¿Baʼax ken a beet ‹beora tsʼoʼok a kʼaj óoltik Diosaʼ›?
«Beoraaʼ a kʼaj óoleʼex Jajal Dios.» (GAL. 4:9)
1. ¿Baʼaxten juntúul pilotoeʼ unaj u beetik baʼax yaan tiʼ junpʼéel lista táanil tiʼ u beetik u líikʼil junpʼéel avión?
TÁANIL tiʼ u líikʼil junpʼéel tiʼ le avionoʼob maas maʼalobtak yanoʼ, juntúul pilotoeʼ ku meyajtiʼ junpʼéel lista utiaʼal u checartik maas tiʼ treinta baʼaloʼob tiʼ le avionoʼ. Wa maʼ tu beetkeʼ maʼ xaaneʼ jeʼel u lúubuleʼ. ¿A wojel wa tiʼ máaxoʼob maases ku yaʼalaʼal ka u yiloʼob tuláakal le baʼaxoʼob yaan teʼ listaoʼ? Tiʼ le máaxoʼob maas jach u yojloʼob le meyajaʼ. ¿Baʼaxten? Tumen le maas yaʼab u viajaroʼoboʼ jeʼel u tuklikoʼob maʼalob yanil le avionoʼ yéetel maʼ xaaneʼ maʼ tu láaj beetkoʼob baʼax ku yaʼalik le listaoʼ.
2. ¿Baʼax unaj u yilik u beetik mantatsʼ máax meyajtik Dios?
2 Jeʼex juntúul piloto ku beetik maʼalob u meyajeʼ, toʼoneʼ maʼalob xan ka k-beet junpʼéel lista utiaʼal k-ilik wa muʼukʼaʼan yanil k-fe kex jeʼel baʼaxak ka k-aktáanteʼ. Wa táant k-okjaʼ wa tsʼoʼok u yúuchtaleʼ, maʼalob ka k-il mantatsʼ wa muʼukʼaʼan k-fe bey xan bix k-meyajtik Jéeoba. Wa maʼ t-beetkeʼ jeʼel k-náachtal tiʼ Dioseʼ. Le Bibliaoʼ ku yaʼalik: «Le máax ku tuklik waʼalakbal maʼalobeʼ u kanáant maʼ u lúubul» (1 Cor. 10:12).
3. ¿Baʼax unaj u beetik kaʼach le sukuʼunoʼob yaan Galaciaoʼ?
3 Le sukuʼunoʼob yaan kaʼach Galaciaoʼ kʼaʼabéet u yilkoʼob wa muʼukʼaʼan u fejoʼob yéetel u tsʼáaikoʼob u nib óolalil tumen ku béeytal u meyajtikoʼob Dios. Le máaxoʼob tu tsʼáaj u fejoʼob tiʼ u kuxtal Jesús tu kʼuboʼ bey jeʼekʼabtaʼabtiʼob junpʼéel bej utiaʼal u maas kʼaj óoltikoʼob Dioseʼ: ¡jeʼel tak u páajtal u kʼaʼamloʼob bey u paalaloʼobeʼ! (Gal. 4:9.) Utiaʼal maʼ u peʼertikoʼob le páajtalilaʼ, le galaciailoʼoboʼ maʼ unaj u kʼamkoʼob le baʼax ku yaʼalik jujuntúul tiʼ le máaxoʼob yaan teʼ múuchʼuliloʼ. Letiʼobeʼ ku yaʼalikoʼobeʼ unaj u beetaʼal baʼax ku yaʼalik u Ley Moisés. Baʼaleʼ le máaxoʼob yanoʼob kaʼach tu múuchʼulil galaciaoʼ mix juntéen anchajaʼanoʼob yáanal u páajtalil le Leyaʼ tumen maʼ judíoʼobiʼ. Le judíoʼob yéetel le maʼ sijnáaloʼob judíoʼoboʼ utiaʼal u maas meyajtikoʼob Dioseʼ, unaj u yojéeltikoʼobeʼ maʼ kun antaloʼob maʼalobil tu táan Dios chéen ikil u beetaʼal baʼax ku yaʼalik u Ley Moisés.
BAʼALOʼOB UNAJ K-BEETIK UTIAʼAL K-KʼAJ ÓOLTIK DIOS
4, 5. ¿Baʼax tsolnuʼukil tu tsʼáaj Pablo tiʼ le sukuʼunoʼob yaan Galaciaoʼ, yéetel baʼaxten unaj k-chʼaʼik en cuenta?
4 Le tsolnuʼukoʼob tu tsʼáaj apóstol Pablo tiʼ le sukuʼunoʼob yaan Galaciaoʼ yaan baʼax oʼolal tsʼíibtaʼab teʼ Bibliaoʼ. Beetaʼab utiaʼal maʼ u náachtal le máaxoʼob meyajtik Dios tiʼ u jaajil kaʼansaj yéetel ka suunakoʼob tiʼ le baʼaloʼob tsʼoʼok u pʼatkoʼoboʼ. Yáanal u nuʼuktaj Jéeobaeʼ, Pabloeʼ tu líiʼsaj u yóol tuláakal máaxoʼob meyajtik Dios utiaʼal u chúukpajal u yóoloʼob, maʼ chéen le múuchʼuliloʼob yaan Galaciaoʼ.
5 Unaj k-kʼaʼajsik bix jáalkʼabtaʼabikoʼon tiʼ le kaʼansajoʼob maʼ jaajtakoʼ yéetel bix káajik k-meyajtik Jéeoba. Le kaʼapʼéel kʼáatchiʼobaʼ jeʼel u yáantkoʼoneʼ: ¿Kʼajaʼan wa tech baʼax anchaj a beetik utiaʼal u béeytal a wokjaʼ? ¿Kʼajaʼan wa tech bix káajik a kʼaj óoltik Dios yéetel bix káajik a biskaba tu yéetel, le oʼolal kiʼimakchaj a wóol tumen a wojel táan a beetik baʼax maʼalob?
6. ¿Baʼax listail ken k-xakʼalte?
6 U suukileʼ tuláakloʼon k-beetik le nueve baʼaloʼob táakaʼanoʼob tiʼ le lista ku chíikpajal teʼ cuadro: « Baʼaloʼob ku beetik máak utiaʼal u yokjaʼ yéetel u seguer u meyajtik Dios». K-kʼaʼajsik le nueve baʼaloʼobaʼ yaan u yáantkoʼon utiaʼal maʼ k-kaʼa suut teʼ yóokʼol kaabaʼ. Juntúul pilotoeʼ utiaʼal u bin utsil tiʼ ken viajarnakeʼ táanil ku seguertik junpʼéel lista utiaʼal u checartik le avionoʼ. Toʼon xaneʼ utiaʼal maʼ u xuʼulul k-meyajtik Dioseʼ unaj k-seguertik junpʼéel lista utiaʼal k-ilik bix táan k-meyajtik Dios.
MAʼ U XUʼULUL A KAANBAL YÉETEL TSʼÁA A WÓOL A MAAS MEYAJT DIOS
7. ¿Baʼax unaj k-tʼilkúunsik t-tuukul, yéetel baʼaxten?
7 Le lista ku seguertik le pilotooʼ ku kʼaʼajsiktiʼ tuláakal le baʼaxoʼob unaj u beetik táanil tiʼ u líikʼil le avionoʼ. Toʼon xaneʼ jeʼel u páajtal k-ilik bix táan k-meyajtik Dioseʼ bey xan le baʼaxoʼob tsʼoʼok k-beetik desde ka okjaʼanajoʼonoʼ. Pabloeʼ tu yaʼalaj tiʼ Timoteo: «Tʼilkúuns ta tuukul le maʼalob kaʼansaj in tsʼaamajtechoʼ, yéetel kuxlen tiʼ le oksaj óolal yéetel le yaakunaj yaantoʼon tiʼ Cristo Jesusoʼ» (2 Tim. 1:13). «Le maʼalob kaʼansa[jaʼ]» tiaʼan teʼ Bibliaoʼ (1 Tim. 6:3). Jeʼex juntúul máak ken u yil u wíinklil junpʼéel naj ku taal tu tuukul bix kun pʼáatal ken tsʼoʼokkeʼ, ken u kan máak baʼax ku kaʼansik le Bibliaoʼ ku taal xan tu tuukul baʼax ku páaʼtik Dios ka u beete. Le oʼolaleʼ koʼoneʼex kʼaʼajsik le baʼaxoʼob t-beetaj utiaʼal k-okjaʼoʼ yéetel koʼoneʼex ilik wa táan k-beetik baʼax ku yaʼalik le Bibliaoʼ.
8, 9. 1) ¿Baʼaxten unaj u seguer k-ilik u maas yantaltoʼon kʼaj óolal yéetel fe? 2) ¿Baʼaxten unaj k-ilik k-maas tsʼáaik k-óol k-meyajt Dios, yéetel baʼaxten chíikaʼan tiʼ u nojochtal junkúul cheʼ?
8 Le yáax baʼax yaan teʼ listaoʼ letiʼe u kʼaʼabéetil u yantaltoʼon kʼaj óolaloʼ. Tsʼoʼoleʼ unaj u yantaltoʼon fe. Baʼaleʼ maʼ chéen tu káajbaliʼ, baʼaxeʼ mantatsʼ unaj k-ilik u maas yantaltoʼon le kaʼapʼéel baʼaloʼobaʼ (2 Tes. 1:3). Utiaʼal u maas yantaltoʼon kʼaj óolal yéetel fejeʼ yaan baʼaxoʼob unaj u seguer k-beetik, bey ka nojochchajkoʼoneʼ. Le oʼolal ken tsʼoʼokok k-okjaʼeʼ unaj k-ilik k-maas meyajtik Dios.
Junkúul cheʼeʼ maʼ tu xuʼulul u nojochtal. Bey xan juntúul máax meyajtik Dioseʼ maʼ unaj u xuʼulul u kaanbaliʼ
9 Le bix k-tsʼáaik k-óol k-meyajt Diosoʼ jeʼel u páajtal k-ketik yéetel junkúul cheʼ ku nojochtaleʼ. Junkúul cheʼeʼ jeʼel u nojoch cheʼetaleʼ, maases wa taam u moots bey xan wa nojoch tuʼux ku jayik u moots. Yaan jujunkúul tiʼ u cedroiloʼob Líbanoeʼ ku chukik tak 37 metros u kaʼanlil, u mootsoʼobeʼ chowak yéetel taam yanil tsʼoʼoleʼ u polkil u chuuneʼ ku chukik kex 12 metros (Cant. de Cant. 5:15). Tu káajbaleʼ séeb u jáajan nojochtal, baʼaleʼ ken tsʼoʼokkeʼ jujunpʼíitil u nojochtal. Cada jaʼabeʼ ku maas poloktal u chuun yéetel ku maas jayik u moots, le oʼolal maʼ tu jáan lúubul. Toʼon xaneʼ ken káajak k-xokik le Bibliaoʼ k-jáajan beetik baʼax k-kanik tak ken okjaʼanakoʼon; maʼ xaaneʼ séeb k-beetik tak baʼax ku kʼáataʼal utiaʼal k-beetikba precursoril wa utiaʼal u tsʼaʼabaltoʼon uláakʼ meyaj ichil u kaajal Dios. Le sukuʼunoʼob teʼ múuchʼuliloʼ ku kiʼimaktal u yóoloʼob ken u yiloʼob le baʼaxoʼob k-beetkoʼ. Baʼaleʼ ken máanak kʼiineʼ maʼ xaaneʼ maʼ jach chíikaʼan u yilaʼal bix k-tsʼáaik k-óol k-meyajt Diosiʼ. Baʼaleʼ unaj u seguer k-ilik u yantaltoʼon fe yéetel kʼaj óolal tak ken pʼáatkoʼon bey «máakoʼob tsʼoʼok u chúukaʼan chʼíijiloʼob, keet yéetel u chúukaʼan kaʼanlil Cristo[eʼ]» (Efe. 4:13). Beyoʼ k-pʼáatal jeʼex junkúul cheʼ muʼukʼaʼan yéetel nojocheʼ.
10. ¿Baʼaxten tak le máax úuch joʼopʼok u meyajtik Dios unaj u seguer u kaanbaloʼ?
10 Baʼaleʼ maʼ chéen letiʼe unaj k-beetkoʼ. Unaj u maas yantaltoʼon kʼaj óolal yéetel k-maas muʼukʼaʼankúuntik k-fe, beyoʼ maas yaan k-beetik baʼax ku yaʼalik le Bibliaoʼ bey ka táabak k-moots tiʼeʼ (Pro. 12:3). Yaʼab sukuʼunoʼobeʼ tsʼoʼok u beetkoʼob beyoʼ. Juntúul sukuʼun maas tiʼ 30 jaʼaboʼob joʼopʼok u beetik u ancianoileʼ tu yaʼaleʼ tak bejlaʼa maʼ tu xuʼulul u kaanbaleʼ. Letiʼeʼ tu yaʼalaj: «Bejlaʼeʼ maas in yaabiltmaj baʼax ku kaʼansik le Bibliaoʼ. Sáamsamaleʼ kin wilik jejeláas bix jeʼel in tsʼáaik ichil in kuxtaleʼ. Cada kʼiin ku máaneʼ maas kiʼimak in wóol in meyajtik Dios».
ILAWIL A MAAS BISKABA YÉETEL DIOS
11. ¿Bix jeʼel k-maas kʼaj óoltik Jéeoba jeʼex u máan le kʼiinoʼoboʼ?
11 Unaj xan k-maas bisikba yéetel Jéeoba yéetel k-ilik bey k-Taataeʼ. Letiʼeʼ u kʼáat ka k-uʼuy yaabiltaʼanoʼon yéetel kanáantaʼanoʼon, jeʼel bix u yuʼubikuba juntúul chan paal méekʼaʼan tumen u taataeʼ wa jeʼel bix k-uʼuyikba tu yiknal juntúul k-amigoeʼ. Baʼaleʼ utiaʼal k-bisikba yéetel Jéeobaeʼ kʼaʼabéet u máan tiempo, tumen jujunpʼíitil u bin k-kʼaj óoltik yéetel k-maas yaabiltik. Le oʼolaleʼ chʼaʼtukult a jóoʼsik u súutukil a xokik sáamsamal le Bibliaoʼ. Xok xan tuláakal le revistaʼob U Pʼíich Tulumil Kanan, ¡Despertad! yéetel u maasil jóoʼsaʼaniloʼoboʼ.
12. ¿Baʼax unaj k-beetik utiaʼal k-maas bisikba yéetel Jéeoba?
12 Le máaxoʼob ku payalchiʼob tu jaajil u yóoloʼob yéetel yaantiʼob maʼalob amigoʼoboʼ ku tsʼáaik u yóoloʼob u maas meyajtoʼob Dios (xok Malaquías 3:16). Jéeobaeʼ «ku yuʼubik u payalchiʼob» (1 Ped. 3:12). Jeʼex juntúul taatatsil ku chʼenxikintik baʼax ku yaʼalik u paalaleʼ, Jéeobaeʼ ku chʼenxikintik k-payalchiʼob. Le oʼolal unaj ‹k-payalchiʼ mantatsʼ› (Rom. 12:12). Wa minaʼantoʼon u yáantaj Dioseʼ jeʼel u xuʼulul k-tsʼáaik k-óol k-meyajteʼ. Chéen t-juunaleʼ maʼ tu béeytal k-aktáantik le nukuch talamiloʼob ku yantaltoʼonoʼ. Kʼaʼabéet maʼ u xuʼulul k-payalchiʼ utiaʼal u seguer k-kʼamik le páajtalil utiaʼal k-aktáantik le talamiloʼoboʼ. Jéeobaeʼ taak u tsʼáaiktoʼon le páajtalilaʼ yéetel jeʼel u béeytal u beetkeʼ. Techeʼ bix a wilik, ¿unaj wa a maas maʼalobkíintik bix a payalchiʼ? (Jer. 16:19.)
13. ¿Baʼaxten utiaʼal u béeytal k-maas meyajtik Dioseʼ kʼaʼabéet k-muchʼikba yéetel uláakʼ sukuʼunoʼob?
13 Le ‹máaxoʼob ku yoksik u yóoloʼob› tiʼ Jéeobaoʼ ku lúubloʼob utsil tiʼ letiʼ. Le oʼolal kex tsʼoʼok k-kʼaj óoltik Dioseʼ unaj u seguer k-muchʼikba yéetel le máaxoʼob u naatsʼmubaʼob xan tiʼ Diosoʼ (Nah. 1:7). Teʼ yóokʼol kaab tuʼux yaʼab baʼaloʼob jeʼel u lúuʼsik k-óoleʼ, maʼalob ka k-bisba yéetel sukuʼunoʼob jeʼel u yáantkoʼoneʼ. ¿Baʼax utsiloʼob jeʼel k-kʼamkeʼ? Teʼ múuchʼuliloʼ yaan sukuʼunoʼob jeʼel u yáantkoʼon k-beet baʼax maʼalobeʼ yéetel k-eʼesik yaabilaj (Heb. 10:24, 25). Utiaʼal u yantal le yaabilaj tu yaʼalaj Pablo tiʼ le sukuʼunoʼob hebreoʼoboʼ, unaj u yantal máaxoʼob ku muchʼkubaʼob adorar wa junpʼéel múuchʼulil. Jeʼex k-ilkoʼ utiaʼal u yeʼesik máak le yaabilajaʼ unaj u muchʼkuba yéetel uláakʼ sukuʼunoʼob. Teʼ lista t-aʼalaj tu káajbaloʼ, ilawil wa táan a beetik le tuʼux ku yaʼalik unaj a bin muchʼtáambal yéetel a táakpajloʼ.
14. ¿Baʼaxten ku yaʼalaʼal mantatsʼ unaj k-arrepentir yéetel u xuʼulul k-beetik baʼaxoʼob maʼ maʼalobtakiʼ?
14 Utiaʼal k-meyajtik Dios jeʼex uts tu tʼaaneʼ, anchaj k-arrepentir yéetel u xuʼulul k-beetik baʼaloʼob maʼ maʼalobtakiʼ. Lelaʼ mantatsʼ unaj k-beetik, tumen le kʼebanoʼ bey juntúul kaan u kotsʼmuba táan u páaʼtik u chiʼikoʼoneʼ (Rom. 3:9, 10; 6:12-14). Maʼ u náayal k-óol, unaj k-ilik wa yaan baʼax maʼ maʼalob táan k-beetkiʼ. U maʼalobileʼ Jéeobaeʼ ku chúukpajal u yóol u páaʼt k-kʼexik k-kuxtal (Fili. 2:12; 2 Ped. 3:9). Jach jeʼel u yáantkoʼon wa k-ilik baʼax k-beetik yéetel k-tiempo yéetel k-ilik bix u meyajtoʼon le baʼaxoʼob yaantoʼonoʼ. Unaj u xuʼulul xan k-kaxtik chéen k-utsil. Juntúul kiikeʼ ku yaʼalik: «Líikʼen ichil junpʼéel familia ku meyajtik Dios, baʼaleʼ kaʼacheʼ maʼatech in wilik Jéeoba jeʼex u yilaʼal tumen u maasiloʼ. Kin sajaktal ken tuukulnaken tiʼ letiʼ yéetel kin tuklik mix bikʼin in lúubul utsil tiʼ». Ka máan kʼiineʼ le kiikaʼ óolak xuʼuluk u meyajtik Dios yoʼolal baʼaxoʼob tu muʼyajtaj. Ku seguer u yaʼalik: «Maʼ wa tumen maʼ in yaabiltmaj Jéeobaiʼ, baʼaxeʼ tumen maʼ in kʼáaj óolt kaʼachiʼ. Baʼaleʼ ka tsʼoʼok in sen payalchiʼ yéetel u jaajil in wóoleʼ, káaj in wuʼuyik bey u machmen Jéeoba tin kʼab jeʼex juntúul chan paaleʼ. Tin wuʼuyaj tu yáanten yéetel yaabilaj in aktáant cada junpʼéel tiʼ le baʼaxoʼob kin muʼyajtikoʼ yéetel tu yeʼesajten baʼax unaj in beetik».
15. ¿Baʼax ku yilik Jesús yéetel u Taata?
15 Juntúul u ángel Dioseʼ tu yaʼalaj tiʼ Pedro yéetel tiʼ u maasil apostoloʼob le ka tsʼoʼok u jáalkʼabtaʼaloʼob: «Tsikbalteʼex tiʼ le máakoʼob» le maʼalob péektsiloʼ (Hch. 5:19-21). Uláakʼ baʼax yaan teʼ lista tsʼoʼok k-aʼalikoʼ letiʼe maʼ u máan junpʼéel semana maʼ k-jóokʼol kʼaʼaytajoʼ. Jesús yéetel u Taataeʼ táan u yilkoʼob bix yanil k-fe yéetel bix k-tsʼáaik k-óol meyajtoʼob (Apo. 2:19). Le anciano tsʼoʼok k-yáax chʼaʼchiʼitik teʼ xookaʼ, ku yaʼalik: «Le kʼaʼaytajoʼ ku tsʼáaik u biilal k-kuxtal».
16. ¿Baʼaxten unaj k-kʼaʼajsik le kʼiin ka t-kʼubaj k-kuxtal tiʼ Jéeobaoʼ?
16 Kʼaʼajs le kʼiin ka ta kʼubaj a kuxtal tiʼ Jéeobaoʼ. Le bisbail yaantoʼon yéetel Jéeobaoʼ letiʼe baʼax maas maʼalob yaantoʼonoʼ. Letiʼeʼ u kʼaj óol máaxoʼob meyajtik (xok Isaías 44:5). Payalchiʼinen utiaʼal a wilik bix a biskaba tu yéetel. Kʼaʼajs xan u kʼiinil ka okjaʼanajech, tumen beyoʼ maʼ kun tuʼubultecheʼ bey ta weʼesil tu táan u maasil le baʼax maas kʼaʼanaʼan tsʼoʼok a chʼaʼtuklik a beetkoʼ.
LE CHÚUKAʼAN ÓOLALOʼ KU YÁANTKOʼON UTIAʼAL MAʼ K-NÁACHTAL TIʼ JÉEOBA
17. ¿Baʼaxten unaj u chúukpajal k-óol utiaʼal maʼ u xuʼulul k-meyajtik Jéeoba?
17 Teʼ carta tu tsʼíibtaj Pablo tiʼ le galaciailoʼoboʼ, tu yeʼesaj u kʼaʼanaʼanil u chúukpajal u yóoloʼob (Gal. 6:9). Bejlaʼeʼ unaj xan u chúukpajal u yóol máax meyajtik Dios. Ken a aktáant talamiloʼobeʼ yaan u yáantkech Jéeoba. Maʼ u xuʼulul a kʼáatik u kiliʼich muukʼ. Yaan u líikʼil a wóol ken u luʼs muʼyajil utiaʼal u tsʼáaik kiʼimak óolal bey xan ken u luʼs chiʼichnakil utiaʼal u tsʼáaik jeetsʼelil (Mat. 7:7-11). Maʼ u tuʼubultecheʼ wa Jéeoba ku kanáantik le chʼíichʼoʼoboʼ, maas yaan u kanáantkech tumen a yaabiltmaj yéetel a kʼubmaj a kuxtal tiʼ letiʼ (Mat. 10:29-31). Jeʼel baʼaxak ka a aktáanteʼ maʼ u lúubul a wóol ka tak xuʼuluk a meyajtik Jéeoba. Jeʼex k-ilkoʼ ¡táaj yaʼab utsiloʼob k-kʼamik ikil k-bisikba yéetel Jéeoba!
18. ‹Beora tsʼoʼok a kʼaj óoltik Diosaʼ›, ¿baʼax unaj a beetik?
18 Le oʼolaleʼ wa maʼ úuch a kʼaj óolt Dios yéetel okjaʼanakecheʼ, ¿baʼax unaj a beetik beoraaʼ? Unaj u seguer a kʼaj óoltik Jéeoba yéetel a maas meyajtik. ¿Kux túun wa úuch okjaʼanakech? Unaj xan u seguer a maas kʼaj óoltik Jéeoba. Maʼ u náayal a wóol, ilawil a maas biskaba tu yéetel. Cada wa baʼax kʼiineʼ xakʼalt le baʼaxoʼob yaan teʼ lista t-aʼaloʼ utiaʼal a wilik wa táan a maas biskaba yéetel Jéeoba, k-Taata, k-Amigo yéetel k-Dios (xok 2 Corintoiloʼob 13:5, 6).
