Xiʼiktech utsil
Xiʼiktech utsil
«Tuláakal baʼax [ken a beeteʼ], bíin xiʼiktech utsil.» (JOS. 1:8)
¿BAʼAX JEʼEL A NÚUKIKEʼ?
¿Baʼax kʼiin ka bin utsil tiʼ Salomón?
¿Baʼaxten jeʼel u páajtal u yaʼalaʼal bin utsil tiʼ Pabloeʼ?
¿Bix jeʼel u bintoʼon utsil mantatsʼeʼ?
1, 2. 1) Yaʼab máakeʼ, ¿bix u yilik wa táan u bin utsil tiʼ máak? 2) ¿Baʼax unaj a beetik utiaʼal a wilik baʼax eʼesik tiʼ teech táan u bin utsil tiʼ máak?
¿BAʼAX eʼesik táan u bin utsil tiʼ máak? Wa k-kʼáatik tiʼ yaʼab máakeʼ jejeláas baʼax jeʼel u núukikoʼobeʼ. Yaʼabeʼ ku yaʼalikeʼ u ayikʼaltal máak, u kaʼantal u xook yéetel u yantal junpʼéel maʼalob meyaj tiʼ. Uláakʼoʼobeʼ ku yaʼalikoʼobeʼ wa ku biskuba máak yéetel u familia, u amigoʼob yéetel u yéet meyajoʼobeʼ, táan u bin utsil tiʼ. Yéetel juntúul máax meyajtik Dioseʼ maʼ xaaneʼ ku yaʼalik táan u bin utsil tiʼ ken tsʼaʼabaktiʼ junpʼéel nojoch meyaj teʼ múuchʼuliloʼ wa tu yoʼolal bix u bintiʼ teʼ kʼaʼaytajoʼ.
2 Techeʼ ¿bix a wilik wa táan u bin utsil tiʼ máak? Utiaʼal a wojéeltikeʼ tsʼíibt u kʼaabaʼ jujuntúul máax ka tuklik tsʼoʼok u bin utsil tiʼ, maases le ka tuklik minaʼan uláakʼ jeʼex letiʼoʼ. ¿Baʼaxoʼob yaan tiʼ tuláakloʼob? ¿Kʼaj óoltaʼanoʼob yaʼab tuʼux yéetel ayikʼaloʼob? ¿Jach yaan páajtalil tiʼob? Le baʼax ken a núukoʼ jeʼel u yeʼesik baʼax yaan ta puksiʼikʼaleʼ, yéetel letiʼe baʼax ken u péeksech a wil baʼax ken a beet ichil a kuxtaloʼ (Luc. 6:45).
3. 1) ¿Baʼax unaj u beetik kaʼach Josué utiaʼal u bin utsil tiʼ? 2) ¿Baʼax ken k-il beoraaʼ?
3 Maas unaj k-ilik k-lúubul utsil tiʼ Jéeoba, tumen chéen bey jeʼel u bintoʼon utsiloʼ. Le ka tu kʼubéentaj Dios tiʼ Josué ka u nuʼukt u yokol le israelitaʼob teʼ Luʼum Aʼalaʼan u Tsʼaʼabaloʼ tu yaʼalajtiʼ ka u xok «mantatsʼ» le Leyoʼ yéetel ka u beet baʼax ku yaʼalik. Tsʼoʼoleʼ tu yaʼalajtiʼ: «Tuláakal baʼax [ken a beeteʼ], bíin xiʼiktech utsil» (Jos. 1: 7, 8). Jeʼex k-ojliloʼ bin utsil tiʼ Josué. ¿Kux túun toʼon? ¿Bix jeʼel k-ojéeltik wa k-tuukul jeʼex Jéeoba tu yoʼolal le u bin utsil tiʼ máakoʼ? Utiaʼal k-ojéeltikeʼ koʼoneʼex tʼaan tiʼ kaʼatúul máax ku chʼaʼchiʼitaʼal teʼ Bibliaoʼ.
¿BIN WA UTSIL TIʼ SALOMÓN?
4. ¿Baʼaxten jeʼel u páajtal k-aʼalik bin utsil tiʼ Salomoneʼ?
4 Salomoneʼ jach bin utsil tiʼ jejeláas bixi. ¿Baʼaxten k-aʼalik? Tumen ichil yaʼab jaʼaboʼobeʼ tu yilaj u beetik baʼax uts tu tʼaan Jéeoba, yéetel sen kiʼikiʼtʼantaʼabi. Kʼaʼajaktecheʼ le ka tu yaʼalaj Dios tiʼ Salomón ka u kʼáat jeʼel baʼaxakeʼ, le reyoʼ tu kʼáataj naʼatil utiaʼal u nuʼuktik le kaajoʼ. Jéeoba túuneʼ maʼ chéen tu tsʼáajtiʼ naʼatiliʼ, baʼaxeʼ tak ayikʼalil (xokaʼak 1 Reyes 3:10-14). «Salomoneʼ píitmáan u yojéelajil tiʼ u kʼaj óolal le egipcioʼoboʼ yéetel tiʼ le j-lakʼiniloʼoboʼ.» Kʼuch tak u tsikbalil tiʼ «tuláakal le múuchʼ kaajoʼob[oʼ]» (1 Rey. 4:30, 31). Ku kʼamik xan maas tiʼ 22,000 kilos oro cada jaʼab (2 Cró. 9:13). Ku múul meyaj kaʼach yéetel uláakʼ luʼumiloʼob, tu beetaj nukuch najoʼob yéetel jach tu kanaj u beet negocio. Salomoneʼ jach bin utsil tiʼ le táan u meyajtik Diosoʼ (2 Cró. 9:22-24).
5. ¿Baʼax tu yaʼalaj Salomón tu yoʼolal le máaxoʼob jach tu jaajil ku bin utsil tiʼoboʼ?
5 Le baʼax tu tsʼíibtaj Salomón tu libroil Eclesiastesoʼ ku yeʼesik maʼ tu tuklaj wa chéen le máaxoʼob ayikʼal jeʼel u bin utsil tiʼob yéetel jeʼel u yantaltiʼob kiʼimak óolaloʼ. Letiʼeʼ tu yaʼalaj: «Teneʼ in wojleʼ baʼax maʼalob ku beet wíinikeʼ, ka u kiʼimakkúunt u yóol yéetel ka u tsʼáa uts tiʼ u kuxtal kaʼalikil kuxaʼan, tumen wa k-janal, yéetel [k-]ukʼul, [bey] xan [k-]ilik u yutsil tuláakal [k-]meyajeʼ, leloʼ chéen tumen [Dios] tsʼáa tiʼ toʼon» (Ecl. 3:12, 13). Tu yileʼ le baʼaloʼobaʼ chéen ku tsʼaʼabal u nib óolalil tumen le máaxoʼob uts yanikoʼob tu táan Jéeoba yéetel ku biskubaʼob tu yéeteloʼ. Jach jaaj le baʼax tu yaʼalaj le reyaʼ: «Tuláakal tsʼoʼok u yaʼalaʼal. Tsik [Dios], tsʼoʼokbes u yaʼalmajtʼaanoʼob, tumen leloʼ [le unaj u beetik] tuláakal [...] wíinik» (Ecl. 12:13).
6. Le baʼax ku yaʼalik le Biblia yoʼolal u kuxtal Salomonoʼ, ¿bix u yáantkoʼon k-il bix juntúul máax ku bin utsil tiʼ?
6 Salomoneʼ ichil yaʼab jaʼaboʼob tu yilaj u beetik baʼax u kʼáat Dios. Le Bibliaoʼ ku yaʼalikeʼ «u yaabiltmaj kaʼach Yuumtsil yéetel ku tsʼoʼokbesik le aʼalmajtʼaanoʼob tsʼaʼan tumen David u taata[oʼ]» (1 Rey. 3:3). Jach bin utsil tiʼ, tsʼoʼoleʼ yéetel u yáantaj Dioseʼ tu beetaj junpʼéel nojoch templo utiaʼal u jaajil adoración yéetel tu tsʼíibtaj óoxpʼéel u libroil le Bibliaoʼ. Kex maʼ tu páajtal k-beetik le baʼaxoʼob tu beetoʼ, lelaʼ unaj u yáantkoʼon k-il bix juntúul máax ku bin utsil tiʼ yéetel baʼax unaj k-beetik utiaʼal u bintoʼon utsil xan. Kʼaʼajaktecheʼ Dios tsʼáa tu tuukul Salomón utiaʼal ka u tsʼíibteʼ le ayikʼalil, le u kanik máak yaʼab baʼal, le u kʼaj óoltaʼal máak yaʼab tuʼux yéetel le páajtaliloʼ chéen kunel baʼaloʼob yéetel wa k-bin tu paachoʼobeʼ, bey ka k-óot «lapʼ iikʼeʼ». ¿Tsʼoʼok wa a wilkeʼ máax u yaabiltmaj taakʼineʼ ku tsʼíiboltik u maasil? U suukileʼ mix tu weenloʼob yoʼolal baʼax yaantiʼob, kex u jaajileʼ yaan u kʼuchul u kʼiinil u pʼáatal tiʼ yaanal máak (xokaʼak Eclesiastés 2:8-11, 17 yéetel 5:10-12).
7, 8. ¿Baʼax maʼ maʼalob tu beetaj Salomoniʼ, yéetel baʼax úuchtiʼ?
7 Ka máan kʼiineʼ Salomoneʼ náachchaj tiʼ Dios. Le Bibliaoʼ ku yaʼalik: «Le ka nuxibchaj Salomoneʼ beetaʼab u kʼéechel u puksiʼikʼal tumen u yatanoʼob utiaʼal u bin tu paach beetbil [diosoʼob], tumen maʼ jach u kʼububa kaʼach tiʼ Yuumtsil u [Dios], jeʼel bix tu kʼubilakuba David u taataeʼ. [...] Le baʼaloʼob tu beetaj Salomonoʼ kʼaas lúubik tu táan Yuumtsil» (1 Rey. 11:4-6).
8 Le oʼolal Jéeobaeʼ tu yaʼalajtiʼ: «Tu yoʼolal [...] maʼ xan ta tsʼoʼokbesaj u yaʼalmajtʼaaniloʼob le núuptʼaan tin waʼalaj tiʼ techeʼ, bíin [...] in luʼs tiʼ teech le [reinooʼ] utiaʼal ka in tsʼáa tiʼ juntúul a palitsil» (1 Rey. 11:11). Tu kʼaskúuntaj u kuxtal, tumen kex ku bin utsil tiʼ kaʼacheʼ, tu tsʼookeʼ tu beetaj baʼax maʼ uts tu tʼaan Jéeobaiʼ. Maʼ tu beetaj le baʼax maas kʼaʼabéetoʼ: u chúukpajal u yóol u meyajt Dios. Cada juntúul tiʼ toʼoneʼ maʼalob ku tukle: «¿In chʼaʼtukultmaj wa in kaanbal tiʼ le baʼax úuch tiʼ Salomón utiaʼal u binten utsiloʼ?».
JUNTÚUL MÁAX BIN UTSIL TIʼ
9. Utiaʼal le yóokʼol kaabaʼ, ¿maʼalob wa u bin kaʼach tiʼ Pablo?
9 Apóstol Pabloeʼ maʼ kuxlaj jeʼex Salomoneʼ. Letiʼeʼ maʼ kulaj tiʼ junpʼéel trono beetaʼan yéetel marfiliʼ mix múul jaan yéetel reyoʼobiʼ. Baʼaxeʼ tu muʼyajtaj wiʼij, ukʼaj, keʼel yéetel pʼáat yaan kʼiin minaʼan u nookʼ (2 Cor. 11:24-27). Le ka tu kʼamaj Jesús bey Mesíaseʼ, tu pʼataj tuláakal le páajtalil yaantiʼ ichil le judíoʼoboʼ, pʼektaʼab tumen u nuuktakil le judíoʼoboʼ, kʼaʼal cárcel, jaʼajatsʼaʼabi yéetel muruxtuntaʼabi. Pabloeʼ tu yaʼaleʼ letiʼ yéetel le máaxoʼob tsaypachtik Cristooʼ ku poʼochʼoloʼob, ku chʼaʼpachtaʼaloʼob yéetel ku yaʼalaʼal baʼax maʼ jaaj tu yoʼolaloʼobiʼ. Letiʼeʼ tu tsʼíibtaj: «[K-keʼetel] yéetel u sojolil yóokʼol kaab, bey wíinikoʼob mix baʼal u biilaloʼobeʼ» (1 Cor. 4:11-13).
10. ¿Baʼaxten jeʼel u tuklaʼal kaʼacheʼ Pabloeʼ maʼ u kʼáat ka xiʼik utsil tiʼiʼ?
10 Tu táankelmil Pablo, le kʼaj óoltaʼan kaʼach bey Saulooʼ, bey jach yaan u bin utsil tiʼeʼ. Maʼ xaaneʼ tumen síij ichil junpʼéel maʼalob familia yéetel kaʼansaʼab tumen Gamaliel, juntúul j-kaʼansaj jach kʼaj óolaʼan kaʼachi. Ka máan kʼiineʼ tu tsʼíibtaj: «Tu religión le judíoʼoboʼ, teneʼ maas táanil yanen kaʼach tiʼ yaʼab in wéet jaʼabiloʼob» (Gal. 1:14). U yojel kaʼach hebreo yéetel griego yéetel tumen kʼamaʼan bey romanoeʼ, yaʼab derechoʼob yaantiʼ yéetel yaʼab baʼaloʼob ku páajtal u beetik. Wa ka u chʼaʼtukult u bin utsil tiʼ teʼ yóokʼol kaabaʼ, maʼ xaaneʼ tsʼoʼok kaʼach u maas antal páajtalil yéetel ayikʼalil tiʼeʼ. Baʼaleʼ letiʼeʼ tu yéeyaj u beetik junpʼéel baʼax ku tuklik u maasil chéen jeʼel u beetaʼal tumen máax ku chokotal u pooleʼ; maʼ xaaneʼ yaan tak jujuntúul u láakʼtsiloʼob tukult beyoʼ. ¿Baʼaxten tu beetaj kex beyoʼ?
11. ¿Baʼaxoʼob jach ku tsʼáaik kaʼach u nib óolalil Pablo yéetel baʼax u chʼaʼtukultmaj kaʼachi, yéetel baʼaxten?
11 Pabloeʼ u yaabiltmaj kaʼach Jéeoba yéetel maas ku tsʼíiboltik u yantal maʼalob tu táan ke u ayikʼaltal wa u yilaʼal bey minaʼan uláakʼ jeʼex letiʼeʼ. Le ka tu kanaj u jaajileʼ, kʼuch u tsʼáa u nib óolalil le úuchik u kʼubik u kuxtal Jesusoʼ, le u páajtalil u meyajtaʼal Diosoʼ yéetel le u páajtalil u kuxtal máak teʼ kaʼan, kex le yóokʼol kaab mix tu beetik u cuentailoʼ. Tu naʼateʼ unaj u yeʼesaʼal maʼ jaaj wa Satanaseʼ jeʼel u náachkuntik jeʼel máaxak tiʼ Jéeobaeʼ (Job 1:9-11; 2:3-5). Kex jeʼel baʼaxak ka u muʼyajteʼ u chʼaʼtukultmaj u chúukpajal u yóol u meyajt Dios yéetel maʼ u náachtal tiʼ u jaajil, kex le máakoʼoboʼ maʼ tu yilkoʼob wa kʼaʼabéet utiaʼal u bin utsil tiʼ máak.
12. ¿Baʼaxten maʼalob ka a kʼub a wóol tiʼ Jéeoba?
12 ¿Bey wa a tuukul jeʼex Pablooʼ? Kex maʼ chéen chʼaʼabil u chúukpajal u yóol máak u meyajt Dioseʼ, k-ojleʼ Jéeobaeʼ jeʼel u kiʼikiʼtʼantikoʼoneʼ yéetel jeʼel k-antal maʼalob tu táaneʼ. Beyoʼ jach tu jaajil yaan u bintoʼon utsil (Pro. 10:22). Bejlaʼeʼ táan k-kʼamik yaʼab utsiloʼob yéetel ichil junpʼíit kʼiineʼ k-ojel yaan k-kʼamik u maasil (xokaʼak Marcos 10:29, 30). Le oʼolaleʼ maas maʼalob ka k-kʼub k-óol «tiʼ le kuxaʼan Jajal Diosoʼ máax tsʼáaiktoʼon tuláakal baʼal jach yaʼab utiaʼal [k-]utsil» ke tiʼ le ayikʼalil jach séeb u máanoʼ. Beyoʼ yaan k-beetik le baʼax tu yaʼalaj Pabloaʼ: «Yanak[teʼex] le ayikʼalil ku tsʼáaik tuʼux [a pʼáatleʼex jeetsʼel] maʼalob utiaʼal le kʼiinoʼob bíin taalakoʼ, yéetel bíin [a] mach[eʼex] le kuxtal minaʼan u xuuloʼ» (1 Tim. 6:17-19). Wa k-beetik beyoʼ, ichil cien, wa mil jaʼaboʼob wa tak u maasileʼ, yaan k-aʼalik: «¡Tin yéeyaj le bej jach tu jaajil ku beetik u bin utsil tiʼ máakoʼ!».
¿TUʼUX KA MUCHʼKÍINTIK A AYIKʼALIL?
13. ¿Baʼax tu yaʼalaj Jesús tu yoʼolal u muchʼkíintaʼal ayikʼalil?
13 Jesuseʼ tu yaʼalaj: «Maʼ a muchʼkíintikeʼex ayikʼaliloʼob way luʼumeʼ, tuʼux ku kʼaskúunaj kʼamas yéetel tuʼux ku kuuxumtal tuláakal baʼal, tuʼux xan ku paʼabal najoʼob tumen j-ookoloʼob utiaʼal u yookoloʼob. Baʼaleʼ muchʼkíinteʼex ayikʼaliloʼob teʼ kaʼanoʼ, tuʼux maʼ tu kʼaskúunaj kʼamas mix ku kuuxumtal mix baʼal, mix xan tu paʼabal najoʼob tumen j-ookoloʼob utiaʼal u yookoloʼob. Tumen tuʼux yaan a ayikʼalileʼexeʼ, tiʼ bíin yanak xan a puksiʼikʼaleʼexiʼ» (Mat. 6:19-21).
14. ¿Baʼaxten chéen kunel u muchʼkíintik máak «ayikʼaliloʼob way luʼumeʼ»?
14 Le ka tu yaʼalaj Jesús le «ayikʼaliloʼob way luʼumeʼ», maʼ chéen táan u tʼaan tiʼ taakʼiniʼ. Maʼ xaaneʼ jeʼel xan u tsʼíiboltik máak le baʼaloʼob tu yaʼalaj Salomonoʼ bey xan le baʼaxoʼob ku tuklik le yóokʼol kaab ku chíikbesik táan u bin utsil tiʼ máakoʼ, jeʼex le u kʼaj óoltaʼal máak yaʼab tuʼuxoʼ wa u yantaltiʼ páajtalil. Jesuseʼ tu yaʼaleʼ u ayikʼalil le yóokʼol kaabaʼ séeb u máan, lelaʼ chíikaʼan tiʼ le baʼax tu tsʼíibtaj le rey Salomón tu libroil Eclesiastesoʼ. Maʼ xaaneʼ techeʼ tsʼoʼok a wilkeʼ le baʼaloʼobaʼ séeb u máan, bey ku jóokʼol u xiikʼeʼ. Juntúul profesor ku kʼaabaʼtik Frederick D. Brunereʼ, tu tsʼíibtaj: «Jeʼex k-ojliloʼ juntúul máak jach kʼaj óolaʼan yaʼab tuʼuxeʼ ku kʼuchul u kʼiinil u tuʼubsaʼal. Juntúul máak u yáantmaj u maasileʼ séeb u tuʼubsaʼal xan. Junpʼéel negocio jach maʼalobeʼ tuláakʼ jaʼabeʼ ku kʼaʼalal. [...] Jesuseʼ u yaabiltmaj máak, le oʼolal utiaʼal maʼ u chiʼichnaktaleʼ ku yaʼalik maʼ u bin tu paach le baʼaloʼobaʼ. Maʼ u kʼáat ka muʼyajnak le máaxoʼob tsaypachtikoʼ. ‹Sáamsamaleʼ le yóokʼol kaabaʼ yaan máax ku luʼsik tu trono›». Kex yaʼab máak u yojel jaaj le baʼax tu yaʼaloʼ, láayliʼ ku binoʼob tu paacheʼ. ¿Baʼax ken a beet teech?
15. ¿Baʼax maas unaj k-ilik k-beetik?
15 Yaan tiʼ u nuuktakil le religionoʼoboʼ ku kaʼanskoʼobeʼ maʼ maʼalob u kaxtik máak u bin utsil tiʼiʼ. Baʼaleʼ Jesuseʼ maʼ tu yaʼalaj wa kʼaas leloʼ. Baʼaxeʼ tu yaʼalaj tiʼ u disipuloʼob ka u yil u muchʼkíintikoʼob «ayikʼaliloʼob teʼ kaʼanoʼ», tumen leloʼ maʼatech u saʼatal. Maas unaj k-ilik k-pʼáatal utsil tu táan Jéeoba. Le baʼax tu yaʼalaj Jesusoʼ ku kʼaʼajsiktoʼoneʼ jeʼel u páajtal k-yéeyik baʼax ken k-beeteʼ. U jaajileʼ yaan k-bin tu paach le baʼax yaan t-puksiʼikʼaloʼ wa le baʼax maas maʼalob k-ilkoʼ.
16. ¿Baʼax tu yaʼalaj Jesús maʼalob ka k-kʼub óolte?
16 Wa k-puksiʼikʼal ku tsʼíiboltik u lúubul utsil tu táan Jéeobaeʼ, letiʼeʼ yaan u tsʼáaiktoʼon baʼax kʼaʼabéet. Maʼ xaaneʼ yaan kʼiineʼ yaan u chaʼik k-muʼyajtik wiʼij wa ukʼaj jeʼex úuchik tiʼ Pabloeʼ (1 Cor. 4:11). Baʼaleʼ yéetel kʼub óolal k-beetik le baʼax tu yaʼalaj Jesusaʼ: «Maʼ a sen tuukuleʼex táan a waʼalikeʼex: ¿Baʼax k-bíin jaante? wa ¿Baʼax k-bíin ukʼe? wa ¿Baʼax k-bíin búukinte? Tumen u kajnáaliloʼob le yóokʼol kaabaʼ ku kaxtikoʼob tuláakal le baʼaloʼobaʼ, baʼaleʼ teʼexeʼ yaanteʼex juntúul Taata teʼ kaʼanoʼ u yojel kʼaʼabéetteʼex tuláakal le baʼaloʼobaʼ. Bey túunoʼ kaxteʼex táanil u [reino] Jajal Dios yéetel le toj kuxtal uts tu tʼaan letiʼoʼ, tuláakal túun le baʼaloʼobaʼ bíin tsʼaʼabakteʼex» (Mat. 6:31-33).
YANAKECH UTSIL TU TÁAN DIOS
17, 18. 1) ¿Baʼax unaj u beetik máak utiaʼal u bin utsil tiʼ? 2) ¿Baʼaxoʼob minaʼan mix baʼal u yil yéetel u bin utsil tiʼ máak?
17 Maʼ unaj u tuʼubultoʼoneʼ: juntúul máax ku bin utsil tiʼeʼ maʼ tu yilaʼal tu yoʼolal le baʼaloʼob yaantiʼoʼ mix tu yoʼolal le bix yanil teʼ yóokʼol kaabaʼ. Mix xan tu yoʼolal le meyaj ku beetik tu kaajal Diosoʼ, kex lelaʼ maʼ xaaneʼ yaan baʼax u yil yéetel le u bin utsil tiʼ máak jach tu jaajiloʼ: u yuʼubik máak u tʼaan Dios yéetel u chúukpajal u yóol u meyajte. Dioseʼ ku yaʼalik teʼ Bibliaoʼ: «Le máax kʼubéentaʼan wa baʼax tiʼeʼ unaj u yeʼesik u kʼubmaj u yóol tiʼ baʼax kʼubéentaʼantiʼ» (1 Cor. 4:2). Unaj u chúukpajal k-óol k-meyajt Dios, tumen Jesuseʼ tu yaʼalaj: «Le máax ku pʼáatal tiʼ teen tak tu xuuleʼ, letiʼ bíin [salvartaʼak]» (Mat. 10:22). ¿Máasaʼ le u salvarkuba máakoʼ ku chíikbesik tsʼoʼok u bin utsil tiʼ?
18 Ken tuukulnakoʼon tiʼ le baʼaloʼobaʼ, k-ilkeʼ le u chúukpajal u yóol máak u meyajt Diosoʼ minaʼan baʼax u yil yéetel le páajtaliloʼ, le bukaʼaj xook u beetmoʼ, le bukaʼaj taakʼin yaantiʼoʼ; mix tu yoʼolal u naʼat wa baʼax u yojel u beetoʼ. Tuláakloʼon jeʼel u páajtal u chúukpajal k-óol k-meyajt Dioseʼ. Ichil le máaxoʼob meyajt Dios teʼ yáax siglooʼ anchaj ayikʼaloʼob yéetel óotsiloʼob. Pabloeʼ tu yaʼalaj tiʼ le ayikʼaloʼob ka u tsʼáa u yóol u beetoʼob baʼax maʼalob, ka yaʼabchajak le baʼaloʼob maʼalobtak ku beetkoʼoboʼ yéetel mantatsʼ ka u síiʼob baʼaloʼob tiʼ u maasil jeʼex u síijil tu puksiʼikʼaloʼobeʼ. Kex ayikʼaloʼob wa óotsiloʼobeʼ jeʼel u páajtal kaʼach «u chich machkubaʼob tiʼ le kuxtal jach tu jaajil kuxtaloʼ, NM» (1 Tim. 6:17-19). Bejlaʼa xaneʼ láayliʼ beyoʼ. Yaantoʼon u páajtalil yéetel unaj u chúukpajal k-óol k-meyajt Dios yéetel «[k-ayikʼalchajal] tiʼ maʼalob meyajoʼob». Beyoʼ yaan u bintoʼon utsil tu táan le Máax beetmiloʼonoʼ yéetel yaan u kiʼimaktal k-óol tumen k-ojel maʼalob yaniloʼon tu táan (Pro. 27:11).
19. ¿Baʼax tsʼoʼok a chʼaʼtuklik a beetik utiaʼal u bintech utsil?
19 Maʼ xaaneʼ maʼ tu béeytal a jechik tuláakal le talamiloʼoboʼ, baʼaleʼ jeʼel u páajtal a wilik bix ken a aktáanteʼ. Ilawil u chúukpajal a wóol a meyajt Dios kex jeʼel baʼaxak ka a muʼyajte, tumen beyoʼ yaan a kʼamik yaʼab utsiloʼob. Yéetel Jéeobaeʼ yaan u kiʼikiʼtʼantkech bejlaʼeʼ yéetel utiaʼal mantatsʼ. Maʼ u tuʼubultech le baʼax tu yaʼalaj Jesús tiʼ le sukuʼunoʼob yéeyaʼanoʼoboʼ: «Chúukaʼanchajak a wóol tak tu kʼiinil a kíimil, teen túuneʼ bíin in tsʼáatech u [coronail] kuxtal» (Apo. 2:10). Beyoʼ yaan u páajtal k-aʼalik: ¡Bintoʼon utsil!
[U kʼáatchiʼiloʼob le xookoʼ]
[Foto yaan teʼ táan juʼun 6]
Tu táan wíinikeʼ bey jach yaan u bin utsil kaʼach tiʼ Sauloeʼ
[Foto yaan teʼ táan juʼun 7]
Pabloeʼ tu jaajil bin utsil tiʼ
