Utiaʼal kaʼach u láakʼtsil Caifás
Yaan kʼiineʼ le baʼaloʼob ku kaxtik le arqueologoʼoboʼ ku yeʼesik jach anchaj le máaxoʼob ku yaʼalik le Bibliaoʼ. Yaan horaeʼ ku chíikpajal u kʼaabaʼob tiʼ úuchben baʼaloʼob wa ku chíikpajal u kʼaabaʼ u láakʼtsiloʼob. Bey úuchik yéetel junpʼéel baʼax tsʼaʼab ojéeltbil tumen u jaats investigadoroʼob tu jaʼabil 2011: junpʼéel osario (wa cofre) yaan dos mil jaʼaboʼob tiʼ. Lelaʼ beetaʼan yéetel tuunich tuʼux taʼakaʼan u baakel juntúul koʼolel.
Teʼ osariooʼ tsʼíibtaʼan: «Míriam, u hija Yeshúa u hijo Caifás, sacerdote tiʼ Maazías tiʼ Bet Imrí». Caifaseʼ letiʼe nojoch j-kʼiin táakpaj utiaʼal u pʼis óoltaʼal yéetel u kíimsaʼal Jesusoʼ (Juan 11:48-50). Tiʼ junpʼéel libro tu tsʼíibtaj le historiador Flavio Josefooʼ tu yaʼaleʼ le nojoch j-kʼiinaʼ «José, ku yaʼalaʼaltiʼ xan Caifás». K-ilik túuneʼ le osariooʼ utiaʼal kaʼach u láakʼtsil Caifás. Tiʼ uláakʼ junpʼéel osario kaxtaʼan, ku tuklaʼal utiaʼal Caifaseʼ, ku yaʼalik Yehosef bar Caiapha (José u hijo Caifás). * Lelaʼ ku yeʼesikeʼ Miriameʼ maʼ xaaneʼ juntúul u láakʼtsil Caifás.
Le Autoridad tiʼ Antigüedades tiʼ Israeloʼ (IAA, junpʼéel bix u tsʼíibtaʼal ich inglés) ku yaʼalikeʼ le osariooʼ toʼok tiʼ u jaats j-ookoloʼob. Letiʼobeʼ tu yokloʼob tiʼ junpʼéel úuchben muknal. Yaʼab baʼax beetaʼab utiaʼal u yilaʼal wa úuchben le cofre yéetel le baʼax tsʼíibtaʼanoʼ. Ka tsʼoʼokeʼ ilaʼab jaaj úuchben.
Le osariooʼ tu yeʼesaj junpʼéel baʼax maʼ ojéelaʼan kaʼachiʼ. Tu yeʼeseʼ úuchjeakeʼ tu kaajil Israeleʼ jóoʼsaʼan 24 u jaatsal tiʼ le j-kʼiinoʼoboʼ yéetel tiʼ jejeláas horaʼob ku yookloʼob meyaj teʼ templo yaan Jerusalenoʼ. U tsʼook u jaatsoʼ nuʼuktaʼan tumen Maazías (1 Cró. 24:18). Le IAA ku yaʼalikeʼ le baʼax tsʼíibtaʼan teʼ cofreoʼ ku yeʼesik «u familia Caifaseʼ tiaʼan ichil le [j-kʼiinoʼob] nuʼuktaʼanoʼob tumen Maazíasoʼ».
Teʼ cofreoʼ ku yaʼalik xan «Bet Imrí». Le IAA ku yaʼalikeʼ maʼ xaaneʼ kaʼapʼéel baʼal u kʼáat u yaʼale. Yáaxeʼ «u kʼaabaʼ junpʼéel familia j-kʼiinoʼob, u paalal Imer (Esdras 2:36-37; Nehemías 7:39-42), teʼ chʼiʼibalaʼ tiʼ u taal le [j-kʼiinoʼob] nuʼuktaʼanoʼob tumen Maazíasoʼ». U kaʼapʼéeleʼ «letiʼe tuʼux u taal le máax kimenoʼ wa tuʼux u taal u familia». Kex jaaj le baʼax ku yaʼalaʼal wa maʼoʼ, le osariooʼ ku yeʼesik jach anchaj le máaxoʼob ku yaʼalik le Bibliaoʼ yéetel ku taaloʼob tiʼ familiaʼob jach anchajaʼan.
^ xóot’ol 3 Utiaʼal a wojéeltik u maasil yoʼolal u osario Caifaseʼ ilawil le xook ku kʼaabaʼtik «El sumo sacerdote que condenó a Jesús» tiʼ U Pʼíich Tulumil Kanan 15 tiʼ enero tiʼ 2006, táan juʼun 10 tak 13.
Maʼ xaaneʼ jeʼel u yutstal xan ta wicheʼ
ULÁAKʼ BAʼALOʼOB
Junpʼéel baʼax eʼesik jach anchajaʼan le rey Davidoʼ
Yaan máakoʼobeʼ ku yaʼalikoʼobeʼ le rey Davidoʼ maʼ anchajaʼaniʼ chéen bin jóoʼsaʼan u tsikbalil. ¿Yaan wa uláakʼ baʼax eʼesik jach anchajaʼan le reyaʼ?
