¿Kʼajaʼan wa tech?

¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

¿Tuʼux u taal u muukʼ Sansón?

U muukʼ Sansoneʼ maʼ tu tsoʼotsel u pool u taaliʼ, baʼaxeʼ tiʼ le bisba yaantiʼ yéetel Jéeobaoʼ, tumen letiʼeʼ nazareo. Le ka tu beetaj Dalila u kʼoʼosol Sansoneʼ kʼaschaj le bisba yaantiʼ yéetel Diosoʼ (15/4, táan juʼun 9).

¿Baʼax óoxpʼéel baʼal jeʼel u kanáantik tak le puksiʼikʼal eʼesik jach máaxoʼonoʼ?

1) U janal máak. Jeʼel bix kʼaʼabéet u jaantik máak maʼalob janal utiaʼal u yutsil u puksiʼikʼaleʼ, kʼaʼabéet xan u tséentkuba yéetel le maʼalob kaʼansaj ku keʼetel yéetel janaloʼ. 2) Unaj k-beetik u maas meyaj. U tsʼáaik u yóol máak teʼ kʼaʼaytajoʼ ku yáantaj utiaʼal maʼ u kʼojaʼantal le puksiʼikʼal eʼesik jach máaxoʼ. 3) Maʼ u jach chiʼichnakkúuntikuba máak. Utiaʼal maʼ u jach chiʼichnaktal máakeʼ unaj u maas biskuba yéetel le sukuʼunoʼoboʼ, tumen letiʼobeʼ u yaabiltmoʼob u maasil (15/4, táan juʼun 16).

¿Baʼax kʼiin ka aʼalaʼab tiʼ Noé ka u beet le arcaoʼ?

Le Bibliaoʼ ku yaʼalikeʼ le ka aʼalaʼab tiʼ Noé ka u beet le arcaoʼ tsʼoʼok u nuuktal u paalal, yéetel tsʼokaʼan u beeloʼob. Jéeobaeʼ tu yaʼalaj: «Ta wéetel yaan in beetik junpʼéel núuptʼaan; tiʼ le cheemoʼ [arca] yaan u yokoloʼob ta wéeteleʼ a paalal, a watan yéetel a wiliboʼob» (Gén. 6:9-18). Le oʼolal le ka aʼalaʼab tiʼ Noé ka u beet le arcaoʼ maʼ xaaneʼ chéen cuarenta wa cincuenta jaʼaboʼob u bin u taal le Búulkabaloʼ (15/4, táan juʼun 23).

¿Baʼaxten yaan tiʼ le máaxoʼob meyajtik Diosoʼ maʼatech u tsʼoʼokol u beeloʼob?

Ken máanak kʼiineʼ u maas yaʼabil máakeʼ ku tuklik u tsʼoʼokol u beel, baʼaleʼ yaan tiʼ le máaxoʼob meyajtik Jéeobaoʼ maʼ tsʼoʼokok u beeloʼobiʼ, tumen maʼ yanak juntúul máax uts tu yichoʼob ku kʼaʼamal xan tumen Diosiʼ. Yanoʼobeʼ ku yilkoʼobeʼ maʼ kʼaʼabéet u tsʼoʼokol u beeloʼobiʼ, le oʼolal ku páajtal u maas kʼubikubaʼob u meyajtoʼob Jéeoba (15/5, táan juʼun 7).

¿Baʼaxten teʼ tsoltʼaan ku máansaʼal ken kíimik wa máaxoʼ, maʼ unaj u meyaj le Salmo 116:15 utiaʼal u chʼaʼchiʼitaʼal le kimenoʼ?

Le tekstoaʼ ku yaʼalik: «Ku sen yaatal tu yóol Yuumtsil u yilik u kíimil le máaxoʼob yaabiltmiloʼ». Lelaʼ u kʼáat u yaʼaleʼ utiaʼal Jéeobaeʼ jach nojoch baʼal u yilik ka kíimik tuláakal le máaxoʼob meyajtik yéetel chúukaʼan óolaloʼ, le oʼolal maʼ ken u chaʼa u yúuchul. Maʼ ken u chaʼa u xuʼulsaʼal tiʼ tuláakal le máaxoʼob meyajtikoʼ (15/5, táan juʼun 22).

¿Máaxoʼob kaʼach le colportoroʼoboʼ?

Tak tu jaʼabil 1931, bey kʼaj óolaʼanil kaʼach le precursoroʼoboʼ (15/5, táan juʼun 31).

¿Máax tuláakal le uláakʼ reyoʼob ku yaʼalik Daniel 2:44?

Le tekstoaʼ táan u tʼaan chéen tiʼ le gobiernoʼob ku chíikbesaʼaloʼob tumen le nojoch estatua tu yilaj Danieloʼ (15/6, táan juʼun 17).

¿Baʼax kʼiin ka kʼuch u beetuba u siete nojoch gobiernoil le potencia angloamericana jeʼex u yaʼalik le profecíaʼoboʼ?

Le nojoch gobiernoaʼ anchaj le ka tu muchʼuba Gran Bretaña yéetel Estados Unidos teʼ yáax nojoch baʼateltáambaloʼ (15/6, táan juʼun 19).

¿Baʼaxoʼob ken u beet u káajal le Armagedonoʼ?

U gobiernoiloʼob le yóokʼol kaabaʼ yaan u yaʼalikoʼob «tuláakal jejetsʼkil yéetel maʼalob yanil» (1 Tes. 5:3). Letiʼobeʼ yaan u líikʼloʼob tu contra le religionoʼob maʼatech u kaʼanskoʼob u jaajiloʼ (Apo. 17:15-18). Le gobiernoʼoboʼ yaan u líikʼloʼob tu contra u kaajal Jéeoba. Tsʼoʼoleʼ ku taal le Armagedonoʼ (1/7 táan juʼun 9).

¿Máaxoʼob tʼanik náhuatl, yéetel baʼax ku beetaʼal tu yoʼolaloʼob?

Letiʼe tʼaan ku beetik kaʼach le Aztecaʼoboʼ yéetel bejlaʼeʼ ku tʼanaʼal tumen kex junpʼéel millón yéetel taanchumuk máakoʼob tu luʼumil México. Le j-Jaajkunajoʼoboʼ ku kʼaʼaytajoʼob yéetel ku beetkoʼob jejeláas jóoʼsaʼaniloʼob ich náhuatl (1/7 táan juʼun 13 yéetel 14).