Yaʼab baʼaxoʼob eʼesik angeloʼob. ¿Baʼaxoʼobiʼ?

Génesis 6:2 ku yaʼalik: «U paalal [Dioseʼ] tu yiloʼob kiʼichpantak le koʼoleloʼob[oʼ]. Ka túun tu yéeyajoʼob utiaʼal u tsʼoʼokol u beeloʼob, [...] jeʼex tu yóotoʼobeʼ».

Ka yáax tsʼíibtaʼab le Kiliʼich Tsʼíiboʼob ich Hebreooʼ, le tʼaan «u paalal u jaajil Dios» yéetel «u paalal Diosoʼ» ku chíikpajal tiʼ Génesis 6:2, 4; Job 1: 6; 2:1; 38:7 yéetel Salmo 89:6. Teʼ bibliaʼob ich mayaoʼ chéen ku chíikpajal tiʼ Génesis 6:2 yéetel 4. ¿Baʼax ku yaʼalik le tekstoʼob yoʼolal «u paalal [Diosoʼ]»?

Le «u paalal u jaajil Dios» ku yaʼalik Job 1:6, angeloʼob muchʼukbaloʼob tu táan Dios. Ichiloʼobeʼ tiaʼan Satanasiʼ, máax ku xíimbaltik kaʼach tuláakal yóokʼol kaab (Job 1:7; 2:1, 2). Job 38:4 tak 7, ku yaʼalik xaneʼ papaxkʼabnaj yéetel kiʼimak óolal «u paalal Dios» ka tu yiloʼob u tsʼaʼabal u «tuunichil u chuun pakʼil» le Luʼumaʼ. Le u paalal Dios ku yaʼalikoʼ angeloʼob, tumen teʼ kʼiinoʼoboʼ maʼ beetaʼak wíinikiʼ. Tsʼoʼoleʼ le «u paalal Dios» ku yaʼalik Salmo 89:6, angeloʼob yanoʼob yiknal Dios teʼ kaʼanoʼ, maʼ máakoʼobiʼ.

¿Máaxoʼob túun le «u paalal [Dios]» ku yaʼalik Génesis 6:2 yéetel 4? Yoʼolal baʼax tsʼoʼok k-ilik teʼ Bibliaoʼ jeʼel u páajtal k-aʼalikeʼ angeloʼob yanoʼob kaʼach teʼ kaʼan éemoʼob way Luʼumeʼ.

Yaan máaxoʼob maʼ tu jach creertikoʼob wa anchaj angeloʼob tu tsʼíiboltaj u yantal baʼax u yiloʼob yéetel koʼoleloʼob, tumen Jesuseʼ tu yaʼaleʼ teʼ kaʼanoʼ mix máak ku tsʼíiboltik u yantal baʼax u yil yéetel mix máak, mix tu tsʼoʼokol u beel (Mateo 22:30). Baʼaleʼ úuchjeakileʼ anchaj angeloʼob tu sutubaʼob bey wíinikeʼ, tsʼoʼoleʼ múul jaanoʼob yéetel ukʼulnajoʼob yéetel máakoʼob (Gén. 18: 1-8; 19: 1-3). Le oʼolal ka tu sutuba le angeloʼob bey wíinikeʼ páajchaj u yantal baʼal u yiloʼob yéetel koʼoleloʼob.

Le Bibliaoʼ ku yeʼesik baʼaxten jeʼel u páajtal u yaʼalaʼal jach bey úuchikoʼ. Judas 6 yéetel 7, ku ketik u kʼeban u kajnáaliloʼob kaʼach Sodoma, máaxoʼob «binoʼob tu paach u tsʼíibolal u bakʼeloʼob utiaʼal u beetkoʼob yéetel u wíinkliloʼob baʼaloʼob maʼ bey tsʼaʼanil tumen Diosiʼ», yéetel u kʼeban «le angeloʼob xan maʼ pʼáatoʼob teʼ tuʼux tsʼaʼaboʼob tu káajbal, baʼaxeʼ lukʼoʼob teʼ tuʼux unaj u kajtaloʼoboʼ». Le angeloʼob yéetel u kajnáaliloʼob Sodomaeʼ junpʼéeliliʼ baʼax tu beetoʼob, «sen núupkʼebanchajoʼob. Letiʼobeʼ binoʼob tu paach u tsʼíibolal u bakʼeloʼob utiaʼal u beetkoʼob yéetel u wíinkliloʼob baʼaloʼob maʼ bey tsʼaʼanil tumen Diosiʼ». U yáax tsʼíib Pedro 3:19 yéetel 20, ku yaʼalikeʼ le angeloʼob maʼ tu yuʼuboʼob tʼaanoʼ anchajoʼob «tu kʼiiniloʼob Noé» (2 Ped. 2:4, 5). Le oʼolaleʼ le baʼax tu beetaj le angeloʼob tu kʼiiniloʼob Noeoʼ chíikaʼan tiʼ baʼax tu beetaj u kajnáaliloʼob Sodoma yéetel Gomorra.

Jeʼex k-ilkoʼ le «u paalal [Dios]» ku yaʼalik Génesis 6:2 yéetel 4, angeloʼob tu sutubaʼob bey wíinikeʼ, utiaʼal u yantal baʼax u yiloʼob yéetel koʼoleloʼob, le oʼolal ku yaʼalaʼal tu beetoʼob baʼaloʼob maʼ bey tsʼaʼanil tumen Diosiʼ.

Apóstol Pedroeʼ tʼaanaj tiʼ angeloʼob «maʼ tu yuʼuboʼob u tʼaan Dios úuchjeakil, tu kʼiiniloʼob Noé le táan u páaʼtaj Dios yéetel chúukaʼan óolaloʼ» (1 Ped. 3:20). Letiʼeʼ táan u tʼaan kaʼach tiʼ le angeloʼob tu tsʼáajubaʼob tu tséel Satanasoʼ. Judaseʼ tu yaʼaleʼ «le angeloʼob xan maʼ pʼáatoʼob teʼ tuʼux tsʼaʼaboʼob tu káajbal, baʼaxeʼ lukʼoʼob teʼ tuʼux unaj u kajtaloʼoboʼ, kʼaʼaxoʼob tumen Dios yéetel cadenaʼob junpuliʼ maʼ tu páajtal u tʼoʼokloʼob yéetel tsʼaʼaboʼob ich éeʼjochʼeʼenil tak ken kʼuchuk u noj kʼiinil le juiciooʼ» (Jud. 6).

¿Baʼax maʼ maʼalob tu beetaj le kʼasaʼan angeloʼob tu kʼiiniloʼob Noeoʼ? Táanil tiʼ le Búulkabaloʼ tu sutubaʼob bey wíinik, kex maʼ Dios aʼal ka u beetoʼobiʼ (Gén. 6:2, 4). Tsʼoʼoleʼ anchaj baʼax u yiloʼob yéetel koʼoleloʼob, kex maʼ beetaʼanoʼob utiaʼal leloʼ (Gén. 5:2). Le angeloʼob maʼ tu yuʼuboʼob tʼaanoʼ yaan u xuʼulsaʼaloʼob teʼ kʼiin u chʼaʼtukultmaj Diosoʼ. Baʼaleʼ le maʼ kʼuchuk le kʼiinoʼ, jeʼex tu yaʼalaj Judaseʼ, bey tiaʼanoʼob «ich éeʼjochʼeʼenil[eʼ]», wa bey kʼalaʼanoʼob tumen Dioseʼ.

¿Baʼax kʼiin ka kʼaʼaytajnaj Jesús tiʼ le «kʼasaʼan angeloʼob kʼalaʼanoʼoboʼ», yéetel bixi? Pedroeʼ ku yaʼalikeʼ tsʼoʼok u «kaʼa kuxkíintaʼa[l] yéetel junpʼéel kaʼanilbeʼen wíinklil» ka tu beetaj (1 Ped. 3:18, 19). Tsʼoʼoleʼ tu yaʼaleʼ kʼaʼaytajnajtiʼob. Leloʼ ku yeʼesik úuch táanil tiʼ u tsʼíibtik Pedro u yáax carta. U kʼáat u yaʼaleʼ tsʼokaʼaniliʼ u kaʼa kuxkíintaʼal Jesús ka tu kʼaʼaytaj tiʼ le kʼasaʼan angeloʼob le castigo ku náajmatkoʼoboʼ. Maʼ junpʼéel esperanza tu kʼaʼaytajtiʼobiʼ, baʼaxeʼ junpʼéel juicio (Jon. 1:1, 2). Jesuseʼ jeʼel u páajtal u yaʼalik kaʼach baʼax kun úuchultiʼobeʼ. Tumen yoʼolal u fe, yoʼolal chúukpajik u yóol tak ka kíimi yéetel úuchik u kaʼa kuxtaleʼ tu yeʼeseʼ minaʼan yáanal u páajtalil le Kʼaasilbaʼaloʼ (Juan 14:30; 16:8-11).

Yaan u kʼuchul u kʼiinileʼ Jesuseʼ yaan u kʼaxik Satanás yéetel yaan u píikchʼintik teʼ taamkach chʼeʼen paʼteʼ yéetel le kʼasaʼan angeloʼoboʼ (Luc. 8:30, 31; Apo. 20:1-3). Le maʼ kʼuchuk le kʼiinaʼ le angeloʼob maʼ tu yuʼuboʼob tʼaanoʼ bey tiaʼanoʼob «ich éeʼjochʼeʼenil[eʼ]», chéen táan u páaʼtik u xuʼulsaʼaltiʼob (Apo. 20:7-10).