Tu yáantoʼob u maasil yéetel le baʼax yaantiʼoboʼ

TU JAʼABIL 49, Pedro, Santiago yéetel Juan, «máaxoʼob kʼaj óoltaʼanoʼob jeʼel bix u nuuktakiloʼob[eʼ]», tu yaʼaloʼob tiʼ Pablo yéetel tiʼ Bernabeeʼ le táan u kʼaʼaytajoʼob tiʼ yaanal luʼumiloʼoboʼ, unaj u chʼaʼikoʼob en cuenta le sukuʼunoʼob óotsiloʼoboʼ (Gal. 2:9, 10). ¿Bix tu tsʼoʼokbesiloʼob le baʼax aʼalaʼabtiʼoboʼ?

Le cartaʼob tu tsʼíibtaj Pablooʼ ku yeʼesik bix tu beetil. Letiʼeʼ tu tsʼíibtaj tiʼ le sukuʼunoʼob yaan Corintooʼ: «Tu yoʼolal le siibaloʼob utiaʼal u yáantaʼal le [j-]oksaj óoloʼoboʼ, beeteʼex jeʼel bix tin tsolaj tiʼ le [múuchʼuliloʼob] yaan tu luʼumil Galaciaoʼ. Tu yáax kʼiinil le semanaoʼ, cada juntúul tiʼ teʼexeʼ unaj u junpáaykuntik wa bajux, tu pʼiis jeʼel bix tu náajalteʼ, ka u líiʼseʼ utiaʼal maʼ u moʼolol taakʼin le ken kʼuchken. Le ken kʼuchkeneʼ, bíin in kaʼaj in túuxt Jerusalén le máaxoʼob kan a yéeyeʼexeʼ, yéetel tsʼíibaʼan juʼunoʼob ka in tsʼáatiʼobeʼ, utiaʼal ka u bisoʼob a siibaleʼex tiʼ le j-oksaj óoloʼob[oʼ]» (1 Cor. 16:1-3).

Yéetel u nuʼuktaj Dioseʼ tu tsʼíibtaj u kaʼapʼéel carta tiʼ letiʼob, teʼeloʼ tu yaʼalaj baʼax u biilal u moʼolol taakʼin: «Ka a keet áantabaʼex. Bejlaʼeʼ tiʼ teʼexeʼ yaan le baʼax ku bineltik tiʼ letiʼob[oʼ]» (2 Cor. 8:12-15).

Le ka tu tsʼíibtaj apóstol Pablo u carta tiʼ le sukuʼunoʼob yaan Roma, óoliʼ tu jaʼabil 56, taʼaytak kaʼach u xuʼulul u moʼolol le taakʼinoʼ. Letiʼeʼ tu yaʼalaj: «Táan in bin Jerusalén, tumen táan in bisik junpʼéel áantaj utiaʼal le sukuʼunoʼob yanoʼob teʼeloʼ. Tumen le Macedoniailoʼob yéetel le Acayailoʼoboʼ tsʼoʼok u tuklikoʼob u tsʼáaikoʼob siibaloʼob utiaʼal u túuxtoʼob tiʼ le sukuʼunoʼob óotsiloʼob yanoʼob Jerusalenoʼ» (Rom. 15:25, 26). Maʼ sen úuch tiʼ leloʼ Pabloeʼ tu tsʼoʼoksaj le meyaj tsʼaʼantiʼoʼ, tumen le ka suunaj Jerusalén yéetel ka maʼach utiaʼal kʼalbileʼ, tu yaʼalaj tiʼ le gobernador romano Felixoʼ: «Suunajen tin luʼum utiaʼal in tsʼáaik siibaloʼob» (Hch. 24:17).

Pabloeʼ tu yaʼalaj yoʼolal le sukuʼunoʼob yaan Macedoniaoʼ: «Tu jach kʼáat óoltoʼobtoʼon ka k-chaʼa u yáantajoʼob». Bey u tuukul le sukuʼunoʼob teʼ yáax siglooʼ, le oʼolal Pabloeʼ tu yaʼalaj tiʼ le sukuʼunoʼob yaan Corinto ka u beetoʼob xan beyoʼ: «Cada juntúuleʼ unaj u tsʼáaik jeʼel bix u tukultmaj tu puksiʼikʼaleʼ, maʼ yéetel x-maʼ óoliʼ, mix tumen táan u tsaʼabaltiʼiʼ [wa u kʼáataʼaltiʼ], tumen Jajal Dioseʼ u yaabiltmaj le máax ku tsʼáa[ik] yéetel kiʼimak óolaleʼ». ¿Baʼax péeks le múuchʼuliloʼob u tsʼáa u siibaloʼoboʼ? Letiʼobeʼ «maʼ chéen táan [u] tsʼáaik[oʼob] junpʼéel baʼal kʼaʼabéet tiʼ [le máaxoʼob kiliʼichoʼoboʼ], baʼaleʼ táan [...] u tsʼáaikoʼob yaʼabkach nib óolal tiʼ Jajal Dios» (2 Cor. 8:4; 9:7, 12). Toʼon xaneʼ jeʼel u béeytal k-beetik beyoʼ, tumen k-ojel Jéeoba Dioseʼ yaan u kiʼikiʼtʼantik le baʼax k-beetkoʼ. Jach minaʼan uláakʼ baʼax jeʼel u taasik utsil tiʼ máakeʼ (Pro. 10:22).

 [Cuadro yaan teʼ táan juʼun 9]

LE BIX U YÁAANTAJ JUJUNTÚUL MAAK UTIAʼAL LE MEEYJIL KʼAʼAYTAJOʼ

Jeʼex tu kʼiiniloʼob Pabloeʼ, bejlaʼeʼ yaʼab máaxeʼ ku «junpáaykuntik wa bajux» utiaʼal u tsʼáaik teʼ caja ku kʼaabaʼtik «Utiaʼal le meeyjil kʼaʼaytajoʼ» (Obra mundial) (1 Cor. 16:2). Cada meseʼ le múuchʼuliloʼoboʼ ku túuxtikoʼob tu najil Betel le taakʼin ku siʼibiloʼ. Jeʼel u páajtal xan u túuxtaʼal u taatsʼ tiʼ u j-jaajkunajoʼob Jéeobaeʼ. Wa a kʼáat a wojéelt bix u kʼaabaʼ le tuʼux unaj a túuxtikoʼ, tʼaanen tu najil Betel ilik le kʼaʼaytaj ku beetaʼal tuʼux kajaʼanechoʼ. Jeʼel u páajtal a wilik u direccionil teʼ www.pr418.com/contact. Le siibaloʼob ken k-il beoraaʼ u taatsʼ jeʼel u páajtal u túuxtaʼaleʼ:

BAʼALOʼOB KU SIʼIBIL

• U síik máak taakʼin, alhajaʼob wa uláakʼ baʼaloʼob yaan u tojol.

• Unaj u túuxtik máak junpʼéel carta tuʼux ku yaʼalik siibil u beetik.

TAAKʼIN MAJÁANTAʼAN

• U tsʼáaik máak taakʼin, baʼaleʼ jeʼel u páajtal u kaʼa chʼaʼik wa ku kʼaʼabéettaltiʼeʼ.

• Unaj u túuxtik máak junpʼéel carta tuʼux ku yaʼalik chéen táan u tsʼáaik majáantbil.

SIIBALOʼOB KU CHʼAʼTUKLAʼAL BIX KUN TSʼAABIL

Beoraaʼ koʼoneʼex ilik uláakʼ bix jeʼel u tsʼáaik u siibal máak utiaʼal u maas kʼaʼaytaʼal le maʼalob péektsiloʼ. Wa a kʼáat a beet junpʼéel bix tiʼ le ken k-iloʼ, táanil unaj a tʼaan tu najil Betel utiaʼal a wojéeltik wa jeʼel u páajtaleʼ. Tumen maʼ junpʼéeliliʼ baʼax ku kʼáatik le gobiernoʼoboʼ, jach unaj a kʼáatik u yáantaj juntúul máax yojel tiʼ baʼaloʼob beyaʼ, tumen beyoʼ jeʼel u páajtal a yéeyik bix maas maʼalob a tsʼáaik a siibaleʼ.

Seguroʼob. Jeʼel u páajtal u yaʼalaʼal ka cobrartaʼak junpʼéel seguro de vida wa junpʼéel pensión tumen u j-jaajkunajoʼob Jéeobaeʼ.

Taakʼin oksaʼan banco. Le taakʼin ku tsʼaʼabal tiʼ máak ken jubilartaʼakoʼ jeʼel u páajtal u yoksaʼal banco utiaʼal ka cobrartaʼak u interesil tumen u j-jaajkunajoʼob Jéeobaeʼ. Bey xan jeʼel u páajtal u beetaʼal yéetel u reciboil le taakʼin oksaʼan bancooʼ (certificado de depósito) utiaʼal ka cobrartaʼak u interesil. Tsʼoʼoleʼ jeʼel xan u páajtal u cobrartaʼal le taakʼin tumen u j-jaajkunajoʼob Jéeoba wa ku kíimil u yuumiloʼ, baʼaleʼ unaj u beetaʼal jeʼex u yaʼalik le bancooʼ.

Le reciboʼob ku tsʼáaik junpʼéel empresa ken tsʼaʼabak taakʼin u majáantoʼ. Leloʼobaʼ jeʼel u páajtal u siʼibil tiʼ u j-jaajkunajoʼob Jéeobaeʼ. Tsʼoʼoleʼ jeʼel xan u tsʼaʼabaltiʼ u páajtalil u cobrartik le taakʼin ken kíimik u yuumiloʼ.

Terrenoʼob yéetel najoʼob. Jeʼel u páajtal u pʼaʼatal tiʼ u j-jaajkunajoʼob Jéeoba utiaʼal ka meyajnak jeʼel bix kʼaʼabéeteʼ. Baʼaleʼ wa yaan máax kajakbaleʼ jeʼel u páajtal u pʼáatal kajtal tak ken kíimkeʼ.

Áantaj ku tsʼaʼabal yoʼolal junpʼéel nojoch siibal. Jeʼel u páajtal u pʼaʼatal yaʼabkach taakʼin wa junpʼéel baʼal jach yaʼab u tojol tiʼ u j-jaajkunajoʼob Jéeoba, baʼaleʼ cada jaʼabeʼ ku tsʼaʼabal áantaj tiʼ le máax tsʼáaikoʼ (wa tiʼ le máax ken u yaʼal ka tsʼaʼabak) tak ken kíimkoʼ. Le máaxoʼob beetik le siibaloʼob beyaʼ, maʼ yaʼab impuesto ku boʼotkoʼob teʼ jaʼab jeʼeloʼ.

Testamentoʼob yéetel u cobrartaʼal interés. Jeʼel u páajtal u pʼaʼatal taakʼin yéetel terrenoʼob tiʼ u j-jaajkunajoʼob Jéeobaeʼ, baʼaleʼ leloʼ unaj u beetaʼal yéetel junpʼéel testamento tu táan juntúul notario. Tsʼoʼoleʼ jeʼel xan u páajtal u yoksaʼal taakʼin teʼ banco utiaʼal ka u cobrart u interesoʼ (fideicomiso). Le máaxoʼob beetik le siibaloʼob beyaʼ maʼ yaʼab impuesto ku boʼotkoʼobiʼ.

Jeʼex u yaʼalik le jaats «siibaloʼob ku chʼaʼtuklaʼal bix kun tsʼaabiloʼ», le siibaloʼob tsʼoʼok k-aʼalikaʼ unaj u chʼaʼtuklaʼal tubeel. Le máaxoʼob u kʼáat u yojéeltoʼob u maasil yoʼolal le jejeláas bix jeʼel u maas áantajoʼob utiaʼal ka kʼaʼaytaʼak le maʼalob péektsiloʼ, jeʼel u páajtal u xakʼalxoktikoʼob le folleto Donaciones planificadas para favorecer el servicio del Reino en todo el mundo. Le folletoaʼ ku tsolik le jejeláas bix jeʼel u páajtal u siʼibil taakʼin wa uláakʼ baʼaloʼoboʼ. Maʼ xaaneʼ maʼ tuláakal le baʼax ku yaʼalik ku páajtal a beetkoʼ, tumen tiʼ cada luʼumileʼ jejeláas baʼax ku kʼáataʼal. Le oʼolal ken tsʼoʼokok a xokik le folletooʼ unaj a kʼáatik u yáantaj juntúul máax u yojel tiʼ baʼaloʼob beyaʼ. Tu yoʼolal le siibaloʼob beyaʼ yaʼab máakeʼ tsʼoʼok u yáantaj utiaʼal u kaʼansaʼal yéetel u yáantaʼal yaʼab máak tiʼ tuláakal yóokʼol kaab, yéetel tsʼoʼok xan u jóoʼskoʼob yaʼab utsil yoʼolal le baʼax ku beetkoʼoboʼ. Wa yaan le folleto teʼ luʼumil tuʼux yanechoʼ jeʼel u páajtal a kʼáatik tiʼ u secretarioil a múuchʼulileʼ.

Wa a kʼáat a wojéelt u maasileʼ tsʼíibnen wa tʼaanen teʼ Oficina de Donaciones Planificadas (Charitable Planning Office), teʼ dirección yaan kabaloʼ wa jeʼel u páajtal a tʼaan tu najil Beteleʼ.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Teléfono: (845) 306-0707