YOʼOLAL u temploil Jerusaleneʼ, Jesuseʼ tu yaʼaleʼ «mix junpʼéel tuunich tu yóokʼol uláakʼ tuunich» kun pʼáatliʼ. Le profecíaaʼ béeychaj ka xuʼulsaʼab tiʼ Jerusalén tumen u soldadoiloʼob Roma tu jaʼabil 70 tsʼoʼokok u taal Jesús, nuʼuktaʼanoʼob tumen Tito (Mat. 24:2). Ka máan kʼiineʼ emperador Julianoeʼ tu yóotaj u jel beet le templooʼ.

Ku yaʼalaʼaleʼ Juliano, u sobrino Constantino el Grande, letiʼe u tsʼook u emperadoril Roma maʼ cristianooʼ. Kex kaʼansaʼab bey «cristianoeʼ», ka beetaʼab emperadoril tu jaʼabil 361, tu tsʼáaj ojéeltbil maʼ tu kʼamik u religión le cristianoʼob ku beetkoʼob baʼaloʼob kʼaastak teʼ kʼiinoʼoboʼ ka tu tsʼáajuba tu tséel le maʼ jaajil religionoʼoboʼ. Le oʼolal ichil yaʼab libroʼobeʼ ku yaʼalaʼaltiʼ: «Apóstata».

Julianoeʼ tu pʼektaj u religión le cristianoʼoboʼ, maʼ xaaneʼ tumen le yaan seis jaʼaboʼob tiʼoʼ tu yilaj u kíimsaʼal u taata yéetel u láakʼtsiloʼob tumen le máaxoʼob ku yaʼalikubaʼob cristianoʼoboʼ. Yaʼab máaxoʼob kaʼanchajaʼan u xookoʼobeʼ ku yaʼalikoʼobeʼ Julianoeʼ tu yaʼalaj tiʼ le judíoʼob ka u jel beetoʼob le templooʼ, tumen taak u yeʼesik Jesuseʼ maʼ jaaj wa profetaiʼ. *

U jaajileʼ Julianoeʼ u kʼáat kaʼach u jel beet le templooʼ. Baʼaleʼ maʼ ojéelaʼan wa káaj u jel beetaʼaliʼ, yéetel wa káajeʼ, maʼ ojéelaʼan baʼaxten xuʼuliʼ. Chéen ojéelaʼan kíim Juliano mix kaʼapʼéel jaʼab káajak u gobernar, yéetel maʼ béeychaj le baʼax u tukultmoʼ.