ k-familiaeʼ, unaj u kʼaʼajaltoʼoneʼ Jéeobaeʼ jeʼel u yáantkoʼoneʼ (Heb. 13:5, 6). Letiʼeʼ u yojel baʼax kʼaʼabéet tiʼ le máaxoʼob meyajtikoʼ.
11. ¿Bix k-áantik uláakʼ máakoʼob ken k-kʼub k-óol tiʼ Jéeoba? Aʼal junpʼéel baʼax uchaʼan.
11 Koʼoneʼex ilik le baʼax úuch tiʼ Victoria, juntúul koʼolel kajaʼan Liberia ku tsʼaʼabal xook tiʼ. Ka joʼopʼ u tsʼáaik u yóol u meyajt Dios utiaʼal u yokjaʼeʼ, pʼaʼat paʼteʼ yéetel óoxtúul u paalal tumen le máax chʼaʼamiloʼ. Kex pʼáat minaʼan u yotoch yéetel u meyajeʼ, maʼ xuʼul u tsʼáaik u yóol tak ka okjaʼanaji. Maʼ úuch tiʼ leloʼ u hija yaantiʼ 13 jaʼaboʼobeʼ tu kaxtaj junpʼéel billetera chuup yéetel taakʼin. Utiaʼal maʼ u taaktal u pʼáataltiʼobeʼ mix tu xokoʼob bajux yaniʼ, baʼaxeʼ tu séebaʼanil tu kaxtoʼob u yuumil, juntúul soldado. Letiʼeʼ tu yaʼaleʼ wa tuláakal máak jeʼex u j-jaajkunajoʼob Jéeobaeʼ, maas jeʼel u bin utsil teʼ yóokʼol kaabaʼ yéetel maas jeʼel u yantal jeetsʼelileʼ. Victoria túuneʼ tu yeʼesajtiʼ yéetel le Biblia le túumben yóokʼol kaab ku yaʼalik Jéeoba ken u taasoʼ. Tumen tu yilaj le soldado maʼ pʼáat Victoria yéetel le taakʼinoʼ tu chʼaʼaj nonojeʼ ka tu tsʼáajtiʼ. Toʼon u j-jaajkunajoʼon Jéeobaeʼ tsʼoʼok k-eʼesik mix juntéen k-chʼaʼik baʼax maʼ k-tiaʼaliʼ, tumen k-ojel letiʼeʼ yaan u tsʼáaik tuláakal baʼax kʼaʼabéettoʼon.
12. ¿Baʼax k-eʼesik ken seguernak k-meyajtik Jéeoba kex yaan baʼaxoʼob k-peʼertik? Aʼal junpʼéel baʼax uchaʼan.
12 Tukult xan bix tu yuʼubiluba Thomas, juntúul j-kʼaʼaytaj maʼ okjaʼanak, kajaʼan tu luʼumil Sierra Leona. Letiʼeʼ káaj u beetik u maestroil tiʼ secundaria, baʼaleʼ aʼalaʼabtiʼeʼ tak ken máanak óoliʼ junpʼéel jaʼab yéetel ken tsʼoʼokok u beetaʼal u juʼuniloʼobeʼ, ku káajal u cobrar. ¿Baʼax anchaj u beetik tu tsʼook utiaʼal u cobrartik tak le pʼaxaʼantiʼoʼ? Anchaj u tʼaan yéetel le sacerdote, le máax nuʼuktik le escuelaoʼ. Le sacerdoteoʼ tu yaʼalajtiʼeʼ le baʼax ku tuklik u j-jaajkunajoʼob Jéeobaoʼ ku bin tu contra le baʼax ku kaʼansik le escuelaoʼ, yéetel tu yaʼalajtiʼ ka u yéey le meyaj ku beetkoʼ, wa le baʼaxoʼob ku creertik teʼ Bibliaoʼ. Thomaseʼ tu pʼataj le meyaj kex maʼ u boʼotaʼal tak le pʼaxaʼantiʼoʼ, ka tsʼoʼokeʼ joʼopʼ u meyaj tuʼux ku yutskíintaʼal radioʼob yéetel telefonoʼob. Jeʼex u yeʼesik le baʼaxoʼob uchaʼanoʼ, tumen k-jach kʼubik k-óol tiʼ le Máax beetmil tuláakal baʼal yéetel ku kanáantik u kaajaloʼ, maʼatech k-chiʼichnaktal yoʼolal baʼax kʼaʼabéettoʼon jeʼex le máakoʼob bejlaʼaʼ.
13. ¿Bix u bin u maas kʼaʼaytaʼal le maʼalob péektsil teʼ tuʼuxoʼob yaan óotsililoʼ?
13 Tiʼ yaʼab luʼumiloʼob tuʼux yaan óotsilileʼ, le sukuʼunoʼoboʼ jach ku tsʼáaik u yóoloʼob kʼaʼaytaj. ¿Baʼaxten? Junpʼéel u najil Beteleʼ, tu tsʼíibtaj: «Yaʼab tiʼ le máaxoʼob ku yóotkoʼob xookoʼ minaʼan meyaj tiʼob, le oʼolal maas yaan tiempo u xookoʼob. Le sukuʼunoʼob xanoʼ maas yaan u tiempoil u jóokʼloʼob kʼaʼaytaj. Tuláakal le máakoʼob maases le kajaʼanoʼob tuʼux maas yaan óotsililoʼ yojloʼob kuxaʼanoʼon tu tsʼook kʼiinoʼob, tumen sáamsamal ku yilkoʼob baʼax ku yúuchul». Tiʼ junpʼéel luʼumil xaneʼ, cada juntúul j-kʼaʼaytajeʼ ku tsʼáaik junpʼíit maas tiʼ óoxpʼéel xookoʼob. Juntúul misionero tsʼoʼok maas tiʼ doce jaʼaboʼob yanak teʼ luʼumilaʼ, ku yaʼalik: «Tumen yaʼab j-kʼaʼaytajoʼob suuk u kuxtaloʼob yéetel junpʼíit baʼal yéetel óoliʼ minaʼan baʼax yéetel u náaysik u yóoloʼobeʼ, u suukileʼ ku maas páajtal u jóokʼloʼob kʼaʼaytaj».
14. ¿Bix u kanáantik Dios le yaʼabkach máakoʼoboʼ?
14 Jéeobaeʼ u yaʼalmaj u yáantik, u kanáantik yéetel u jáalkʼabtik u kaajal tiʼ le baʼaloʼob maʼ jaajtakoʼ, le oʼolal k-kʼubik óoltiʼ (Sal. 37:28; 91:1-3). Yaʼab máakoʼob ken u salvartubaʼob tiʼ le «nojoch yaayaj óolaloʼ» (Apo. 7:9, 14). Le oʼolal k-ojel maʼ kun xuʼulsbiltiʼob teʼ tu tsʼook kʼiinoʼobaʼ. Yaan u tsʼaʼabaltiʼob tuláakal baʼax kʼaʼabéet utiaʼal u chúukpajal u yóoloʼob u meyajtoʼob Dios yéetel utiaʼal u aktáantkoʼob le talamiloʼoboʼ. Le ken taalak u tsʼoʼokol le nojoch yaayaj óolaloʼ, Jéeobaeʼ yaan u kanáantik u kaajal.
«YUUMTSIL, EʼESTEN A BEEL»
15, 16. ¿Baʼax utsil jeʼel k-kʼamik wa k-chaʼik u nuʼuktikoʼon Jéeobaeʼ? Aʼal junpʼéel baʼax uchaʼan.
15 Utiaʼal maʼ k-chʼaʼik saajkileʼ, kʼaʼabéet u kaʼanskoʼon Dios mantatsʼ, jeʼex tu yaʼalil Davidaʼ: «Yuumtsil, eʼesten a beel; bisen tiʼ u tojil bej tu yoʼolal in j-pʼeekoʼob» (Sal. 27:11). Utiaʼal lelaʼ kʼaʼabéet k-beetik tu séebaʼanil le baʼax ku yaʼalik u kaajal Jéeobaoʼ. Le sukuʼunoʼob tsʼoʼok u xuʼulul u pʼaxkubaʼob yéetel baʼaxoʼob maʼ jach kʼaʼabéettiʼob yéetel ku beetkoʼob le baʼax ku yaʼalik u kaajal Jéeobaoʼ tsʼoʼok u kʼamkoʼob utsiloʼob teʼ kʼiinoʼob jach yaan óotsililaʼ. Tumen ku yilkoʼob maʼ u yantal baʼaloʼob mix kʼaʼabéettiʼobeʼ, maas ku páajtal u meyajtikoʼob Dios. Jeʼex tsʼoʼok k-ilkoʼ cada juntúul tiʼ toʼon unaj u tuklik: «¿Kin beetik wa tu séebaʼanil le baʼaxoʼob kin xokik teʼ Biblia yéetel teʼ jóoʼsaʼaniloʼob ku taal tiʼ le palitsil chúukaʼan u yóol yéetel yaan u naʼat, kex ka talamchajaktenoʼ?» (Mat. 24:45).
16 Wa k-chaʼik u nuʼuktikoʼon Jéeobaeʼ maʼ unaj k-chʼaʼik saajkiliʼ. Juntúul precursor regular kajaʼan tu luʼumil Estados Unidoseʼ tu kʼáataj ka tsʼaʼabaktiʼ junpʼéel meyaj utiaʼal u seguer u beetik u precursoril tuláakal u familia, baʼaleʼ le máax nuʼuktik le meyajoʼ tu yaʼalajtiʼeʼ wa maʼ xooknajaʼan tiʼ junpʼéel universidadeʼ maʼ ken u tsʼáatiʼ. Wa tiʼ teech ka úuchuk lelaʼ, ¿jeʼel wa u yaatal a wóol maʼ kaʼanchaj a xook úuchik a beetik a precursoriliʼ? Ka máan kaʼapʼéel semanaeʼ, jóoʼsaʼab le supervisoroʼ, le gerente túunoʼ tu kʼáataj tiʼ le sukuʼun baʼax meyajil taak u beetkoʼ. Le sukuʼunoʼ tu séebaʼanil tu yaʼalajtiʼeʼ letiʼ yéetel u yataneʼ u j-jaajkunajoʼob Jéeoba yéetel u kʼáat u seguer u beetik u precursoriloʼob. Táanil tiʼ u yaʼalik uláakʼ wa baʼaxeʼ, le gerenteoʼ tu yaʼalajtiʼ: «¡Tin waʼajiliʼ maʼ beyech jeʼex u maasiloʼ! Le taʼaytak u kíimil in taataoʼ, kaʼatúul j-Jaajkunajoʼob ku taaloʼob kaʼach sáamsamal u xokoʼobtiʼ le Bibliaoʼ. Le oʼolal tin waʼaleʼ wa ku kʼuchul u kʼiinil u kʼaʼabéettal in wáantik juntúul u j-jaajkunaj Jéeobaeʼ, yaan in beetik». Ka sáaschaj tuláakʼ kʼiineʼ aʼalaʼab tiʼ le sukuʼun yaan u tsʼaʼabal le meyaj maʼ taak u tsʼaʼabal kaʼach tiʼ tumen le supervisoreʼ. Jeʼex k-ilkoʼ le ken k-tsʼáa táanil le Reinooʼ, Jéeobaeʼ ku tsʼáaiktoʼon tuláakal le baʼax kʼaʼabéettoʼonoʼ (Mat. 6:33).
JACH KʼAʼABÉET FE YÉETEL ESPERANZA
17. ¿Baʼax jeʼel u yáantkoʼon k-aktáant le baʼaxoʼob kun taal u kʼiinoʼ?
17 Davideʼ, tu yaʼalaj: «Teneʼ in wojel bíin kʼuchken in wil u yutsil Yuumtsil tiʼ tuláakal u jaʼabiloʼob in kuxtal» (Sal. 27:13). Jeʼex k-ilkoʼ Davideʼ jach tu tsʼáaj u fe tiʼ le baʼaxoʼob u yaʼalmaj u beetik Jéeobaoʼ, le oʼolal anchajtiʼ esperanza. Toʼon xaneʼ kʼaʼabéet u yantaltoʼon fe yéetel esperanza. Tukult lelaʼ: ¿baʼax jeʼel k-páaʼtik wa maʼ yoʼolal le esperanza u tsʼaamajtoʼon Dios yéetel wa maʼ k-yaabiltik le baʼaxoʼob ku yaʼalik le Salmo 27? Le oʼolaleʼ koʼoneʼex kʼáatik tiʼ Jéeoba yéetel fe ka u kanáantoʼon yéetel ka u tsʼáatoʼon u muukʼil k-aktáantik le baʼaxoʼob kun úuchul teʼ Armagedonoʼ (xokaʼak Salmo 27:14).
[U kʼáatchiʼiloʼob le xookoʼ]
[Foto yaan teʼ táan juʼun 23]
Davideʼ muʼukʼaʼanchaj u yóol ka tu kʼaʼajsaj bix salvartaʼanil tumen Jéeoba
[Foto yaan teʼ táan juʼun 25]
Ken yanak talamil yoʼolal taakʼineʼ, ¿k-ilik wa bey u súutukil k-maas táakpajal teʼ kʼaʼaytajoʼ?
