Yaan baʼax kʼubéentaʼantoʼon
Yaan baʼax kʼubéentaʼantoʼon
«Teʼexeʼ maʼ u yuumileʼex a wíinklileʼexiʼ.» (1 COR. 6:19)
¿BAʼAX JEʼEL A NÚUKIKEʼ?
Úuchjeakeʼ ¿baʼax meyajil ku beetik le máax tsʼaʼan u kanáant junpʼéel najoʼ?
¿Baʼaxoʼob kʼubéentaʼan tiʼ tuláakloʼon tumen Dios?
¿Bix unaj k-ilik le baʼaxoʼob kʼubéentaʼantoʼonoʼ?
1. ¿Baʼax ku tuklik yaʼab máak ken u yuʼub le tʼaan palitsiloʼ?
KEX óoliʼ dos mil quinientos jaʼaboʼob bejlaʼeʼ, juntúul griego ku tsʼíibtik dramaʼobeʼ tu yaʼalaj: «Mix máak uts tu tʼaan ka palitsiltaʼak». Tuláakal máax jeʼel u yaʼalik jaaj u tʼaan le máakaʼ. Ken k-uʼuy u yaʼalaʼal le tʼaan palitsiloʼ ku taal t-tuukul máakoʼob ku pechʼ óoltaʼaloʼob yéetel kʼaxaʼanoʼob, tsʼoʼoleʼ le meyaj ku beetkoʼoboʼ chéen ku jóoʼsaʼal u yutsil tumen le kʼasaʼan máakoʼob palitsilmiloʼoboʼ.
2, 3. 1) ¿Bix le kuuch ku yóotik u bis u j-meyajoʼob wa palitsiloʼob Cristooʼ? 2) ¿Baʼax kʼáatchiʼiloʼob ken k-núuk tu yoʼolal le meyaj kʼubéentaʼantoʼonoʼ?
2 Jesuseʼ tu yaʼaleʼ u disipuloʼobeʼ, j-meyajoʼob wa palitsiloʼob, baʼaleʼ maʼatech u mixbaʼalkúuntik mix tech u loobiltik le máaxoʼob tsaypachtikoʼ. Baʼaxeʼ ku beetik u yuʼubikubaʼob maʼalobil, maʼ saajkoʼobiʼ yéetel ku yeʼesaʼaltiʼob tsiikil. Koʼoneʼex ilik baʼax tu yaʼalaj Jesús jujunpʼéel kʼiinoʼob táanil tiʼ u kíimil; tu yaʼaleʼ yaan baʼax ken u kʼubéent tiʼ juntúul «palitsil chúukpajaʼan u yóol yéetel yaan u naʼat» (Mat. 24:45-47).
3 (Xokaʼak Lucas 12:42-44.) Le tʼaan sutaʼan «palitsil» teʼ tekstoʼobaʼ, ich griegoeʼ suʼut bey «juntúul máax ku kanáantik ayikʼalil». Bejlaʼeʼ óoliʼ tuláakal le máaxoʼob meyajtik Diosoʼ minaʼanoʼob ichil le u múuchʼ máakoʼob ku chíikbesaʼaloʼob tumen le palitsiloʼ, baʼaleʼ tuláakal le máaxoʼob meyajtik Diosoʼ yaan baʼax kʼubéentaʼantiʼob. ¿Baʼaxiʼ? Yéetel ¿bix unaj k-ilik? Utiaʼal k-ojéeltikeʼ koʼoneʼex ilik baʼax meyajil ku beetik le máaxoʼob kʼubéentaʼantiʼob wa baʼax úuchjeakoʼ.
LE MEYAJ KU BEETIK LE MÁAXOʼOB KU KʼUBÉENTAʼALTIʼOB WA BAʼAXOʼ
4, 5. Úuchjeakeʼ ¿baʼax meyajil ku beetik le máax tsʼaʼan u kanáant junpʼéel najoʼ? Aʼal máaxoʼob beet beyoʼ.
4 Úuchjeakeʼ juntúul palitsil ku kʼubik u yóol u tsʼuulil tiʼeʼ, ku kʼubéentaʼaltiʼ ka u kanáant u yotoch u tsʼuulil bey xan u ayikʼalil. U suukileʼ yaan páajtalil tiʼ, tumen ku tsʼaʼabal u kanáant u taakʼin yéetel u palitsiloʼob le tsʼuuloʼ. Jeʼex Abrahaneʼ tu kʼubéentaj tiʼ Eliezer tuláakal le baʼaxoʼob yaantiʼoʼ. Maʼ xaaneʼ letiʼ túuxtaʼab tumen u tsʼuulil tu luʼumil Mesopotamia utiaʼal u kaxtik juntúul koʼolel u yatant Isaak (Gén. 13:2; 15:2; 24:2-4).
5 José, u kaʼa áabil Abrahaneʼ, tu kanáantaj u yotoch Potifar (Gén. 39:1, 2). Ka máan kʼiineʼ Joseeʼ yanchaj xan juntúul máax kanáantik u yotoch, juntéenjeakeʼ le máax kanáantik u yotochoʼ tu kʼamaj diez u láakʼtsiloʼob José. Tu beetaj xan tuláakal le baʼax tu yaʼalaj u tsʼuulil tu yoʼolal le copa de plataoʼ. Jeʼex k-ilkoʼ juntúul tsʼuuleʼ maʼ chéen tiʼ jeʼel máax ku tsʼáaik u kanáant u yotochiʼ (Gén. 43:19-25; 44:1-12).
6. ¿Baʼax jejeláas meyajil kʼubéentaʼan tiʼ le ancianoʼoboʼ?
6 Ka máan kʼiineʼ apóstol Pabloeʼ tu yaʼaleʼ le ancianoʼoboʼ unaj u yilkoʼob «kʼubéentaʼan u baʼalubaʼob Jajal Dios [tiʼob]» (Tito 1:7). Tsʼaʼanoʼob utiaʼal u kanáantoʼob u «tamanoʼob Jajal Dios», le oʼolal ku nuʼuktikoʼob le múuchʼuliloʼoboʼ yéetel ku yeʼeskoʼob bix unaj u meyajtaʼal Dios (1 Ped. 5:1, 2). Chéen baʼaleʼ jejeláas meyaj ku beetkoʼob. U maas yaʼabil le ancianoʼoboʼ ku yáantajoʼob tiʼ junpʼéel múuchʼulil, baʼaleʼ le superintendente viajanteʼoboʼ ku yáantkoʼob yaʼab múuchʼuliloʼob. Yéetel le yanoʼob ichil le Comités tiʼ Sucursaloʼ ku nuʼuktikoʼob le múuchʼuliloʼob yaan tiʼ junpʼéel luʼumiloʼ. Baʼaleʼ tuláakloʼob ku páaʼtaʼal ka u tsʼoʼokbesoʼob baʼax kʼubéentaʼantiʼob, tumen yaan u kʼubkoʼob cuenta tiʼ Dios (Heb. 13:17).
7. ¿Baʼaxten jeʼel u páajtal u yaʼalaʼal tuláakloʼon yaan baʼax kʼubéentaʼantoʼoneʼ?
7 Baʼaleʼ ¿kux túun le máaxoʼob maʼ tsʼaʼan u beet u ancianoiloʼoboʼ? Apóstol Pedroeʼ tu yaʼalaj tiʼ tuláakal máax meyajtik Dios: «Cada juntúuleʼ ka u meyajt uláakʼ máakoʼob jeʼel bix le páajtalil tsʼaʼantiʼ tumen Jajal Diosoʼ, jeʼel bix máaxoʼob ku beetkoʼob u meyajoʼob maʼalob u jejeláas utsil siibal Jajal Dioseʼ» (1 Ped. 1:1; 4:10). Tu yoʼolal u yutsil Dioseʼ yaan baʼax u tsʼaamaj tiʼ tuláakloʼon jeʼel u meyaj utiaʼal k-áantik k-sukuʼunoʼobeʼ. Jeʼex k-ilkoʼ tuláakloʼon yaan baʼax u kʼubéentmajtoʼon Dios unaj k-tsʼoʼokbesik, baʼaleʼ kiʼimak k-óol tumen ku yeʼesik ku kʼubik u yóol tiʼ toʼon.
U TIAʼALOʼON DIOS
8. ¿Baʼax ku yaʼalik le Biblia jach unaj k-chʼaʼik en cuentaoʼ?
8 Beoraaʼ yaan k-ilik óoxpʼéel baʼal kun áantkoʼon k-tsʼoʼokbes le meyaj kʼubéentaʼantoʼonoʼ. Le yáaxoʼ, u tiaʼaloʼon Dios yéetel yaan k-kʼubik cuenta tiʼ. Pabloeʼ tu tsʼíibtaj: «Teʼexeʼ maʼ u yuumileʼex a wíinklileʼexiʼ, tumen nojoch u tojol maʼanikeʼex», lelaʼ letiʼe u kʼiʼikʼel Cristo tu kʼubaj bey siibaloʼ (1 Cor. 6:19, 20). U tiaʼaloʼon Jéeoba, le oʼolal unaj k-tsʼoʼokbesik baʼax ku yaʼalik tumen maʼ junpʼéel kuuch aal u bisaʼaliʼ (Rom. 14:8; 1 Juan 5:3). U palitsiloʼon xan Cristo. Jeʼex le máax kanáantik junpʼéel naj úuchjeakoʼ ku chaʼabal xan k-beetik yaʼab baʼal, baʼaleʼ maʼ utiaʼal k-beetik chéen baʼax k-kʼáatiʼ. Unaj k-beetik tuláakal baʼal jeʼex u yaʼalaʼaltoʼonoʼ. Jeʼel baʼaxak meyajil k-beetik teʼ múuchʼuliloʼ, maʼ unaj u tuʼubultoʼoneʼ u palitsiloʼon Dios yéetel Cristo.
9. ¿Baʼax tu beetaj Jesús utiaʼal u yeʼesik bix yanil juntúul palitsil tu táan u tsʼuulil?
9 Tiʼ junpʼéel kettʼaan tu beetaj Jesuseʼ tu yeʼesaj bix yanil juntúul palitsil tu táan u tsʼuulil. Tu tsikbaltaj tiʼ u disipuloʼob yoʼolal juntúul palitsil kʼuch tu yotoch le tsʼokaʼaniliʼ u meyaj bul kʼiinoʼ. ¿Aʼalaʼab wa tiʼ tumen u tsʼuulil: «Máanen, kulen janal»? Maʼ. Baʼaxeʼ tu yaʼalajtiʼ: «Nuʼukbes in janal, ilawil a meyajtiken kaʼalikil táan in janal yéetel táan in wukʼul; ku tsʼoʼokoleʼ ka janal yéetel ka wukʼul teech». Ka tsʼoʼokeʼ tu yaʼalaj Jesús: «Bey xan teʼex, le ken tsʼoʼokok a beetkeʼex tuláakal le baʼax ku yaʼalik Jajal Dioseʼ, aʼaleʼex: Palitsiloʼon mix baʼal k-biilal, tumen t-beetaj chéen le baʼax unaj k-beetkeʼ» (Luc. 17:7-10).
10. ¿Baʼax eʼesik Jéeobaeʼ maʼatech u tuʼubsik le bix k-tsʼáaik k-óol k-meyajtoʼ?
10 U jaajileʼ Jéeobaeʼ maʼatech u tuʼubsik le bix k-tsʼáaik k-óol k-meyajtoʼ. Le Bibliaoʼ ku yaʼalik: «Jajal Dioseʼ toj, yéetel maʼ bíin u tuʼubs le baʼax tsʼoʼok a beetkeʼexoʼ yéetel le yaakunaj tsʼoʼok a weʼeskeʼextiʼoʼ» (Heb. 6:10). Jéeobaeʼ maʼatech u píitmáan u kʼab yéetel baʼax ku kʼáatik. Maʼ junpʼéel kuuchiʼ yéetel utiaʼal k-utsil. Baʼaleʼ Jesuseʼ teʼ kettʼaan tu beetoʼ tu kaʼansajtoʼoneʼ juntúul palitsileʼ maʼatech u beetik chéen baʼax u kʼáat yéetel maʼ yáax u yutsil ku kaxtikiʼ. Ku kʼaʼajsiktoʼoneʼ ken k-kʼub k-kuxtal tiʼ Dioseʼ, k-aʼalik yaan k-tsʼáaik táanil k-meyajtik.
¿BAʼAX KU PÁAʼTIK JÉEOBA TIʼ TOʼON?
11, 12. Tumen yaan baʼax u kʼubéentmajtoʼon Dioseʼ, ¿baʼax modos unaj k-eʼesik, yéetel baʼax maʼ unaj k-beetkiʼ?
11 U kaʼapʼéeleʼ, tumen yaan baʼax kʼubéentaʼantoʼoneʼ, junpʼéeliliʼ baʼax ku kʼáataʼaltoʼon. U jaajileʼ yaan meyajoʼobeʼ chéen ku tsʼaʼabal tiʼ jujuntúul sukuʼunoʼob, baʼaleʼ u maas yaʼabileʼ ku tsʼaʼabal tiʼ tuláakal. Tumen k-tsaypachtik Cristo yéetel u j-jaajkunajoʼon Jéeobaeʼ jach kʼaʼabéet k-paklan yaabiltikba. Jesuseʼ tu yaʼaleʼ le yaabilajoʼ yaan u yeʼesik máaxoʼob jach tu jaajil tsaypachtik (Juan 13:35). Baʼaleʼ k-yaabiltmaj tak máaxoʼob maʼ tu meyajtikoʼob Dios. Le yaabilajaʼ tuláakloʼon jeʼel u páajtal k-eʼesikeʼ yéetel ku páaʼtaʼal ka k-beete.
12 Jéeobaeʼ ku páaʼtik ka k-beet baʼax maʼalob. Maʼ k-kʼáat beet le baʼaxoʼob ku bin tu contra le baʼax ku yaʼalik le Bibliaoʼ. Pabloeʼ tu yaʼalaj: «Maʼ bíin u tiaʼaltoʼob u [reino] Jajal Dios le máaxoʼob ku kʼaakʼas kuxtaloʼoboʼ, mix le ku [adorartikoʼob] beetbil [diosoʼoboʼ], mix le ku núupkʼebanoʼoboʼ, mix le ku núupkʼebantkubaʼob yéetel u yéet xiibiloʼoboʼ, mix le ku yookoloʼoboʼ, mix le ku tsʼíiboltkoʼob taakʼinoʼ, mix le ku káaltaloʼoboʼ, mix le ku yaʼalikoʼob baʼaloʼ, mix le ku tuusoʼoboʼ» (1 Cor. 6:9, 10). U jaajileʼ maʼ chéen chʼaʼabil u beetaʼal le baʼax ku yaʼalik Diosoʼ. Baʼaleʼ maʼ chéen kuneliʼ, tumen ku taasik yaʼab utsil. Maʼ tu tsaʼayaltoʼon kʼaakʼas kʼojaʼaniloʼob, k-bisikba maʼalob yéetel u maasil, tsʼoʼoleʼ kiʼimak k-óol tumen maʼalob yaniloʼon tu táan Dios (xokaʼak Isaías 48:17, 18).
13, 14. ¿Baʼax unaj u beetik tuláakal le cristianoʼoboʼ, yéetel bix unaj k-ilik?
13 Maʼ u tuʼubultoʼoneʼ jeʼex le máaxoʼob kanáantik junpʼéel naj úuchjeakoʼ, yaan baʼax tsʼaʼantoʼon yéetel yaan baʼax ku páaʼtaʼal tiʼ toʼon. Jéeobaeʼ u tsʼaamaj u páajtalil k-kʼaj óoltik u jaajil, lelaʼ junpʼéel baʼal jach koʼoj u tojol. Yéetel ku páaʼtik ka k-kaʼans tiʼ k-éet máakil (Mat. 28:19, 20). Pabloeʼ tu yaʼalaj: «Unaj a kʼamikoʼoneʼex chéen jeʼel bix u yáantajoʼob Cristo, máaxoʼob kʼubéentaʼantiʼob ka u kaʼansoʼob u taʼakbil baʼaloʼob Jajal Dios» (1 Cor. 4:1). Le apostoloʼ tu yaʼaleʼ le máaxoʼob kʼubéentaʼantiʼob «u taʼakbil baʼaloʼob» Dios, wa le u jaajil ku kaʼansik le Bibliaoʼ, unaj u tsʼáaik u yóol u kanáantoʼob yéetel u kaʼanskoʼob tiʼ u maasil jeʼex tu yaʼalil Jesucristo, le Tsʼuuloʼ (1 Cor. 9:16).
14 Letiʼe yaabilaj péeksikoʼon k-kaʼans u jaajiloʼ. Baʼaleʼ cada cristianoeʼ jejeláas baʼax ku aktáantik. Le oʼolal maʼ junpʼéeliliʼ bix u meyajtikoʼob Jéeobaiʼ yéetel letiʼeʼ ku naʼatik. Baʼax kʼaʼabéeteʼ, k-beetik tuláakal le ku páajtaleʼ. Beyoʼ k-eʼesik k-yaabiltmaj Dios bey xan u maasil, maʼ utiaʼal k-jóoʼsik wa baʼax utsiliʼ.
BAʼAXTEN UNAJ U CHÚUKPAJAL K-ÓOL
15-17. 1) ¿Baʼaxten jach unaj u chúukpajal u yóol le máax ku tsʼaʼabal u kanáant wa baʼaxoʼ? 2) ¿Bix tu yeʼesil Jesús baʼax jeʼel u yúuchul tiʼ máax maʼ tu chúukpajal u yóoleʼ?
15 U yóoxpʼéeleʼ jach yaan baʼax u yil yéetel u yáax kaʼapʼéeloʼ, unaj u chúukpajal k-óol k-meyajt Dios utiaʼal u páajtal u kʼubik u yóol tiʼ toʼon. Le máax ku kʼubéentaʼaltiʼ wa baʼaxoʼ kex jatsʼuts u modos yéetel yaʼab baʼax u yojleʼ, chéen kunel wa maʼ tu tsʼoʼokbesik u meyaj yéetel wa maʼ chúukaʼan u yóol u meyajt u tsʼuuliliʼ. Unaj chúukaʼan u yóol u beet le meyaj tsʼaʼantiʼoʼ. Kʼaʼajaktoʼon le baʼax tu yaʼalaj Pabloaʼ: «Le máax kʼubéentaʼan wa baʼax tiʼeʼ unaj u yeʼesik u kʼubmaj u yóol tiʼ baʼax kʼubéentaʼantiʼ» (1 Cor. 4:2).
16 Baʼax k-ojleʼ Jéeobaeʼ yaan u beetik u bintoʼon utsil wa ku chúukpajal k-óol, baʼaleʼ wa maʼeʼ yaan k-muʼyaj. Tu kettʼaanil le talentoʼoboʼ bey tu kaʼansil Jesusoʼ. Le tsʼuuloʼ tu yaʼalaj maʼalob baʼax tu beetaj le palitsiloʼob chúukpaj u yóoloʼob yéetel tu meyajtoʼob le taakʼinoʼ, tsʼoʼoleʼ tu tsʼáaj uláakʼ baʼaloʼob tiʼob. Baʼaleʼ tiʼ le palitsil maʼ tu beetaj le baʼax tu kʼubéentajtiʼoʼ, tu yaʼalaj: «Kʼaakʼas yéetel maʼakʼóol palitsil» yéetel «palitsil mix baʼal u biilal». Tu luʼsaj le taakʼin u tsʼaamajtiʼoʼ yéetel tu yaʼalaj ka jóoʼsaʼak píikchʼintbil (xokaʼak Mateo 25:14-18, 23, 26, 28-30).
17 Tiʼ uláakʼ kettʼaaneʼ Jesuseʼ tu yeʼesaj baʼax jeʼel u yúuchul tiʼ máak wa maʼ chúukaʼan u yóoliʼ, tu yaʼalaj: «Juntúul tsʼuuleʼ tu tsʼáaj juntúul máak kanáantik u ayikʼalil, baʼaleʼ tsikbaltaʼabtiʼeʼ táan u xuʼuxupaʼal u ayikʼalil tumen le máakoʼ. [Letiʼeʼ] tʼaʼan tumen u tsʼuulileʼ ka aʼalaʼabtiʼ: ¿Baʼax le ku yaʼalaʼalten ta woʼolalaʼ? Kʼubten le meyaj a beetmoʼ, tumen bíin u kaʼaj xuʼulul a kanáantik in ayikʼalil» (Luc. 16:1, 2). Tumen chéen bey tu xuʼuxupaj u ayikʼalil le tsʼuuloʼ, luʼsaʼab meyaj tiʼ. Lelaʼ ¡jach yaan baʼax ku kaʼansiktoʼon! Unaj k-beetik le baʼax ku kʼáatiktoʼon Jéeobaoʼ.
¿MAʼALOB WA K-KETIKBA YÉETEL U MAASIL?
18. ¿Baʼaxten maʼ maʼalob k-ketikba yéetel u maasiliʼ?
18 Kex cada juntúul maʼalob ka u yil bix táan u beetik le meyaj kʼubéentaʼantiʼoʼ, maʼ maʼalob u ketkuba yéetel u maasiliʼ. Le Bibliaoʼ ku yaʼaliktoʼon: «Cada juntúuleʼ u xíixt baʼax ku beetik yéetel maʼ unaj u ketik yéetel le baʼax ku beetik u yéet máakiloʼ. Beyoʼ yaan u kiʼimaktal u yóol yoʼolal le baʼaxoʼob tsʼoʼok u beetkoʼ» (Gal. 6:4, NM). Tu lugar k-ketik le baʼax k-beetik yéetel le baʼax ku beetik u maasiloʼ, unaj k-ilik baʼax jeʼel u páajtal k-beetik toʼoneʼ. Beyoʼ maʼ kun kaʼantal k-ich, mix kun lúubul k-óol. Ken k-il baʼax jeʼel u páajtal k-beetkeʼ unaj u kʼaʼajaltoʼon jeʼel u kʼexpajal xan k-kuxtaleʼ. Maʼ xaaneʼ tu yoʼolal kʼojaʼanil, chʼíijil yéetel uláakʼ baʼaloʼobeʼ maʼ kun béeytal k-beetik jeʼex kaʼacheʼ. Baʼaleʼ maʼ xaaneʼ jeʼel u páajtal k-beetik u maasileʼ. Wa ku béeytaleʼ maʼalob ka k-il k-beetik.
19. ¿Baʼaxten maʼ unaj u lúubul k-óol wa maʼ t-kʼamik junpʼéel meyaj k-tsʼíiboltikiʼ?
19 Maʼ unaj xan k-ketikba yéetel le máaxoʼob táan u beetkoʼob junpʼéel meyaj k-tsʼíiboltik k-beetik toʼonoʼ. Maʼ xaaneʼ juntúul sukuʼuneʼ taak u beetik u ancianoil teʼ múuchʼuliloʼ wa u máansik tsoltʼaanoʼob teʼ asambleaʼoboʼ. Maʼ kʼaas k-tsʼáaik k-óol utiaʼal k-beetik le baʼaloʼobaʼ, baʼaleʼ maʼ unaj u lúubul k-óol wa ku chan máan kʼiin maʼ tsʼaʼabaktoʼoniʼ. Maʼ xaaneʼ kex maʼ k-naʼatik baʼax oʼolaleʼ, maʼ kun séeb tsʼaabiltoʼon. Moiseseʼ jeʼel kaʼach u páajtal u jóoʼsik le israelitaʼob tu kaajil Egiptooʼ, baʼaleʼ anchaj u páaʼtik cuarenta jaʼaboʼob utiaʼal u beetik. Lelaʼ tu tsʼáaj tiempo utiaʼal u yantaltiʼ le jatsʼuts modos kʼaʼabéet utiaʼal u nuʼuktik junpʼéel kaaj chich u puksiʼikʼal yéetel maʼ tu yuʼubik tʼaanoʼ (Hch. 7:22-25, 30-34).
20. ¿Baʼax k-kanik tiʼ Jonatán?
20 Maʼ xaaneʼ jeʼel xan u pʼáatal maʼ u tsʼaʼabaltoʼon junpʼéel meyaj k-tsʼíiboltikeʼ. Lelaʼ bey úuchik tiʼ Jonatán, u hijo Saúl. Letiʼ kaʼach unaj u kʼuchul u beetuba u reyil u kaajil Israel, baʼaleʼ Dioseʼ tu yéeyaj David, juntúul máax maas táankelem. ¿Bix tu yilil Jonatán? Maʼ tsʼíikilnajiʼ yéetel tu yáantaj David kex u yojel jeʼel tak u kíimsaʼaleʼ. Kʼuch tak u yaʼaltiʼ: «Bíin kʼuchkech a bee[taba u reyil] Israel, teen bíin in beet in nojchil ta wéetel» (1 Sam. 23:17). Jonataneʼ tu kʼamaj le baʼax úuchoʼ, maʼ kʼuuxilnaj jeʼex tu beetil u taataoʼ. ¿Baʼax ku kaʼansiktoʼon lelaʼ? Ku kaʼansiktoʼoneʼ tu lugar k-tsʼíiboltik le baʼaxoʼob ku beetik u maasiloʼ, unaj k-ilik k-beetik tubeel le meyajoʼob tsʼaʼantoʼonoʼ. Tumen k-jach ojel teʼ túumben luʼumoʼ, Jéeobaeʼ yaan u tsʼáaik tuláakal le baʼax maʼalob ku tsʼíiboltik le máaxoʼob meyajtikoʼ.
21. ¿Bix unaj k-ilik le meyaj kʼubéentaʼantoʼonoʼ?
21 Kʼaʼajaktoʼoneʼ le táan k-beetik le baʼax kʼubéentaʼantoʼonoʼ maʼ t-obligartaʼal k-meyajt juntúul tsʼuul jach kʼasaʼan. Baʼaxeʼ Jéeobaeʼ u kʼubéentmajtoʼon junpʼéel nojoch yéetel jatsʼuts meyaj: k-kʼaʼaytik le maʼalob péektsil teʼ tu tsʼook kʼiinoʼobaʼ, lelaʼ junpʼéel baʼal mix bikʼin kun kaʼa úuchul. Tsʼoʼoleʼ maʼ tuláakal baʼal ku yaʼalaʼaltoʼon jach bix unaj k-beetkiʼ, baʼaxeʼ tsʼaʼantoʼon u páajtalil k-chʼaʼtuklik bix ken k-tsʼoʼokbesil. Le oʼolaleʼ unaj u chúukpajal k-óol k-beet le baʼax kʼubéentaʼantoʼonoʼ yéetel unaj k-ilik junpʼéel nojoch yéetel jatsʼuts meyaj le baʼax k-beetkoʼ, tumen táan k-meyajtik le Máax maas yaan u páajtaliloʼ.
[U kʼáatchiʼiloʼob le xookoʼ]
[Foto yaan teʼ táan juʼun 12]
Chúukpajak k-óol k-beet le baʼax kʼubéentaʼantoʼonoʼ
