¿Kʼajaʼan wa tech?
¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:
¿Baʼax le bibliomanciaoʼ yéetel bix unaj u yilik máax meyajtik Dios?
Letiʼe u jáan jeʼekʼabtik máak le Biblia utiaʼal u xokik le yáax teksto ken u yiloʼ, tumen ku tuklik bey u nuʼuktaʼal u kuxtaloʼ. Máaxoʼob meyajtik Dioseʼ maʼ tu kaxtikoʼob chíikulaloʼob, baʼaxeʼ ku xakʼalxoktikoʼob le Biblia utiaʼal u yantaltiʼob chúukaʼan kʼaj óolal yéetel ku chaʼik u nuʼuktaʼaloʼob tumen Dios (15/12, táan juʼun 3).
¿Baʼax le «yóokʼol kaab» kun xuʼulsbiloʼ?
Letiʼe máakoʼob maʼ tu kuxtaloʼob jeʼex u yaʼalik Diosoʼ (1 Juan 2:17). Le Luʼum yéetel máaxoʼob meyajtik Dioseʼ maʼ kun xuʼulsbiloʼob (1/1, táan juʼun 5 tak 7).
Wa kimen Abeleʼ, ¿baʼaxten ku yaʼalaʼal láayliʼ ku tʼaaneʼ? (Heb. 11:4.)
Ken kaanbalnakoʼon tiʼ letiʼ yéetel ken k-beet jeʼex letiʼeʼ k-uʼuyik bey ku tʼankoʼoneʼ. Le fe tu yeʼesoʼ tak bejlaʼa kuxaʼaneʼ (1/1, táan juʼun 12).
¿Baʼaxoʼob maʼ unaj k-chaʼik u náachkuntkoʼon tiʼ Jéeobaiʼ?
Baʼaloʼob jeʼex: k-meyaj, bix k-náaysik k-óol, bix k-bisikba yéetel k-láakʼtsiloʼob jóoʼsaʼanoʼob teʼ múuchʼuliloʼ, chiʼichnakil yoʼolal k-toj óolal, tecnología, taakʼin yéetel u tuklik máak maas maʼalob bix u tuukul wa bix u meyaj tiʼ u maasil (15/1, táan juʼun 12 tak 21).
¿Baʼax ku kaʼansiktoʼon le kabal óolal tu yeʼesaj Moisesoʼ?
Letiʼeʼ maʼ tu nojbaʼalkúuntuba yoʼolal le páajtalil yaantiʼoʼ, baʼaxeʼ tu kʼubaj u yóol tiʼ Dios. Toʼon xaneʼ maʼ unaj k-nojbaʼalkúuntikba yoʼolal k-muukʼ, k-páajtalil wa baʼaxoʼob k-ojel k-beetiʼ, baʼaxeʼ unaj k-kʼubik k-óol tiʼ Jéeoba (Pro. 3:5, 6) (1/2, táan juʼun 5).
¿Tuʼux kun kajtal le máaxoʼob kun kaʼa kuxkíintbiloʼ?
Le 144,000, yaan u binoʼob kaʼan. Baʼaleʼ u maas yaʼabileʼ yaan u kaʼa kuxkíintaʼaloʼob utiaʼal u kuxtaloʼob mantatsʼ way Luʼumeʼ (1/3, táan juʼun 6).
¿Baʼaxten aʼalaʼab «j-maʼ oksaj óol» le israelitaʼoboʼ? (Jer. 9:26.)
U puksiʼikʼaloʼobeʼ pʼáat maʼ tu yuʼubik tʼaan, le oʼolal unaj u kʼexik bix u tuukuloʼob yéetel baʼax ku tsʼíiboltkoʼob ku bin tu contra baʼax uts tu tʼaan Dios (Jer. 5:23, 24) (15/3, táan juʼun 9 yéetel 10).
¿Baʼax kiʼimakkúunt u yóol Jesús?
Tu yilaj u béeykuntik baʼax u kʼáat Jéeoba. Tu jach yaabiltaj u Taata bey xan u maasil máakoʼob. U yojel yaabiltaʼan tumen u Taata. Lelaʼ jach kʼaʼabéet utiaʼal u kiʼimaktal u yóol máak (1/4, táan juʼun 4 yéetel 5).
¿Máaxoʼob táakaʼanoʼob ichil u kaajal Jéeoba way Luʼumeʼ?
Le Cuerpo Gobernanteoʼ, le Comiteʼob tiʼ Sucursaloʼ, le superintendente viajanteʼoboʼ, le múuchʼ ancianoʼoboʼ, le múuchʼuliloʼoboʼ yéetel le j-kʼaʼaytajoʼoboʼ (15/4, táan juʼun 29).
¿Baʼax eʼesik maʼ píitmáan le castigoʼob tu tsʼáaj Diosoʼ?
Jéeobaeʼ maʼ u kʼáat u xuʼuls le kʼasaʼan máakoʼoboʼ (Eze. 33:11). Le baʼaxoʼob u beetmaj úuchjeakiloʼ ku yeʼesikeʼ yoʼolal u yaabilajeʼ táanil tiʼ u taasik junpʼéel castigoeʼ ku yaʼalik tiʼ wíinik. Lelaʼ ku yeʼesiktoʼon jeʼel k-salvartikba ken u taas le castigooʼ (1/5, táan juʼun 5 yéetel 6).
Le israelitaʼob kaʼachoʼ, ¿ku chʼuykíintkoʼob wa le kʼasaʼan máakoʼob utiaʼal u kíimloʼob tiʼ junpʼéel cheʼoʼ?
Maʼatech, baʼaleʼ uláakʼ kaajoʼobeʼ bey u beetkoʼob kaʼachoʼ. Tu kʼiinil le Ley tsʼaʼab tiʼ Moisesoʼ yáaxeʼ ku kíimsaʼal le kʼasaʼan máakoʼ, maʼ xaaneʼ ku muruxtuntaʼal (Lev. 20:2, 27). Tsʼoʼoleʼ ku chʼuykíintaʼal tiʼ junpʼéel cheʼ utiaʼal u yeʼesaʼal baʼax jeʼel u yúuchul tiʼ máax kʼasaʼaneʼ (15/5, táan juʼun 13).
¿Baʼaxten jach talam u yantal jeetsʼelil way Luʼumeʼ?
Kex yaʼab nukuch baʼaloʼob tsʼoʼok u beetik wíinikeʼ, maʼ beetaʼan utiaʼal u nuʼuktikuba tu juunaliʼ (Jer. 10:23). U túulisil yóokʼol kaabeʼ tiaʼan yáanal u páajtalil Satanaseʼ. Le oʼolal wíinikeʼ mix bikʼin ken u taas jeetsʼelil (1 Juan 5:19) (1/6, táan juʼun 16).
