¿Kʼajaʼan wa tech?

¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

¿Bix jeʼel k-kanáantik k-aakʼ utiaʼal maʼ u tʼabik junpʼéel kʼáakʼeʼ?

Unaj k-xakʼaltik k-puksiʼikʼal. Táanil tiʼ k-jáan tuukul kʼaas tiʼ juntúul sukuʼuneʼ, unaj k-ilik baʼaxten taak k-aʼalik baʼal tiʼ. ¿K-aʼalik wa baʼal chéen tu yoʼolal k-pʼáatal maʼalobil? Maʼ u tuʼubultoʼoneʼ wa k-aʼalik baʼaleʼ chéen ku maas taasik talamil (15/8, táan juʼun 21).

¿Baʼaxoʼob kun úuchul táanil tiʼ u taal le xuʼulsajoʼ?

Yaan u yaʼalaʼal: «Tuláakal jejetsʼkil yéetel maʼalob yanil». Yaan u xuʼulsaʼal le «nojoch Babilonia» tumen le gobiernoʼoboʼ. Yaan u yúuchul baʼateʼel tu contra u kaajal Jéeoba. Yaan u taal le Armagedonoʼ yéetel yaan u puʼulul Satanás yéetel u demonioʼob teʼ taamkach chʼeʼenoʼ (15/9, táan juʼun 4).

¿Baʼax kun úuchul ken «xuʼuls[aʼak]» le kíimiloʼ?

Le Bibliaoʼ ku yaʼalikeʼ «u tsʼook baʼax kun xuʼulsbileʼ letiʼ le kíimiloʼ» (1 Cor. 15:26). Lelaʼ kaʼa jaats máakoʼob kun kʼamik u yutsil. Yáaxeʼ le «yaʼabkach máakoʼob» kuxaʼanoʼob bejlaʼaʼ yaan u páajtal u yookloʼob teʼ túumben luʼumoʼ yéetel mix bikʼin kun kíimloʼob. Tsʼoʼoleʼ u millonesil máakoʼob kimenoʼobeʼ yaan u kaʼa kuxtaloʼob (15/9, táan juʼun 11).

¿Bix u yáantkoʼon maʼ k-ojéeltik baʼax kʼiin yéetel baʼax hora u taal le xuʼulsajoʼ?

Ku béeytal k-eʼesik baʼax yaan t-puksiʼikʼal yéetel ku béeytal k-kiʼimakkúuntik u yóol Jéeoba. Ku suuktal k-tsʼáaik baʼax yáantoʼon, k-maas kʼubik k-óol tiʼ Jéeoba yéetel tiʼ baʼax ku yaʼalik le Bibliaoʼ. Tsʼoʼoleʼ ku muʼukʼaʼantal k-fe ken k-aktáant talamiloʼob (15/9, táan juʼun 24 yéetel 25).

¿Bix u tuʼubsik Dios u kʼeban le máaxoʼob ku arrepentiroʼ?

Jéeobaeʼ ku yaʼalik yoʼolal le máaxoʼob meyajtikoʼ: «[Maʼ] bíin kaʼa kʼaʼajak tiʼ teen u kʼebanoʼobiʼ» (Jer. 31:34). Yoʼolal u kuxtal Jesús tu kʼuboʼ Jéeobaeʼ jeʼel u perdonartik k-kʼebaneʼ. Ken u beeteʼ maʼ tu kʼaʼajsik utiaʼal u kaʼa castigartikoʼon tu yoʼolal (1/10, táan juʼun 18).

¿Máaxoʼob ku chíikbesik le «siete eekʼoʼob» yaan tu x-noʼoj kʼab Jesús, ku yaʼalik Apocalipsis 1: 16, 20?

Ku chíikbesik le ancianoʼob yéeyaʼanoʼob utiaʼal u binoʼob kaʼanoʼ, bey xan tuláakal le ancianoʼob yanoʼob teʼ múuchʼuliloʼoboʼ (15/10, táan juʼun 14).

¿Baʼax jeʼel u yáantkoʼon k-tsʼoʼokbes baʼax k-aʼalikeʼ?

Teʼ tu «tsʼook jaʼaboʼob[aʼ]» yaʼab máaxeʼ maʼ chúukaʼan u yóol u beet baʼax maʼalobiʼ, «kex ka u yaʼaloʼob jach u tsʼaamaj u yóoloʼob u adorartoʼob Dioseʼ, yéetel u kuxtaloʼobeʼ [ku] yeʼeskoʼob maʼ beyiʼ, NM» (2 Tim. 3:1-5). Le oʼolal maʼ unaj k-bisikba tu yéeteloʼobiʼ, baʼaxeʼ unaj k-bisikba yéetel k-muchʼikba yéetel máaxoʼob ku tsʼoʼokbesik u tʼaanoʼob ken u yaʼaloʼob, beyoʼ (Heb. 10:24, 25) (15/10, táan juʼun 30).

¿Bix tu yeʼesil Jesús kabal óolal jeʼex aʼalaʼanil tiʼ Isaías 50:4 yéetel 5?

Le tekstooʼ ku yaʼalikeʼ, ‹le máax kaʼansaʼanoʼ› maʼ tu ‹sutaj u paachiʼ›. Tumen jach taak u kaanbaleʼ Jesuseʼ yéetel kabal óolal tu chʼenxikintaj le baʼax ku kaʼansaʼaltiʼ tumen u Taataoʼ. Tsʼoʼoleʼ jach tu yilaj bix tu yeʼesil kabal óolal Jéeoba úuchik u chʼaʼik óotsilil tiʼ j-kʼeban wíinikoʼob (15/11, táan juʼun 11).

¿Baʼaxten yaan horaeʼ talam u perdonar máak?

Tumen u suukileʼ ken beetaʼaktoʼon wa baʼaxeʼ maʼ xaaneʼ k-pʼuʼujul, k-uʼuyik pʼaʼatoʼon kʼaasil, k-kʼáat ka beetaʼak justicia wa ku taaktal k-sutik u jeel (15/11, táan juʼun 27).