¿Bix kun xuʼulsbil le kʼasaʼan yóokʼol kaabaʼ??
¿Bix kun xuʼulsbil le kʼasaʼan yóokʼol kaabaʼ?
«Maʼ ich éeʼjochʼeʼenil yaneʼexiʼ utiaʼal ka téek taalak ta wóokʼoleʼex u kʼiinil Yuumtsil jeʼel bix [...] juntúul j-ookoleʼ.» (1 TES. 5:4)
¿JEʼEL WA U PÁAJTAL A TSOLIKEʼ?
Le tekstoʼobaʼ, ¿baʼaxoʼob ku yaʼalik kun úuchul?
1. ¿Baʼax kun áantkoʼon k-aktáant jeʼel baʼaxak talamileʼ?
LE PROFECÍAʼOB ku béeychajloʼ ku yeʼesik yaan nukuch baʼaloʼob taʼaytak u yúuchul. ¿Baʼax kun áantkoʼon k-aktáant jeʼel baʼaxakeʼ? Le apóstol Pablooʼ tu yaʼaleʼ maʼ unaj «k-paktik le baʼaloʼob ku yilaʼaloʼoboʼ, baʼaleʼ le baʼaloʼob maʼ tu yilaʼaloʼoboʼ». Maʼ unaj u tuʼubultoʼoneʼ táan k-páaʼtik k-kuxtal mantatsʼ, maʼ xaaneʼ kaʼan wa way Luʼumeʼ. Pabloeʼ tu tsʼíibtaj lelaʼ utiaʼal u beetik u tuukul le cristianoʼob tiʼ le baʼax ku páaʼtik le máaxoʼob ku chúukpajal u yóoloʼoboʼ. Beyoʼ jeʼel u páajtal u aktáantkoʼob le talamiloʼob yéetel le chʼaʼpachtajiloʼ (2 Cor. 4:8, 9, 16-18; 5:7).
2. 1) ¿Baʼax unaj k-beetik utiaʼal maʼ k-tuʼubsik le baʼax ken u tsʼáatoʼon Diosoʼ? 2) ¿Baʼax ken k-il teʼ xookaʼ bey xan teʼ tuláakʼoʼ?
2 Le baʼax tu yaʼalaj Pablooʼ ku kaʼansiktoʼoneʼ utiaʼal maʼ k-tuʼubsik le baʼax ken u tsʼáatoʼon Diosoʼ, unaj k-tuukul tak tiʼ le baʼaxoʼob maʼ k-il u yúuchloʼ (Heb. 11:1; 12:1, 2). Le oʼolal teʼ xookaʼ bey xan teʼ tuláakʼoʼ yaan k-ilik diez baʼaloʼob kun úuchul ku yeʼesik naatsʼ yanil le kuxtal minaʼan u xuuloʼ.
¿BAʼAX KUN ÚUCHUL JACH TÁANIL TIʼ LE XUʼULSAJOʼ?
3. 1) ¿Baʼax ku yaʼalik 1 Tesalonicailoʼob 5:2 yéetel 3 kun úuchul? 2) ¿Baʼax ken u tukult le gobiernoʼoboʼ, yéetel maʼ xaaneʼ máaxoʼob ken u beetoʼob xan beyoʼ?
3 Tiʼ junpʼéel carta tu túuxtaj tiʼ le Tesalonicailoʼoboʼ, Pabloeʼ tu yaʼalaj le yáax baʼax kun úuchloʼ (xokaʼak 1 Tesalonicailoʼob 5:2, 3). Teʼ tekstoaʼ le ka tu yaʼalaj le apóstol «u kʼiinil Yuumtsileʼ», táan u tʼaan tiʼ le tiempo ken káajak u xuʼulsaʼal le maʼ jaajil religionoʼoboʼ yéetel yaan u tsʼoʼokol teʼ Armagedonoʼ. Jach táanil tiʼ u káajal «u kʼiinil Yuumtsileʼ», yaan u yaʼalaʼal tumen le gobiernoʼoboʼ: «Tuláakal jejetsʼkil yéetel maʼalob yanil». Maʼ xaaneʼ junpʼéel baʼax kun úuchul wa jejeláas. Le gobiernoʼoboʼ maʼ xaaneʼ yaan u tuklikoʼob taʼaytak u yutskíintikoʼob jujunpʼéel nukuch talamiloʼob. ¿Kux túun u nuuktakil le religionoʼoboʼ? Tumen ku táakpajloʼob teʼ yóokʼol kaabaʼ, maʼ xaaneʼ yaan xan u yaʼalikoʼob beyoʼ (Apo. 17:1, 2). Yaan u pʼáatloʼob jeʼex u profetailoʼob Judaeʼ, Jéeobaeʼ tu yaʼaleʼ letiʼobeʼ ku yaʼalikoʼob: «Láaj maʼalob yanil», tsʼoʼoleʼ tuláakal kʼaas yanil (Jer. 6:14; 23:16, 17).
4. ¿Baʼax k-naʼatik, kex u maas yaʼabil le máakoʼob maʼatech u naʼatkoʼoboʼ?
4 Kex jeʼel máaxak ka u yaʼal «tuláakal jejetsʼkil yéetel maʼalob yanileʼ», lelaʼ yaan u yeʼesik jach taʼaytak u káajal u kʼiinil Jéeoba. Le oʼolal Pabloeʼ tu yaʼalaj: «Sukuʼuneʼex, maʼ ich éeʼjochʼeʼenil yaneʼexiʼ utiaʼal ka téek taalak ta wóokʼoleʼex u kʼiinil Yuumtsil jeʼel bix u téek taal juntúul j-ookoleʼ. Tumen tuláakaleʼexeʼ utiaʼaleʼex le sáasiloʼ» (1 Tes. 5:4, 5). Kex u maas yaʼabil máak maʼ tu naʼatik le baʼaxoʼob ku yúuchloʼ, toʼoneʼ k-naʼatik le baʼaxoʼob ku yaʼalik le Bibliaoʼ. Baʼaleʼ ¿bix kun béeytal le profecía tuʼux kun aʼalbil «tuláakal jejetsʼkil yéetel maʼalob yanil[oʼ]»? Jeʼeliliʼ k-ilkeʼ. Le oʼolaleʼ «unaj k-pʼil ich yéetel u pʼáatal jabaʼan k-óol» (1 Tes. 5:6; Sof. 3:8).
JUNTÚUL REINA JACH NAAYAL U YÓOL
5. 1) ¿Bix kun káajal le «táaj yaʼab muʼyaj[oʼ]»? 2) ¿Baʼax reinail kun kʼastal yokil tiʼ?
5 ¿Máakalmáak le uláakʼ baʼax kun úuchloʼ? Pabloeʼ tu yaʼalaj: «Ken u yaʼal [le] máakoʼob: Tuláakal jejetsʼkil yéetel maʼalob yanileʼ, letiʼ le ken téek taalak tu yóokʼoloʼob le xuʼulsajoʼ». Yáax baʼax kun úuchul «le ken téek taalak [...] le xuʼulsajoʼ» letiʼe u xuʼulsaʼal «le x-núupkʼeban koʼolel», «le nojoch Babilonia», wa tuláakal le religionoʼob minaʼan u jaajil tiʼoboʼ (Apo. 17:5, 6, 15). Bey kun káajal le «táaj yaʼab muʼyaj[oʼ]» (Mat. 24:21; 2 Tes. 2:8). Yaʼab máax naayal u yóol ken káajak. ¿Baʼaxten? Tumen tak teʼ kʼiinoʼ le x-káakbachaʼ naayal u yóol, bey juntúul reina ku yaʼalik: «[Maʼ] bíin okʼolnakeniʼ». Baʼaleʼ yaan u kʼastal yokil tiʼ. Tumen séeb kun lúubul, bey «tiʼ junpʼéeliliʼ kʼiin[eʼ]» (Apo. 18:7, 8).
6. ¿Máax kun xuʼulsik le religionoʼob maʼatech u kaʼanskoʼob u jaajiloʼ?
6 ¿Máax kun líikʼil tu contra le x-káakbachoʼ? Le Bibliaoʼ ku yaʼalikeʼ juntúul «nojoch chak baʼalcheʼ» yaan «[diez] u tsʼíitil u baak». Ken xakʼalxoktaʼak u libroil Apocalipsiseʼ ku yilaʼaleʼ letiʼe ONU le baʼalcheʼoʼ, le «[diez] u tsʼíitil u baak[oʼ]» letiʼe tuláakal le gobiernoʼob ku yáantkoʼob le «nojoch chak baʼalcheʼ[oʼ]» (Apo. 17:3, 5, 11, 12). * Letiʼe ONU kun xanaʼchaʼatik le x-káakbachoʼ. Yaan u chíikbesik baʼax ku beetik, yaan u jaantik yéetel «yaan u tóokik [...] tiʼ kʼáakʼ» (xokaʼak Apocalipsis 17:16).
7. ¿Bix kun líikʼil baʼateʼel le «nojoch chak baʼalcheʼ[oʼ]»?
7 Le profecíaʼoboʼ ku yaʼalik xan bix kun káajal. Jéeoba ken u tsʼáa tu puksiʼikʼal le gobiernoʼob «le baʼax u kʼáa[toʼ]», u xuʼulskoʼob le x-káakbachoʼ (Apo. 17:17). Tuláakal tuʼuxeʼ le religionoʼoboʼ ku beetkoʼob u yantal baʼateʼel, le oʼolal maʼ xaaneʼ le gobiernoʼoboʼ yaan u tuklikoʼob maas maʼalob ka xuʼulsaʼakoʼob. Le gobiernoʼoboʼ yaan u tuklikoʼob chéen letiʼob taak u beetkoʼob. Baʼaleʼ u jaajileʼ Dios kun péeksikoʼob u xuʼulsoʼob le religionoʼob maʼatech u kaʼanskoʼob u jaajiloʼ. U jaats tiʼ le baʼax yaan yáanal u páajtalil Satanasoʼ chéen ken jáan líikʼik tu contra uláakʼ jaats, tsʼoʼoleʼ mix baʼal kun páajtal u beetik le Kʼaasilbaʼaloʼ (Mat. 12:25, 26).
BAʼATEʼEL TU CONTRA U KAAJAL DIOS
8. ¿Baʼax ken u beet «Gog»?
8 Ken xuʼulsaʼak le religionoʼob maʼatech u kaʼanskoʼob u jaajiloʼ, yaan u yilaʼal u kaajal Dioseʼ «jetsʼeknak yaniloʼob» yéetel minaʼan baʼpakʼoʼob kanáantkoʼob (Eze. 38:11, 14). ¿Baʼax kun úuchul tiʼ le máaxoʼob meyajtik Jéeobaoʼ? Yaʼab «j-baʼateloʼob» kun líikʼloʼob tu contraʼob. Le Bibliaoʼ ku yaʼalikeʼ «Gog», wa Satanás kun péeksikoʼob u beetoʼob (xokaʼak Ezequiel 38:2, 15, 16). ¿Unaj wa k-sajaktal?
9. 1) ¿Baʼax maas k-tuklik? 2) ¿Baʼax unaj k-beetik utiaʼal k-muʼukʼaʼankúuntik k-fe?
9 Toʼon k-meyajtik Dioseʼ maʼ saajkoʼon tiʼ le baʼax kun úuchlaʼ. Maʼ chéen k-tuklik bix ken k-salvartbiliʼ, baʼaxeʼ bix kun kiliʼichkúuntbil u kʼaabaʼ Jéeoba yéetel u yeʼesaʼal chéen letiʼ yaan u derechoil u gobernar. Letiʼeʼ maas tiʼ sesenta u téenel tu yaʼalaj: «Bíin a táan óolteʼex teen Yuumtsil» (Eze. 6:7). Le oʼolal k-jach tsʼíiboltik ka béeychajak le baʼax ku yaʼalik u profecíaʼob Ezequieloʼ, yéetel k-kʼubik k-óol xaneʼ «Yuumtsileʼ u yojel u tok tiʼ le muʼyajoʼoboʼ le máaxoʼob u kʼubmajoʼob u kuxtaloʼob tiʼ letiʼoʼ» (2 Ped. 2:9). Le táan k-páaʼtikoʼ unaj k-muʼukʼaʼankúuntik k-fe mantatsʼ utiaʼal u chúukpajal k-óol tiʼ Jéeoba kex jeʼel baʼaxak ka úuchkeʼ. ¿Baʼax túun unaj k-beetik? Unaj k-payalchiʼ, k-xakʼalxoktik le Bibliaoʼ, k-tuukul tiʼ le baʼaxoʼob k-xokikoʼ yéetel k-kʼaʼaytik le Reinooʼ. Beyoʼ le kuxtal minaʼan u xuuloʼ yaan u pʼáatal jeetsʼel yanil t-tuukul, jeʼex junpʼéel «ancla[eʼ]» (Heb. 6:19; Sal. 25:21).
LE KAAJOʼOBOʼ YAAN U YOJÉELTIKOʼOB MÁAX JÉEOBA
10, 11. ¿Bix kun káajal le Armagedonoʼ, yéetel baʼax kun úuchul teʼ baʼatelaʼ?
10 Ken líikʼik le kaajoʼob tu contra u kaajal Diosoʼ letiʼe ken úuchuk uláakʼ junpʼéel nojoch baʼaloʼ. Yéetel u yáantaj Jesús bey xan le angeloʼoboʼ, Jéeobaeʼ yaan u salvartik u kaajal (Apo. 19:11-16). Bey kun káajal le Armagedón wa «u baʼatelil u nojoch kʼiinil [...] Jajal Dios, tiʼ máax yaan tuláakal páajtalil» (Apo. 16:14, 16).
11 ¿Baʼax kun úuchul teʼ baʼatelaʼ? Jéeobaeʼ tu yaʼalaj tiʼ Ezequiel ka u yaʼale: «Bíin in beet u taal tu yóokʼol Gog tuláakal u jejeláasil [...] loob» tsʼoʼoleʼ «u j-baʼateloʼobeʼ bíin u paklan kíimsubaʼob yéetel máaskab. Teen Yuumtsil, teen aʼalik». Tumen yaan u saʼatal u yóoloʼobeʼ, yaan u woʼoltikuba le máaxoʼob yanoʼob tu tséel Satanasoʼ yéetel yaan u paklan kíimskubaʼob. Mix le Kʼaasilbaʼal ken u salvartubaoʼ, Jéeobaeʼ ku yaʼalik: «Bíin in beet u lúubul tu yóokʼol letiʼ [yéetel] tu yóokʼol u j-baʼateloʼob [...] kʼáakʼ yéetel siʼintun [wa azufre]» (Eze. 38:21, 22). ¿Bix túun kun tsʼoʼokol le baʼatelaʼ?
12. ¿Baʼax ken u yil le kaajoʼoboʼ?
12 Le kaajoʼoboʼ yaan u kʼuchul u yiloʼobeʼ Jéeoba ku baʼateʼel tu contraʼob. Jeʼex u soldadoiloʼob Egipto le ka tu chʼaʼpachtoʼob le israelitaʼob teʼ Chak kʼáaʼnáaboʼ, le máaxoʼob nuʼuktaʼanoʼob tumen Satanasoʼ maʼ xaaneʼ yaan u yaʼalikoʼob: «Yuumtsileʼ táan u baʼateʼel tu tséeloʼob» (Éxo. 14:25). Le kaajoʼoboʼ yaan u yojéeltikoʼob máax Jéeoba (xokaʼak Ezequiel 38:23). ¿Bukaʼaj u bin u yúuchul lelaʼ?
MAʼ KUN ANTAL ULÁAKʼ POTENCIA
13. ¿Baʼax k-ojel yoʼolal le u cinco xéetʼel le imagen tu yilaj Danieloʼ?
13 Junpʼéel tiʼ u profecíaʼob Danieleʼ ku yáantkoʼon k-naʼat tiʼ baʼax kʼiin kuxaʼanoʼon. Le profetaoʼ ku tʼaan tiʼ junpʼéel estatua beetaʼan yéetel jejeláas baʼaloʼob (Dan. 2:28, 31-33). Le imagen bey wíinikoʼ ku chíikbesik le potenciaʼob tu pʼektoʼob u kaajal Dios úuchjeakoʼ, Babilonia, Medopersia, Grecia yéetel Roma, yéetel le u tsʼookoʼ táan u gobernar bejlaʼeʼ. Lelaʼ ku chíikbesaʼal tumen u yook yéetel u dedosil u yook le estatuaoʼ. Le táan le yáax nojoch baʼateltáambaloʼ, tu muchʼuba Gran Bretaña yéetel Estados Unidos. Le oʼolaleʼ le u cinco xéetʼel le imagen tu yilaj Danieloʼ letiʼe potencia angloamericanaoʼ. Le potenciaaʼ ku chíikbesaʼal tumen u yookoʼob le estatuaoʼ, ¿baʼax ku yeʼesik leloʼ? Ku yeʼesikeʼ maʼ kun antal uláakʼ potencia. Tumen u yookoʼob yéetel u dedos beetaʼan de hierro yéetel kʼateʼ, ku chíikbesik le baʼax luʼsik u muukʼ le potencia angloamericanaoʼ.
14. Ken káajak le Armagedonoʼ, ¿baʼax potenciail táan u gobernar?
14 Le profecíaoʼ ku yaʼalik xaneʼ yaan u lúubul junpʼéel nojoch tuunich ku taal tiʼ junpʼéel wits. Le tuunichoʼ ku chíikbesik u Reino Dios, yéetel le witsoʼ ku chíikbesik le derecho yaan tiʼ Jéeoba utiaʼal u gobernaroʼ. Le tuunich xoʼotʼ tu jaʼabil 1914, teʼ súutukaʼ chich u bin tu tojil u yookoʼob le estatuaoʼ. Teʼ Armagedonoʼ u yookoʼob yéetel tuláakal u wíinklil le estatuaaʼ yaan u pʼuʼupʼuyaʼal (xokaʼak Daniel 2:44, 45). Le oʼolal ken káajak le Armagedonoʼ, letiʼe potencia angloamericana táan u gobernaroʼ. Bukaʼaj jatsʼutsil ka k-il u tsʼok béeytal le profecíaaʼ. * Baʼaleʼ ¿baʼax ken u beet Jéeoba tiʼ Satanás? Koʼoneʼex ilik.
BIX KEN U XUʼULSIL JÉEOBA LE MÁAX MAAS PʼEKMILOʼ
15. ¿Baʼax kun beetbil tiʼ Satanás yéetel u kʼasaʼan angeloʼob ken tsʼoʼokok le Armagedonoʼ?
15 Yáaxeʼ Satanaseʼ yaan u yilik bix kun xuʼulsbil tuláakal le máakoʼob yaan yáanal u páajtaliloʼ. Ken tsʼoʼokkeʼ ku xuʼulsaʼal tiʼ letiʼ. Apóstol Juaneʼ tu yaʼalaj baʼax kun úuchul (xokaʼak Apocalipsis 20:1-3). Jesucristo, le «ángel» yaantiʼ «u llaveil le jach taamkach chʼeʼenoʼ», yaan u kʼaxik Satanás yéetel u kʼasaʼan angeloʼob utiaʼal u pulik teʼ taamkach chʼeʼenoʼ yéetel tiʼ kun antaloʼob ichil mil jaʼaboʼobiʼ (Luc. 8:30, 31; 1 Juan 3:8). Bey kun káajal u kiimbesaʼal tu pool le kaanoʼ (Gén. 3:15). *
16. ¿Baʼax kun úuchul tiʼ Satanás ken puʼuluk teʼ «taamkach chʼeʼenoʼ»?
16 ¿Baʼax le «taamkach chʼeʼen» tuʼux kun pulbil Satanás yéetel u kʼasaʼan angeloʼoboʼ? Le tʼaan ich griego ábyssos meyajnaj tiʼ Juan teʼ tekstoaʼ u kʼáat u yaʼal «junpʼéel baʼax maʼ tu páajtal u yojéeltaʼal bukaʼaj u taamil», yéetel jeʼel xan u suʼutul «minaʼan u xuul u taamil». Le oʼolal lelaʼ junpʼéel kúuchil chéen jeʼel u béeytal u kʼuchul Jéeoba wa le ángel u tsʼaamajtiʼ «u llaveil le jach taamkach chʼeʼenoʼ». Lelaʼ u kʼáat u yaʼaleʼ Satanaseʼ maʼ kun béeytal u beetik mix baʼal, bey ka kíimkeʼ. Bey kun makbil u chiʼ le «león ku yáakam[oʼ]» (1 Ped. 5:8).
BAʼALOʼOB KUN ÚUCHUL TÁANIL TIʼ U YANTAL JEETSʼELIL
17, 18. 1) Jeʼex tsʼoʼok k-kanik teʼ xookaʼ ¿baʼaxoʼob kun úuchul? 2) Ken tsʼoʼokkeʼ, ¿baʼax kun úuchul?
17 Maʼ kun xáantal ken béeychajak le nukuch baʼaloʼobaʼ. K-jach tsʼíiboltik k-uʼuyik bix kun aʼalbil «Tuláakal jejetsʼkil yéetel maʼalob yanil». Tsʼoʼoleʼ yaan k-ilik bix kun xuʼulsbil le nojoch Babiloniaoʼ, u baʼateʼel Gog bey xan u káajal le Armagedonoʼ. Ken tsʼoʼokkeʼ yaan u puʼulul Satanás yéetel u kʼasaʼan angeloʼob teʼ taamkach chʼeʼenoʼ. Ken xuʼuluk tuláakal le kʼasaʼaniloʼ, yaan u káajal u gobernar Jesucristo ich Mil Jaʼaboʼob, teʼ kʼiinoʼoboʼ yaan u yantal «nojoch jeetsʼel» (Sal. 37:10, 11).
18 Tsʼoʼok k-xakʼalxoktik cinco baʼaloʼob maʼ kʼuchuk u kʼiinil u «yilaʼaloʼob[iʼ]», baʼaleʼ maʼ unaj u xuʼulul k-páaʼtikiʼ. Teʼ tuláakʼ xookoʼ yaan k-ilik uláakʼ cinco baʼaloʼob kun úuchul.
[Tsolajiloʼob]
^ xóot’ol 6 Ilaʼak le libro Apocalipsis... ¡se acerca su magnífica culminación!, táan juʼun 251 tak 258.
^ xóot’ol 14 Ken u yaʼal Daniel 2:44 «yaan u xuʼulsik junpuliʼ tuláakal le [...] [reinoʼobaʼ]», táan u tʼaan tiʼ le potenciaʼob ku chíikbesaʼaloʼob tumen le estatuaoʼ. Baʼaleʼ uláakʼ junpʼéel profecíaeʼ ku yaʼalikeʼ «tuláakal u [reyiloʼob] yóokʼol kaab[eʼ]» yaan u baʼateloʼob tu contra Jéeoba tu «nojoch kʼiinil [...] Jajal Dios, tiʼ máax yaan tuláakal páajtalil» (Apo. 16:14; 19:19-21). Bey kun xuʼulsbil tuláakal le gobiernoʼob yaan way yóokʼol kaabeʼ, maʼ chéen le ku chíikbesaʼaloʼob tumen le imagen tu yilaj Danieloʼ.
^ xóot’ol 15 Ken tsʼoʼokok le mil jaʼaboʼoboʼ yaan u xuʼulsaʼal tiʼ Satanás yéetel u kʼasaʼan angeloʼob ken puʼulukoʼob «ichil u kʼáakʼil azufre» (Apo. 20:7-10; Mat. 25:41).
[U kʼáatchiʼiloʼob le xookoʼ]
[Fotoʼob yéetel cuadroʼob yaan teʼ táan juʼun 4 yéetel 5]
CINCO BAʼALOʼOB KUN ÚUCHUL:
1 U yaʼalaʼal «tuláakal jejetsʼkil yéetel maʼalob yanil»
2 U xuʼulsaʼal le «nojoch Babilonia» tumen le gobiernoʼoboʼ
3 Le baʼateʼel tu contra u kaajal Jéeobaoʼ
4 Le Armagedonoʼ
5 U puʼulul Satanás yéetel u demonioʼob teʼ taamkach chʼeʼenoʼ
