Yaʼab kaajoʼob úuchjeakileʼ ku chʼuykíintkoʼob jujuntúul kʼasaʼan máakoʼob utiaʼal u kíimloʼob tiʼ junpʼéel cheʼ. Kaʼacheʼ le romanoʼoboʼ ku kʼaxkoʼob wa ku bajkoʼob tiʼ junpʼéel cheʼ, jeʼel tak u máan yaʼab kʼiinoʼob ken kíimik yoʼolal u muʼyaj, yoʼolal ukʼaj, yoʼolal wiʼij wa yoʼolal uláakʼ baʼal. Tumen táaj suʼtsil u kíimil máak beyaʼ, chéen ku beetkoʼob tiʼ le máaxoʼob jach kʼasaʼanoʼoboʼ.

Baʼaleʼ ¿bey wa u beetik kaʼach le israelitaʼoboʼ? Le Ley tsʼaʼab tiʼ Moisesoʼ ku yaʼalik: «Wa juntúul máak ku xotʼkʼíintaʼal kíimil chʼuykíintbil tiʼ junkúul cheʼ [...] tumen yanchaj junpʼéel u nojoch siʼipileʼ, u wíinklileʼ, maʼ unaj u pʼáatal bul áakʼab teʼeloʼ, baʼaleʼ yaan u muʼukul láayliʼ tiʼ le kʼiinoʼ» (Deu. 21:22, 23). Jeʼex k-ilkoʼ tu kʼiinil le Ley tsʼaʼab tiʼ Moisesoʼ yáaxeʼ ku kíimsaʼal le kʼasaʼan máakoʼ, tsʼoʼoleʼ ku chʼuykíintaʼal tiʼ junpʼéel cheʼ wa tiʼ junkúul cheʼ.

Tu yoʼolal lelaʼ Levítico 20:2, ku yaʼalik: «Jeʼel máax ichiloʼob, wa jeʼel máaxak j-táanxel luʼumil kajnáal Israel ka kʼuchuk u kʼub juntúul tiʼ u paalal tiʼ [dios] Moloqueʼ, unaj u kíimsaʼal yéetel chʼiin tumen u kajnáaliloʼob le luʼumoʼ». Le máaxoʼob «ku yokol pixan tiʼob wa ku beetik u j-meenil wa u x-meenileʼ» unaj xan u kíimsaʼaloʼob beyoʼ (Lev. 20:27).

Deuteronomio 22:23 yéetel 24, ku yaʼalik xan: «Wa juntúul x-chʼúupal tsʼaʼan u tʼaanil tsʼoʼokol beel tiʼ tumen juntúul xiib, ku naktáantaʼal tumen uláakʼ xiib teʼ kaaj ku chital yéeteloʼ, tu kaʼatúulal bíin bisaʼakoʼob tu táan u j-pʼis óoliloʼob le kaajoʼ, teʼeloʼ bíin xotʼkʼíintaʼakoʼob kíimil yéetel chʼiin: le x-chʼúupaloʼ tumen maʼ tu kʼáataj áantaj kex tiʼ yaan tiʼ junpʼéel kaajiʼ, le xiiboʼ tumen tu [mixbaʼalkúuntaj] u yatan u láakʼ. Beyoʼ ka luʼskeʼex le kʼaas yaan ichileʼex[oʼ]». Jeʼex k-ilkoʼ maas suuk u muruxtuntaʼal le máaxoʼob ku beetkoʼob baʼaloʼob jach kʼaastakoʼ. *

Deuteronomio 21:23, ku yaʼalik: «Loolobtʼantaʼan tumen [Dios] le máax ku kíimil chʼuyukbal tiʼ junkúul cheʼ». U chʼuykíintaʼal juntúul máax kʼasaʼan, «loolobtʼantaʼan tumen [Dios]», tiʼ junpʼéel cheʼ wa tiʼ junkúul cheʼeʼ, ku yeʼesik tiʼ le israelitaʼob baʼax jeʼel u yúuchul tiʼ máax kʼasaʼanoʼ.